Առաքինի մնանք՝ անառակութեամբ լեցուն աշխարհի մը մէջ

«Ամէն բան առանց տրտունջներու ու վիճաբանութիւններու ըրէք. որպէս զի ըլլաք անբիծ ու անարատ, Աստուծոյ որդիներ առանց մեղադրանքի, կամակոր ու խոտորեալ ազգին մէջ»։—ՓԻԼԻՊՊԵՑԻՍ 2։14, 15

1, 2. Աստուած ինչո՞ւ Քանանացիները բնաջնջել ուզեց։

ԵՀՈՎԱՅԻ հրամանները զիջումներ ընելու առիթ չեն ձգեր։ Իսրայելացիները Խոստացեալ Երկիրը մտնելու վրայ էին, երբ Մովսէս մարգարէն անոնց ըսաւ. «Քետացիները, Ամօրհացիները, Քանանացիները, Փերեզացիները, Խեւացիներն ու Յեբուսացիները բոլորովին կորսնցո՛ւր, ինչպէս քու Տէր Աստուածդ քեզի պատուիրեց»։—Բ. Օրինաց 7։2. 20։17

² Քանի որ Եհովա ողորմած Աստուած է, ինչո՞ւ Քանանի բնակիչներուն բնաջնջումը պահանջեց։ (Ելից 34։6) Պատճառներէն մէկը՝ ‘որպէս զի Քանանացիները Իսրայելացիներուն չսորվեցնէին իրենց բոլոր գարշելի գործերը, ինչպէս անոնք իրենց աստուածներուն կ’ընէին ու այսպիսով Եհովա Աստուծոյ առջեւ մեղք չգործէին’։ (Բ. Օրինաց 20։18) Մովսէս նաեւ ըսաւ. «Քանզի Տէրը այս ազգերը իրենց անօրէնութեանը համար քու առջեւէդ կը վռնտէ»։ (Բ. Օրինաց 9։4) Քանանացիները անառակութեան մարմնացումն էին։ Սեռային եղծանումը եւ կռապաշտութիւնը իրենց պաշտամունքին յատկանիշն էին։ (Ելից 23։24. 34։12, 13. Թուոց 33։52. Բ. Օրինաց 7։5) Ազգապղծութիւնը, սոդոմականութիւնն ու անասնապղծութիւնը ‘Քանանի երկրին մէջ’ սովորական էին։ (Ղեւտացւոց 18։3-25) Անմեղ մանուկներ կեղծ աստուածներու անգթօրէն զոհ կը մատուցանուէին։ (Բ. Օրինաց 18։9-12) Զարմանալի չէ որ Եհովա այս ազգերուն գոյութիւնն իսկ իր ժողովուրդին ֆիզիքական, բարոյական եւ հոգեւոր բարօրութեան վտանգ մը նկատեց։—Ելից 34։14-16

3. Քանի որ Իսրայելացիները Քանանի երկրին բնակիչներուն առնչութեամբ Աստուծոյ հրամանները լիովին չկատարեցին, հետեւանքը ի՞նչ եղաւ։

³ Քանի որ Աստուծոյ հրամանները լիովին չգործադրուեցան, Իսրայէլ Խոստացեալ Երկիրը նուաճելէ ետք, Քանանի երկրի բնակիչներէն շատեր վերապրեցան։ (Դատաւորաց 1։19-21) Ժամանակ մը ետք, անոնց վրայ Քանանացիներուն ձգած ազդեցութիւնը զգալի դարձաւ եւ կարելի եղաւ ըսել. «[Եհովայի] կանոններն ու իրենց [Իսրայելացիներուն] հայրերուն հետ՝ անոր ըրած ուխտը եւ անոր տուած վկայութիւնները մէկդի ձգեցին ու սնապաշտութեան ետեւէ գացին ու սնապաշտ եղան եւ իրենց չորս կողմը գտնուած ազգերուն հետեւեցան, որոնց համար Տէրը իրենց պատուիրեր էր, որ անոնց պէս չընեն»։ (Դ. Թագաւորաց 17։15) Այո, տարիներու ընթացքին Իսրայելացիներէն շատեր գործեցին այն նոյն անառակութիւնները, որոնց պատճառաւ Աստուած Քանանացիներուն բնաջնջումը հրամայած էր. կռապաշտութիւն, սեռային ծայրայեղութիւններ եւ նոյնիսկ մանուկներու զոհագործութիւն։—Դատաւորաց 10։6. Դ. Թագաւորաց 17։17. Երեմեայ 13։27

