Բարեպաշտ հնազանդութիւն կրօնապէս բաժնուած ընտանիքի մը մէջ

«ՖԻԶԻՔԱԿԱՆ որեւէ հարուածէ աւելի կը վիրաւորէ անիկա։ ... Ամբողջովին ջախջախուած կը զգամ եւ տակաւին ոչ ոք կը տեսնէ զայն»։ «Երբեմն կեանքէս կը զզուիմ ... կամ կ’ուզեմ տունը ձգել ու բնաւ չվերադառնալ»։ «Երբեմն դժուար է շիտակ խորհիլ»։

Յուզումով լեցուն այս խօսքերը յուսահատութեան եւ առանձնութեան զգացումներ կը յայտնեն։ Ասոնք իրենց կողակիցներուն կամ ընտանիքի անդամներուն կողմէ բերանացի եղծանումի՝ դատապարտութիւններու, սպառնալիքներու, վարկաբեկիչ ածականներու, լուռ վերաբերմունքին՝ եւ նոյնիսկ ֆիզիքական եղծանումի զոհ գացողներու կողմէ կ’արտասանուին։ Այս անհատները ինչո՞ւ այսպիսի գէշ վերաբերմունքի կ’ենթարկուին։ Պարզապէս, կրօնական տարբեր հաւատալիքներու պատճառաւ։ Այս պարագաներուն ներքեւ, կրօնապէս բաժնուած ընտանիքի մը մէջ ապրիլը իրապէս մարտահրաւէր մը կը դարձնէ Եհովայի պաշտամունքը։ Այսուհանդերձ, զոհ գացող բազմաթիւ Քրիստոնեաներ յաջող կերպով բարեպաշտ հնազանդութիւն կը ցուցաբերեն։

Բարեբախտաբար, կրօնապէս բաժնուած բոլոր տուներուն մէջ այսպիսի մտատանջութիւն ու լարուածութիւն գոյութիւն չունի, սակայն եւ այնպէս, անոնք գոյութիւն ունին։ Ձեր տունը այսպիսի նկարագրութեան կը յարմարի՞։ Եթէ այո, այդ պարագային թերեւս տեսնէք որ դժուար է ձեր կողակիցին կամ ձեր ծնողքին հանդէպ յարգանք պահել։ Եթէ այսպիսի պարագայի ներքեւ եղող կին մը, կամ այսպիսի միջավայրի մէջ եղող զաւակներ էք, ինչպէ՞ս կրնաք բարեպաշտ հնազանդութիւն ցուցաբերել կրօնապէս բաժնուած տան մը մէջ։ Ուրիշներ ինչպէ՞ս կրնան թիկունք կանգնիլ։ Իսկ Աստուած ինչպէ՞ս կը դիտէ այս հարցը։

Ինչո՞ւ Այդքան Դժուար Է Հնազանդիլ

Աշխարհի շահախնդրութիւնն ու ապերախտութիւնը ձեր անկատար հակումներուն կ’ազդեն եւ բարեպաշտ հնազանդութիւնը յարատեւ պայքարի մը կը վերածեն։ Սատանան գիտէ ասիկա եւ իր նպատակն է ձեր վճռակամութիւնը ջախջախել։ Ան յաճախ ընտանիքի անդամները կը գործածէ, որոնք աստուածային չափանիշներու հանդէպ շատ քիչ կամ ոչ մէկ գնահատութիւն ու յարգանք ունին։ Ձեր հոգեւոր եւ բարոյական բարձր արժէքները յաճախ բոլորովին տարբեր են ձեր անհաւատ ընտանիքին անդամներուն արժէքներէն։ Ասիկա վարքի եւ գործունէութեան նկատմամբ հակասական տեսակէտներ կը նշանակէ։ (Ա. Պետրոս 4։4) Ձեզ Քրիստոնէական չափանիշներէն հեռացնելու ճնշումը կրնայ մեծ ըլլալ, քանի որ դուք հետեւեալ պատուէրին հնազանդած էք. «Կցորդ մի՛ ըլլաք խաւարին անպտուղ գործերուն»։ (Եփեսացիս 5։11) Անոնց աչքին, այլեւս ի՛նչ ալ ընէք շիտակ չէ։ Անոնք ամէն անհամաձայնութիւն ձեր կրօնքին կը վերագրեն։ Երբ հիւանդ զաւակներով ծանրաբեռնուած զգաց, մայր մը իր ամուսինէն օգնութիւն խնդրեց, բայց հեգնական պատասխան մը ստացաւ. «Կրօնքիդ համար ժամանակ ունիս, ուրեմն օգնութեան պէտք չունիս»։ Այսպիսի խօսքեր հնազանդութեան մարտահրաւէրը կը դժուարացնեն։

