Desemba

Hapo Jehova u nomasa wokupendura ovaṱi? Otjingaperi. Eye “Omunamasaaehe.” (Omavan. 1:8) Ku nao eye omunamasa tjinene okurwisa ovanavita, nandarire onḓiro. (1 Kor. 15:26) Epu rarwe rokutja ongwaye Mukuru tji ma yenene okupendura ovaṱi omena rokutja omeripura we kaye vazewa. Eye u isana onyose aihe kena rayo. (Jes. 40:26) Eye wina u zemburuka imba mba ṱa. (Job 14:13; Luk. 20:38) Eye ma yenene okuzemburuka otjiṋa ngamwa atjihe ohunga na ingwi ngu ma pendura, tjimuna omuano mbwaa munika, ovikaṋena vye, oviṋa mbya tuurunga mehupo, na wina omeripura we. Eṱe tjiri matu yenene okukara nongamburiro momakwizikiro wa Jehova wombendukiro, mena rokutja eṱe matu tjiwa kutja eye u nonḓero nomasa okuyenenisa omakwizikiro ngo. Epu rarwe ndi tu nongamburiro momakwizikiro wa Mukuru nga, omena rokutja Jehova wa rora okupendura ovandu morukapitaveze. Moruveze rwOmbeibela, eye wa yandja omasa we kovarumendu tjiva ovaṱakame na wina ku Jesus okupendura ovaṱi. w23.04 9-10 ¶7-9

Indu tji twa ziri ovandu nongengezero noupore, ma rire oupupu ku wo okukara nonḓero okupuratena kweṱe nokukayendisa ehungi komurungu. Otjiperi kutja indu omundu tji ma vanga okukara nozombata pu na eṱe poo okutuyamburura, katu sere okukayendisa ehungi ndo komurungu. (Omiano 26:4) Posi yokutja, ovandu ovengi kamaape ya ave kara nao. Otjiperi kutja ovengi mape ya ave puratene. Oukahu kutja eṱe tu muna ouwa indu tji matu rihongo okukara noupore. Kumba ku Jehova okukupa omasa kokutja u rire omupore indu tji mo ziri omapuriro ngu maye pirukire. Zemburuka kutja indu tji mo raisa oupore, tji tjita kutja u nakaure omaumune pekepeke ngu maye tjiti kutja pe kare nozombata. Indu tji wa ziri omundu momuano omupore nu wondengero, iho matji yenene okuhinga ovapuratene voye okurundurura oumune wawo ohunga na eṱe nouatjiri wOmbeibela. ‘Aruhe rirongera okuzira’ ohunga nongamburiro yoye amo ‘mangurura nomutima omutarazu nondengero.’ (1 Petr. 3:​15, 16) Ii, otjiperi kutja indu tji u ri omupore u rira omunamasa. w23.09 19 ¶18-19

Ngatu tare komiano vine mbi mavi yenene okuraisa kutja tu nomuretima. Otjitenga, omundu ngu nomuretima ka pindike tjimanga. Indu varwe tji va tjiti oviṋa mbi mavi mu pindikisa, eye u porimana nu ke ve tjindi omuano owo mu mave mu tjindi. Eye wina ka tjindi varwe navi indu tje ri kehi yombameno. (Eks. 34:6) Otjitjavari, omundu ngu nomuretima u undja noupore. Indu otjiṋa tji matji toora orure nokuhinokuundjira ko, omundu otja ingo u kondja okuhinokupindika hakahana. (Mat. 18:​26, 27) Otjitjatatu, omundu ngu nomuretima ka tjiti oviṋa nokuhinokuripura. Indu omundu tje nomuretima okuyenenisa oviungura ovinanḓengu, eye ka hakahanene po okuuta poo okumana. Nungwari, eye u twa po oruveze ndwa yenene okurongerisa oviṋa mbi ma sokutjita. Eye u toora oruveze okuungura otjiungura ho nawa. Otjitjaine, omundu ngu nomuretima u kondja okutjinda omauzeu nokuhinokuunauna. Eye u ripura ohunga noviṋa oviwa mehupo re, nu u kondja pu ma yenene okukayenda komurungu okukarera Jehova nondjoroka. (Kol. 1:11) OtjOvakriste, eṱe matu hepa okuraisa omuretima momiano avihe mbi. w23.08 20-21 ¶3-6

Epu rimwe enanḓengu ndi tjita kutja tu tjevere omutima wetu, omena rokutja Jehova u konḓonona omutima wetu. Eye u muna oviṋa ovingi vyarwe mbi ve ha yenene okumuna nu u tjiwa kutja oweṱe ovangendu mourekoto womitima vyetu. Eye me tu suvere indu tji twe ripurire kounongo we mbu mau tu vatere kutja tu hupe nga aruhe. (Joh. 4:14) Ku nao, eṱe kamaatu hihamisiwa i yozongaro ozombi novizeze vya Satan novandu ovarunde mbe ri mouye we. (1 Joh. 5:​18, 19) Indu tji twa tumbuka popezu na Jehova, orusuvero rwetu nondengero ku ye mavi kurire ko. Mena rokutja eṱe katu nokuvanga okuhihamisa Tate wetu, eṱe matu tondo nandarire omeripura wokutjita ouvi. Marta, omukazendu omukambure moCroatia ngwa muna omarorero okutjita ouvi, wa tja: “Ya ri ouzeu kwami okuripura nawa nokurwisa onḓero yokutjita otjiṋa otjivi. Posi yokutja ondira ku Jehova ye ndji yama.” Omomuano uṋe ondira ku Mukuru mu ye mu yama? Marta wa tja eye we ripurira oukoto kovikongorere ko mbya tja vi kara po indu tja tjiti otjiṋa otjivi. Eṱe matu yenene okutjita nao wina. w23.06 20-21 ¶3-4

