Ո՛վ ծնողներ, ձեր օրինակը ի՞նչ կը սորվեցնէ
«Աստուծոյ նմանող եղէք սիրելի զաւակներու պէս, եւ սիրով վարուեցէք»։—ԵՓԵՍԱՑԻՍ 5։1, 2
1. Եհովա ի՞նչպիսի ցուցմունքներ տուաւ մարդկային առաջին զոյգին։
ԵՀՈՎԱ ընտանեկան կարգադրութեան Հեղինակն է։ Իւրաքանչիւր ընտանիք իր գոյութիւնը իրեն կը պարտի, քանի որ առաջին ընտանիքը ի՛նք հաստատեց եւ մարդկային առաջին զոյգին ծննդագործական զօրութիւն տուաւ։ (Եփեսացիս 3։14, 15) Ան Ադամի ու Եւայի հիմնական հրահանգներ տուաւ իրենց պատասխանատուութիւններուն մասին, նաեւ թոյլ տուաւ որ զանոնք գործադրելու մէջ լայնօրէն անձնական նախաձեռնութիւններ գործածեն։ (Ծննդոց 1։28-30. 2։15-22) Ադամն ու Եւան մեղանչելէ ետք, ընտանիքներու կացութիւնը աւելի բարդացաւ։ Այսուհանդերձ, Եհովա սիրալիր կերպով ուղղութիւններ տուաւ, իր ծառաներուն օգնելով որ այսպիսի կացութիւններու հետ գլուխ ելլեն։
2. (ա) Եհովա ի՞նչ միջոցներով գրաւոր խրատը աւելի ազդու դարձուց բերանացի հրահանգներով։ (բ) Ծնողներ իրենք իրենց ի՞նչ պէտք է հարցնեն։
2 Որպէս մեր Մեծ Ուսուցիչը, Եհովա մեր ընելիք եւ զգուշանալիք բաներուն մասին գրաւոր ուղղութիւններ տալէն աւելին ըրած է։ Անցեալին, գրաւոր հրահանգներուն հետ բերանացի հրահանգներ ալ տուաւ քահանաներուն, մարգարէներուն եւ ընտանիքի գլուխներուն միջոցաւ։ Մեր օրերուն, այսպիսի բերանացի ուսուցում տալու համար ան որո՞նք կը գործածէ։ Քրիստոնեայ երէցները եւ ծնողները։ Եթէ դուք ծնող մըն էք, ձեր ընտանիքը Եհովայի ճամբաներուն մէջ դաստիարակելու մէջ ձեզի ինկած բաժինը կ’ընէ՞ք։—Առակաց 6։20-23
3. Ազդու ուսուցումի շուրջ տան գլուխներ ի՞նչ կրնան սորվիլ Եհովայէ։
3 Ընտանիքէն ներս, այսպիսի դաստիարակութիւն մը ի՞նչպէս պէտք է տրուի։ Ասոր մէջ Եհովա օրինակ կը հանդիսանայ։ Ան յստակօրէն կը նշէ թէ ի՛նչը լաւ եւ ի՛նչը վատ է, եւ ասիկա անընդհատ կը կրկնէ։ (Ելից 20։4, 5. Բ. Օրինաց 4։23, 24. 5։8, 9. 6։14, 15. Յեսուայ 24։19, 20) Ան միտք գրգռող հարցումներ կը գործածէ։ (Յոբայ 38։4, 8, 31) Պատկերներ եւ իրական կեանքէ առնուած օրինակներ գործածելով, ան մեր զգացումները կը գրգռէ եւ մեր սրտերը կը ձեւաւորէ։ (Ծննդոց 15։5. Դանիէլ 3։1-29) Ո՛վ ծնողներ, երբ ձեր զաւակներուն կը սորվեցնէք, կը փորձէ՞ք այս օրինակին հետեւիլ։
4. Կրթութիւն տալու մէջ, Եհովայէ ի՞նչ կը սորվինք, եւ կրթութիւնը ինչո՞ւ կարեւոր է։
