Օգտակար ուսուցում մեր դժուարին ժամանակներուն
«Գիտցիր թէ վերջին օրերը չար [դժուարին (ՆԱ)] ժամանակներ պիտի գան. ... չար ու խաբեբայ մարդիկ չարութեան մէջ պիտի յառաջանան՝ մոլորեցնելով ու մոլորելով»։—Բ. ՏԻՄՈԹԷՈՍ 3։1, 13
1, 2. Ինչո՞ւ կարեւոր է հետաքրքրուիլ թէ ի՛նչպիսի ուսուցումի կը հետեւինք։
ՕԳՏՈՒԱ՞Ծ էք, թէ՝ վնասուած։ Ձեր խնդիրները լուծուա՞ծ են, թէ՝ աւելի բարդացած։ Բայց ինչո՞վ։ Ուսուցումներով։ Այո, ուսուցումները կրնան մեծապէս ազդել ձեր կեանքին, կա՛մ դէպի լաւ եւ կամ դէպի վատ։
2 Երեք համագործակից փրոֆէսէօրներ վերջերս այս կէտը ուսումնասիրեցին եւ անոր արդիւնքը ներկայացուցին Կրօնքի Գիտական Ուսումնասիրութեան Լրագրին մէջ (Անգլ.)։ Ճիշդ է որ անոնք ձեզ կամ ձեր ընտանիքը չուսումնասիրեցին, սակայն անոնց յայտնագործութիւնները ցոյց կու տան մեր դժուարին ժամանակներուն հետ գլուխ ելլելու մէջ ուսուցումին եւ անհատին յաջողութեան կամ ձախողութեան հետ անոր ունեցած կապակցութիւնը։ Յաջորդ յօդուածին մէջ աչքէ պիտի անցնենք անոնց յայտնագործութիւնները։
3, 4. Ի՞նչ են կարգ մը ապացոյցները թէ մենք դժուարին ժամանակներու մէջ կ’ապրինք։
3 Բայց նախ նկատի առէք հետեւեալ հարցումը. ‘Համաձա՞յն էք, որ դժուարին ժամանակներու մէջ կ’ապրինք’։ Եթէ այո, այդ պարագային վստահաբար պիտի տեսնէք ապացոյցը թէ մեր օրերը դժուարին ժամանակներ են։ (Բ. Տիմոթէոս 3։1–5) Ասոնք ամենուն վրայ նոյն ազդեցութիւնը չունին։ Օրինակի համար, հաւանաբար գիտէք կարգ մը երկիրներ որոնք պառակտուած են, քանի որ տարբեր կուսակցութիւններ կը պայքարին քաղաքական տիրապետութեան համար։ Ուրիշ տեղեր, սպանութեան պատճառը կրօնական կամ ցեղային տարբերութիւնն է։ Այս պարագային, միայն զինուորները չեն, որոնք կը վնասուին։ Խորհեցէք անթիւ կիներու եւ աղջիկներու մասին, որոնք վայրագօրէն չարչարուած են, տարեցներու մասին, որոնք ուտելիքէ, ջերմութենէ ու պատսպարանէ զրկուած են։ Անհամար անհատներ շատ մեծ տառապանքի մէջ են. ասիկա ապաստանեալներու ջախջախիչ հոսանք մը եւ անկէ առթած թշուառութիւններ յառաջացուցած է։
4 Մեր ժամանակները տնտեսական խնդիրներով ալ յատկորոշուած են, որոնց հետեւանքն է գործարաններու փակուիլը, գործազրկութիւնը, կառավարական նպաստի նուազումը, հանգստաթոշակը, դրամի արժէզրկումը, աւելի քիչ ճաշերը։ Կրնա՞ք այս խնդիրներուն ցանկը երկարել։ Շատ վստահաբար։ Համայն աշխարհի մէջ, ուրիշ միլիոնաւորներ ուտելիքի պակասէ եւ հիւանդութիւններէ կը տառապին։ Հաւանաբար տեսած էք Արեւելեան Ափրիկէէն եկած ահաւոր նկարներ. չորցած այրեր, կիներ եւ երախաներ։ Ասիական երկիրներուն մէջ ալ շատեր նոյնպէս կը տառապին։
