Ամուսին եւ երէց. պատասխանատուութիւնները հաւասարակշռել
«Եպիսկոպոսը [«տեսուչը», ՆԱ] պէտք է անարատ ըլլայ, մէկ կնոջ այր»։—Ա. ՏԻՄՈԹԷՈՍ 3։2
1, 2. Ինչո՞ւ կուսակրօնութիւնը սուրբ գրային չէ։
ԱՌԱՋԻՆ դարու հաւատարիմ Քրիստոնեաները իրենց զանազան պատասխանատուութիւններուն մէջ հաւասարակշռութիւն պահելով հետաքրքրուած էին։ Երբ Պօղոս առաքեալ ըսաւ որ Քրիստոնեայ մը ամուրի մնալով «աւելի աղէկ» կ’ընէ, արդեօք ըսել կ’ուզէր որ այդ տղամարդը քրիստոնէական ժողովքին մէջ ծառայելու աւելի՞ յարմարութիւն ունի։ Արդեօք, ըստ իրեն, երիցութեան համար ամուրիութիւնը պահա՞նջ մըն էր։ (Ա. Կորնթացիս 7։38) Կաթողիկէ կղերներէն կուսակրօնութիւն պահանջուած է։ Սակայն կուսակրօնութիւնը սուրբ գրայի՞ն է։ Արեւելեան Ուղղափառ Եկեղեցին թոյլ կու տայ որ քահանաները ամուսնացած այրեր ըլլան, բայց ոչ՝ եպիսկոպոսները։ Ասիկա Աստուածաշունչին հետ ներդաշնա՞կ է։
2 Քրիստոնէական ժողովքի հիմը կազմող Քրիստոսի 12 առաքեալներէն շատեր, ամուսնացած տղամարդիկ էին։ (Մատթէոս 8։14, 15. Եփեսացիս 2։20) Պօղոս գրեց. «Միթէ մենք իրաւունք չունի՞նք Քրիստոսով քոյր եղող կին մը մեզի հետ պտըտցնելու, ինչպէս միւս առաքեալներն ու Տէրոջը եղբայրները ու Կեփաս կ’ընեն»։ (Ա. Կորնթացիս 9։5) Կաթողիկէ Նոր Համայնագիտարանը (Անգլերէնով) կը հաստատէ որ «կուսակրօնութիւնը եկեղեցական ծագում ունի» եւ թէ «պարտադիր չէր որ Ն[որ] Կ[տակարան]ի քարոզիչները ամուրի ըլլային»։ Եհովայի Վկաները սուրբ գրային օրինակին կը հետեւին եւ ոչ թէ՝ եկեղեցական օրէնքին։—Ա. Տիմոթէոս 4։1–3
Երիցութիւնը եւ Ամուսնութիւնը Ներհակ Չեն
3. Սուրբ գրային ի՞նչ ապացոյց ունինք թէ Քրիստոնեայ տեսուչները կրնան ամուսնացած տղամարդիկ ըլլալ։
3 Տեսուչ նշանակուելու համար տղամարդոցմէ փոխանակ ամուրիութիւն պահանջելու, Պօղոս առաքեալ Տիտոսի գրեց. «Ասոր համար ես քեզ Կրետէ թողուցի, որպէս զի բոլոր պակաս բաները շտկես ու ամէն մէկ քաղաքի մէջ երէցներ [Յունարէն՝ բրէս·պիթէ·րոս] կարգես, ինչպէս ես քեզի պատուիրեցի. եթէ մէկը անմեղադրելի ըլլայ, մէկ կնոջ այր, հաւատացեալ զաւակներ ունենայ, որոնք անառակութեան համար ամբաստանուած կամ անհնազանդ չըլլան։ Վասն զի եպիսկոպոսը [«տեսուչը», ՆԱ] պէտք է անմեղադրելի ըլլայ Աստուծոյ տնտեսին պէս»։—Տիտոս 1։5–7
4. (ա) Ինչպէ՞ս գիտենք որ ամուսնութիւնը պայման չէ Քրիստոնեայ տեսուչ ըլլալու համար։ (բ) Երէց եղող ամուրի եղբայր մը ի՞նչ առաւելութիւններ կրնայ ունենալ։
