Շատեր կրօնական ծառայութիւններու ներկայ գտնուելէ դադրած են, քանի որ հոգեւոր առաջնորդութիւն կամ մխիթարութիւն չեն գտներ։ Ուստի, ինչո՞ւ պէտք է ներկայ գտնուիս այն քրիստոնէական ժողովներուն, որոնք Եհովայի վկաները կը կազմակերպեն։ Հոն ի՞նչ պիտի գտնես։

Սիրառատ եւ հոգատար մարդոց մէջ ըլլալու ուրախութիւնը։ Առաջին դարուն, քրիստոնեաները ժողովքներ կազմակերպեցին եւ ժողովներ գումարեցին Աստուած պաշտելու, Սուրբ Գրութիւնները ուսումնասիրելու եւ մէկզմէկ քաջալերելու համար (Եբրայեցիս 10։24, 25)։ Սիրալիր մթնոլորտի մէջ մէկտեղ հաւաքուելով, անոնք զգացին թէ շրջապատուած էին իսկական բարեկամներով,– իրենց հոգեւոր եղբայրները (Բ. Թեսաղոնիկեցիս 1։3. Գ. Յովհաննէս 14, 15)։ Մենք անոնց օրինակին կը հետեւինք եւ համանման ուրախութիւն կը վայելենք։

Աստուածաշունչի սկզբունքները ինչպէ՛ս կիրարկել սորվելու օգուտը։ Ինչպէս որ էր պարագան Աստուածաշունչի ժամանակներուն, տղամարդիկ, կիներ եւ երեխաներ մէկտեղ կը հաւաքուին։ Որակեալ ուսուցիչներ Աստուածաշունչը կը գործածեն մեզի օգնելու, որ սորվինք ինչպէ՛ս ատոր սկզբունքները մեր առօրեայ կեանքին մէջ կիրարկել (Բ. Օրինաց 31։12. Նէեմիա 8։8)։ Բոլո՛րը կրնան քննարկութիւններուն եւ երգեցողութեան մասնակցիլ, եւ այսպէս կրնանք մեր քրիստոնէական յոյսը արտայայտել (Եբրայեցիս 10։23)։

Աստուծոյ հանդէպ հաւատքդ զօրացնելու օրհնութիւնը։ Պօղոս առաքեալ իր օրուան ժողովքներէն մէկուն գրեց. «Կը փափաքիմ ձեզ տեսնել, որ. . . ձեզի հետ ես ալ մխիթարուիմ իմ ու ձեր փոխադարձ հաւատքին միջոցով» (Հռովմայեցիս 1։11, 12)։ Ժողովներու մէջ, կանոնաւորապէս մեր հաւատակիցներուն հետ հաղորդակցիլը կը զօրացնէ մեր հաւատքը եւ քրիստոնէավայել կեանք վարելու մեր վճռականութիւնը։

Ինչո՞ւ չընդունիս մեր յաջորդ ժողովքային հանդիպումին ներկայ գտնուելու հրաւէրը, եւ հոս նշուած բաները անձամբ վայելես։ Դուն ջերմօրէն պիտի ընդունուիս։ Մուտքը ազատ է,– որեւէ հանգանակութիւն չի կատարուիր։

• Մեր ժողովքային հանդիպումները ո՞ր օրինակին կը հետեւին։

• Քրիստոնէական ժողովներու ներկայ գտնուիլը ինչպէ՞ս մեզի կ’օգտէ։

Նոյնիսկ եթէ ստիպուած ենք խիտ անտառի մը մէջէն քալել կամ օդը աննպաստ է, կանոնաւորապէս մեր ժողովներուն ներկայ կը գտնուինք։ Հակառակ կեանքի մարտահրաւէրներուն եւ աշխատանքի յոգնութեան, Եհովայի վկաները ինչո՞ւ այսպիսի ջանք կը թափեն իրենց հաւատակիցներուն հետ ընկերակցելու համար։

Մեր բարօրութեան համար լաւ է։ Խօսելով անոնց մասին՝ որոնց հետ ժողովքէն ներս կ’ընկերակցինք, Պօղոս առաքեալ գրեց. ‘Իրարու հոգ տարէք’ (Եբրայեցիս 10։24)։ Այս արտայայտութիւնը կը նշանակէ «ուշադրութեամբ մտածել», այսինքն՝ զիրար ճանչնալ։ Ուստի, առաքեալին խօսքերը մեզ կը քաջալերեն, որ ուրիշներով հետաքրքրուինք։ Ուրիշ քրիստոնէական ընտանիքներ ճանչնալով, կը նկատենք թէ ոմանք մեր դիմագրաւած համանման մարտահրաւէրներու հետ գլուխ ելած են եւ կրնան մեզի օգնել որ մենք ալ յաջողինք։