Ապա, կան ժամանակներ, երբ կրնաք չհամաձայնիլ այն հարցերուն շուրջ, որոնք Սուրբ Գրութիւններուն ուղղակիօրէն չեն հակասեր։ Բայց կը գիտակցիք որ ընտանիքի մը մէկ մասն էք եւ այդ մարզին մէջ որոշ պարտականութիւններ ունիք։ «Շատ կը յուզուիմ, երբ կը մտածեմ թէ հայրս ի՛նչպէս կը վարուի մեզի հետ, քանի որ կը հասկնամ որ ան առանձին կը զգայ», կ’ըսէ Գաննի։ «Յաճախ ես ինծի պէտք է յիշեցնեմ որ հօրս հակառակութեան պատճառաւ չընդվզիմ։ Ես ինծի պէտք է ըսեմ որ զօրաւոր պատճառ մը կայ թէ ան ի՛նչու կը հակազդէ կամ մեր դիրքը կը մերժէ։ Սատանան իրերու այս դրութեան իշխանն է»։ Սիւզանը, որ Վկայ չեղողի մը հետ ամուսնացած է, կը վստահի. «Սկիզբը, սովորութիւն ունէի խորհելու թէ իրմէ պէտք է բաժնուիմ. բայց այլեւս այդպէս չեմ խորհիր։ Գիտեմ որ Սատանան զինք կը գործածէր ինծի հասնելու համար»։

Գրեթէ այնպէս կը թուի որ Սատանան կը ջանայ յարատեւաբար ձեզի զգացնել տալ որ դուք անարժէք էք։ Թերեւս օրեր կ’անցնին ձեր կողակիցին հետ առանց բառ մը փոխանակելու։ Շատ առանձին կրնաք զգալ։ Ասիկա ձեր վստահութիւնն ու արժանապատուութիւնը կը մաշեցնէ եւ ձեր բարեպաշտ հնազանդութիւնը փորձի կ’ենթարկէ։ Զաւակներն ալ զգացական եւ ֆիզիքական չորութիւն կը զգան։ Առիթով մը, նոյնիսկ երբ իրենց ծնողները առարկեցին, Աստուծոյ երեք պատանի ծառաներ հաւատարմօրէն Քրիստոնէական ժողովներու ներկայ գտնուեցան։ Անոնցմէ մէկը, որ հիմա լման ժամանակով ծառայ քոյր մըն է, ընդունեց. «Թմրած եւ ուժաթափ եղած կը զգայինք. չէինք կրնար քնանալ. ասիկա մեր սրտերը կը կոտրէր»։

Աստուած Ի՞նչ կ’Ակնկալէ Ձեզմէ

Աստուծոյ հանդէպ հնազանդութիւնը միշտ առաջին տեղը կը գրաւէ, իսկ ամուսնոյն գլխաւորութեան հանդէպ յարաբերական հնազանդութիւնը միշտ պէտք է ըլլայ այն կերպով զոր Եհովա կ’ուղղէ։ (Գործք 5։29) Ատիկա կրնայ դժուար ըլլալ, բայց կարելի է։ Օգնութեան համար շարունակեցէք Աստուծոյ նայիլ։ Ան կ’ուզէ որ դուք «հոգիով ու ճշարտութիւնով երկրպագութիւն» ընէք եւ իր առաջնորդութեան մտիկ ընէք ու ենթարկուիք։ (Յովհաննու 4։24) Աստուծոյ Խօսքէն գիտութիւնը, երբ ուղիղ սրտի մը հասնի, յօժարակամ հնազանդութեան կը մղէ։ Թէեւ ձեր անձնական պարագաները կրնան փոխուիլ, բայց ոչ Եհովան, ոչ ալ իր Խօսքը կը փոխուին։ (Մաղաքեայ 3։6. Յակոբու 1։17) Եհովա գլխաւորութիւնը ամուսինին յանձնած է։ Ամուսինը Քրիստոսի գլխաւորութիւնը ընդունի թէ ոչ, ասիկա չի փոխուիր։ (Ա. Կորնթացիս 11։3) Թէեւ կրնայ դժուար ըլլալ ասոր հետ ապրիլ, երբ անդադար եղծանումի եւ նուաստացումի ենթարկուիք, սակայն Յակոբոս աշակերտ կ’ըսէ. «Վերին իմաստութիւնը ... հլու» է։ (Յակոբու 3։17) Այս գլխաւորութիւնը անվարան ճանչնալը եւ ընդունիլը Աստուծոյ հոգին, յատկապէս անոր մէկ պտուղը՝ սէրը, կը պահանջեն։—Գաղատացիս 5։22, 23

