Քրիստոսի այլակերպութիւնը ի՛նչպէս կ’ազդէ ձեզի

Չորս մարդիկ նոր բարձրացած էին բարձր լեռ մը։ Այդ բարձրութեան մէջ ապշեցուցիչ բան մը պատահեցաւ։ Մինչ երեք շփոթած աշակերտները կը նայէին, Յիսուս Քրիստոս անոնց աչքերուն առջեւ փոխուեցաւ։ Մտիկ ըրէք այս զգայացունց դէպքը տեղեկագրող Մարկոս Աւետարանիչին.

«ՅԻՍՈՒՍ իրեն հետ առաւ Պետրոսն ու Յակոբոսը եւ Յովհաննէսը ու զանոնք բարձր լեռ մը հանեց առանձինն եւ անոնց առջեւ այլակերպեցաւ։ Իր հանդերձները եղան փայլուն, խիստ ճերմակ, այնպէս որ երկրի վրայ թափիչ մը չէր կրնար այդպէս ճերմկցնել։ Ու Եղիան Մովսէսին հետ երեւցաւ անոնց եւ Յիսուսի հետ խօսեցան։ Ապա Պետրոս ըսաւ Յիսուսին. ‘Ռա՛բբի, աղէկ է որ հոս կենանք ու երեք խրճիթ շինենք, մէկը՝ քեզի, մէկը՝ Մովսէսին ու մէկը՝ Եղիային’։ Վասնզի չէր գիտեր թէ ի՛նչ խօսի, քանզի զարհուրեր էին։ Ամպ մը հովանի եղաւ անոնց վրայ ու ձայն մը եկաւ ամպէն՝ ըսելով. ‘Ատիկա է իմ սիրելի Որդիս, ատոր մտիկ ըրէք’։ Երբ յանկարծ ասդին անդին նայեցան, ուրիշ մէկը չտեսան, հապա միայն Յիսուսը՝ իրենց հետ»։—Մարկոս 9։1–7

Խորհեցէ՛ք. Յիսուսի երեսը արեւու պէս կը փայլէր։ (Մատթէոս 17։2) Իր հանդերձները կը պլպլային «այնպէս որ երկրի վրայ թափիչ մը չէր կրնար այդպէս ճերմկցնել»։ Աստուծոյ հզօր ձայնը լսուեցաւ, որ իր Որդւոյն մասին յայտարարութիւն կ’ընէր։ Ի՜նչ հոյակապ դէպք մը։

Հոս գործածուած Յունարէն «այլակերպութիւն» բառը կը նշանակէ «ուրիշ ձեւի մը փոխուիլ»։ Այս բառը գործածուած է նաեւ Հռովմայեցիս 12։2–ի մէջ, ուր Քրիստոնեաներուն խրատ տրուած է որ «փոխուին», իրենց մտքերը նորոգելով։—An Expository Dictionary of New Testament Words, Վայնի կողմէ, Հատոր Դ. էջ 148

Այո, տպաւորիչ դէպք մը տեղի ունեցաւ երբ Յիսուս այլակերպեցաւ Հ.Դ. 32–ի Պէնտէկոստէի տօնակատարութենէն քիչ ետք։ Ի՞նչ բան պատճառ եղաւ այս հրաշքին։ Անիկա մասնաւոր նպատակ մը ունէ՞ր։ Ինչո՞ւ Մովսէս եւ Եղիա երեւցան։ Իսկ Քրիստոսի այլակերպութիւնը ինչպէ՞ս կ’ազդէ ձեզի։

Նախորդող Դէպքեր

Լեռ բարձրանալէ առաջ, Յիսուս եւ իր աշակերտները Փիլիպպոսի Կեսարիայի մօտերը կը գտնուէին։ Քանի որ այս քաղաքը Հերմոն Լեռնէն 25 քմ. հարաւ–արեւմուտքը կը գտնուի, այլակերպութիւնը այս լերան բարձր կատարներէն մէկուն վրայ տեղի ունեցած ըլլալու է։

