Novemba

Tji u ri omunene, vatera ovanatje voye okurirongerisa omaziriro otja kozombura zawo. Povikando tjiva, oviṋa tjimuna omauzeu motukupo, poo ozongaro zomeritjindiro tji mavi hungirwa morupa ndwo, mape ya ape kara oparagrafa imwe poo mbari omuatje ndji ma yenene okuzirira ko. Nu wina vatera ovanatje voye okuzuva kutja kaaruhe tji mave pewa oruveze okuzira, indu tji va yere eke. Indu tji we ve kahururire nao, matji vatere ovanatje voye kutja ave ha u momuinyo indu varwe tji va toororwa okuzira. (1 Tim. 6:18) Eṱe atuhe matu yenene okurirongerisa omaziriro omayanḓiparise ngu maye yandja ondjozikiro ku Jehova nokuyanḓiparisa ovakambure ovakwetu. (Omiano 25:11) Nandarire kutja povikando tjiva tu yandja omaziriro ohunga noviṋa mbya tjitwa kweṱe, tu sokukondja kokutja atu ha hungire tjinene ohunga na eṱe oveni. (Omiano 27:2; 2 Kor. 10:18) Nungwari, tu kondja tjinene okuyandja ombango ku Jehova, Embo re, novakarere ve.—Omavan. 4:11. w23.04 24-25 ¶17-18

Orusuvero maru tu vatere okukara katumba atu nomuungutima. (Mat. 22:​37-39) Orusuvero ku Mukuru maru tu vatere okupanḓera po motjiungura tjokuzuvarisa nandarire kutja matu munu ouzeu. (2 Tim. 1:​7, 8) Mena rokutja eṱe tu raisa orusuvero ku imba mbe ha karere Jehova, tu kayenda komurungu okuzuvarisa, nu nandarire okupitira mongoze na motutuu. Eṱe katu yumbu ohama kutja eyuva rimwe ovandu mave rundurura ongaro yawo nave utu okutjita imbi mbi ri ovisemba. (Esek. 18:​27, 28) Orusuvero rwetu kovandu ru kamburira mo ovakambure ovakwetu. Eṱe tu raisa orusuvero otja indwo indu tji matu ‘pandiparisasana nokuvaterasana.’ (1 Tes. 5:11) Eṱe tu yanḓiparisasana tjimuna ovasorondate tji ve ri pamwe motjirwa. Eṱe kamaatu hihamisire ovakambure ovakwetu owina poo okuyarura ouvi mouvi. (1 Tes. 5:​13, 15) Eṱe wina tu raisa orusuvero rwetu mokuraisa ondengero kovakambure mbe hongorera po ombongo.—1 Tes. 5:12. w23.06 9 ¶6; 10-11 ¶10-11

Omuano umwe mu matu yenene okupamisa ongamburiro yetu, eendu tji matu ripurire ko oukoto kotjisuta tjonguturiro. Otjisuta tjonguturiro tji tu pa ongamburiro kutja omakwizikiro wa Mukuru maye yenenisiwa. Indu tji twe ripurire ko oukoto kutja omena raye otjisuta tjonguturiro tji tja yandjwa nokutja tji kamburira mo ye, matu kurisa ongamburiro yetu kutja omakwizikiro wa Mukuru womuinyo waaruhe mouye ouwa tjiri maye yenenisiwa. Omena raye tji matu tja nao? Hapo otjisuta tjonguturiro tji kamburira mo ye? Jehova wa hinda Omuna we omukwatwaerike ngwa ri omundu wopopezu tjinene na ye, okuza keyuru okuyekukwatwa otjomundu ohomonena. Tja ri kombanda yehi, Jesus wa muna omauzeu pekepeke. Eye wa tatumisiwa na ṱu onḓiro ohihamise. Tjiri Jehova wa suta otjisuta tjokombanda. Mukuru wetu worusuvero katja yandjera Omuatje we kutja ma hihamisiwe nokuṱa kutja tu kare nehupo ewa oure woruveze orusupi uriri. (Joh. 3:16; 1 Petr. 1:​18, 19) Mena rokutja Jehova we tu pa Omuatje we omuingona okutuvatera, Eye ma katjita kutja tu yenene okuhupa nga aruhe mouye oupe. w23.04 27 ¶8-9

Hapo Jehova u nonḓero yokupendura ovaṱi? Nokuhinomakeyakeyero, eye tjiri u nonḓero yokutjita nao. Eye wa hinga ovatjange tjiva vOmbeibela okutjanga ohunga nomakwizikiro we wombendukiro. (Jes. 26:19; Omavan. 20:​11-13) Nu indu Jehova tja tjiti omakwizikiro, eye aruhe u ye yenenisa. (Jos. 23:14) Jehova tjiri u nonḓero okupendura imba mba ṱa. Ripura na imbi Job mbya hungira. Eye wa ri nongamburiro kutja nandarire tja ṱu, Jehova ma zeri okumumuna rukwao. (Job 14:​14, 15) Jehova u nonḓero tjingeyo kovakarere ve avehe mba ṱa. Eye u nonḓero okuvekotora komuinyo kutja ve rire ovaveruke nu ve kare nondjoroka. Nu hapo Jehova u noumune uṋe ohunga novandu avehe mba ṱa nokuhinokumuna oruveze rwokurihonga ouatjiri ohunga na ye? Mukuru wetu worusuvero, eye wina u vanga okuvependura. (Oviung. 24:15) Eye u vanga kutja ve kare noruveze okurira omapanga we nokuhupa kombanda yehi nga aruhe.—Joh. 3:16. w23.04 9 ¶5-6

