‘Արդեօք քու սիրտդ իմ սրտիս հետ ուղի՞ղ է’
«Ինծի հետ եկո՛ւր ու Տէրոջը համար ունեցած նախանձաւորութիւնս [«որեւէ մրցակցութիւն չհանդուրժելս», ՆԱ] տես»։—Դ. ԹԱԳԱՒՈՐԱՑ 10։16
1, 2. (ա) Իսրայէլի կրօնական վիճակը ի՞նչպէս հետզհետէ վատթարացաւ։ (բ) Հ.Դ.Ա. 905–ին, շշմեցուցիչ ի՞նչ փոփոխութիւններ կը սպասէին Իսրայէլի։
Իսրայէլի մէջ, Հ.Դ.Ա. 905 տարին մեծ փոփոխութիւններու ժամանակ մըն էր։ Գրեթէ 100 տարիներ առաջ, Սողոմոնի հաւատուրացութեան պատճառաւ, Եհովա Իսրայէլի միացած թագաւորութիւնը բաժնած էր։ (Գ. Թագաւորաց 11։9-13) Յուդայի հարաւային թագաւորութեան վրայ Սողոմոնի որդին Ռոբովամ կ’իշխէր, մինչ Իսրայէլի հիւսիսային թագաւորութեան վրայ՝ Եփրեմեան Յերոբովամը։ Դժբախտաբար, հիւսիսային թագաւորութիւնը աղիտալի սկիզբ մը ունեցաւ։ Յերոբովամ չուզեց որ իր հպատակները մինչեւ հարաւային թագաւորութիւն երթային, տաճարին մէջ պաշտամունք մատուցանելու համար, վախնալով որ անոնք Դաւիթի տան վերադառնալու գաղափարը կրնային յղանալ։ Ուստի, ան Իսրայէլի մէջ հորթի պաշտամունքը հաստատեց. կռապաշտութեան ձեւ մը, որ որոշ տարողութեամբ շարունակուեցաւ հիւսիսային թագաւորութեան ամբողջ տեւողութեան։—Գ. Թագաւորաց 12։26-33
2 Երբ Ամրիին որդին Աքաաբ թագաւոր եղաւ, կացութիւնը աւելի վատթարացաւ։ Անոր օտարազգի կինը՝ Յեզաբէլ, Բահաղի պաշտամունքը քաջալերեց ու Եհովայի մարգարէները սպաննեց։ Հակառակ Եղիա մարգարէին խիզախ ազդարարութիւններուն, Աքաաբ Յեզաբէլի արգելք չհանդիսացաւ։ Սակայն, Հ.Դ.Ա. 905–ին, Աքաաբ արդէն մեռած էր ու իր որդին Յովրամ կ’իշխէր։ Ժամանակն էր որ երկիրը մաքրուէր։ Եղիայի յաջորդը՝ Եղիսէ, զինուորական հրամանատարին՝ Յէուի՝ տեղեկացուց թէ Եհովա զինք կ’օծէր Իսրայէլի յաջորդ թագաւորը ըլլալու։ Ի՞նչ պիտի ըլլար իր յանձնարարութիւնը։ Աքաաբի մեղաւոր ընտանիքը բնաջնջել ու Յեզաբէլի ձեռքով թափուած մարգարէներուն արեան վրէժը առնել։—Դ. Թագաւորաց 9։1-10
3, 4. Յովնադաբ ի՞նչպէս ցոյց տուաւ որ իր սիրտը ‘Յէուի սրտին հետ ուղիղ’ էր։
3 Յէու, Աստուծոյ պատուէրին հնազանդելով, նախ չար Յեզաբէլը սպաննեց ու անկէ ետք սկսաւ Իսրայէլը մաքրել՝ Աքաաբի տունը բնաջնջելով։ (Դ. Թագաւորաց 9։15–10։14, 17) Ապա, ան հանդիպեցաւ իրեն զօրավիգ եղող անհատի մը։ «[«Իրեն ընդառաջ եկող», Էջմիածին] Ռեքաբին որդին Յովնադաբը գտաւ»։ Անոր բարեւ տուաւ ու ըսաւ. ‘Ինչպէս իմ սիրտս քու սրտիդ հետ ուղիղ է, արդեօք քու սիրտդ ալ այնպէս ուղի՞ղ է’։ Յովնադաբ ըսաւ. ‘Այո՛’։ ‘Ուրեմն ձեռքդ տուր’։ Անիկա ձեռքը տուաւ։ Զանիկա կառքին մէջ իր քով առաւ եւ ըսաւ. ‘Ինծի հետ եկո՛ւր ու Տէրոջը համար ունեցած նախանձաւորութիւնս [«որեւէ մրցակցութիւն չհանդուրժելս», ՆԱ] տես’։ Այսպէս անոր կառքը հեծցուցին զանիկա»։—Դ. Թագաւորաց 10։15, 16
