Բարեպաշտ հպատակութիւնը ի՛նչ կը պահանջէ մեզմէ

«Ուստի հնազանդեցէ՛ք Աստուծոյ»։—ՅԱԿՈԲՈՒ 4։7

1. Ի՞նչ կրնանք ըսել մեր Աստուծոյ մասին, որու կը պաշտենք։

ԵՀՈՎԱՆ ի՜նչ հոյակապ Աստուած մըն է։ Ան աննման, անմրցելի, անբաղդատելի, անզուգական է շատ մը կերպերով։ Ան Բարձրեալն է, Տիեզերքի Գերիշխանը որու մէջ ամէն իրաւացի հեղինակութիւն կը կայանայ։ Ան յաւիտեանս յաւիտենից է, այնքա՛ն փառաւոր՝ որ ոչ մէկ մարդ կրնայ զինք տեսնել ու ապրիլ։ (Ելից 33։20. Հռովմայեցիս 16։26) Ան անհուն զօրութիւն ու իմաստութիւն ունի, բացարձակապէս կատարեալ՝ արդարութեամբ, ու սիրոյ մարմնացումն է։ Ան մեր Ստեղծիչը, մեր Դատաւորը, մեր Օրէնսդիրը եւ մեր Թագաւորն է։ Ամէն բարի տուրք ու ամէն կատարեալ պարգեւ իրմէ կու գայ։—Սաղմոս 100։3. Եսայեայ 33։22. Յակոբու 1։17

2. բարեպաշտ հպատակութիւնը ի՞նչ բաներ կը պարփակէ։

² Այս բոլոր իրողութիւններուն ի տես, իրեն հպատակելու աներկբայելի կը դառնայ մեր պարտաւորութիւնը։ Բայց ասոր մէջ ի՞նչ պարփակուած է։ Կարգ մը բաներ։ Քանի որ Եհովա Աստուծոյ անձամբ չենք կրնար տեսնել, իրեն հպատակիլը կը պարփակէ դաստիարակուած խղճմտանքի ձայնին հետեւիլ, Աստուծոյ երկրային կազմակերպութեան հետ համագործակցիլ, աշխարհային հեղինակութիւնները ընդունիլ եւ ընտանեկան շրջանակէն ներս գլխաւորութեան սկզբունքը յարգել։

Բարի Խղճմտանք մը Պահել

3. Բարի խղճմտանք մը պահելու համար, ի՞նչպիսի արգիլումներու պէտք է հնազանդինք։

³ Բարի խղճմտանք մը պահելու համար, հնազանդ պէտք է ըլլանք անպարտադրելիին, այսինքն, այն օրէնքներուն կամ սկզբունքներուն զորս մարդիկ չեն կրնար պարտադրել։ Օրինակի համար, Տասնաբանեային տասներորդ պատուիրանը, որ ցանկալու դէմ էր, անպարտադրելի էր մարդկային հեղինակութիւններու կողմէ։ Ահաւասիկ պարագայ մը՝ որ կը վկայէ Տասնաբանեային աստուածային ծագում ունենալուն, քանի որ մարդկային ոչ մէկ օրէնսդրական մարմին օրէնք մը պիտի դնէր որ պիտի չկարենար, բեկանուելու պարագային, պատժամիջոցներով պարտադրել զայն։ Այս օրէնքով, Եհովա Աստուած իւրաքանչիւր Իսրայելացիի տուաւ ինքն իր անձին ոստիկանը ըլլալու պատասխանատուութիւնը—եթէ կ’ուզէր բարի խղճմտանք մը ունենալ։ (Ելից 20։17) Նմանապէս, անհատ մը Աստուծոյ Թագաւորութիւնը ժառանգելէ զրկող մարմնին գործերուն մաս կը կազմեն «նախանձներ»ը եւ «չար նայուածքներ»ը—հակազդեցութիւններ՝ որոնց դէմ մարդկային դատաւորներ չեն կրնար պատժամիջոցներ պարտադրել։ (Գաղատացիս 5։19–21) Բայց բարի խղճմտանք մը պահելու համար, պէտք է խուսափինք ասոնցմէ։

