Ամէն բանի մէջ պարկեշտ եղիր

Ամէն մարդ կ’ուզէ պարկեշտ բարեկամներ ունենալ։ Եհովան ալ կ’ակնկալէ, որ իր բարեկամները պարկեշտ ըլլան։ Բայց ասիկա դիւրին չէ աշխարհի մը մէջ, ուր շատեր անպարկեշտ են։ Ամէն բանի մէջ պարկեշտ ըլլալուն օգուտները ի՞նչ են։

1. Պարկեշտ ըլլալու ամէնէն կարեւոր պատճառը ի՞նչ է

Երբ ուրիշներուն հետ պարկեշտ ենք, Եհովային ցոյց կու տանք, որ զինք կը սիրենք ու կը յարգենք։ Պահ մը մտածէ. Եհովան գիտէ ամէն բան որ կը մտածենք եւ կ’ընենք (Եբրայեցիս 4։13)։ Ան կը նկատէ, երբ կ’ընտրենք պարկեշտ ըլլալ, եւ ատիկա կը գնահատէ։ Իր Խօսքը կ’ըսէ. «Ծուռ մարդը Տէրոջը առջեւ պիղծ է, բայց անոր մտերմութիւնը արդարներուն հետ է» (Առակաց 3։32)։

2. Ի՞նչ կարգ մը կերպերով կրնանք մեր առօրեայ կեանքին մէջ պարկեշտ ըլլալ

Եհովան կ’ուզէ որ ‘ճշմարտութիւնը խօսինք ամէն մէկս իր ընկերին հետ’ (Զաքարիա 8։16, 17)։ Ասիկա ի՞նչ կը նշանակէ։ Երբ կը խօսինք մեր ընտանիքին, գործընկերներուն, քրիստոնեայ եղբայրներուն ու քոյրերուն կամ կառավարական պաշտօնեաներու հետ, սուտ չենք խօսիր, ոչ ալ կ’ըսենք բան մը, որ կարելի է տարբեր կերպերով հասկնալ։ Պարկեշտ մարդիկը ուրիշներէն չեն գողնար կամ զիրենք չեն խաբեր (կարդա՛ Առակաց 24։28 եւ Եփեսացիս 4։28)։ Եւ անոնք իրենցմէ պահանջուած բոլոր տուրքերը կը վճարեն (Հռովմայեցիս 13։5-7)։ Այս եւ ուրիշ կերպերով, ‘ամէն բանի մէջ պարկեշտութեամբ կը վարուինք’ (Եբրայեցիս 13։18, ԱԾ)։

3. Պարկեշտ ըլլալուն օգուտները ի՞նչ են

Երբ ուրիշները մեզ կը ճանչնան որպէս պարկեշտ մէկը, մեզի կը վստահին։ Ժողովքին մէջ բոլորին կ’օգնենք որ ապահով զգան, կարծես հոգատար ընտանիքի մը մէջ ըլլան։ Մաքուր խիղճ կ’ունենանք։ Նաեւ, մեր պարկեշտութիւնը կրնայ ‘մեր Փրկիչ Աստուծոյ վարդապետութիւնը զարդարել’ եւ ուրիշներուն մէջ Եհովան ճանչնալու փափաքը արթնցնել (Տիտոս 2։10)։

ԱՒԵԼԻ՛ ՊՐՊՏԷ

4. Եհովան կ’ուրախանայ երբ պարկեշտ ըլլանք

Կարդացէ՛ք Սաղմոս 44։21 եւ Մաղաքիա 3։16 ու քննարկեցէ՛ք այս հարցումները.

• Քու կարծիքովդ, ինչո՞ւ պէտք չէ մտածենք, թէ կրնա՛նք Եհովայէն բան մը պահել։

• Քու կարծիքովդ, Եհովան ի՞նչ կը զգայ, երբ կ’ընտրենք ճշմարտութիւնը խօսիլ, նոյնիսկ երբ ատիկա ընելը դժուար է։

5. Ամէն ատեն պարկեշտութեամբ վարուէ

ՎԻՏԷՕ. Ի՞նչը ուրախութիւն կը պատճառէ. Մաքուր խղճմտանքը (2։32)

Կարդացէ՛ք Եբրայեցիս 13։18 եւ քննարկեցէ՛ք, թէ ինչպէ՛ս կրնանք պարկեշտ ըլլալ՝

• մեր ընտանիքին հետ։

• գործատեղը կամ դպրոցին մէջ։

• ուրիշ պարագաներու։

6. Պարկեշտ ըլլալով կ’օգտուինք

Թերեւս սկիզբը այնպէս երեւնայ, որ պարկեշտութիւնը խնդիրներու պատճառ կ’ըլլայ։ Բայց ի վերջոյ, ատիկա միշտ լաւագոյն բանն է, որ կրնաս ընել։ Կարդացէ՛ք Սաղմոս 34։12-16 եւ քննարկեցէ՛ք այս հարցումը.

• Պարկեշտութիւնը կեանքդ ինչպէ՞ս կը բարելաւէ։

1. Ա. Պարկեշտ ամուսիններն ու կիները իրենց ամուսնութիւնը կը զօրացնեն

2. Բ. Պարկեշտ գործաւորները իրենց գործատէրերուն վստահութիւնը կը շահին

3. Գ. Պարկեշտ քաղաքացիները լաւ անուն կ’ունենան կառավարական պաշտօնեաներուն քով

ԱՄՓՈՓՈՒՄ

Եհովան կ’ուզէ որ իր բարեկամները պարկեշտ ըլլան ամէն բանի մէջ որ կ’ըսեն ու կ’ընեն։

Վերաքաղ

• Ի՞նչ կարգ մը կերպերով կրնանք պարկեշտ ըլլալ։

• Ինչո՞ւ պէտք չէ մտածենք, թէ կրնա՛նք Եհովայէն բան մը պահել։

• Ինչո՞ւ կ’ուզես ամէն ատեն պարկեշտ ըլլալ։

ԱՒԵԼԻ՛Ն ԳԻՏՑԻՐ

Ծնողները ինչպէ՞ս կրնան իրենց պզտիկներուն սորվեցնել, որ պարկեշտ ըլլան։

Սուտ մի՛ խօսիր (1։44)

Ինչպէ՞ս կ’օգտուինք, երբ մեր խոստումները կը կատարենք։

Խոստումներդ յարգէ եւ օրհնութիւններ վայելէ (9։09)

Նկատի առ թէ արդեօք պէ՞տք է տուրքերը վճարենք, նոյնիսկ եթէ սխալ կերպով կը գործածուին։

«Պէ՞տք է տուրքերը վճարես» (յօդուած՝ Դիտարան–ին մէջ)

Ի՞նչ բան անպարկեշտ տղամարդ մը մղեց, որ իր կեանքը փոխէ եւ սկսի պարկեշտ կերպով դրամ շահիլ։

«Շօշափեցի թէ Եհովան ողորմած ու ներող է» (Դիտարան 1 մայիս 2015)