4 Միւս կողմէ, երէց ըլլալու համար ամուսնութիւնը սուրբ գրային պահանջ մը չէ։ Յիսուս ամուրի մնաց։ (Եփեսացիս 1։22) Առաջին դարու քրիստոնէական ժողովքի կարկառուն տեսուչներէն մէկը՝ Պօղոս՝ այն ատեն ամուսնացած չէր։ (Ա. Կորնթացիս 7։7–9) Ներկայիս, ամուրի շատ Քրիստոնեաներ կան, որոնք որպէս երէց կը ծառայեն։ Անոնց ամուրի վիճակը հաւանաբար աւելի ժամանակ կու տայ որ իրենց տեսչութեան պարտականութիւնները կատարեն։
‘Ամուսնացած Տղամարդը Երկուքի Բաժնուած Է’
5. Ամուսնացած եղբայրներ սուրբ գրային ի՞նչ իրողութիւններ պէտք է ընդունին։
5 Երբ Քրիստոնեայ այր մը ամուսնանայ, ան պէտք է գիտակցի որ նոր պատասխանատուութիւններ կը ստանձնէ, որոնք իր ժամանակը եւ ուշադրութիւնը պիտի խլեն։ Աստուածաշունչը կ’ըսէ. «Կին չունեցողը միայն Տիրոջ հոգը կ’ունենայ, ջանալով Տիրոջ կամքը ընել. մինչդեռ ամուսնացած մարդը երկրաւոր հոգեր կ’ունենայ, ջանալով իր կնոջ կամքը կատարել. որով երկուքի բաժնուած կ’ըլլայ»։ (Ա. Կորնթացիս 7։32–34, Նոր Աշխարհաբար Թարգմանութիւն) Ան ի՞նչ առումով երկուքի բաժնուած է։
6, 7. (ա) Ամուսնացած տղամարդ մը ի՞նչ կերպով «երկուքի բաժնուած» է։ (բ) Պօղոս ի՞նչ խրատ տուաւ ամուսնացած Քրիստոնեաներուն։ (գ) Գործի նշանակում ընդունելու համար ասիկա ինչպէ՞ս կրնայ ազդել տղամարդու մը տալիք որոշումին։
6 Նախ՝ ամուսնացած այր մը ինքն իր մարմնին վրայ հեղինակութիւն ունենալէ կը հրաժարի։ Պօղոս ասիկա պարզեց, ըսելով. «Կինը իր մարմնին չիշխեր, հապա այրը. նոյնպէս այրն ալ իր մարմնին չիշխեր, հապա՝ կինը»։ (Ա. Կորնթացիս 7։4) Ամուսնութեան մասին մտածողներէն ոմանք կրնան խորհիլ որ ասիկա շատ մեծ կարեւորութիւն ունեցող բան մը չէ, քանի որ իրենց ամուսնութեան մէջ սեռայնութիւնը գլխաւոր կարեւորութիւն ունեցող բանը պիտի չըլլայ։ Սակայն, քանի որ նախամուսնական մաքրութիւնը սուրբ գրային պահանջ մըն է, Քրիստոնեաները իրապէս չեն կրնար գիտնալ թէ իրենց ապագայ կողակիցին սեռային կարիքները ի՛նչ են։
7 Պօղոս ցոյց կու տայ որ նոյնիսկ ‘հոգեւոր բաներ մտածող’ զոյգ մը, իրարու սեռային կարիքները նկատի պէտք է առնէ։ «Այրը թող իր կնոջ պարտքը վճարէ, նոյնպէս կինն ալ՝ իր էրկան։ Մէկզմէկ մի՜ զրկէք, եթէ ոչ՝ միաբանութեամբ ատեն մը, աղօթքի պարապելու համար ու նորէն իրարո՛ւ դարձէք, որպէս զի Սատանան ձեզ չփորձէ ձեր անժուժկալութեան համար»։ (Հռովմայեցիս 8։5. Ա. Կորնթացիս 7։3, 5) Դժբախտաբար, այս խրատին չանսալուն հետեւանքով շնութեան պարագաներ եղած են։ Ասիկա ի մտի ունենալով, ամուսնացած Քրիստոնեայ մը հարցը լրջօրէն պէտք է կշռէ, ընդունելէ առաջ գործի նշանակում մը, որ զինք որոշ ժամանակ իր կնոջմէն հեռու պիտի պահէ։ Ան այլեւս ազատ չէ վարուելու այնպէս՝ ինչպէս կը վարուէր երբ ամուրի էր։