Երբ մէկը սիրէք, աւելի դիւրին կ’ըլլայ Աստուծոյ կողմէ հաստատուած հեղինակութեան հանդէպ բարեպաշտ հնազանդութիւն ցուցաբերել։ Եփեսացիս 5։33–ը կը խրատէ. «Ձեզմէ ամէն մէկն ալ իր կինը այնպէս սիրէ՝ որպէս թէ իր անձը ու կինը իր այրէն ակնածի»։

Յիսուսը նկատի առէք։ Թէեւ ան բերանացի ու ֆիզիքական եղծանումի ենթարկուեցաւ, սակայն բնաւ չնախատեց։ Ան անմեղադրելի գտնուեցաւ։ (Ա. Պետրոս 2։22, 23) Այսպիսի դառն վարկաբեկումներու համբերելու համար, Յիսուս մեծ քաջութեան եւ իր Հօրը՝ Եհովայի՝ հանդէպ անշեղ սիրոյ կարիքը ունէր։ Բայց սէրը «ամէն բանի կը համբերէ»։—Ա. Կորնթացիս 13։4–8

Պօղոս Տիմոթէոսին՝ իր գործակիցին՝ յիշեցուց եւ մեզի ալ կը յիշեցնէ. «Աստուած մեզի երկչոտութեան հոգի չտուաւ, հապա զօրութեան ու սիրոյ եւ զգաստութեան»։ (Բ. Տիմոթէոս 1։7) Եհովայի եւ Յիսուս Քրիստոսի հանդէպ խոր սէրը կրնայ մղել ձեզ որ, երբ պարագան անտանելի թուի, բարեպաշտ հնազանդութեամբ համբերէք։ Զգաստութիւնը պիտի օգնէ ձեզի որ հաւասարակշռուած տեսակէտ մը պահէք եւ շարունակէք Եհովային եւ Յիսուս Քրիստոսին հետ ձեր յարաբերութեան մասին մտածել։—Բաղդատել Փիլիպպեցիս 3։8–11։

Բարեպաշտ Հնազանդութիւն Ցուցաբերող Յաջողակ Կողակիցներ

Երբեմն երկար ժամանակ պէտք է սպասէք տեսնելու համար թէ Եհովա ի՛նչպէս պիտի լուծէ ձեր խնդիրները։ Սակայն, իր ձեռքը բնաւ կարճ չէ։ «Միշտ ըրէք ա՛յն բաները որոնց համար Եհովա ընելու իրաւունքն ու առանձնաշնորհումը կու տայ. ժողովներուն եւ համաժողովներուն զինք պաշտել, ուսումնասիրել, ծառայութեան երթալ եւ աղօթել», կը խրատէ բարեպաշտ հնազանդութիւն ցուցաբերող յաջողակ քոյր մը։ Եհովա ձեր ջանքերն է, որ կ’օրհնէ եւ ոչ թէ միայն արդիւնքները։ Բ. Կորնթացիս 4։17–ին մէջ, Պօղոս առաքեալ ըսաւ որ ‘մեր վայրկենական նեղութիւնը յաւիտենական փառք կը ներգործէ’։ Ասոր վրայ խոկացէք։ Անիկա հաստատուն տարր մը պիտի ըլլայ։ Կին մը դիտել կու տայ. «Ընտանեկան կեանքս չի բարելաւուիր եւ երբեմն ես ինծի հարց կու տամ թէ արդեօք Եհովա կը հաճի՞ ինծի։ Բայց բան մը զոր ես օրհնութիւն կը նկատեմ այն իրողութիւնն է թէ ես այս դժուար պարագաներուն աւելի լաւ կը տոկամ քան ամուսինս։ Երբ գիտենք որ մեր արարքները Եհովայի հաճելի են, այդ պարագային կ’արժէ ամբողջ նեղութիւնը կրել»։

