Ապահով եղէք որպէս Աստուծոյ կազմակերպութեան մէկ մասը
«Տէրոջը անունը ամուր աշտարակ է, արդարը անոր կը դիմէ ու ապահով ապաստանարան կ’ունենայ»։—ԱՌԱԿԱՑ 18։10
1. Ըստ Յիսուսի աղօթքին, Քրիստոնեաները ո՞ր դժուարին կացութեան մէջ են։
ՄԵՌՆԵԼԷՆ քիչ առաջ, Յիսուս իր հետեւորդներուն համար իր երկնաւոր Հօրը աղօթեց։ Սիրազեղ հետաքրքրութեամբ, ան ըսաւ. «Ես քու խօսքդ անոնց տուի ու աշխարհ զանոնք ատեց, վասն զի աշխարհէն չեն, ինչպէս ես աշխարհէն չեմ։ Չեմ աղաչեր որ զանոնք աշխարհէն վերցնես, հապա որ զանոնք չարէն պահես»։ (Յովհաննու 17։14, 15) Յիսուս գիտէր որ աշխարհը վտանգաւոր վայր մըն էր Քրիստոնեաներուն համար։ Անիկա զիրենք պիտի ատէր, իրենց վրայ սուտեր խօսելով եւ զիրենք հալածելով։ (Մատթէոս 5։11, 12. 10։16, 17) Անիկա ապականութեան աղբիւր մըն ալ պիտի ըլլար։—Բ. Տիմոթէոս 4։10. Ա. Յովհաննու 2։15, 16
2. Քրիստոնեաները ո՞ւր կրնան հոգեւոր ապահովութիւն գտնել։
2 Յովհաննէս առաքեալ ըսաւ որ Քրիստոնեաները ատող աշխարհը՝ Աստուծմէ օտարացած ու Սատանայի ղեկավարութեան ներքեւ եղող մարդոցմէ կը բաղկանայ։ (Ա. Յովհաննու 5։19) Այս աշխարհը քրիստոնէական ժողովքէն շատ աւելի մեծ է, իսկ Սատանան՝ ոեւէ անհատէ աւելի ուժեղ։ Հետեւաբար, աշխարհի ատելութիւնը իրական սպառնալիք մըն է։ Յիսուսի հետեւորդները ո՞ւր հոգեւոր ապահովութիւն պիտի կարենային գտնել։ Դիտարան 1 Դեկտեմբեր 1922–ի համարին մէջ (Անգլերէն), պատասխան մը թելադրուած էր. «Հիմա մենք չար օրերու մէջ ենք։ Սատանայի կազմակերպութեան ու Աստուծոյ կազմակերպութեան միջեւ կռիւը կը շարունակուի։ Անիկա կատաղի կռիւ մըն է»։ Այս պայքարին մէջ, Աստուծոյ կազմակերպութիւնը հոգեւորապէս ապահով վայրի մը մէջ է։ Աստուածաշունչին մէջ «կազմակերպութիւն» բառ չկայ եւ 1920–ական թուականներուն, «Աստուծոյ կազմակերպութիւնը» նոր արտայայտութիւն մըն էր։ Արդ, ի՞նչ է այս կազմակերպութիւնը եւ ի՞նչպէս կրնանք պաշտպանութիւն գտնել անոր մէջ։
Եհովայի Կազմակերպութիւնը
3, 4. (ա) Բառարանի մը եւ Դիտարան–ի համաձայն, կազմակերպութիւն մը ի՞նչ է։ (բ) Եհովայի Վկաներու միջազգային ընկերակցութիւնը ի՞նչ առումով կարելի է կազմակերպութիւն կոչել։
