Muna ondjoroka ndji za mokuyandja

1-2. Omena raye Jehova tje tu mema kutja tu kare nondjoroka indu tji matu yandja ku varwe?

INDU Jehova tja mema ovandu, eye we ve ungura kutja ve mune enyando tjinene mokuyandja kombanda yokupewa. (Oviung. 20:35) Hapo ihi matji hee kutja eṱe katu kara nenyando indu omundu tje tu pe otjiyandjewa? Kako. Eṱe atuhe tu kara nondjoroka indu tji twa pewa otjiyandjewa. Posi ya, eṱe tu kara nenyando tjinene indu tji matu yandja ku varwe. Nu tjiri otjiṋa otjiwa kutja Jehova we tu ungura momuano mbo. Omena raye?

² Mena rokutja Jehova we tu ungura momuano mbwi, eṱe matu yenene okukurisa ondjoroka yetu oveni. Eṱe matu yenene okukurisa ondjoroka yetu, indu tji twe ripura nomiano mu matu yenene okuyandja ku varwe nu okuzambo atu tjiti nao. Tjiri otjiṋa otjiwa kutja Jehova we tu ungura momuano mbwi.—Eps. 139:14.

3. Omena raye tji ku za Jehova ‘oMukuru wondjoroka’?

³ Mena rokutja Ombeibela i tu raera kutja imba mbe yandja ku varwe ve kara nondjoroka, eṱe tu yenena okuzuva nawa kutja omena raye Jehova tje ri “Mukuru wondjoroka.” (1 Tim. 1:​11, NWT) Jehova ongwa ri omundu omutenga okuyandja ku varwe, nu kape nomundu ngu yandja okukapita ye. Omuapostele Paulus wa tja nai ohunga na ye: “Mu Ye omu tu nomuinyo nomu tu nyinganyinga nomu tu ri.” (Oviung. 17:28) Otjiperi kutja “otjiyandjewa atjihe otjiwa, notjipewa atjihe otjipwe” tji za ku Jehova.—Jak. 1:17.

4. Ovikwaye mbi mavi tu vatere kutja tu kurise ondjoroka yetu?

⁴ Eṱe atuhe tu vanga okumuna ondjoroka ndji za mokuyandja. Eṱe matu yenene okutjita nao indu tji twa horere kouharupu wa Jehova. (Ef. 5:1) Morupa ndwi, matu kakonḓonona otjihorera tje otjiwa tjokuyandja, nu wina matu kerihonga kutja matu yenene okutjita vi indu tji matu munu kutja varwe kave nondangi koviṋa mbi twe ve tjitire. Ihi matji tu vatere kutja tu kayende komurungu okuyandja ku varwe nokukurisa ondjoroka yetu.

RIRA OMUHARUPU TJIMUNA JEHOVA

5. Oviṋa viṋe tjiva Jehova mbye tu pa?

⁵ Omomiano viṋe tjiva Jehova me raisa ouharupu? Tara kovihorera tjiva. Jehova u tu pa oviṋa mbi matu hepa. Eye mape ya kaaruhe tji me tu pe oviṋa mbi matu vanga, posi ya eye aruhe u tu pa oviṋa mbi matu hepa. Otjotjihorera, eye u tjita kutja tu kare novikurya, ozombanda, noruveze pu matu rara. (Eps. 4:8; Mat. 6:​31-33; 1 Tim. 6:​6-8) Jehova ketu pe oviṋa mbi mena rokutja ma sokutjita nao. Ku nao, omena raye Jehova tje tu tjitira oviṋa mbi?