Jesus aa tjiwa kutja ondando ya Jehova oyokuyapura ena Re, nokukohorora ro komayamburiro ayehe nga tjitwa ku ro. Mena ranao, Omuhona wetu opa zokuraera ovemukongorere okukumba nai: “Tate yetu ngu u ri momayuru: Ena roye ngari yapurwe.” (Mat. 6:9) Jesus aa tjiwa kutja iho otjiṋa otjinanḓengu tji tji ṱuna koviutwa avihe. Kape notjiutwa meyuru poo kombanda yehi tji tja yenena okuyapura ena ra Jehova okukapita Jesus. Nungwari, indu Jesus tja kamburwa, ovanavita ve mu kuminina tjike? Owo ve mu kuminina kutja wa yamburura Ihe. Jesus aa munu kutja okuungurisa navi poo okuyamburura ena ra Ihe eyapuke, ya ri ouvi ounene tjinene. Eye tjiri wa hihamisiwa i yomakuminino ngo nokupewa ondjo mena rouvi mbwo. Iho mape ya ootjiṋa tji tja tjita kutja Jesus ma hare “omburuma” ozoiri zokomurungu waindu ngunda e hi ya kamburwa.—Luk. 22:​41-44. w24.02 11 ¶11

Motjirarakaneno tjetu tjomuinyo, eṱe matu sokusuvera Jehova na Jesus okukapita ovazamumwe vetu. (Mat. 10:37) Ihi katji nokuheya kutja matu sokunakaura omerizirira wetu meṱunḓu. Nungwari kutja tu tjate ku Mukuru na Jesus, eṱe matu sokuyenenisa omerizirira wetu weṱunḓu. (1 Tim. 5:​4, 8) Indu tji twa tjiti nao, matu kara nondjoroka. Jehova u tjiwa kutja omaṱunḓu maye kara nondjoroka, indu omurumendu nomukazendu tji mave tjindasana norusuvero nondengero, na indu ovanene tji va suvera nokuhonga ovanatje vawo, nu wina ovanatje tji ve nonḓuviro kovanene vawo. (Ef. 5:33; 6:​1, 4) Nandarire kutja oove omurumendu, omukazendu poo omuatje, ṱakamisa ounongo wOmbeibela. O riyameke ku imbi mbi mo nangarasi ovisemba, kombazu poo koviṋa mbi hungirwa momaturiro woye. Ungurisa omambo wetu nga zikamena kOmbeibela. Oyo ye hungirira komuano mbu matu yenene okuṱakamisa omirari vyOmbeibela. w23.08 28 ¶6-7

Omukazendu Omukriste ma hepa okukara nondjiviro ndji mai mu vatere mehupo. Ondjiviro omuatje omukazona ndje rihonga indu tje ri omuṱiṱi i kayenda komurungu okumuvatera indu tja rire omunene. Otjotjihorera, rihonga okulesa nokutjanga nawa. Mozombazu tjiva okulesa nokutjanga kavi varwa otja oviṋa ovinanḓengu ovakazendu okurihonga. Posi ya, otjiṋa otjiwa nu otjinahepero kOvakriste avehe okurihonga okulesa nokutjanga nawa. (1 Tim. 4:13) Ku nao, nandarire kutja ouzeu okutjita nao, kayende komurungu okukondja okurihonga okulesa nokutjanga nawa. Ouwa waye mbu mo munu? Ondjiviro ndjo mape ya ai ku vatere okumuna oviungura. Nu wina mai tjiti kutja i rire oupupu kove okukonḓonona nokuhonga varwe Ombeibela. Tjinenenene, ove mo tumbuka popezu na Jehova otja tji mo lese Embo re nokuripurira ko oukoto.—1 Tim. 4:15. w23.12 20 ¶10-11

Ningira ombatero ya Jehova okurwisa omarorero. Mena rokutja kaweṱe ohomonena, eṱe aruhe tu hepa okurwisa omarorero wokutjita imbi mbi ri ovivi. Satan u tjita otjiṋa ngamwa atjihe kutja i rire ouzeu kweṱe okurwisa omarorero ngo. Omuano umwe me tjita nao, omokukondja okuzunḓa ouripura wetu mokutarera omanyando nge he ri omawa. Omanyando otja ingo maye tjiti kutja tu kare nomeripura omavi. Omeripura omavi maye tjiti kutja eṱe tu rire ovahakohoke momurungu wa Jehova nu ye tjita kutja tu tjite ouvi ounene. (Mar. 7:​21-23; Jak. 1:​14, 15) Eṱe matu hepa ombatero ya Jehova indu tji matu vanga okutuurunga omarorero wokutjita imbi mbi ri ovivi. Jesus wa tamuna otjiṋa ho mongumbiro ndji tjiukwa tjinene indu tja tja: “Nu o tu hitisa momarorero, nungwari kutura eṱe kouvi.” (Mat. 6:13) Jehova u vanga okutuvatera, posi ya eṱe matu sokuningira ombatero okuza ku ye. Indu tji twa zu nokuningira ombatero okuza mongumbiro, eṱe wina matu sokuyepa oviṋa mbi mavi tu twa mo momarorero. w23.05 6-7 ¶15-17

