Քանի՞ Եհովայի վկայ կը ճանչնաս։ Մեզմէ ոմանք՝ թերեւս ըլլան դրացիներդ, պաշտօնակիցներդ կամ դասընկերներդ։ Կամ՝ թերեւս քեզի հետ Աստուածաշունչի քննարկութիւններ ունեցած ենք։ Իրապէս ո՞վ ենք մենք, եւ ինչո՞ւ մեր հաւատալիքները հրապարակաւ կը բաժնենք։

Սովորական մարդիկ ենք։ Մենք այլազան ենթահողերէ եւ ընկերային խաւերէ կու գանք։ Մեզմէ ոմանք՝ նախապէս տարբեր կրօնքի կը պատկանէին, իսկ ուրիշներ Աստուծոյ չէին հաւատար։ Վկաներ ըլլալէ առաջ սակայն, բոլորս ժամանակ տրամադրեցինք Աստուածաշունչի ուսուցումները ուշադրութեամբ քննելու համար (Գործք 17։11)։ Մեր սորվածները ընդունեցինք եւ ապա Եհովան պաշտելու անձնական որոշում կայացուցինք։

Աստուածաշունչը ուսումնասիրելով կ’օգտուինք։ Ուրիշներու նման, խնդիրներու եւ անձնական տկարութիւններու հետ պէտք է գլուխ ելլենք։ Սակայն ջանալով մեր առօրեայ կեանքին մէջ Աստուածաշունչի սկզբունքները կիրարկել, մեր կեանքի որակը աչքառու կերպով բարեփոխուած է (Սաղմոս 128։1, 2)։ Ասիկա պատճառներէն մէկն է, թէ ինչո՛ւ ուրիշներու հետ կը բաժնենք այն լաւ բաները, որոնք Աստուածաշունչէն սորված ենք։

Աստուածային արժանիքներու համաձայն կ’ապրինք։ Աստուածաշունչի արժանիքները յառաջ կը մղեն մեր բարօրութիւնը եւ ուրիշներուն հանդէպ յարգանքը, ինչպէս նաեւ՝ պարկեշտութեան եւ ազնուութեան նման յատկութիւններ։ Այդ արժանիքները ընկերութեան առողջ ու արդիւնաբեր անդամներ մէջտեղ գալուն կը նպաստեն, եւ բարոյականութիւնն ու ընտանեկան միութիւնը կը քաջալերեն։ Համոզուած ըլլալով թէ «Աստուծոյ քով աչառութիւն չկայ», մենք կը պատկանինք միջազգային հոգեւոր եղբայրութեան մը, որ ցեղային ու քաղաքական խոչընդոտներէ զերծ է։ Թէեւ սովորական մարդիկ ենք, սակայն իւրայատուկ ժողովուրդ կը կազմենք (Գործք 4։13. 10։34, 35)։

• Եհովայի վկաները ուրիշ մարդոց հետ հասարակաց ի՞նչ բաներ ունին։

• Աստուածաշունչը ուսումնասիրելով, Վկաները ի՞նչ արժանիքներ սորված են։

Շատեր կը խորհին թէ Եհովայի վկաներ անունը նոր կրօնքի մը անունն է։ Սակայն, աւելի քան 2700 տարի առաջ, միակ ճշմարիտ Աստուծոյ ծառաները նկարագրուեցան որպէս իր «վկաներ»ը (Եսայի 43։10-12)։ Մինչեւ 1931, ճանչցուած էինք որպէս Աստուածաշունչի Աշակերտներ։ Ուստի, ինչո՞ւ Եհովայի վկաներ անունը որդեգրեցինք։

Ատիկա մեր Աստուածը կը բնորոշէ։ Ըստ հին ձեռագիրներու, Աստուծոյ անունը՝ Եհովա, Աստուածաշունչին մէջ հազարաւոր անգամներ կը նշուի։ Բազմաթիւ թարգմանութիւններու մէջ, այս անունը փոխարինուած է Տէր կամ Աստուած տիտղոսով։ Բայց ճշմարիտ Աստուածը ինքզինք Մովսէսի յայտնած էր իր անձնական անունով՝ Եհովա, ըսելով. «Իմ անունս յաւիտեան այս է» (Ելից 3։15)։ Այս կերպով, ան ինքզինք բոլոր չաստուածներէն զատորոշեց։ Մենք Աստուծոյ սուրբ անունը կրելով կը պարծենանք։

