Ekondwa 14
Oouṋe Mbe Yenda kEyuru, nOmena Ratjike?
1. Ovandu ovengi epuriro ndi, Oouṋe mbe yenda keyuru, nomena ratjike, mave ri ziri vi?
OVANDU OVENGI ve tja, ‘Ovandu avehe ovawa ve yenda keyuru.’ Posi yokutja, tji va purwa kutja omena ratjike tji ve yenda keyuru, owo mape ya ave tja: ‘Okukakara puna Mukuru,’ poo, ‘Ondjambi yokukara omundu omuwa.’ Ombeibela i honga tjike ohunga na ihi?
2, 3. (a) Omena ratjike eṱe tji mape ya atu kara nongamburiro kutja ovandu tjiva mave i keyuru? (b) Epuriro riṋe ndi mari hepa okuzirwa?
2 Ombeibela i ri oukahu kutja Jesus wa pendurwa okuza movaṱi nokutja eye wa ya keyuru. Wina, oyo itja ovandu varwe wina mave twarewa ngo. Ouṱuku komeho wonḓiro ye, Jesus wa raera ovaapostele ve ovaṱakame: “Mondjuwo yaTate mu nomatuwo omengi, nAmi me kemuṱunina oruveze. Ami hitje mu raera otjiṋa hi, andakuzu katji pe ri nao. Nu tji mba i ne kemuṱunina oruveze, indino me kotoka ne yokumutwara koyandje, kokutja eṋe mu kakare ingwi ami ku mbi ri.”—Johanes 14:1-3.
3 Oukahu, Jesus aa raere ovaapostele ve kutja owo atja ve twarewa keyuru okukakara puna ye. Omuapostele Paulus potuingi wa raera Ovakriste vanare ohunga nomaundjiro omahimangongo ngo. Otjotjihorera, eye wa tjanga: “Nungwari eha retu ri ri meyuru, nu matu undju omukuture wetu Jesus Kristus oMuhona, a rauke keyuru.” (Ovafilipi 3:20, 21; Ovaroma 6:5; 2 Ovakorinte 5:1, 2) Avya zikamisiwa momakwizikiro otja ingo, omangete wovandu va twa omitima vyawo komuinyo womeyuru. Posi yokutja ovandu ovawa avehe mave i keyuru?
OVANDU OVAWA AVEHE VE YENDA KEYURU?
4, 5. Pe na omaraisiro yeṋe kutja David na Job kave i re keyuru?
4 Katjisupi Jesus tja za nokupendurwa movaṱi, omuapostele Petrus wa raera ongambi yOvajuda: “Tate yetu omukururume omutjiukwa ombara David . . . wa koka na pakwa, neyendo re ri ri mokati ketu nga ku ndinondi. Orondu David ke na pa rondere keyuru.” (Oviungura 2:29, 34) Okutja omurumendu omuwa David ke na pa ya keyuru. Pe ri vi ohunga nomurumendu omusemba Job?
5 Ngunda ama hihamwa, Job wa kumba ku Mukuru: “Ami me zeri kutja andakuzu mo ndji horeke motjovakoke [eyendo]; ndji esa mbi horekwe nga omazenge woye tji ya zu po, tjazumba u twe po oruveze ndu mo ndji zemburuka.” Job aa undju kutja indu tja koka eye atja rira omuhinakutjiwa otjiṋa meyendo. Eye aa tjiwa kutja katja yenda keyuru. Nungwari eye wa ri nomaundjiro, otja eye tja kahurura: “Omundu tja koka, u rira omunamuinyo rukwao are? Nungwari ami me undju otuveze otusemba, me undju nga oruveze ndwi rwoviwonga [oruveze ndwa zikama meyendo] tji rwa yanda. Tjazumba Ove mo isana, nu ami me itavere.”—Job 14:13-15.
6, 7. (a) Otjikwatjike tji matji raisa kutja kape na umwe ngwa ṱa komeho waKristus ngwa ya keyuru? (b) Mape tjitwa tjike kovaṱakame avehe mba ṱa komeho waKristus?