Indu ovakupasane tji ve vara oupanga wawo ku na Ihe womeyuru otjotjiṋa otjinanḓengu, mai rire oupupu ku wo okuyakura omaronga we, nu ihi matji ve vatere okuyepa nokutuurunga omauzeu ngu mape ya aye tjiti kutja orusuvero rwawo ru pore. Imba mbe noupanga ouwa ku na Jehova ve kondja okuhorera ku ye otja pu mave yenene, nokukara novikaṋena eye mbye raisa tjimuna ouwa, omuretima nondjesiro. (Ef. 4:32–5:1) Indu ovakupasane tji mave raisa ovikaṋena mbi, mai rire oupupu ku wo okukurisa orusuvero rwawo. Omukazendu omukambure wena Lena, ngwa kupwa oure wozombura nḓe ri kombanda yozombura 25, wa tja: “Oupupu okukara nondengero nokusuvera omundu ngu noupanga ouwa ku na Jehova.” Tara kotjihorera tjOmbeibela. Indu Jehova tja sokutoorora ovakupasane okurira ovanene va Messias ngu me ya moruyaveze, eye wa toorora Josef na Maria okuza mozondekurona za David ozengi. Omena raye? Owo aveyevari va ri noupanga wopopezu ku na Jehova nu Jehova aa tjiwa kutja mave mu twa poruveze orutenga morukupo rwawo. w23.05 20-21 ¶3-4

Jesus Omunane wetu nu eye ohomonena. Posi yokutja ovanane eye mba zika okutuhongorera po owo ka homonena. Mape ya ai rire ouzeu kweṱe okukara nonḓuviro ku wo, tjinenenene indu tji ve tu ningire okutjita otjiṋa tji tu hi nokuvanga okutjita. Omuapostele Petrus rutenga wa perwe erakiza ndaa ha vanga okukara nonḓuviro ku ro. Indu omuengeli tja raera Petrus kutja nga rye ovipuka mbyaavi varwa otjovihakohoke kehi yOmatwako wa Moses, Petrus wa panḓa povikando vitatu. (Oviung. 10:​9-16) Omena raye tja panḓa? Eye kaa zuu nawa omuhunga omupe. Posi ya, Omuapostele Paulus wa ri nonḓuviro indu ovanene vombongo moJerusalem tji ve mu raera okutoora ovarumendu vane, nokuvetwara kondjuwo ondjapuke ya Muhona kokutja meke rikohorore omuini mokuraisa kutja eye aa ṱakamisa Omatwako wa Moses. Paulus aa tjiwa kutja Ovakriste kave ri kehi yOmatwako wa Moses. “Mependukirwa raindo Paulus wa toorere ovarumendu mba vane na katjita omerikohororero puna wo.” (Oviung. 21:​23, 24, 26) Mena rokutja Paulus wa kara nonḓuviro komuhunga mbwa pewa, eye wa vatera ovakambure ovakwao okukara nombwaneno.—Rom. 14:​19, 21. w23.10 10 ¶15-16

Ove mape ya o he ripura kutja okukara nondira otjikaṋena otjinanḓengu indu tji mo vanga okukara noupanga ouwa. Nungwari, imba mbe vanga okukara noupanga wopopezu ku na Jehova mave sokukara “nondira ku ye.” Nandarire kutja twa karera Jehova pu pe ṱa pi, eṱe atuhe matu hepa okukayenda komurungu okukara nondira ku ye. Hapo okukara nondira ku Mukuru maku hee tjike? Omundu ngu nondira ku Mukuru momuano omusemba, u mu suvera nu ka vanga okutjita otjiṋa ngamwa atjihe tji mape ya atji teya oupanga we ku na ye. Jesus wa raisa “ondira” ndjo. (Hebr. 5:​7, NWT) Eye kaa ri nomburuma nu kaa tira Jehova. (Jes. 11:​2, 3) Nungwari eye we mu suverere tjinene nu aa vanga okukara nonḓuviro ku ye. (Joh. 14:​21, 31) Tjimuna Jesus, eṱe tu vanga okukara nondengero nondjozikiro onene ku Jehova mena rokutja eye u norusuvero, onongo, omusemba nomunamasa. Eṱe wina tu tjiwa kutja Jehova we tu suvera, neye u ṱunwa i yongaro eṱe ndji matu raisa indu tji me tu hongo. Indu tji tu hi nonḓuviro ku Jehova eye u kara nomuhihamwatima posi yokutja indu tji tu nonḓuviro, eye u kara nondjoroka.—Eps. 78:41; Omiano 27:11. w23.06 14 ¶1-2; 15 ¶5