Ատիկա մեր առաքելութիւնը կը նկարագրէ։ Վաղեմի ժամանակներուն բազմաթիւ անհատներ, սկսելով արդար Աբէլէն, Եհովայի հանդէպ իրենց ունեցած հաւատքին մասին վկայեցին։ Դարերու ընթացքին, Նոյ, Աբրահամ, Սառա, Մովսէս, Դաւիթ եւ ուրիշներ միացան այս «վկաներու բազմութեան» (Եբրայեցիս 11։4–12։1)։ Ճիշդ ինչպէս որ անհատ մը կրնայ դատարանին մէջ անմեղ մարդու մը ի նպաստ վկայել, մենք վճռած ենք մեր Աստուծոյն մասին ճշմարտութիւնը յայտնել։

Մենք Յիսուսը կ’ընդօրինակենք։ Աստուածաշունչը զինք կը կոչէ «հաւատարիմ ու ճշմարիտ Վկան» (Յայտնութիւն 3։14)։ Յիսուս ի՛նք ըսաւ թէ ‘Աստուծոյ անունը ճանչցուց’ եւ Աստուծոյ վերաբերեալ ‘ճշմարտութեան համար վկայեց’ (Յովհաննէս 17։26. 18։37)։ Ուստի, Քրիստոսի հարազատ հետեւորդները Եհովայի անունը պէտք է կրեն եւ զայն ճանչցնեն։ Ճիշդ ասիկա է որ Եհովայի վկաները կը ջանան ընել։

• Աստուածաշունչի Աշակերտները ինչո՞ւ Եհովայի վկաներ անունը որդեգրեցին։

• Որքա՞ն ժամանակէ ի վեր Եհովան երկրագունդին վրայ վկաներ ունեցած է։

• Եհովայի մեծագոյն Վկան ո՞վ է։

Աստուածաշունչը մարգարէացաւ թէ Քրիստոսի մահէն ետք, սուտ վարդապետներ նախկին քրիստոնեաներուն մէջ պիտի ելլէին եւ աստուածաշնչական ճշմարտութիւնը աղաւաղէին (Գործք 20։​29, 30)։ Ժամանակի ընթացքին, ճիշդ ասիկա է որ պատահեցաւ։ Անոնք Յիսուսի ուսուցումները հեթանոսական կրօնական գաղափարներու հետ խառնեցին, եւ կեղծ քրիստոնէութիւն մը զարգացաւ (Բ. Տիմոթէոս 4։​3, 4)։ Ինչպէ՞ս կրնանք վստահ ըլլալ որ ներկայիս ճիշդ կերպով կը հասկնանք, թէ Աստուածաշունչը իրապէս ի՛նչ կը սորվեցնէ։

Ժամանակը եկաւ որ Եհովան ճշմարտութիւնը յայտնէ։ Ան կանխագուշակեց, թէ «վերջին ժամանակը. . . [«ճշմարիտ», ՆԱ] գիտութիւնը պիտի շատնայ» (Դանիէլ 12։4)։ 1870–⁠ին, ճշմարտութիւնը փնտռող պզտիկ խումբ մը գիտակցեցաւ, թէ բազմաթիւ եկեղեցական վարդապետութիւններ աստուածաշնչական չէին։ Հետեւաբար, անոնք սկսան ջանալ Աստուածաշունչի բուն ուսուցումները հասկնալ, եւ Եհովան զիրենք օրհնեց՝ հոգեւոր հասկացողութիւն տալով։

Անկեղծ տղամարդիկ Աստուածաշունչը ուշադրութեամբ ուսումնասիրեցին։ Այդ լուրջ Աստուածաշունչի Աշակերտները, մեր նախորդները, դիմեցին ուսումնասիրութեան մեթոտի մը, որ մինչեւ օրս կը գործածենք։ Անոնք Աստուածաշունչը նիւթ առ նիւթ քննարկեցին։ Երբ դժուարահասկնալի հատուածի մը կը հանդիպէին, զայն բացատրող այլ համարներ կը փնտռէին։ Երբ կը հասնէին եզրակացութեան մը, որ Սուրբ Գրութիւններուն մնացեալ մասերուն հետ ներդաշնակ էր, զայն գրի կ’առնէին։ Այսպէս թոյլ տալով որ Աստուածաշունչը ինքզինք մեկնաբանէ, անոնք վերագտան ճշմարտութիւնը Աստուծոյ անուան եւ Թագաւորութեան մասին, մարդկութեան եւ երկրագունդի նկատմամբ Աստուծոյ նպատակին մասին, մեռելներու վիճակին եւ յարութեան յոյսին մասին։ Անոնց որոնումը զիրենք բազմաթիւ սուտ հաւատալիքներէ եւ սովորութիւններէ ազատեց (Յովհաննէս 8։​31, 32)։