6. Ovikwaye mbi matu rihongo okuza ku Mateus 6:​25, 26?

⁶ Jehova u tu pa oviṋa mbi matu hepa mena rokutja we tu suvera. Tara komambo wa Jesus nge ri mu Mateus 6:​25, 26. (Lesa.) Jesus wa ungurisa ovihorera okuza koviutwa. Eye wa ungurisa otjihorera tjozonḓera zokuti indu tja tja: “Ozo kaze kunu nu kaze kondo, nu kaze wongere momatuwo womapwikiro.” Posi ya, tara ku imbi mbya hungira okuzambo: “Iho meyuru Eye ngo u ze kora.” Okuzambo Jesus wa pura kutja: “Neṋe kamu vananḓengu pozonḓera are?” Jesus aa vanga okutuhonga tjike? Ovakarere va Jehova ovaṱakame ovananḓengu tjinene ku ye okukapita ovipuka. Indu Jehova tje rikendera kovihepwa vyovipuka, eṱe matu yenene okukara nongamburiro kutja eye me tu parura. Tjimuna ihe ngu rikendera ovanatje ve, Jehova u parura eṱunḓu re mena rokutja we ri suvera.—Eps. 145:16; Mat. 6:32.

7. Omomuano uṋe mu matu yenene okuhorera komuano Jehova me yandja ku varwe? (Wina tara kotjiperendero.)

⁷ Tjimuna Jehova, eṱe matu yenene okuyandja ku varwe oviṋa mbi mave hepa mena rokutja twe ve suvera. Otjotjihorera, hapo mo tjiwa omurumendu poo omukazendu omukambure ngu ma hepa ovikurya poo ozombanda? Jehova ma yenene okukuungurisa kutja u mu vatere. Ovakarere va Jehova wina ve hakahana okuvatera varwe indu tji kwa tjitwa oumba. Otjotjihorera, moruveze rwokorona, ovakambure aave haṋasana ovikurya, ozombanda, noviṋa vyarwe ku na imba mbaave hepa. Ovengi wina va yandja ovimariva vyouharupu koviungura vyouye auhe. Ovimariva mbyo vya vatera ovakambure mouye auhe mba ri nouhepe mena romaumba kaaṋi. Owo va ṱakamisa omambo nge ri mOvaheberi 13:​16, ngu maye tja: “Amu zembi okutjita ouwa nokuvaterasana, orondu ozombunguhiro otja inḓa ze tjata ku Ndjambi.”

8. Omomiano viṋe mu tu muna ouwa komasa nge za ku Jehova? (Ovafilipi 2:13)

⁸ Jehova u yandja omasa. Jehova u nomasa nge ha yanda, nu u nondjoroka okuyandja omasa ngo kovakarere ve ovaṱakame. (Lesa Ovafilipi 2:13.) Hapo ove wa rora okukumba kutja u kare nomasa okupirukira omarorero, poo okutuurunga ouzeu kaaṋi? Ove wina mape ya wa kumba okukara nomasa okutjita oviṋa mbi mo hepa okutjita meyuva ndo. Indu ongumbiro yoye yokukara nomasa tji ya zuvirwa, ove mo yenene okuyenda kumwe nomambo womuapostele Paulus nga: “Ami me yenene okutjinda avihe, eye tjinga e ndji pa omasa womasorero.”—Fil. 4:​13, NWT.

9. Omomiano viṋe tjiva mu matu yenene okuhorera ku Jehova mokuungurisa omasa wetu okuvatera varwe? (Wina tara kotjiperendero.)

⁹ Eṱe katu nomasa omengi tjimuna Jehova, nu katu yenene okuyandja omasa ku varwe tjimuna tje tjita. Posi ya matu yenene okumuhorera mokuungurisa omasa wetu okuvatera varwe. Otjotjihorera, eṱe matu yenene okuvatera ovakambure ovakwetu ovanene motjiwondo poo mba vera, mokuvevatera noviṋa ponganda, poo okukeverandera oviṋa kostora. Indu tji matu yenene, eṱe matu yenene okuvatera okukohorora Etuwo rOmerikotameneno nokuriṱuna. Indu tji twa ungurisa omasa wetu okuungura oviṋa mbi, eṱe tu vatera ovakambure ovakwetu okumuna ouwa.