Omomuano uṋe mu mo yenene okutjita kutja omaundjiro woye ye kare nomasa? Indu tji u nomaundjiro yokukahupa nga aruhe kombanda yehi, lesa omazeva mOmbeibela nge hungira ohunga noparadisa nu u ripurire ko oukoto. (Jes. 25:8; 32:​16-18) Ripura kutja ehupo mari kakara vi mouye oupe. Rimuna omuini mbo. Indu tji matu twa po oruveze okuripurira kouye oupe, omauzeu wetu maye rire ‘omapupu nu maye kapita tjimanga.’ (2 Kor. 4:17) Omaundjiro Jehova nge ku pa, maye yenene okukuvatera okutjinda omauzeu. Eye we ku pa oviṋa mbi mo hepa kutja u mune omasa okuza ku ye. Ku nao, indu tji mo hepa ombatero okuyenenisa otjiungura, okutjinda ouzeu, poo okukara nondjoroka, kumba ku Jehova nu tjita omakonḓononeno woye omuini wOmbeibela kutja u mune ombatero. Yakura omayanḓiparisiro okuza kovakambure ovakweṋu. Aruhe twa po oruveze okuripurira komaundjiro woye woruyaveze. Ku nao, ‘Ndjambi ngu nomasa nounene me ku zeuparisa nu me ku pe omasorero aehe kokutja nomuretima u yenene okukara nonḓaro orure mu avihe.’—Kol. 1:11. w23.10 17 ¶19-20

Eṱe tu nomapu omengi wokutja ndangi ku Jehova mongumbiro. Eṱe matu yenene okutja ndangi ku ye koviṋa avihe oviwa mbi tu na vyo, mena rokutja otjiyandjewa atjihe otjiwa tji za ku ye. (Jak. 1:17) Otjotjihorera, matu yenene okutja ndangi ku Jehova kehi ewa nda mema noviṋa oviwa mbi ri mu ro. Eṱe wina matu yenene okuraisa ondangi kehupo retu, keṱunḓu retu, komapanga wetu, nomaundjiro wetu. Nu matu vanga okuraisa ondangi ku Jehova mokutuyandjera okuyorokera oupanga ouwa ku na ye. Eṱe matu hepa okutjita ongondjero yapeke okuripura ohunga nomapu ku matu tjere ndangi ku Jehova. Ovandu ovengi ndino kave nondangi. Ovandu potuingi ve ripurira koviṋa mbi mave ve vanga pendje nokuraisa ondangi yawo koviṋa mbi ve na vyo. Indu tji twa horere kongaro ndjo, ozongumbiro zetu maze kara noviṋa mbi matu vanga uriri. Okutjita kutja iho atji ha tjitwa, matu hepa okukayenda komurungu okukurisa nokuraisa ondangi koviṋa avihe Jehova mbye tu tjitira.—Luk. 6:45. w23.05 4 ¶8-9

Jehova ka vanga kutja tu mune ouzeu mena rokutja oTate wetu worusuvero. (Jes. 63:9) Nungwari, eye ka tjaere omauzeu wetu aihe nge ri tjimuna omeva omakoto poo omuriro. (Jes. 43:2) Posi yokutja, eye wa kwizika kutja me tu vatere ‘okukonda’ poo okutuurunga omauzeu wetu. Neye kamaa yandjere omauzeu wetu okutupora ku ye. Jehova wina u tu pa ombepo ye onamasa ondjapuke okutuvatera kutja tu tuurunge. (Luk. 11:13; Fil. 4:13) Mena ranao, eṱe matu yenene okukara nongamburiro kutja eye aruhe me tu pe imbi mbi matu hepa kokutja tu tuurunge nokupanḓera pouṱakame. Jehova u undjira ko kweṱe kutja tu kare nongamburiro mu ye. (Hebr. 11:6) Povikando tjiva, eṱe mape ya atu munu kutja ouzeu okutjinda omauzeu wetu. Nu nandarire mape ya atu utu okukeyakeya kutja Jehova me tu vatere. Posi yokutja Ombeibela ye tu kwizikira kutja eṱe matu yenene ‘okuhavera’ poo okutjinda omauzeu wetu nomasa wa Mukuru. (Eps. 18:29) Ku nao pendje nokukeyakeya, eṱe matu sokukumba atu nongamburiro okuura kutja Jehova ma zuvire ozongumbiro zetu.—Jak. 1:​6, 7. w23.11 22 ¶8-9

