Ժողովքը ինչպէ՞ս կազմակերպուած է

Եհովան կարգուկանոնի Աստուած է (Ա. Կորնթացիս 14։33, 40)։ Ուստի, կ’ակնկալենք որ իր ժողովուրդը կազմակերպուած ըլլայ։ Քրիստոնէական ժողովքը ինչպէ՞ս կազմակերպուած է։ Եւ ինչպէ՞ս կրնանք անոր թիկունք կանգնիլ։

1. Ո՞վ է ժողովքին գլուխը

«Քրիստոս ժողովքին գլուխն է» (Եփեսացիս 5։23, ՆԱ)։ Ան երկինքէն կ’առաջնորդէ Եհովայի ժողովուրդին գործունէութիւնները համայն աշխարհի մէջ։ Յիսուս նշանակեց «հաւատարիմ ու իմաստուն ծառան»,– փորձառու երէցներու պզտիկ խումբ մը, որ նաեւ կը կոչուի Կառավարիչ մարմին (կարդա՛ Մատթէոս 24։45-47)։ Կառավարիչ մարմինը բոլոր ժողովքներուն ուղղութիւններ կու տայ, ճիշդ ինչպէս որ առաջին դարուն, Երուսաղէմի մէջ գտնուող առաքեալները եւ երէցները ըրին (Գործք 15։2)։ Բայց Կառավարիչ մարմինի անդամները մեր կազմակերպութեան առաջնորդները չեն։ Անոնք առաջնորդութեան համար Եհովային ու իր Խօսքին կը դիմեն եւ Յիսուսի գլխաւորութիւնը կ’ընդունին։

2. Երէցներուն դերը ի՞նչ է

Երէցները հասուն քրիստոնեաներ են, որոնք Սուրբ Գիրքէն կը սորվեցնեն եւ Եհովայի ժողովուրդին կ’օգնեն ու կը քաջալերեն։ Անոնք իրենց ըրածին համար դրամ չեն առներ։ Անոնք կը ծառայեն «կամաւ, ո՛չ թէ անարգ շահախնդրութեամբ՝ հապա յօժարութեամբ» (Ա. Պետրոս 5։1, 2)։ Երէցներուն կ’օգնեն օգնական ծառաները, որոնք ժամանակի ընթացքին կրնան երէցներ ըլլալ։

Կառավարիչ մարմինը կարգ մը երէցներ կը նշանակէ, որ շրջանային տեսուչներ ըլլան։ Անոնք ժողովքներուն կ’այցելեն, որպէսզի ուղղութիւն եւ քաջալերանք տան։ Անոնք երէց կամ օգնական ծառայ կը նշանակեն այն եղբայրները, որոնք Սուրբ Գիրքին պահանջած որակումները ունին (Ա. Տիմոթէոս 3։1-10, 12. Տիտոս 1։5-9)։

3. Ամէն մէկ Վկայի դերը ի՞նչ է

Ամէն մէկ Վկայ ‘Տէրոջը անունը կ’օրհնէ’, ժողովներուն մասնակցելով եւ քարոզչութեան մէջ բաժին բերելով իր պարագաներուն ներած չափով (կարդա՛ Սաղմոս 148։12, 13)։

ԱՒԵԼԻ՛ ՊՐՊՏԷ

4. Յիսուս ազնիւ առաջնորդ է

Յիսուս մեզի ջերմ հրաւէր մը կու տայ։ Կարդացէ՛ք Մատթէոս 11։28-30 եւ քննարկեցէ՛ք այս հարցումը.

• Յիսուս ինչպիսի՞ առաջնորդ մըն է եւ ի՞նչ կ’ուզէ որ զգանք։

ՎԻՏԷՕ. Նեփալի երկրաշարժէն ետք՝ երէցները օգնութեան կը հասնին (4։56)

Սուրբ Գիրքը յստակօրէն կը սորվեցնէ, թէ երէցները ինչպէ՛ս պէտք է ընեն իրենց գործը։

Կարդացէ՛ք Եսայի 32։2 եւ Ա. Պետրոս 5։1-3 ու քննարկեցէ՛ք այս հարցումները.