4, 5. (ա) Անհաւատարիմ Իսրայէլի եւ Յուդայի ի՞նչ պատահեցաւ։ (բ) Փիլիպպեցիս 2։14, 15–ի մէջ ի՞նչ յորդոր տրուած է, եւ ի՞նչ հարցումներ կը ծագին։

⁴ Հետեւաբար, Ովսէէ մարգարէն յայտարարեց. «Տէրոջը խօսքը լսեցէ՛ք, ո՛վ Իսրայէլի որդիներ, քանզի Տէրը երկրի բնակիչներուն հետ վէճ ունի, քանզի երկրի վրայ ճշմարտութիւն չկայ ու ողորմութիւն չկայ ու Աստուծոյ գիտութիւնը չկայ։ Երդումն ու ստախօսութիւնը, մարդասպանութիւնը, գողութիւնն ու շնութիւնը շատցեր են ու արիւնները արիւններու կը խառնեն։ Անոր համար երկիրը սուգ պիտի բռնէ ու անոր բոլոր բնակիչները դաշտի գազաններուն ու երկնքի թռչուններուն հետ պիտի նուաղին ու ծովու ձուկերն ալ պիտի սպառին»։ (Ովսեայ 4։1-3) Հ.Դ.Ա. 740–ին, Իսրայէլի ապականած հիւսիսային թագաւորութիւնը, Ասորեստանի կողմէ նուաճուեցաւ։ Իսկ աւելի քան դար մը ետք, Յուդայի անհաւատարիմ հարաւային թագաւորութիւնը Բաբելոնի կողմէ նուաճուեցաւ։

⁵ Այս դէպքերը ցոյց կու տան թէ որքան վտանգաւոր է թոյլ տալ որ անառակութեամբ կլանուինք։ Աստուած անարդարութիւնը կ’ատէ եւ զայն պիտի չհանդուրժէ իր ժողովուրդին մէջ։ (Ա. Պետրոս 1։14-16) Շիտակ է որ կ’ապրինք «հիմակուան չար աշխարհ»ին մէջ, աշխարհ մը՝ որ երթալով կ’ապականի։ (Գաղատացիս 1։4. Բ. Տիմոթէոս 3։13) Այսուհանդերձ, Աստուծոյ Խօսքը բոլոր Քրիստոնեաները կը յորդորէ, որ շարունակեն ըլլալ «անբիծ ու անարատ, Աստուծոյ որդիներ առանց մեղադրանքի, կամակոր ու խոտորեալ ազգին մէջ, որոնց մէջ լուսաւորներու պէս կը [փայլին] աշխարհի մէջ»։ (Փիլիպպեցիս 2։14, 15) Սակայն, ի՞նչպէս կրնանք առաքինի մնալ, անառակութեամբ լեցուն աշխարհի մը մէջ։ Ասիկա ընելը իրապէս կարելի՞ է։

Անառակութեամբ Լեցուն Հռովմէական Աշխարհը

6. Առաջին դարու Քրիստոնեաները ինչո՞ւ առաքինի մնալու մարտահրաւէր մը դիմագրաւեցին։

⁶ Առաջին դարու Քրիստոնեաները առաքինի մնալու մարտահրաւէրը դիմագրաւեցին, քանի որ անառակութիւնը հռովմէական ընկերութեան ամէն մարզերէն ներս թափանցած էր։ Հռովմայեցի իմաստասէր Սէնէգա, իր ժամանակակիցներուն մասին ըսաւ. «Մարդիկ ամբարշտութեան հզօր մրցակցութեան մը մէջ կը պայքարին։ Ամէն օր, յանցագործութիւն ընելու ցանկութիւնը կ’աւելնայ, սակայն անկէ վախնալը՝ կը պակսի»։ Ան հռովմէական ընկերութիւնը «գազաններու համայնքի մը» հետ բաղդատեց։ Ուստի, զարմանալի չէ, որ Հռովմէացիները որպէս ժամանց սուսերամարտական սադիստ մրցումներ եւ թատերական ցոփ ներկայացումներ կը փնտռէին։