6 Johanes, ngwa papitisa Jesus, wina wa ri omurumendu omuwa. Posi yokutja Jesus wa tja: “Ingwi ngu ri okaṱiṱiṱiṱi mouhona womayuru, eye omunene pu Johanes.” (Mateus 11:11) Ihi tji ri nao mena rokutja Johanes Omupapitise ke na ku yenda keyuru. Jesus indu tja ri kombanda yehi, nḓa ri ozombura okukapita 4 000 kombunda yomapirukiro waAdam na Eva, wa tja: “Kape nomundu ngwa rorere okuronda keyuru posi yOmuna wOmundu. Eye porwe ongwa zire keyuru.”—Johanes 3:13.
7 Okutja, otja komambo waJesus omuini, kape nomundu na umwe ngwa rora okuyenda keyuru mozombura azehe nḓo 4 000 zomakuruhungi womundu ngandu meyuva re. David, Job na Johanes Omupapitise maave munu ombendukiro komuinyo kombanda yehi. Mouatjiri, ovarumendu avehe novakazendu ovaṱakame mba ṱa komeho Jesus ngunda e hi ya ṱa va ri nomaundjiro wokukara nomuinyo rukwao kombanda yehi, kameyuru. Owo mave pendurwa okurira tjiva vovakarere vehi vOuhona waMukuru.—Epsalme 72:7, 8; Oviungura 17:31.
EPU TJIVA OVAṰAKAME NDI VE YENDERA KEYURU
8. Omaziriro komapuriro yeṋe nge ri omananḓengu, nomena ratjike?
8 Jesus omena ratjike tja ya keyuru? U na oviungura viṋe okukaungura ngo? Omaziriro komapuriro nga omananḓengu. Ihi tji ri nao orondu imba mbu mave i keyuru mave ka kara norupa puna Jesus moviungura vye. Owo ve yenda keyuru mena repu ndo porwe.
9, 10. Otja ku Daniel, ouṋe pendje na Kristus mbu mave honapara mohoromende yaMukuru?
9 Eṱe twe rihonga momakondwa wokomeho kutja Jesus maa honapara kombanda yehi epe oparadisa otjOmbara yohoromende yeyuru yaMukuru. Rukurukuru Jesus ngunda e hi ye ya kehi, embo rOmbeibela raDaniel ra hunganeka kutja “omuzandu womundu” atja “pewa ouvara.” “Omuna wOmundu” oJesus Kristus. (Markus 14:41, 62) Nu Daniel ma kaenda okutja: “Ouvara we mau karerere nga aruhe, nouhona we kamaau yanda ko.”—Daniel 7:13, 14, sasaneka NW.
10 Posi yokutja, otjinanḓengu okukengeza imba membo raDaniel kutja “omuzandu womundu” ke na ku honapara erike. Ombeibela mai tja: “Ouvara nounene . . . mau yandjewa kotjiwaṋa tja[Mukuru, NW] wokOmbandambanda. Ouvara watjo kamaau yanda ko.” (Daniel 7:27) Omaheya nga “otjiwaṋa” na “ouvara watjo” maye tu raere kutja varwe mave honapara puna Kristus mohoromende yaMukuru.
11. Otjikwatjike tji matji raisa kutja ovakongorere vaKristus ovatenga mave honapara puna ye?
11 Ouṱuku ousenina Jesus mbwa sekira pamwe novaapostele ve ovaṱakame 11 wa raisa kutja owo atja ve ri ra ovahonapare puna ye mOuhona waMukuru. Eye we ve raera: “Eṋe oweṋe mbu mu ri imba mba panḓera puna ami momarorero wandje; nu Ami me kutu omakutasaneno kuna eṋe, otja tjimuna Tate tja kuta omakutasaneno kuna ami, kouhona.” (Lukas 22:28, 29, NW) Kombunda omuapostele Paulus na Timoteus va tuwa momakutasaneno nga, poo onḓuvasaneno, yOuhona. Mena repu ndo Paulus wa tjanga ku Timoteus: “Tji twa panḓere pokutjinda omihihamo, eṱe wina matu honapara puna Ye [otjozombara, NW].” (2 Timoteus 2:12) Wina, omuapostele Johanes wa tjanga ohunga na imba mbu mave “honapara otjozombara kombanda yehi” puna Jesus Kristus.—Omavandururiro 5:9, 10, NW; 20:6.