3 Կազմակերպութիւն մը «կազմակերպուած մարմին» մըն է, Քընսայս Օքսֆորտ Տիքշընըրի–ին համաձայն։ Ասիկա ի մտի ունենալով, քանի որ առաքեալներ առաջին դարու Քրիստոնեաները տեղական ժողովքներու մէջ կազմակերպեցին՝ Երուսաղէմի կառավարիչ մարմինին վերատեսչութեան ներքեւ, տեղին է այդ «եղբայրութիւնը» կոչել կազմակերպութիւն մը։ (Ա. Պետրոս 2։17) Ներկայիս Եհովայի Վկաները կազմակերպչական նոյնանման կառոյց մը ունին։ Առաջին դարուն այդ մարմինին միասնականութիւնը զօրացուած էր «հովիւներ ու վարդապետներ»ու նման ‘որպէս պարգեւ տրուած տղամարդոցմով’։ Անոնցմէ ոմանք ժողովքէ ժողովք կ’երթային, իսկ ուրիշներ տեղական ժողովքներու մէջ երէցներ էին։ (Եփեսացիս 4։8, 11, 12. Գործք 20։28) Նոյնանման «պարգեւներ» ներկայիս Եհովայի Վկաներու միութիւնը կը զօրացնեն։
4 Դիտարան 1 Նոյեմբեր 1922–ի համարը (Անգլերէն) «կազմակերպութիւն» բառին մասին ըսաւ. «Կազմակերպութիւն մը՝ անհատներու ընկերակցութիւն մըն է, ծրագիր մը յառաջ տանելու համար»։ Դիտարան–ը շարունակեց բացատրել թէ Եհովայի Վկաները կազմակերպութիւն մը կոչելը զիրենք «աղանդ մը չի դարձներ, այդ արտայայտութեան գործածուած ըմբռնումով, այլ պարզապէս կը նշանակէ թէ Աստուածաշունչի Աշակերտները [Եհովայի Վկաները] կը ջանան Աստուծոյ նպատակները կատարել եւ ասիկա կ’ընեն, ինչպէս Տէրը ամէն բան կ’ընէ, կարգ ու կանոնով»։ (Ա. Կորնթացիս 14։33) Պօղոս առաքեալ ցոյց տուաւ որ իր օրուան Քրիստոնեաներն ալ կարգապահութեամբ կը վարուէին։ Ան օծեալ Քրիստոնեաներու ընկերակցութիւնը համեմատեց մարդկային մարմնին հետ, որ շատ մասեր ունի, իւրաքանչիւրը իրեն նշանակուած դերը կատարելով, որպէսզի մարմինը պատշաճօրէն գործէ։ (Ա. Կորնթացիս 12։12-26) Կազմակերպութիւն մը նկարագրելու համար ի՜նչ գեղեցիկ պատկեր մը։ Քրիստոնեաները ինչո՞ւ կազմակերպուած էին։ «Աստուծոյ նպատակներ»ուն ծառայելու համար, այսինքն, Եհովայի կամքը կատարելու համար։
5. Աստուծոյ տեսանելի կազմակերպութիւնը ի՞նչ է։
5 Աստուածաշունչը նախագուշակեց որ մեր օրերուն Քրիստոնեաները միացած պիտի ըլլային, որպէս մէկ «ազգ» մէկ ‘երկրի’ մէջ հաւաքուած ըլլալով, ուր ‘լուսաւորներու պէս պիտի փայլէին աշխարհի մէջ’։ (Եսայեայ 66։8. Փիլիպպեցիս 2։15) Հիմա այս կազմակերպուած «ազգ»ը հինգուկէս միլիոնէն աւելի անդամներ ունի։ (Եսայեայ 60։8-10, 22) Սակայն, ասիկա Աստուծոյ կազմակերպութեան լման տարողութիւնը չէ, քանի որ հրեշտակներն ալ անոր մէջ պարփակուած են։
6. Աւելի լայն առումով, Աստուծոյ կազմակերպութիւնը որոնցմէ՞ բաղկացած է։
