Ներատեսութեամբ եւ համոզումով ուսուցանեցէք
«Իմաստունին սիրտը իր բերնին իմաստութիւն կու տայ ու իր շրթունքներուն համոզում կ’աւելցնէ»։—ԱՌԱԿԱՑ 16։23, ՆԱ։
1. Աստուծոյ Խօսքը ուսուցանելը ինչո՞ւ պարզապէս տեղեկութիւն փոխանցելէն աւելին կը բովանդակէ։
ՈՐՊԷՍ Աստուծոյ Խօսքը ուսուցանողներ, մեր նպատակակէտն է լուսաւորել, ո՛չ միայն մեր աշակերտներուն մտքերը, այլ նաեւ՝ սրտերը։ (Եփեսացիս 1։18) Հետեւաբար, ուսուցանելը պարզապէս տեղեկութիւն փոխանցելէն աւելին կը բովանդակէ։ Առակաց 16։23–ը կ’ըսէ. «Իմաստունին սիրտը իր բերնին իմաստութիւն կու տայ ու իր շրթունքներուն համոզում կ’աւելցնէ»։
2. (ա) Ի՞նչ կը նշանակէ համոզել։ (բ) Ի՞նչպէս կարելի է որ բոլոր Քրիստոնեաները համոզող ուսուցանողներ ըլլան։
2 Պօղոս առաքեալ վստահաբար այս սկզբունքը գործածեց ուսուցանելու իր գործին մէջ։ Երբ ան Կորնթոս կը գտնուէր, «ամէն շաբաթ օր ժողովարանին մէջ կը խօսէր եւ Հրեաներն ու Յոյները կը համոզէր»։ (Գործք 18։4) Հեղինակութեան մը համաձայն, հոս «համոզել» թարգմանուած Յունարէն բառը կը նշանակէ՝ «բանաւոր ազդեցութեամբ կամ բարոյական քննարկումներով մտքի փոփոխութիւն մը պատճառել»։ Համոզիչ պատճառաբանութիւններով, Պօղոս կը մղէր մարդոց որ իրենց ամբողջ մտածելակերպը փոխեն։ Համոզելու այնքան լաւ կարողութիւն մը ունէր որ իր թշնամիները իրմէ կը վախնային։ (Գործք 19։24-27) Սակայն եւ այնպէս, Պօղոսի ուսուցումը մարդկային զուտ կարողութեան արդիւնքը չէր։ Ան Կորնթացիներուն ըսաւ. «Իմ խօսքս եւ քարոզութիւնս ո՛չ թէ մարդկային իմաստութեան համոզիչ խօսքերով էր, հապա Հոգիին համոզիչ զօրութիւնով։ Որպէս զի ձեր հաւատքը մարդոց իմաստութիւնովը չըլլայ, հապա Աստուծոյ զօրութիւնովը»։ (Ա. Կորնթացիս 2։4, 5) Քանի որ բոլոր Քրիստոնեաներն ալ Եհովա Աստուծոյ հոգիին օգնութիւնը ունին, ուրեմն բոլորն ալ կրնան համոզիչ ուսուցանողներ ըլլալ։ Բայց ի՞նչպէս։ Հիմա ուսուցանելու ազդու ճարտարամտութիւններէն քանի մը հատը ձեռք առնենք։
Լաւ Մտիկ Ընող մը Եղէք
3. Երբ ուրիշներու կը սորվեցնենք, ինչո՞ւ ներատես ըլլալու կարիքը կայ, եւ Աստուածաշունչի աշակերտին սրտին ի՞նչպէս կրնանք հասնիլ։