5, 6. Ինչո՞ւ կրնանք ըսել որ հիւանդութիւններն ալ մեր ժամանակին կարեւոր երեւոյթներէն մէկն են։
5 Բոլորս ալ լսած ենք այն սարսափելի հիւանդութիւններուն մասին, որոնք երթալով կը շատնան։ Նիւ Եորք Թայմզը (Յունուար 25, 1993, Անգլ.) նշեց. «Սեռային խառնագնացութեան, կեղծաւորութեան եւ կանխարգելիչ միջոցառումներու պատահական գործածութեան պատճառով, Լատին Ամերիկայի ԱԴԱ–ի [AIDS] համաճարակը Միացեալ Նահանգներէն աւելի արագ կը յառաջանայ։ ... Այս յաւելումին գլխաւոր պատճառը կիներու մէջ վարակումի բարձր համեմատութիւնն է»։ 1992–ի Հոկտեմբերին, լրագիր մը (U.S.News & World Report) ըսաւ. «Միայն երկու տասնամեակներ առաջ էր որ Մ.Ն.–ու վիրաբուժապետը, հանրային առողջութեան մեծագոյն յաղթանակը ողջունած ատեն, ըսաւ որ այլեւս ‘վարակիչ հիւանդութիւններու գիրքը գոցուած է’»։ Բայց հիմա ի՞նչ կրնանք ըսել։ «Հիւանդանոցները խճողուած են յաղթահարուած կարծուած պատուհասներու զոհերով։ ... Մանրէները, երթալով աւելի իմաստուն կերպով ծննդական ռազմավարութիւններ կը զարգացնեն, որոնք նոր մանրէասպաններէն աւելի արագ կ’ընթանան։ ... Մենք վարակիչ հիւանդութիւններու նոր դարաշրջան մը կը մտնենք»։
6 Որպէս օրինակ 11 Յունուար 1993–ի Newsweek–ը տեղեկագրեց. «Ամէն տարի Մալարիայէ կը վարակուին մօտ 270 միլիոն անհատներ, որոնցմէ 2 միլիոնը կը մահանան ... եւ առնուազն 100 միլիոնը ծանրօրէն կը հիւանդանան ...։ Միեւնոյն ատեն, հիւանդութիւնը երթալով աւելի կը դիմադրէ բուժիչ դեղերուն։ ... Կարգ մը տեսակներ կրնան շուտով անբուժելի ըլլալ»։ Ասիկա կը սարսափեցնէ մեզ։
7. Ոմանք ինչպէ՞ս կը հակազդեն այս դժուարին ժամանակներուն։
7 Նշմարած ըլլալու էք որ այս դժուարին ժամանակներուն, շատեր օգնութիւն կը փնտռեն իրենց խնդիրներուն համար։ Խորհեցէք անոնց մասին, որոնք գիրքերու կը դիմեն պրկուածութեան կամ նոր հիւանդութեան մը լուծում գտնելու համար։ Ուրիշներ յուսահատօրէն խրատ կը փնտռեն ձախորդ ամուսնութեան, երախայի հոգատարութեան, խմիչքի կամ թմրեցուցիչի խնդիրներու, կամ իրենց գործի պահանջին եւ տան ճնշումներուն միջեւ հաւասարակշռութիւնը պահելու շուրջ։ Այո՛, անոնք իրապէս օգնութեան պէտք ունին։ Արդեօք դուք ալ անձնական խնդրի մը դէմ կը պայքարի՞ք, կամ պատերազմի, սովի կամ աղէտի հետեւանքով դժուարութիւններ ունի՞ք։ Նոյնիսկ երբ ստիպողական եղող խնդիր մը անլուծելի կը թուի, պատճառ ունիք հարց տալու. ‘Ինչո՞ւ այս վիճակին հասած ենք’։
8. Ներատեսութեան եւ առաջնորդութեան համար ինչո՞ւ Աստուածաշունչին պէտք է դիմենք։