Մինչ դէպի «բարձր լեռ»ը կը քալէին, Յիսուս հարցուց իր աշակերտներուն. «Ինծի համար ո՞վ կ’ըսեն մարդիկ թէ եմ»։ Անոնք պատասխանեցին. «Ոմանք՝ Յովհաննէս Մկրտիչը, [ուրիշներ ալ՝ Եղիան], իսկ ուրիշներ ալ մարգարէներէն մէկը»։ Ապա Քրիստոս հարցուց. «Հապա դո՞ւք, ինծի համար ո՞վ կ’ըսէք»։ Պետրոս պատասխանեց. «Դուն ես Քրիստոսը»։ Ասոր վրայ, Յիսուս «սաստիկ պատուիրեց անոնց՝ որ իրեն համար մարդո՛ւ բան չըսեն։ Յետոյ սկսաւ սորվեցնել անոնց թէ ‘պէտք է Որդին մարդոյ շատ չարչարանքներ կրէ ու երէցներէն եւ քահանայապետներէն ու դպիրներէն մերժուի ու սպաննուի ու երեք օրէն յետոյ յարութիւն առնէ»։—Մարկոս 8։27–31

Յիսուս շարունակելով հետեւեալ խոստումը տուաւ. «Հոս ներկայ եղողներէն մէկ քանիները կան՝ որոնք մահուան համը պիտի չառնեն, մինչեւ տեսնեն Աստուծոյ թագաւորութիւնը զօրութիւնով եկած»։ (Մարկոս 9։1. Մատթէոս 16։28) Այս խոստումը կատարուեցաւ «վեց օր յետոյ», երբ Յիսուս կ’աղօթէր ու Պետրոսի, Յակոբոսի եւ Յովհաննէսի առջեւ այլակերպեցաւ։ Ղուկաս կ’ըսէ թէ ասիկա տեղի ունեցաւ «ութ օր ետքը», հաւանաբար ան կը հաշուէր խոստումը տրուած եւ դէպքը կատարուած օրերը։—Մատթէոս 17։1, 2. Մարկոս 9։2. Ղուկաս 9։28

Երազ Կամ Ցնորք մը Չէ

Յիսուսի այլակերպութիւնը երազ մը չէր։ Երեք առաքեալներն ալ չէին կրնար նոյն երազը տեսնել, իսկ Յիսուս զանիկա «տեսիլք» կոչեց։ Ատիկա ցնորք ալ չէր, քանի որ Մատթէոս 17։9–ի մէջ գործածուած Յունարէն բառը ուրիշ տեղ ‘երեւոյթ’ թարգմանուած է։ (Գործք 7։31, ՆԱ։) Ուստի, տեսնողները ամբողջովին արթուն էին եւ իրենց աչքերով եւ ականջներով տեսան ու լսեցին պատահածը։—Ղուկաս 9։32

Իրապէս արթուն՝ բայց շփոթած ըլլալով, Պետրոս թելադրեց որ երեք վրան կանգնեն, մէկը Յիսուսին, մէկը Մովսէսին եւ մէկը Եղիային համար։ (Ղուկաս 9։33) Պետրոսի խօսած ատեն ամպը որ պատեց, բացայայտօրէն կը մատնանշէր լերան վրայ Աստուծոյ ներկայութեան, ճիշդ անապատին մէջ Իսրայէլի վկայութեան վրանին ամպին նման։ (Ելից 40։34–38. Ղուկաս 9։34) Իսկ առաքեալները վստահաբար քնացած չէին, երբ Հայրը յայտարարեց. «Ատիկա է իմ սիրելի Որդիս, որուն հաւներ եմ»։—Բ. Պետրոս 1։17, 18. Ղուկաս 9։35

Ի՛նչու Մովսէս Երեւցաւ

Այլակերպութեան ժամանակ, Մովսէս ‘բան մը չէր գիտեր’, քանի որ դարեր առաջ մեռած էր։ (Ժողովողի 9։5, 10) Դաւիթի նման, ան ալ յարուցուած չէր եւ հետեւաբար անձնապէս ներկայ չէր հոն։ (Գործք 2։29–31) Բայց այս տեսիլքին մէջ ինչո՞ւ Մովսէս երեւցաւ Քրիստոսին հետ։

Աստուած ըսած էր Մովսէսին. «Քեզի պէս մարգարէ մը պիտի հանեմ անոնց իրենց եղբայրներուն մէջէն եւ իմ խօսքերս իրենց բերանը պիտի դնեմ ու ինչ որ անոր պատուիրեմ, անոնց պիտի ըսէ»։ (Բ. Օրինաց 18։18) Պետրոս այս մարգարէութիւնը մասնայատուկ կերպով Յիսուս Քրիստոսի կիրարկեց։ (Գործք 3։20–23) Յիսուսէ զատ, Մովսէս Աստուծոյ կողմէ Իսրայէլ ազգին ղրկուած մեծագոյն մարգարէն էր։