1879–⁠ին, Աստուածաշունչի Աշակերտները արդէն գիտակցած էին, որ ժամանակը եկած էր ճշմարտութիւնը ընդարձակօրէն յայտարարելու։ Այդ տարին, անոնք սկսան արտադրել այն պարբերաթերթը, որ մինչեւ օրս կը հրատարակենք՝ Դիտարան կը ծանուցանէ Եհովայի Թագաւորութիւնը։ Այժմ Աստուածաշունչի ճշմարտութիւնը կը բաժնենք մարդոց հետ 240 երկիրներու մէջ եւ շուրջ 750 լեզուներով։ Արդարեւ, ճշմարիտ գիտելիքները աննախընթաց կերպով առա՛տ են։

• Քրիստոսի մահէն ետք, Աստուածաշունչի ճշմարտութեան ի՞նչ պատահեցաւ։

• Ի՞նչ բան մեզ կարող դարձուցած է որ Աստուծոյ Խօսքին ճշմարտութիւնը վերագտնենք։

Տասնամեակներ շարունակ, Եհովայի վկաները Աստուածաշունչի տարբեր թարգմանութիւններ գործածեցին, տպեցին եւ բաշխեցին։ Սակայն, յետոյ նկատեցինք թէ կարիք կայ արտադրելու նոր թարգմանութիւն մը, որ աւելի լաւ կերպով մարդոց պիտի օգնէր ‘ճշմարտութիւնը ճանչնալու’, ինչ որ Աստուծոյ կամքն է (Ա. Տիմոթէոս 2։​3, 4)։ Այսպէս, 1950–⁠ին, սկսանք մաս առ մաս հրատարակել արդի լեզուով գրուած Աստուածաշունչը՝ Նոր աշխարհի թարգմանութիւն։ Այս Աստուածաշունչը ճշգրիտ կերպով թարգմանուած է աւելի քան 130 լեզուներուa։

Դիւրահասկնալի Աստուածաշունչի մը կարիք կար։ Լեզուները ժամանակի ընթացքին կը փոխուին, եւ բազմաթիւ թարգմանութիւններ կը բովանդակեն աղօտ կամ անգործածական արտայայտութիւններ, որոնք դժուարահասկնալի են։ Նաեւ, յայտնաբերուած են հին ձեռագիրներ, որոնք աւելի ճշգրիտ են ե՛ւ սկզբնական ձեռագիրներուն աւելի մօտիկ են, աստուածաշնչական եբրայերէն, արամերէն եւ յունարէն լեզուները աւելի հասկնալի դարձնելով։

Աստուծոյ պատգամին հաւատարիմ եղող թարգմանութեան մը կարիք կար։ Փոխանակ Աստուծմէ ներշնչուած գրութիւններուն հետ իրենց ազատութիւնը առնելու, Աստուածաշունչի թարգմանիչները անոր բնագիրին հաւատարիմ պէտք է մնան։ Սակայն, թարգմանութիւններուն մեծամասնութիւնը չի՛ գործածեր աստուածային անունը՝ Եհովա։

Վարկը իր Հեղինակին տուող Աստուածաշունչի մը կարիք կար (Բ. Թագաւորաց 23։2)։ Նոր աշխարհի թարգմանութեան մէջ, Եհովայի անունը ետ դրուեցաւ ո՛ւր որ ամէնէն հին ձեռագիրներուն մէջ շուրջ 7000 անգամ կը նշուի, ինչպէս որ վարի օրինակը ցոյց կու տայ (Սաղմոս 83։18)։ Տարիներու ժրաջան պրպտումի արդիւնքն է՝ թէ այս Աստուածաշունչը կարդալու հաճելի է, քանի որ յստակ կերպով Աստուծոյ մտածումը կը հաղորդէ։ Նոր աշխարհի թարգմանութիւն–⁠ը քու լեզուովդ ունի՛ս կամ ոչ, քեզ կը քաջալերենք որ Եհովայի Խօսքը ամէն օր կարդալու լաւ սովորութիւնը ունենաս (Յեսու 1։8. Սաղմոս 1։​2, 3)։

• Ինչո՞ւ որոշեցինք որ Աստուածաշունչի նոր թարգմանութեան մը կարիք կար։

• Առօրեայ ո՞ր սովորութիւնը օգտակար է ամէն անհատի որ կ’ուզէ Աստուծոյ կամքին մասին սորվիլ։