4 Եհովա շիտակ բաներուն նկատմամբ հաստատ է, բայց ան կը հասկնայ անկատարութեան ազդեցութիւնները։ Ուստի, պատժելէ առաջ, անկատար մարդոց կը սորվեցնէ եւ անոնց կրկնակի ազդարարութիւններ եւ վերյիշեցումներ կու տայ։ (Ծննդոց 19։15, 16. Երեմեայ 7։23-26) Երբ կը կրթէ, չափաւոր կերպով կ’ընէ, առանց չափազանցութեան երթալու։ (Սաղմոս 103։10, 11. Եսայեայ 28։26-29) Եթէ մեր զաւակներուն հետ այս կերպով վարուինք, կ’ապացուցանենք որ կը ճանչնանք Եհովան, եւ անոնց համար ալ աւելի դիւրին պիտի ըլլայ զինք ճանչնալ։—Երեմեայ 22։16. Ա. Յովհաննու 4։8
5. Ծնողներ մտիկ ընելու մասին Եհովայէ ի՞նչ կրնան սորվիլ։
5 Հոյակապօրէն, Եհովա մտիկ կ’ընէ որպէս սիրազեղ երկնաւոր Հայր մը։ Ան պարզապէս հրամաններ չ’արձակեր։ Ան մեզ կը քաջալերէ որ մեր սիրտը իր առջեւ թափենք։ (Սաղմոս 62։8, ՆԱ) Իսկ եթէ մեր արտայայտած զգացումները պէտք եղած չափով շիտակ չեն, ան երկինքէն յանդիմանութիւն չի տեղացներ։ Ան համբերութեամբ կը սորվեցնէ մեզի։ Ուստի, որքա՜ն յարմար է Պօղոս առաքեալի խրատը. «Աստուծոյ նմանող եղէք սիրելի զաւակներու պէս»։ (Եփեսացիս 4։31–5։1) Եհովա ի՜նչ գեղեցիկ օրինակ կը հանդիսանայ այն ծնողներուն, որոնք կը ջանան իրենց զաւակները դաստիարակել։ Անոր օրինակը մեր սրտին կը դպչի եւ մեր մէջ փափաք մը կ’արթնցնէ որ իր կեանքի ճամբուն հետեւինք։
Օրինակին Ձգած Ազդեցութիւնը
6. Ծնողներուն կեցուածքը եւ օրինակը ի՞նչպէս կ’ազդեն զաւակներուն։
6 Բերանացի ուսուցումի կողքին, օրինակը խոր ազդեցութիւն ունի անչափահասներուն վրայ։ Ծնողներ ասկէ ախորժին կամ ոչ, իրենց զաւակները ի վերջոյ զիրենք պիտի ընդօրինակեն։ Ծնողներ թերեւս հաճելի գտնեն՝ եւ երբեմն ալ թերեւս զիրենք անակնկալի բերէ՝ երբ իրենց զաւակներէն լսեն այնպիսի բաներ, զորս իրենք ըսած են։ Երբ ծնողներուն վարքն ու կեցուածքը խոր գնահատութիւն արտացոլացնէ հոգեւոր բաներու հանդէպ, ասիկա դրական ազդեցութիւն մը կ’ունենայ զաւակներուն վրայ։—Առակաց 20։7
7. Յեփթայէ ծնողական ի՞նչ օրինակ հանդիսացաւ իր աղջկան եւ ի՛նչ հետեւանքով։
7 Ծնողական օրինակին ազդեցութիւնը լաւ կերպով ցոյց տրուած է Աստուածաշունչին մէջ։ Յեփթայէ՝ զոր Եհովա գործածեց որպէսզի Իսրայէլ Ամմոնացիներու վրայ յաղթանակ տանի՝ ինք ալ հայր մըն էր։ Ամմոնի թագաւորին տուած իր պատասխանը՝ որ արձանագրուած է, կը նշէ թէ Յեփթայէ յաճախ կը կարդար Իսրայէլի հետ Եհովայի գործառնութիւններուն պատմութիւնը։ Ան դիւրութեամբ կրնար մէջբերել այդ պատմութիւնը եւ Եհովայի վրայ մեծ հաւատք ցուցաբերեց։ Անկասկած, իր օրինակը օգնեց իր աղջկան, որ հաւատք եւ անձնազոհ հոգի մը զարգացնէ, զոր ցոյց տուաւ, երբ որպէս ամուրի իր ամբողջ կեանքը Եհովայի ծառայութեան նուիրեց։—Դատաւորաց 11։14-27, 34-40. համեմատել՝ Յեսուայ 1։8
8. (ա) Սամուէլի ծնողքը ի՞նչպիսի լաւ կեցուածք մը ցուցաբերեց։ (բ) Ասիկա ի՞նչպէս օգտակար եղաւ Սամուէլի։