3 Ուսուցանելու առաջին ճարտարամտութիւնն է խօսելէ աւելի՝ մտիկ ընել։ Ինչպէս նշուած է Առակաց 16։23–ի մէջ, համոզիչ ըլլալու համար, ներատեսութիւն պէտք է ունենանք։ Յիսուս անշուշտ ներատեսութիւն ունէր իր ուսուցանած մարդոց հանդէպ։ Յովհաննու 2։25–ը կ’ըսէ. «Ինք գիտէր թէ ի՛նչ կայ մարդուն ներսիդին»։ Բայց մենք ի՞նչպէս կրնանք գիտնալ թէ ի՛նչ կայ մեր ուսուցանած մարդոց սրտին մէջ։ Կերպերէն մէկն է՝ լաւ մտիկ ընող ըլլալով։ Յակոբու 1։19–ն կ’ըսէ. «Ամէն մարդ թող արագ ըլլայ լսելու մէջ եւ ծանր՝ խօսելու»։ Ճիշդ է որ ամէն մարդ դիւրութեամբ չ’արտայայտեր իր միտքը։ Երբ Աստուածաշունչի մեր աշակերտները համոզուին որ մենք անկեղծ հետաքրքրութիւն ունինք իրենց հանդէպ, անոնք հաւանաբար իրենց զգացումները աւելի արտայայտեն։ Ազնիւ եւ սուր հարցումներ կրնան յաճախ օգնել որ մեր ուսուցանած անհատներուն սրտին հասնինք եւ անկէ ‘դուրս հանենք’ այդ արտայայտութիւնները։—Առակաց 20։5
4. Քրիստոնեայ երէցները ինչո՞ւ լաւ մտիկ ընողներ պէտք է ըլլան։
4 Մասնաւորաբար կարեւոր է որ Քրիստոնեայ երէցներ լաւ մտիկ ընողներ ըլլան։ Միայն ա՛յն ատեն իրապէս կրնան գիտնալ «թէ ի՛նչպէս կը վայլէ [անոնց] ամէն մէկուն պատասխան տալ»։ (Կողոսացիս 4։6) Առակաց 18։13–ը հետեւեալ ազդարարութիւնը կու տայ. «Ո՛վ որ բան մը չլսած պատասխան կու տայ, յիմարութիւն ու նախատինք է իրեն»։ Քոյր մը որ քանի մը ժողովներէ բացակայած էր, երկու եղբայրներ՝ լաւ դիտաւորութիւնով, խրատներ տուին աշխարհային ըլլալու շուրջ։ Քոյրը խոր կերպով վիրաւորուեցաւ. քանի որ անոնք չհարցուցին իրեն թէ ինչո՛ւ ներկայ չէր գտնուած ժողովներու։ Ան վիրաբուժական գործողութեան մը ենթարկուած էր եւ ապաքինման ընթացքի մէջ էր։ Ուստի, որքա՜ն կարեւոր է խրատ տալէ առաջ մտիկ ընել։
5. Երէցները եղբայրներուն միջեւ յարուցուող վէճերը ի՞նչպէս կրնան ձեռք առնել։
5 Երէցներու ուսուցանելու գործը յաճախ ուրիշներուն խրատ տալու հետ կապուած է։ Հոս ալ շատ կարեւոր է լաւ մտիկ ընող մը ըլլալ։ Մտիկ ընելը մասնաւորաբար անհրաժեշտ է երբ Քրիստոնեայ հաւատակիցներու միջեւ վէճեր ծագին։ Երէցները մտիկ ընելէն ետքն է միայն որ կրնան նմանիլ ‘առանց աչառութեան դատող Հօր’։ (Ա. Պետրոս 1։17) Այսպիսի պարագաներու յաճախ տրամադրութիւնները տաքցած կ’ըլլան եւ երէց մը պէտք է ի մտի ունենայ Առակաց 18։17–ի ըսածը. «Իր դատը առաջուընէ սկսողը իրաւունք ունեցող կը սեպուի. բայց երբ իր ոսոխը գայ՝ զանիկա կը քննէ»։ Ազդու ուսուցանող մը երկու կողմերը մտիկ կ’ընէ։ Աղօթք մը մատուցանելով, ան կ’օգնէ որ հանդարտ մթնոլորտ մը ստեղծուի։ (Յակոբու 3։18) Եթէ տրամադրութիւնները տաքնան, ան կրնայ թելադրել որ իւրաքանչիւր եղբայր ուղղակի իր հետ խօսի, փոխանակ որ երկու կողմերը իրարու հետ առնեն տան։ Յարմար հարցումներ ուղղելով, երէցը կրնայ նկատի առնուած հարցերը յստակացնել։ Շատ մը պարագաներուն, կը տեսնուի որ վէճերուն պատճառը ոչ թէ չարասրտութիւն է, այլ՝ տկար հաղորդակցութիւնը։ Բայց եթէ Աստուածաշունչի սկզբունքներ ոտնակոխուած են, սիրալիր ուսուցանող մը երկու կողմերը լսած ըլլալով կրնայ ներատեսութեամբ խրատել։