Tjiri inga omambo omawa ohunga norusuvero rwatjiri. Inga omambo omatunduuze kovakupasane, owo mave yenene okusuverasana norusuvero rwatjiri. Pe hepa ozongondjero kovakupasane okusuverasana oure womuinyo wawo. Otjotjihorera, omuriro u yenena okuyaka nga aruhe indu omundu tji ma twa ko ozonguṋe, posi yokutja indu tji u hi nokuhohiziwa mau zemi. Momuano otjingewo, orusuvero pokati komurumendu nomukazendu mba kupasana maru yenene okukura indu tji mave ru hohiza. Povikando tjiva, ovakupasane mape ya ave munu kutja orusuvero rwawo rwa pora, tjinene indu tji ve nouzeu wovimariva, wouveruke poo wokukurisa ovanatje. Ku nao, okutjita kutja “omuriro wa Jehova” au ha zemi, omurumendu nomukazendu mba kupasana mave sokukondja kutja ve kare noupanga ouwa ku na Jehova. w23.05 20 ¶1-3

Ovikwaye mbi matu hepa okutjita kutja tu kurise ouvanḓe? Ovanene vetu mape ya ave tu tunduuza kutja tu rire ozombanḓe, posi ya kamaave yenene okutjita kutja tu rire ozombanḓe, nandarire kutja owo oveni ozombanḓe. Okukara nouvanḓe ku ri tjimuna okurihonga ondjiviro ombe, poo otjiṋa otjipe. Kutja u tjite nao, mo sokutara kovitjitwa vya ingwi ngu me ku hongo, nokuhorera kotjihorera tje. Momuano tjingewo, tu rihonga okurira ozombanḓe mokutara komuano varwe mu ve raisa otjikaṋena hi nokuhorera ku wo. Tjimuna Daniel, eṱe matu hepa okutjiwa Embo ra Mukuru nawa. Eṱe matu sokukurisa oupanga wetu ku na Jehova mokuhungira ku na ye aruhe nokumuraera omuano mu matu fula. Nu eṱe matu hepa okukara nongamburiro mu Jehova kutja eye aruhe me tu vatere. Indu ongamburiro yetu tja rorwa, eṱe matu kara nouvanḓe. Ovandu ozombanḓe potuingi ve muna ondengero okuza ku varwe. Owo wina mave yenene okuvatera tjiva okutjiwa Jehova. Tjiri, eṱe tu nomapu omawa okukurisa ouvanḓe. w23.08 2 ¶2; 4 ¶8-9

Embo rOtjigrike ndi ‘okurora’ aari ungurisiwa okuhungira ohunga nomuano ovandu maave roro osilveri nongoldo kutja ondji ri yo poo indee. Ku nao, eṱe matu hepa okurora imbi mbi matu zuu poo mbi matu lese okutara kutja ovyo ouatjiri poo indee. Iho otjiṋa otjinahepero tjinene kweṱe otja tji matu yendere ozombamisiro ozonene tjinene. Pendje nokukambura moviṋa ovandu varwe mbi mave hungire, eṱe matu sokuungurisa ouripura wetu okusasaneka imbi mbi matu lese poo mbi matu zuu ku na imbi mbi mavi hungirwa mOmbeibela na motjira tja Jehova. Indu tji twa tjiti nao, eṱe kamaatu pukisiwa i yovizeze vyozondemone. (Omiano 14:15; 1 Tim. 4:1) Matu tjiwa kutja ovakarere va Jehova mave tuurunga ozombamisiro ozonene tjinene, posi ya katu tjiwa kutja muhuka mari eta ye. (Jak. 4:14) Nandarire kutja twa tuurunga ozombamisiro ozonene tjinene, poo twa ṱu komurungu wanao, eṱe matu kamuna otjisuta tjomuinyo waaruhe indu tji twa kayenda komurungu okurira ovaṱakame. Ngatu yandje ombango komaundjiro wetu omawa nu ngatu kayende komurungu okurirongerera eyuva ra Jehova. w23.06 13 ¶15-16

Eṱe katu nokutjiwa kutja omaprofetero tjiva wOmbeibela maye yenenisiwa vi. (Dan. 12:​8, 9) Nandarire kutja katu nokutjiwa kutja omaprofetero maye yenenisiwa vi, iho katji hee kutja oyo kaye nokuyenenisiwa. Eṱe matu yenene okukara nongamburiro kutja Jehova me tu vatere okuzuva nawa oviṋa mbi matu hepa okutjiwa moiri ndji ri yo tjimuna tja tjita morukapitaveze. Maku tjitwa omatjivisiro nga “ku nohange norusuvo!” (1 Tes. 5:​3, EEP) Moruyaveze rwopopezu, ozohoromende mouye maze rwisa ozongamburiro zoposyo nokuzenyona. (Omavan. 17:​16, 17) Okuzambo mave rwisa ovakarere va Mukuru. (Esek. 38:​18, 19) Nu ovita ovisenina vya Armagedon o tji mavi utu. (Omavan. 16:​14, 16) Eṱe matu yenene okukara nongamburiro kutja ovitjitwa mbi mavi tjitwa moruyaveze rwopopezu. Ngunda oviṋa mbyo avi hi ya tjitwa ngatu kayende komurungu okuraisa ondangi yetu ku Tate wetu womeyuru mokukonḓonona omaprofetero wOmbeibela nokuvatera varwe okutjita nao wina. w23.08 13 ¶19-20