8 Կեանքի խնդիրները ազդու կերպով լուծելէ եւ հիմա ու ապագային գոհացուցիչ կեանք մը գտնելէ առաջ, պէտք է գիտնանք թէ ի՛նչու այսքան դժուարին ժամանակներ կը դիմագրաւենք։ Անկեղծ ըլլալու համար, ասիկա պատճառ կու տայ որ իւրաքանչիւրս նկատի առնենք Աստուածաշունչը։ Ինչո՞ւ Աստուածաշունչին կը մատնանշենք։ Քանի որ միայն անոր մէջ ճշգրիտ մարգարէութիւններ, այսինքն, կանխայայտ պատմութիւններ կը գտնենք, որոնք մեզի ցոյց կու տան թէ մեր խնդիրներուն պատճառը ի՛նչ է, թէ ո՛ւր ենք եւ թէ ո՛ւր կ’երթանք։
Պատմութենէն Դաս մը
9, 10. Մատթէոս 24–րդ գլուխին մէջ Յիսուսի մարգարէութիւնը ինչպէ՞ս կատարուեցաւ առաջին դարուն։
9 Դիտարան Յունիս 1, 1994–ի թիւը վառ կերպով աչքէ անցուց Մատթէոս 24–րդ գլուխին Յիսուսի նկարագրական մարգարէութիւնը։ Հաճեցէք ձեր Աստուածաշունչը բանալ այդ գլուխին։ 3–րդ համարին մէջ կրնաք տեսնել թէ Յիսուսի առաքեալները իր ներկայութեան եւ իրերու դրութեան վախճանին մասին նշան մը ուզեցին։ Ապա 5–14–րդ համարներուն մէջ, Յիսուս նախագուշակեց սուտ Քրիստոսներ, պատերազմներ, սովեր, Քրիստոնեաներուն հալածանք, անօրէնութիւն եւ Աստուծոյ Թագաւորութեան մասին լայնատարած քարոզչութիւն։
10 Պատմութիւնը կը փաստէ թէ այս բաները տեղի ունեցան իրերու Հրէական դրութեան վախճանին ընթացքին։ Եթէ դուք այն ատեն ապրած ըլլայիք, այդ օրերը դժուարին ժամանակներ պիտի չըլլայի՞ն ձեզի համար։ Սակայն, վիճակները երթալով իրենց յանգումին կը մօտենային. Երուսաղէմի եւ Հրէական դրութեան վրայ աննախընթաց նեղութիւն մը։ 15–րդ համարին մէջ կը կարդանք թէ Հ.Դ. 66–ին Հռովմէացիները Երուսաղէմի վրայ յարձակելէ ետք, ինչ տեղի պիտի ունենար։ Այս դէպքերը, 21–րդ համարին մէջ, Յիսուսի յիշած նեղութիւնը իր գագաթնակէտին հասցուցին. Հ.Դ. 70–ի Երուսաղէմի կործանումը որ այդ քաղաքին վրայ ցարդ եկած մեծագոյն նեղութիւնն էր։ Այսուհանդերձ, գիտենք որ պատմութիւնը հոն չկեցաւ. Յիսուս չէր ըսած որ այդպէս պիտի ըլլար։ 23–28–րդ համարներուն մէջ, ան ցոյց տուաւ որ Հ.Դ. 70–ի նեղութենէն ետք, ուրիշ բաներ տեղի պիտի ունենային։
11. Մատթէոս 24–րդ գլուխին կատարումը ի՞նչ կերպով առնչութիւն ունի մեր օրերուն հետ։
11 Ներկայիս թերեւս ոմանք, անցեալին տեղի ունեցած այս խնդիրներուն նկատմամբ անտարբեր ըլլալով, կրնան ըսել. ‘Ինծի ի՛նչ’։ Ասիկա սխալ պիտի ըլլար։ Այդ ատեն կատարուած այս մարգարէութիւնը կենսական կարեւորութիւն ունի։ Ինչո՞ւ։ Իրերու Հրէական դրութեան վախճանին ընթացքին եղած պատերազմները, սովերը, երկրաշարժները, պատուհասները եւ հալածանքը աւելի մեծ կատարում մը պիտի ունենային ‘ազգերու