Պարզութեան Արժէքը
6. Յիսուս եւ Պօղոս պարզութեամբ սորվեցնելու մէջ ի՞նչպիսի օրինակներ հանդիսացած են։
6 Ուսուցանելու ուրիշ արժէքաւոր հմտութիւն մըն է՝ ամէն բան պարզութեամբ առնել։ Այո, ճիշդ է որ կը փափաքինք որ Աստուածաշունչի աշակերտները «կարենա[ն] հասկնալ բոլոր սուրբերուն հետ մէկտեղ, թէ ի՞նչ է լայնութիւնը ու երկայնութիւնը եւ խորութիւնը ու բարձրութիւնը» ճշմարտութեան։ (Եփեսացիս 3։18) Աստուածաշունչի վարդապետութիւններու կարգ մը երեսակներ կան, որոնք գրաւիչ եւ յաճախ դժուարին են։ (Հռովմայեցիս 11։33) Այսուհանդերձ, երբ Պօղոս Յոյներուն կը քարոզէր, ան ‘Քրիստոսի ցցահանուելուն’ պարզ պատգամին վրայ շեշտ դրաւ։ (Ա. Կորնթացիս 2։1, 2) Յիսուս ալ յստակ ու գրաւիչ կերպով քարոզեց։ Իր Լերան Քարոզին մէջ ան պարզ բառեր գործածեց։ Սակայն, այդ քարոզը ցարդ յայտնաբերուած ամենախոր ճշմարտութիւնները կը պարունակէր։—Մատթէոս 5-7–րդ գլուխները։
7. Երբ Աստուածաշունչի ուսումնասիրութիւններ կը վարենք, ի՞նչպէս կրնանք հարցերը պարզութեամբ նկատի առնել։
7 Մենք ալ հարցերը պարզութեամբ կրնանք ձեռք առնել, երբ Աստուածաշունչի ուսումնասիրութիւններու կ’ուսուցանենք։ Ի՞նչպէս։ «Աւելի կարեւոր» բաներուն վրայ շեշտ դնելով։ (Փիլիպպեցիս 1։10, ՆԱ) Երբ խոր նիւթեր կը բացատրենք, պէտք է ջանանք պարզ լեզու մը գործածել։ Պէտք է մեր ուշադրութիւնը կեդրոնացնենք բանալի համարներու վրայ, փոխանակ գրականութեան մէջ նշուած բոլոր համարները կարդալու ու անոնց մասին խօսակցելու։ Ասիկա մեր կողմէն լաւ պատրաստութիւն կը պահանջէ։ Մանրամասնութիւններով չխճողենք աշակերտը, ո՛չ ալ չնչին կարեւորութիւն ունեցող հարցերով նիւթէն շեղինք։ Եթէ աշակերտը հարցում մը ունենայ որ ուղղակիօրէն կապ չունի դասին հետ, կրնանք փափկանկատութեամբ թելադրել որ անոր մասին կրնանք խօսիլ դասը վերջացնելէ ետք։
Հարցումներու Ազդու Գործածութիւն
8. Յիսուս ի՞նչպէս հարցումները ազդու կերպով գործածեց։