8, 9. (ա) Պօղոս ի՞նչ ըսել ուզեց երբ ըսաւ որ ամուսնացած Քրիստոնեաներ «աշխարհիս բաներով մտահոգ» են։ (բ) Ամուսնացած Քրիստոնեաներու մտահոգութիւնը ի՞նչ պէտք է ըլլայ։
8 Ի՞նչ առումով կարելի է ըսել որ ամուսնացած Քրիստոնեայ տղամարդիկ, մէջը ըլլալով երէցները, «աշխարհիս [գոզմոս] բաներով մտահոգ» են։ (Ա. Կորնթացիս 7։33) Բացայայտ է որ Պօղոս այս աշխարհի վատ բաներուն չէր ակնարկեր, որոնցմէ բոլոր Քրիստոնեաներն ալ հեռու պէտք է մնան։ (Բ. Պետրոս 1։4. 2։18–20. Ա. Յովհաննու 2։15–17) Աստուծոյ Խօսքը մեզի կը սորվեցնէ որ «ամբարշտութիւնն ու աշխարհային [գոզմոս] ցանկութիւնները ուրանանք եւ զգաստութիւնով ու արդարութիւնով եւ բարեպաշտութիւնով ապրինք այս աշխարհի մէջ»։—Տիտոս 2։12
9 Հետեւաբար, ամուսնացած Քրիստոնեայ մը «աշխարհիս բաներով մտահոգ է», այն առումով որ ան ամուսնացեալ սովորական կեանքին մէկ մասը կազմող աշխարհային բաներով օրինաւոր կերպով մտահոգուած է. ուրիշ խօսքով, առտնին գործեր, ուտելիք, հագուելիք, զբօսանք, իսկ եթէ զաւակներ ունի՝ անկէ առթած անհամար զբաղումներ։ Բայց նոյնիսկ զաւակ չունեցող զոյգի մը պարագային, ամուսնութիւն մը լաւ ընթանալու համար, ամուսինը թէ կինը իր կողակիցին «հաճելի» ըլլալու մասին պէտք է մտածէ։ Ասոր մասնաւորաբար ուշադրութիւն պէտք է ընեն Քրիստոնեայ երէցները, մինչ իրենց պատասխանատուութիւնները կը հաւասարակշռեն։
Լաւ Ամուսիններ, Ինչպէս Նաեւ՝ Լաւ Երէցներ
10. Որպէսզի Քրիստոնեայ մը որակելի ըլլայ որպէս երէց, իր եղբայրները եւ դուրսի մարդիկը իր վրայ ի՞նչ պէտք է տեսնեն։
10 Թէեւ երէց ըլլալու համար ամուսնացած ըլլալը պայման չէ, սակայն Քրիստոնեայ այր մը եթէ երէց նշանակուելու յանձնարարուելէն առաջ ամուսնացած է, ան պէտք է ապացուցանէ որ լաւ եւ սիրալիր ամուսին մըն է եւ իր գլխաւորութիւնը պատշաճ կերպով կը կատարէ։ (Եփեսացիս 5։23–25, 28–31) Պօղոս գրեց. «Եթէ մէկը եպիսկոպոսութեան [«տեսչութեան», ՆԱ] կը ցանկայ, աղէկ գործի կը ցանկայ, ուստի եպիսկոպոսը [«տեսուչը», ՆԱ] պէտք է անարատ ըլլայ, մէկ կնոջ այր»։ (Ա. Տիմոթէոս 3։1, 2) Բացայայտ պէտք է ըլլայ որ երէց մը