• Ի՞նչ կը զգաս, գիտնալով որ Յիսուսին պէս, երէցները կը ջանան ուրիշները թարմացնել։

• Երէցները ուրիշ ի՞նչ կերպերով ալ կ’ընդօրինակեն Յիսուսը։

5. Երէցները իրենց օրինակով կը սորվեցնեն

ՎԻՏԷՕ. Երէցները առաջնորդութիւնը կ’առնեն (7։39)

Յիսուս ուղղութիւն տուաւ անոնց համար, որոնք ժողովքին մէջ առաջնորդութիւնը կ’առնեն։ Կարդացէ՛ք Մատթէոս 23։8-12 եւ քննարկեցէ՛ք այս հարցումները.

• Սուրբ Գիրքը ի՞նչ ուղղութիւն տուած է երէցներուն համար։ Կը կարծե՞ս որ կրօնական առաջնորդները Սուրբ Գիրքին ըսածին կը հետեւին։

1. Ա. Երէցները իրենք զիրենք եւ իրենց ընտանիքները հոգեւորապէս զօրաւոր կը պահեն

2. Բ. Երէցները ամբողջ ժողովքին հոգ կը տանին

3. Գ. Երէցները կանոնաւորաբար կը քարոզեն

4. Դ. Երէցները կը սորվեցնեն։ Բայց նաեւ սրահը կը մաքրեն եւ ուրիշ պարտականութիւններ կ’ընեն

6. Կրնանք երէցներուն հետ համագործակցիլ

Սուրբ Գիրքը մեզի կու տայ կարեւոր պատճառ մը, որ երէցներուն հետ համագործակցինք։ Կարդացէ՛ք Եբրայեցիս 13։17 եւ քննարկեցէ՛ք այս հարցումները.

• Սուրբ Գիրքը ինչո՞ւ կ’ըսէ, որ պէտք է յօժարաբար հնազանդինք անոնց, որոնք առաջնորդութիւնը կ’առնեն։ Ասոր նկատմամբ ի՞նչ կը զգաս։

Կարդացէ՛ք Ղուկաս 16։10 եւ քննարկեցէ՛ք այս հարցումը.

• Ինչո՞ւ պէտք է երէցներուն հետ համագործակցինք, նոյնիսկ եթէ երեւի թէ հարցը շատ կարեւոր չէ։

ԱՄՓՈՓՈՒՄ

Յիսուս ժողովքին գլուխն է։ Մենք ուրախութեամբ կը համագործակցինք անոր առաջնորդութեան տակ ծառայող երէցներուն հետ, քանի որ մեզ կը թարմացնեն եւ իրենց օրինակով մեզի կը սորվեցնեն։

Վերաքաղ

• Ո՞վ է ժողովքին գլուխը։

• Երէցները ինչպէ՞ս ժողովքին կ’օգնեն։

• Եհովային ամէն մէկ ծառային դերը ի՞նչ է։

ԱՒԵԼԻ՛Ն ԳԻՏՑԻՐ

Տե՛ս թէ ներկայիս Կառավարիչ մարմինը եւ ուրիշ երէցներ ինչպէ՛ս մեծապէս հետաքրքրուած են հաւատակիցներով։

Արգելքի տակ գտնուող եղբայրները զօրացնել (4։22)

Նկատի առ թէ շրջանային տեսուչները ի՛նչ գործ կ’ընեն։

Շրջանային տեսուչ մը կ’այցելէ կղզի մը (4։51)

Կարդա՛ ժողովքին մէջ կիներուն դերին մասին։

«Եհովայի վկաները կիներուն սորվեցնելու պատասխանատուութիւն կու տա՞ն» (յօդուած՝ Դիտարան–ին մէջ)

Տե՛ս թէ երէցները ինչպէ՛ս ծանր կ’աշխատին, որպէսզի իրենց հաւատակիցները քաջալերեն։

«Երէցները ‘գործակիցներ են մեր ուրախութեան’» (Դիտարան 15 յունուար 2013)