Մեր կազմակերպութեան մէջ աշխատավարձ ստացող կղեր չունինք։ Փոխարէն, ինչպէս որ էր պարագան երբ քրիստոնէական ժողովքը սկսաւ, որակեալ տեսուչներ կը նշանակուին «Աստուծոյ ժողովքը հովուելու համար» (Գործք 20։28, ՆԱ)։ Այս երէցները հոգեւորապէս հասուն տղամարդիկ են, որոնք առաջնորդութիւն կ’առնեն ժողովքին մէջ եւ զայն կը հովուեն «ո՛չ թէ ակամայ՝ հապա կամաւ, ո՛չ թէ անարգ շահախնդրութեամբ՝ հապա յօժարութեամբ» (Ա. Պետրոս 5։1-3)։ Անոնք մեզի ի նպաստ ի՞նչ աշխատանք կը կատարեն։

Մեզ կը հոգան եւ մեր վրայ կը վերահսկեն։ Երէցները ժողովքը կ’առաջնորդեն եւ հոգեւորապէս կը պաշտպանեն։ Գիտակցելով թէ Աստուած այս կարեւոր դերը իրենց վստահած է, երէցները իր ժողովուրդին չեն տիրեր, այլ՝ մեր բարօրութեան եւ ուրախութեան կը նպաստեն (Բ. Կորնթացիս 1։23)։ Ճիշդ ինչպէս որ հովիւ մը ժրաջանօրէն իւրաքանչիւր ոչխարին հոգ կը տանի, երէցները կը ջանան ժողովքի բոլոր անդամները անհատապէս ճանչնալ (Առակաց 27։23)։

Մեզի կը սորվեցնեն ինչպէ՛ս Աստուծոյ կամքը կատարել։ Ամէն շաբաթ, երէցները ժողովները կը վարեն, որպէսզի մեր հաւատքը ամրացնեն (Գործք 15։32)։ Այս նուիրեալ տղամարդիկը նաեւ աւետարանչութեան մէջ առաջնորդութիւն կ’առնեն, մեզի հետ աշխատելով եւ մեզ մարզելով ծառայութեան բոլոր երեսակներուն մէջ։

Մեզի անձնական քաջալերութիւն կու տան։ Մեր անձնական հոգեւոր պէտքերը հոգալու համար, երէցները կրնան մեր տուները այցելել կամ Թագաւորութեան սրահին մէջ մեզի հետ խօսակցիլ, Սուրբ Գրութիւններէն օգնութիւն ու մխիթարութիւն մատակարարելու համար (Յակոբոս 5։14, 15)։

Ժողովքին մէջ իրենց աշխատանքին կողքին, երէցներուն մեծամասնութիւնը նաեւ ունի աշխարհիկ գործեր եւ ընտանեկան պատասխանատուութիւններ, որոնք ժամանակ եւ ուշադրութիւն կը պահանջեն։ Այս ջանասէր եղբայրները մեր յարգանքին արժանի են (Ա. Թեսաղոնիկեցիս 5։12, 13)։

• Ժողովքի երէցներուն դերը ի՞նչ է։

• Երէցները ի՞նչ կերպերով մեզի հանդէպ անձնական հետաքրքրութիւն կը ցուցաբերեն։

Աստուածաշունչը կը նկարագրէ քրիստոնեայ տղամարդոց երկու խումբեր, որոնք ժողովքային պատասխանատուութիւններուն հոգ կը տանին,– «վերակացուներ եւ օգնական ծառաներ» (Փիլիպպեցիս 1։1, ՆԱ)։ Ընդհանրապէս, իւրաքանչիւր ժողովքի մէջ քանի մը երէցներ եւ օգնական ծառաներ կան։ Օգնական ծառաները մեր օգտին համար ի՞նչ աշխատանք կը կատարեն։

Երէցներու մարմինին կ’աջակցին։ Օգնական ծառաները հոգեւոր մտայնութիւն ունին, վստահելի եւ խղճամիտ տղամարդիկ են. ոմանք՝ երիտասարդ, ուրիշներ՝ տարեց։ Անոնք հոգ կը տանին կարեւոր, բայց յաճախ կազմակերպչական ու ֆիզիքական աշխատանքներու, որոնք ժողովքէն ներս պէտք է ձեռք առնուին։ Ասիկա թոյլ կու տայ երէցներուն, որ ուսուցանելու եւ հովուելու պատասխանատուութիւններուն վրայ կեդրոնանան։

Գործնական ծառայութիւններ կը մատուցանեն։ Օգնական ծառաներէն ոմանք կը նշանակուին որպէս հիւրընկալներ, որպէսզի բարի գալուստ մաղթեն բոլոր անոնց՝ որոնք ժողովի կու գան։ Ուրիշներուն պատասխանատուութիւնն է՝ ձայնային սարքերու հոգ տանիլ, հրատարակութիւններ բաշխել, ժողովքին հաշիւները ընել եւ ժողովքի անդամներուն նշանակել քարոզելու թաղամասեր։ Անոնք նաեւ կ’օգնեն Թագաւորութեան սրահը լաւ վիճակի մէջ պահելու։ Երէցները կրնան անոնցմէ խնդրել, որ տարեցներուն օգնութիւն մատակարարեն։ Օգնական ծառաները յօժարութեամբ կը կատարեն որեւէ պատասխանատուութիւն որ իրենց կը տրուի, եւ ժողովքը իրենց ժրաջանութիւնը կը գնահատէ (Ա. Տիմոթէոս 3։13)։