Indu Ombara Usija tja muna kutja ouvara we ounamasa, eye wa isa okuraisa ondangi ku Jehova koviṋa avihe oviwa Jehova mbye mu tjitira. Matu rihongere ko tjike? Matu sokuzemburuka kutja Jehova ongu tu pa oviṋa avihe oviwa mbi tu yorokera mehupo na motjiungura tje. Pendje nokurihivira oviṋa mbi twa yenenisa, matu sokuraisa ondangi ku Jehova koviṋa mbi tu yenena okutjita. (1 Kor. 4:7) Nomerisusuparisiro eṱe matu sokutjiwa kutja kaweṱe ohomonena nu tu hepa omavyuriro. Omurumendu omukambure ngu ri motjiwondo tjozombura 60 wa tja: “Ami mbe rihonga okuhinokuhakahana okupindika poo okuwa momuinyo indu varwe tji va munu ozondataiziro zandje. Indu tji mba munu omavyuriro kozondataiziro nḓu mbi tjita ovikando tjiva, ami mbi kondjisa okuriṱuna nokukayenda komurungu okukarera Jehova otja pu me yenene.” Indu tji twa kara nonḓuviro ku Jehova natu kayenda komurungu okurisusuparisa, eṱe tjiri matu kara nehupo rondjoroka.—Omiano 22:4. w23.09 10 ¶10-11

Ovakriste ovakuru aave hepa okukara nonḓarorure. Owo va ri nomauzeu tjingewo inga ovandu moruveze ndwo ngu va ri na wo, posi yokutja wina va ri nomauzeu mena rokutja va ri Ovakriste. Ovengi aave tatumisiwa i yovanane vozongamburiro zOvajuda nouhonapare wOvaroma, nu nandarire aave tatumisiwa i yomaṱunḓu wawo. (Mat. 10:21) Owo aave sokutjita kutja omahongero woposyo wovandu mba isa okukarera Jehova novandu nu mbe mu pirukira aye ha ṱunu ku wo, nu aye ha haṋa ombongo. (Oviung. 20:​29, 30) Posi ya, Ovakriste mbo va panḓera po nouṱakame. (Omavan. 2:3) Omomuano uṋe? Owo aave ripurire kovihorera vyovandu mba raisa onḓarorure, tjimuna Job. (Jak. 5:​10, 11) Owo aave kumbu okuningira omasa. (Oviung. 4:​29-31) Nu owo aave zemburuka kutja Jehova me ve sere ondaya indu tji va raisa onḓarorure. (Oviung. 5:41) Matu yenene okukara nonḓarorure indu tji twa konḓonona nokuripurira ko oukoto kovihorera vyovandu mba raisa onḓarorure mbi ri mEmbo ra Mukuru nomambo wetu nga zikamena kOmbeibela. w23.07 3 ¶5-6

Jehova na Jesus kamaave twesa ko. Kombunda yaindu omuapostele Petrus tja pataṋa Jesus, eye aa sokutoora omukambo omunanḓengu. Hapo eye ma yumbu ohama poo ma panḓere po otjomuhongewa wa Kristus? Jesus wa kumba ku Jehova kutja ongamburiro ya Petrus ai ha yanda. Jesus wa raera Petrus ohunga nongumbiro ndjo nu we mu raisira kutja u nongamburiro kutja Petrus ma yenene okukayanḓiparisa ovakambure ovakwao. (Luk. 22:​31, 32) Iho tja yanḓiparisa Petrus indu tja zemburuka omambo wa Jesus ngo. Indu tji matu toora omukambo omunanḓengu, Jehova mape ya a ungurisa ovarise mbe rikendera eṱe okutuvatera nomayanḓiparisiro ngu matu hepa kokutja tu panḓere pouṱakame. (Ef. 4:​8, 11) Jehova ma yenene okutuvatera noviṋa mbi matu hepa indu tji twa twa po otjiungura tjokuzuvarisa poruveze orutenga mehupo retu, tjimuna tja vatera Petrus novaapostele varwe noviṋa mbyaave hepa. w23.09 24-25 ¶14-15

Jehova u muna ouwa auhe mbu tu tjitira varwe nandarire kutja omomuano omuṱiṱi. Eye u vara ozongondjero nḓu tu tjita nu me tu sutire po ouwa mbu tu raisa. Indu tjo karere otjomuvatere poo omunene wombongo, Jehova u zemburuka oviungura mbi wa ungura morukapitaveze norusuvero ndwe ku hinga kutja u tjite nao. (1 Kor. 15:58) Eye wina u muna omuano mbu kayenda komurungu okuraisa orusuvero. Jehova u vanga kutja eṱe atuhe tu kurise orusuvero rwetu ku ye na ku varwe. Eṱe matu yenene okukurisa orusuvero rwetu ku Jehova mokulesa Embo re nokuripurira ko oukoto na mokuhungira ku na ye mongumbiro aruhe. Eṱe matu yenene okukurisa orusuvero rwetu kovakambure ovakwetu mokuvevatera momiano pekepeke. Otja orusuvero rwetu tji maru kurire ko, eṱe matu tumbuka popezu na Jehova na kovakambure ovakwetu. Nu eṱe matu yorokere oupanga mbo nga aruhe. w23.07 10 ¶11; 11 ¶13; 13 ¶18