4. Բարի խղճմտանք մը պահելու համար, Աստուածաշունչի ո՞ր սկզբունքներով պէտք է ապրինք։

⁴ Այո, Աստուածաշունչի սկզբունքներուն համաձայն պէտք է ապրինք։ Այս սկզբունքները կարելի է այն երկու պատուիրաններուն մէջ ամփոփել որոնց մասին Յիսուս արտայայտուեցաւ, երբ պատասխանեց այն հարցումին թէ Մովսիսական օրէնքին մէջ ո՞ր պատուիրանքը մեծագոյն էր։ «Քու Տէր Աստուածդ սիրես քու բոլոր սրտովդ եւ քու բոլոր անձովդ ու քու բոլոր մտքովդ։ ... Քու ընկերդ սիրես քու անձիդ պէս»։ (Մատթէոս 22։36–40) Մատթէոս 7։12–ին մէջ արձանագրուած Յիսուսի խօսքերը կը բացատրեն թէ այս երկրորդ պատուիրանը ի՛նչ կը պարփակէ. «Ուստի ամէն ինչ որ կ’ուզէք որ մարդիկ ձեզի ընեն, դուք ալ անոնց այնպէս ըրէք, քանզի այս է օրէնքը ու մարգարէները»։

5. Եհովա Աստուծոյ հետ ինչպէ՞ս կրնանք լաւ յարաբերութիւն մը պահել։

⁵ Պէտք է ընենք ինչ որ գիտենք թէ շիտակ է եւ ետ կենանք ընելէ ինչ որ գիտենք թէ սխալ է, ուրիշներ զայն նկատեն կամ ոչ։ Ասիկա կ’ընենք նոյնիսկ երբ պատժուելու վտանգը չկայ, չընելով ինչ որ պէ՛տք է ընենք կամ ընելով ինչ որ պէտք չէ՛ ընենք։ Անիկա կը նշանակէ մեր երկնաւոր Հօրը հետ լաւ յարաբերութիւն մը պահել, ի մտի ունենալով Եբրայեցիս 4։13–ին մէջ Պօղոս առաքեալի արտայայտած ազդարարութիւնը. «Չկայ արարած մը որ անոր դէմ չերեւնայ, հապա ամէն բան բաց ու յայտնի է անոր աչքերուն առջեւ, որուն պիտի տրուի մեր հաշիւը»։ Երբ յարատեւենք շիտակը ընելու մէջ, անիկա պիտի օգնէ մեզի որ Բանսարկուին խորամանկ հնարքներուն դէմ մաքառինք, աշխարհի ճնշումներուն դիմադրենք եւ անձնասիրական ժառանգուած հակումներուն դէմ պայքարինք։—Բաղդատել Եփեսացիս 6։11։

Աստուծոյ Կազմակերպութեան Հպատակիլ

6. Նախա–Քրիստոնէական ժամանակներուն, Եհովա հաղորդակցութեան ի՞նչ խողովակներ գործածեց։

⁶ Եհովա Աստուած բոլորովին մեր կամքին բոլորովին չէ ձգած անհատապէս որոշելու թէ մեր կեանքին մէջ ի՛նչպէս պէտք է կիրարկենք Աստուածաշունչի սկզբունքները։ Մարդկային պատմութեան սկիզբէն իսկ, Աստուած մարդիկ գործածած է որպէս հաղորդակցութեան խողովակներ։ Այսպիսով, Ադամ Աստուծոյ խօսնակն էր Եւային համար։ Արգիլուած պտուղին մասին պատուէրը Ադամի տրուեցաւ, Եւայի ստեղծուելէն առաջ, ուստի Ադամ Եւայի տեղեկացուցած ըլլալու էր թէ ինչ էր Աստուծոյ կամքը իրեն համար։ (Ծննդոց 2։16–23) Նոյ Աստուծոյ մարգարէն էր իր ընտանիքին եւ նախա–ջրհեղեղեան աշխարհին համար։ (Ծննդոց 6։13. Բ. Պետրոս 2։5) Աբրահամ Աստուծոյ խօսնակն էր իր ընտանիքին համար։ (Ծննդոց 18։19) Իսրայէլ ազգին համար Մովսէսն էր Աստուծոյ մարգարէն եւ հաղորդակցութեան խողովակը։ (Ելից 3։15, 16. 19։3, 7) Անկէ ետք, մինչեւ Յովհաննէս Մկրտիչ, Աստուած շատ մը մարգարէներ, քահանաներ եւ թագաւորներ գործածեց իր ժողովուրդին իր կամքը հաղորդելու համար։