Որպէս քրիստոնեայ տղամարդիկ լաւ օրինակ կը հանդիսանան։ Օգնական ծառաները իրենց ընտիր հոգեւոր յատկութիւններուն համար կ’ընտրուին։ Երբ ժողովներուն մէջ նիւթեր կը ներկայացնեն, անոնք մեր հաւատքը կ’ամրացնեն։ Քարոզչութեան մէջ առաջնորդութիւն առնելով, մեզի կ’օգնեն աւելի՛ նախանձախնդիր ըլլալու։ Իրենց համագործակցական հոգիին շնորհիւ, ուրախութիւն եւ միութիւն յառաջ կը մղեն (Եփեսացիս 4։16)։ Ժամանակի ընթացքին, անոնք կրնան որակեալ ըլլալ որպէս երէցներ ծառայելու։

• Օգնական ծառաները ինչպիսի՞ տղամարդիկ են։

• Այս ծառաները ինչպէ՞ս կ’օգնեն ժողովքին որ ատակօրէն գործէ։

Քրիստոնէական Յունարէն Գրութիւնները յաճախ կը նշեն Բառնաբասն ու Պօղոս առաքեալը։ Այս տղամարդիկը ծառայեցին որպէս շրջագայող տեսուչներ, այցելելով առաջին դարու ժողովքները։ Ինչո՞ւ։ Անոնք անկեղծօրէն իրենց հոգեւոր եղբայրներուն բարօրութեամբ հետաքրքրուած էին։ Պօղոս ըսաւ թէ կ’ուզէր ‘դառնալ ու այցելել եղբայրներուն’, որպէսզի տեսնէր թէ ինչպէ՛ս էին։ Ան յօժար էր հարիւրաւոր մղոններ կտրելու, որպէսզի երթար ու զօրացնէր եղբայրները (Գործք 15։36)։ Ներկայիս, մեր շրջանային տեսուչները այդ նոյն փափաքը ունին։

Անոնք կու գան մեզ քաջալերելու։ Ամէն շրջանային տեսուչ շուրջ 20 ժողովք կ’այցելէ, տարին երկու անգամ իւրաքանչիւրին հետ մէկ շաբաթ անցընելով։ Մեծապէս կրնանք օգտուիլ այս եղբայրներուն փորձառութենէն եւ անոնց կիներուն փորձառութենէն,– եթէ ամուսնացած են։ Անոնք կը ջանան ծանօթանալ թէ՛ երիտասարդներուն եւ թէ տարեցներուն, ինչպէս նաեւ կը տենչան մեզի հետ դաշտի ծառայութեան մասնակցիլ ու Աստուածաշունչի ուսումնասիրութիւններուն ներկայ գտնուիլ։ Այս տեսուչները երէցներուն հետ հովուական այցելութիւններ կ’ընեն, եւ մեզ զօրացնելու համար՝ ժողովներուն ու համաժողովներուն մէջ քաջալերական դասախօսութիւններ կու տան (Գործք 15։35)։

Անոնք բոլորին հանդէպ հետաքրքրութիւն կը ցուցաբերեն։ Շրջանային տեսուչները ժողովքներուն հոգեւոր վիճակով խորապէս հետաքրքրուած են։ Անոնք երէցներուն եւ օգնական ծառաներուն հետ կը ժողվուին, որպէսզի ժողովքին յառաջդիմութիւնը աչքէ անցընեն ու պատասխանատուութիւնները շալկելու առնչութեամբ գործնական խրատներ տան։ Անոնք ռահվիրաներուն կ’օգնեն յաջող ծառայութիւն վայելելու. նաեւ, կ’ուրախանան նորեկներուն ծանօթանալով եւ լսելով անոնց հոգեւոր յառաջդիմութեան մասին։ Այս եղբայրներէն իւրաքանչիւրը անձնազոհ է եւ որպէս «գործակից» կ’աշխատի մեր օգտին համար (Բ. Կորնթացիս 8։23)։ Անոնց հաւատքն ու աստուածպաշտութիւնը պէտք է ընդօրինակենք (Եբրայեցիս 13։7)։

• Շրջանային տեսուչները ի՞նչ նպատակով ժողովքները կ’այցելեն։

• Անոնց այցելութիւններէն ինչպէ՞ս կրնաս օգտուիլ։

Երբ աղէտ մը հարուածէ, Եհովայի վկաները անմիջապէս գործի կ’անցնին, տուժած եղբայրներուն օգնելու համար։ Այսպիսի ջանքեր ցոյց կու տան իրարու հանդէպ մեր ունեցած հարազատ սէրը (Յովհաննէս 13։34, 35. Ա. Յովհաննէս 3։17, 18)։ Ի՞նչ կերպերով կ’օգնենք։

Նիւթական օգնութիւն կը մատուցանենք։ Երբ առաջին դարուն Հրէաստանի մէջ մեծ սով մը եղաւ, Անտիոքի մէջ եղող քրիստոնեաները իրենց հոգեւոր եղբայրներուն նիւթական օգնութիւն ուղարկեցին (Գործք 11։27-30)։ Նմանապէս, երբ գիտնանք թէ երկրագունդի մէկ մասին մէջ մեր եղբայրները դժուարութիւն կը դիմագրաւեն, մեր տեղական ժողովքին միջոցաւ նուիրատուութիւններ կ’ուղարկենք, հրատապ կարիք ունեցողներուն նիւթական օգնութիւն հայթայթելու համար (Բ. Կորնթացիս 8։13-15)։

Գործնական օգնութիւն կը հայթայթենք։ Տուժած վայրը գտնուող երէցները կը ջանան ժողովքի իւրաքանչիւր անդամի հետ կապ պահել, վստահ ըլլալու համար թէ բոլորն ալ ապահով են։ Օգնութեան յանձնախումբ մը կը համակարգէ ուտելիք, խմելիք մաքուր ջուր, հագուստ, պատսպարան եւ բժշկական խնամք հայթայթելը։ Հարկ եղած հմտութիւնները ունեցող բազմաթիւ Վկաներ կամաւորաբար իրենց հաշւոյն կ’երթան աղէտեալ վայրը, որպէսզի օգնութեան աշխատանքին մասնակցին կամ քանդուած տուներն ու Թագաւորութեան սրահները նորոգեն։ Մեր վայելած միութիւնը որպէս կազմակերպութիւն եւ այն փորձառութիւնը որ ձեռք ձգած ենք միասնաբար աշխատելով, մեզ կարող կը դարձնեն որ նեղութեան ատեն շուտով մէկտեղենք հարկ եղած օգնութիւնն ու աշխատաւորները։ Թէեւ ձեռք կու տանք «հաւատքի ընտանիներուն», սակայն երբ կարելի է՝ ուրիշներուն ալ կ’աջակցինք, ի՛նչ որ ալ ըլլայ անոնց կրօնքը (Գաղատացիս 6։10)։