Indu omuapostele Paulus tja hungirire kongamburiro, omaundjiro norusuvero, eye kamaandero wa tja: “Ihi tji tja kapita [ovikaṋena] avihe mbi orwo ndwi orusuvero.” (1 Kor. 13:13) Omena raye Paulus tja tja nao? Moruyaveze, katu nokuhepa okukara nongamburiro momakwizikiro wa Mukuru ohunga nouye oupe poo omaundjiro wokutja omakwizikiro ngo maye yenenisiwa mena rokutja tjandje ya yenenisiwa. Posi yokutja, matu kahepa okuraisa orusuvero ku Jehova na kovandu aruhe. Ku nao, orusuvero rwetu ku wo maru kurire ko nga aruhe. Wina, orusuvero orunanḓengu okukapita omapu aihe, mena rokutja ru tjiukisa Ovakriste vatjiri. Jesus wa tja nai kovaapostele ve: “Tji mwa suverasana, indino avehe otji mave tjiwa kutja oweṋe ovahongewa vandje.” (Joh. 13:35) Wina, orusuvero ru tjita kutja tu kare nombwaneno. Paulus wa tja: “Orusuvero ondu ri otjiwaneke tji tji mu kuta kumwe okuura.” (Kol. 3:14) Omuapostele Johanes wa raera ovakambure ovakwao kutja: “Ingwi ngwa suvera Ndjambi nga suvere omukwao wina.” (1 Joh. 4:21) Indu tji matu raisirasana orusuvero, tu raisa kutja twa suvera Mukuru. w23.11 8 ¶1, 3

Ombeibela i sasaneka omuinyo wetu otjOvakriste ku notjikara tjomararakaneno. Ovatupuke mba toṋa otjikara tjomararakaneno mave kamuna ondjambi yomuinyo waaruhe. (2 Tim. 4:​7, 8) Eṱe matu sokutjita ozongondjero otja pu matu yenene okukayenda komurungu okutupuka, mena rokutja eṱe tu ri popezu tjinene nomaandero wotjikara tjomararakaneno. Omuapostele Paulus wa tamuna oviṋa mbi mavi tu vatere okutaara otjikara tjomararakaneno hi. Eye we tu raera kutja ngatu twa “pehi omutwaro auhe . . . nu ngatu tupuke nokuhaurwa ihi otjikara tjomararakaneno nge ri komurungu wetu.” Hapo Paulus aa hee kutja kape nomutwaro Omukriste mbu ma sokutjinda? Kako, nungwari aa hee kutja matu hepa okuisa omitwaro mbi he ri ohepero okutjinda. Omitwaro otja imbyo mavi tu yarura ombunda navi tjiti kutja tu ngundipare. Kutja tu tuurunge, matu sokuhakahana okutara kutja tu tjinda omitwaro otja imbyo natu hakahana okuvyesa. Momuano tjingewo, katu nokuvanga okuisa omitwaro mbi matu sokutjinda. Indu tji twa isa okutjinda omitwaro mbi, eṱe kamaatu kara motjikara tjomararakaneno.—2 Tim. 2:5. w23.08 26 ¶1-2

Okupuratena poo okuraisa ondengero koumune wavarwe maku tu vatere. Otjotjihorera, ovakazendu ovakambure tjiva va suvera okurihwa oviṋa momurungu ngunda varwe ave ha vanga okutjita nao. Ovakriste tjiva ve nwa otjikariha nokuhinokukapitisa etota, posi ya varwe va tya okuhinokunwa oparukaze. Ovakriste avehe ve vanga ouveruke ouwa, posi ya auhe u ritoororera omuini omuano womapangero we. Indu tji tu muna kutja oumune wetu aruhe ombu ri ousemba, nokukondja okuṋiṋikizira oumune wetu movakambure ovakwetu, mape ya aku tjiti kutja varwe ve putare naku eta ohaṋi. (1 Kor. 8:9; 10:​23, 24) Otjotjihorera, Jehova ke tu raere kutja matu sokurihwikika ye, posi ya u tu pa omirari mbi tu sokukongorera. Eṱe matu sokurihwikika momuano omuhirona ‘nomupwe’ mbu mau yozike Mukuru. (1 Tim. 2:​9, 10) Ku nao, katu nokuvanga okurihwikika momuano mbu mau nanene ombango yovandu kweṱe. Omirari vyOmbeibela wina mavi vatere ovanene vombongo okuhinokutwa po ozoveta zawo oveni ohunga nomizaro nomaṱunino wozondjise. w23.07 23-24 ¶13-14

Jehova we tu pa omuano mu matu yenene okukara noruyaveze rwondjoroka. Imba mbe yakura omaṋangero ‘womukazendu eyova’ ve kondja okumuna ondjoroka moruvakiro. Ovitjitwa vyawo mavi ve twara konḓiro. (Omiano 9:​13, 17, 18) Imba mbu mave yakura omaṋangero womukazendu ngu kuramena po “ounongo” mave kakara noruyaveze ndwa panguka. (Omiano 9:1) Eṱe tu rihonga okusuvera imbi Jehova mbya suvera nokutonda imbi eye mbya tonda. (Eps. 97:10) Nu eṱe tu nondjoroka mena rokutja matu yenene okuṋanga varwe okuyekurihonga okuza ‘kounongo’ mbwi. Eṱe tu ri tjimuna ovakarere mbe isana “pozondongamo zotjihuro amave tjivisa nai: ‘Indjeye, vandu ovehinondjiviro!’” Eṱe na imba mbe yakura omaṋangero nga, tu muna ouwa nai, nu ouwa mbo mau karerere nu mau tjiti kutja tu ‘kahupe’ nga aruhe otja ‘tji matu twara ondjira yozondunge.’—Omiano 9:​3, 4, 6. w23.06 24 ¶17-18