8 Ազդու հարցումներ ուղղելը, ուսուցանելու ուրիշ պիտանի հմտութիւն մըն է։ Յիսուս Քրիստոս իր ուսուցումին մէջ շատ հարցումներ գործածեց։ Օրինակ, Յիսուս Պետրոսի հարցուց. «Քեզի ի՞նչպէս կ’երեւնայ, Սի՛մոն, երկրի թագաւորները որմէ՞ կ’առնեն հարկը կամ տուրքը. իրենց որդիներէ՞ն թէ օտարներէն»։ Երբ ան ըսաւ «օտարներէն», Յիսուս անոր ըսաւ. «Ուրեմն որդիները ազատ են»։ (Մատթէոս 17։24-26) Որպէս տաճարին մէջ պաշտուած Էակին միածին Որդին, Յիսուս տուրք վճարելու պարտաւորուած չէր։ Բայց Յիսուս հարցումներու ազդու գործածութեամբ փոխանցեց ճշմարտութիւնը։ Այս կերպով Յիսուս օգնեց Պետրոսի, որպէսզի իր արդէն ունեցած տեղեկութեամբ յարմար եզրակացութեան մը յանգի։
9. Աստուածաշունչի ուսումնասիրութիւններու ընթացքին ի՞նչպէս կրնանք հարցումներ գործածել։
9 Աստուածաշունչի ուսումնասիրութիւններու ընթացքին կրնանք ազդու կերպով հարցումներ գործածել։ Երբ աշակերտը սխալ պատասխան մը տայ, թերեւս փորձուիք դուք տալ շիտակ պատասխանը, բայց այսպէս ընելով, ան իրապէս միտքը պիտի պահէ՞ տրուած տեղեկութիւնը։ Յաճախ նախընտրելի է հարցումներ ուղղելով աշակերտին օգնել որ շիտակ եզրակացութեան յանգի։ Օրինակի համար, եթէ դժուարութիւն ունի ըմբռնելու թէ ինչո՛ւ Աստուծոյ անունը պէտք է գործածէ, կրնանք հարցնել. ‘Քեզի համար կարեւո՞ր է քու անունդ . . . Ինչո՞ւ։ . . . Ի՞նչպէս կը զգաս, եթէ անհատ մը չուզէ անունդ գործածել։ . . . Տրամաբանական չէ՞ որ Աստուած պահանջէ որ իր անձնական անունը գործածենք’։
10. Երէցները ի՞նչպէս կրնան հարցումներ գործածել, երբ զգացականօրէն վիրաւորուած անհատներուն կ’օգնեն։
10 Երէցները հօտը հովուելու համար ալ կրնան լաւ կերպով հարցումներ գործածել։ Ժողովքին մէջ շատեր զգացականօրէն ջախջախուած եւ ընկճուած են Սատանայի աշխարհին կողմէ եւ կրնան զգալ որ անմաքուր են ու մէկու մը կողմէ սիրուած չեն։ Երէց մը այսպիսի անհատի մը հետ կրնայ տրամաբանել, ըսելով. ‘Թէեւ դուն կը խորհիս որ մաքուր չես, բայց Եհովա՞ն ինչ կը մտածէ քու մասիդ։ Եթէ մեր սիրալիր երկնաւոր Հայրը թոյլ տուաւ որ իր Որդին մեռնի եւ քեզի համար փրկանքը հայթայթէ, ասիկա ապացոյց մը չէ՞ որ Աստուած կը սիրէ քեզ’։—Յովհաննու 3։16
11. Հռետորական հարցումները ի՞նչ նպատակի կը ծառայեն, եւ հրապարակախօսութեան մէջ ի՞նչպէս կրնան գործածուիլ։
11 Հռետորական հարցումները ուսուցանելու ուրիշ օգտակար ճարտարամտութիւն մըն է։ Մտիկ ընողներէն չի պահանջուիր որ հարցումներուն բարձրաձայն պատասխանեն, բայց անոնք կ’օգնեն որ տրուած նիւթերուն մասին տրամաբանեն։ Վաղեմի մարգարէները յաճախ այսպիսի հարցումներ կը հարցնէին, որպէսզի մտիկ ընողները անոնց մասին խորապէս մտածէին։ (Երեմեայ 18։14, 15) Յիսուս ազդու կերպով գործածեց հռետորական հարցումներ։ (Մատթէոս 11։7-11) Այսպիսի հարցումներ մասնաւորաբար ազդեցիկ են հրապարակախօսութիւններու մէջ։ Փոխանակ ըսելու որ Եհովան հաճեցնելու համար պէտք է բոլորանուէր ըլլանք, թերեւս աւելի ազդու ըլլայ հարցնել. ‘Եթէ մեր ծառայութեան մէջ բոլորանուէր չըլլանք, Եհովան պիտի հաճի՞’։
