Չար հրեշտակներ կա՞ն

Այո՛, չար հրեշտակներ կան։ Անոնք ուրկէ՞ եկան։ Յիշէ թէ երբ Աստուած հրեշտակները ստեղծեց, ազատ կամք տուաւ անոնց։ Առաջին տղամարդն ու կինը՝ Ադամն ու Եւան, երկրին վրայ ստեղծուելէն քիչ ետք, կատարեալ հոգեղէն արարած մը իր ազատ կամքը սխալ կերպով գործածեց, եւ պատճառ դարձաւ որ Ադամն ու Եւան ըմբոստանան Աստուծոյ դէմ (Ծննդոց 3։1-7. Յայտնութիւն 12։9)։ Սուրբ Գիրքը չ’ըսեր թէ այս հոգեղէն արարածին անունը ի՛նչ էր կամ ի՛նչ դիրք ունէր երկինքին մէջ առաջ որ ըմբոստանար։ Բայց Սուրբ Գիրքը անոր ըմբոստութենէն ետք զինք կը կոչէ Սատանայ, որ կը նշանակէ «Հակառակորդ», եւ Բանսարկու, որ կը նշանակէ «Զրպարտիչ» (Մատթէոս 4։8-11)։

Ցաւօք սրտի, այդ ըմբոստութիւնը շարունակուեցաւ։ Նոյի օրերուն, անորոշ թիւով հրեշտակներ Աստուծոյ երկնային ընտանիքին մէջ «իրենց բնակութիւնը ձգեցին»։ Անոնք երկիր իջան եւ մարդկային մարմիններ հագան, որպէսզի անբարոյ կերպով ապրին։ Այսպիսով, անոնք շեղեցան իրենց գոյութեան նպատակէն (Յուդա 6. Ծննդոց 6։1-4. Ա. Պետրոս 3։19, 20)։

Այդ չար հրեշտակներուն ի՞նչ պատահեցաւ։ Երբ Աստուած համաշխարհային ջրհեղեղ մը բերաւ որպէսզի երկիրը մաքրէ, անոնք իրենց մարմինները լուծեցին եւ հոգեղէն վայրը վերադարձան։ Բայց Աստուած չձգեց որ անոնք իրենց առաջուան դիրքին վերադառնան։ Փոխարէն, Ան զանոնք նուաստացած վիճակի՝ հոգեւոր «խաւար»ի մէջ դրաւ, որ Տարտարոս կը կոչուի (Յուդա 6. Բ. Պետրոս 2։4)։ Այս դեւերը իրենք զիրենք դրին ‘դեւերուն իշխանին’՝ Բանսարկու Սատանային իշխանութեան տակ, որ «լուսաւոր հրեշտակի կերպարանք կ’առնէ» (Մատթէոս 12։24. Բ. Կորնթացիս 11։14)։

Սուրբ Գիրքը կը սորվեցնէ թէ Աստուծոյ մեսիական Թագաւորութիւնը, որ երկնային կառավարութիւն մըն է, հաստատուեցաւ 1914–ինa։ Այդ դէպքէն ետք, Սատանան եւ իր դեւերը երկինքէն վար ձգուեցան երկրին վրայ։ Աշխարհին մէջ տարածուած գէշութիւնն ու անբարոյութիւնը կը փաստեն, որ անոնք որքա՛ն քանդիչ ազդեցութիւն եւ ոխ ունին (Յայտնութիւն 12։9-12)։

Բայց չարութեան եւ բռնութեան զարմանալի կերպով աւելնալը կը փաստէ, թէ մօտ ատենէն անոնց վախնալիք իշխանութիւնը պիտի վերջանայ։ Անոնք այլեւս պիտի չկրնան գէշութիւն ընել։ Աստուծոյ Թագաւորութիւնը դրախտային երկրին վրայ 1000 տարի իշխելէ ետք, այս չար հոգեղէն արարածները վերջին առիթը պիտի ունենան որ մարդկութիւնը փորձէ անցընեն։ Ետքը, անոնք յաւիտեան պիտի կործանին (Մատթէոս 25։41. Յայտնութիւն 20։1-3, 7-10)։