7, 8. Մեսիային գալովը, որո՞նք գործածուեցան որպէս Աստուծոյ խօսնակներ։ (բ) Բարեպաշտ հպատակութիւնը ի՞նչ կը պահանջէ Եհովայի Վկաներէն այսօր։

⁷ Երբ Մեսիան՝ Յիսուս Քրիստոսը՝ եկաւ, Աստուած զինք եւ իր անմիջական առաքեալներն ու աշակերտները գործածեց որպէս Իր խօսնակները։ Հետագային, Յիսուս Քրիստոսի օծեալ հաւատարիմ հետեւորդները պիտի ծառայէին որպէս «հաւատարիմ ու իմաստուն ծառայ» մը, Եհովայի ժողովուրդին հաղորդելու համար թէ իրենց կեանքին մէջ Աստուածաշունչի սկզբունքները ի՛նչպէս կրնան կիրարկել։ Բարեպաշտ հպատակութիւնը ցոյց տալ կը նշանակէր ընդունիլ Եհովա Աստուծոյ գործածած գործիքը։—Մատթէոս 24։45–47. Եփեսացիս 4։11–14

⁸ Իրողութիւնները ցոյց կու տան որ «հաւատարիմ ու իմաստուն ծառան» այսօր Եհովայի Վկաներուն հետ ընկերակցած է եւ անոնց Կառավարիչ Մարմինով ներկայացուած է։ Այդ մարմինը, իր կարգին, այլազան հանգամանքներ ունեցող տեսուչներ կը նշանակէ—ինչպէս՝ երէցներ եւ շրջուն ներկայացուցիչներ—իւրաքանչիւր շրջանի մէջ գործը առաջնորդելու համար։ Բարեպաշտ հպատակութիւնը իւրաքանչիւր նուիրուած Վկայէ կը պահանջէ որ այս տեսուչներուն հպատակի Եբրայեցիս 13։17–ին հետ համաձայն. «Ձեր առաջնորդներուն մտիկ ըրէ՛ք ու անոնց հնազանդեցէ՛ք, վասնզի անոնք ձեր հոգիներուն համար կը հսկեն, որպէս թէ հաշիւ պիտի տան. որպէսզի խնդութիւնով ընեն այն գործը եւ ոչ թէ հառաչելով, վասնզի այն ձեզի օգտակար չէ»։

Կրթութիւնը Ընդունիլ

9. Բարեպաշտ հպատակութիւնը յաճախ ի՞նչ բանի հետ կապ ունի։

⁹ Բարեպաշտ հպատակութիւնը յաճախ կապ ունի որպէս տեսուչներ ծառայողներէն կրթութիւն ընդունելուն հետ։ Եթէ մենք մեր անձին միշտ պէտք եղած կրթութիւնը չտանք, թերեւս ասիկա ընելու փորձառութիւն ու հեղինակութիւն ունեցողներու՝ ինչպէս մեր ժողովքի երէցներուն՝ կողմէ խրատուելու ու կրթուելու կարիքը ունենանք։ Այսպիսի կրթութիւն ընդունիլը իմաստութիւն է։—Առակաց 12։15. 19։20