7. Պօղոս ի՞նչպէս նկարագրեց Հ.Դ. առաջին դարուն ապրողներէն շատերուն սովորական դարձած անառակութիւնները։

⁷ Պօղոս առաքեալ առաջին դարու մարդոց ստորին վարմունքը թերեւս ի մտի ունէր, երբ գրեց. «Աստուած զանոնք անարգ կրքերու մատնեց։ Իրենց էգերն անգամ բնական պէտքը բնութեան դէմ եղող պէտքի փոխեցին։ Նոյնպէս ալ արուները կնոջ բնական պէտքը թողուցած՝ իրենց ցանկութիւնովը իրարու հետ վառուեցան. արուները արուներու հետ խայտառակութիւն կը գործէին եւ իրենց մոլութեանը վայլած հատուցումը իրենց վրայ կ’ընդունէին»։ (Հռովմայեցիս 1։26, 27) Վճռած ըլլալով մարմնի պիղծ ցանկութիւնները հետապնդել, հռովմէական ընկերութեան մէջ անառակութիւնը կը վխտար։

8. Յունական եւ հռովմէական ընկերութեան մէջ, մանուկներ յաճախ ի՞նչպէս կը շահագործուէին։

⁸ Պատմութիւնը յստակօրէն չ’ըսեր, թէ Հռովմայեցիներուն մէջ միասեռականութիւնը ո՛ր տարողութեամբ ընդհանրացած էր։ Սակայն, անկասկած, անոնք իրենց յոյն նախորդներէն ազդուած ըլլալու էին, որոնց քով ընդհանրացած էր այս սովորութիւնը։ Սովորական էր որ չափահասներ՝ պղծէին պատանիները, աշակերտ–ուսուցիչ փոխյարաբերութեան մէջ զանոնք իրենց թեւերուն տակ առնելով, ինչ որ յաճախ պատանիները սեռային զարտուղի վարմունքի կ’առաջնորդէր։ Աներկբայելիօրէն, այսպիսի անառակութեան ու մանուկներու հանդէպ գէշ վերաբերմունքին ետին կը գտնուէին Սատանան ու իր դեւերը։—Յովելեայ 3։3. Յուդա 6, 7

9, 10. (ա) Ա. Կորնթացիս 6։9, 10–ն ի՞նչպէս դատապարտեց զանազան անառակութիւններ։ (բ) Կորնթոսի ժողովքին կարգ մը անդամները ի՞նչ խաւերէ եկած էին, բայց ի՞նչ փոփոխութիւն ըրին։

⁹ Աստուածային ներշնչման ներքեւ գրելով, Պօղոս Կորնթոսի Քրիստոնեաներուն ըսաւ. «Չէ՞ք գիտեր թէ անիրաւները Աստուծոյ արքայութիւնը պիտի չժառանգեն։ Մի՛ խաբուիք։ Ո՛չ պոռնիկները, ո՛չ կռապաշտները, ո՛չ շնացողները, ո՛չ իգացեալները, ո՛չ արուագէտները, ո՛չ գողերը, ո՛չ ագահները, ո՛չ գինովները, ո՛չ նախատողները ո՛ւ ոչ յափշտակողները Աստուծոյ թագաւորութիւնը պիտի ժառանգեն։ Եւ դուք մէկ քանիներդ այնպիսիներ էիք. բայց լուացուեցաք, բայց սրբուեցաք, բայց արդարացաք Տէր Յիսուսին անունովը ու մեր Աստուծոյն Հոգիովը»։—Ա. Կորնթացիս 6։9-11