Ove u kara noumune uṋe indu omundu ngu mu ungura pamwe poo ngu mu hita pamwe oskole tje ku pura ohunga nongamburiro yoye? Hapo ove u uruma? Ovengi vetu ve uruma. Epuriro otja indo ri tu vatera okutjiwa omeripura nongamburiro yomundu ngo, tji matji tjiti kutja i rire oupupu kweṱe okuhaṋasana ombuze ombwa ku na ye. Povikando, omundu mape ya a pura epuriro otjomuano wokupaha ozombata ku na eṱe. Iho katji nokututemisa. Kombanda yaavihe, iho otjiṋa tji tji tjitwa aruhe mena rokutja ovandu ovengi ve zuva oviṋa vyoposyo ohunga na imbi mbi tu kambura mo. (Oviung. 28:22) Nu wina, tu hupa “momayuva omasenina,” moruveze ovandu mu ve “ha hangana” nu nandarire owo “ovanautwe.” (2 Tim. 3:​1, 3) Ove mape ya o ripura kutja, ‘Hapo me yenene vi okurira omupore nokukara nongengezero indu omundu tji ma vanga okupatasana ohunga noviṋa mu mbi kambura mo?’ Otjikwaye tji matji yenene okukuvatera? Okurira omupore poo ongozu maku ku vatere. Omundu omupore ka pindike hakahana, nungwari u yenena okuritjaera indu tja pindikisiwa. w23.09 14 ¶1-2

Povikando tjiva eṱe tu muna omaronga nge tu tjevera kokusuvera ovimariva nokutjita oviṋa mbi mavi tjiti kutja tu teye ozoveta za Mukuru. Nu moviṱo mbyo, mai rire nawa kweṱe indu tji twa kongorere omuhunga wa Jehova. (Jes. 48:​17, 18; 1 Tim. 6:​9, 10) Jehova ma kayenda komurungu okuungurisa ovandu okuyandja omuhunga mondatumisire ozondirise, nu nandarire indu Jesus tji ma honaparere po oure wozombura eyovi. Hapo eṱe matu kayenda komurungu okukongorera omuhunga mbo? Mai rire oupupu kweṱe okutjita nao indu tji tu kongorera omuhunga wa Jehova nai. Ngatu kayende komurungu okukongorera omuhunga wa Jehova, mbu mau kamburire mo imbwi mbu tu pewa i yovarumendu ovaṱakame eye mba zika okututjevera. (Jes. 32:​1, 2; Hebr. 13:17) Eṱe matu yenene okukongorera Omuhongore wetu Jehova nongamburiro aihe, mena rokutja eye u tjita kutja tu kare kokure noviṋa mbi mape ya avi tjiti kutja tu teye oupanga wetu ku na ye nokutuhongorera po kokutja tu kamune omuinyo waaruhe. w24.02 25 ¶17-18

Omuapostele Paulus wa ri nondjoroka okukarera Jehova, posi yokutja kaya ri oupupu ku ye okutjita nao aruhe. Potuingi Paulus aa toora ouyenda oure, nu okutoora ouyenda momayuva ngo ka kwa ri oupupu. Mouyenda we Paulus wa ri ‘momaumba wozonḓonḓu, nomaumba wovapunde voviṋa.’ Wina pa ri ovikando ovanavita na ye tji ve mu tona. (2 Kor. 11:​23-27) Nu kaaruhe ovakambure ovakwao tjaave raisa ondangi ku ye koviṋa mbya tjita okuvevatera. (2 Kor. 10:10; Fil. 4:15) Ovikwaye mbya vatera Paulus okukayenda komurungu okukarera Jehova? Paulus we rihonga ovingi ohunga novikaṋena vya Jehova okuza kOmatjangwa na koviṋa mbya tjitwa ku ye omuini. Paulus wa ri nongamburiro yokutja Jehova we mu suverere. (Rom. 8:​38, 39; Ef. 2:​4, 5) Nu eye wa suverere Jehova tjinene. Paulus wa raisa orusuvero rwe ku Jehova ‘mokukarera ovakriste ovakwao.’—Hebr. 6:10. w23.07 9 ¶5-6