Մնայուն բարեկամութիւններ կը հաստատէ։ Մեր ժողովներուն մէջ, մէկտեղ կը հաւաքուինք ոչ թէ ծանօթներու հետ, այլ՝ սերտ բարեկամներու խումբի մը հետ։ Ուրիշ առիթներով, միասնաբար թարմացուցիչ զբօսանք կը վայելենք։ Այսպիսի ընկերակցութիւններ ի՞նչ օգտակար ազդեցութիւն ունին։ Կը սորվինք մէկզմէկ աւելի գնահատել, ինչ որ մեր սիրոյ կապերը կ’ամրացնէ։ Ապա, երբ մեր եղբայրներն ու քոյրերը խնդիրներ դիմագրաւեն, յօժարութեամբ անոնց կ’օգնենք, քանի որ զօրաւոր բարեկամութիւններ հաստատուած են (Առակաց 17։17)։ Մեր ժողովքի բոլո՛ր անդամներուն հետ ընկերակցելով, ցոյց կու տանք թէ ‘միեւնոյն խնամքը ունինք իրարու վրայ’ (Ա. Կորնթացիս 12։25, 26)։

Կը քաջալերենք քեզ որ որպէս բարեկամ ընտրես Աստուծոյ կամքը ընողները։ Այսպիսի բարեկամներ Եհովայի վկաներուն մէջ պիտի գտնես։ Թոյլ մի՛ տար որեւէ բանի որ քեզ ետ պահէ մեզի հետ ընկերակցելէ։

• Ինչո՞ւ մեզի օգտակար է ժողովներուն մէջ իրարու հետ ընկերակցիլ։

• Ե՞րբ կը փափաքիս մեր ժողովքին ծանօթանալ։

Նախկին քրիստոնէական ժողովներուն գլխաւորաբար մաս կը կազմէին երգեցողութիւնները, աղօթքները եւ Սուրբ Գրութիւնները կարդալն ու քննարկելը,– առանց որեւէ ծէսի (Ա. Կորնթացիս 14։26)։ Շատ նման բան մը կրնաս ակնկալել մեր ժողովներուն մէջ։

Ցուցմունքները Աստուածաշունչին վրայ հիմնուած են եւ գործնական են։ Շաբաթավերջին, իւրաքանչիւր ժողովք կը հաւաքուի ունկնդրելու համար 30 վայրկեան տեւող աստուածաշնչական դասախօսութիւն մը, որ ցոյց կու տայ թէ ինչպէ՛ս Սուրբ Գրութիւնները կապ ունին մեր կեանքին եւ մեր ապրած ժամանակներուն հետ։ Բոլորիս քաջալերութիւն կը տրուի, որ մեր անձնական Աստուածաշունչը բանանք ու հետեւինք։ Դասախօսութենէն ետք, ունինք մէկ ժամ տեւող «Դիտարան»–⁠ի ուսումնասիրութիւն, ուր ներկաները Դիտարան–⁠ի ուսումնասիրական հրատարակութեան մէկ յօդուածին քննարկութեան կը մասնակցին։ Այս քննարկութիւնը մեզի կ’օգնէ Աստուածաշունչի ուղղութիւնը կիրարկելու մեր կեանքին մէջ։ Աշխարհի տարածքին աւելի քան 110,000 ժողովքներէն իւրաքանչիւրը նոյն նիւթը կ’ուսումնասիրէ։