10. Կրթութիւն տուողները ի՞նչ պարտաւորութիւն ունին։

¹⁰ Անշուշտ, կրթութիւն տուող երէցները իրենք բարեպաշտ հպատակութեան օրինակներ պէտք է հանդիսանան։ Ինչպէ՞ս։ Ըստ Գաղատացիս 6։1–ին, անոնք ոչ միայն խրատելու լաւ կերպ մը պէտք է ունենան, այլ՝ օրինակելի պէտք է ըլլան։ «Եղբա՛յրներ, եթէ մէկը ոեւէ յանցանքով բռնուելու ըլլայ, դուք որ հոգեւոր էք, այնպիսին հեզութեան հոգիով ուղղութեան բերէք։ Քու անձիդ ալ զգուշութիւն ըրէ որ չըլլայ թէ փորձութեան մէջ իյնաս»։ Ուրիշ խօսքով, երէցին խրատը ներդաշնակ պէտք է ըլլայ իր օրինակին հետ։ Ասիկա համաձայն է Բ. Տիմոթէոս 2։24, 25–ին եւ Տիտոս 1։9–ին մէջ տրուած յորդորանքին։ Այո, յանդիմանութիւն կամ սրբագրութիւն տուողները շատ ուշադիր պէտք է ըլլան որ երբեք կոշտ չըլլան։ Անոնք միշտ հեզ, ազնիւ պէտք է ըլլան եւ սակայն ամուր կառչին Աստուծոյ Խօսքի սկզբունքներուն։ Անոնք անաչառ ունկնդիրներ պէտք է ըլլան, կազդուրիչ՝ անոնց համար, որոնք յոգնած ու բեռնաւորուած են։—Բաղդատել Մատթէոս 11։28–30։

Մեր Վրայ Եղած Իշխանութիւններուն Հպատակիլ

11. Աշխարհային իշխանութիւններուն առնչութեամբ Քրիստոնեաներէն ի՞նչ կը պահանջուի։

¹¹ Բարեպաշտ հպատակութիւնը նաեւ մեզմէ կը պահանջէ աշխարհային իշխանութիւններուն հնազանդիլ։ Հռովմայեցիս 13։1–ին մէջ մեզի խրատ տրուած է. «Ամէն մարդ իր վրայ եղած իշխանութիւններուն թող հնազանդի. վասնզի չկայ իշխանութիւն մը որ Աստուծմէ չըլլայ եւ անոնք որ կան՝ Աստուծմէ կարգուած են»։ Այս խօսքերը մեզմէ կը պահանջեն, ի միջի այլոց, երթեւեկի օրէնքներուն հնազանդիլ եւ մեր տուրքերն ու մաքսերը խղճմտօրէն վճարել, ինչպէս Պօղոս առաքեալ կը նշէ Հռովմայեցիս 13։7–ին մէջ։

12. Կայսրին հանդէպ մեր հպատակութիւնը ի՞նչ իմաստով յարաբերական է։

¹² Սակայն, որոշ է որ Կայսրին հանդէպ այսպիսի հպատակութիւն մը յարաբերական պէտք է ըլլայ։ Միշտ պէտք է յիշենք Յիսուս Քրիստոսի տուած սկզբունքը, որ Մատթէոս 22։21–ին մէջ արձանագրուած է. «Զայն որ Կայսրինն է՝ Կայսրին տուէք եւ զայն որ Աստուծոյն է՝ Աստուծոյ տուէք»։ Թարգմանութեան մը մէջ (Oxford NIV [New International Version] Scofield Study Bible), Հռովմայեցիս 13։1–ի վերաբերեալ աստղանիշ մը դիտել կու տայ. «Ասիկա չի նշանակեր թէ ան պէտք է հնազանդի այն կանոններուն որոնք անբարոյական կամ հակա–Քրիստոնէական են։ Այսպիսի պարագաներուն, անոր պարտականութիւնն է առաւել Աստուծոյ հնազանդիլ քան թէ մարդոց (Գործք 5։29. բաղդ. Դանիէլ 3։16–18. 6։10 եւ յաջորդ համարները)»։