8 Սամուէլ օրինակելի էր որպէս երախայ եւ Աստուծոյ հաւատարիմ՝ որպէս մարգարէ, իր ամբողջ կեանքի տեւողութեան։ Կը փափաքէի՞ք որ ձեր զաւակներն ալ անոր նմանէին։ Վերլուծեցէք Սամուէլի ծնողքին, Եղկանայի ու Աննայի ձգած օրինակը։ Իրենց ընտանեկան կացութիւնը անթերի չըլլալով հանդերձ, անոնք կանոնաւորաբար Սելով կ’երթային պաշտամունքի համար, ուր սրբազան տաղաւարը կը գտնուէր։ (Ա. Թագաւորաց 1։3-8, 21) Ուշադրութիւն ըրէք թէ ի՜նչ խոր զգացումով Աննա աղօթեց։ (Ա. Թագաւորաց 1։9-13) Նայեցէք թէ երկուքն ալ Աստուծոյ տուած իրենց խոստումները ի՛նչպէս կը նկատէին։ (Ա. Թագաւորաց 1։22-28) Անոնց գեղեցիկ օրինակը անկասկած օգնեց որ Սամուէլ այնպիսի յատկութիւններ զարգացնէ, որոնց շնորհիւ կրցաւ շիտակ ընթացքի մը հետեւիլ, նոյնիսկ երբ իր շուրջի անհատները՝ որոնք իբրեւ թէ Եհովայի կը ծառայէին՝ Աստուծոյ ճամբաներուն հանդէպ յարգանք չունէին։ Ժամանակի ընթացքին, Եհովա Սամուէլի վստահեցաւ Իր մարգարէն ըլլալու պատասխանատուութիւնը։—Ա. Թագաւորաց 2։11, 12. 3։1-21
9. (ա) Տան մէջ ի՞նչ բաներ լաւ ազդեցութիւն ունեցան Տիմոթէոսի վրայ։ (բ) Տիմոթէոս ի՞նչպիսի անհատ մը եղաւ։
9 Կը փափաքէի՞ք որ ձեր տղան Տիմոթէոսի նման ըլլար, որ իր երիտասարդ տարիքին Պօղոս առաքեալի ուղեկիցը եղաւ։ Տիմոթէոսի հայրը հաւատացեալ մը չէր, բայց իր մայրն ու տատը, հոգեւոր բաներու հանդէպ գնահատութեան գեղեցիկ օրինակ հանդիսացան։ Անկասկած ասիկա լաւ հիմ մը դրաւ Տիմոթէոսի քրիստոնէական կեանքին մէջ։ Ըսուած է որ իր մայրը Եւնիկէ եւ իր տատը՝ Լաւոդիա, «անկեղծ հաւատք» ունէին։ Որպէս Քրիստոնեաներ անոնց կեանքը դերասանութիւն չէր. անոնք իրապէս իրենց դաւանութեան համաձայն կեանք մը կը վարէին եւ պատանի Տիմոթէոսի սորվեցուցին որ նոյնը ընէ։ Տիմոթէոս փաստեց որ ինք վստահելի՝ եւ ուրիշներուն բարօրութեամբ անկեղծօրէն հետաքրքրուած անհատ մըն էր։—Բ. Տիմոթէոս 1։5. Փիլիպպեցիս 2։20-22
10. (ա) Տունէն դուրս, ի՞նչ օրինակներ կրնան ազդեցութիւն ունենալ մեր զաւակներուն վրայ։ (բ) Եթէ մեր զաւակներուն խօսակցութեան կամ ընթացքին մէջ այսպիսի ազդեցութիւններ ի յայտ գան, ի՞նչպէս պէտք է հակազդենք։
10 Միայն տան պայմանները չեն որ մեր զաւակներուն վրայ ազդեցութիւն կը բանեցնեն։ Կան ուրիշ երախաներ, որոնց հետ դպրոց կ’երթան, ուսուցիչներ, որոնց գործն է դեռատի մտքերը կաղապարել, անհատներ՝ որոնք իրապէս համոզուած են որ ամէն մարդ խոր կերպով կապուած պէտք է ըլլայ իր ցեղային կամ համայնքային սովորութիւններուն. կան մարզանքի կուռքեր, որոնց իրագործումները լայնօրէն գովաբանուած են, նաեւ՝ հանրային պատշօնեաներ, որոնց վարքին մասին