Օգնութիւն կը ստանանք մեր սորվեցնելու հմտութիւնները բարելաւելու։ Նաեւ, միջշաբաթային երեկոյ մը մէկտեղ կը հաւաքուինք, վայելելու համար երեք մասերէ բաղկացած յայտագիր մը՝ Քրիստոնեային կեանքն ու ծառայութիւնը, որ հիմնուած է՝ այդ անունով ամէն ամիս լոյս տեսնող ժողովի տետր–ին նիւթերուն վրայ։ Այս ժողովին առաջին մասը՝ Աստուծոյ Խօսքէն գանձեր, մեզի կ’օգնէ որ ընտելանանք Աստուածաշունչի հատուածի մը, որ ժողովքը կանխաւ կարդացած կ’ըլլայ։ Յետոյ, Դաշտի ծառայութեան մէջ ժրաջան եղիր մասը կը պարփակէ ցուցադրութիւններ, թէ ինչպէ՛ս կրնանք ուրիշներուն հետ Աստուածաշունչէն խօսիլ։ Խրատատու մը դիտողութիւններ կու տայ, որպէսզի կարդալու եւ խօսելու մեր հմտութիւնները զարգացնենք (Ա. Տիմոթէոս 4։13)։ Իսկ վերջին մասին՝ Քրիստոնէավայել ապրելակերպ–ին մէջ, կը սորվինք թէ ինչպէ՛ս կրնանք աստուածաշնչական սկզբունքները մեր առօրեայ կեանքին մէջ կիրարկել։ Ասիկա կը պարփակէ հարց–պատասխանով քննարկութիւններ, որոնք Աստուածաշունչի մեր հասկացողութիւնը կը խորացնեն։

Երբ մեր ժողովներուն ներկայ գտնուիս, տրուած աստուածաշնչական դաստիարակութեան որակով անկասկած պիտի տպաւորուիս (Եսայի 54։13)։

• Եհովայի վկաներու ժողովներուն մէջ ի՞նչ կրնաս ակնկալել լսել։

• Մեր ո՞ր ժողովին կը փափաքիս ներկայ գտնուիլ։

Այս գրքոյկին նկարներուն մէջ նշմարեցի՞ր թէ ինչպէ՛ս Եհովայի վկաները իրենց ժողովքային հանդիպումներուն համար պատշաճօրէն հագուած են։ Ինչո՞ւ մեր հագուելակերպին եւ յարդարանքին այսպիսի ուշադրութիւն կ’ընծայենք։

Որպէսզի մեր Աստուծոյն հանդէպ յարգանք ցուցաբերենք։ Ճիշդ է որ Աստուած մեր արտաքին երեւոյթէն անդին կը նայի (Ա. Թագաւորաց 16։7)։ Բայց երբ կը հաւաքուինք զինք պաշտելու համար, մեր սրտագին փափաքն է՝ թէ՛ իրեն եւ թէ մեր հաւատակիցներուն հանդէպ յարգանք ցուցաբերել։ Եթէ դատարանի մէջ դատախազի մը առջեւ պիտի կայնէինք, հաւանաբար պիտի ուզէինք մեր երեւոյթին ուշադրութիւն ընծայել՝ առ ի յարգանք անոր դիրքին։ Նմանապէս, ժողովներուն մէջ մեր դրսերեւոյթը ցոյց կու տայ մեր յարգանքը «բոլոր երկրի Դատաւոր»ին՝ Եհովա Աստուծոյ՝ եւ այն վայրին, որուն մէջ զինք կը պաշտենք (Ծննդոց 18։25)։

Որպէսզի արտացոլենք այն արժանիքները՝ որոնց համաձայն կ’ապրինք։ Աստուածաշունչը կը քաջալերէ քրիստոնեաները, որ «ամօթխածութեամբ եւ պարկեշտութեամբ» հագուին (Ա. Տիմոթէոս 2։9, 10)։ «Ամօթխածութեամբ» հագուիլ կը նշանակէ խուսափիլ այն հագուստներէն, որոնք ցուցամոլական, գրգռիչ կամ մարմինը ցուցադրող ըլլալով՝ ուշադրութիւն կը հրաւիրեն մեր վրայ։ Նաեւ, «պարկեշտութիւն»ը մեզի կ’օգնէ ընտրելու գրաւիչ հագուստներ, որոնք ո՛չ թափթփած են, ոչ ալ ծայրայեղ են։ Այս սկզբունքները տակաւին տեղ կը ձգեն անհատական բազմաթիւ ընտրութիւններու։ Առանց բառ մը արտասանելու, մեր գրաւիչ եւ ճաշակաւոր դրսերեւոյթը կրնայ ‘մեր Փրկիչ Աստուծոյ վարդապետութիւնը զարդարել’ ե՛ւ ‘Աստուած փառաւորել’ (Տիտոս 2։10. Ա. Պետրոս 2։12)։ Այսպէս ժողովներուն մէջ վայելչազգեստ ըլլալով՝ կ’ազդենք մարդոց տեսակէտին, թէ ինչպէ՛ս կը նկատեն Եհովայի պաշտամունքը։