Եհովա կը խոստանայ որ ինք թոյլ պիտի չտայ որ դուք ձեր կարողութենէն աւելի տոկաք։ Իրեն վստահեցէ՛ք։ Ան ձեզմէ աւելի լաւ գիտէ եւ ձեզ աւելի լաւ կը ճանչնայ քան դուք ձեզի։ (Հռովմայեցիս 8։35–39. 11։33. Ա. Կորնթացիս 10։13) Դժուար պարագաներու ներքեւ, Եհովայի աղօթելը կ’օգնէ։ Աղօթեցէք որ իր հոգին ձեզ առաջնորդէ, մասնաւորաբար երբ չէք գիտեր ո՛ր ճամբան առնել կամ պարագայ մը ի՛նչպէս ձեռք առնել։ (Առակաց 3։5. Ա. Պետրոս 3։12) Ձեր կեանքին մէջ հեղինակութիւններու հնազանդելու համար, անդադար համբերութիւն, ժուժկալութիւն եւ խոնարհութիւն աղաչեցէք Իրմէ։ Սաղմոսերգուն ըսաւ. «Տէրը իմ վէմս, ամրութիւնս ու փրկիչս է»։ (Սաղմոս 18։2) Այս խօսքերը յիշելը զօրացուցիչ օգնութիւն մըն է կրօնապէս բաժնուած ընտանիքներու մէջ ապրողներուն համար։

Նախ եւ առաջ ամէն ջանք թափեցէք, որպէսզի ուրախ ամուսնութիւն մը ունենաք։ Այո, Յիսուս նախատեսեց որ բարի լուրը բաժանումներ պիտի պատճառէր։ Սակայն, աղօթեցէք որ որեւէ բաժանում ձեր կեցուածքին եւ վարքին պատճառաւ չըլլայ։ (Մատթէոս 10։35, 36) Այս նպատակով, համագործակցութիւնը ամուսնական խնդիրները կը նուազեցնէ։ Նոյնիսկ երբ այս պատշաճ կեցուածքը ցուցաբերողը միայն դուք էք, անիկա կրնայ մեծապէս նպաստել որ խնդիրները զօրաւոր ընդհարումի եւ անհամաձայնութեան աստիճանին չհասնին։ Համբերութիւնն ու սէրը շատ կարեւոր են։ «Հեզահոգի» եղէք եւ ‘ոխ մի՛ պահէք’։—Բ. Տիմոթէոս 2։24

Պօղոս առաքեալ ‘ամենուն հետ ամէն բան եղաւ’։ (Ա. Կորնթացիս 9։22) Նմանապէս, Քրիստոնէական պարտականութիւններուն մէջ համակերպումներ չընելով հանդերձ, թերեւս երբեմն ձեր յայտագիրը պէտք է վերաճշդէք ձեր կողակիցին եւ ընտանիքին հետ աւելի ժամանակ անցնելու համար։ Կարելի եղած չափով շատ ժամանակ տրամադրեցէք անոր որու հետ ընտրած էք ձեր կեանքը բաժնել։ Քրիստոնէական փափկանկատութիւն ցուցաբերեցէք։ Ասիկա բարեպաշտ հնազանդութեան արտայայտութիւն մըն է։

Ճկուն եւ կարեկից աստուածավախ եւ հնազանդ կին մը աւելի դիւրին կը գտնէ բարեպաշտ հնազանդութիւն ցուցաբերել։ (Եփեսացիս 5։22, 23) Շնորհքով եղող՝ «աղով համովցած»՝ խօսքերը կը նուազեցնեն յաճախակի վէճերը։—Կողոսացիս 4։6. Առակաց 15։1

Աստուածային իմաստութիւնը կը պատուիրէ ձեզ որ անհամաձայնութիւնները շուտով լուծէք եւ կերտիչ լաւ խօսքերով խաղաղութիւնը վերահաստատէք, քան թէ՝ ‘բարկացած’ վիճակով քնանալու երթաք։ (Եփեսացիս 4։26, 29, 31) Ասիկա խոնարհութիւն կը պահանջէ։ Ոյժ ստանալու համար, ուղղակի Եհովայի յենուեցէք։ Քրիստոնեայ կին մը խոնարհաբար ընդունեց. «Ջերմեռանդ աղօթքէ մը ետք, զգացի որ Եհովայի հոգին իմ թեւերս բարձրացուց, որպէսզի ամուսինիս փաթթուիմ»։ Աստուծոյ Խօսքը կը խրատէ. «Չարութեան փոխարէն մէկո՛ւն չարութիւն մի՛ հատուցանէք ...։ Բարիով յաղթէ՛ չարին»։ (Հռովմայեցիս 12։17–21) Ասիկա իմաստուն խրատ եւ բարեպաշտ հնազանդութեան ընթացքն է։