լուրերու մէջ կը խօսուի։ Միլիոնաւոր երախաներ պատերազմի վայրագութիւններու ալ ենթարկուած են։ Պէ՞տք է զարմանանք, երբ մեր զաւակներուն խօսակցութեան կամ կեցուածքին մէջ այսպիսի անհատներու ազդեցութիւնը տեսնուի։ Երբ այսպիսի բաներ ընեն, ի՞նչպէս կը հակազդենք։ Արդեօք սաստիկ յանդիմանութիւն մը, կամ խիստ ճառ մը խնդիրը կը լուծէ՞։ Փոխանակ արագօրէն պատասխան մը տալու մեր զաւակներուն, նախընտրելի է որ մենք մեզի հարցնենք. ‘Մեզի հետ Եհովայի վարուելակերպին մէջ կա՞յ բան մը որ կրնայ օգնել գիտնալու, թէ այս կացութիւնը ինչպէս կրնանք ձեռք առնել’։—Համեմատել՝ Հռովմայեցիս 2։4
11. Երբ ծնողներ սխալներ գործեն, ասիկա ի՞նչպէս կրնայ ազդել իրենց զաւակներուն կեցուածքին։
11 Անշուշտ, անկատար ծնողներ միշտ չեն կրնար լաւագոյն կերպով վարուիլ կացութիւններու հետ։ Անոնք սխալներ պի՛տի գործեն։ Երբ երախաներ ասիկա նկատեն, իրենց ծնողներուն հանդէպ յարգանքը պիտի կորսնցնե՞ն։ Պարագան այս կրնայ ըլլալ, եթէ ծնողներ իրենց սխալները ծածկեն, իրենց հեղինակութիւնը բրտօրէն պարտադրելով։ Բայց հետեւանքը շատ տարբեր կրնայ ըլլալ, եթէ ծնողներ խոնարհ են եւ իրենց սխալները սիրայօժար կերպով կ’ընդունին։ Ասով, անոնք կրնան արժէքաւոր օրինակ մը հանդիսանալ իրենց զաւակներուն, որոնք նոյն կերպով վարուիլ սորվելու կարիքը ունին։—Յակոբու 4։6
Մեր Օրինակը Ի՛նչ Կրնայ Սորվեցնել
12, 13. (ա) Երախաները սիրոյ մասին սորվելու համար ի՞նչ բանի կարիքը ունին, եւ ասիկա սորվեցնելու ամենէն ազդու կերպը ի՞նչ է։ (բ) Ինչո՞ւ կարեւոր է որ երախաները սիրոյ մասին սորվին։
12 Շատ արժէքաւոր դասեր կարելի է ազդու կերպով սորվեցնել, երբ բերանացի խրատին ընկերակցի լաւ օրինակ մը։ Քանի մը օրինակներ նկատի առնենք։
13 Անձնուրաց սէր արտայայտել. Օրինակի հետ շաղախուած ամենակարեւոր դասերէն մէկն է՝ սիրոյ նշանակութիւնը։ «Մենք զանիկա կը սիրենք, վասն զի ան առաջ մեզ սիրեց»։ (Ա. Յովհաննու 4։19) Ան սիրոյ Ակունքը եւ գերադրական օրինակն է։ Սկզբունքային այս սէրը՝ ակաբէ, աւելի քան 100 անգամ յիշուած է Աստուածաշունչին մէջ։ Անիկա ճշմարիտ Քրիստոնեաները բնորոշող յատկութիւն մըն է։ (Յովհաննու 13։35) Այսպիսի սէր պէտք է ցոյց տրուի Աստուծոյ ու Յիսուս Քրիստոսի հանդէպ, նաեւ՝ մարդիկ իրարու հանդէպ. նոյնիսկ մարդոց՝ որոնց նկատմամբ մասնաւոր զգացում մը չունինք։ (Մատթէոս 5։44, 45. Ա. Յովհաննու 5։3) Այս սէրը մեր սրտին մէջ պէտք է ըլլայ եւ բացայայտ՝ մեր կեանքին մէջ, զայն մեր զաւակներուն լաւ կերպով սորվեցնելէ առաջ։ Արարքները խօսքերէն բարձր կը խօսին։ Ընտանեկան շրջանակէն ներս, զաւակները պէտք է տեսնեն եւ զգան սէրը, եւ անոր առնչուած ուրիշ յատկութիւններ, ինչպէս՝ խանդաղատանքը։ Առանց այս բաներուն, երախայի մը ֆիզիքական, մտային եւ զգացական աճումը կրնայ խափանուիլ։ Երախաները պէտք է տեսնեն նաեւ թէ ընտանեկան շրջանակէն դուրս, Քրիստոնեայ հաւատակիցներու հանդէպ ինչպէս սէր ու խանդաղատանք ցոյց կը տրուի։—Հռովմայեցիս 12։10. Ա. Պետրոս 3։8