Նոյնիսկ եթէ պաշտօնական հագուստ չունիս, կրնա՛ս Թագաւորութեան սրահին մէջ ժողովներուն ներկայ գտնուիլ։ Կրնանք պատշաճ, մաքուր ու ներկայանալի հագուստներ հագուիլ, առանց սուղ կամ նորաձեւ հագուստներ ունենալու։

• Որքա՞ն կարեւոր է մեր հագուելակերպը, երբ Աստուած կը պաշտենք։

• Ո՞ր սկզբունքներուն համաձայն կ’ընտրենք մեր հագուելակերպն ու յարդարանքը։

Եթէ Աստուածաշունչը կ’ուսումնասիրես Եհովայի վկայի մը հետ, հաւանաբար կը ջանաս ուսումնասիրուելիք նիւթը նախապէս աչքէ անցընել։ Մեծագոյն օգուտը քաղելու համար, լաւ է որ նոյնը ընես ժողովի մը ներկայ գտնուելէ առաջ։ Լաւագոյն արդիւնքը ձեռք կը ձգենք, երբ լաւ սովորամոլութիւն հաստատենք։

Որոշէ ե՛րբ եւ ո՛ւր ուսումնասիրել։ Ե՞րբ կրնաս մեծապէս կեդրոնանալ։ Արդեօք առաւօտո՞ւն՝ օրուան աշխատանքը սկսելէ առաջ, թէ ոչ գիշերը՝ զաւակները քնանալէ ետք։ Նոյնիսկ եթէ չես կրնար երկա՜ր ատեն ուսումնասիրել, որոշէ որքա՛ն ժամանակ կրնաս տրամադրել, եւ փորձէ թոյլ չտալ որեւէ բանի որ յայտագիրդ խանգարէ։ Հանդարտ վայր մը ընտրէ եւ շեղում պատճառող բոլոր բաները հեռացուր, մարելով՝ ձայնասփիւռը, հեռատեսիլը եւ հեռախօսիկը։ Ուսումնասիրելէ առաջ աղօթելը քեզի պիտի օգնէ, որ օրուան մտահոգութիւնները մէկ կողմ դնելով՝ Աստուծոյ Խօսքին վրայ կարենաս կեդրոնանալ (Փիլիպպեցիս 4։6, 7)։

Ընդգծէ նիւթին գլխաւոր գաղափարները եւ պատրաստէ մեկնաբանութիւններ։ Նախ՝ նիւթին մասին ընդհանուր գաղափար մը առ։ Յօդուածին կամ գլուխին խորագրին մասին մտածէ՛, նկատի առ թէ ինչպէ՛ս իւրաքանչիւր ենթավերնագիր կապ ունի այդ բնաբանին հետ, աչքէ անցուր նկարները եւ վերաքաղի հարցումները, որոնք գլխաւոր կէտերը կը շեշտեն։ Ապա, իւրաքանչիւր պարբերութիւն կարդա՛ եւ անոր հարցումին պատասխանը փնտռէ։ Նշուած համարները բաց ու կարդա՛, եւ մտածէ թէ անոնք ինչպէ՛ս նիւթին կ’աջակցին (Գործք 17։11)։ Երբ հարցումին պատասխանը գտնես, ընդգծէ՛ պարբերութեան բանալի բառերը կամ նախադասութիւնները, որոնք քեզի պիտի օգնեն պատասխանը յիշելու ժողովին ընթացքին։ Ետքը, ժողովին մէջ կրնաս ձեռքդ բարձրացնել,– եթէ կը փափաքիս,– եւ հակիրճ կերպով քու բառերովդ մեկնաբանել։

Սերտելով տարբեր նիւթեր՝ որոնք իւրաքանչիւր շաբաթ ժողովներուն կը քննարկուին, Աստուածաշունչի գիտութեան «գանձ»իդ մէջ նոր գաղափարներ պիտի դիզես (Մատթէոս 13։51, 52)։

