Սուրբ Գիրքը ի՞նչ կ’ըսէ ամուրիութեան եւ ամուսնութեան մասին

Կարգ մը մշակոյթներու մէջ, մարդիկ կը հաւատան որ մէկը չի կրնար ուրախ ըլլալ եթէ չամուսնանայ։ Բայց ո՛չ բոլոր ամուսնացածները ուրախ են, ոչ ալ բոլոր ամուրիները տխուր են։ Իրականութիւնը այն է, որ Սուրբ Գիրքը թէ՛ ամուրիութեան եւ թէ ամուսնութեան համար կ’ըսէ, որ նուէրներ են։

1. Ի՞նչ են ամուրի ըլլալուն կարգ մը օգուտները

Սուրբ Գիրքը կ’ըսէ. «Ով որ կ’ամուսնանայ՝ լաւ կ’ընէ, իսկ ով որ չ’ամուսնանար՝ աւելի լաւ կ’ընէ» (ՆԹ) (կարդա՛ Ա. Կորնթացիս 7։32, 33, 38)։ Ամուրի անձ մը ի՞նչ կերպերով «աւելի լաւ կ’ընէ»։ Ամուրի քրիստոնեաները պէտք չունին կողակիցի մը պէտքերուն հոգ տանելու։ Անոր համար, ընդհանրապէս աւելի ազատ կ’ըլլան։ Օրինակ, ոմանք կրնան իրենց ծառայութիւնը ընդարձակել հետաքրքրական կերպերով, ինչպէս՝ ուրիշ երկիր փոխադրուիլ բարի լուրը քարոզելու համար։ Եւ ամէնէն կարեւորը, անոնք կրնան աւելի ժամանակ տալ, որպէսզի Եհովային մօտենան։

2. Ի՞նչ են օրինապէս ամուսնացած ըլլալուն կարգ մը օգուտները

Ամուրիութեան պէս, ամուսնութիւնն ալ իր յատուկ օգուտները ունի։ Սուրբ Գիրքը կ’ըսէ որ «երկուքը մէկէն աղէկ է» (Ժողովող 4։9)։ Ասիկա մանաւանդ ճիշդ է այն քրիստոնեաներուն պարագային, որոնք իրենց ամուսնութեան մէջ սուրբգրային սկզբունքները կը գործադրեն։ Զոյգեր, որոնք օրինաւոր կերպով կ’ամուսնանան, կը խոստանան որ միշտ իրար պիտի սիրեն ու յարգեն։ Արդիւնքը կ’ըլլայ որ անոնք յաճախ աւելի ապահով կը զգան քան՝ այն զոյգերը, որոնք պարզապէս իրարու հետ կ’ապրին։ Եւ իրենց զաւակներն ալ աւելի ապահով պիտի զգան։

3. Եհովան ամուսնութիւնը ինչպէ՞ս կը նկատէ

Երբ Եհովան առաջին զոյգը ամուսնացուց, ըսաւ. «Այրը պիտի ձգէ իր հայրը ու իր մայրը եւ իր կնոջ պիտի յարի» (Ծննդոց 2։24)։ Եհովան կ’ուզէ որ ամուսինն ու կինը իրար սիրեն ու իրարու հետ մնան այնքան ատեն որ ողջ են։ Ան ամուսնալուծումը կ’արտօնէ, միայն երբ կողակից մը շնութիւն ընէ, այսինքն՝ իր կողակիցէն զատ ոեւէ մէկու հետ սեռային յարաբերութիւն ունենայ։ Այսպիսի պարագայի, Եհովան անմեղ կողակիցին իրաւունք կու տայ որոշելու, թէ պիտի ամուսնալուծուի՛ կամ ոչ (Մատթէոս 19։9)a։ Եհովան չ’արտօներ որ քրիստոնեան մէկէ աւելի կողակից ունենայ (Ա. Տիմոթէոս 3։2)։

ԱՒԵԼԻ՛ ՊՐՊՏԷ

4. Ամուրիութեան պարգեւդ լաւ կերպով գործածէ

Յիսուս ամուրիութիւնը պարգեւ նկատեց (Մատթէոս 19։11, 12)։ Կարդացէ՛ք Մատթէոս 4։23 եւ քննարկեցէ՛ք այս հարցումը.

• Յիսուս ինչպէ՞ս ամուրիութեան պարգեւը գործածեց իր Հօր ծառայելու եւ ուրիշներուն օգնելու համար։

Յիսուսին պէս, քրիստոնեաները կրնան վայելել իրենց ամուրիութիւնը։ Դիտեցէ՛ք ՎԻՏԷՈՆ եւ քննարկեցէ՛ք այս հարցումը։

ՎԻՏԷՕ. Հաւատարիմ ամուրիներ (3։11)

• Քրիստոնեաները ի՞նչ աղուոր կերպերով կրնան իրենց ամուրիութիւնը գործածել։

Գիտէի՞ր

Սուրբ Գիրքը չ’ըսեր թէ մէկը ո՛ր տարիքին կրնայ ամուսնանալ։ Բայց անիկա կը քաջալերէ, որ պատանիները սպասեն մինչեւ որ անցնի «երիտասարդութեան ծաղկուն շրջանը», երբ սեռային զօրաւոր զգացումները կը դժուարացնեն իմաստուն որոշումներ առնելը (Ա. Կորնթացիս 7։36, ՆԱ)։

5. Իմաստութեամբ կողակիցդ զատէ

Կողակից զատելը ամէնէն կարեւոր որոշումներէն մէկն է, որ կեանքիդ մէջ պիտի առնես։ Կարդացէ՛ք Մատթէոս 19։4-6, 9 եւ քննարկեցէ՛ք այս հարցումը.