Հոգեւոր եւ զգացական աջակցութիւն կը մատակարարենք։ Աղէտահարները մանաւանդ մխիթարութեան պէտք կ’ունենան։ Այսպիսի ժամանակներու մէջ, զօրութիւն կը ստանանք Եհովայէն՝ ‘ամէն մխիթարութեան Աստուծմէն’ (Բ. Կորնթացիս 1։3, 4)։ Յուսահատ վիճակի մէջ եղողներուն հետ կը բաժնենք Աստուածաշունչի խոստումները, երաշխիք տալով թէ շուտով Աստուծոյ Թագաւորութիւնը վերջ պիտի դնէ բոլոր ողբերգութիւններուն, որոնք ցաւ ու տառապանք կը պատճառեն (Յայտնութիւն 21։4)։

• Աղէտներու ժամանակ, Վկաները ինչո՞ւ կարող են անմիջապէս քայլեր առնել։

• Ի՞նչ հոգեւոր մխիթարութիւն կրնանք բաժնել վերապրողներուն հետ։

Իր մահէն քիչ առաջ, Յիսուս անձնական խօսակցութիւն ունեցաւ չորս աշակերտներու հետ,– Պետրոս, Յակոբոս, Յովհաննէս եւ Անդրէաս։ Մինչ Յիսուս վերջին օրերուն իր ներկայութեան նշանը կը կանխագուշակէր, կարեւոր հարցում մը ուղղեց. «Ո՞վ է այն հաւատարիմ ու իմաստուն ծառան՝ որ իր տէրը իր ծառաներուն վրայ դրաւ, որպէս զի ատենին անոնց կերակուր տայ» (Մատթէոս 24։3, 45. Մարկոս 13։3, 4)։ Յիսուս իր աշակերտները կը հաւաստիացնէր, թէ որպէս իրենց «տէրը», պիտի նշանակէր անհատներ՝ որոնք վերջին ժամանակին ընթացքին իր հետեւորդներուն անդադար հոգեւոր սնունդ պիտի հայթայթէին։ Որո՞նք պիտի կազմէին այս ծառան։

Ան Յիսուսի օծեալ հետեւորդներէ բաղկացած խմբակ մըն է։ «Ծառան» բնորոշուած է որպէս Եհովայի վկաներու Կառավարիչ մարմինը։ Ան ժամանակայարմար հոգեւոր սնունդ կը մատակարարէ Եհովայի երկրպագուներուն։ Մենք կախեալ ենք այս հաւատարիմ ծառայէն, որ շարունակենք ‘ատենին մեր ուտելիքը’ ստանալ (Ղուկաս 12։42)։

Ան Աստուծոյ տան հոգ կը տանի (Ա. Տիմոթէոս 3։15)։ Յիսուս ծառային հսկայ պատասխանատուութիւն տուաւ. Եհովայի կազմակերպութեան երկրային մասի գործունէութեան վրայ վերահսկել,– նիւթական ստացուածքներուն հոգ տանիլ, քարոզչութիւնը առաջնորդել եւ ժողովքներուն միջոցաւ մեզի սորվեցնել։ Այսպէս, մեզի պէտք եղածը ատենին հայթայթելու համար, «հաւատարիմ ու իմաստուն ծառան» հոգեւոր սնունդ կը բաշխէ հրատարակութիւններու միջոցաւ, որոնք մեր ծառայութեան մէջ կը գործածենք, ինչպէս նաեւ յայտագիրներու միջոցաւ, որոնք մեր ժողովներուն եւ համաժողովներուն մէջ կը ներկայացուին։

Ծառան Աստուածաշունչի ճշմարտութիւններուն եւ բարի լուրը քարոզելու իր յանձնարարութեան հաւատարիմ կը մնայ, եւ Քրիստոսի երկրային շահերը իմաստուն կերպով կը հոգայ (Գործք 10։42)։ Եհովան անոր գործունէութիւնը կ’օրհնէ՝ երկրպագուներուն թիւը աւելցնելով եւ ճոխ հոգեւոր կարգադրութիւններ ընելով (Եսայի 60։22. 65։13)։

• Յիսուս ո՞վ նշանակեց իր աշակերտները հոգեւորապէս կերակրելու համար։

• Ծառան ի՞նչ կերպերով հաւատարիմ ու իմաստուն է։

Առաջին դարուն, պզտիկ խումբ մը՝ ‘առաքեալները եւ երէցները Երուսաղէմի մէջ’, ծառայեց իբրեւ կառավարիչ մարմին, որպէսզի ամբողջ օծեալ քրիստոնէական ժողովքին ի նպաստ կարեւոր որոշումներ կայացնէ (Գործք 15։2)։ Սուրբ Գրութիւնները քննարկելով ե՛ւ Աստուծոյ հոգիին առաջնորդութեան հետեւելով, անոնք միաբանութեամբ որոշում կը կայացնէին (Գործք 15։25)։ Ներկայիս, նոյն մեթոտը ի գործ կը դրուի։