10. Omomuano uṋe mu matu yenene okuyanḓiparisa varwe noviṋa mbi matu hungire?

¹⁰ O zembi kutja oviṋa mbi mo hungire wina mavi yenene okuyanḓiparisa varwe. Hapo pe nomundu ngu mo munu kutja ma yenene okumuna ouwa indu tji we mu tanga? Hapo mo tjiwa omundu ngu ma hepa omahuhumiṋino? Indu tji pe ri nao, raera omundu ngo kutja u rikendera ye. Ove mo yenene okukemuryangera, okumutonena ongoze poo ngahino okumuhindira okakarata, o-email, poo okuhinda ombuze. O rikende tjinene ohunga noviṋa mbi mo sokuhungira. Omukambure omukwetu mape ya a hepa omambo omaṱiṱi worusuvero kutja ma kayende komurungu okukarera Jehova nouṱakame, poo okukara noumune ouwa ohunga nongaro me ri.—Omiano 12:25; Ef. 4:29.

11. Omomuano uṋe Jehova me ungurisa ounongo we?

¹¹ Jehova u yandja ounongo. Omuhongewa Jakobus wa tjanga kutja: “Mokati keṋu tji pe na ngu ma hepa ounongo, nga kumbe ku Ndjambi, nEye me mu pe, Ndjambi tjinga e yandja nouharupu notjari ku avehe.” (Jak. 1:5) Ihi matji raisa kutja Jehova ka ṱizire ounongo we ku ye omuini. Eye u yandja ku varwe nouharupu. Jakobus wina wa tja indu Jehova tji ma yandja ounongo, eye u tjita nao “notjari.” Eye ka vanga kutja tu fule navi indu tji matu ningire omuhunga okuza ku ye. Mouatjiri, eye u vanga kutja tu mu ningire.—Omiano 2:​1-6.

12. Omomiano viṋe mu matu yenene okuhaṋasana imbi mbi matu tjiwa ku na varwe?

¹² Tjike na eṱe? Hapo matu yenene okuhorera ku Jehova mokuhaṋasana ounongo wetu ku na varwe? (Eps. 32:8) Ovakarere va Jehova mave yenene okuhaṋasana imbi mbi ve rihongo ku na varwe momiano omingi pekepeke. Otjotjihorera, eṱe potuingi tu honga imba ovape motjiungura tjokuzuvarisa. Ovanene vombongo nomuretima ve vatera ovavatere vombongo novarumendu ovakambure mba papitisiwa okurihonga okuyenenisa omerizirira wawo mombongo. Nu ovarumendu novakazendu ovakambure mbe nondjiviro momatungiro nomaṱunino womatuwo, ve honga varwe okuungura pomatuwo nge ungurisiwa motjiungura tja Jehova.

13. Matu yenene vi okuhorera komuano Jehova me yandja ounongo?

¹³ Kondja okuhorera ku Jehova indu tji mo hongo varwe. Zemburuka kutja Jehova u tjaterwa okuyandja ounongo we. Ku nao, eṱe wina tu vanga okuhaṋasana imbi mbi matu tjiwa ku na imba mbu mave rihongo. Eṱe katu tira okuhonga varwe mena rokumuna kutja omundu ngu twa hongo me tu pingene. Povikando tjiva ovandu ve ripura kutja kave nokuhonga varwe mena rokutja kape nomundu ngwe ve honga. Kape nomukarere wa Jehova ngu ma sokuripura nao. Nungwari, eṱe tu nondjoroka okuhaṋasana imbi mbi matu tjiwa nokutjita otja pu matu yenene okuhonga varwe. (1 Tes. 2:8) Eṱe tu vanga kutja owo ve “yenene okuhonga ovakwao wina.” (2 Tim. 2:​1, 2) Indu tji twa tjiti nao, atuhe matu rire ozonongo nu matu kara nondjoroka.