Omukriste auhe u sokuritoororera omuini kutja ma pangwa momuano uṋe. Indu Ovakriste tji mave toorora omapangero, owo mave hepa okukara nonḓuviro komatwako wOmbeibela nge tja matu sokukara kokure nombinḓu noundjai. (Oviung. 15:20; Gal. 5:​19, 20) Posi ya, mozongaro zarwe, owo mave yenene okurityera oveni kutja omapangero yeṋe ngu mave yakura. Eṱe mape ya atu munu kutja omapangero kaaṋi maye vatere poo maye eta oumba, posi ya matu hepa okuraisa ondengero komikambo ovakambure ovakwetu mbi va toora ohunga nouveruke vawo oveni. Ku nao, eṱe matu sokuzemburuka omapu yane nga: (1) Ouhona wa Mukuru auyerike ombu mau eta omberukiro yaaruhe. (Jes. 33:24) (2) Omukriste auhe ma sokukara “nouripura we omuini momutima we” wokutja omapangero yeṋe nge ri omasemba ku ye. (Rom. 14:5) (3) Eṱe katu pangura varwe komikambo mbi va toora, nu katu tjiti otjiṋa tji mape ya atji ve putarisa. (Rom. 14:13) (4) Ovakriste ve raisa orusuvero nu ve tjiwa kutja ombwaneno mombongo onahepero tjinene okukapita oumune wawo oveni.—Rom. 14:​15, 19, 20. w23.07 24 ¶15

Hapo ove wa suvera Jehova tjinene? Otjingaperi. Okuza koruveze orukuru, ovandu ovengi va suverere Jehova momuano tjingewo. (Eps. 104:​33, 34) Ovandu ovengi va tjita ozongondjero okurikotamena ku Jehova. Nu iho otjiṋa Ovanasirei mu Israel otjikuru tjaave tjiti poo imba mbe riyandja oveni. Ovanasirei va ri Ovaisrael ovapyuke mbe riyandjerere oveni okukarera Jehova momuano wapeke. Omatwako wa Moses aaye yandjere omurumendu poo omukazendu okutjita oruyano rwapeke ku Jehova mokutoorora okuhupa otjOmunasirei oure woruveze kaaṋi. (Num. 6:​1, 2) Indu Omuisrael tja tjiti oruyano otjOmunasirei, eye aa sokukongorera omirari Ovaisrael varwe mbyaave ha hepa okukongorera. Nu hapo omena raye Omuisrael tjaa toorora okurira Omunasirei? Omuisrael ngo ngahino aa hingwa i yorusuvero ndwe na rwo ku Jehova, nondangi ku ye mena rozondaya nḓaa munu.—Deut. 6:5; 16:17. w24.02 14 ¶1-2

Ombeibela potuingi i hungira ohunga nouṱakame poo orusuvero oruṱakame Mukuru ndwe raisa komapanga we. Ombeibela wina i hungira ohunga nouṱakame ovakarere va Mukuru mbu ve raisasana. (2 Sam. 9:​6, 7) Ouṱakame wetu mau yenene okukurira ko otja oruveze tji maru kayenda. Ngatu tare komuano ouṱakame wa Daniel mu we kurira ko. Oure womuinyo wa Daniel, ouṱakame we ku Jehova aau rorwa. Posi ya, otjiṋa otjizeu tjinene tja tjitwa indu Daniel tja ri nozombura zokombanda 90. Ouṋepo mbwaau ungura pondjuwo youhona wOmbara Darius kaave vanga Daniel nu kava ri nondengero ku Mukuru we. Ku nao, owo va tjita kutja Daniel ma zepewa. Owo va tjita kutja ombara i twa ko ena re komarakiza ngu maye roro Daniel kutja ma raisa ouṱakame ku Mukuru poo kombara. Daniel aa sokuraisa ouṱakame we kombara mokuhinokukumba ku Jehova oure womayuva 30. Daniel wa toorora okurira omuṱakame ku Jehova.—Dan. 6:​12-15, 20-22. w23.08 5 ¶10-12

Jehova u vanga kutja tu kayende komurungu okuraisa orusuvero kovakambure ovakwetu. Indu omukambure omukwetu tje he tu tjindire momuano omuwa, iho katji nokuheya kutja we tu hihamisire owina nu matu yenene okukara nongamburiro kutja u vanga okutjita imbi mbi ri ovisemba. (Omiano 12:18) Mukuru wa suvera ovakarere ve ovaṱakame, nandarire kehi yozondataiziro nḓu ve tjita. Nandarire kutja tu tjita ozondataiziro, eye u kayenda komurungu okurira epanga retu nu ketu pindikire. (Eps. 103:9) Tjiri eṱe tu nondangi tjinene kutja Jehova u tu isira nu eṱe matu sokuhorera ku ye mokuisira varwe. (Ef. 4:32–5:1) Wina zemburuka kutja, otja omaandero tji maye ya popezu, eṱe matu sokukayenda komurungu okutumbuka popezu novakambure ovakwetu. Eṱe matu sokuundjira ko kutja ondatumisire mai ririre ko onyingi. Eṱe mape ya atu hitisiwa monḓorongo mena rongamburiro yetu. Iho tji tja tjitwa, matu hepa ovakambure ovakwetu tjinene.—Omiano. 17:17. w24.03 15-16 ¶6-7