Աստուած զայն կը գործածէ իր կամքը կատարելու համար։ Օծեալ եղբայրները, որոնք Կառավարիչ մարմինի անդամներ են, Աստուծոյ Խօսքով խորապէս հետաքրքրուած են եւ գործնական ու հոգեւոր հարցեր ձեռք առնելու մէջ շատ փորձառութիւն ունին։ Իւրաքանչիւր շաբաթ անոնք կը հաւաքուին, աշխարհածաւալ եղբայրութեան կարիքները նկատի առնելու համար։ Ինչպէս որ էր պարագան առաջին դարուն, Աստուածաշունչի վրայ հիմնուած ցուցմունքները կը տրուին կա՛մ նամակներու միջոցաւ եւ կամ շրջագայող տեսուչներու եւ ուրիշներու միջոցաւ։ Ասիկա Աստուծոյ ժողովուրդին կ’օգնէ որ համերաշխաբար մտածեն ու գործեն (Գործք 16։4, 5)։ Կառավարիչ մարմինը կը վերահսկէ հոգեւոր սնունդի պատրաստութեան վրայ, քարոզչութեան թափ կու տայ եւ պատասխանատու դիրքերու վրայ եղբայրներ կը նշանակէ։

Աստուծոյ հոգիին առաջնորդութեան կ’ընդառաջէ։ Առաջնորդութեան համար, Կառավարիչ մարմինը կը դիմէ տիեզերքի Գերիշխանին՝ Եհովային, եւ ժողովքի Գլուխին՝ Յիսուսին (Ա. Կորնթացիս 11։3. Եփեսացիս 5։23)։ Ատոր անդամները իրենք զիրենք Աստուծոյ ժողովուրդին առաջնորդներ չեն նկատեր։ Անոնք, միւս բոլոր օծեալ քրիստոնեաներուն հետ, «Գառնուկին [Յիսուս] ետեւէն կ’երթան՝ ուր որ ան երթայ» (Յայտնութիւն 14։4)։ Կառավարիչ մարմինը կը գնահատէ իրեն ի նպաստ մեր մատուցած աղօթքները։

• Որո՞նք կազմեցին առաջին դարու կառավարիչ մարմինը։

• Ներկայիս, Կառավարիչ մարմինը ինչպէ՞ս Աստուծոյ առաջնորդութիւնը կը փնտռէ։

Բեթէլ եբրայերէն անուն մըն է, որ կը նշանակէ «Աստուծոյ տունը» (Ծննդոց 28։17, 19)։ Անիկա պատշաճ նկարագրութիւն մըն է այն համալիրներուն, որոնք Եհովայի վկաները աշխարհի տարածքին հաստատած են, ուրկէ քարոզչութիւնը կ’առաջնորդուի եւ կ’օժանդակուի։ Կառավարիչ մարմինը կը ծառայէ գլխաւոր կեդրոնատեղիին մէջ, որ կը գտնուի Նիւ Եորք նահանգը (ԱՄՆ), ուրկէ կը վերահսկէ բազմաթիւ երկիրներու մէջ գտնուող մասնաճիւղերուն աշխատանքին վրայ։ Այս համալիրներուն մէջ ծառայողները ճանչցուած են որպէս՝ Բեթէլի ընտանիք։ Ընտանիքի մը նման, անոնք միասնաբար կ’ապրին ու կ’աշխատին, միասնաբար կը ճաշեն, եւ միասնաբար Աստուածաշունչը կ’ուսումնասիրեն (Սաղմոս 133։1)։

Յատուկ վայր մը՝ ուր Բեթէլի ընտանիքը անձնազոհութեամբ կ’աշխատի։ Իւրաքանչիւր Բեթէլի մէջ, քրիստոնեայ տղամարդիկն ու կիները նուիրուած են Աստուծոյ կամքը կատարելու եւ լիաժամ կերպով Թագաւորութեան շահերուն ծառայելու (Մատթէոս 6։33)։ Անոնցմէ ո՛չ ոք աշխատավարձ կամ ամսական կ’առնէ, այլ՝ բոլորին կը տրուին սենեակ, ուտելիք եւ որոշ գումար մը, իրենց անձնական ծախսերը հոգալու համար։ Բեթէլի մէջ իւրաքանչիւր անհատ նշանակում մը ունի,– ոմանք գրասենեակը, խոհանոցը կամ ճաշասրահը. ոմանք կը ծառայեն տպարանին կամ կազմատան մէջ, իսկ ուրիշներ տնտեսութիւն, լուացք, նորոգութիւններ կամ այլ բաներ կ’ընեն։

Բազմազբաղ վայր մը՝ որ Թագաւորութեան քարոզչութեան կ’աջակցի։ Իւրաքանչիւր Բեթէլի գլխաւոր նպատակն է՝ աստուածաշնչական ճշմարտութիւնը կարելի եղածին չափ շատ մարդոց մատչելի դարձնել։ Այս գրքոյկը օրինակ մըն է։ Անիկա Կառավարիչ մարմինին վերատեսչութեան ներքեւ գրուեցաւ, ելեկտրոնային ձեւով փոխանցուեցաւ աշխարհի տարածքին գտնուող հարիւրաւոր թարգմանչական խումբերու, զանազան Բեթէլներու արագընթաց տպագրամեքենաներով տպուեցաւ, եւ աւելի քան 110,000 ժողովքներու ուղարկուեցաւ։ Այս գործընթացին իւրաքանչիւր հանգրուանին, Բեթէլի ընտանիքները կը հայթայթեն կենսական աջակցութիւն ամէնէն հրատապ աշխատանքին՝ բարի լուրի քարոզչութեան (Մարկոս 13։10)։