INDU OVANDU TJI VE HA RAISIRE ONDANGI

14. Ovandu ovengi ve tjita vi indu tji twe ve tjitire otjiṋa?

¹⁴ Indu tji twa yandja poo tji twa tjitire varwe otjiṋa, tjinenenene ovakambure ovakwetu, owo potuingi ve tja ndangi. Owo mape ya ave tjanga okakarata okutja ndangi, poo ave raisa ondangi yawo momuano warwe. (Kol. 3:15) Indu tji va tja ndangi, tu kara nondjoroka tjinene kutja twe ve tjitire otjiṋa.

15. Ovikwaye mbi matu sokuzemburuka indu tjiva tji ve ha raisire ondangi?

¹⁵ Posi ya, povikando tjiva ovandu kave tja ndangi koviṋa mbi twe ve tjitire. Povikando tjiva, pe munika tjimuna varwe kave rikende ohunga noviṋa avihe mbi twa tjiti kutja tu ve vatere, poo okumuna kutja twa ungurisa oruveze, omasa, novimariva vyetu okuvetjitira otjiṋa. Iho tji tja tjitwa, hapo omomuano uṋe mu matu tjiti kutja atu ha pandjara ondjoroka yetu poo okupindika? Zemburuka omambo nge ri mOviungura 20:35 ku kwa zikamene orupa ndwi. Ondjoroka ndji tu kara na yo indu tji twa yandja ku varwe, kai zikamene komuano ovandu mu va raisa ondangi. Eṱe matu yenene okutoorora okuyandja nondjoroka nandarire kutja mape munika tjimuna varwe kave nondangi. Ovikwaye mbi mavi yenene okutuvatera? Ngatu tare komiano tjiva.

16. Ovikwaye mbi mavi yenene okutuvatera okukayenda komurungu okuyandja nondjoroka?

¹⁶ Zemburuka kutja indu tji mo yandja ku varwe, ove mo horere ku Jehova. Eye u yandja oviṋa oviwa kovandu nandarire kutja va raisa ondangi poo kave raisire. (Mat. 5:​43-48) Jehova wa kwizika kutja indu tji tu “hi nongamburiro yokukotorerwa” “ondjambi [yetu] otji mai rire onene.” (Luk. 6:35) Ku nao, ou momuinyo indu ovandu aruhe tji ve ha tjere ndangi. Zemburuka kutja Jehova aruhe me ku pe ondjambi koviṋa oviwa mbi u tjita okuvatera varwe, mena rokutja ove u “yandja nouharupu” poo u yandja nondjoroka.—Omiano 19:17; 2 Kor. 9:7.

17. Omomuano uṋe mu matu yenene okukara noumune ouwa indu tji matu yandja ku varwe? (Lukas 14:​12-14)

¹⁷ Omuano warwe mu matu yenene okuhorera ku Jehova indu tji matu yandja, omokuṱakamisa imbi Jesus mbya hungira mu Lukas 14:​12-14. (Lesa.) Otjingaperi kutja kanavi okuṋanga varwe keriro poo okuraisa ouwa ku imba mbu mave yenene okututjitira nao wina. Posi ya, hapo tjike indu tji twa munu kutja potuingi tu yandja ku varwe mena rokutja tu vanga okumuna otjiṋa okuza ku wo? Ndoovazu pe ri nao, rora okutjita imbi Jesus mbya hungira. Raisa ouharupu komundu ngu mo tjiwa kutja eye kamaa yenene okukupa otjiṋa mena raimbi mbi we mu tjitire. Okuzambo matu kara nondjoroka mena rokutja matu horere ku Jehova. Nu indu tji twa kara noumune tjingewo, mau tu vatere kutja aruhe tu kare nondjoroka indu tji twa yandja ku varwe nandarire kutja kave raisire ondangi.