6 Շատ պարագաներ կան, երբ հրեշտակներ Աստուծոյ երկրային ծառաներուն հետ գործած են։ (Ծննդոց 28։12. Դանիէլ 10։12-14. 12։1. Եբրայեցիս 1։13, 14. Յայտնութիւն 14։14-16) Ուստի, տեղին ըլլալով, Դիտարան 15 Մայիս 1925–ի համարը (Անգլերէն) կ’ըսէր. «Սուրբ հրեշտակները Աստուծոյ կազմակերպութեան մէկ մասն են»։ Աւելցնելով, անիկա կ’ըսէր. «Աստուծոյ կազմակերպութեան գլուխն է Տէր Յիսուս Քրիստոս, որ ամէն զօրութիւն եւ իշխանութիւն ունի»։ (Մատթէոս 28։18) Ուստի, աւելի լայն առումով, Աստուծոյ կազմակերպութիւնը կը կազմեն այն բոլորը, որոնք Աստուծոյ կամքը կատարելու համար երկնքի մէջ ու երկրի վրայ միասնաբար կ’աշխատին։ (Տես՝ շրջագիծը։) Ի՜նչ հոյակապ առանձնաշնորհում մըն է անոր մէկ մասը ըլլալ։ Իսկ ի՜նչ ուրախութիւն է ակնկալութեամբ սպասել այն ժամանակը, երբ բոլոր ապրող արարածները՝ երկնքի մէջ ու երկրի վրայ՝ կազմակերպուած պիտի ըլլան Եհովա Աստուած միակամօրէն փառաբանելու։ (Յայտնութիւն 5։13, 14) Սակայն, այսօր Աստուծոյ կազմակերպութիւնը ի՞նչ պաշտպանութիւն կը հայթայթէ մեզի։
Աստուծոյ Կազմակերպութեան Մէջ Պաշտպանուած՝ Ի՞նչպէս
7. Աստուծոյ կազմակերպութիւնը ի՞նչ կերպով մեզ կը պաշտպանէ։
7 Աստուծոյ կազմակերպութիւնը կրնայ մեզի օգնել արթուն մնալու Սատանայի եւ իր հնարքներուն դէմ։ (Եփեսացիս 6։11) Սատանան ճնշում կը բանեցնէ, կը հալածէ ու փորձութեան կ’ենթարկէ Եհովայի երկրպագուները, իր մտքին մէջ մէ՛կ նպատակակէտ ունենալով. ‘Իրենց քալելիք ճամբէն’ հեռացնել զանոնք։ (Եսայեայ 48։17. բաղդատել՝ Մատթէոս 4։1-11։) Իրերու այս դրութեան մէջ բնաւ չենք կրնար լիովին խուսափիլ այս յարձակումներէն։ Բայց Աստուծոյ եւ իր կազմակերպութեան հետ մեր սերտ յարաբերութիւնը մեզ կը զօրացնէ եւ կը պաշտպանէ ու այս կերպով մեզի կ’օգնէ որ «ճամբուն» մէջ մնանք։ Որպէս հետեւանք, մեր յոյսը չենք կորսնցներ։
8. Եհովայի անտեսանելի կազմակերպութիւնը ի՞նչպէս թիկունք կը կանգնի իր երկրային ծառաներուն։
8 Աստուծոյ կազմակերպութիւնը ի՞նչպէս կը հայթայթէ այս պաշտպանութիւնը։ Նախ՝ Եհովայի հոգեւոր ծառաները անվրէպ սատար կը կանգնին մեզի։ Երբ Յիսուս սաստիկ ճնշումի ներքեւ էր, հրեշտակ մը իրեն սպասաւորութիւն ըրաւ։ (Ղուկաս 22։43) Երբ Պետրոս մահուան սպառնալիքի ներքեւ էր, հրեշտակ մը հրաշքով զինք ազատեց։ (Գործք 12։6-11) Թէեւ ներկայիս այսպիսի հրաշքներ չկան, բայց Եհովայի ծառաները իրենց քարոզչութեան մէջ հրեշտակային օգնութիւն ստանալու խոստումը ունին։ (Յայտնութիւն 14։6, 7) Անոնք երբ դժուար կացութիւններու դիմաց գտնուին, յաճախ բնականէն գերիվեր եղող զօրութիւն մը կ’ունենան։ (Բ. Կորնթացիս 4։7) Ասկէ զատ, անոնք գիտակից են որ «Տէրոջը հրեշտակը իր բանակը անկէ վախցողներուն չորս կողմը կը դնէ ու զանոնք կ’ազատէ»։—Սաղմոս 34։7