MOmatjangwa mu nomahungi yomitanda mbya tumbuka popezu na Jehova, mbya yorokisa omutima we nu mbya hupa ehupo ewa. David wa ri umwe wawo. Eye wa toorora okurira epanga ra Mukuru indu tja ri omuṱiṱi nga tja karira ombara onḓakame. (1 Ozomb. 3:6; 9:​4, 5; 14:8) Indu tji mo rihongo ohunga na David, otjihorera tje matji ku tunduuza okukarera Jehova nouṱakame. Momakonḓononeno woye mo yenene okuyandja ombango kotjihorera tja Markus poo tja Timoteus. Owo va uta okukarera Jehova indu tji va ri ovaṱiṱi, nu va kayenda komurungu okumukarera nouṱakame. Nu otjiṋa ho tja yorokisa Mukuru. Omuano mu u hupa ehupo roye nai, mau ṱunu komuano ehupo roye mu mari kakara moruyaveze. Indu tji we riyameke ku Jehova nu o he riyameke ku imbi mbi mo tjangovasi mo tjiwa, eye me ku vatere okutwa po ozondando ozombwa. Ove mo yenene okukara nehupo ewa nu nda serwa ondaya. Zemburuka kutja Jehova u nondangi koviṋa avihe mbi u mu tjitira. Kape nomuano warwe omusemba wokuhupa ehupo roye pendje nokukarera Tate wetu worusuvero Jehova. w23.09 13 ¶18-19

Omuapostele Paulus aa tjiwa kutja ovakambure ovakwao kahomonena. Otjotjihorera, ovakambure tjiva moJerusalem aave mu tira. (Oviung. 9:26) Kombunda, tjiva va kahungira oviṋa ovivi ohunga na ye, okutjita kutja varwe ave ha kara nongamburiro mu ye. (2 Kor. 10:10) Paulus wa muna omunene wombongo ama toora omukambo omuvi mbu mape ya wa putarisa varwe. (Gal. 2:​11, 12) Nu Paulus wa hihamisirwe i yepanga re ropopezu Markus. (Oviung. 15:​37, 38) Paulus atja yandjera kutja omauzeu ngo ye tjite kutja a ha vanga okukara pamwe na imba mbe mu hihamisa. Posi ya, eye wa kayenda komurungu okukara noumune ouwa ohunga novakambure ovakwao, nu wa kayenda komurungu okukarera Jehova nouṱakame. Otjikwaye tji tja vatera Paulus okupanḓera po? Paulus wa suverere ovakambure ovakwao. Orusuvero Paulus ndwa ri na ro rwe mu vatera kutja ma tjite imbi mbya tamunwa metjangwa randino. w24.03 15 ¶4-5

MOmbeibela mu novihorera vyovandu ovengi mba raisa ounanḓengu wokukara notjikaṋena tjoupore. Tara kotjihorera tja Isak. Indu tja turire moFilisti, morukondwa rwa Gerar, ovararanganda ve va ri neruru na ye, nu ave sire ozondjombo nḓa tungirwe i yovakarere vaihe. Pendje nokurwira ozondjombo ze, Isak wa tjindisa eṱunḓu re kokure nu a katopora ozondjombo zarwe. (Gen. 26:​12-18) Posi ya, Ovafilisti va tja omeva nge ri mozondjombo nḓo wina oyawo. Nandarire kehi yomauzeu ayehe ngo, Isak wa raisa oupore. (Gen. 26:​19-25) Otjikwaye tji tje mu vatera kutja ma rire omupore nandarire kutja ovandu varwe aave mu pindikisa? Eye aa tarere kovihorera vyovanene ve, nu ee rihongere komuano Abraham mee ritjindi, “nombepo ondarazu ndja pora” ya Sara.—1 Petr. 3:​4-6; Gen. 21:​22-34. w23.09 15 ¶4

Jehova wa hinda Omuna we omukwatwaerike kouye okuyekuhonga ovandu ohunga nOuhona wa Mukuru nokuyandja omuinyo we okutuyama kouvi nonḓiro. Okuzambo Jesus wa pendurwa na yaruka keyuru okukanana otjombara yOuhona wa Mukuru. Ombuze onanḓengu mOmbeibela oyokutja ena ra Jehova mari yapurwa otja tji ma yenenisa ondando ye kehi okupitira mOuhona we mbu mau nanwa i Kristus. Ondando ya Jehova kamaai rundururwa. Eye wa kwizika kutja oviṋa avihe mavi tjitwa otja pa hungira. (Jes. 46:10; Hebr. 6:​17, 18) Ouye mau rire oparadisa mu mamu tura ozondekurona za Adam na Eva ohomonena mu ‘mave ṋingapara nga aruhe.’ (Eps. 22:26) Posi ya imbyo kaviṋa aviyerike Jehova mbi ma kayenenisa. Eye wina ma wanisa ovakarere ve avehe meyuru na kombanda yehi. Nu okuzambo avehe mave kara nonḓuviro ku Jehova otjOmunane wawo. (Ef. 1:​8-11) Hapo ove ko nokutjaterwa i yomuano omuwa Jehova me yenenisa ondando ye? w23.10 20 ¶7-8