18. Ovikwaye mbi tu ha sokutjita, nu omena raye?

¹⁸ O kara noumune ouvi ohunga na varwe. (1 Kor. 13:7) Indu varwe tji ve ha raisire ondangi, eṱe matu yenene okuripura oveni kutja: ‘Hapo owo tjiri kave nondangi, poo va zembi okutja ndangi uriri?’ Ngahino pe nomapu warwe nga tjiti kutja ave ha raisa ondangi yawo. Tjiva mape ya ave kara nondangi tjinene posi ya ai rire ouzeu ku wo okuiraisa. Owo mape ya ave ṱohoṋi okumuna ombatero, tjinenenene indu tjaave yenene okuvatera varwe morukapitaveze. Posi ya, indu tji twa suvera ovakambure ovakwetu tjiri, eṱe katu nokukara noumune ouvi ohunga na wo, nu matu kayenda komurungu okuyandja nondjoroka.—Ef. 4:2.

19-20. Ovikwaye vyarwe mbi mavi tu vatere okukara nondjoroka okuyandja ku varwe? (Wina tara kotjiperendero.)

¹⁹ Kara nomuretima. Ombara onongo Salomo wa tjanga kutja: “Yumba omboroto yoye kombanda yomeva, orondu kombunda yomayuva omengi mo keivaza rukwao.” (Omuzuv. 11:1) Omambo ngo maye tu hongo kutja povikando tjiva ovandu mape ya ave raisa ondangi yawo “korusenina,” poo kombunda yoruveze orure. Ngatu tare kotjihorera tji matji raisa ouatjiri womambo ngo.

²⁰ Ozombura ozengi nḓa kapita, omukazendu womutarere worukondwa wa tjanga orutuu komukazendu omukambure ngwa papitisiwa oupe. Morutuu rwe, eye we mu raera ounanḓengu wokukayenda komurungu okurira omuṱakame ku Jehova. Kombunda yozombura ape hambondatu, omukazendu omukambure ngo we mu yarurira orutuu, nu wa tja: “Ami me tjiwa kutja ko nokutjiwa otjiṋa hi, posi ya me vanga okukuraera omuano mu we ndji vatera oure wozombura nḓa.” Eye wa kayenda komurungu okutja: “Ove we ndji tjangera omambo omawa tjinene, nu hi ya zemba etjangwa ndi wa tamuna.”a Eye we mu raera omauzeu nga muna oure wozombura, nu okuzambo wa tja: “Povikando tjiva ami ee vanga okuyumba ohama nokuisa okurira Omuhongonone wa Jehova. Posi ya, aruhe ee zemburuka etjangwa ndwe ndji tjangera, nu re ndji pa omasa okukayenda komurungu okurira omuṱakame, nokundjivatera kutja e ha yumbu ohama.” Eye wa weza kutja: “Oure wozombura hambondatu nḓo, kape notjiṋa tjarwe tji tje ndji yanḓiparisa okukapita orutuu rwoye netjangwa ndwe ndji tjangera.” Omukazendu womutarere worukondwa tjiri wa ri nondjoroka okumuna orutuu ndwo kombunda yozombura ozengi. Mape ya ape kapita oruveze orure kombunda yaindu omundu tji me tu raisire ondangi koviṋa oviwa mbi twe mu tjitira.

21. Ongwaye tji we rimanenene okukayenda komurungu okuhorera kouharupu wa Jehova?

²¹ Jehova we tu mema kutja tu kare nondjoroka tjinene indu tji matu yandja kombanda yaindu tji matu pewa. Eṱe tu fula nawa indu tji matu yenene okuvatera ovakambure ovakwetu, nu tu kara nondjoroka indu tji mave raisa ondangi yawo. Posi ya, kainatja kutja omundu wa raisa ondangi poo ka raisire , eṱe tu tjaterwa kutja twa tjiti otjiṋa otjisemba. O zembi kutja, kainatja kutja wa yandja tjike “Ndjambi ongu ma sora okukuyarurira ovingi komurungu waimbyo!” (2 Ekuruh. 25:9) Ku nao, Jehova aruhe me ku pe ovingi okukapita imbi mbi wa yandja. Nu indu Jehova tje tu pe ondjambi, oyo i rira ondjambi osembasemba. Ngatu rimanene okukayenda komurungu okuhorera Tate wetu womeyuru omuharupu.