9, 10. Ի՞նչպէս կրնայ ըսուիլ որ «Տէրոջը անունը ամուր աշտարակ է», եւ այս սկզբունքը ի՞նչպէս կը կիրարկուի Աստուծոյ կազմակերպութեան որպէս ամբողջութիւն մը։
9 Եհովայի տեսանելի կազմակերպութիւնն ալ պաշտպանութիւն մըն է մեզի համար։ Ի՞նչպէս։ Առակաց 18։10–ի մէջ կը կարդանք. «Տէրոջը անունը ամուր աշտարակ է, արդարը անոր կը դիմէ ու ապահով ապաստանարան կ’ունենայ»։ Ասիկա չի թելադրեր որ Աստուծոյ անունը պարզապէս կրկնելը պաշտպանութիւն կը հայթայթէ։ Հապա, Աստուծոյ անուան մեր ապաստանիլը կը նշանակէ թէ Եհովայի կը վստահինք։ (Սաղմոս 20։1. 122։4) Անիկա կը նշանակէ իր գերիշխանութեան նեցուկ կանգնիլ, իր օրէնքներն ու սկզբունքները պաշտպանել, եւ իր խոստումներուն հաւատք ընծայել։ (Սաղմոս 8։1-9. Եսայեայ 50։10. Եբրայեցիս 11։6) Անիկա կը պարունակէ Եհովայի բացարձակ պաշտամունք տալ։ Եհովան այս կերպով պաշտողներն են միայն որ կրնան սաղմոսերգուին հետ ըսել. «Մեր սրտերը [Եհովայով] կ’ուրախանան, քանզի անոր սուրբ անուանը յուսացինք»։—Սաղմոս 33։21. 124։8
10 Հիմա Աստուծոյ տեսանելի կազմակերպութեան մէջ գտնուող բոլորը Միքիայի հետ կ’ըսեն. «Մենք յաւիտեանս յաւիտենից մեր Տէր Աստուծոյն անունովը պիտի քալենք»։ (Միքիայ 4։5) Արդի կազմակերպութիւնը «Աստուծոյ Իսրայէլ»ին շուրջ հաւաքուած է, որ Աստուածաշունչին մէջ կոչուած է ‘ժողովուրդ մը իր անուանը համար’։ (Գաղատացիս 6։16. Գործք 15։14. Եսայեայ 43։6, 7. Ա. Պետրոս 2։17) Հետեւաբար, Եհովայի կազմակերպութեան մաս կազմել, կը նշանակէ մէկ մասը ըլլալ այն ժողովուրդին, որ իր պաշտպանութիւնը Աստուծոյ անուան մէջ կը փնտռէ ու կը գտնէ զայն։
11. Եհովայի կազմակերպութիւնը ի՞նչ մասնայատուկ կերպերով պաշտպանութիւն կը հայթայթէ անոր մաս կազմողներուն։
11 Ասկէ զատ, Աստուծոյ տեսանելի կազմակերպութիւնը հաւատքի համայնք մըն է, հաւատակիցներու ընկերակցութիւն մը, որոնք իրար կը կերտեն ու կը քաջալերեն։ (Առակաց 13։20. Հռովմայեցիս 1։12) Անիկա վայր մըն է ուր Քրիստոնեայ հովիւներ ոչխարներուն հոգ կը տանին, հիւանդներն ու ընկճուածները կը քաջալերեն եւ ինկածները վերահաստատելու ջանք կը թափեն։ (Եսայեայ 32։1, 2. Ա. Պետրոս 5։2-4) «Հաւատարիմ ու իմաստուն ծառան» ‘ատենին կերակուր’ կու տայ՝ կազմակերպութեան միջոցաւ։ (Մատթէոս 24։45) Այդ «ծառան», օծեալ Քրիստոնեաներէ բաղկացած, հոգեւոր գետնի վրայ լաւագոյն բաները կը հայթայթէ. յաւիտենական կեանքի առաջնորդող ճշգրիտ ու Աստուածաշունչի վրայ հիմնուած՝ գիտութիւն։ (Յովհաննու 17։3) «Ծառայ»էն եկած առաջնորդութեան շնորհիւ, Քրիստոնեաները բարոյական բարձր չափանիշներ կը պահեն եւ զիրենք շրջապատող վտանգաւոր միջավայրին մէջ «խորագէտ [կ’ըլլան] օձերու պէս, եւ անմեղ՝ աղաւնիներու պէս»։ (Մատթէոս 10։16, Անթիլիաս) Նաեւ օգնութիւն կը ստանան, որպէսզի ‘ամէն ատեն աւելնան Տէրոջը գործին մէջ’, ինչ որ ինքնին զօրաւոր պաշտպանութիւն մըն է։—Ա. Կորնթացիս 15։58