սահմանուած ժամանակներուն’ լրանալէն՝ 1914–էն՝ ետք։ (Ղուկաս 21։24, ՆԱ։) Ներկայիս ապրողներէն ոմանք ականատես եղած են Ա. Աշխարհամարտին, երբ այս մարգարէութեան արդի կատարումը սկսաւ։ Նոյնիսկ եթէ 1914–էն ետք ծնած էք, Յիսուսի մարգարէութեան կատարումը տեսած էք։ Այս Ի. դարու իրադարձութիւնները կը փաստեն որ մենք ներկայ ամբարիշտ դրութեան վախճանին մէջ կ’ապրինք։
12. Ըստ Յիսուսին, տակաւին ի՞նչ կրնանք ակնկալել։
12 Ասիկա կը նշանակէ որ Մատթէոս 23։29–ին ‘նեղութիւն’ը տակաւին մեր դիմաց է։ Անիկա երկնային պատահարներ պիտի բովանդակէ։ 30–րդ համարը ցոյց կու տայ որ մարդիկ տարբեր նշան մը պիտի տեսնեն. նշան մը՝ որ պիտի փաստէ թէ կործանումը մօտ է։ Ղուկաս 21։25–28–ի զուգահեռ տեղեկութեան համաձայն, այդ ժամանակ, որ տակաւին ապագային է, «մարդոց սրտերը պիտի նուաղին իրենց վախէն եւ աշխարհի վրայ գալու բաներուն սպասելէն»։ Ղուկասի տեղեկութիւնը կ’ըսէ նաեւ որ Քրիստոնեաները իրենց գլուխները պիտի բարձրացնեն, քանի որ իրենց փրկութիւնը շատ մօտեցած պիտի ըլլայ։
13. Ո՞ր երկու կէտերը մեր ուշադրութեան արժանի են։
13 ‘Այս բոլորը շատ լաւ’, կրնաք ըսել, ‘բայց ես կը խորհէի որ հարցն էր՝ ի՛նչպէս կրնամ մեր դժուարին ժամանակները հասկնալ եւ զանոնք դիմագրաւել’։ Իրաւունք ունիք։ Մեր բուն նպատակն էր գլխաւոր խնդիրները բնորոշել եւ տեսնել թէ ի՛նչպէս կրնանք անոնցմէ խուսափիլ։ Անոր կապուած է երկրորդ կէտը. Սուրբ գրային ուսուցումը ինչպէ՞ս կրնայ մեզի օգնել հիմա աւելի լաւ կեանք մը վայելելու։ Այս առնչութեամբ, հաճեցէք բանալ ձեր Աստուածաշունչը, Բ. Տիմոթէոս 3–րդ գլուխը եւ նկատեցէք թէ Պօղոսի խօսքերը ի՛նչպէս կրնան ձեզի օգնել դժուարին ժամանակներուն հետ գլուխ ելլելու։
Մեր Ժամանակներուն Մասին Մարգարէութիւն մը
14. Ի՞նչ պատճառ ունինք հաւատալու որ Բ. Տիմոթէոս 3։1–5–ը նկատի առնելը կրնայ օգտակար ըլլալ մեզի։
14 Աստուած Պօղոս առաքեալը ներշնչեց որ հաւատարիմ Քրիստոնեայի մը՝ Տիմոթէոսի՝ շատ մը խրատներ գրէ, որպէսզի ան աւելի յաջող եւ ուրախ կեանք մը վարէ։ Պօղոսի գրած բաներուն մեծամասնութիւնը գլխաւորաբար մեր օրերուն կը կիրարկուին։ Նոյնիսկ երբ կը խորհիք որ լաւ գիտէք այս խօսքերը, ուշադրութեամբ հետեւեցէք Երկրորդ Տիմոթէոս 3։1–5–ի մարգարէական խօսքերուն։ Պօղոս գրեց. «Գիտցիր թէ վերջին օրերը չար ժամանակներ պիտի գան. վասնզի մարդիկ պիտի ըլլան անձնասէր, արծաթասէր, ամբարտաւան, հպարտ, հայհոյիչ, ծնողներու անհնազանդ, ապերախտ, անսուրբ, անգութ, անհաշտ, բանսարկու, անժուժկալ, դաժանաբարոյ, բարին չսիրող, մատնիչ, յանդուգն, գոռոզ, աւելի հեշտասէր քան թէ աստուածասէր. որոնք աստուածպաշտութեան կերպարանքը ունին, բայց անոր զօրութիւնը ուրացած են»։