• Ժողովներուն նախապատրաստուելու համար, ի՞նչ սովորամոլութիւն կրնաս հաստատել։

• Ինչպէ՞ս կրնաս պատրաստուիլ, ժողովին մէջ մեկնաբանութիւն մը ներկայացնելու համար։

Վաղեմի ժամանակներէն ի վեր, Եհովան ուզած է որ իւրաքանչիւր ընտանիքի անդամներ միասին ժամանակ անցընեն, իրենց հոգեւորութիւնը ամրացնելու եւ իրենց փոխյարաբերութիւնը զօրացնելու համար (Բ. Օրինաց 6։​6, 7)։ Անոր համար է որ Եհովայի վկաները ամէն շաբաթ ժամանակ կը տրամադրեն, որպէսզի ընտանիքի անդամները միասնաբար պաշտամունք մատուցանեն,– հանդարտ միջավայրի մէջ քննարկելով իրենց կարիքներուն յարմար եղող հոգեւոր նիւթեր։ Նոյնիսկ եթէ առանձին կ’ապրիս, կրնաս լաւ ժամանակ անցընել Աստուծոյ հետ, ընտրելով ուսումնասիրել աստուածաշնչական նիւթ մը՝ որ քեզ կը հետաքրքրէ։

Անիկա Եհովային աւելի՛ մօտենալու ժամանակ է։ «Աստուծոյ մօտեցէ՛ք ու անիկա ձեզի պիտի մօտենայ» (Յակոբոս 4։8)։ Եհովան աւելի լաւ կը ճանչնանք, երբ իր գրաւոր Խօսքին ընդմէջէն՝ իր անձնաւորութեան եւ արարքներուն մասին մանրամասնութիւններ կը սորվինք։ Ընտանեկան պաշտամունքը սկսելու դիւրին կերպ մըն է՝ ժամանակին մէկ մասը տրամադրել Աստուածաշունչը միասնաբար բարձրաձայն կարդալու,– թերեւս հետեւելով «Կեանք եւ ծառայութիւն» ժողովին յայտագրին։ Ընթերցանութենէն մաս մը կրնայ նշանակուիլ իւրաքանչիւր անդամի, եւ ապա բոլորը կրնան քննարկել թէ Սուրբ Գրութիւններէն ի՛նչ սորվեցան։

Անիկա իրարու աւելի՛ մօտենալու ժամանակ է։ Ամուսիններ եւ կիներ, ինչպէս նաեւ ծնողներ եւ զաւակներ, իրենց կապերը կ’ամրացնեն, երբ Աստուածաշունչը ընտանեօք կ’ուսումնասիրեն։ Անիկա պէտք է ուրախ եւ խաղաղ ժամանակ մը ըլլայ, որուն ընտանիքի անդամները ամէն շաբաթ անձկագին կը սպասեն։ Իրենց զաւակներուն տարիքին համաձայն, ծնողներ կրնան քննարկուելիք գործնական նիւթեր ընտրել, թերեւս գործածելով յօդուածներ Դիտարան–⁠էն եւ Զարթի՛ր–⁠էն կամ մեր կայքէն՝ jw.org։ Կրնաս խօսիլ խնդրի մը մասին, որ զաւակներդ դպրոցին մէջ դիմագրաւեցին, եւ բացատրել ատոր լուծումը։ Կրնաս JW Հեռատեսիլի կայանէն (tv.jw.org) դիտել յայտագիր մը եւ ապա զայն միասնաբար քննարկել։ Ժողովներուն մէջ երգեցուելիք երգերը կրնաք փորձ ընել, իսկ ընտանեկան պաշտամունքէն ետք կրնաք զանազան կերպերով թարմանալ։

Իւրաքանչիւր շաբաթ Եհովան միասնաբար պաշտելու տրամադրուած այս մասնայատուկ ժամանակը, ընտանիքի բոլոր անդամներուն պիտի օգնէ որ Աստուծոյ Խօսքէն հաճոյք առնեն, եւ ան առատապէս ձեր ջանքերը պիտի օրհնէ (Սաղմոս 1։​1-3)։

• Ինչո՞ւ ժամանակ կը տրամադրենք ընտանեկան պաշտամունքի համար։

• Ծնողները ինչպէ՞ս կրնան այս առիթը հաճոյալի դարձնել ընտանիքի բոլոր անդամներուն։

Այս մարդիկը ինչո՞ւ շատ ուրախ են։ Քանի որ մեր համաժողովներէն մէկուն մէջ են։ Աստուծոյ վաղեմի ծառաներուն նման, որոնց ցուցմունք տրուած էր որ տարին երեք անգամ համախմբուէին, մենք անձկագին կը սպասենք որ հսկայ խումբերով մէկտեղ հաւաքուինք (Բ. Օրինաց 16։16)։ Ամէն տարի երեք առիթ ունինք. երկու միօրեայ շրջանային համաժողով եւ մէկ եռօրեայ մարզային համաժողով։ Այս համաժողովներէն ինչպէ՞ս կ’օգտուինք։