¹⁰ Ուստի, Պօղոսի ներշնչուած նամակը սեռային անբարոյականութիւնը դատապարտեց, ըսելով թէ «պոռնիկները» ‘Աստուծոյ թագաւորութիւնը պիտի չժառանգեն’։ Սակայն, կարգ մը անառակութիւններ թուելէ ետք, Պօղոս ըսաւ. «Դուք մէկ քանիներդ այնպիսիներ էիք. բայց լուացուեցաք»։ Աստուծոյ օգնութեամբ կարելի էր որ յանցագործներ մաքրուէին իր աչքին։

11. Առաջին դարու Քրիստոնեաները, իրենց օրուան ամբարիշտ միջավայրին մէջ ի՞նչպէս կրցան ապրիլ։

¹¹ Այո, քրիստոնէական առաքինութիւնը ուռճացաւ, նոյնիսկ առաջին դարու անառակութեամբ լեցուն աշխարհին մէջ։ Հաւատացեալներ՝ ‘իրենց մտքին նորոգութիւնովը նորոգուեցան’։ (Հռովմայեցիս 12։2) Անոնք իրենց «առաջուան վարմունքը» լքեցին եւ ‘իրենց միտքը դրդող ոյժով նորոգուեցան’։ Այսպիսով, աշխարհի անառակութիւններէն փախան եւ ‘նոր անձնաւորութիւնը հագան, որ Աստուծոյ կամքին համաձայն ճշմարիտ արդարութիւնով ու հաւատարմութիւնով ստեղծուած էր’։—Եփեսացիս 4։22-24, ՆԱ։

Անառակութիւնով Լեցուն Ներկայ Աշխարհը

12. 1914–էն ի վեր աշխարհի մէջ ի՞նչ փոփոխութիւն տեղի ունեցած է։

¹² Ի՞նչ կրնանք ըսել մեր օրերուն մասին։ Մեր ապրած աշխարհը որեւէ ժամանակէ աւելի անառակութիւնով տարուած է։ Մասնաւորաբար 1914–էն ի վեր, բարոյական երկրածաւալ անկում մը եղած է։ (Բ. Տիմոթէոս 3։1-5) Շատեր առաքինութեան, բարոյականութեան, վարք ու բարքի մասին աւանդական գաղափարները մերժելով, ինքնակեդրոն մտածելակերպ ունեցած եւ բարոյական գետնի վրայ «անզգայ» եղած են։ (Եփեսացիս 4։19) Նիուզուիք պարբերաթերթը (Անգլերէն) գրեց. «Մենք բարոյական յարաբերականութեան դարու մը մէջ կ’ապրինք», աւելցնելով թէ տիրական եղող բարոյական մթնոլորտը «շիտակի եւ սխալի բոլոր գաղափարները վերածած է անհատական ճաշակի, զգացական նախընտրութեան կամ մշակութային ընտրութեան հարցերու»։

13. (ա) Արդի ժամանցներուն մեծ մասը ի՞նչպէս անառակութիւն կը քաջալերէ։ (բ) Անպատշաճ ժամանցը ի՞նչ գէշ ազդեցութիւն կրնայ ունենալ անհատին վրայ։

¹³ Ինչպէս առաջին դարուն, այսօր ալ նուաստացուցիչ ժամանցը ընդհանրացած է։ Հեռատեսիլը, ձայնասփիւռը, շարժապատկերներն ու պատկերիզները շարունակաբար սեռի վրայ շեշտ դնող նիւթեր կը տեղացնեն։ Անառակութիւնը համակարգիչի ցանցերէն ներս ալ սպրդած է։ Պոռնկագրական նիւթերը երթալով աւելի մատչելի կը դառնան ներկայ համակարգիչի ցանցերուն մէջ եւ ամէն անհատի՝ մեծ թէ պզտիկ՝ դիւրամատոյց են։ Այս բոլորին հետեւանքը ի՞նչ եղած է։ Լրագրի մը սիւնակագիրը կ’ըսէ. «Երբ արիւնահեղութիւնը, անդամաբեկութիւնը եւ ստորին սեռը մեր ժողովրդական մշակոյթը ողողեն, արիւնահեղութիւնը, անդամաբեկութիւնը եւ ստորին սեռը մեզի համար սովորական կը դառնան ու հետզհետէ անզգայ կը դառնանք։ Եղծանումը երթալով աւելի հանդուրժելի կը դառնայ, քանի որ անոնք երթալով նուազ կը գայթակղեցնեն մեզ»։—Բաղդատել՝ Ա. Տիմոթէոս 4։1, 2։