Նմանութիւններ գոյութիւն ունին Մովսէսի եւ Մեծագոյն Մովսէսի՝ Յիսուս Քրիստոսի միջեւ։ Օրինակի համար, անոնց մանկութեան, երկուքին ալ կեանքերը վտանգուեցան բռնատէր իշխաններու կողմէ, բայց Աստուած հոգ տարաւ որ այս մանուկները խնայուին։ (Ելից 1։20–2։10. Մատթէոս 2։7–23) Երկուքն ալ որպէս Եհովայի մասնաւոր ծառաներ, իրենց ասպարէզը սկսելէն առաջ, 40 օր ծոմապահութեամբ անցուցին։ (Ելից 24։18. 34։28. Բ. Օրինաց 9։18, 25. Մատթէոս 4։1, 2) Իսկ, թէ՛ Մովսէս եւ թէ Յիսուս Աստուծոյ զօրութեամբ հրաշքներ ըրին։—Ելից 14։21–31. 16։11–36. Սաղմոս 78։12–54. Մարկոս 4։41. Ղուկաս 7։18–23. Յովհաննու 14։11

Աստուած Մովսէսը գործածեց որպէսզի Իսրայէլը ազատագրէ Եգիպտական կապանքէն, ինչպէս որ Յիսուս հոգեւոր ազատագրութիւն բերաւ։ (Ելից 12։37–14։31. Յովհաննու 8։31, 32) Մովսէս առանձնաշնորհումը ունեցաւ Օրէնքի ուխտին միջնորդը ըլլալու Աստուծոյ եւ Իսրայելացիներուն միջեւ, մինչ Յիսուս նոր ուխտին Միջնորդն է։ (Ելից 19։3–9. 34։3–7. Երեմեայ 31։31–34. Ղուկաս 22։20. Եբրայեցիս 8։3–6. 9։15) Եհովա նաեւ Մովսէսը գործածեց որպէսզի Իրեն համար անուն մը շինէ Իսրայելացիներուն, Եգիպտացիներուն եւ ուրիշներուն առջեւ, ճիշդ ինչպէս Յիսուս Քրիստոս Եհովայի սուրբ անունը մեծարեց։ (Ելից 9։13–17. Ա. Թագաւորաց 6։6. Յովհաննու 12։28–30. 17։5, 6, 25, 26) Այլակերպուած Յիսուսին հետ Մովսէսը երեւցնելով, Աստուած ցոյց տուաւ որ Քրիստոս այս հանգամանքով պիտի ծառայէր շատ աւելի մեծ տարողութեամբ։

Ի՛նչու Եղիան Երեւցաւ

Թէեւ վախճանած Եղիա մարգարէն յարուցուած չէր, բայց յարմար էր որ ան այլակերպումի տեսիլքին մէջ երեւնար։ Եղիա մաքուր պաշտամունքը վերահաստատելու եւ Իսրայելացիներուն մէջ Եհովայի անունը սրբացնելու մէջ կարեւոր գործ մը տեսաւ։ Յիսուս Քրիստոս ալ նոյնը ըրաւ երբ երկրի վրայ էր եւ տակաւին շատ աւելին պիտի ընէ, մաքուր կրօնքը հաստատելով եւ իր երկնաւոր Հօրը անունը ջատագովելով, Մեսիական Թագաւորութեան միջոցաւ։

Մաղաքիա մարգարէն ցոյց տուաւ որ Եղիայի գործը ապագայ գործունէութեան մը նախաշուքն էր։ Մաղաքիայի միջոցաւ Աստուած ըսաւ. «Ահա ես Եղիա մարգարէն ձեզի պիտի ղրկեմ դեռ Տէրոջը մեծ ու ահեղ օրը չեկած։ Անիկա հայրերուն սիրտը՝ որդիներուն ու որդիներուն սիրտը հայրերուն պիտի դարձնէ, որ չըլլայ թէ ես գամ ու երկիրը անէծքով զարնեմ»։—Մաղաքեայ 4։5, 6

Այս մարգարէութիւնը իր պզտիկ կատարումը ունեցաւ Յովհաննէս Մկրտիչի գործունէութեամբ։ Յիսուս ասոր մատնանշեց իր այլակերպութենէն ետք, երբ իր աշակերտները հարցուցին թէ ի՛նչու դպիրները կ’ըսեն որ Մեսիային երեւնալէն առաջ, նախ Եղիան պէտք է գայ։ Յիսուս ըսաւ. «Յիրաւի առաջ Եղիան կու գայ եւ ամէն բան կարգի կը դնէ։ Բայց ձեզի կ’ըսեմ թէ Եղիան արդէն եկած է եւ զանիկա չճանչցան, հապա ինչ որ ուզեցին ըրին անոր. նոյնպէս ալ Որդին մարդոյ անոնցմէ պիտի չարչարուի»։ Պատմութիւնը կը շարունակէ ըսել. «Այն ատեն հասկցան աշակերտները թէ Յովհաննէս Մկրտիչին համար ըսաւ անոնց»։—Մատթէոս 17։10–13