4 Յովնադաբ Իսրայելացի մը չէր։ Բայց եւ այնպէս, իր անուան համաձայն (որ կը նշանակէ «Եհովա Կամեցող Է», «Եհովա Վեհանձն Է», կամ՝ «Եհովա Առատաձեռն Է»), ան Եհովան պաշտող մըն էր։ (Երեմեայ 35։6) Վստահաբար, ան արտասովոր հետաքրքրութիւն մը ունէր տեսնելու, թէ Յէու ի՛նչպէս ‘Տէրոջը համար որեւէ մրցակցութիւն պիտի չհանդուրժէր’։ Ի՞նչպէս գիտենք։ Քանի որ Իսրայէլի օծեալ թագաւորին հետ իր հանդիպումը պարզ դիպուած մը չէր։ Յովնադաբ «իրեն ընդառաջ» կ’երթար այնպիսի ատեն մը, որ Յէու արդէն իսկ սպաննած էր Յեզաբէլը, ինչպէս նաեւ՝ Աքաաբի տունէն ուրիշներ։ Յովնադաբ գիտէր եղելութիւնը, երբ կառքը ելլելու Յէուի հրաւէրը ընդունեց։ Ճշմարիտ եւ սուտ պաշտամունքի միջեւ մղուած այս պայքարին մէջ, ան անվրէպ Յէուի ու Եհովայի կողմն էր։
Արդի Յէուն եւ Արդի Յովնադաբը
5. (ա) Ամբողջ մարդկութեան համար ի՞նչ փոփոխութիւններ տեղի պիտի ունենան շուտով։ (բ) Ո՞վ է Մեծագոյն Յէուն, եւ երկրի վրայ ո՞վ կը ներկայացնէ զինք։
5 Ներկայիս, շուտով վիճակները արմատական կերպով պիտի փոխուին բոլոր մարդկութեան համար, ճիշդ ինչպէս որ Իսրայէլի պատահեցաւ Հ.Դ.Ա. 905–ին։ Ժամանակը մօտ է, երբ Եհովա երկիրը պիտի մաքրէ Սատանայի ազդեցութեան գէշ հետեւանքներէն, սուտ կրօնքն ալ ներառեալ։ Ո՞վ է արդի Յէուն։ Ան Յիսուս Քրիստոսն է, որու ուղղուած են մարգարէական հետեւեալ խօսքերը. «Ո՛վ Հզօր, թուրդ մէջքդ կապէ քու փառքովդ ու վայելչութիւնովդ։ Ու քու վայելչութիւնովդ յառաջացիր։ Ճշմարտութեան ու հեզութեան եւ արդարութեան համար հեծիր»։ (Սաղմոս 45։3, 4) Երկրի վրայ Յիսուս ներկայացուած է «Աստուծոյ Իսրայէլ»ով՝ օծեալ Քրիստոնեաներով՝ ‘որոնք Աստուծոյ պատուիրանքները կը պահեն ու Յիսուսին վկայութիւնը [«մասին վկայելու գործը», ՆԱ] ունին’։ (Գաղատացիս 6։16. Յայտնութիւն 12։17) 1922–էն ի վեր, Յիսուսի այս օծեալ եղբայրները խիզախօրէն ազդարարած են Եհովայի դատաստանական մօտալուտ արարքներուն մասին։—Եսայեայ 61։1, 2. Յայտնութիւն 8։7–9։21. 16։2-21
6. Ազգերէն որո՞նք օծեալ Քրիստոնեաներու օգնութեան փութացած են եւ անոնք ի՞նչպէս Մեծագոյն Յէուի այլաբանական կառքը հեծած են։