12. Epu riṋe ohunga ‘norukwato’ rwaAbraham ndi mari raisa kutja Kristus ma kara novahonapare pamwe naye?
12 Okutja imba mbu mave i keyuru ve yenda ngo okukakarera otja ovahonapare pamwe na Kristus mohoromende yeyuru yaMukuru. Nandarire kutja Jesus ongu ri “orukwato” ohongora rwomakwizikiro, Mukuru u hoora varwe okuza movandu okukahonapara puna Jesus mOuhona. Owo okutja mave rire orupa ‘rworukwato,’ otja Ombeibela tji mai tja: “Nu tji mu ri ovaKristus, oueṋe orukuato vari ruaAbraham uina, novarumate, punga mape he ing’ [omakwizikiro, NW].”—Ovagalate 3:16, 29, EEP; Jakobus 2:5.
I VE NGAPI MBU MAVE I KEYURU?
13. (a) Omena ratjike ovivereko tji vi hinokuyenda keyuru? (b) Jesus wa handjuṋuna vi otjivaro tji matji munu Ouhona?
13 Owo indu tji mave sokuhonapara kombanda yehi, otjo oukahu kutja imba mbu mave i keyuru mave rire ovakongorere vaKristus mba kondjisiwa nokurorwa. Ihi matji hee kutja ovivereko novanatje ovaṱiṱi, mbe hi ya rorwa momakaondjero wozombura zoukarere wOukriste, kave na ku twarewa keyuru. (Mateus 16:24) Posi yokutja, ovaṱiṱi ohamukwao na imbo mbu mave koka ve na inga omaundjiro yokupendurwa komuinyo kombanda yehi. (Johanes 5:28, 29) Okutja otjivarero atjihe kumwe tja imba mbu mave i keyuru matji rire otjiṱiṱi tji tja sasanekwa na imba ovengi mbu mave munu omuinyo kombanda yehi kehi youhonapare wOuhona. Jesus wa raera ovahongewa ve: “Amu tira ko, karupanda okaṱiṱi, orondu Iho u nonyuṋe okumupa imbwi ouhona.”—Lukas 12:32.
14. Ivengapi mbe zikamisa ‘okarupanda okaṱiṱi’ mbu mave i keyuru?
14 Otjivarero tjorupanda ndwo rwovahonapare vOuhona matji rire otjiṱiṱi pu pe ṱeki pi? Matji kara novaapostele uriri novakongorere varwe ovatenga vaJesus? Kako, Ombeibela mai raisa kutja ‘okarupanda okaṱiṱi’ make kara novengi. MOmavandururiro 14:1, 3 Ombeibela mai tja: “Indino ami mba tarere ne munu Ondjona [Jesus Kristus] ndja kuramene kOndundu [yeyuru] yaSion; nu pu yo pa ri ovandu omayovi esere nomirongo vine na vane . . . [owo mba randwa (poo, mba toorwa) okuza mehi, NW].” Kengeza kutja ovandu 144 000 uriri ombu mave munika puna Ondjona, Jesus Kristus, kombanda yOndundu yeyuru Sion. (Ovaheberi 12:22) Okutja pendje novandu ovawa avehe okuyenda keyuru, Ombeibela mai vandurura kutja ovandu 144 000 uriri mba rorwa novaṱakame ombu mave twarewa ngo okukahonapara puna Kristus.