Բարեպաշտ Հպատակութիւն Ընտանեկան Շրջանակէն Ներս

13. Ընտանեկան շրջանակէն ներս բարեպաշտ հպատակութիւնը ի՞նչ կը պահանջէ անոր անդամներէն։

¹³ Ընտանեկան շրջանակէն ներս, ամուսինն ու հայրը կը ծառայէ որպէս գլուխ։ Ասիկա կը պահանջէ կիներէն որ հետեւին Եփեսացիս 5։22, 23–ին մէջ տրուած խրատին. «Կիները իրենց այրերուն հնազանդ ըլլան՝ որպէս թէ Տէրոջը. վասնզի այրը կնոջ գլուխն է, ինչպէս Քրիստոս ալ եկեղեցիին գլուխն է ու ինք մարմնին Փրկիչն է»։a Իսկ գալով զաւակներուն, անոնք իրենց անձնական կանոնները չեն հաստատեր, այլ իրենց հօրը եւ մօրը բարեպաշտ հպատակութիւն կը պարտին, ինչպէս Պօղոս Եփեսացիս 6։1–3–ին մէջ կը բացատրէ. «Ո՛րդիներ, ձեր ծնողներուն հնազանդ եղէ՛ք Տէրոջմով, վասնզի այդ է արժանը։ ‘Պատուէ՛ քու հայրդ ու մայրդ’, որ առաջին պատուիրանքն է խոստումով, ‘որպէսզի քեզի աղէկ ըլլայ ու երկար կեանք ունենաս երկրի վրայ’»։

14. Բարեպաշտ հպատակութիւնը ի՞նչ կը պահանջէ ընտանիքի գլուխներէն։

¹⁴ Անշուշտ, երբ ամուսիններն ու հայրերը իրենք բարեպաշտ հպատակութիւն ցոյց տան, աւելի դիւրին կ’ըլլայ որ կիներն եւ զաւակները այսպիսի բարեպաշտ հպատակութիւն մը ցոյց տան։ Անոնք ասիկա կ’ընեն իրենց գլխաւորութիւնը բանեցնելով, Աստուածաշունչի սկզբունքներուն համաձայն, ինչպէս նշուած է Եփեսացիս 5։28, 29–ին եւ 6։4–ին մէջ. «Նոյնպէս ալ պէտք է որ այրերը իրենց կիները սիրեն իրենց մարմիններուն պէս։ Ան որ իր կինը կը սիրէ, իր անձը կը սիրէ. վասնզի մէկը բնաւ իր անձը չ’ատեր, հապա կը սնուցանէ ու կը խնամէ զանիկա, ինչպէս Տէրն ալ՝ եկեղեցին»։ «Դո՛ւք, հայրե՛ր, ձեր որդիները մի՛ բարկացնէք, հապա զանոնք մեծցուցէք Տէրոջը վարժութիւնովն ու խրատովը»։

Օգնութիւններ Բարեպաշտ Հպատակութիւն Ցոյց Տալու Համար

15. Հոգիին ո՞ր պտուղը պիտի օգնէ մեզի որ բարեպաշտ հպատակութիւն ցոյց տանք։

¹⁵ Ի՞նչ բան մեզի պիտի օգնէ որ այս տարբեր մարզերուն մէջ բարեպաշտ հպատակութիւն ցոյց տանք։ Նախ, անձնուրաց սէրը—սէր Եհովա Աստուծոյ եւ իր կողմէ մեր վրայ հսկելու նշանակուած անհատներուն հանդէպ։ Ա. Յովհաննու 5։3–ին մէջ մեզի կ’ըսուի. «Ասիկա է Աստուծոյ սէրը, որ անոր պատուիրանքները պահենք եւ անոր պատուիրանքները ծանր բան չեն»։ Յովհաննու 14։15–ին մէջ Յիսուս նոյն կէտը շեշտեց. «Եթէ զիս կը սիրէք, իմ պատուիրանքներս պահեցէ՛ք»։ Իրապէս, սէրը—հոգիին առաջնագոյն պտուղը—պիտի օգնէ որ գնահատենք մեզի ի նպաստ Եհովայի ըրած բոլոր բաները եւ այսպիսով բարեպաշտ հպատակութիւն ի գործ դնենք։—Գաղատացիս 5։22