Մեր քրիստոնէական եղբայրութիւնը կ’ամրացնեն։ Ճիշդ ինչպէս որ իսրայէլացիները ուրախացան Եհովան փառաբանելով «ժողովներուն մէջ», մենք եւս մասնաւոր առիթներով զինք միասնաբար պաշտելով կ’ուրախանանք (Սաղմոս 26։12. 111։1)։ Այս համախմբութիւնները պատեհութիւն կը ստեղծեն, ուրիշ ժողովքներու պատկանող կամ նո՛յնիսկ տարբեր երկիրներէ եկող Վկաներու ծանօթանալու եւ ընկերակցելու։ Կէսօրին, համաժողովի վայրին մէջ միասնաբար կը ճաշենք, այս հոգեւոր առիթներուն ընկերային մթնոլորտին նպաստելով (Գործք 2։42)։ Հոն անձամբ կը շօշափենք այն սէրը, որ աշխարհի տարածքին մեր «եղբայրութիւնը» կը միացնէ (Ա. Պետրոս 2։17)։

Մեզի կ’օգնեն հոգեւորապէս յառաջդիմելու։ Իսրայէլացիները նաեւ կ’օգտուէին՝ ‘բացատրուած խօսքերը հասկնալով’ (Նէեմիա 8։8, 12)։ Մենք ալ կը գնահատենք աստուածաշնչական ցուցմունքները, որոնք մեր համաժողովներուն մէջ կը ստանանք։ Իւրաքանչիւր յայտագիր հիմնուած է սուրբ գրային բնաբանի մը վրայ։ Հետաքրքրաշարժ դասախօսութիւններու, ելոյթաշարերու եւ խաղարկութիւններու միջոցաւ, կը սորվինք ինչպէ՛ս Աստուծոյ կամքը ընել մեր կեանքին մէջ։ Կը քաջալերուինք լսելով անոնց փորձառութիւնները, որոնք այս դժուար ժամանակներուն մէջ քրիստոնէավայել կեանք վարելու մարտահրաւէրին հետ գլուխ կ’ելլեն։ Մարզային համաժողովներու մէջ, թատերախաղերը Աստուածաշունչի պատմութիւնները կեանքի կը բերեն եւ մեզի գործնական դասեր կը սորվեցնեն։ Իւրաքանչիւր համաժողովի մէջ, կը մկրտուին անոնք՝ որոնք կ’ուզեն Աստուծոյ իրենց ըրած նուիրումը խորհրդանշել։

• Համաժողովները ինչո՞ւ ուրախ առիթներ են։

• Համաժողովի մը ներկայ գտնուելով ինչպէ՞ս կրնաս օգտուիլ։

Իր մահէն քիչ առաջ, Յիսուս յայտարարեց. «Արքայութեան այս աւետարանը բովանդակ աշխարհի մէջ պիտի քարոզուի՝ բոլոր ազգերուն վկայութիւն ըլլալու։ Անկէ յետոյ վերջը պիտի գայ» (Մատթէոս 24։14)։ Բայց այս աշխարհածաւալ քարոզչութիւնը ինչպէ՞ս պիտի կատարուէր։ Հետեւելով Յիսուսի հանդիսացած օրինակին (Ղուկաս 8։1)։

Կը ջանանք մարդոց հետ շփման մէջ գալ՝ իրենց տուները այցելելով։ Յիսուս իր աշակերտները մարզեց, որ բարի լուրը տունէ տուն քարոզեն (Մատթէոս 10։11-13. Գործք 5։42. 20։20)։ Այդ առաջին դարու աւետարանիչներուն նշանակուեցան քարոզելու մասնայատուկ շրջաններ (Մատթէոս 10։5, 6. Բ. Կորնթացիս 10։13)։ Նմանապէս այսօր, մեր քարոզչութիւնը լաւ կազմակերպուած է, եւ իւրաքանչիւր ժողովքի նշանակուած է ծածկուելիք շրջան մը։ Ասիկա մեզ կարող կը դարձնէ, որ ‘ժողովուրդին քարոզելու ու վկայութիւն տալու’ Յիսուսի պատուէրը կատարենք (Գործք 10։42)։