14. (ա) Երախաները ի՞նչպէս կրնան գոհունակութիւն պատճառող որակաւոր գործ ընել սորվիլ։ (բ) Ասիկա ի՞նչպէս կարելի է ընել ձեր ընտանեկան պայմաններուն մէջ։
14 Ինչպէս աշխատիլ սորվիլ. գործը՝ կեանքի հիմնական երեսակներէն մէկն է։ Արժանապատուութեան զգացում ունենալու համար, անհատ մը կարիքը ունի սորվելու թէ ի՛նչպէս կրնայ որակաւոր գործ ընել։ (Ժողովողի 2։24. Բ. Թեսաղոնիկեցիս 3։10) Եթէ երախայի մը պարտականութիւններ յանձնուած են, որոնց մասին շատ քիչ տեղեկութիւն տրուած է իրեն, եւ երբ զանոնք լաւ չընելուն համար յանդիմանուի, անհաւանական է որ լաւ գործ ընել սորվի։ Բայց երբ երախաները իրենց ծնողներուն հետ աշխատելով եւ տեղին գովասանքներ ստանալով սորվին, շատ աւելի հաւանական է որ սորվին այնպիսի գործեր ընել, որոնցմէ գոհունակութիւն ստանան։ Եթէ ծնողներուն օրինակին ընկերակցի բացատրութիւնը, երախաները ոչ միայն կը սորվին ինչպէս գործ մը գլուխ հանել, այլ նաեւ՝ ի՛նչպէս յաղթահարել խնդիրները, ինչպէս գործի մը մէջ յարատեւել մինչեւ որ վերջանայ, եւ ի՛նչպէս տրամաբանել եւ որոշումներու յանգիլ։ Այս պայմաններու մէջ, անոնց օգնութիւն կը տրուի գնահատելու թէ Եհովա ալ կ’աշխատի եւ որակաւոր գործ կ’ընէ, եւ թէ Յիսուս՝ իր Հօրը օրինակին կը հետեւի։ (Ծննդոց 1։31. Առակաց 8։27-31. Յովհաննու 5։17) Եթէ ընտանիք մը ագարակ ունի, կամ անձնական գործ մը կ’ընէ, ընտանիքի անդամներէն ոմանք կրնան միասնաբար աշխատիլ։ Կամ թերեւս մայրը կրնայ իր տղուն կամ աղջկան կերակուր պատրաստել եւ ճաշէն ետք չորս կողմը մաքրել սորվեցնէ։ Հայր մը, որ տունէն դուրս կ’աշխատի, կրնայ իր զաւակներուն հետ տունը որոշ ծրագիրներու վրայ աշխատիլ։ Որքա՜ն մեծ օգուտ կը քաղուի, երբ ծնողներ ո՛չ թէ անմիջական գործերը վերջացնելու, այլ, զաւակները կեանքի համար զինելու մասին մտածեն։
15. Հաւատքի մասին դասերը ի՞նչպէս կարելի է սորվեցնել։ Բացատրեցէք։