Indu Ovajuda mba pita mu Babilon tji va vaza moJerusalem, aave munu ko ouzeu okutumba omaṱunḓu wawo. Wina mwa ri ozondjakaha mokati kOuhonapare wa Persie nomapirukiro okuza koviwaṋa ongondoroka na wo. Tjiva aave munu ko ouzeu okutwa po omatungururiro wondjuwo ondjapuke ya Muhona otjotjiṋa otjinanḓengu mehupo rawo. Jehova wa hinda ovaprofete vevari ooHagai na Sakarja, okuvatera ovakarere ve okukara nonḓero yokurikotamena ku ye nu oviungura vyovaprofete mbo vya ri nondoṋeno. (Hag. 1:1; Sak. 1:1) Kombunda yozombura 50 nḓa kapita, Ovajuda aave hepa okutunduuzwa rukwao. Esra ngwa ri onongo mOmatwako wa Muhona, we ya koJerusalem okuza koBabilon okuyekutunduuza ovakarere va Mukuru okutwa po omerikotameneno wouatjiri otjotjiṋa otjitenga mehupo rawo. (Esra 7:​1, 6) Tjimuna omaprofetero wa Hagai na Sakarja tji ya vatera ovakarere va Mukuru morukapitaveze okukayenda komurungu okukara nongamburiro mu Jehova moruveze ovandu tjaave ve pirukire, oyo wina maye yenene okutuvatera okukara nongamburiro mu Jehova nandarire kehi yomauzeu ngu tu muna ndino.—Omiano 22:19. w23.11 14-15 ¶2-3

Omomuano uṋe mu matu raisire ovakambure ovakwetu orusuvero? Omuano umwe mu matu yenene okutjita nao, omokuyarurasana pehi omitima poo okuhuhumiṋasana. Eṱe matu yenene ‘okuyarurasana pehi omitima’ indu tji matu raisire varwe otjari. (1 Tes. 4:18) Matu yenene vi okuraisasana orusuvero orunamasa? Omokuisira ovakambure ovakwetu nandarire kutja ouzeu okutjita nao. Ongwaye okuraisasana orusuvero tje ri otjiṋa otjinanḓengu ndino? Tara kepu Petrus nda yandja: “Ondjandero yoviṋa avihe ya tumbuka. . . . Nu kombanda yaavihe suverasaneye nomasa tjinene.” (1 Petr. 4:​7, 8) Otjikeṋa tji matu undjire ko, otja ouye ourunde mbwi tji u ri pokuyanda? Jesus wa hunganeka nai ohunga novemukongorere: “Ovandu avehe mave mu tondo motjimbe tjandje.” (Mat. 24:9) Kokutja tu panḓere po nandarire kutja ovandu mave tu tondo, eṱe matu hepa okukara nombwaneno. Indu tji twa suvere ovakambure ovakwetu, Satan kamaa yenene okutuhaṋa mena rokutja twa wanekwa kumwe i yorusuvero.—Fil. 2:​1, 2. w23.11 13 ¶18-19

Ouatjiri wEmbo ra Mukuru u nomasa tjinene. Mokuhonga ovandu ohunga na Jehova nokutja eye tjiri omundu ngu ri vi, eṱe tu muna ouwa. Ovandu mba kave u hara amave wovisiwa i yovizeze vya Satan rukwao. Owo ve yenena okuuta okumuna ovikaṋena oviwa vya Tate wetu. Owo ve temisiwa i yomasa omahimise wa Mukuru. (Jes. 40:26) Owo ve rihonga okuriyameka ku ye mena rousemba we. (Deut. 32:4) Owo ve rihonga ovingi okuza kounongo we. (Jes. 55:9; Rom. 11:33) Nu owo ve tjaterwa tji mave rihongo kutja eye orusuvero. (1 Joh. 4:8) Otja tji mave tumbuka popezu na Jehova, omaundjiro wawo wokukahupa nga aruhe otjovanatje ve ye harera ko omasa. Tjiri ondjingonekero onene kweṱe okuvatera varwe okutumbuka popezu na Ihe yawo. Indu tji matu tjiti nao, Jehova me tu vara kutja oweṱe “ovaungure vapamwe” na ye.—1 Kor. 3:5. w24.02 12 ¶15

Indu tji u rihonga Ombeibela poo tji we kurisiwa i yovanene mbe ri Ovahongonone va Jehova, hapo u ripura ohunga nokupapitisiwa? Indjo tjiri ondando ombwa. Posi ya ngunda au hi ya papitisiwa, ove mo sokuriyandja omuini ku Jehova. Omomuano uṋe mu u riyandja omuini ku Jehova? Ove u mu kwizikira mongumbiro kutja mo rikotamene ku ye erike nu mo tjiti kutja ombango ye i rire otjiṋa otjitenga mehupo roye. Okuzambo u kwizikira Jehova kutja mo kayenda komurungu okumusuvera “nomutima woye auhe, nomuinyo woye auhe, nozondunge zoye azehe, nomasa woye aehe!” (Mar. 12:30) Omeriyandjerero ngo u ye tjita pokati koye na Jehova uriri. Posi ya, tji wa papitisiwa u raisa ku varwe kutja wa tjiti omeriyandjerero ku Jehova. Omakwizikiro woye otjiṋa otjinanḓengu. Ondando yoye oyokuyenenisa omakwizikiro ngo nu Jehova u undjira kove okutjita nao.—Omuzuv. 5:4. w24.03 2 ¶2; 3 ¶5