Յովհաննէս Եղիայի նման գործ մը կատարեց, երբ Օրէնքի ուխտին դէմ իրենց կատարած մեղքերէն զղջացող Հրեաները մկրտեց։ Ասկէ կարեւորը, Յովհաննէս Մեսիայի նախակարապետն էր եւ Յիսուս Քրիստոսը ներկայացուց։ (Մատթէոս 11։11–15. Ղուկաս 1։11–17. Յովհաննու 1։29) Բայց ինչո՞ւ Յովհաննէսի գործը Մաղաքիայի մարգարէութեան պզտիկ մէկ կատարումն էր։

Այս տեսիլքին մէջ Եղիան երեւցաւ որ Յիսուսին հետ կը խօսէր։ Ասիկա Յովհաննէս Մկրտիչի մահուընէ ետքն էր, ուստի կը հետեւցուի որ ապագային, Եղիայի գործին նման գործ մը պիտի կատարուէր։ Ասկէ զատ, մարգարէութիւնը ցոյց կու տար թէ այս գործը պիտի կատարուէր «Տէրոջը մեծ ու ահեղ օրը» գալէն առաջ։ Արագօրէն մօտեցող այդ դէպքը կը բովանդակէ նաեւ Արմագեդոնին «Ամենակալ Աստուծոյ այն մեծ օրուան պատերազմ»ը։ (Յայտնութիւն 16։14–16) Ասիկա կը նշանակէր թէ այն ատեն տակաւին ապագային հաստատուելիք, Աստուծոյ երկնային Թագաւորութեան պիտի նախորդէր Եղիայի եւ անոր յաջորդը եղող Եղիսէի նման գործունէութիւն մը։ Իսկ հիմա մէկ դարէ աւելի է որ Եհովայի արդի Վկաները գործունէութիւն մը մղած են, որու նպատակն է մաքուր պաշտամունքը վերահաստատել եւ Աստուծոյ անունը պանծացնել։—Սաղմոս 145։9–13. Մատթէոս 24։14

Անոր Նպատակը

Այլակերպութիւնը Յիսուսը զօրացուցած ըլլալու էր, իր ենթարկուելիք չարչարանքներուն եւ մահուան համար։ Յիսուսի հաւատքը ցօրացած ըլլալու էր, լսելով իր երկնաւոր Հօրը ձայնը, որ իրեն համար կ’ըսէր թէ Իր սիրելի Որդին է։ Բայց այլակերպութիւնը ուրիշներուն համար ի՞նչ օգուտ ունի։

Յիսուսի այլակերպութիւնը, ականատեսներուն հաւատքն ալ զօրացուց։ Անիկա անոնց մտքերուն վրայ դրոշմեց թէ Յիսուս Քրիստոս Աստուծոյ Որդին է։ Արդարեւ, քանի որ Եհովայի Գլխաւոր Խօսնակը, Բանը, անոնց մէջ կը գտնուէր, անոնք լսեցին ուղղակի Աստուծոյ ձայնը որ կ’ըսէր. «Ատիկա է իմ սիրելի Որդիս, որուն հաւներ եմ»։ Թէեւ Եհովա վկայած էր Յիսուսի մկրտութեան ատեն, սակայն այլակերպութեան ընթացքին, ան աւելցուց որ աշակերտները Իր Որդւոյն մտիկ պէտք է ընեն։—Մատթէոս 3։13–17. 17։5. Յովհաննու 1։1–3, 14

Ուրիշ կերպով մըն ալ այլակերպութիւնը հաւատք ցօրացուց։ Տեսիլքի ընթացքին, Յիսուս, «Մովսէս» եւ «Եղիա» կը խօսէին «անոր այս կեանքէն ելլելուն [մեկնելուն] վրայով ... որ Երուսաղէմի մէջ պիտի կատարուէր»։ (Ղուկաս 9։31) «Մեկնիլ» բառը թարգմանուած է Յունարէն Էկզոտոս բառին որպէս մէկ ձեւը։ Այս էկզոտոսը կամ մեկնիլը բացայայտօրէն կը բովանդակէր Յիսուսի մահը եւ Աստուծոյ կողմէ հոգեւոր կեանքի յարուցուիլը։ (Ա. Պետրոս 3։18) Ուստի, այլակերպութիւնը Քրիստոսի յարութեան վրայ ալ հաւատք զօրացուց։ Անիկա մասնաւորաբար հաւատք կերտեց, Մեսիական Թագաւորութեան մէջ Յիսուսի Թագաւոր ըլլալուն մասին համոզիչ ապացոյցներ հայթայթելով։ Ասկէ զատ, տեսիլքը ցոյց տուաւ թէ Թագաւորութիւնը փառաւոր պիտի ըլլար։