Որո՞նք Աստուծոյ Կազմակերպութեան Մաս կը Կազմեն
12. Որո՞նք բնորոշուած են որպէս Աստուծոյ երկնային կազմակերպութեան մէկ մասը։
12 Քանի որ այս պաշտպանութիւնը մատչելի է անոնց որոնք Աստուծոյ կազմակերպութեան մաս կը կազմեն, որոնցմէ՞ բաղկացած է անիկա։ Երկնային կազմակերպութեան առնչութեամբ այս հարցումին պատասխանը որոշ է։ Սատանան եւ իր հրեշտակները այլեւս երկնքի մէջ չեն։ Իսկ հաւատարիմ հրեշտակները տակաւին հոն են՝ «հանդիսաւոր ժողովին»։ Յովհաննէս առաքեալ տեսաւ որ վերջին օրերու ընթացքին, «Գառնուկը», քերովբէները («չորս կենդանիներ»ը) եւ «բիւրաւոր հրեշտակները» Աստուծոյ աթոռին շատ մօտ պիտի ըլլային։ Անոնց հետ պիտի ըլլային 24 երէցները, որոնք կը ներկայացնէին այն օծեալ Քրիստոնեաները որոնք ստացած էին իրենց երկնային փառաւոր ժառանգութիւնը։ (Եբրայեցիս 12։22, 23. Յայտնութիւն 5։6, 11. 12։7-12) Որոշ է ուրեմն, որ այս բոլորը Աստուծոյ կազմակերպութեան մաս կը կազմեն։ Բայց մարդոց մէջ, հարցերը այդքան ալ պարզ չեն։
13. Յիսուս ի՞նչպէս բնորոշեց Աստուծոյ կազմակերպութեան մաս կազմողները եւ անոր մաս չկազմողները։
13 Իրեն հետեւիլ դաւանող կարգ մը անհատներուն Յիսուս կ’ըսէ. «Շատերը այն օրը ինծի պիտի ըսեն. ‘Տէ՛ր, Տէ՛ր, չէ՞ որ քու անունովդ մարգարէութիւն ըրինք եւ քու անունովդ դեւեր հանեցինք ու քու անունովդ շատ հրաշքներ ըրինք’։ Այն ատեն յայտնապէս անոնց պիտի ըսեմ թէ Ես բնաւ ձեզ չէի ճանչնար. մէկդի՛ գացէք քովէս դուք, որ անօրէնութիւն կը գործէիք»։ (Մատթէոս 7։22, 23) Եթէ անհատ մը անօրէնութիւն գործող մըն է, վստահաբար Աստուծոյ կազմակերպութեան մաս չի կազմեր, ի՛նչ որ ալ դաւանի եւ ո՛ւր որ ալ երթայ Աստուած պաշտելու համար։ Յիսուս նաեւ ցոյց տուաւ թէ ի՛նչպէս կարելի է բնորոշել թէ անհատ մը Աստուծոյ կազմակերպութեան մաս կը կազմէ։ Ան ըսաւ. «Ոչ թէ ամէն ով որ ինծի ‘Տէ՛ր, Տէ՛ր’, կ’ըսէ, պիտի մտնէ երկնքի թագաւորութիւնը, հապա անիկա՝ որ իմ երկնաւոր Հօրս կամքը կը կատարէ»։—Մատթէոս 7։21
14. Աստուծոյ կազմակերպութեան մաս կազմողներուն վրայ Աստուծոյ կամքին ո՞ր հարկադրանքը կայ։