15 Հակառակութեան դիմաց հաստատ հաւատք պահել. Հաւատքն ալ մեր կեանքին կենսական երեսակներէն մէկն է։ Երբ ընտանեկան ուսումնասիրութեան ընթացքին հաւատքի մասին խօսուի, զաւակները զայն սահմանել կը սորվին։ Անոնք կարգ մը իրողութիւններէն ալ տեղեակ կրնան ըլլալ, որոնց պատճառաւ իրենց սրտին մէջ կը սկսի հաւատքը աճիլ։ Բայց երբ անոնք տեսնեն որ իրենց ծնողները անխախտ հաւատք մը ունին խիստ փորձութեանց դիմաց, անոր ազդեցութիւնը իրենց ամբողջ կեանքին կ’ազդէ։ Բանամայի մէջ կին մը Աստուածաշունչ կը սերտէր. անոր ամուսինը սպառնաց զինք տունէն դուրս դնել, եթէ Եհովայի ծառայելը չդադրեցնէր։ Բայց ան իր չորս զաւակներով, կանոնաւորաբար ամենամօտ Թագաւորութեան Սրահը կ’երթար 16 քմ. քալելով, իսկ մնացեալ 30 քմ.–ը՝ հանրակառքով։ Այդ օրինակէն քաջալերուած, իր ընտանիքէն շուրջ 20 հոգիներ ճշմարտութիւնը ընդունեցին։
Աստուածաշունչի Առօրեայ Ընթերցանութեան Մէջ Օրինակ Հանդիսանալ
16. Ինչո՞ւ Աստուածաշունչի ընտանեկան առօրեայ ընթերցանութիւնը յանձնարարելի է։
16 Աստուածաշունչի կանոնաւոր ընթերցանութիւնը ամենակարեւոր սովորութիւններէն մէկն է, զոր ընտանիք մը կրնայ ունենալ. սովորութիւն մը որ ծնողներուն օգտակար է, եւ զաւակներն ալ կրնան այդ օրինակին հետեւիլ։ Եթէ կարելի է, ամէ՛ն օր որոշ չափով Աստուածաշունչ կարդացէք։ Ամենակարեւոր բանը ընթերցանութեան քանակը չէ։ Շատ աւելի իմաստալից է անոր կանոնաւորութիւնը եւ կատարուած կերպը։ Աստուածաշունչի ընթերցանութենէն զատ, երախաները կրնան Աստուածաշունչի Պատմութիւններու Հաւաքածոյ գրքին ձայներիզները ունկնդրել, եթէ ձեր լեզուով մատչելի են։ Ամէն օր Աստուծոյ Խօսքէն կարդալը կ’օգնէ որ Աստուծոյ խորհուրդները մեր մտքին մէջ ունենանք։ Իսկ եթէ Աստուածաշունչի այսպիսի ընթերցանութիւն ոչ միայն անհատապէս, այլ՝ որպէս ընտանիք ընենք, ասիկա կրնայ նպաստել որ ամբողջ ընտանիքը Եհովայի ճամբաներուն մէջ քալէ։ «Աստուծոյ Ընդունելի Ապրելակերպը» Նահանգային Համաժողովներուն մէջ ներկայացուած՝ Աստուածաշունչի Առօրեայ Ընթերցանութիւնը Ձեր Ապրելակերպը Դարձուցէք թատերախաղին մէջ, այս սովորութեան վրայ էր որ շեշտ դրուեցաւ։—Սաղմոս 1։1-3
17. Աստուածաշունչի ընտանեկան ընթերցանութիւնը եւ սուրբ գրային գլխաւոր համարներ անգիր սորվիլը, ի՞նչպէս Եփեսացիս 6։4–ի խրատը գործադրելու կը նպաստեն։
17 Ընտանեօք Աստուածաշունչի ընթերցանութիւն կատարելը, Եփեսացի Քրիստոնեաներուն ուղղած Պօղոս առաքեալի ներշնչեալ նամակին մէջի հետեւեալ խրատին հետ ներդաշնակ է. «Հայրե՛ր, ձեր որդիները մի՛ բարկացնէք, հապա զանոնք մեծցուցէք Տէրոջը վարժութիւնովն ու խրատովը [«խրատով եւ Տիրոջ ուսմունքովը», Արարատ]»։ (Եփեսացիս 6։4) Ասիկա ի՞նչ կը նշանակէ։ «Ուսմունք» բառացիօրէն կը նշանակէ՝ «մտքին մէջ զետեղել». ուստի, Քրիստոնեայ հայրերու քաջալերութիւն տրուած է որ Եհովա Աստուծոյ միտքը զետեղեն իրենց զաւակներուն մէջ, անոնց օգնելով որ գիտնան Աստուծոյ միտքը։ Ասիկա կերպով մը կ’իրագործուի, երախաները քաջալերելով որ Աստուածաշունչի գլխաւոր համարներ անգիր ընեն։ Ասոր նպատակն է թոյլ տալ որ Եհովայի խորհուրդները ուղղութիւն տան երախաներու մտքին, որպէսզի անոնց փափաքներն ու վարքը աստիճանաբար աստուածային չափանիշներ արտացոլացնեն, ծնողները իրենց հետ ըլլան կամ ոչ։ Աստուածաշունչը այսպիսի մտածելակերպի հիմքը կը կազմէ։—Բ. Օրինաց 6։6, 7