Բարեպաշտ Հնազանդութիւն Ցուցաբերող Զաւակներ

Կրօնապէս բաժնուած ընտանիքներու մէջ եղող ո՛վ զաւակներ, Եհովա հետեւեալ խրատը կու տայ ձեզի. «Ամէն բանի մէջ հնազանդ եղէք ձեր ծնողներուն, վասնզի այն է Տէրոջը առջեւ հաճելի»։ (Կողոսացիս 3։20) Նկատի առէք որ Տէր Յիսուս Քրիստոս հարցին մէջ կը բերուի։ Հետեւաբար, ծնողներու հնազանդիլը բացարձակ չէ։ Գործք 5։29–ի խրատը՝ «Առաւել Աստուծոյ հնազանդիլ պէտք է, քան թէ՝ մարդոց»՝ Քրիստոնեայ երիտասարդներուն ալ կը կիրարկուի։ Առիթներ պիտի ըլլան, երբ դուք պէտք է որոշէք թէ ի՛նչ պիտի ընէք Սուրբ Գրութիւններուն վրայ հիմնուած շիտակի մասին ձեր ունեցած գիտութեան համաձայն։ Կրնայ ըլլալ որ սուտ պաշտամունքի արարքի մը մասնակցիլը մերժելուն համար որոշ պատիժի մը ենթարկուիք։ Թէեւ ասիկա անհաճելի հեռանկար մըն է, բայց կրնաք մխիթարութիւն գտնել կամ նոյնիսկ ուրախանալ այն իրողութեամբ թէ Աստուծոյ աչքին շիտակ եղածը ընելու համար կը տառապիք։—Ա. Պետրոս 2։19, 20

Քանի որ ձեր խորհուրդները Աստուածաշունչի սկզբունքներով առաջնորդուած են, որոշ հարցերու մէջ ձեր ծնողքին հետ թերեւս համամիտ չըլլաք։ Ասիկա զանոնք ձեր թշնամիները չի դարձներ։ Եթէ նոյնիսկ Եհովայի նուիրուած ծառաներ չեն, անոնք պատշաճ պատիւի արժանի են։ (Եփեսացիս 6։2) Սողոմոն ըսաւ. «Հնազանդէ՛ մօրդ, որ քեզ ծներ է ու մի՛ անարգեր քու հայրդ, երբ կը ծերանայ»։ (Առակաց 23։22) Փորձեցէք հասկնալ այն վիրաւորանքը զոր անոնք կը զգան իրենց շատ տարօրինակ թուող ձեր հետապնդած հաւատքին համար։ Անոնց հետ հաղորդակցեցէք եւ թոյլ տուէք որ «ձեր քաղցրութիւնը ամէն մարդու ... յայտնի ըլլայ»։ (Փիլիպպեցիս 4։5) Ձեր զգացումներն ու մտահոգութիւնները բաժնեցէք։ Աստուածային սկզբունքներուն կառչած մնացէք, սակայն «որչափ կարելի է ձեզի՝ ամէն մարդու հետ խաղաղութիւն ունեցէ՛ք»։ (Հռովմայեցիս 12։18) Այն իրողութիւնը թէ դուք հիմա ծնողական իշխանութեան կը հնազանդիք ցոյց կու տայ Եհովային որ դուք կը փափաքիք Թագաւորութեան մէկ հնազանդ հպատակը ըլլալ։

Ուրիշներ Ի՛նչ Կրնան Ընել

Կրօնապէս բաժնուած ընտանիքներու մէջ ապրող Քրիստոնեաները իրենց հաւատակիցներէն եկող օգնութեան ու հասկացողութեան կարիքը ունին։ Ասիկա բացայայտ է կնոջ մը խօսքերէն, որ ըսաւ. «Ամբողջովին անյոյս եւ անօգնական կը զգամ, քանի որ ոեւէ մէկը չի կրնար բան մը ընել, իսկ ես բան մը չեմ կրնար ընել վիճակը փոխելու համար։ Եհովայի կը վստահիմ, որ ընտանիքիս մէջ իր կամքը կատարէ, ի՛նչ ալ ըլլայ ատիկա»։