12. Տեսակէտ յայտնող հարցումներուն արժէքը ի՞նչ է։
12 Տեսակէտ յայտնող հարցումները գործնական են, գիտնալու համար թէ Աստուածաշունչի աշակերտ մը իր սորված բաներուն իրապէս կը հաւատայ թէ ոչ։ (Մատթէոս 16։13-16) Աշակերտ մը կրնայ շիտակ պատասխանել, ըսելով որ պոռնկութիւնը սխալ է։ Բայց լաւ է աւելի առաջ երթալ, այսպիսի հարցումներ ուղղելով. Բարոյականի շուրջ Աստուծոյ չափանիշը անձնապէս ի՞նչպէս կը նկատէք։ Կը խորհի՞ք որ ան շատ կաշկանդիչ է։ Աստուծոյ չափանիշներուն հետեւիլը կամ չհետեւիլը որեւէ տարբերութիւն կ’ընէ՞։
Սրտին Հասնող Օրինակներ
13, 14. (ա) Ի՞նչ կը նշանակէ օրինակ գործածել։ (բ) Լաւ օրինակները ինչո՞ւ ազդեցիկ են։
13 Ունկնդիրներուն կամ Աստուածաշունչի աշակերտներուն սրտին հասնելու ուրիշ կերպ մըն է ազդու օրինակները։ «Օրինակ» թարգմանուած Յունարէն արտայայտութիւնը, բառացիօրէն կը նշանակէ «կողքը, կամ քովը դնել»։ Երբ օրինակ մը կու տաք, բան մը կը բացատրէք, զայն նման բանի մը ‘կողքին դնելով’։ Օրինակ, Յիսուս հարցուց. «Աստուծոյ թագաւորութիւնը ի՞նչ բանի նմանցնենք կամ ի՞նչ առակով զանիկա բացատրենք»։ Որպէս պատասխան, Յիսուս յիշեց մանանեխի հունտը։—Մարկոս 4։30-32
14 Աստուծոյ մարգարէները բազմաթիւ ուժեղ օրինակներ գործածեցին։ Ասորեստանցիները՝ զորս Աստուած որպէս գործիք գործածած էր Իսրայելացիները պատժելու համար՝ երբ բուռն անգթութեան դիմեցին, Եսային անոնց յաւակնոտութիւնը բացայայտեց հետեւեալ օրինակով. «Միթէ տապարը իրմով կտրող մարդուն դէմ կը գոռոզանա՞յ. կամ սղոցը զինք գործածողին դէմ կը հպարտանա՞յ»։ (Եսայեայ 10։15) Յիսուս ալ ուրիշներուն սորվեցնելու համար յաճախ օրինակներ կը գործածէր։ Տեղեկագրուած է որ «առանց առակի բան մը չէր խօսեր անոնց»։ (Մարկոս 4։34) Լաւ օրինակներուն արժէքը մեծ է, քանի որ անոնք միտքն ու սիրտը գործի կը լծեն։ Անոնք կ’օգնեն որ մտիկ ընողները տրուած նոր տեղեկութիւնը դիւրութեամբ իւրացնեն, զայն կապելով արդէն իրենց ծանօթ եղող բանի մը հետ։
15, 16. Ի՞նչ բան օրինակները շատ ազդու կը դարձնէ։ Օրինակներ տուէք։