15. Ինչո՞ւ Բ. Տիմոթէոս 3։1–ը մասնաւորաբար պէտք է հետաքրքրէ մեզ այսօր։
15 Եթէ հաշուեցիք, ցանկին մէջ 19 բաներ յիշուած էին։ Ասոնք քննելէ եւ անոնցմէ օգտուելէ առաջ, նախ պահ մը կանգ առէք եւ ընդհանուր ակնարկ մը նետեցէք։ Նայեցէք առաջին համարին։ Պօղոս նախագուշակեց. «Վերջին օրերը չար ժամանակներ պիտի գան»։ Ո՞ր «վերջին օրեր»ուն։ Շատ մը վերջին օրեր եղած են. վաղեմի Փոմփէյի վերջին օրերէն մինչեւ թագաւորի մը կամ իշխանական ընտանիքի մը վերջին օրերը։ Աստուածաշունչն ալ կը յիշէ քանի մը վերջին օրեր, զոր օրինակ, Հրէական դրութեան վերջին օրերը։ (Գործք 2։16, 17) Սակայն Յիսուս մեզի օգնեց հասկնալու որ Պօղոսի յիշած «վերջին օրերը» մեր ժամանակին կ’ակնարկուէին։
16. Ցորենի եւ որոմի առակը ի՞նչ վիճակ կը նախագուշակէր մեր ժամանակին համար։
16 Յիսուս ասիկա ըրաւ Մատթէոս 13–րդ գլուխին մէջ, ցորենի եւ որոմի մասին առակ մը տալով։ Անոնք դաշտի մը մէջ ցանուած եւ աճած էին։ Ան ըսաւ որ ցորենը եւ որոմը կը պատկերացնէին մարդիկ. ճշմարիտ Քրիստոնեաներ եւ սուտ Քրիստոնեաներ։ Ասիկա յիշեցինք պարզապէս ցոյց տալու համար որ երկար ժամանակ մը պիտի անցնէր իրերու չար դրութեան ամբողջական կործանումէն առաջ։ Երբ այդ վախճանը հասնէր, բան մը լիովին ծաղկած պիտի ըլլար։ Ի՞նչ բան։ Հաւատուրացութիւնը, կամ ճշմարիտ Քրիստոնէութենէն հեռացումը, որու արդիւնքը պիտի ըլլար չարութեան մեծ հունձք մը։ Աստուածաշունչի ուրիշ մարգարէութիւններ կը հաստատեն որ ասիկա չար դրութեան վերջին օրերուն տեղի պիտի ունենար։ Հիմա այս օրերուն, իրերու դրութեան վախճանին, մէջ կ’ապրինք։
17. Բ. Տիմոթէոս 3։1–5–ը իրերու դրութեան վախճանին մասին ի՞նչ զուգահեռ տեղեկութիւն կը հայթայթէ մեզի։
17 Ասոր նշանակութիւնը կը տեսնէ՞ք։ Երկրորդ Տիմոթէոս 3։1–5–ը ցոյց կու տայ որ իրերու դրութեան վախճանին, կամ վերջին օրերուն, համայն աշխարհի Քրիստոնեաներուն պտուղները գէշ պիտի ըլլային։ Պօղոս ըսել չուզեց որ իր յիշած 19 բաները գլխաւոր կերպը պիտի ըլլար փաստելու թէ մենք վերջին օրերուն մէջ ենք։ Այլ ան մեզ կը զգուշացնէր որ վերջին օրերուն, մենք ի՛նչ բաներ պիտի դիմագրաւէինք։ Առաջին համարը կը խօսի «չար ժամանակներ»ու մասին։ Այդ արտայայտութիւնը Յունարէնէն առնուած է, որ բառացիօրէն կը նշանակէ «նշանակուած կատաղի ժամանակներ»։ Չէ՞ք համաձայնիր որ «կատաղի» բառը շատ լաւ կը նկարագրէ մեր օրերը։ Այս ներշնչեալ հատուածը մեր ժամանակին մասին աստուածային ներատեսութիւն կու տայ մեզի։