14 Հետեւաբար, Աստուծոյ կազմակերպութեան մաս կազմելու համար՝ որու հիմնական մէկ մասն է «երկնքի թագաւորութիւնը»՝ անհատ մը պէտք է Աստուծոյ կամքը կատարէ։ Ի՞նչ է իր կամքը։ Պօղոս անոր կենսական մէկ երեսակը բնորոշեց, երբ ըսաւ. «Աստուած կ’ուզէ որ բոլոր մարդիկ փրկուին ու ճշմարտութիւնը ճանչնան»։ (Ա. Տիմոթէոս 2։4) Երբ անհատ մը իրապէս կը ջանայ Աստուածաշունչէն ճշգրիտ գիտութիւն ձեռք ձգել, զայն իր կեանքին մէջ կիրարկել եւ զայն ‘բոլոր մարդոց’ ցրուել՝ ուրեմն Աստուծոյ կամքը կը կատարէ։ (Մատթէոս 28։19, 20. Հռովմայեցիս 10։13-15) Աստուծոյ կամքին մաս կը կազմէ նաեւ որ ոչխարները կերակրուին ու խնամուին։ (Յովհաննու 21։15-17) Ասոր մէջ քրիստոնէական ժողովները կենսական դեր մը կը խաղան։ Անհատ մը որ ազատ է այսպիսի ժողովի մը ներկայ գտնուելու ու զայն կ’անտեսէ, ցոյց կու տայ որ Աստուծոյ կազմակերպութեան մէջ իր տեղը չի գնահատեր։—Եբրայեցիս 10։23-25
Աշխարհի Հետ Բարեկամութիւն
15. Յակոբոս իր օրուան ժողովքներուն ի՞նչ ազդարարութիւն տուաւ։
15 Յիսուսի մահուընէ շուրջ 30 տարիներ ետք, իր կէս–եղբայրը՝ Յակոբոս՝ որոշ ազդակներ ալ բնորոշեց, որոնք կրնան Աստուծոյ կազմակերպութեան մէջ անհատի մը տեղը վտանգել։ Ան գրեց. «Անհաւատարի՛մ մարդիկ, չէ՞ք գիտեր որ աշխարհին հետ բարեկամութիւն ընել՝ Աստուծոյ թշնամութիւն ընել կը նշանակէ։ Որովհետեւ ով որ կ’ուզէ աշխարհին բարեկամ ըլլալ՝ ինքզինք Աստուծոյ թշնամի կը դարձնէ»։ (Յակոբու 4։4, Անթիլիաս) Աստուծոյ թշնամի մը վստահաբար տեղ չունի իր կազմակերպութեան մէջ։ Արդ, աշխարհի հետ բարեկամութիւնը ի՞նչ է։ Ըստ բացատրութեան, անիկա տարբեր երեւոյթներ ունի, ինչպէս՝ չար ընկերակցութիւններ մշակել կամ անոնց միջամուխ ըլլալ։ Ասկէ զատ, Յակոբոս կեդրոնացաւ շատ մասնայատուկ բանի մը վրայ, որ էր՝ անվայել վարմունքի առաջնորդող սխալ մտավիճակներ։
16. Աշխարհի հետ բարեկամութիւնը Աստուծոյ դէմ թշնամութիւն ըլլալու մասին Յակոբոսի տուած ազդարարութիւնը ի՞նչ առիթով էր։
16 Յակոբու 4։1-3–ի մէջ կը կարդանք. «Ուրկէ՞ են պատերազմները եւ ուրկէ՞ կռիւները ձեր մէջ։ Չէ՞ որ ձեր ցանկութիւններէն, որոնք ձեր անդամներուն մէջ կը պատերազմին։ Կը ցանկաք ու չունիք, կը սպաննէք ու կը նախանձիք եւ չէ՛ք կրնար ձեր ուզածին հասնիլ։ Կը պատերազմիք ու կը կռուիք, բայց չունիք, վասն զի չէ՛ք խնդրեր. կը խնդրէք ու չէ՛ք առներ, վասն զի չարաչար կը խնդրէք՝ որպէս զի ձեր ցանկութիւններուն բանեցնէք»։ (Յակոբու 4։1-3) Այս խօսքերը գրելէն ետքն է որ Յակոբոս զգուշացուց աշխարհի հետ բարեկամ ըլլալու դէմ։