Ombeibela i tja ozohoromende ‘ouhonapare.’ Ovandu ovengi ve yakura kutja onawa okukara nozohoromende, posi yokutja mape ya ave kara nonḓuviro kozoveta tjiva zozohoromende nḓo. Nu owo, mape ya ave ha yakura ozoveta nḓu ve hi nokuvanga. Ombeibela i tu raera kutja ozohoromende zovandu ze eta omauzeu tjinga a ze ri kehi yomananeno wa Satan nu moruveze rwopopezu maze ya okunyonwa. (Eps. 110:​5, 6; Omuzuv. 8:9; Luk. 4:​5, 6) Oyo wina i tu raera kutja “ingwi ngu ma pirukire ouvara mbu ri po, ma pirukire omaraerero waNdjambi.” Jehova nai u yandjera ozohoromende okutwa po ozoveta kokutja oviṋa avihe vi kare mondjeverero nu u undjira ko kutja tu kare nonḓuviro ku zo. Ku nao, eṱe matu ‘sokusuta ondjo ndji tu na yo ku wo,’ ndji mai kamburire mo okusuta otjitjamurongo, nokuraisa ondengero nonḓuviro. (Rom. 13:​1-7) Eṱe mape ya atu vara oveta ndjo otja otjiṋa otjihasemba poo otjizeu okukara nonḓuviro ku tjo. Posi yokutja, eṱe tu kara nonḓuviro kovandu mbe ri mouvara mena rokutja Jehova u tu raera okutjita nao, indu tji ve hi nokutuningira okuteya omatwako we.—Oviung. 5:29. w23.10 8 ¶9-10

Indu Simson tja kwatwa, Ovafilisti aave honaparere po nokuṋiṋikiza otjiwaṋa tjOvaisrael. (Ovapang. 13:1) Ovaisrael va munine omauzeu omengi mena rokutja Ovafilisti aave ve honaparere po noutwe. Jehova wa toorora Simson a rire ngu ‘ma kutura Ovaisrael kOvafilisti.’ (Ovapang. 13:5). Kutja ma yenenise otjiungura otjizeu hi, Simson aa hepa okuriyameka ku Jehova. Otjikando tjimwe, orupa rwovita rOvafilisti rwee ku kambura Simson motjihuro hi Lehi, mape ya tji tja ri moJuda. Ovajuda aave tira, ku nao owo va tya okuyandja Simson kovanavita. Owo va pandeka Simson nozongoze mbari ozombe nave mu yandja kOvafilisti. (Ovapang. 15:​9-13) “Nungwari ombepo ya Ndjambi ya harisa Simson omasa” na pora ozongoze nḓo. Nu okuzambo eye wa toora “eṱupa roruyeo orutarazu rwokasino” ne ri ungurisa okuzepa ovarumendu 1 000 Ovafilisti.—Ovapang. 15:​14-16. w23.09 2-3 ¶3-4

Jehova wa vandurura kouṱiṱiṱiṱi imbi mbye “rivangera okuza ko nga aruhe” mOmbeibela. Jehova ma yenene okutoorora omiano pekepeke okuyenenisa ondando ye mena rokutja avihe eye “mbya ungura vi nomaheyero wavyo.” (Omiano 16:4) Nu imbi avihe Jehova mbya ungura mavi karerere nga aruhe. Ondando ya Jehova oiṋe nu ovikwaye mbya rundurura kokutja me i yenenise? Mukuru wa raera ovandu ovatenga ohunga nondando ndjaari na yo kovandu. Owo aave ‘sokukwatasana okutakavara nokuurisa ehi nokukara nouvara kombanda yovinamuinyo avihe’ mbi ri kombanda yehi. (Gen. 1:28) Indu Adam na Eva tji va pirukira Mukuru nave tjiti kutja ouvi u ye movandu, iho katji tjaerere ondando ya Jehova kutja ai ha yenenisiwa. Eye wa rundurura omuano mu ma yenene okuyenenisa ondando ndjo. Nu tjimanga, eye we rimanena okutwa po Ouhona meyuru mbu mau yenenisa ondando ndja ri na yo kovandu na kombanda yehi.—Mat. 25:34. w23.10 20 ¶6-7

Jehova ma yenene okutuvatera okupanḓera po. Kaaruhe tji mai rire oupupu okukayenda komurungu, indu tjinene tji tu kondja noungundipare kaaṋi oure woruveze orure. Povikando tjiva, oungundipare wetu mape ya au munika aayo ouzeu pu imbwi omuapostele Petrus mbwa ri na wo. Posi yokutja Jehova ma yenene okutupa omasa kutja atu ha yumbu ohama. (Eps. 94:​18, 19) Otjotjihorera, omurumendu omukambure umwe aa rara povarumendu ovakwao oure wozombura ozengi ngunda e hi ya rihonga ouatjiri. Eye wa rundurura ehupo re, nu okuzambo wa uta okuhupa otja komirari vyOmbeibela. Posi yokutja, eye povikando aa kondjo nozonḓuma ozombi. Otjikeṋa tji tje mu vatera okupanḓera po? Eye wa tja: “Jehova u tu pa omasa. Nombatero yombepo ya Jehova . . . , ami mbe rihonga kutja me yenene [okukayenda komurungu] okuhupa omuano Jehova mbu ma vanga kutja tu hupe . . . Jehova wa yenena okundjiungurisa, nu nandarire kutja kawami ohomonena eye u kayenda komurungu okundjipa omasa.” w23.09 23 ¶12