EPU OWO NDI VA HOOREWA OKUZA MEHI
15. Omena ratjike Mukuru tji ma hoora ovahonapare vOuhona okuza mokati kovandu?
15 Nungwari omena ratjike Mukuru tji ma hoora ovahonapare mba okuza mokati kovandu? Omena ratjike tje hinokukara novaengeli okuhonapara puna Kristus? Ii, pa ri mba kombanda yehi ouvara wokuhonapara waJehova pu wa tokwa. Pa ri mba kombanda yehi ouṱakame wovandu ku Mukuru pa tja u rorwa kehi yomapirukiro okuza kOmudiaboli. Pa ri mba kombanda yehi Jesus pa raisa ouṱakame we auhe ku Mukuru na yandja omuinyo we otja otjisuta tjonguturiro kovandu. Okutja pa ri okuza mehi Jehova pa tja toora ‘okarupanda okaṱiṱi’ kovandu okukakara pamwe nOmuzandu we mOuhona womayuru. Owo ombe ri mba, mouṱakame wawo ku Mukuru, mba raisa omaheya wOmudiaboli otjoposyo kutja ovandu ve karera Mukuru uriri motjimbe tjomapu omanaukona. Ku nai, okutja pe ri osemba ku Jehova indu tje ungurisa ovandu mba kondjozikiro ye.—Ovaefese 1:9-12, EEP.
16. Omena ratjike eṱe tji mape ya atu kara nondangu kutja ovahonapare vOuhona va hupire kombanda yehi?
16 Wina, ripura kutja matji rire otjihimangongo okukara notjovahonapare ovandu mba kara nouṱakame ku Mukuru imba kombanda yehi, ovengi vawo nandarire mba yandja ominyo vyawo motjimbe tjOuhona. (Omavandururiro 12:10, 11, EEP; 20:4) Ovaengeli kave na pu va hakaena nomarorero nga sana ngo. Nopo wina kava ri nondjiririra yomaputi ouandazere kovandu. Okutja owo katja ve zuva ongahukiro kutja pe ri vi okurira omundu omunaurunde nokukara nomaputi eṱe ovandu ngu tu na wo. Nungwari imba 144 000 mave paka orondu owo va ri nomapu inga oyeni. Tjiva vawo va sokutaara ovitjitwa ovinaurunde tjinene, nu owo mave tjiwa kutja mape ya ape rire ouzeu mbu ṱa pi okutjita nao. (1 Ovakorinte 6:9-11, EEP) Ku nai, owo mave ungura novakarere vehi vawo momuano wokupaka.—Ovaheberi 2:17, 18.
OMBONGO YAMUKURU
17. Embo “ombongo” ri raisa kutjike?
17 Ombeibela mai tu raere kutja Kristus ongu ri otjiuru tjombongo yaMukuru, nokutja ouṋepo wayo u riwisa kehi yaJesus. (Ovaefese 5:23, 24) Okutja embo “ongereka,” poo “ombongo jaMukuru,” kari raisa kondjuwo harive. Posi yokutja, oro ri raisa kongambi yOvakriste. (1 Ovakorinte 15:9, EEP) Ku ndino eṱe mape ya atu hungire ohunga nombongo yOvakriste eṱe mbu tu sekirasana pamwe. Momuano tjingewo, eṱe matu lese mOmbeibela ohunga ‘nombongo yOvalaodisea’ nu morutuu rwomuapostele Paulus ku Filemon, ohunga ‘nombongo [ndja ri] mondjuwo [ye].’—Ovakolose 4:16; Filemon 2.
18. (a) Oouṋe mbe zikamisa ‘ombongo jaMukuru omunamuinjo’? (b) Ombongo ndji mOmbeibela i raisiwa nomarukwana yeṋe wina?