18. Մինչ Պօղոսի մարգարէական խօսքերը կ’ուսումնասիրենք, մեր ուշադրութիւնը ի՞նչ բանի վրայ պիտի կեդրոնացնենք։
18 Այս մարգարէութեամբ հետաքրքրուիլը թոյլ պիտի տայ մեզի օրինակներ տեսնելու թէ մեր ժամանակաշրջանը որքան դժուարին կամ կատաղի է։ Մի՛ մոռնաք մեր երկու գլխաւոր կէտերը. (1) Բնորոշել ա՛յն խնդիրները որոնք մեր ժամանակները կը դժուարացնեն եւ տեսնել թէ ի՛նչպէս կրնանք անոնցմէ խուսափիլ. (2) հետեւիլ այն ուսուցումին որ իրապէս գործնական է եւ կրնայ մեզի օգնել աւելի լաւ կեանք մը վայելելու։ Ուստի, փոխանակ ժխտական բաներուն վրայ շեշտ դնելու, մեր ուշադրութիւնը պիտի կեդրոնացնենք այն ուսուցումներուն վրայ, որոնք կրնան մեզի եւ մեր ընտանիքներուն օգնել այս «չար ժամանակներ»ուն հետ գլուխ ելլելու համար։
Ճոխ Օրհնութիւններ
19. Մարդոց անձնասէր ըլլալուն մասին ի՞նչ ապացոյց ունիք։
19 Պօղոս իր ցանկը կը սկսի նախագուշակելով որ վերջին օրերուն «մարդիկ պիտի ըլլան անձնասէր»։ (Բ. Տիմոթէոս 3։2) Ան ի՞նչ ըսել ուզեց։ Իրաւունք ունիք, երբ ըսէք որ ամբողջ պատմութեան ընթացքին, իրենք զիրենք տեսնող, ինքնասպաս այրեր ու կիներ եղած են։ Այսուհանդերձ, այս թերութիւնը շատ սովորական է այսօր։ Շատեր ասոր մէջ կը չափազանցեն. քաղաքական եւ վաճառականական աշխարհին մէջ, ասիկա գրեթէ չափանիշ մը դարձած է։ Այրեր եւ կիներ ամէն գնով հեղինակութիւն ու համբաւ կը հետապնդեն։ Յաճախ, անիկա ի՛նչ ալ արժէ ուրիշներուն, քանի որ այս անձնասէրները հոգ անգամ չեն ըներ թէ ուրիշներուն վնաս կը հասցնեն։ Անոնք ուրիշները անմիջապէս դատի կը քաշեն կամ զանոնք կը խաբեն։ Հասկնալի է որ շատեր ասիկա կը կոչեն «Ես–ի սերունդ»։ Երթալով կը շատնան կարկառուն ըլլալ փափաքող եւ անձնակեդրոն մարդիկը։
20. Սուրբ գրային խրատը ինչպէ՞ս ներկայիս տիրապետող անձնասէր հոգիին հակառակն է։
20 Կարիք չկայ յիշեցնելու այն դառն փորձառութիւնները որոնք ունեցած ենք «անձնասէր» անհատներու հետ շփում ունենալով։ Այսուհանդերձ, ճիշդ է որ այս հարցը անկեղծօրէն շօշափելով, Աստուածաշունչը իրապէս կ’օգնէ մեզի, քանի որ անիկա մեզի կը սորվեցնէ թէ ի՛նչպէս կրնանք այս որոգայթէն խուսափիլ։ Անիկա հետեւեալը կ’ըսէ. «Բան մը գրգռութիւնով կամ սնապարծութիւնով մի՛ ընէք. հապա խոնարհութիւնով մէկզմէկ ձեր անձէն լաւ սեպեցէք. միայն ձեր անձերուն շահը մի՛ փնտռէք հապա ամէն մէկը իր ընկերինն ալ»։ «Պէտք եղածէն աւելի բարձր նկատողութիւն մի՛ ունենաք ձեր անձին հանդէպ։ Այլ, համեստ եղէք ձեր մտածումներուն մէջ»։ Այս հոյակապ խրատները կը գտնուին Փիլիպպեցիս 2։3, 4–ին եւ Հռովմայեցիս 12։3–ին մէջ, TEV.