Varumendu omitanda, eṋe mamu hepa okutjita ozongondjero kutja mu rire ovarumendu mbe horera kotjihorera tja Jesus. Eṋe mamu sokupaha ovihorera oviwa ku mamu yenene okuhorera ko, okukara nomeripura omawa, okurira omundu varwe mu mave yenene okukambura mo, okukara nondjiviro yehupo nokurirongerisa komerizirira ngu mamu kakara na wo moruyaveze. Tji we ripura ohunga noviṋa avihe mbi mo sokuungurira ko, mape ya o munu kutja ouzeu kove okutjita nao. Posi ya ove mo yenene okutjita nao. Zemburuka kutja Jehova tjiri u nonḓero okukuvatera. (Jes. 41:​10, 13) Ovakambure ovakweṋu mombongo wina mave ku vatere. Ove tji wa rire Omukriste ngu noupanga ouwa ku na Jehova, ehupo roye mari kara nondjoroka nu wina mari kara nondoṋeno. Eṱe twe mu suvera varumendu omitanda. Jehova nge mu sere ondaya otja tji mamu ungura oukukutu okurira ovarumendu Ovakriste mbe noupanga ouwa ku na Jehova. w23.12 29 ¶19-20

Ngatu tje u ri poṋa pu mwa worongana pu novakambure ovakweṋu. Eṋe mu nondjoroka pamwe nu ove o perende otjiperendero pu novakambure ovakweṋu. Tjazumba, o perende oviperendero vyarwe vivari kokutja u kare na vyarwe indu ihi otjitenga tji tji ha pitire nawa. Okutja nai u noviperendero vitatu. Mu tjimwe tjavyo o munu kutja omukambure omukweṋu ke nokumeṱameṱa. Ku nao, ove mo isa mo otjiperendero ho, mena rokutja u noviperendero vyarwe vivari omurumendu omukambure ngo novakwao mu mave meṱameṱa. Potuingi tu zemburuka oviṋa oviwa mbi twa tjita pu novakambure ovakwetu. Posi ya ngatu tje potjitjitwa tjimwe, omukambure umwe a hungire poo a tjiti otjiṋa tji tje ku hihamisa. Matu sokutjita vi nouripura mbwo? Eṱe matu sokukondja okuzemba ouripura mbwo, tjimuna tji tu isa mo otjiperendero tji twa perende. (Ef. 4:32) Eṱe matu yenene okutjita nao, mena rokutja tu zemburuka oviṋa oviwa ovingi mbi twa tjita pu na ye. Ingo omeripura ngu matu vanga okuṱiza nokuzemburuka. w23.11 12-13 ¶16-17

Omambo wOtjigrike nga ungurisiwa mba ye raisa kutja omukazendu u sokurihwikika momuano omuwa nokuripurira koumune wa varwe ohunga noviṋa mbye rihwikike. Tjiri vakazendu Ovakriste eṱe tu tjaterwa indu mamu kongorere omurari wokurihwikika mbwi. Ozondunge otjikaṋena tjarwe ovakazendu Ovakriste avehe mbe noupanga ouwa ku na Jehova tji mave hepa okukara na tjo. Ozondunge otjikeṋa? Ozondunge ze tu vatera okutjiwa kutja ovikwaye mbi ri ovisemba na mbi he ri ovisemba, nokutoorora imbi mbi ri ovisemba. Tara kotjihorera tja Abigajil. Omurumendu we wa toora omukambo omuvi mbwa tja u eta oumba keṱunḓu re arihe. Abigajil wa hakahanena po okutoora omukambo. Mena rokutja wa raisa ozondunge, eye wa yama omiinyo. (1 Sam. 25:​14-23, 32-35) Ozondunge wina ze tu vatera okutjiwa kutja oruṋe tji matu sokuhungira nu oruṋe tji matu sokumwina. Nu ze tu vatera okuraisa onḓero mu varwe nokuhina okutjita kutja ve rimune okuṋiṋikiziwa.—1 Tes. 4:11. w23.12 20 ¶8-9

Omuapostele Paulus wa tjanga omambo ngo kombongo moRoma. Ovakambure mbo ve rihonga ohunga na Jehova na Jesus, ave raisa ongamburiro, nu okuzambo ave rire Ovakriste. Mukuru opa ‘zokuvevara otjovasemba mena rongamburiro,’ nu we ve twirisa nombepo ondjapuke. (Rom. 5:1) Tjiri owo va ri nomaundjiro omawa nu aave tjiwa kutja mave keyemuna. Paulus kombunda wa tjanga kOvakriste ovatwirisiwa moEfese ohunga nomaundjiro Mukuru nge ve pa. Omaundjiro ngo aaye kamburire mo okupewa ‘otjirumatua.’ (Ef. 1:​18, EEP) Nu wina Paulus wa raera Ovakolose kutja omaundjiro wawo maye kakara pi. Eye wa tja ‘omaundjiro nga pwikirwa eṋe meyuru.’ (Kol. 1:​4, 5) Ovakriste ovatwirisiwa ve nomaundjiro wokukapendurwa komuinyo waaruhe meyuru, ku mave kahonapara pu na Kristus.—1 Tes. 4:​13-17; Omavan. 20:6. w23.12 9 ¶4-5