18 Posi yokutja, Ombeibela indu tji mai hungire ohunga ‘nombongo jaMukuru omunamuinjo,’ oyo mai raisa kongambi harive peke yovakongorere vaKristus. (1 Timoteus 3:15, EEP) Owo wina ve isanewa “ombongo jovaveri, nga tjangerue momajuru.” (Ovaheberi 12:23, EEP) Okutja “ombongo jaMukuru” ndji ya zikamisiwa mOvakriste avehe kombanda yehi mbe na omaundjiro womuinyo womayuru. Mu avehe, ovandu porwe 144 000 korusenina ombu mave zikamisa “ombongo jaMukuru.” Ku ndino uriri okatjongo okaṱiṱi kaimba, ihi otjihupe, ngundee tji tji ri kombanda yehi. Ovakriste mbe na omaundjiro wokukara nomuinyo nga aruhe kombanda yehi ve yerura omeho kombatero yombepo okuza kouṋepo ‘wombongo jaMukuru omunamuinjo’ ndji. Ombeibela wina i raisa kombongo ndji youṋepo 144 000 nomarukwana tjimuna “Omuvarekwa, ingwi omukazendu wOndjona,” “orutu rwaKristus,” ‘ondjuwo ondjapuke yaMukuru,’ ‘otjiwaṋa tjaIsrael tjaMukuru,’ na “Jerusalem otjipe.”—Omavandururiro 21:9; Ovaefese 4:12; 1 Ovakorinte 3:17; Ovagalate 6:16; Omavandururiro 21:2.
OTJIṊA OTJIPE MONDANDO YAMUKURU
19. Otjiṋa tjiṋe otjipe Mukuru tja eta okutuvakanisa ondando ye yokombutiro kehi?
19 Jehova Mukuru ke na pa tanaura ondando ye kehi na imba ovandu kombanda yaro kombunda yaAdam tja wombororisa omuhoko wovandu mondjira yourunde nonḓiro. Andakuzu Mukuru wa tjita nao, otjo atja tji ha kutja Mukuru ka yenenene okutuvakaṋisa ondando ye yokombutiro. Ondando ye okuza kombutiro ya ri okukara oparadisa nouparanga wehi ndje ura novandu ovaṋingadu, ovaveruke, nu ondando ndjo ngundee ya zikama. Otjiṋa otjipe atjiyerike Mukuru tja eta ya ri ondyero ye kohoromende ombe okutuvakanisa ondando ye. Otja eṱe tjitwa munu, Omuzandu we, Jesus Kristus, ongu ri omuhonapare ohongora mohoromende ndji, nu ovandu 144 000 mave toorewa okuza mokati kovandu okukahonapara meyuru puna ye.—Omavandururiro 7:4.
20. (a) Oouṋe mbe zikamisa “omajuru omape” na indi “ehi epe”? (b) Ove wa sokutjita tjike motjimbe tjokurira orupa rwaindi “ehi epe”?
20 Ovahonapare mba meyuru mave zikamisa “omajuru omape” wondyero ombe yaMukuru. Posi yokutja oukahu kutja tji pa sokukara ovahonapare ohamukwao na imbo kombanda yehi, okutja pa sokukara imba owo mbu mave ve honaparere. Ombeibela mai raisa kovandu mba otja “ehi epe.” (2 Petrus 3:13, EEP; Omavandururiro 21:1-4) Mu wo mamu kara Job, David na Johanes Omupapitise—ii, ovandu avehe ovaṱakame mba ri nomuinyo Kristus ngunda e hi ye ya kombanda yehi. Nungwari mape kara ovengi mbu mave zikamisa “ehi epe,” mu mamu kara ovandu mbu mave hupu omaandero wondyero ndji yoviṋa ohangundu. Ove moo rire umwe waimba ovatuurunge? Ove mo vanga okurira omukarere wohoromende yaMukuru? Tji pe ri nao, pe na oviundjirwa ko mbi wa sokuyenenisa.
[Oviperendero pomukuma 121]
Ovarumendu mba ovasemba va ya keyuru?
Ombara David
Job
Johanes Omupapitise
[Otjiperendero pomukuma 122]
Mouṱuku we ousenina puna ovaapostele ve, Jesus wa tja owo atja ve rira ovahonapare puna ye mOuhona waIhe we