• Որո՞նք Բեթէլի մէջ կը ծառայեն, եւ անոնց համար ի՞նչ կարգադրութիւններ եղած են։

• Իւրաքանչիւր Բեթէլի գործունէութիւնը ո՞ր հրատապ աշխատանքին կ’աջակցի։

Բեթէլի ընտանիքի անդամները զանազան բաժանմունքներու մէջ կը ծառայեն, մէկ կամ քանի մը երկիրներու մէջ կատարուած քարոզչութեան հոգ տանելով։ Անոնց աշխատանքը կրնայ ըլլալ. թարգմանութեան մասնակցիլ, պարբերաթերթեր տպել, գիրքեր կազմել, հրատարակութիւնները մթերել, ձայնագրութիւն/տեսաերիզ արտադրել, կամ շրջանին վերաբերեալ որոշ հարցերու հոգ տանիլ։

Մասնաճիւղի յանձնախումբը կը վերահսկէ գործունէութեան վրայ։ Կառավարիչ մարմինը իւրաքանչիւր մասնաճիւղի վերատեսչութիւնը կը յանձնէ Մասնաճիւղի յանձնախումբի մը, որ երեք կամ աւելի փորձառու եւ որակեալ երէցներէ կազմուած կ’ըլլայ։ Մասնաճիւղի յանձնախումբը Կառավարիչ մարմինը տեղեակ կը պահէ իր հովանաւորութեան տակ եղող իւրաքանչիւր երկրի մէջ տարուած գործունէութեան յառաջդիմութեան եւ ծագած խնդիրներուն։ Այսպիսի տեղեկագրութիւններ կ’օգնեն Կառավարիչ մարմինին, որ որոշէ թէ ի՛նչ նիւթեր պէտք է նկատի առնուին ապագայ հրատարակութիւններուն, ժողովներուն եւ համաժողովներուն մէջ։ Կառավարիչ մարմինի ներկայացուցիչները կանոնաւորաբար մասնաճիւղերը կ’այցելեն եւ յանձնախումբերուն ցուցմունքներ կու տան՝ իրենց նշանակումները ինչպէ՛ս ձեռք առնելու առնչութեամբ (Առակաց 11։14)։ Մասնաւոր յայտագիր մը, ներառեալ՝ կեդրոնատեղիի ներկայացուցիչին կողմէ դասախօսութիւն մը, կը կարգադրուի քաջալերելու համար մասնաճիւղի թաղամասին մէջ գտնուողները։

Տեղական ժողովքներու աջակցութիւն կը տրուի։ Մասնաճիւղի պատասխանատու եղբայրները նոր ժողովքներ կազմելը կը վաւերացնեն ու մասնաճիւղի թաղամասին մէջ ծառայող ռահվիրաներուն, միսիոնարներուն եւ շրջանային տեսուչներուն գործունէութիւնը կ’ուղղեն։ Անոնք համաժողովները կը կազմակերպեն, նոր Թագաւորութեան սրահներու շինարարութիւնը կը համակարգեն եւ ժողովքներուն հարկ եղած հրատարակութիւնները կ’ուղարկեն։ Մասնաճիւղին ամէն գործունէութիւնը կը նպաստէ, որ քարոզչութիւնը կարգապահ կերպով կատարուի (Ա. Կորնթացիս 14։33, 40)։

• Մասնաճիւղի յանձնախումբը ինչպէ՞ս Կառավարիչ մարմինին կ’օգնէ։

• Մասնաճիւղը ի՞նչ պատասխանատուութիւններու հոգ կը տանի։

Որպէսզի մեր ամէն կարելին ընենք «աւետիսը» յայտարարելու «բոլոր ազգերուն ու ցեղերուն եւ լեզուներուն ու ժողովուրդներուն», շուրջ 750 լեզուներով հրատարակութիւններ կ’արտադրենք (Յայտնութիւն 14։6)։ Այս խրթին աշխատանքը ինչպէ՞ս կը կատարենք։ Միջազգային գրական անձնակազմի եւ խումբ մը նախանձախնդիր թարգմանիչներու օգնութեամբ,– բոլո՛րը Եհովայի վկաներ։

Բնագիրը անգլերէն լեզուով կը պատրաստուի։ Գլխաւոր կեդրոնատեղիին մէջ, Կառավարիչ մարմինը կը վերահսկէ Գրական բաժանմունքին գործունէութեան վրայ։ Այս բաժանմունքը կը համակարգէ գրողներուն նշանակումները, որոնք կեդրոնատեղիին եւ որոշ մասնաճիւղերու մէջ կը ծառայեն։ Այլազան գրողներ ունենալը թոյլ կու տայ, որ բազմաթիւ մշակոյթներ հետաքրքրող նիւթեր պատրաստենք, ինչ որ մեր հրատարակութիւնները միջազգային գետնի վրայ հրապուրիչ կը դարձնէ։

Բնագիրը կը ղրկուի թարգմանիչներուն։ Գրուած նիւթը մշակուելէ եւ հաւանութիւն ստանալէ ետք, ելեկտրոնային ձեւով կ’ուղարկուի աշխարհի տարածքին գտնուող թարգմանչական խումբերուն, որոնք բնագիրը կը թարգմանեն եւ իրենց թարգմանութիւնը կը ստուգեն ու կը սրբագրեն։ Անոնք կը ջանան ընտրել ճշգրիտ բառեր, որոնք անգլերէնին լման իմաստը կը հաղորդեն (Ժողովող 12։10)։

Համակարգիչները գործընթացը կ’արագացնեն։ Համակարգիչը չի կրնար գրողներն ու թարգմանիչները փոխարինել։ Սակայն, անոնց աշխատանքը կրնայ աւելի արագ ըլլալ, գործածելով համակարգչային բառարաններ, լեզուական ծրագիրներ եւ հետազօտութեան միջոցներ։ Եհովայի վկաները ծրագրեցին «Բազմալեզու ելեկտրոնային հրատարակութեան դրութիւն»ը (MEPS), որուն միջոցաւ համակարգիչին մէջ տեղեկութիւնները հարիւրաւոր լեզուներով կը մտցուին, ընկերակցող պատկերները կը կցուին եւ էջադրումը կը կատարուի, առ ի պատրաստութիւն տպագրութեան։