14, 15. Ի՞նչ ապացոյց կայ որ սեռային բարոյականութիւնը նուաստացած է համայն աշխարհի մէջ։

¹⁴ Նկատի առէք Տը Նիու Եորք Թայմզ–ի (Անգլերէն) հետեւեալ տեղեկագրութիւնը. «Ինչ որ 25 տարի առաջ վատահամբաւ կը նկատուէր, ներկայիս ընդունելի ապրելակերպ դարձած է։ Փոխանակ ամուսնանալու, իրարու հետ ապրիլ ընտրող զոյգերուն թիւը, 1980–էն 1991–ի միջեւ, 80 առ հարիւր աւելցաւ [Միացեալ Նահանգներու մէջ]»։ Ասիկա միմիայն Հիւսիսային Ամերիկայի վերաբերող յատկանշական եղելութիւն մը չէ։ Էժիաուիք պարբերաթերթը (Անգլերէն) կը տեղեկագրէ. «Ամբողջ [Ասիոյ] մէջ մշակութային բանավէճ մը ծագած է։ Հարցը հետեւեալն է. սեռային ազատութիւնը՝ ընդդէմ աւանդական արժէքներու, իսկ փոփոխութեան համար եղած ճնշումը ի՛րապէս կ’աւելնայ»։ Վիճակագրութիւնը ցոյց կու տայ թէ շատ մը երկիրներու մէջ շնութիւնը եւ նախամուսնական սեռային յարաբերութիւնը հետզհետէ ընդունելի կը դառնան։

¹⁵ Աստուածաշունչը նախագուշակեց որ սատանայական գործունէութիւնը մեր օրերուն պիտի սաստկանար։ (Յայտնութիւն 12։12) Հետեւաբար, պէտք չէ զարմանանք որ անառակութիւնը ահռելիօրէն տիրական է։ Օրինակի համար, մանուկները սեռային գետնի վրայ շահագործելը համաճարակային համեմատութիւններու հասած է։a Միացեալ Ազգերու Մանկանց Հիմնադրամը կը տեղեկագրէ թէ «սեռային չարաշահութեան առեւտուրը երախաներուն վնաս կը հասցնէ գրեթէ աշխարհի բոլոր երկիրներուն մէջ»։ Ամէն տարի, «ըստ տեղեկագրութեան, համայն աշխարհի մէջ, աւելի քան մէկ միլիոն երախաներու պարտադրաբար երախայական պոռնկութիւն ընել կու տան, զանոնք ապօրէն կերպով կը ծախեն, սեռային նպատակներու եւ մանուկներու պոռնկագրութեան մէջ գործածուելու համար»։ Միասեռականութիւնն ալ ընդհանրացած է, եւ քաղաքագէտներէն ու կրօնական առաջնորդներէն ոմանք առաջնորդութիւնը առած են զայն քաջալերելու համար որպէս «ապրելակերպի տեսակ» մը։

Աշխարհի Անառակութիւնները Մերժենք

16. Եհովայի Վկաները սեռային բարոյականութեան նկատմամբ ի՞նչ դիրք կը բռնեն։

¹⁶ Եհովայի Վկաները չեն միանար սեռային բարոյականութեան թոյլատու չափանիշներ որդեգրողներու ամբոխին։ Տիտոս 2։11, 12 կ’ըսէ. «Աստուծոյ փրկարար շնորհքը բոլոր մարդոց երեւցաւ։ Ան մեզ կը խրատէ՝ որպէս զի ամբարշտութիւնն ու աշխարհային ցանկութիւնները ուրանանք եւ զգաստութիւնով ու արդարութիւնով եւ բարեպաշտութիւնով ապրինք այս աշխարհի մէջ»։ Այո, իսկական ատելութիւն՝ խորշանք կը մշակենք այսպիսի անառակութիւններու հանդէպ, ինչպէս՝ նախամուսնական սեռը, շնութիւնը եւ միասեռական արարքները։b (Հռովմայեցիս 12։9. Եփեսացիս 5։3-5) Պօղոս հետեւեալ յորդորը տուաւ. «Անիրաւութենէ մէկդի թող կենան անոնք, որ Քրիստոսին [«Եհովայի», ՆԱ] կը պատկանին»։—Բ. Տիմոթէոս 2։19