6 Օծեալ Քրիստոնեաները առանձին չեն եղած։ Ինչպէս որ Յովնադաբ Յէուն դիմաւորելու գնաց, ազգերէն շատեր եկած են ճշմարիտ պաշտամունքին մէջ թիկունք կանգնելու Յիսուսի՝ Մեծագոյն Յէուի՝ եւ իր երկրային ներկայացուցիչներուն։ (Զաքարեայ 8։23) Յիսուսի կողմէ «ուրիշ ոչխարներ» կոչուած այս խումբը, 1932–ին ճանչցուեցաւ որպէս վաղեմի Յովնադաբի արդի համազօրը ու հրաւէր տրուեցաւ որ արդի Յէուի ‘կառքը’ հեծնէ։ (Յովհաննու 10։16) Ի՞նչպէս։ ‘Աստուծոյ պատուիրանքները պահելով’ եւ օծեալներուն հետ «Յիսուսին մասին վկայելու գործ»ին մասնակցելով։ Արդի ժամանակներուն, ասիկա կը պարփակէ Յիսուսը որպէս Թագաւոր ունեցող Աստուծոյ հաստատուած Թագաւորութեան մասին բարի լուրը քարոզել։ (Մարկոս 13։10) 1935–ին այս «Յովնադաբները» բնորոշուեցան որպէս Յայտնութիւն 7։9-17–ի «մեծ բազմութիւն»ը։
7. Ներկայիս, Քրիստոնեաները ի՞նչպէս ցոյց տուած են որ իրենց ‘սիրտը տակաւին ուղիղ է’ Յիսուսի սրտին հետ։
7 1930–ական թուականներէն ի վեր, մեծ բազմութիւնը եւ անոնց օծեալ եղբայրները խիզախօրէն ապացուցանած են որ ճշմարիտ պաշտամունքին սատար կը կանգնին։ Արեւելեան ու Արեւմտեան Եւրոպայի, Ծայրագոյն Արեւելքի եւ Ափրիկէի կարգ մը երկիրներուն մէջ, անոնցմէ շատեր իրենց հաւատքին համար մեռած են։ (Ղուկաս 9։23, 24) Ուրիշ երկիրներու մէջ, անոնք բանտարկուած, խուժանային յարձակումներու ենթարկուած, կամ ուրիշ կերպերով հալածուած են։ (Բ. Տիմոթէոս 3։12) Անոնք հաւատքի ի՜նչ հոյակապ արձանագրութիւն մը շինած են։ Իսկ 1997–ի Ծառայութեան Տարուան Տեղեկագրութիւնը ցոյց կու տայ որ անոնք տակաւին վճռած են Աստուծոյ ծառայել ի՛նչ որ ալ պատահի։ Անոնց ‘սիրտը տակաւին ուղիղ է’ Յիսուսի սրտին հետ։ Ասիկա յստակօրէն ցոյց տրուեցաւ 1997–ի ընթացքին, երբ 5,599,931 Թագաւորութեան հրատարակիչներ, որոնց մեծամասնութիւնը «Յովնադաբներ» են, Յիսուսի մասին վկայելու գործին համար ընդամէնը 1,179,735,841 ժամ տրամադրեցին։
Տակաւին Նախանձախնդրութեամբ կը Քարոզեն
8. Եհովայի Վկաները ճշմարիտ պաշտամունքի հանդէպ իրենց նախանձախնդրութիւնը ի՞նչպէս ցոյց կու տան։
8 Յէու իր կառքը կատաղաբար քշելու համբաւը կը վայելէր, ինչ որ կ’ապացուցանէր որ ան իր պաշտօնը կատարելու մէջ նախանձախնդիր էր։ (Դ. Թագաւորաց 9։20) Մեծագոյն Յէուի՝ Յիսուսի, մասին ըսուած է որ նախանձախնդրութիւնը ‘զինք կ’ուտէր’։ (Սաղմոս 69։9) Զարմանալի չէ որ ներկայիս ճշմարիտ Քրիստոնեաները իրենց նախանձախնդրութեամբ ճանչցուած են։ Ըլլա՛յ ժողովքին մէջ կամ հանրապէս, անոնք «խօսքը կը քարոզեն, . . . ստիպողականօրէն՝ նպաստաւոր թէ աննպաստ եղանակին»։ (Բ. Տիմոթէոս 4։2, ՆԱ) Անոնց նախանձախնդրութիւնը յատկապէս բացայայտ էր 1997–ի սկիզբի շրջանին, երբ Մեր Թագաւորութեան Ծառայութիւնը թերթիկին մէջ յօդուած մը քաջալերեց որ կարելի եղածին չափ շատ անհատներ օժանդակ ռահվիրաներ ըլլան։ Իւրաքանչիւր երկրի մէջ օժանդակ ռահվիրաներու նշանակէտ մը դրուեցաւ։ Արդիւնքը