Ինչո՞ւ այսքան ջանք կը թափենք, նոյնիսկ քանի մը հազար մարդոց կողմէ խօսուած լեզուներու համար։ Քանի որ Եհովայի կա՛մքն է, որ «ամէն տեսակ մարդիկ ճշմարտութեան մասին ճշգրիտ գիտելիքներ ստանան եւ փրկուին» (Ա. Տիմոթէոս 2։​3, 4, ՆԱ)։

• Մեր հրատարակութիւնները ինչպէ՞ս կը գրուին։

• Ինչո՞ւ մեր հրատարակութիւնները բազմաթիւ լեզուներու կը թարգմանենք։

Ամէն տարի, մեր կազմակերպութիւնը կը հրատարակէ եւ անվճար կը բաշխէ հարիւր միլիոնաւոր Աստուածաշունչեր եւ այլ հրատարակութիւններ։ Թագաւորութեան սրահներ եւ մասնաճիւղեր կը կառուցանենք ու կը նորոգենք։ Հազարաւոր բեթէլականներու եւ միսիոնարներու նիւթապէս կ’օգնենք, եւ աղէտներու ժամանակ օժանդակութիւն կը հայթայթենք։ Ուստի, թերեւս հարց տաս. ‘Այս ամէնը ինչպէ՞ս կը ֆինանսաւորուի’։

Մենք տասանորդ կամ տուրք չենք պահանջեր, ոչ ալ հանգանակութիւն կը կատարենք։ Թէեւ մեր աւետարանչական աշխատանքին թիկունք կանգնելու ծախսերը շատ են, սակայն գումարներ չենք հաւաքեր։ Աւելի քան մէկ դար առաջ, Դիտարան–⁠ի երկրորդ թիւը նշեց, թէ մենք կը հաւատանք որ մեզի զօրավիգ կանգնողը Եհովան է եւ «բնա՛ւ մարդոցմէ նիւթական օգնութիւն պիտի չխնդրենք կամ չաղաչենք»,– եւ պարագան միշտ այդպէս եղած է (Մատթէոս 10։8)։

Մեր գործունէութիւնները յօժարակամ նուիրատուութիւններով կ’օժանդակուին։ Բազմաթիւ մարդիկ Աստուածաշունչի մեր կրթական գործունէութիւնը կը գնահատեն եւ անոր ի նպաստ նուիրատուութիւններ կ’ընեն։ Վկաները ուրախութեամբ իրենց ժամանակը, կորովը, դրամը եւ ուրիշ միջոցներ կը տրամադրեն, ամբողջ երկրագունդի տարածքին Աստուծոյ կամքը կատարելու համար (Ա. Մնացորդաց 29։9)։ Թագաւորութեան սրահին եւ մեր համաժողովներուն մէջ նուիրատուութեան տուփեր կան, որոնց մէջ նուիրատուութիւններ կը դնեն անոնք՝ որոնք կը փափաքին։ Անոնք նաեւ կրնան նուիատուութիւններ ընել jw.org կայքին միջոցաւ։ Մեծաւ մասամբ, նուիրատուութիւններ ընողները համեստ ապրուստ ունին, Յիսուսի գոված տնանկ այրիին նման, որ տաճարի գանձանակը երկու լումայ ձգեց (Ղուկաս 21։​1-4)։ Արդ, ոեւէ անձ կրնայ կանոնաւորաբար բան մը ‘իր քով դիզել’, որպէսզի տայ «ինչպէս իր սրտովը կը յօժարի» (Ա. Կորնթացիս 16։2. Բ. Կորնթացիս 9։7)։

Համոզուած ենք թէ Եհովան պիտի շարունակէ այն անհատներուն սրտերը մղել, որոնք Թագաւորութեան գործին թիկունք կանգնելով կ’ուզեն ‘զինք պատուել իրենց ստացուածքներով’, որպէսզի Իր կամքը կատարուի (Առակաց 3։9)։

• Ի՞նչ բան մեր կազմակերպութիւնը ուրիշ կրօնքներէ տարբեր կը դարձնէ։

• Կամաւոր նուիրատուութիւնները ինչպէ՞ս կը գործածուին։

Ինչպէս որ «Թագաւորութեան սրահ» անուանումը ցոյց կու տայ, հոն քննարկուող գլխաւոր աստուածաշնչական ուսուցումը կը կեդրոնանայ Աստուծոյ Թագաւորութեան վրայ,– Յիսուսի ծառայութեան բնաբանը (Ղուկաս 8։1)։

Ճշմարիտ պաշտամունքի կեդրոններ են։ Այդ վայրէն Թագաւորութեան բարի լուրի քարոզչութիւնը կը կազմակերպուի (Մատթէոս 24։14)։ Թագաւորութեան սրահները զանազան չափեր եւ կառուցուածքներ ունին, բայց բոլորն ալ համեստ են, եւ շատերը կը գործածուին մէկէ աւելի ժողովքներու կողմէ։ Վերջերս, տասնեակ հազարաւոր Թագաւորութեան սրահներ կառուցանած ենք (միջին հաշուով՝ ամէն օր հինգ սրահ), որպէսզի հրատարակիչներու եւ ժողովքներու յաւելման հետ քայլ պահենք։ Ասիկա ինչպէ՞ս կարելի է (Մատթէոս 19։26)։

Կեդրոնական հիմնադրամի մը համար եղած նուիրատուութիւններով կը կառուցանուին։ Այս նուիրատուութիւնները կ’ուղարկուին մասնաճիւղ, որպէսզի գումարը մատչելի դառնայ այն ժողովքներուն, որոնք Թագաւորութեան սրահ մը պիտի կառուցանեն կամ նորոգեն։