17. Առաջին դարու քրիստոնէական ժողովքին մէջ ի՞նչ կերպով «պատերազմներ» եւ «կռիւներ» կային։
17 Յակոբոսի մահուընէ դարեր ետք, կեղծ Քրիստոնեաներ պատերազմներ մղեցին եւ բառացիօրէն իրար սպաննեցին։ Սակայն, Յակոբոս կը գրէր առաջին դարու «Աստուծոյ Իսրայէլ»ի անդամներուն, ապագացու երկնային ‘թագաւորներու ու քահանաներու’։ (Յայտնութիւն 20։6) Անոնք բառացիօրէն իրար չմեռցուցին ու չսպաննեցին։ Ուստի, Յակոբոս ինչո՞ւ խօսեցաւ Քրիստոնեաներու մէջ կատարուած այսպիսի բաներու մասին։ Իր եղբայրը ատողը, Յովհաննէս առաքեալ մարդասպան կոչեց։ Իսկ Պօղոս ժողովքներու մէջ անձնաւորութեան բախումները եւ երկարատեւ գժտութիւնը կոչեց «կռիւներ» ու «վէճեր»։ (Տիտոս 3։9. Բ. Տիմոթէոս 2։14. Ա. Յովհաննու 3։15-17) Այս նոյն ուղղութեամբ, բացայայտօրէն Յակոբոս ի մտի ունէր Քրիստոնեայ հաւատակիցները չսիրել։ Քրիստոնեաները իրարու հետ կը վարուէին աշխարհայիններուն վարուած կերպով։
18. Ի՞նչ բան Քրիստոնեաներու միջեւ անսիրալիր արարքներու ու տրամադրութիւններու կրնայ առաջնորդել։
18 Ինչո՞ւ այսպիսի բաներ կը պատահէին քրիստոնէական ժողովքներուն մէջ։ Սխալ վերաբերմունքի պատճառով, ինչպէս՝ անյագութիւն եւ «ցանկութիւններ»։ Հպարտութիւնը, նախանձը եւ փառասիրութիւնն ալ կրնան ժողովքի մը մէջ քրիստոնէական սիրալիր ընկերակցութիւնը քայքայել։ (Յակոբու 3։6, 14) Այսպիսի վերաբերմունք անհատ մը աշխարհի բարեկամ կը դարձնէ, հետեւաբար՝ Աստուծոյ թշնամի։ Այսպիսի վերաբերմունք ունեցող ոե՛ւէ անհատ չի կրնար ակնկալել Աստուծոյ կազմակերպութեան մէկ մասը մնալ։
19. (ա) Երբ Քրիստոնեայ մը տեսնէ որ իր սրտին մէջ սխալ մտածելակերպ արմատ կապած է, գլխաւորաբար ո՞վ է մեղադրելին։ (բ) Քրիստոնեայ մը ի՞նչպէս կրնայ սխալ մտածելակերպը յաղթահարել։
19 Որո՞ւ պէտք է այպանել, երբ սխալ մտածելակերպ մեր սրտին մէջ խոր արմատ կապէ։ Սատանա՞ն։ Որոշ չափով՝ այո։ Ան այսպիսի վերաբերմունքներու վարժ եղող այս աշխարհի «օդին իշխանութեանը իշխան»ն է։ (Եփեսացիս 2։1, 2. Տիտոս 2։12) Սակայն, սովորաբար, սխալ մտածելակերպի արմատները մեր անկատար մարմիններուն մէջ կը գտնուին։ Աշխարհի հետ բարեկամութեան դէմ ազդարարելէ ետք, Յակոբոս գրեց. «Կը կարծէք որ գիրքը պարա՞պ տեղ կ’ըսէ թէ Նախանձի կը փափաքի մեր մէջ բնակող հոգին»։ (Յակոբու 4։5) Բոլորս ալ սխալը ընելու բնածին հակում մը ունինք։ (Ծննդոց 8։21. Հռովմայեցիս 7։18-20) Սակայն կրնանք այդ հակումին դէմ պայքարիլ, եթէ ընդունինք մեր տկարութիւնները եւ զանոնք յաղթահարելու համար Եհովայի