16. Բարեպաշտ վախը ի՞նչ օգնութիւն կը հայթայթէ բարեպաշտ հպատակութիւն ցոյց տալու մէջ։

¹⁶ Երկրորդ, բարեպաշտ վախն է։ Եհովա Աստուած տհաճեցնելու վախը պիտի օգնէ մեզի, քանի որ անիկա «չարութիւնը ատել կը նշանակէ»։ (Առակաց 8։13) Անվիճելիօրէն, Եհովան տհաճեցնելու վախը մեզ ետ պիտի պահէ մարդու վախի դիմաց զիջում ընելէ։ Անիկա նաեւ պիտի օգնէ մեզի Աստուծոյ հրահանգներուն հնազանդելու, ինչ որ ալ ըլլան յաղթահարուելիք դժուարութիւնները։ Ասկէ զատ, անիկա մեզ ետ պիտի պահէ փորձութիւններու կամ չար հակումներու անձնատուր ըլլալէ։ Սուրբ Գրութիւնները ցոյց կու տան որ Եհովայի վախն էր որ կարողութիւն տուաւ Աբրահամին որ փորձէ իր սիրելի որդին՝ Իսահակը՝ զոհ մատուցանել, դարձեալ նոյն վախն էր որ ոյժ տուաւ Յովսէփին որ Պետափրէսի կնոջ անբարոյական առաջարկներուն յաջողութեամբ դէմ դնէ։—Ծննդոց 22։12. 39։9

17. Հաւատքը ի՞նչ դեր կը խաղայ մեր բարեպաշտ հպատակութիւնը ի գործ դնելուն մէջ։

¹⁷ Երրորդ օգնութիւնն է՝ Եհովա Աստուծոյ վրայ հաւատքը։ Հաւատքը մեզ կարող պիտի դարձնէ Առակաց 3։5, 6–ի խրատին հետեւելու. «Քու բոլոր սրտովդ Տէրոջը ապաւինէ եւ քու իմաստութեանդ մի՛ վստահիր։ Քու բոլոր ճամբաներուդ մէջ զանիկա ճանչցիր ու անիկա քու շաւիղներդ պիտի ուղղէ»։ Հաւատքը պիտի օգնէ մանաւանդ երբ մեզի թուի որ անիրաւօրէն կը տառապինք կամ երբ խորհինք որ մեր ցեղին, ազգութեան կամ անձնաւորութեան տարբերութեան պատճառաւ խտրականութեան զոհ դարձած ենք։ Ոմանք թերեւս նաեւ խորհին թէ անիրաւօրէն անտեսուած են, երբ չեն յանձնարարուած որպէս երէց կամ օգնական ծառայ։ Եթէ հաւատք ունինք, Եհովայի պիտի սպասենք որ խնդիրները շտկէ իր յարմար ժամանակին։ Մինչ այդ, թերեւս կարիքը ունինք համբերութիւն մշակելու։—Ողբք 3։26

18. Մեր բարեպաշտ հպատակութիւնը ցոյց տալուն մէջ չորրորդ օգնութիւնը ի՞նչ է։

¹⁸ Չորրորդ օգնութիւնը խոնարհութիւնն է։ Խոնարհ անհատ մը դժուարութիւն չունի բարեպաշտ հպատակութիւն ցոյց տալու, քանի որ ‘խոնարհութիւնով, ան ուրիշները իր անձէն լաւ կը սեպէ’։ Խոնարհ անհատ մը կը յօժարի «պզտիկ»ի մը պէս վարուիլ։ (Փիլիպպեցիս 2։2–4. Ղուկաս 9։48) Բայց հպարտ մէկը չուզէր հպատակիլ. անիկա զինք կը զայրացնէ։ Ըսուած է թէ այսպիսի անձ մը կը նախընտրէ գովասանքներով կորսուիլ, քան քննադատութեամբ փրկուիլ։