17. Ճշմարիտ Քրիստոնեաները ոգելից ըմպելիներու գործածութիւնը ի՞նչպէս կը նկատեն։

¹⁷ Ճշմարիտ Քրիստոնեաները աննշան թուող անառակութիւններուն նկատմամբ աշխարհի տեսակէտը կը մերժեն։ Օրինակի համար, ներկայիս շատեր ոգելից ըմպելիներու չափազանց գործածութիւնը զուարճութիւն կը սեպեն։ Սակայն Եհովայի ժողովուրդը կ’անսայ Եփեսացիս 5։18–ի խրատին. «Մի՛ գինովնաք գինիով, որուն մէջ անառակութիւն կայ, հապա Հոգիո՛վ լեցուեցէք»։ Եթէ Քրիստոնեան ուզէ խմել, ան ասիկա չափաւոր կերպով կ’ընէ։—Առակաց 23։29-32

18. Աստուածաշունչի սկզբունքները ի՞նչպէս կ’առաջնորդեն Եհովայի ծառաները, իրենց ընտանիքի անդամներուն հանդէպ իրենց վերաբերմունքին մէջ։

¹⁸ Որպէս Եհովայի ծառաներ, նաեւ կը մերժենք աշխարհի մէջ ոմանց ունեցած այն տեսակէտը, թէ կողակիցին կամ զաւակներուն վրայ պոռալ–կանչելը, կամ անոնց վիրաւորական խօսքեր ուղղելը՝ ընդունելի վարմունք մըն է։ Քրիստոնեայ այրեր ու կիներ, առաքինի ընթացք մը հետապնդելու վճռակամութեամբ, միասնաբար կ’աշխատին Պօղոսի խրատը կիրարկելու. «Ամէն դառնութիւն եւ բարկութիւն ու սրտմտութիւն եւ աղաղակ ու հայհոյութիւն վերցուի ձեզմէ իրենց չարութիւններով մէկտեղ։ Եւ իրարու հետ քաղցր եղէք, գթած, ներելով իրարու, ինչպէս Աստուած Քրիստոսով ներեց ձեզի»։—Եփեսացիս 4։31, 32

19. Առեւտրական աշխարհին մէջ, անառակութիւնը ո՞ր աստիճան տիրական է։

¹⁹ Անպարկեշտութիւնը, խարդախութիւնը, ստութիւնը, առեւտրական անգութ կերպերն ու գողութիւնն ալ սովորական են ներկայիս։ Առեւտրական պարբերաթերթի մը մէջ (CFO), յօդուած մը հետեւեալը կը տեղեկագրէ. «4,000 աշխատաւորներու հետ եղած վիճակագրութիւն մը . . . երեւան հանեց թէ ասոնցմէ 31 առ հարիւրը, անցեալ տարուան ընթացքին, ‘լուրջ անպարկեշտութեան’ ականատես եղած էր»։ Այսպիսի անպարկեշտ արարքներուն մաս կը կազմէին, ստելը, արձանագրութիւններ կեղծելը, սեռային ձանձրոյթ պատճառելը եւ գողնալը։ Եթէ կ’ուզենք Եհովայի աչքին բարոյապէս մաքուր մնալ, այսպիսի վարքէ պէտք է խուսափինք եւ մեր նիւթական գործառնութեանց մէջ պարկեշտ ըլլանք։—Միքիայ 6։10, 11