Embo ndi ‘okuṱakamisa’ aari ungurisiwa okuhungirira kovasorondate mbaave tjevere otjihuro kutja atji ha wirwa. Ovandu mba ri motjihuro tja tji tjeverwa i yovasorondate aave rara mohange, mena rokutja aave munu kutja ve ri mondjeverero. Momuano tjingewo, indu ohange ya Ndjambi tji mai ṱakamisa omitima nouripura wetu, eṱe tu porimana mena rokutja tu tjiwa kutja tu ri mondjeverero. (Eps. 4:8) Tjimuna Hana, nandarire kutja ongaro yetu kai nokuhakahana okurunduruka, eṱe matu yenene okukara nohange momuinyo. (1 Sam. 1:​16-18) Nu indu tji twa porimana, potuingi i rira oupupu okuripura nawa nokutoora omikambo omiwa. Ovikwaye mbi matu yenene okutjita? Tjimuna ovature votjihuro tji ve isana ovasorondate okuvetjevera, eṱe wina matu yenene okuningira Jehova okututjevera. Omomuano uṋe? Kumba ngandu tji wa munu ohange ya Mukuru. (Luk. 11:9; 1 Tes. 5:17) Indu tji u ri mouzeu, panḓera pokukumba nove mo munu ohange ya Jehova tji mai tjevere omutima nouripura woye.—Rom. 12:12. w24.01 21 ¶5-6

Mokuyapura ena ra Ihe, Jesus wa tuurunga omihihamo ngamwa avihe, omayambururiro, na indu tja kumininwa. Eye aa tjiwa kutja wa kara nonḓuviro ku Ihe moviṋa avihe, nu kaa hepa okuṱa ohoṋi. (Hebr. 12:2) Eye wina aa tjiwa kutja Satan ee mu wire moruveze oruzeu ndwo. (Luk. 22:​2-4; 23:​33, 34) Satan wa kondja nomasa okuteya ouṱakame wa Jesus, nungwari eye ka toṋene oparukaze. Jesus wa raisa kutja Satan omunavizeze nokutja ovakarere va Jehova ovaṱakame mave yenene okupanḓera pouṱakame, nandarire kehi yomarorero omazeu. Hapo mo vanga okuyorokisa Ombara yoye ndji honapara nai? Kayende komurungu okutanga ena ra Jehova amo vatere varwe okurihonga ohunga novikaṋena oviwa vya Mukuru wetu. Indu tji wa tjiti nao, ove mo horere ku Jesus. (1 Petr. 2:21) Tjimuna Jesus, ove mo yorokisa Jehova nu mo raisa kutja omunavita wa Mukuru ingwi Satan omunavizeze. w24.02 11-12 ¶11-13

Ozombura ndano nḓa kapita, ovandu mbe ri kombanda yengete va papitisiwa otjOvahongonone va Jehova. Indu ove tji we riyandja omuini ku Jehova u toorora okurira omuhongewa wa Jesus Kristus nokutjita kutja ombango ya Mukuru i rire otjiṋa otjinanḓengu mehupo roye. Okuriyandja omuini otjOmukriste ku kamburire mo ye? Jesus wa tja: “Auhe ngu ma vanga okuyenda puna Ami nge rizembe omuini.” (Mat. 16:24) Omambo wOtjingrike nga torokwa nga “nge rizembe omuini” ye yenena okuheya kutja “kahupu otja kombango ye omuini.” Otjomundu ngwe riyandja omuini ku Jehova, ove mo sokunakaura oviṋa avihe mbi ha tjata ku Jehova. (2 Kor. 5:​14, 15) Iho matji hee kutja mo nakaura “oviungura vyongaro youndu” mbi kamburire mo oruvakiro. (Gal. 5:​19-21; 1 Kor. 6:18) Hapo okukongorera omarakiza ngo maku tjiti kutja ehupo roye rire ezeu? Komoo munu nao indu tji wa suvera Jehova nu tji u nongamburiro yokutja okukongorera omatwako we maku ku vatere.—Eps. 119:97; Jes. 48:​17, 18. w24.03 2 ¶1; 3 ¶4

Jehova u yandja ombepo ye ondjapuke ku imba eye me nonyuṋe. (Mat. 12:18) Ripura ohunga nepuriro ndi, ‘Hapo ami mbi raisa ovikaṋena tjiva mbi za kovihape vyombepo ondjapuke ya Mukuru mehupo randje?’ Hapo u muna kutja ove u nomuretima na varwe okukapita indu tji wa uta okutjiwa Jehova? Otjiperi kutja otja tji mo raisa ovikaṋena vyombepo ya Mukuru, otji u kurisa ongamburiro yoye kutja Jehova u nonyuṋe move. Jehova u ungurisa onḓengu yotjisuta tjonguturiro ku imba eye me nonyuṋe. (1 Tim. 2:​5, 6) Posi ya tjike indu ngamba tji tu muna kutja Jehova ke nonyuṋe mweṱe, nandarire kutja tu nongamburiro motjisuta tjonguturiro nu twa papitisiwa? Zemburuka kutja, kaaruhe tji matu yenene okukara nongamburiro mweṱe oveni, posi ya matu yenene okukara nongamburiro mu Jehova. Eye u vara imba mbe nongamburiro motjisuta tjonguturiro kutja ovasemba nu wa kwizika okuvesera ondaya.—Eps. 5:12; Rom. 3:26. w24.03 30 ¶15; 31 ¶17