19. Դիտարանի Ընկերութեան նախկին նախագահներէն մէկը խոնարհութեան ի՞նչ լաւ օրինակ հանդիսացաւ։

¹⁹ Խոնարհութեան եւ բարեպաշտ հպատակութեան մէջ լաւ օրինակ հանդիսացած է Ժոզէֆ Ռաթհըրֆորտ [Դիտ. Փետրուար 1, 1991, էջ 12]ը, Դիտարանի, Սուրբ Գրոց եւ Թերթիկի Ընկերութեան երկրորդ նախագահը։ Երբ Հիթլէր Գերմանիոյ մէջ Եհովայի Վկաներու գործունէութիւնը արգիլեց, հոն գտնուած եղբայրները նամակ գրեցին, հարցնելու համար թէ ժողովներուն եւ քարոզչական գործունէութեան առնչութեամբ ի՛նչ պէտք էր ընէին։ Ան այս հարցը Պէթէլի ընտանիքին ուշադրութեան յանձնեց եւ անկեղծօրէն ընդունեց որ չէր գիտեր ի՛նչ ըսել Գերմանացի եղբայրներուն, մանաւանդ պարփակուած խիստ պատժամիջոցներուն ի տես։ Ան ըսաւ որ եթէ ոեւէ մէկը գիտէր ի՛նչ ըսել անոնց, ուրախութեամբ մտիկ պիտի ընէր անոր։ Ի՜նչ խոնարհ հոգի մը։b

Բարեպաշտ Հպատակութիւն Ցոյց Տալուն Օգուտները

20. Բարեպաշտ հպատակութիւն ցոյց տալէն ի՞նչ օրհնութիւններ յառաջ կու գան։

²⁰ Տեղին է հարցնել. Բարեպաշտ հպատակութիւն ցոյց տալուն օգուտները ի՞նչ են։ Արդարեւ, շա՜տ են։ Զերծ կը մնանք այն մտատանջութիւններէն եւ յուսախաբութիւններէն որոնք անկախօրէն վարուողներուն վիճակուած են։ Եհովա Աստուծոյ հետ լաւ յարաբերութիւն մը կը վայելենք։ Մեր Քրիստոնեայ եղբայրներուն հետ լաւագոյն ընկերակցութիւնը ունինք։ Ասկէ զատ, օրինապահ ըլլալով, աշխարհային հեղինակութիւններուն հետ անտեղի խնդիրներ ունենալէ կը խուսափինք։ Նաեւ ընտանեկան ուրախ կեանք մը կը վայելենք որպէս ամուսիններ ու կիներ, որպէս ծնողներ ու զաւակներ։ Ասկէ զատ, բարեպաշտ հպատակութեան մէջ շարունակելով, Առակաց 27։11–ին խրատին համաձայն կը վարուինք. «Որդեա՛կ իմ, իմաստուն եղի՛ր ու սիրտս ուրախացո՛ւր, որպէսզի [զիս] անարգողին պատասխան տամ»։

[Ստորանիշ էջ 15]

[Ստորանիշ էջ 17]

Վերաքաղի Հարցումներ

◻ Աստուած ո՞ր մարդիկը գործածեց որպէս հաղորդակցութեան խողովակներ, եւ իր ծառաները անոնց ի՞նչ պարտեցան։

◻ Ո՞ր տարբեր յարաբերութիւններուն մէջ բարեպաշտ հպատակութիւնը կը կիրարկուի։

◻ Ո՞ր յատկութիւնները մեզի պիտի օգնեն բարեպաշտ հպատակութիւն ցոյց տալու։

◻ Բարեպաշտ հպատակութենէն ի՞նչ օրհնութիւններ յառաջ կու գան։

[Նկար՝ էջ 14]

Աստուած Երուսաղէմի տաճարին կառոյցը գործածեց իր ժողովուրդին իր կամքը հաղորդելու համար

[Նկար՝ էջ 16]

Մարզեր՝ որոնց մէջ կրնանք բարեպաշտ հպատակութիւն ցոյց տալ