18. Երբ Աստուածաշունչ կը կարդանք, ի՞նչ բանի կարիքը կրնանք ունենալ, որպէսզի (ա) զայն յստակօրէն հասկնանք. (բ) անոր պարունակած խրատէն օգտուինք. (գ) Եհովայի նպատակին մասին անոր յայտնած բաներուն ընդառաջենք. (դ) մարդոց կեցուածքներուն եւ արարքներուն մասին ըսուած բաներէն օգտուինք։
18 Անշուշտ, Աստուածաշունչը մեր կեանքին ազդելու համար, պէտք է հասկնանք անոր ըսածը։ Շատերուն համար, ասիկա նոյն հատուածը քանի մը անգամ կարդալ կրնայ պահանջել։ Կարգ մը արտայայտութիւններ աւելի յստակօրէն հասկնալու համար, թերեւս կարգ մը բառեր բառարանին, կամ՝ Խորաթափանց Ակնարկ Սուրբ Գրութիւններուն Վրայ գրքին մէջ պէտք է փնտռենք։ Եթէ համարին մէջ խրատ մը կամ պատուէր մը կայ, մերօրեայ կացութիւններուն հետ անոր յարակցութիւնը ցոյց տալու համար ժամանակ յատկացուցէք։ Ապա կրնաք հարց տալ. ‘Այս խրատը կիրարկելը ի՞նչպէս կրնայ օգտակար ըլլալ մեզի’։ (Եսայեայ 48։17, 18) Եթէ համարը Եհովայի նպատակներուն մէկ երեսակին մասին կը խօսի, հարց տուէք. ‘Ասիկա ի՞նչ ազդեցութիւն ունի մեր կեանքին վրայ’։ Թերեւս պատմութիւն մը կը կարդաք, որ մարդոց կեցուածքներուն եւ արարքներուն մասին կը խօսի։ Անոնք կեանքի մէջ ի՞նչ ճնշումներու տակ էին։ Անոնց հետ ի՞նչպէս վարուեցան։ Իրենց օրինակէն ի՞նչպէս կրնանք օգտուիլ։ Միշտ ժամանակ յատկացուցէք այդ պատմութեանց մեր կեանքին հետ ունեցած նշանակութեան մասին խօսելու համար։—Հռովմայեցիս 15։4. Ա. Կորնթացիս 10։11
19. Աստուծոյ նմանողներ ըլլալով, մեր զաւակներուն ի՞նչ տուած պիտի ըլլանք։
19 Աստուծոյ խորհուրդները մեր մտքին ու սրտին վրայ դրոշմելու ի՜նչ լաւ կերպ մը։ Այս կերպով, իրապէս պիտի կարենանք ‘Աստուծոյ նմանող ըլլալ սիրելի զաւակներու պէս’։ (Եփեսացիս 5։1) Իսկ մեր զաւակներուն համար, իրապէս ընդօրինակուելու արժանի օրինակ մը պիտի ըլլանք։
Կը Յիշէ՞ք
◻ Ծնողներ ի՞նչպէս կրնան օգտուիլ Եհովայի օրինակէն։
◻ Երախաներուն բերանացի դաստիարակութեան ինչո՞ւ պէտք է ընկերակցի ծնողական լաւ օրինակը։
◻ Ի՞նչ դասեր կ’ուսուցուին ծնողական օրինակով։
◻ Աստուածաշունչի ընտանեկան ընթերցանութենէն ի՞նչպէս լաւագոյնս կրնանք օգտուիլ։
[Նկարներ՝ էջ 20]
Շատեր ընտանեօք Աստուածաշունչի առօրեայ ընթերցանութենէն կ’օգտուին