Կը ջանանք մարդոց հասնիլ՝ ո՛ւր որ ալ գտնուին։ Յիսուս նաեւ օրինակ թողուց՝ հրապարակաւ մարդոց քարոզելով, ինչպէս՝ ծովեզերքը կամ ջրհորի մօտ (Մարկոս 4։1. Յովհաննէս 4։5-15)։ Մենք եւս ամէնուրեք մարդոց հետ Աստուածաշունչի մասին կը խօսինք,– փողոցը, առեւտրական շրջանները, զբօսավայրերը կամ հեռաձայնով։ Նաեւ, կը վկայենք մեր դրացիներուն, գործակիցներուն, դասընկերներուն եւ ազգականներուն, երբ յարմար պատեհութիւններ ունենանք։ Այս բոլոր ջանքերը, աշխարհի տարածքին միլիոնաւորներու կարելի դարձուցած են որ «փրկութեան բարի լուրը» լսեն (Սաղմոս 96։2, ՆԱ)։

Միտքդ կու գա՞յ անհատ մը, որուն հետ կը փափաքիս բաժնել Աստուծոյ Թագաւորութեան բարի լուրը եւ մատուցած յոյսը։ Ուրիշներու հետ զայն բաժնէ՝ կարելի եղածին չափ շուտ։

• Ի՞նչ «բարի լուր» պէտք է ծանուցանուի։

• Եհովայի վկաները Յիսուսի քարոզչութեան մեթոտը ինչպէ՞ս կ’ընդօրինակեն։

«Ռահվիրայ» բառը յաճախ կ’ակնարկէ անոնց՝ որոնք նոր շրջաններ կը հետախուզեն եւ ուրիշներուն առջեւ ճամբան կը հարթեն։ Յիսուս ձեւով մը ռահվիրայ էր, քանի որ երկիր եկաւ կենսատու ծառայութիւն մը կատարելու եւ փրկութեան ճամբան հարթելու (Մատթէոս 20։28)։ Ներկայիս, իր հետեւորդները զինք կ’ընդօրինակեն, կարելի եղածին չափ շատ ժամանակ տրամադրելով ‘աշակերտելու’ գործին (Մատթէոս 28։19, 20)։ Շատեր կրցած են մասնակցիլ այն բանին, որ կը կոչենք՝ ռահվիրայական ծառայութիւն։

Ռահվիրան լիաժամ աւետարանիչ է։ Բոլոր Եհովայի վկաները բարի լուրի քարոզիչներ են։ Բայց ոմանք իրենց կեանքը կազմակերպած են, որպէսզի իբրեւ կանոնաւոր ռահվիրաներ ծառայեն, ամէն ամիս 70 ժամ տրամադրելով քարոզչութեան։ Ասիկա ընելու համար, շատեր մասնաժամով կ’աշխատին։ Ուրիշներ ընտրուած են որպէս մասնաւոր ռահվիրաներ ծառայելու շրջաններու մէջ, ուր Թագաւորութիւնը ծանուցանողներու աւելի մեծ կարիք կայ, ամէն ամիս ծառայութեան տրամադրելով 130 ժամ կամ աւելի։ Ռահվիրաները գոհունակ են համեստ կենցաղակերպ մը վարելով, վստահ ըլլալով որ Եհովան կեանքի անհրաժեշտութիւնները իրենց պիտի հայթայթէ (Մատթէոս 6։31-33. Ա. Տիմոթէոս 6։6-8)։ Անոնք՝ որոնք չեն կրնար լիաժամ կերպով ռահվիրայութիւն ընել, կրնան օժանդակ ռահվիրաներ ըլլալ,– երբ ի վիճակի են,– ամիսը 30 կամ 50 ժամ ծառայելով։

Ռահվիրային շարժառիթն է՝ Աստուծոյ եւ մարդոց հանդէպ սէրը։ Յիսուսի նման, ներկայիս կը նշմարենք շատերու յուսահատ հոգեւոր վիճակը (Մարկոս 6։34)։ Բայց ունինք գիտելիքներ, որոնք կրնան անոնց օգնել՝ ապագային համար հաստատ յոյս մը տալով։ Ընկերին հանդէպ սէրը ռահվիրան կը մղէ, որ առատապէս իր ժամանակն ու կորովը տրամադրէ, ուրիշներուն հոգեւորապէս օգնելու համար (Մատթէոս 22։39. Ա. Թեսաղոնիկեցիս 2։8)։ Առ ի արդիւնք, ռահվիրայի՛ն հաւատքը կը զօրանայ, Աստուծոյ աւելի կը մօտենայ եւ շա՜տ ուրախութիւններ կը վայելէ (Գործք 20։35)։