Այլակերպութիւնը նաեւ Աստուածաշունչի մարգարէութեան վրայ իրենց հաւատքը զօրացուց։ Շուրջ 32 տարի ետք (Հ.Դ. 64–ին), Պետրոս տակաւին չէր մոռցած այս փորձառութիւնը եւ գրեց. «Ո՛չ թէ մենք վարպետութեամբ շինուած առասպելներու ետեւէ երթալով՝ մեր Տէր Յիսուս Քրիստոսի զօրութիւնը ու գալուստը ձեզի ցուցուցինք, հապա անոր մեծափառութեանը ականատես ըլլալով։ Վասնզի ինք Հօր Աստուծմէն փառք ու պատիւ առաւ այն մեծավայելչութեան փառքէն այնպիսի ձայն մը եկաւ, թէ՝ ‘Ատիկա է իմ սիրելի Որդիս, որուն հաւներ եմ’։ Եւ երկինքէն եկած այս ձայնը լսեցինք մենք, որ անոր հետ էինք սուրբ լերանը վրայ։ Մարգարէական խօսքն ալ ունինք, որ աւելի հաստատուն է ու աղէկ կ’ընէք՝ եթէ անոր ուշադրութիւն ընէք, որպէս թէ մութ տեղը լոյս տուող ճրագի մը, մինչեւ ցորեկը լուսնայ ու արուսեակը սրտերնուդ մէջ ծագի»։—Բ. Պետրոս 1։16–19

Անոր Նշանակութիւնը Ձեզի Համար

Այո, Պետրոս Յիսուսի այլակերպութիւնը նկատեց որպէս Աստուծոյ մարգարէական խօսքին հզօր հաստատումը։ Յովհաննէս առաքեալ ալ թերեւս այս տեսիլքին ակնարկեց, երբ ըսաւ. «Բանը մարմին եղաւ ու մեր մէջ բնակեցաւ, (եւ անոր փառքը տեսանք՝ Հօրմէն միածնի փառքին պէս), շնորհքով ու ճշմարտութիւնով լեցուն»։ (Յովհաննու 1։14) Հետեւաբար, այլակերպութիւնը կրնայ ձեր հաւատքը կերտել Եհովայի մարգարէական խօսքին հանդէպ։

Այլակերպութիւնը եւ անոր հետ յարակցութիւն ունեցող դէպքերը կրնան ձեր հաւատքը զօրացնել թէ Յիսուս Քրիստոս Աստուծոյ Որդին եւ խոստացեալ Մեսիան է։ Անիկա կրնայ ձեր հաւատքը զօրացնել նաեւ երկնային կեանքի համար Յիսուսի յարութեան վրայ։ Այս ապշեցուցիչ տեսիլքը նաեւ ձեր հաւատքը պէտք է աւելցնէ Աստուծոյ կառավարութեան վրայ, քանի որ այլակերպութիւնը Քրիստոսի փառքին եւ Թագաւորական զօրութեան նախատեսիլն էր։

Մասնաւորաբար հաւատք կը զօրացնէ գիտնալ թէ Քրիստոսի այլակերպութիւնը մեր օրերուն կը մատնանշէր, երբ Քրիստոսի ներկայութիւնը իրողութիւն մըն է։ (Մատթէոս 24։3–14) Ան 1914–էն ի վեր երկնքի մէջ կը թագաւորէ որպէս Աստուծոյ նշանակած Թագաւորը։ Իր աստուածատուր հեղինակութիւնը եւ զօրութիւնը շուտով ի գործ պիտի դնէ աստուածային իշխանութեան բոլոր հակառակորդներուն դէմ, նոր աշխարհի մը ճամբան բանալով։ (Բ. Պետրոս 3։13) Կրնաք անվերջ օրհնութիւններ վայելել, եթէ հաւատք ընծայէք Յիսուս Քրիստոսի այլակերպութեան մէջ ներկայացուած հոյակապ բաներուն։