իր կարելին կ’ընէ, որպէսզի լաւ ամուսին մը ըլլայ, իր կինը հաւատակից մը ըլլայ թէ ոչ։ Արդարեւ, ժողովքէն դուրս եղողներն ալ պէտք է նշմարեն որ լաւ հոգ կը տանի իր կնոջ եւ մնացեալ պատասխանատուութիւններուն։ Պօղոս աւելցուց. «Պէտք է եկեղեցիէն դուրս եղողներէն ալ բարի վկայութիւն բերէ, որ չըլլայ թէ նախատինքի մէջ ու Սատանային որոգայթին մէջ իյնայ»։—Ա. Տիմոթէոս 3։7
11. «Մէկ կնոջ այր» նախադասութիւնով ի՞նչ կը հասկնանք, ուստի երէցները ի՞նչ նախազգուշութիւն ձեռք պէտք է առնեն։
11 Անշուշտ, «մէկ կնոջ այր» նախադասութիւնը կը վանէ բազմակնութիւնը, բայց ամուսնական հաւատարմութիւնն ալ կը շեշտէ։ (Եբրայեցիս 13։4) Մասնաւորաբար երէցները ուշադիր պէտք է ըլլան, երբ ժողովքի քոյրերուն կ’օգնեն։ Երբ խրատի եւ մխիթարութեան կարիքը ունեցող քրոջ մը կ’այցելեն, պէտք չէ առանձին ըլլան։ Լաւ է որ անոնք երթան ուրիշ երէցի մը, օգնական ծառայի մը, կամ նոյնիսկ իրենց կնոջ հետ՝ եթէ այցելութեան նպատակը միմիայն քաջալերութիւն տալ է։—Ա. Տիմոթէոս 5։1, 2
12. Երէցներուն եւ օգնական ծառաներուն կիները ո՞ր նկարագրութեան պէտք է ջանան յարմարիլ։
12 Մինչ երէցներու ու օգնական ծառաներու համար պահանջներուն ցանկը կը թուէ, Պօղոս առաքեալ ի միջի այլոց երկու խօսք ալ կ’ըսէ այդ առանձնաշնորհումները կրելու արժանի եղողներու կիներուն մասին։ Ան կ’ըսէ. «Նոյնպէս ալ անոնց կիները ծանրաբարոյ ըլլան, ո՛չ չարախօս, հապա զգաստ, ամէն բանի մէջ հաւատարիմ»։ (Ա. Տիմոթէոս 3։11) Քրիստոնեայ ամուսին մը շատ բան կրնայ ընել իր կնոջ օգնելու որ այս նկարագրութեան գոհացում տայ։
Կնոջ Հանդէպ Սուրբ Գրային Պարտաւորութիւններ
13, 14. Նոյնիսկ երբ երէցի մը կինը Վկայ մը չէ, ինչո՞ւ ան պէտք է շարունակէ անոր հետ մնալ եւ լաւ ամուսին մը ըլլալ։
13 Անշուշտ, երէցներու կամ օգնական ծառաներու կիներուն տրուած այս խրատները կը կանխահետեւցնեն թէ անոնք նուիրուած Քրիստոնեաներ են։ Ընդհանրապէս այս է պարագան, քանի որ Քրիստոնեաներէն պահանջուած է որ «միայն թէ Տէրոջմով» ամուսնանան։ (Ա. Կորնթացիս 7։39) Սակայն եթէ եղբայր մը իր կեանքը Եհովայի նուիրելէ առաջ անհաւատի մը հետ ամուսնացած ըլլայ, կամ որու կինը ճշմարտութենէն հեռանայ՝ որու ինք պատասխանատու չէ, այս պարագային ի՞նչ։