21, 22. (ա) Ի՞նչ բացայայտ ապացոյց կայ թէ այս խրատը իրապէս օգտակար է ներկայիս։ (բ) Աստուծոյ խրատը ի՞նչ ազդեցութիւն ունեցած է մարդոց վրայ։
21 Անհատ մը կրնայ առարկել. ‘Ասոնք լաւ խրատներ են, բայց գործնական չեն’։ Անոնք գործնական են։ Անոնք այսօր մարդոց քով յաջողութիւն կը գտնեն։ 1990–ին, Օգսֆորտի Համալսարանի հրատարակիչ մը գիրք մը հրատարակեց (The Social Dimensions of Sectarianism), որու 8–րդ գլուխին խորագիրն էր՝ «Եհովայի Վկաները Կաթողիկէ Երկրի մը մէջ», իսկ անիկա Պելճիքայի մէջ կատարուած ուսումնասիրութիւն մը կը նկարագրէր։ Կը կարդանք. «Վկայ մը ըլլալու դրական հրապոյրներուն մէջ, ‘Ճշմարտութեան’ հրապոյրէն զատ, ընդառաջողները մէկէ աւելի յատկանիշներ յիշեցին։ ... Ջերմութիւնը, ընկերային ըլլալը, սէրը եւ միութիւնը կանոնաւորաբար յիշուած յատկութիւններն էին, բայց պարկեշտութիւնը եւ ‘սուրբ գրային սկզբունքները անձնապէս կիրարկել’ն ալ Վկաներուն նախասիրած յատկութիւններն էին»։
22 Վերոյիշեալը կրնանք նմանցնել բոլորաձեւ առնուած պատկերի մը։ Եթէ ժամանակ ըլլար եւ եթէ դուք մեծցնող ոսպնեակով մը կամ թէլէֆոթոյով նայէիք, պիտի կարենայիք աւելի մօտէն դիտել իրական կեանքէ առնուած փորձառութիւններ։ Պիտի կարենայիք անոնց մէջ գտնել անհատներ որոնք սնապարծ, իշխող կամ չափազանց անձնասէր էին, բայց հիմա աւելի մեղմ են եւ իրենց կողակիցներուն ու զաւակներուն, նոյնիսկ ուրիշներու, հանդէպ աւելի գորովալից ամուսիններ ու հայրեր եղած են։ Անոնց մէջ պիտի գտնէք նաեւ կիներ որոնք իշխող կամ անկարեկից էին, բայց հիմա կ’օգնեն ուրիշներուն որ ճշմարիտ Քրիստոնէութեան ճամբան սորվին։ Հարիւր հազարաւոր այսպիսի օրինակներ կան։ Հիմա հաճեցէք անկեղծ ըլլալ։ Աւելի հաճելի չէ՞ այսպիսի անհատներով շրջապատուած ըլլալ քան ամէն բանէ աւելի եւ նախ իրենց անձերը սիրող անհատներու հետ։ Ատիկա պիտի չօգնէ՞ր որ աւելի դիւրութեամբ տանէինք այս դժուարին ժամանակները։ Ուստի, սուրբ գրային այսպիսի ուսուցումներուն հետեւիլը ձեզ աւելի ուրախ պիտի չդարձնէ՞ր։
23. Ինչո՞ւ իրապէս կ’արժէ յաւելեալ ուշադրութիւն ընծայել Բ. Տիմոթէոս 3։2–5–ին։
23 Սակայն, Բ. Տիմոթէոս 3։2–5–ին մէջ արձանագրուած Պօղոսի ցանկին միայն մէկ երեսակը նկատի առինք։ Ի՞նչ կրնանք ըսել միւսներուն մասին։ Արդեօք անոնք ալ ուշադրութեամբ քննելը կրնա՞յ օգնել ձեզի որ մեր ժամանակներուն գլխաւոր խնդիրները բնորոշէք, որպէսզի անոնցմէ խուսափիք եւ հասկնաք թէ ո՛ր ընթացքը կրնայ ձեզի եւ ձեր սիրելիներուն աւելի մեծ ուրախութիւն բերել։ Յաջորդ յօդուածը ձեզի պիտի օգնէ այս հարցումներուն պատասխանելու եւ ճոխ օրհնութիւններ ձեռք ձգելու համար։
Վերյիշելու Կէտեր
◻ Ի՞նչ են կարգ մը ապացոյցները թէ մենք վերջին օրերուն մէջ կ’ապրինք։
◻ Ինչո՞ւ կրնանք վստահ ըլլալ որ մենք վերջին օրերուն մէջ կ’ապրինք։
◻ Բ. Տիմոթէոս 3։1–5–ի ուսումնասիրութենէն ի՞նչ երկու կէտեր կրնանք հանել։
◻ Մեր օրերուն, երբ շատեր անձնասէր են, Աստուածաշունչի ուսուցումը ինչպէ՞ս օգնած է Եհովայի ծառաներուն։
[Նկար՝ էջ Վերապահուած Իրաւասութիւն էջ 21]