Ամէն ենթահողէ եկող եւ առանց վարձքի աշխատող կամաւորներու կողմէ կը կառուցանուին։ Բազմաթիւ երկիրներու մէջ, Թագաւորութեան սրահի շինարարութեան խումբեր կազմակերպուած են։ Շինարարութեան ծառաներու եւ կամաւորներու խումբեր մէկ ժողովքէ միւսը կը փոխադրուին նոյն երկրին մէջ,– նոյնիսկ ամայի շրջաններ,– որպէսզի օգնեն անոնց սրահները կառուցանելու։ Ուրիշ երկիրներու մէջ, որակեալ Վկաներ նշանակուած են, որպէսզի որոշ շրջանի մը մէջ Թագաւորութեան սրահներ կառուցանելու եւ նորոգելու աշխատանքին վրայ վերահսկեն։ Թէեւ տեղացի հմուտ արհեստաւորներ կամաւորաբար շինարարութեան աշխատանքին մէջ բաժին կը բերեն, սակայն իւրաքանչիւր շինարարութեան վայրի մէջ, ժողովքի անդամները կամաւորներուն մեծամասնութիւնը կը կազմեն։ Եհովայի հոգին եւ իր ժողովուրդին բոլորանուէր ջանքերը այս ամէնը կարելի կը դարձնեն (Սաղմոս 127։1. Կողոսացիս 3։23)։

• Մեր պաշտամունքի վայրը ինչո՞ւ «Թագաւորութեան սրահ» կը կոչուի։

• Ինչպէ՞ս կարելի է աշխարհի տարածքին Թագաւորութեան սրահներ կառուցանել։

Եհովայի վկաներու իւրաքանչիւր Թագաւորութեան սրահ Աստուծոյ սուրբ անունը կը կրէ։ Հետեւաբար կը զգանք թէ սրահը մաքուր, ներկայանալի եւ նորոգուած վիճակի մէջ պահելը առանձնաշնորհում մըն է եւ մեր սրբազան պաշտամունքին՝ կարեւոր մէկ մասը։ Բոլո՛րն ալ կրնան բաժին բերել։

Ժողովէն ետք կամաւորաբար մաքրութեան մասնակցէ։ Իւրաքանչիւր ժողովէ ետք, եղբայրներն ու քոյրերը ուրախութեամբ թեթեւ մաքրութիւն կ’ընեն, Թագաւորութեան սրահը կոկիկ դարձնելու համար։ Շաբաթը անգամ մը, աւելի ընդարձակ մաքրութիւն կը կատարուի։ Երէց մը կամ օգնական ծառայ մը աշխատանքը կը համակարգէ, սովորաբար՝ ընելիք բաներու ստուգացանկի մը հետեւելով։ Կարիքին համաձայն, կամաւորները գետինը կ’աւլեն, կը սրբեն, փոշեծծիչով փոշիները կ’առնեն, աթոռները կը շտկեն, լուացարանները կը մաքրեն ու կը հականեխեն, պատուհաններն ու հայելիները կը սրբեն, աղբերը կը թափեն եւ սրահին մուտքը կը մաքրեն։ Առնուազն տարին անգամ մը, օր մը կը յատկացուի ընդհանուր մաքրութեան համար։ Կարգ մը պարտականութիւններու մէջ մեր զաւակները պարփակելով, անոնց կը սորվեցնենք մեր պաշտամունքի վայրը յարգել (Ժողովող 5։1)։

Հարկ եղած նորոգութիւնները ընելու համար ձեռք տուր։ Ամէն տարի, Թագաւորութեան սրահը ներսէն ու դուրսէն կը զննուի. արդիւնքին հիման վրայ նորոգութեան աշխատանքներ կը տարուին, սրահը լաւ վիճակի մէջ պահելու եւ անհարկի ծախսերէ խուսափելու համար (Բ. Մնացորդաց 24։13. 34։10)։ Մաքուր եւ լաւ վիճակի մէջ պահուած Թագաւորութեան սրահը, Աստուած պաշտելու պատշաճ վայր է։ Այս աշխատանքին մէջ բաժին բերելով, ցոյց կու տանք թէ որքա՜ն կը սիրենք Եհովան եւ կ’արժեւորենք մեր պաշտամունքի վայրը (Սաղմոս 122։1)։ Ասիկա նաեւ համայնքին մէջ նպաստաւոր տպաւորութիւն կը ստեղծէ (Բ. Կորնթացիս 6։3)։

• Մեր պաշտամունքի վայրը ինչո՞ւ պէտք չէ անտեսենք։

• Ի՞նչ կարգադրութիւններ Թագաւորութեան սրահը մաքուր կը պահեն։

Կը փափաքի՞ս փնտռտուքներ ընել, Աստուածաշունչի մասին գիտութիւնդ աւելցնելու համար։ Արդեօք մասնայատուկ համար մը կամ Աստուածաշունչին մէջ նշուած անհատ մը, վայր մը կամ բան մը հետաքրքրութիւնդ շարժա՞ծ է։ Կամ, հարց տուա՞ծ ես թէ արդեօք Աստուծոյ Խօսքը կրնա՛յ քեզի օգնել՝ անձնական մտահոգութեան մը շուրջ ցուցմունքներ տալով։ Ուրեմն, Թագաւորութեան սրահի գրադարանը գործածէ։

Փնտռտուքի օգտակար միջոցներ կը հայթայթէ։ Հաւանաբար չունիս Եհովայի վկաներու բոլոր աստուածաշնչական հրատարակութիւնները, որոնք քու լեզուովդ մատչելի են։ Սակայն, Թագաւորութեան սրահի գրադարանը վերջին հրատարակութիւններուն մեծամասնութիւնը կը պարունակէ։ Անիկա նաեւ կրնայ ունենալ Աստուածաշունչի տարբեր թարգմանութիւններ, գործնական բառարան եւ այլ օգտակար աշխատասիրութիւններ։ Ժողովներէն առաջ եւ վերջ, գրադարանը գործածելու ազատ ես։ Եթէ համակարգիչ մը մատչելի է, թերեւս Դիտարանի գրադարան–⁠ը տեղադրուած ըլլայ։ Ատիկա ելեկտրոնային ծրագիր մըն է, որ մեր հրատարակութիւններուն մեծ մասը կը բովանդակէ եւ դիւրաւ գործածուելիք որոնումի միջոց ունի, որով կրնաս նիւթ մը, բառ մը կամ համար մը փնտռել։