ի՞նչ եղաւ։ Շա՛տ յատկանշական։ Բազմաթիւ մասնաճիւղեր որոշուած թիւը անցան։ Էքուատոր 4,000–ի նշանակէտ մը դրաւ, բայց Մարտին՝ 6,936 օժանդակ ռահվիրաներ տեղեկագրեց։ Ճափոնի մէջ, այդ երեք ամսուան ընթացքին ընդամէնը 104,215 օժանդակ ռահվիրաներ տեղեկագրեցին։ Զամպիոյ մէջ, ուր նշանակէտը 6,000 էր, Մարտին 6,414, Ապրիլին՝ 6,532, իսկ Մայիսին՝ 7,695 օժանդակ ռահվիրաներ տեղեկագրեցին։ Համայն աշխարհի մէջ, օժանդակ եւ կանոնաւոր ռահվիրաներուն բարձրագոյն թիւն էր 1,110,251, այսինքն, 34.2% յաւելում 1996–ին վրայ։
9. Տունէ–տուն ծառայութեան կողքին, Եհովայի Վկաները բարի լուրը մարդոց հասցնելու համար ուրիշ ի՞նչ կերպեր կը գործածեն։
9 Պօղոս առաքեալ Եփեսոսի երէցներուն ըսաւ. «Վախնալով բնաւ ետ չկեցայ օգտակար բաներ ձեզի ըսելէ ու ձեզի՝ հրապարակաւ եւ տան մէջ՝ [«տունէ տուն», ՆԱ] սորվեցնելէ»։ (Գործք 20։20) Ներկայիս Եհովայի Վկաները Պօղոսի օրինակին կը հետեւին եւ բարի լուրը նախանձախնդրաբար կը քարոզեն տունէ տուն։ Սակայն, մարդիկը տունը գտնելը դիւրին չէ։ Հետեւաբար, «հաւատարիմ ու իմաստուն ծառան» Թագաւորութեան հրատարակիչները կը քաջալերէ մարդոց մօտենալ իրենց աշխատավայրերուն մէջ, փողոցները, ծովեզերքները, հանրային պարտէզները. ո՛ւր որ կարելի է մարդիկ գտնել։ (Մատթէոս 24։45-47) Արդիւնքները հոյակապ եղած են։
10, 11. Երկու երկիրներու մէջ, հրատարակիչները ի՞նչպէս նախաքայլը առած են հետաքրքրուած անհատներ գտնելու, որոնք սովորաբար տունը չեն ըլլար։
10 Տանըմարքայի մայրաքաղաքին՝ Գոբէնհակընի մէջ, փոքր թիւով հրատարակիչներ շոգեկառքի կայարաններուն քով եղող փողոցներուն մէջ կը վկայէին։ Յունուարէն մինչեւ Յունիս, անոնք 4,733 պարբերաթերթեր տեղաւորեցին, հոյակապ խօսակցութիւններ ունեցան ու բազմաթիւ վերայցելութիւններ ըրին։ Այդ երկրին մէջ, հրատարակիչներէն շատեր առեւտրական թաղամասերու մէջ կանոնաւորաբար պարբերաթերթեր կը տեղաւորեն։ Գիւղաքաղաքի մը մէջ, ամէն Ուրբաթ մեծ շուկայ մը կ’ըլլայ, ուր հազարաւոր այցելուներ կու գան։ Ուստի, տեղական ժողովքը շուկային մէջ կանոնաւորաբար վկայելու կարգադրութիւններ ըրած է։ Շրջանի մը մէջ դպրոցներուն այցելութիւն կը տրուի եւ մասնաւորաբար ուսուցիչներուն յարմար գրականութիւններ կը տրուին։