14 Ասիկա ինքնին արգելք պէտք չէ ըլլայ երէց ըլլալու։ Բայց ան իր կնոջմէն չի կրնար բաժնուիլ, պարզ անոր համար որ ան իր հաւատալիքները չի բաժներ։ Պօղոս խրատեց. «Կապուա՞ծ ես կնոջ, մի՛ փնտռեր արձակուիլ»։ (Ա. Կորնթացիս 7։27) Ան արդէն նշած էր. «Եթէ եղբայր մը անհաւատ կին ունենայ ու անոր հաճելի ըլլայ իրեն հետ բնակիլ, թող չձգէ զանիկա։ Իսկ եթէ անհաւատը զատուի՝ թող զատուի։ Եղբայր մը կամ քոյր մը այնպիսի պարագաներու մէջ գերի չէ. սակայն Աստուած խաղաղութեան կանչեց մեզ։ Քանզի ի՞նչ գիտես դուն, ո՛վ կին, թերեւս քու այրդ պիտի ապրեցնես. կամ դուն ի՞նչ գիտես, ո՛վ այր, թերեւս քու կինդ պիտի ապրեցնես»։ (Ա. Կորնթացիս 7։12, 15, 16) Նոյնիսկ երբ իր կինը Վկայ մը չէ, երէց մը լաւ ամուսին մը պէտք է ըլլայ։
15. Պետրոս առաքեալ ի՞նչ խրատ տուաւ Քրիստոնեայ ամուսիններուն, եւ եթէ երէց մը իր կինը անտեսէ, հետեւանքը ի՞նչ կրնայ ըլլալ։
15 Իր կինը հաւատակից մը ըլլայ կամ ոչ, Քրիստոնեայ երէց մը պէտք է գիտակցի որ իր կինը սիրալիր ուշադրութեան կը կարօտի։ Պետրոս առաքեալ գրեց. «Նմանապէս այրերը խոհեմութիւնով անոնց հետ ապրին, տկար անօթի պէս յարգելով կիները, իբրեւ կեանքի շնորհքին ժառանգակիցներ՝ որպէս զի ձեր աղօթքներուն արգելք չըլլայ»։ (Ա. Պետրոս 3։7) Ամուսին մը որ գիտակցաբար կը մերժէ իր կնոջ կարիքներուն հոգ տանիլ, Եհովայի հետ իր իսկ յարաբերութիւնը կը վտանգէ. անիկա Եհովայի մօտենալու արգելք պիտի ըլլայ իրեն, ‘ամպի մը նման, որպէսզի իր աղօթքը չանցնի’։ (Ողբք 3։44) Ասիկա որպէս Քրիստոնեայ տեսուչ ծառայելու անորակելի պիտի դարձնէ զինք։
16. Պօղոս ի՞նչ գլխաւոր կէտ մը կը շօշափէ եւ երէցները այս մասին ի՞նչ պէտք է խորհին։
16 Ինչպէս նշեցինք, Պօղոսի պատճառաբանութեան միտք բանին այդ էր որ երբ մարդ մը ամուսնանայ, ան որոշ չափով կը հրաժարի ամուրիութեան տուած ազատութենէն, որու պատճառաւ նախապէս ‘բոլորանուէր կերպով կը ծառայէր Տէրոջը’։ (Ա. Կորնթացիս 7։35, ՆԱԹ) Տեղեկագրութիւնները ցոյց կու տան որ ամուսնացած երէցներէն ոմանք Պօղոսի ներշնչեալ խրատին համաձայն հաւասարակշիռ չեն եղած։ Երէցէ մը պահանջուած բաները իրագործելու ցանկութենէ մղուած, անոնք կրնան անտեսել որպէս ամուսին իրենց պարտաւորութիւնները։ Ոմանք չեն կրնար ժողովքային առանձնաշնորհում մը մերժել, գիտնալով հանդերձ որ զայն ընդունիլը ի վնաս իրենց կնոջ պիտի ըլլայ։ Անոնք ամուսնութեան պարգեւած առանձնաշնորհումները կը վայելեն, բայց անկէ առթած պատասխանատուութիւնները ստանձնելու յօժա՞ր են։
17. Կարգ մը կիներու ի՞նչ պատահած է եւ ինչպէ՛ս կարելի էր ասկէ խուսափիլ։