օգնութեան վստահինք։ Յակոբոս կ’ըսէ թէ ‘Աստուծոյ տուած շնորհքը աւելի մեծ է’ քան նախանձի մեր բնածին հակումը։ (Յակոբու 4։6) Աստուծոյ սուրբ հոգիին ու հաւատարիմ Քրիստոնեայ եղբայրներուն օգնութեամբ եւ Յիսուսի փրկանքի զոհին շնորհիւ, հաւատարիմ Քրիստոնեաները իրենց մարմնին տկարութիւնները կը նուաճեն։ (Հռովմայեցիս 7։24, 25) Անոնք Աստուծոյ կազմակերպութեան մէջ ապահով են եւ, ո՛չ թէ աշխարհի, այլ Աստուծոյ բարեկամներն են։
20. Աստուծոյ կազմակերպութեան մաս կազմողները ի՞նչ ճոխ օրհնութիւններ կը վայելեն։
20 Աստուածաշունչը կը խոստանայ. «Տէրը իր ժողովուրդին զօրութիւն պիտի տայ, Տէրը իր ժողովուրդը խաղաղութիւնով պիտի օրհնէ»։ (Սաղմոս 29։11) Եթէ մենք իրապէս Եհովայի արդի «ազգ»ին՝ իր տեսանելի կազմակերպութեան՝ մէջ ենք, անոր տուած զօրութեան մասնակից պիտի ըլլանք եւ պիտի վայելենք այն խաղաղութիւնը, որով օրհնած է իր ժողովուրդը։ Սատանայի աշխարհը՝ Եհովայի տեսանելի կազմակերպութենէն աւելի մեծ է եւ Սատանան մեզմէ աւելի զօրաւոր է։ Բայց Եհովա Ամենակալ է։ Իր գործօն ոյժը անպարտելի է։ Իր հզօր հրեշտակները Աստուծոյ ծառայելու մէջ մեզի կը միանան։ Ուստի, հակառակ մեր դիմագրաւած ատելութեան, կրնանք անխախտ մնալ։ Յիսուսի նման մենք ալ կրնանք յաղթել աշխարհին։—Յովհաննու 16։33. Ա. Յովհաննու 4։4
Կրնա՞ք Բացատրել
◻ Ի՞նչ է Աստուծոյ տեսանելի կազմակերպութիւնը։
◻ Ի՞նչ կերպերով Աստուծոյ կազմակերպութիւնը պաշտպանութիւն կը հայթայթէ։
◻ Ո՞վ մաս կը կազմէ Աստուծոյ կազմակերպութեան։
◻ Ի՞նչպէս կրնանք աշխարհի հետ բարեկամներ ըլլալէ խուսափիլ։
[Շրջանակ՝ էջ 9]
Աստուծոյ կազմակերպութիւնը ի՞նչ է
Եհովայի Վկաներու գրականութիւններուն մէջ, «Աստուծոյ կազմակերպութիւնը» արտայայտութիւնը երեք կերպերով գործածուած է։
1 Եհովայի երկնային, անտեսանելի կազմակերպութիւնը՝ հաւատարիմ հոգեղէն արարածներէ բաղկացած։ Աստուածաշունչին մէջ անիկա կոչուած է «վերի Երուսաղէմը»։—Գաղատացիս 4։26
2 Եհովայի մարդկային, տեսանելի կազմակերպութիւնը։ Ներկայիս, անիկա բաղկացած է օծեալ մնացորդէն եւ անոր միացած մեծ բազմութենէն։
3 Եհովայի տիեզերական կազմակերպութիւնը։ Ներկայիս անիկա կը բաղկանայ Եհովայի երկնային կազմակերպութենէն, ինչպէս նաեւ երկրի վրայ իր օծեալ, որդեգրած որդիներէն, որոնք երկնային յոյս ունին։ Ժամանակի ընթացքին անոր մաս պիտի կազմէ նաեւ երկրի վրայ կատարելութեան հասած մարդկութիւնը։
[Նկար՝ էջ 20]
Հոգեւոր լաւագոյն սնունդը հայթայթուած է Եհովայի կազմակերպութեան միջոցաւ