Ինչո՞ւ ապրիլ Աստուածաշունչի չափանիշներուն համաձայն

ՍԵՌԻ նկատմամբ Աստուածաշունչի տեսակէտը հնաձեւ եւ անհարկիօրէն կաշկանդի՞չ է։ Ընդհակառա՛կը. ատիկա կ’օգնէ մեզի որ հետեւեալներէն խուսափինք՝

▪ Սեռային գետնի վրայ փոխանցուած հիւանդութիւններ

▪ Արտամուսնական յղութիւններ

▪ Քայքայուած ամուսնութիւններու ցաւալի հետեւանքներ

▪ Յանցաւոր խիղճ

▪ Անարժէք ըլլալու զգացում, որ ուրիշին գոհացումին համար օգտագործուելէն յառաջ կու գայ

Մեր Ստեղծիչը՝ Եհովա Աստուած,a կ’ուզէ որ մենք իր պարգեւները վայելենք եւ ատոնցմէ օգտուինք։ Աստուած «քեզի օգտակար եղածը կը սորվեցն[է]» (Եսայի 48։17)։ Սեռի շուրջ Աստուածաշունչի ուղեգծերուն համաձայն ապրող անհատը կ’ունենայ՝

▪ Աստուծոյ հաւանութիւնը

▪ Մտքի խաղաղութիւն

▪ Աւելի զօրաւոր ընտանեկան կապեր

▪ Լաւ համբաւ

▪ Ինքնայարգանք

Սակայն ի՞նչ կրնայ ըսուիլ, եթէ այժմ Աստուածաշունչի բարոյական չափանիշներուն համաձայն չես ապրիր։ Կարելի՞ է որ կենցաղակերպդ փոխես։ Աստուած անցեալի վարքդ քեզի դէմ պիտի գործածէ՞։

Նկատի առ հետեւեալ իրողութիւնը. առաջին դարու քրիստոնէական ժողովքը կազմող կարգ մը անհատներ, նախապէս պոռնիկներ, շնացողներ եւ միասեռականներ էին։ Անոնք ընտրեցին իրենց կենցաղակերպը փոխել, եւ Աստուած իրենց ներեց (Ա. Կորնթացիս 6։9-11)։ Ներկայիս, աշխարհի չորս կողմը հազարաւորներ համանման ընտրութիւն ըրած են։ Անոնք խառնակեաց ապրելակերպէ ձերբազատուած են, եւ Աստուածաշունչի չափանիշներուն համաձայն վարուելով օգտուած են։ Նկատի առ, զոր օրինակ, բացման յօդուածին մէջ նշուած Սառայի փորձառութիւնը։

«Շուտով հանգստութիւն գտայ»

Սառա նկատեց թէ իր սանձարձակ ապրելակերպը չբերա՛ւ այն ազատութիւնն ու գոհունակութիւնը՝ որոնց կը տենչար։ Ան կ’ըսէ. «Զգացի թէ խղճմտանքս խանձուած էր։ Կ’ամչնայի եւ մտահոգ էի որ յղանամ կամ սարսափելի հիւանդութեամբ մը բռնուիմ։ Բնա՛ւ չկորսնցուցի հաւատքս թէ Աստուած գոյութիւն ունի, եւ գիտէի թէ իմ կեանքի ընթացքս զինք վիրաւորած էր։ Անմաքուր զգացի եւ ատիկա կամաց–կամաց զիս մաշեցուց»։

Ի վերջոյ, Սառան իր ապրելակերպը փոխելու ուժը գտաւ։ Ան օգնութիւն խնդրեց իր ծնողներէն, որոնք Եհովայի վկաներ են։ Ան նաեւ տեղական ժողովքի որակեալ երէցներուն օգնութիւնը խնդրեց։ «Ուրախ անակնկալի առջեւ գտնուեցայ, երբ ծնողքիս ու ժողովքի երէցներուն ջերմութիւնն ու սէրը տեսայ», կ’ըսէ Սառա։ «Շուտով հանգստութիւն գտայ»։

Այժմ, Սառա իր երկու զաւակները կը մեծցնէ։ Ան կ’ըսէ. «Զաւակներուս բացէ ի բաց կը պատմեմ իմ ըրած ընտրութիւններուս մասին։ Կ’ուզեմ որ հասկնան թէ Աստուծոյ չափանիշները անտեսելը ինծի ազդեց։ Նպատակս է որ գնահատեն այն ֆիզիքական, մտային եւ զգացական օգուտները, որոնք սեռի նկատմամբ Աստուծոյ չափանիշներուն համաձայն ապրելէն կու գան։ Համոզուած եմ որ Աստուած մեզի բարոյական չափանիշներ կու տայ, որովհետեւ չ’ուզեր որ վնասուինք»։

Դուն եւս կրնաս Աստուծոյ սիրալիր առաջնորդութեան հետեւելուն օգուտները վայելել։ Աստուածաշունչը հետեւեալ խոստումը կու տայ. «Տէրոջը կանոնները շիտակ են, սիրտը կ’ուրախացնեն։ Տէրոջը պատուիրանքները պայծառ են, աչքերուն լոյս կու տան. . . Զանոնք պահելուն վարձքը շատ է» (Սաղմոս 19։8, 11)։b

[Ստորանիշներ]

[Մէջբերում՝ էջ 8]

Աստուածաշունչի չափանիշները անտեսողները, յաճախ զգացական ցաւ կը պատճառեն

[Մէջբերում՝ էջ 9]

Աստուածաշունչի չափանիշներուն համաձայն ապրողները, մաքուր խղճմտանք ունին եւ ընտանեկան զօրաւոր կապեր կը վայելեն