15 Իրապէս ի՞նչպէս կրնանք սրտին հասնող օրինակներ գործածել։ Նախ եւ առաջ, տրամաբանական է որ տրուած օրինակը բացատրուած նիւթին համապատասխան ըլլայ։ Եթէ բաղդատութիւնը չի յարմարիր, օրինակը աւելի ուշադրութիւնը պիտի ցրուէ քան թէ՝ լուսաբանէ։ Առիթով մը լաւ միտումով, դասախօս մը օծեալ մնացորդին Յիսուս Քրիստոսի հանդէպ ունեցած հնազանդութիւնը բաղդատեց շունի մը ցուցաբերած հաւատարմութեան հետ։ Բայց այսպիսի նուաստացուցիչ բաղդատութիւն մը իրապէս տեղի՞ն է։ Աստուածաշունչը նոյն միտքը շատ աւելի գրաւիչ եւ յարգարժան կերպով կը հաղորդէ։ Անիկա Յիսուսի 144,000 օծեալ հետեւորդները կը համեմատէ՝ «իր էրկանը համար զարդարուած հարսի մը» հետ։—Յայտնութիւն 21։2
16 Մարդոց կեանքին հետ կապ ունեցող օրինակները շատ ազդու են։ Մորթուած գառնուկին մասին Նաթանի տուած օրինակը Դաւիթ Թագաւորին սրտին դպաւ. իր երիտասարդութեան հովիւ մը եղած ըլլալով, ան ոչխարները կը սիրէր։ (Ա. Թագաւորաց 16։11-13. Բ. Թագաւորաց 12։1-7) Եթէ օրինակը ցուլի մասին ըլլար, նոյնքան ազդու պիտի չըլլար։ Նոյն կերպով, գիտական բներեւոյթներու կամ պատմական անծանօթ դէպքերու վրայ հիմնուած օրինակներ մեր ունկնդիրներուն համար շատ մեծ նշանակութիւն մը չեն կրնար ունենալ։ Յիսուս իր օրինակները կը քաղէր առօրեայ կեանքի երեւոյթներէն։ Ան խօսեցաւ ճրագի, երկնքի թռչուններու եւ դաշտի շուշաններու նման սովորական բաներու մասին։ (Մատթէոս 5։15, 16. 6։26, 28) Յիսուսի մտիկ ընողները դիւրութեամբ կրնային տեսնել անոնց հետ եղած կապը։
17. (ա) Մեր օրինակները ի՞նչ բանի վրայ պէտք է հիմնենք։ (բ) Մեր գրականութիւններուն մէջի օրինակները ի՞նչպէս կրնանք մեր աշակերտներուն պարագային յարմարեցնել։
17 Մեր ծառայութեան մէջ, պարզ բայց ազդու օրինակներ գործածելու շատ պատեհութիւններ ունինք։ Նկատող եղէք։ (Գործք 17։22, 23) Թերեւս ձեր օրինակը հիմնէք անհատին զաւկին, տան, գործին, կամ իր մէկ նախասիրութեան վրայ։ Կամ, Աստուածաշունչի աշակերտի մը մասին մեր ունեցած գիտութիւնը կրնանք գործածել, մեր ուսումնասիրութեան մէջ արդէն տրուած օրինակները աւելի ցցուն ընելով։ Առէք, զոր օրինակ, Գիտութիւնը Որ Յաւիտենական Կեանքի կ’Առաջնորդէ գրքին 8–րդ գլուխին 14–րդ պարբերութեան մէջ գործածուած օրինակը։ Հոն խօսքը սիրալիր ծնողի մը մասին է, որ դրացիի մը կողմէ զրպարտուած է։ Կրնանք քիչ մը խորհիլ թէ այդ օրինակը ի՛նչպէս կրնանք յարմարեցնել Աստուածաշունչի աշակերտի մը որ իր կարգին ծնող մըն է։
Համարները Հմտութեամբ Կարդացէք
18. Ինչո՞ւ պէտք է ջանանք դիւրասահ ընթերցողներ ըլլալ։