• Քրիստոնեայ մը ինչո՞ւ պէտք չէ աճապարէ ամուսնանալու։

Սուրբ Գիրքը կրնայ քեզի օգնել որ գիտնաս, թէ անհատի մը մէջ ի՛նչ յատկութիւններ պէտք է փնտռես։ Ամենակարեւոր բանը այն է, որ զատես անհատ մը, որ Եհովան կը սիրէb։ Կարդացէ՛ք Ա. Կորնթացիս 7։39 եւ Բ. Կորնթացիս 6։14։ Ետքը, քննարկեցէ՛ք այս հարցումները.

• Ինչո՞ւ պէտք է միայն քրիստոնեայ հաւատակիցի մը հետ ամուսնանանք։

• Քու կարծիքովդ, Եհովան ի՞նչ կը զգայ, եթէ ամուսնանանք մէկու մը հետ, որ զինք չի սիրեր։

6. Ամուսնութեան հանդէպ Եհովայի տեսակէտը ունեցիր

Անցեալին, Իսրայէլի մէջ կարգ մը տղամարդիկ անձնասէր պատճառներով իրենց կիներէն կ’ամուսնալուծուէին։ Կարդացէ՛ք Մաղաքիա 2։13, 14, 16 եւ քննարկեցէ՛ք այս հարցումը.

• Եհովան ինչո՞ւ կ’ատէ առանց սուրբգրային պատճառի եղած ամուսնալուծումը։

Դիտեցէ՛ք ՎԻՏԷՈՆ եւ քննարկեցէ՛ք այս հարցումը։

ՎԻՏԷՕ. Ամուսնութիւնը մնայուն կապ մըն է (4։30)

• Եթէ ամուսնացած ես մէկու մը հետ, որ քեզմէ տարբեր հաւատալիքներ ունի, ի՞նչ կրնաս ընել որ ամուսնութիւնդ յաջող դարձնես։

7. Ամուսնութեան նկատմամբ Եհովայի պահանջներուն համաձայն ապրէ

ՎԻՏԷՕ. Կրնա՛ս Եհովային ուզածին պէս ամուսնութիւն մը ունենալ (4։14)

Կարդացէ՛ք Եբրայեցիս 13։4 եւ քննարկեցէ՛ք այս հարցումները.

• Քու կարծիքովդ, ամուսնութեան նկատմամբ Եհովայի պահանջները տրամաբանակա՞ն են։ Ինչո՞ւ այդպէս կ’ըսես։

Եհովան քրիստոնեաներէն կ’ակնկալէ, որ իրենց ամուսնութիւններն ու ամուսնալուծումները արձանագրեն, քանի որ գրեթէ բոլոր երկիրներուն մէջ կառավարութիւնները ատիկա կը պահանջեն։ Կարդացէ՛ք Տիտոս 3։1 եւ քննարկեցէ՛ք այս հարցումը.

• Եթէ ամուսնացած ես, վստա՞հ ես որ ամուսնութիւնդ օրինապէս արձանագրուած է կառավարութեան քով։

ԱՄՓՈՓՈՒՄ

Ամուրիութիւնը եւ ամուսնութիւնը Եհովայի կողմէ նուէրներ են։ Երկուքն ալ կրնան ուրախութիւն բերել, եթէ Եհովայի կամքին համաձայն ըլլան։

Վերաքաղ

• Անհատ մը ինչպէ՞ս կրնայ իր ամուրիութիւնը լաւ կերպով գործածել։

• Սուրբ Գիրքը ինչո՞ւ կ’ըսէ, որ միայն քրիստոնեայ հաւատակիցի մը հետ պէտք է ամուսնանալ։

• Սուրբ Գիրքին համաձայն, ամուսնալուծման միակ պատճառը ի՞նչ է։

ԱՒԵԼԻ՛Ն ԳԻՏՑԻՐ

Ի՞նչ կը նշանակէ ‘միայն Տէրոջմով’ ամուսնանալ։

«Հարցումներ ընթերցողներէն» (Դիտարան 1 յուլիս 2004)

Դիտէ՛ երկու կարճ վիտէօներ, որոնք կրնան քեզի օգնել որ լաւ որոշումներ առնես, մէկու մը ծանօթանալու եւ ամուսնանալու նկատմամբ։

Ամուսնութեան պատրաստուիլ (11։53)

Տե՛ս թէ եղբայր մը ինչո՛ւ կը զգայ, որ ի՛նչ որ Եհովան իրեն տուած է, շատ աւելի արժէքաւոր է, քան ինչ որ ինք ձգած է։

Յոյս ունէի որ ճշմարտութիւնը պիտի ընդունի (1։56)

Անհատ մը ի՞նչ կարգ մը բաներ պէտք է նկատի առնէ, ամուսնալուծումի կամ բաժանումի մասին մտածելէ առաջ։

«Պատուէ ‘զայն որ Աստուած միաւորեց’» (Դիտարան դեկտեմբեր 2018)