Քրիստոնէական ժողովներուն մեր հոգեւոր եղբայրներուն ու քոյրերուն հետ ընկերակցիլը ապաստան մըն է։ Այս նոյն կինը իր կեանքը նկարագրեց որպէս «երկու տարբեր աշխարհներ։ Մէկը որու մէջ պէ՛տք է ըլլամ, իսկ միւսը որու մէջ կ’ուզե՛մ ըլլալ»։ Եղբայրակցութեան սէրը կարելի կը դարձնէ որ այս վշտահար անհատները ամէն պարագայի ներքեւ համբերեն ու ծառայեն։ Ձեր աղօթքներուն մէջ զանոնք յիշեցէք։ (Եփեսացիս 1։16) Ամէն առիթով, կանոնաւորաբար քաջալերական, դրական եւ հանգստացուցիչ խօսակցութիւն ունեցէք անոնց հետ։ (Ա. Թեսաղոնիկեցիս 5։14) Երբ գործնական եւ տեղին է, ձեր աստուածպետական եւ ընկերային գործունէութիւններուն միջամուխ ըրէք զանոնք։

Բարեպաշտ Հնազանդութեան Օրհնութիւններն ու Օգուտները

Կրօնապէս բաժնուած տան մը մէջ բարեպաշտ հնազանդութիւն ցուցաբերելուն օրհնութիւններուն ու օգուտներուն վրայ ամէն օր խոկացէք։ Հնազանդ ըլլալու վրայ աշխատեցէք։ ‘Մի՛ ձանձրանաք’։ (Գաղատացիս 6։9) Աստուծոյ հանդէպ «խղճմտանք» ունենալու համար աննպաստ պարագաներու եւ անիրաւութիւններու համբերելը «Աստուծոյ քով շնորհք մըն է»։ (Ա. Պետրոս 2։19, 20) Հնազանդ եղէք այնքան ատեն որ Եհովայի արդար սկզբունքներն ու օրէնքները չեն ոտնակոխուիր։ Ասիկա Եհովայի կարգադրութեան հանդէպ հաւատարմութիւն ցուցաբերել է։ Ձեր բարեպաշտ վարքը կրնայ նոյնիսկ ձեր կողակիցին, զաւակներուն, կամ ծնողքին կեանքը փրկել։—Ա. Կորնթացիս 7։16. Ա. Պետրոս 3։1

Մինչ կրօնապէս բաժնուած ընտանիքի մը պահանջներուն եւ ակնկալութիւններուն գոհացում տալու համար կը պայքարիք, Եհովա Աստուծոյ եւ Յիսուս Քրիստոսի հանդէպ ուղղամտութիւն պահելու կարեւորութիւնը մի՛ մոռնաք։ Շատ մը կէտերու մէջ թերեւս տեղի տաք, բայց ձեր ուղղամտութեան մէջ տեղի տալը ամէն բանի՝ տեղի տալ կը նշանակէ, կեանքը ներառեալ։ Պօղոս առաքեալ ըսաւ. «Աստուած ... այս վերջին օրերս իր Որդիովը խօսեցաւ մեզի հետ, որը ամէն բանի ժառանգորդ ըրաւ, որով աշխարհն ալ ստեղծեց»։ «Այնպիսի մեծ փրկութեան» գիտակցիլը պիտի ամրապնդէ ձեզ որ հնազանդ ըլլաք։—Եբրայեցիս 1։1, 2. 2։3

Շիտակ բարոյականութեան եւ արժէքներու հանդէպ ձեր անտեղիտալի հնազանդութիւն եւ հաստատամտութիւն ցուցաբերելը իրական պաշտպանութիւն մըն է ձեզի եւ ձեր անհաւատ կողակիցին համար։ Հաւատարմութիւնը ընտանեկան զօրաւոր կապերը կ’ամրացնէ։ Առակաց 31։11–ը կը խօսի առաքինի ու հաւատարիմ կնոջ մասին, ըսելով. «Անոր էրկանը սիրտը անոր վրայ վստահ է»։ Ձեր առաքինի վարքը եւ խոր յարգանքը կրնան ձեր անհաւատ ամուսինին աչքերը բանալ։ Անոնք կրնան առաջնորդել զինք որ Աստուծոյ ճշմարտութիւնը ընդունի։

Արդարեւ, բարեպաշտ հնազանդութիւնը թանկագին է եւ կեանք կը փրկէ։ Ձեր ընտանեկան կեանքին մէջ հնազանդութիւն ցուցաբերելու համար աղօթեցէ՛ք։ Անիկա մտքի խաղաղութիւն կու տայ եւ Եհովան կը փառաբանէ։