11 Հաուայի մէջ ալ ջանքեր կը թափուին տունը չգտնուող անհատներուն հասնելու համար։ Կան մասնայատուկ թաղամասեր, ինչպէս՝ հանրային վայրեր (փողոցներ, պարտէզներ, կառատուներ եւ հանրակառքի կայաններ), առեւտրական շրջաններ, գնումի կեդրոններ եւ օդակայաններ, հեռաձայնային վկայութիւն, հանրային փոխադրամիջոցներ (հանրակառքին մէջ քարոզել) եւ գիշերօթիկներ։ Հոգ կը տարուի որ իւրաքանչիւր թաղամասին մէջ հարկ եղած թիւով Վկաներ նշանակուին եւ նշանակուած անհատները պատշաճ կերպով մարզուին։ Ասոր նման լաւ կազմակերպուած ջանքեր կը տարուին շատ մը երկիրներու մէջ։ Այս ջանքերուն հետեւանքով, հետաքրքրուած անհատներու կը հանդիպինք, որոնց հաւանաբար բնաւ տունէ–տուն ծառայութեան ընթացքին պիտի չգտնէինք։
Հաստատ Մնալ
12, 13. (ա) 1997–ի ընթացքին Սատանան Եհովայի Վկաներուն դէմ ի՞նչ ռազմավարութիւն գործածեց։ (բ) Երկրի մը մէջ սուտ պրոպականդը դրական ի՞նչ արդիւնք տուաւ։
12 1997–ին, կարգ մը երկիրներու մէջ, Եհովայի Վկաները չարամիտ եւ սուտ պրոպականդի զոհ գացին, որու երեւութական նպատակն էր անոնց դէմ օրինական քայլեր առնել։ Սակայն անոնք անխա՛խտ մնացին։ (Սաղմոս 112։7, 8) Անոնք յիշեցին սաղմոսերգուին աղօթքը. «Ամբարտաւանները ստութիւն հնարեցին ինծի դէմ, բայց ես բոլոր սրտովս քու հրամաններդ պիտի պահեմ»։ (Սաղմոս 119։69) Այսպիսի սուտ ծանուցում պարզապէս կ’ապացուցանէ թէ ճշմարիտ Քրիստոնեաները Յիսուսի մարգարէութեան համաձայն ատելի պիտի ըլլային։ (Մատթէոս 24։9) Իսկ երբեմն ալ ասիկա դրական արդիւնքներ տուած է։ Պելճիքայի մէջ, մարդ մը հանրածանօթ օրաթերթի մը մէջ Եհովայի Վկաներու հասցէին վարկաբեկիչ յօդուած մը կարդաց։ Անոր բովանդակած զրպարտիչ խօսքերէն ցնցուած՝ յաջորդ Կիրակի Թագաւորութեան Սրահի մը մէջ ժողովի մը ներկայ եղաւ։ Ան Վկաներուն հետ Աստուածաշունչը ուզեց ուսումնասիրել ու արագ յառաջդիմութիւն արձանագրեց։ Նախապէս, այս մարդը ոճրագործական խումբի մը մէկ անդամն էր։ Աստուածաշունչի ուսումնասիրութիւնը իր կեանքը մաքրելու նպաստեց եւ ասիկա շուրջի մարդոց ուշադրութիւնը գրաւեց։ Զրպարտութիւն տեղացնող այդ յօդուածին հեղինակը վստահաբար այսպիսի արդիւնքի մը մասին չէր մտածած։
13 Պելճիքայի մէջ, պարկեշտ սիրտ ունեցող անհատներէն ոմանք խիզախօրէն այդ նենգամիտ պրոպականդին դէմ արտայայտուեցան։ Անոնց կարգին էր նախկին վարչապետ մը, որ ընդունեց թէ հիացմունքով լեցուած էր Եհովայի Վկաներու իրագործած բաներուն հանդէպ։ Իսկ երեսփոխան մը գրեց. «Հակառակ զանազան առիթներով տարածուած նսեմացուցիչ խօսքերուն, ինծի կը թուի որ [Եհովայի Վկաները] ո՛չ մէկ կերպով վտանգ մը կը ներկայացնեն Պետութեան։ Անոնք խաղաղասէր, խղճամիտ ու հեղինակութիւններուն հանդէպ յարգալից կեցուածք ունեցող քաղաքացիներ են»։ Արդարեւ, Պետրոս առաքեալի խօսքերուն մէջ իմաստութիւն կայ. «Ձեր վարքը հեթանոսներուն մէջ բարի պահե[ցէք], որպէս զի եթէ ձեզ չարագործներու պէս բամբասեն, ձեր բարի գործերը տեսնելով՝ փառաւորեն Աստուած՝ այցելութեան օրը»։—Ա. Պետրոս 2։12