17 Վստահաբար, երէցի մը նախանձախնդրութիւնը գովելի է։ Սակայն, Քրիստոնեայ մը հաւասարակշիռ եղած կ’ըլլա՞յ, եթէ ժողովքին մէջ իր պարտաւորութիւնները կատարէ, բայց իր կնոջ հանդէպ իր սուրբ գրային պատասխանատուութիւնները անտեսէ։ Մինչ կը ցանկայ ժողովքի անդամներուն թիկունք կանգնիլ, հաւասարակշիռ երէց մը իր կնոջ հոգեւորականութեամբ ալ պէտք է հետաքրքրուի։ Կարգ մը երէցներու կիներ հոգեւորապէս տկարացած են, եւ ոմանք հոգեւոր ‘նաւակոծութեան’ հանդիպած են։ (Ա. Տիմոթէոս 1։19) Թէեւ կին մը իր անձնական փրկութեան համար պէտք է աշխատի, բայց կարգ մը պարագաներու, եթէ երէց մը ‘իր կինը կերակրէ եւ սիրէ’, «ինչպէս Տէրն ալ՝ եկեղեցի»ին կ’ընէ, կարելի է հոգեւոր խնդիրներէ խուսափիլ։ (Եփեսացիս 5։28, 29) Ճիշդ է որ երէցները պէտք է ‘զգուշանան իրենց անձին եւ բոլոր հօտին’։ (Գործք 20։28) Եթէ անոնք ամուսնացած են՝ իրենց կինն ալ անոր մաս կը կազմէ։
«Մարմնի Նեղութիւն»
18. Ամուսնացած Քրիստոնեաներ ի՞նչպիսի «նեղութիւն» կրնան ակնկալել եւ ասիկա ինչպէ՞ս կրնայ ազդել երէցի մը գործունէութիւններուն։
18 Առաքեալը նաեւ գրեց. «Եթէ կոյսը ամուսնանայ՝ չի մեղանչեր։ բայց այնպիսիները մարմնի նեղութիւն պիտի ունենան. սակայն ես ձեզի կը խնայեմ»։ (Ա. Կորնթացիս 7։28) Պօղոս կը փափաքէր որ իր օրինակին հետեւելով ամուրի մնալու կարող եղողները խնայէր այն մտահոգութիւններէն, որոնք ամուսնութեան անբաժան մէկ մասը կը կազմեն։ Զաւակ չունեցող զոյգերն անգամ կրնան առողջապահական խնդիրներ կամ նիւթական դժուարութիւններ, ինչպէս նաեւ կողակիցներէն մէկուն տարեց ծնողին հոգ տանելու սուրբ գրային պատասխանատուութիւններ ունենալ։ (Ա. Տիմոթէոս 5։4, 8) Երէց մը օրինակելի կերպով պէտք է դիմագրաւէ այս պատասխանատուութիւնները եւ ասիկա երբեմն որոշ ազդեցութիւն կրնայ ունենալ որպէս Քրիստոնեայ տեսուչ իր գործունէութիւններուն վրայ։ Բարեբախտաբար, երէցներէն շատեր ընտանեկան եւ ժողովքային պատասխանատուութիւնները լաւ կերպով կը կատարեն։
19. Պօղոս ի՞նչ ըսել կ’ուզէր, երբ ըսաւ. «Անոնք որ կին ունին՝ այնպէս ըլլան որպէս թէ չունին»։
19 Պօղոս աւելցուց. «Բայց ա՛յս կ’ըսեմ, ե՛ղբայրներ, թէ ժամանակը կարճցած է. ալ անոնք որ կին ունին՝ այնպէս ըլլան որպէս թէ չունին»։ (Ա. Կորնթացիս 7։29, Արեւմտահայերէն Թարգմանութիւն) Անշուշտ, այս գլուխին մէջ Կորնթացիներուն գրած բաներուն ի տես, բացայայտ է որ անիկա ըսել չէր ուզեր որ ամուսնացած Քրիստոնեաները իրենց կիները կերպով մը պէտք