• Ինչպէ՞ս կը նկարագրես ռահվիրան։

• Ի՞նչ բան շատերը կը մղէ որ ռահվիրայութեան ձեռնարկեն։

Աստուածպետական կրթութիւնը Եհովայի վկաներու առանձնայատկութիւնը եղած է։ Մասնայատուկ մարզում կը տրուի անոնց՝ որոնք Թագաւորութեան մասին լիաժամ կը քարոզեն, որպէսզի կարենան լիովին իրենց ‘պաշտօնը կատարել’ (Բ. Տիմոթէոս 4։5)։

Ռահվիրայական ծառայութեան դպրոց։ Այս դպրոցը 6 օր կը տեւէ, եւ մօտակայ Թագաւորութեան սրահի մը մէջ կրնայ կայացուիլ։ Կանոնաւոր ռահվիրան անոր կը մասնակցի, երբ լիաժամ ծառայութեան իր առաջին տարին կ’ամբողջացնէ։ Դպրոցին նպատակն է՝ ռահվիրային օգնել որ Եհովային աւելի մօտենայ, ծառայութեան բոլոր երեսակներուն մէջ աւելի հմուտ ըլլայ եւ շարունակէ հաւատարմութեամբ ծառայել։

Թագաւորութեան աւետարանիչներու դպրոց։ Այս երկամսեայ դպրոցը կը մարզէ փորձառու ռահվիրաներ, որոնք յօժար են մեկնելու որեւէ տեղ, ուր իրենց կարիք կայ։ Իրականութեան մէջ, անոնք կ’ըսեն՝ «Ահաւասիկ ես. զի՛ս ղրկէ», ընդօրինակելով երկրի վրայ ծառայած մեծագոյն Աւետարանիչը՝ Յիսուս Քրիստոս (Եսայի 6։8. Յովհաննէս 7։29)։ Օտար շրջան փոխադրուիլը կրնայ պահանջել համեստ կենսամակարդակի յարմարիլ։ Մշակոյթը, կլիման եւ ուտելիքը կրնան բոլորովին տարբեր ըլլալ։ Նաեւ, թերեւս անհրաժեշտ ըլլայ նոր լեզու մը սորվիլ։ Այս դպրոցը կ’օգնէ ամուրի եղբայրներու եւ քոյրերու ու ամոլներու,– 23-65 տարեկան,– որ մշակեն հոգեւոր յատկութիւններ, որոնց պէտք պիտի ունենան իրենց նշանակումին մէջ, եւ հմտութիւններ, որոնց շնորհիւ կրնան Եհովայի ու իր կազմակերպութեան կողմէ լիովին գործածուիլ։

Գաղաադի աստուածաշնչական դպրոց։ Եբրայերէնով «Գաղաադ» կը նշանակէ՝ «վկայութեան դէզ»։ 1943–ին Գաղաադի դպրոցը հաստատուելէ ի վեր, աւելի քան 8000 շրջանաւարտներ որպէս միսիոնար ղրկուած են վկայութիւն տալու «մինչեւ երկրին ծայրերը», եւ անոնք մեծ յաջողութիւն արձանագրած են (Գործք 13։47)։ Առաջին անգամ երբ շրջանաւարտներ հասան Փերու, հոն ո՛չ մէկ ժողովք կար. բայց այժմ աւելի քան 1000 ժողովքներ կան։ Երբ մեր միսիոնարները սկսան Ճափոնի մէջ ծառայել, Վկաներուն թիւը 10–էն պակաս էր. այժմ աւելի քան 200,000 Վկաներ կան։ Գաղաադի հինգ ամսուան դասընթացքը կը պարփակէ՝ Աստուծոյ Խօսքը մանրամասն ուսումնասիրել։ Դպրոցը կը յաճախեն անոնք, որոնք կը ծառայեն որպէս մասնաւոր ռահվիրաներ, միսիոնարներ, բեթէլականներ կամ շրջանային տեսուչներ։ Անոնք խտացուած մարզում կը ստանան, որպէսզի օգնեն համաշխարհային գործը կայունացնելու եւ զօրացնելու։

• Ռահվիրայական ծառայութեան դպրոցի նպատակը ի՞նչ է։

• Թագաւորութեան աւետարանիչներու դպրոցը որո՞նց համար պատրաստուած է։