Աչքառու Յիշատակատօն մը
14. Կարգ մը ի՞նչ հոյակապ տեղեկագրութիւններ կան 1997–ի Յիշատակատօնի ներկաներուն թիւին վերաբերեալ։
14 Շատ տեղին է, որ Յիսուսի մասին վկայութիւն տուողները իր մահուան Յիշատակատօնը տարուան կարեւորագոյն առիթը նկատեն։ 23 Մարտ 1997–ին, 14,322,226 հոգի ներկայ եղան այս առիթը յիշատակելու համար. 1996–ին ներկայ եղողներէն աւելի քան 1,400,000 հոգի։ (Ղուկաս 22։14-20) Շատ մը երկիրներու մէջ, Յիշատակատօնի ներկաներուն թիւը Թագաւորութեան հրատարակիչներու թիւէն շա՜տ աւելի էր, ինչ որ աճումի մեծ հաւանականութիւն մը կը նշէ։ Օրինակ, Հայիթիի մէջ, 1997–ին հրատարակիչներուն բարձրագոյն թիւն էր 10,621, մինչդեռ Յիշատակատօնին ներկայ գտնուողներուն թիւը 67,259 էր։ Կրնաք 26-29–րդ էջերու վրայի տարեկան տեղեկագրութիւնը աչքէ անցընել ու տեսնել թէ ուրիշ քանի երկիրներ հրատարակիչներու թիւին հետ բաղդատած՝ ներկաներու բարձր թիւեր ունեցան։
15. Կարգ մը երկիրներու մէջ, Յիշատակատօնը կատարելու համար մեր եղբայրները ի՞նչպէս լուրջ խնդիրներ յաղթահարեցին։
15 Ոմանց համար, Յիշատակատօնին ներկայ գտնուիլը դիւրին չէր։ Ալպանիոյ մէջ, քաղաքացիական խռովութեան պատճառաւ, իրիկուան ժամը 7–էն ետք շրջագայիլը արգիլուած էր։ Ամբողջ երկրի տարածքին, 115 խմբակներ Յիշատակատօնը սկսան յետմիջօրէի ժամը 5։45–ին։ Արեւը ժամը 6։08–ին մար կը մտնէր, Նիսան 14–ի սկիզբը նշելով։ Ժամը մօտաւորապէս 6։15–ին, խորհրդանիշերը հրամցուեցան։ Մեծամասնութեանց պարագային, փակման աղօթքը կատարուեցաւ ժամը 6։30–ին, իսկ ներկաները արտորնօք իրենց տուները վերադարձան շրջագայութեան արգելքը ի զօրու չեղած։ Ասով հանդերձ, Յիշատակատօնի ներկաներուն թիւն էր 3,154, բաղդատած հրատարակիչներու 1,090 բարձրագոյն թիւին։ Ափրիկեան երկրի մը մէջ, քաղաքացիական խլրտումներու պատճառաւ Թագաւորութեան Սրահի ճամբան փակ էր, ուստի երկու երէցներ որոշեցին երրորդ երէցի մը տան մէջ հանդիպում մը ունենալ, որպէսզի Յիշատակատօնը պզտիկ խումբերով ընելու կարգադրութիւններ ընեն։ Այդ եղբօր տունը հասնելու համար, երկու երէցները փորուած կոյուղիի մը մէջէն պէտք էր անցնէին։ Սակայն, շրջանին մէջ կռիւ կար ու մարդորսները կրակ կը բանային ոեւէ անհատի վրայ որ կը փորձէր կոյուղիէն անցնիլ։ Երէցներէն մէկը վազելով անցաւ։ Բայց երկրորդը փամփուշտի ձայն մը լսելուն պէս գետին նետուեցաւ ու սողալով ապահով տեղ մը գտաւ, մինչ փամփուշտները գլխուն վրայէն կը վզզային։ Երէցներու ժողովը յաջողութեամբ տեղի ունեցաւ ու ժողովքին կարիքներուն հոգ տարուեցաւ։