Otukupo atuhe tu nomauzeu. Ombeibela i tja ovandu mba kupasana “ve muna ouzeu.” (1 Kor. 7:28) Omena raye? Mena rokutja omurumendu nomukazendu aveyevari kahomonena, nu ve novikaṋena mbya panguka, nu ve noviṋa mbi ve vanga na mbi ve ha vanga. Ovakupasane mape ya va za kozombazu pekepeke nu ve kurisiwa momiano pekepeke. Nu kombunda yorukupo mape ya ave utu okumuna ovikaṋena mbi ve hi na aave munu ngunda ave hi ya kupasana. Oviṋa otja imbi mape ya ave tjiti kutja ve kare nomauzeu. Mape ya ave kumininasana mena rouzeu mbu ri morukupo, nandarire kutja aveyevari ve tjita ozondataiziro nu ve sokuzengurura pamwe ouzeu mbwo. Owo nandarire mape ya ave utu okuripura kutja mave sokuhaṋika poo okuteya orukupo. Posi ya hapo okuhaṋika poo okuteya orukupo maku zengurura omauzeu wawo? Kako. Jehova u vanga kutja ovakupasane ve raise ondengero kondyero yorukupo nandarire indu umwe tje tjita kutja irire ouzeu okuhupa pamwe nomukwao w24.03 16 ¶8; 17 ¶11

Kombunda yaindu tji wa za nokupapitisiwa, omaundjiro woye wokukahupa nga aruhe moparadisa kombanda yehi ya kayenda komurungu okukurira ko. (Hebr. 5:13–6:1) Ove mape ya wa tuurunga oviṋa mbya tamunwa mOvaroma 5:​2-4. Mape ya ove wa muna omauzeu pekepeke, posi ya Jehova we ku vatera okutuurunga omauzeu ngo neye we ku raisira kutja u nonyuṋe move. Mena rokutja mo tjiwa kutja Jehova we ku suvera nu u nonyuṋe move, ove nai u nongamburiro yokutja eye me ku pe oviṋa avihe mbye ku kwizikira. Ongamburiro yoye yekurira ko. Nu u i vara kutja otjiṋa otjinanḓengu kove. Oyo tjinene i ṱuna kehupo roye, i rundurura omuano mu u tjinda eṱunḓu roye, i ṱuna komuano mbu u twa po ozondando na komuano mu u ungurisa oruveze rwoye. Omuapostele Paulus wa hungirira kepu enanḓengu ohunga nomaundjiro ngu u muna indu Mukuru tje nonyuṋe move. Eye wa kwizika kutja omaundjiro woye maye yenenisiwa.—Rom. 15:13. w23.12 12-13 ¶16-19

Indu tji tu ri mouzeu, mape ya atu he ripura nokutjita oviṋa tjimuna tji tu tjita aruhe. Tjimuna oskepi tji i hingwa i yozongazona motjivepo, eṱe wina mape ya atu hingwa i yomeripura omengi pekepeke. Jehova u tu vatera vi, indu tji twa ha verwa i yomeripura otja ingo? Eye wa kwizika okutuzikamisa. Indu tji ku notjivepo otjinamasa momuronga, oskepi mape ya ai utu okunyinganyinga tjinene. Okutjita kutja oskepi ai ha nyinganyinga tjinene, oyo mape ya ai kara novivava mbi pita kehi yayo momeva. Ovivava mbi vi vatera kutja oskepi ai ha nyinganyinga tjinene. Ku nao, ovandu mbe ri moskepi ve kara mondjeverero nu ve kara nouyenda ouwa. Ovivava mbi vi ungura nawa indu oskepi tji mai kayenda komurungu. Omuano tjingewo, Jehova me tu zikamisa indu tji matu kayenda komurungu okumukarera nouṱakame moruveze rwouzeu. w24.01 22 ¶7-8

Indu tji mo tira, ripura omuini epuriro ndi, ‘Otjikeṋa Jehova tja tjita?’ Ripura ohunga na imbi eye mbya uta. Otjotjihorera, indu tji matu ‘tara’ komuano Jehova me rikendera ozonḓera novimbloma mbi hi na vya utwa kosaneno ye nu mbi ha yenene okurikotamena ku ye, eṱe matu kurisa ongamburiro yetu yokutja eye me rikendere kweṱe wina. (Mat. 6:​25-32) Wina, tara ku imbi Jehova mbya tjitira ovakarere ve. Ove mape ya o lese otjihorera tjomukarere wa Jehova woruveze rwetu, poo o konḓonona mOmbeibela ongaro yomundu ngwa raisa ongamburiro onḓakame. Wina, ripurira ko oukoto komuano Jehova me ku vatera morukapitaveze. Omomuano uṋe me ku vatera okumutjiwa? (Joh. 6:44) Omomuano uṋe ma zira ozongumbiro zoye? (1 Joh. 5:14) Omomuano uṋe mu u muna ouwa eyuva arihe okuza mombunguhiro yOmuna we omusuverwa?—Ef. 1:7; Hebr. 4:​14-16. w24.01 3 ¶6; 7 ¶17