«Կեանք եւ ծառայութիւն» ժողովի աշակերտներուն համար գործնական է։ Եթէ այս դպրոցին մէջ արձանագրուած ես, կրնաս Թագաւորութեան սրահի գրադարանը օգտագործել, երբ ելոյթներդ կը պատրաստես։ «Կեանք եւ ծառայութիւն» ժողովի տեսուչը գրադարանին պատասխանատուն է։ Ան հոգ կը տանի որ նոր հրատարակութիւնները մատչելի ըլլան եւ ամէն բան լաւ դասաւորուած ըլլայ։ Ան կամ Աստուածաշունչի ուսուցիչդ կրնայ քեզի ցոյց տալ ինչպէ՛ս հարկ եղած տեղեկութիւնները գտնել։ Սակայն, որեւէ գիրք Թագաւորութեան սրահէն դուրս պէտք չէ հանուի։ Եւ անշուշտ, գիրքերը ուշադրութեամբ պէտք է գործածել եւ անոնց մէջ ո՛չ մէկ բան գրել։

Աստուածաշունչը կը բացատրէ, թէ «Աստուծոյ գիտութիւնը» գտնելու համար, պէտք է զայն «ծածուկ գանձերու պէս» փնտռենք (Առակաց 2։​1-5)։ Թագաւորութեան սրահի գրադարանը կրնայ քեզի օգնել որ որոնումդ սկսիս։

• Թագաւորութեան սրահի գրադարանին մէջ փնտռտուքի ի՞նչ միջոցներ մատչելի են։

• Որո՞նք կրնան քեզի օգնել որ գրադարանէն լիովին օգտուիս։

Յիսուս Քրիստոս իր հետեւորդներուն ըսաւ. «Թող լուսաւորուի ձեր լոյսը մարդոց առջեւ, որ տեսնեն ձեր բարի գործերը ու փառաւորեն ձեր Հայրը որ երկինքն է» (Մատթէոս 5։16)։ Ասիկա իրագործելու համար, կ’օգտագործենք արդի արուեստագիտութիւնը, ներառեալ՝ համացանցը։ Մեր կայքը՝ jw.org, Եհովայի վկաներու հաւատալիքներուն եւ գործունէութիւններուն մասին պաշտօնական աղբիւրն է։ Ատիկա ի՞նչ կ’ընդգրկէ։

Սովորաբար ուղղուած հարցումներու Աստուածաշունչի պատասխանը։ Մարդոց ուղղած ամէնէն կարեւոր կարգ մը հարցումներուն պատասխանները կրնաս գտնել։ Օրինակ, Տառապանքը երբեք վերջ պիտի գտնէ՞ եւ Իրապէս կարելի՞ է որ մեռելները դարձեալ ապրին թերթիկները առցանց մատչելի են աւելի քան 600 լեզուներով։ Կրնաս նաեւ գտնել Նոր աշխարհի թարգմանութիւն–⁠ը աւելի քան 130 լեզուներով եւ Աստուածաշունչը սերտելու նպաստող հրատարակութիւններ, ներառեալ՝ Աստուածաշունչը իրապէս ի՞նչ կը սորվեցնէ գիրքը եւ Դիտարան–⁠ի ու Զարթի՛ր–⁠ի ընթացիկ թիւերը։ Այս հրատարակութիւններէն շատերը կրնաս առցանց կարդալ կամ մտիկ ընել, եւ կամ բեռնել տարբեր ձեւաչափերով, ինչպէս՝ MP3, PDF կամ EPUB։ Կրնաս նոյնիսկ հետաքրքրուած անհատի մը լեզուով քանի մը էջ տպել ու տեղեկութիւնները անոր հետ բաժնել։ Նշանային լեզուներով որպէս տեսաերիզ պատրաստուած հրատարակութիւններ մատչելի են։ Կրնաս բեռնել ու ազատ պահերուդ մտիկ ընել Աստուածաշունչի թատերական ընթերցանութիւններ, աստուածաշնչական թատերախաղեր եւ հաճելի երաժշտութիւն։

Եհովայի վկաներուն մասին ընթացիկ տեղեկութիւններ։ Նաեւ, կայքը կը ներկայացնէ մեր համաշխարհային գործին մասին վերջին լուրեր ու տեսաերիզներ, Եհովայի վկաներուն ազդող միջադէպեր եւ աղէտահարներու օժանդակութիւն հասցնելու մեր աշխատանքները։ Կրնաս գալիք համաժողովներուն մասին տեղեկանալ եւ մեր մասնաճիւղերուն հասցէները տեսնել։

Այս միջոցներով, ճշմարտութեան լոյսը կը սփռենք մինչեւ երկրագունդին ծայրերը։ Բոլոր ցամաքամասերուն մէջ, նո՛յնիսկ Անթարքթիքայի մէջ, մարդիկ կ’օգտուին։ Կ’աղօթենք որ «Տէրոջը խօսքը յառաջանայ» մինչեւ երկրին չորս կողմը, ի փառս Աստուծոյ (Բ. Թեսաղոնիկեցիս 3։1)։

• Ինչպէ՞ս jw.org կայքը բազմաթիւ մարդոց կ’օգնէ աստուածաշնչական ճշմարտութիւնը սորվելու։

• Մեր կայքին վրայ ի՞նչ բան կը փափաքիս հետազօտել։