‘Բոլոր Ազգերէն ու Ցեղերէն ու Լեզուներէն’
16. Հաւատարիմ ու իմաստուն ծառան ի՞նչ կարգադրութիւններ ըրած է, որպէսզի բարի լուրը տարածուի լեզուական պզտիկ խումբերու մէջ։
16 Յովհաննէս առաքեալ ըսաւ որ մեծ բազմութիւնը «բոլոր ազգերէն ու ցեղերէն եւ ժողովուրդներէն ու լեզուներէն» պիտի գար։ (Յայտնութիւն 7։9) Հետեւաբար, Կառավարիչ Մարմինը կարգադրութիւններ կ’ընէ որ գրականութիւնները հետզհետէ աւելի շատ լեզուներով մատչելի ըլլան, մէջը ըլլալով՝ մեկուսացած ցեղախումբերու եւ քիչ թիւով մարդոց կողմէ խօսուած լեզուներով։ Օրինակի համար, Մոզամպիկի մէջ, Խաղաղ Կեանք՝ Նոր Աշխարհի մը մէջ թերթիկը հինգ նոր լեզուներով լոյս տեսաւ։ Նիքարակուայի մէջ, Երկրի Վրայ Կեանքը Յաւիտեան Վայելեցէ՛ք գրքոյկը մատչելի եղաւ Միսքիդոյերէնով՝ Դիտարանի Ընկերութեան առաջին գրականութիւնը այդ լեզուով։ Միսքիդօ Հնդիկներէն շատեր իրենց լեզուով գրքոյկ մը տեսնելով զայն ուրախութեամբ ընդունեցին։ 1997–ին Ընկերութիւնը հաւանութիւն տուաւ որ 25 նոր լեզուներով գրականութիւն հրատարակուի եւ տպեց աւելի քան մէկ միլիառ պարբերաթերթեր։
17. Քորէայի մէջ ո՞ր լեզուական խումբին օգնութիւն տրուեցաւ, իսկ պատկերիզները ի՞նչ հոյակապ կերպով օժանդակած են բնակչութեան այս հատուածին։
17 Քորէայի մէջ լեզուական ուրիշ խումբի մըն ալ օգնութիւն տրուեցաւ։ 1997 տարեշրջանին, առաջին անգամ ըլլալով Քորէական համրերու լեզուով նահանգային համաժողով տեղի ունեցաւ։ Քորէայի մէջ համրերու լեզուով 15 ժողովքներ կան, ընդամէնը 543 հրատարակիչներով, բայց համաժողովի ներկաներուն թիւը 1,174 էր, եւ 21 հոգի մկրտուեցաւ։ Խօսուած կամ գրուած լեզուն դիւրին չհասկցող խուլերուն օգնելու համար, համրերու 13 տարբեր լեզուներով գրականութիւններ լոյս կը տեսնեն պատկերիզի վրայ։ Այս կերպով, խուլերուն օգնութիւն կը մատուցուի որ «կարդան» եւ նոյնիսկ ուսումնասիրեն բարի լուրը՝ հոյակապ արդիւնքներ ձեռք ձգելով։ Միացեալ Նահանգներու մէջ, նախապէս հինգ տարի կ’ուզէր որ խուլ անհատ մը մկրտուելու ի վիճակի ըլլար։ Հիմա, Ամերիկեան Համրերու Լեզուով քանի մը պատկերիզներ մատչելի ըլլալէն ետք, կարգ մը խուլեր մօտ մէկ տարիէն այդ քայլը առած են։
‘Կառքին Մէջ Մնանք’
18. Յովնադաբին հանդիպելէ ետք, Յէու ի՞նչ ընելու համար գործի լծուեցաւ։
18 Հ.Դ.Ա. 905–ին, Յովնադաբ իրեն միանալէն ետք, Յէու սուտ պաշտամունքը կործանելու գործին լծուեցաւ։ Ան Բահաղի բոլոր երկրպագուներուն հրաւէր մը տուաւ, ըսելով. «Բահաղին համար տօնախմբութիւն մը սահմանեցէք»։ Ապա բոլոր երկրին մէջ պատգամաւորներ ղրկեց, վստահ ըլլալու համար որ Բահաղի ծառաներէն ոեւէ մէկը բացակայ չէր։ Ամբոխը այդ սուտ չաստուծոյն մեծ տաճարը խուժելէ յետոյ, Յէու վստահ եղաւ որ Եհովայի ծառաներէն մէկը չէր գտնուեր հոն։ Անկէ ետք, Յէու եւ իր բանակը Բահաղի երկրպագուները ջարդեցին։ «Այսպէս Յէու Իսրայէլէն բնաջինջ ըրաւ Բահաղը»։—Դ. Թագաւորաց 10։20-28