է անտեսեն։ (Ա. Կորնթացիս 7։2, 3, 33) Ան իր միտքը պարզեց, երբ ըսաւ. «Անոնք որ աշխարհիկ գործով կը զբաղին՝ որպէս թէ միայն անով չեն զբաղիր. վասն զի այս աշխարհի կերպարանքը կ’անցնի»։ (Ա. Կորնթացիս 7։31) Պօղոսի կամ Յովհաննէսի օրերէն աւելի, հի՛մա կրնանք ըսել որ ‘աշխարհ անցնելու վրայ է’։ (Ա. Յովհաննու 2։15–17) Ուստի, ամուսնացած Քրիստոնեաներ, որոնք Քրիստոսի հետեւելու համար կարգ մը զոհողութիւններ ընելու կարիքը կը զգան, ամուսնական ուրախութիւններու եւ առանձնաշնորհումներու մէջ ամբողջովին չեն կրնար մխրճուիլ։—Ա. Կորնթացիս 7։5
Անձնազոհ Կիներ
20, 21. (ա) Քրիստոնեայ բազմաթիւ կիներ ի՞նչ զոհողութիւններ ընելու պատրաստ են։ (բ) Կին մը իր ամուսինէն ի՞նչ ակնկալելու իրաւունք ունի, նոյնիսկ երբ ան երէց մըն է։
20 Ուստի, ինչպէս որ երէցներ զոհողութիւններ կ’ընեն, ուրիշներու օգտակար ըլլալու համար, երէցներու կիներէն շատեր տան մէջ իրենց պատասխանատուութիւնները հաւասարակշռած են՝ Թագաւորութեան կենսական շահերուն ի տես։ Հազարաւոր Քրիստոնեայ կիներ ուրախութեամբ կը համագործակցին, որպէսզի իրենց ամուսինները կարենան իրենց տեսչութեան պարտաւորութիւնները կատարել։ Եհովա ասոր համար կը սիրէ զիրենք եւ իրենց ցուցաբերած այս լաւ հոգիին համար զանոնք կ’օրհնէ։ (Փիլիմոն 25) Այսուհանդերձ, Պօղոսի հաւասարակշռուած խրատը ցոյց կու տայ, որ տեսուչներու կիներուն իրաւունքն է ակնկալել որ իրենց ամուսինը որոշ ժամանակ եւ ուշադրութիւն ընծայէ իրենց։ Ամուսնացած երէցներուն սուրբ գրային պարտաւորութիւնն է որոշ չափով ժամանակ տրամադրել իրենց կնոջ, որպէսզի կարենան որպէս ամուսին եւ տեսուչ՝ իրենց պատասխանատուութիւնները հաւասարակշռել։
21 Բա՞յց. . . եթէ Քրիստոնեայ երէց մը ամուսին մը ըլլալէ զատ, հայր ալ է։ Ասիկա իր պատասխանատուութիւնները կ’աւելցնէ եւ վերատեսչութեան յաւելեալ դաշտ մը կը բանայ իր առջեւ, ինչպէս պիտի տեսնենք յաջորդ յօդուածին մէջ։
Վերաքաղի Հարցումներ
◻ Սուրբ գրային ի՞նչ իրողութիւններ ցոյց կու տան որ Քրիստոնեայ տեսուչներ կրնան ամուսնացած ըլլալ։
◻ Եթէ ամուրի երէց մը ամուսնանայ, ի՞նչ բանի պէտք է գիտակցի։
◻ Ի՞նչ կերպերով ամուսնացած Քրիստոնեայ մը «աշխարհիս բաներով մտահոգ է»։
◻ Շատ տեսուչներու կիներ ի՞նչպէս անձնազոհ հոգի մը կը ցուցաբերեն։
[Նկար՝ էջ 24]
Նոյնիսկ երբ աստուածպետական գործունէութիւններով զբաղած ըլլայ, երէց մը իր կնոջ սիրալիր ուշադրութիւն պէտք է ընծայէ