20. Քրիստոնեաները ինչո՞ւ ‘արծաթսիրութենէ’ զերծ պէտք է ըլլան։

²⁰ Նկատի առէք մարդու մը պարագան, որ կը խորհէր թէ կրնար աւելի ժամանակ ունենալ Աստուծոյ ծառայութեան, եթէ նիւթական ձեռնարկի մը մէջ անակնկալ ու մեծ շահ մը ընէր։ Ան ուրիշները ներդրումի ծրագրի մը միջամուխ դարձուց, մեծապէս չափազանցելով անոնց ակնկալելիք շահաբաժինները։ Երբ այս շահերը չիրականացան, անիկա հսկայական վնասները հատուցանելու համար ա՛յնքան տակնուվրայ եղաւ որ իրեն վստահուած դրամները գողցաւ։ Իր արարքներուն եւ անզեղջ կեցուածքին պատճառով, ան քրիստոնէական ժողովքէն վտարուեցաւ։ Աստուածաշունչի ազդարարութիւնը արդարեւ շիտակ է. «Բոլոր չարութիւններուն արմատը արծաթսիրութիւնն է»։—Ա. Տիմոթէոս 6։10

21. Աշխարհի մէջ, հեղինակութիւն ունեցող անհատներ հասարակաց ի՞նչ վարուելակերպ մը ունին, սակայն քրիստոնէական ժողովքին մէջ պատասխանատու դիրքերու վրայ եղողները ի՞նչպէս պէտք է վարուին։

²¹ Հեղինակութիւն ու ազդեցութիւն ունեցող աշխարհային մարդիկ, յաճախ առաքինութենէ զուրկ են ու ‘Հեղինակութիւնը կ’ապականէ’ առածին ճշմարիտ ըլլալը ցոյց կու տան։ (Ժողովողի 8։9) Կարգ մը երկիրներու մէջ, կաշառակերութիւնը եւ եղծումի տարբեր կերպերը, դատաւորներու, ոստիկաններու եւ քաղաքագէտներու կենցաղը դարձած են։ Սակայն, քրիստոնէական ժողովքին մէջ առաջնորդութիւնը ստանձնողները, պէտք է առաքինի ըլլան եւ ուրիշներու վրայ չտիրեն։ (Ղուկաս 22։25, 26) Երէցները, ինչպէս նաեւ օգնական ծառաները, ‘անարգ շահախնդրութեան’ համար չեն ծառայեր։ Անոնք, անձնական շահեր ձեռք ձգելու հեռանկարով իրենց դատողութեան ազդող կամ զայն խեղաթիւրող որեւէ փորձի, դէմ պէտք է դնեն։—Ա. Պետրոս 5։2. Ելից 23։8. Առակաց 17։23. Ա. Տիմոթէոս 5։21

22. Յաջորդ յօդուածը ի՞նչ նկատի պիտի առնէ։

²² Ընդհանուր առմամբ, Քրիստոնեաները յաջողութեամբ կը դիմագրաւեն անառակութեամբ լեցուն այս աշխարհին մէջ առաքինի մնալու հիմակուան մարտահրաւէրը։ Սակայն, առաքինութիւնը պարզապէս ամբարշտութենէ խուսափելէն շատ աւելին կ’ընդգրկէ։ Յաջորդ յօդուածը նկատի պիտի առնէ թէ առաքինութիւն մշակելը իրապէս ի՛նչ կը պահանջէ։

[Ստորանիշ]

Վերաքաղի կէտեր

◻ Եհովա ինչո՞ւ Քանանացիներու բնաջնջումը հրամայեց։

◻ Առաջին դարուն ի՞նչ անառակութիւններ ընդհանրացած էին, իսկ Քրիստոնեաները ի՞նչպէս յաջողութիւն գտան այսպիսի միջավայրի մը մէջ։

◻ Ի՞նչ ապացոյց կայ, որ աշխարհը բարոյական երկրածաւալ անկում մը կրած է 1914–էն ի վեր։

◻ Եհովայի ժողովուրդը ընդհանրացած ո՞ր անառակութիւնները պէտք է մերժէ։

[Նկար՝ էջ 21]

Անառակութիւնը թափանցած է համակարգիչի ցանցերէն ներս, պոռնկագրական նիւթեր մատչելի դարձնելով պատանիներու եւ ուրիշներու