19. Մարդկութեան դիմաց վերապահուած բաներու ի տես, ի՞նչպիսի հոգի մը պէտք է ցուցաբերենք, եւ ո՞ր գործով ժրաջանօրէն զբաղած պէտք է ըլլանք։
19 Ներկայիս, բոլոր սուտ կրօնքներու վերջնական դատաստանը շատ մօտ է։ Հրեշտակային առաջնորդութեան ներքեւ, Քրիստոնեաները բարի լուրը կը քարոզեն ամբողջ մարդկութեան, քաջալերելով անոնց որ Աստուծմէ վախնան ու սուտ կրօնքէն անջատուին։ (Յայտնութիւն 14։6-8. 18։2, 4) Հեզերուն քաջալերութիւն կը տրուի որ Եհովայի գահակալուած Թագաւորին՝ Յիսուս Քրիստոսի՝ իշխանութեան ներքեւ եղող Աստուծոյ Թագաւորութեան հպատակին։ (Յայտնութիւն 12։10) Այս սրտայոյզ ժամանակներուն, թոյլ պէտք չէ տանք որ մեր նախանձախնդրութիւնը նուազի, մինչ ճշմարիտ պաշտամունքի կողքին մեր դիրքը որոշած ենք։
20. 1998–ի ծառայութեան տարուան ընթացքին, ի՞նչ ընել վճռած էք։
20 Առիթով մը, երբ Դաւիթ Թագաւոր շատ ընկճուած էր՝ աղօթեց. «Սիրտս պատրաստ [«հաստատ», ՆԱ] է, ո՛վ Աստուած, սիրտս պատրաստ է. պիտի երգեմ ու սաղմոս պիտի ըսեմ։ Ո՛վ Տէր, ժողովուրդներուն մէջ քեզ պիտի գովեմ»։ (Սաղմոս 57։7, 9) Թող որ մենք ալ հաստատ ըլլանք։ 1997–ի ծառայութեան տարուան ընթացքին, հակառակ բազմաթիւ դժուարութիւններու, Եհովա Աստուծոյ փառքին համար գովաբանութեան բարձր աղաղակ մը թնդաց։ Թող որ նոյնանման, նոյնիսկ աւելի բարձր աղաղակ մը լսուի ծառայութեան այս տարուան ընթացքին։ Շարունակենք ասիկա ընել ի հեճուկս մեզ յուսահատեցնելու կամ մեզի հակառակելու Սատանային փորձերուն։ Այսպէս, ցոյց տուած կ’ըլլանք որ մեր սիրտը ուղիղ է Մեծագոյն Յէուի՝ Յիսուս Քրիստոսի՝ սրտին հետ, ուստի բոլոր հոգիով պիտի ընդառաջենք հետեւեալ ներշնչեալ քաջալերութեան. «Ո՛վ արդարներ, Տէրոջմով ուրախ եղէ՛ք ու ցնծացէ՛ք, ցնծութեամբ երգեցէ՛ք դուք ամէնքդ, որ սրտով ուղիղ էք»։—Սաղմոս 32։11
Կրնա՞ք Բացատրել
◻ Հ.Դ.Ա. 905–ին Իսրայէլի մէջ ի՞նչ փոփոխութիւններ տեղի ունեցան։
◻ Ո՞վ է արդի Յէուն, եւ «մեծ բազմութիւն»ը ի՞նչպէս ցոյց տուած է որ իր ‘սիրտը ուղիղ’ է անոր սրտին հետ։
◻ Տարեկան տեղեկագրութեան ո՞ր թիւերը ցոյց կու տան Եհովայի Վկաներու ցուցաբերած նախանձախնդրութիւնը 1997–ի ծառայութեան տարուան ընթացքին։
◻ Սատանան մեր դէմ ի՛նչ որ ալ ընէ, 1998–ի ծառայութեան տարուան ընթացքին ի՞նչպիսի հոգի մը պիտի ցուցաբերենք։