18 Պօղոս հետեւեալ յորդորը տուաւ Տիմոթէոսի. «Մինչեւ ես գամ միտք դիր կարդալու, յորդորելու, սորվեցնելու»։ (Ա. Տիմոթէոս 4։13) Քանի որ մեր ուսուցումին հիմը Աստուածաշունչն է, զայն սահուն կարդալը շատ օգտակար է։ Ղեւտացիները Մովսիսական Օրէնքը Աստուծոյ ժողովուրդին կարդալու առանձնաշնորհումը ունէին։ Արդեօք զայն կարդալու ատեն կը կմկմայի՞ն, կամ միօրինա՞կ կը կարդային։ Ո՜չ. Աստուածաշունչը Նէեմեայ 8։8–ի մէջ կ’ըսէ. «Անոնք Աստուծոյ օրէնքի գիրքը յստակ կերպով կարդացին ու մեկնելով կարդացածնին հասկցուցին»։
19. Սուրբ Գրութիւններու մեր ընթերցանութիւնը ի՞նչպէս կրնանք բարելաւել։
19 Պերճախօս Քրիստոնեայ տղամարդոցմէ ոմանք երբ կարդալու գան՝ դժուարութեան կը հանդիպին։ Անոնք ի՞նչպէս կրնան բարելաւուիլ։ Փորձեր ընելով. այո, կրկին ու կրկին բարձրաձայն կարդալով, մինչեւ որ կարենան սահունօրէն կարդալ։ Եթէ ձեր լեզուով ձայներիզներ կան, խոհեմութիւն է մտիկ ընել ընթերցողին շեշտերուն եւ թոնի փոփոխութիւններուն, եւ նշմարել թէ անունները եւ անսովոր բառերը ի՛նչպէս կը հնչուին։ Երբ փորձ ընենք, նոյնիսկ Մահէր–Շալալ–Հաշ–Պազի նման անուններ կարելի է յարաբերաբար դիւրութեամբ կարդացուիլ։—Եսայեայ 8։1
20. Ի՞նչպէս ‘զգոյշ կ’ըլլանք մեր ուսուցումին նկատմամբ’։
20 Որպէս Եհովայի ծառաները, ի՜նչ ուրախութիւն է որպէս ուսուցանողներ գործածուիլ։ Ուստի, ամէն մէկս լուրջի առնենք այդ պատասխանատուութիւնը։ Թող որ միշտ ‘զգոյշ ըլլանք մեր անձին ու մեր ուսուցումին նկատմամբ’։ (Ա. Տիմոթէոս 4։16, Երուսաղէմ) Լաւ ուսուցանողներ կրնանք ըլլալ՝ լաւ մտիկ ընողներ ըլլալով, հարցերը պարզօրէն ձեռք առնելով, խորաթափանց հարցումներ ուղղելով, ազդու օրինակներ գործածելով եւ համարները հմտութեամբ կարդալով։ Թող որ բոլորս իր կազմակերպութեան միջոցաւ Եհովայի հայթայթած մարզումէն օգտուինք, քանի որ ասիկա մեզի կ’օգնէ որ «իմաստուններու լեզու» ունենանք։ (Եսայեայ 50։4) Մեր ծառայութեան համար հայթայթուած բոլոր գործիքները՝ մէջը ըլլալով գրքոյկները, ձայներիզները եւ պատկերիզները, լաւ կերպով օգտագործելով, կը սորվինք ներատեսութեամբ եւ համոզումով ուսուցանել։
Կը Յիշէ՞ք
◻ Լաւ մտիկ ընող մը ըլլալը ի՞նչպէս մեզի կ’օգնէ ուսուցանելու մէջ։
◻ Պարզութեամբ սորվեցնելու մէջ ի՞նչպէս կրնանք Պօղոսի եւ Յիսուսի օրինակին հետեւիլ։
◻ Երբ ուրիշներուն կը սորվեցնենք, ի՞նչպիսի հարցումներ կրնանք գործածել։
◻ Ի՞նչպիսի օրինակներ ամենէն ազդեցիկներն են։
◻ Հանրային ընթերցանութեան մէջ մեր հմտութիւնը ի՞նչպէս կրնանք բարելաւել։
[Նկար՝ էջ 16]
Լաւ ուսուցանող մը մտիկ կ’ընէ, որպէսզի ներատեսութիւն շահի
[Նկար՝ էջ 18]
Յիսուս իր օրինակները քաղեց կեանքի առօրեայէն