Kaweṱe atuyerike

1-2. (a)Omena raye tji tu nongamburiro kutja kaweṱe atuyerike indu tji tu ri momauzeu? (b) Morupa ndwi matu kahungirira ku ye?

INDU tji tu nomauzeu omanene, mape ya atu rimunu tjimuna oweṱe atuyerike mokayaha okaṱiṱi momuronga mbwa handja. Posi ya, katu tuurunga omauzeu atuyerike. Tate wetu womeyuru u muna omauzeu ngu tu muna, nu wa kwizika kutja me tu vatere okutjinda omauzeu wetu. Eye u raera ovakarere ve ovaṱakame kutja: “Me ku vatere.”—Jes. 41:10.

² Morupa ndwi matu katara komuano Jehova me tu vatera (1) mokutuhongorera po, (2) mokutupa imbi mbi matu hepa, (3) mokututjevera (4) nokutuhuhumiṋa. Jehova wetu raera kutja kainatja kutja omauzeu yeṋe ngu matu munu mehupo, eye kemee tu zembi ko nu kemee twesa ko. Ku nao kaweṱe atuyerike.

JEHOVA U TU HONGORERA PO

3-4. Omomuano uṋe Jehova me tu hongorera po? (Epsalme 48:14)

³ Lesa Epsalme 48:14. Jehova ka undjire ko kutja tu rinane oveni. Omomuano uṋe eye ndino me hongorera po ovakarere ve ovaṱakame? Omuano umwe me tjita nao omokupitira mOmbeibela. (Eps. 119:105) Okupitira mEmbo re Ombeibela, Jehova u tu vatera okutoora omikambo omiwa, nokukara novikaṋena oviwa mbi tjita kutja tu kare nondjoroka mehupo nai, nu tu yenene okukahupa nga aruhe moruyaveze.a Otjotjihorera, eye u tu honga kutja tu ise ongore, okukara nouatjiri moviṋa avihe mbi matu tjiti, nokuraisa orusuvero ku varwe okuza komutima. (Eps. 37:8; Hebr. 13:18; 1 Petr. 1:22) Tji twa raisa ovikaṋena mbyo, tu rira ovanene ovawa, omapanga omawa womorukupo, nu tu rira omapanga omawa ku varwe.

⁴ MOmbeibela mu novihorera vyovandu mba ri nomauzeu noumune tjimuna imbo owetu. (1 Kor. 10:13; Jak. 5:17) Indu tji twa lese ohunga novihorera mbyo na tu vi ungurisa, eṱe matu munu ouwa momiano vivari. Omutenga, tu tjiwa kutja kaweṱe atuyerike mbu tu muna omauzeu mehupo. Varwe wina va muna omauzeu tjimuna ngu tu muna, nu nombatero ya Jehova va tuurunga omauzeu ngo. (1 Petr. 5:9) Omutjavari, tu rihonga kutja ovikwaye mbi mavi yenene okutuvatera okutuurunga omauzeu nokukara nondjoroka.—Rom. 15:4.

5. Hapo Jehova u ungurisa oouṋe okutuhongorera po?

⁵ Jehova wina u ungurisa ovakambure ovakwetu okutuhongorera po.b Otjotjihorera, ovatarere vorukondwa ve ryangera ozombongo okuyekutuyanḓiparisa. Omahungi wawo ye kurisa ongamburiro yetu, nu ye tu vatera okukara nombwaneno. (Oviung. 15:40–16:5) Ovanene vombongo ve ungura oukukutu okuvatera auhe wetu okukara popezu na Jehova. (1 Petr. 5:​2, 3) Ovanene ve honga ovanatje vawo okusuvera Jehova, nokutja mave yenene vi okutoora omikambo omiwa nokukara nomeritjindiro omawa. (Omiano 22:6) Ovakazendu ovakambure mbe kura mongamburiro ve vatera ovakazendu omitanda mokuraisa otjihorera otjiwa, mokuvepa ondunge ombwa, na mokuveyanḓiparisa.—Tit. 2:​3-5.

6. Kutja tu mune ouwa mbu za mokuhongorerwa po i Jehova matu sokutjita vi?

⁶ Jehova we tu pa avihe mbi matu hepa kutja tu toore omikambo omiwa nokukara nondjoroka mehupo. Matu yenene vi okuraisa kutja tu nondangi kombatero aihe ndje tu pa? Omiano 3:​5, 6 mari tja: “Ṱakama mu Muhona nomutima woye auhe. O riyameke ku imbi mbi mo tjangovasi mo tjiwa.” Indu tji twa tjiti nao, eye ma ‘sembamisa ondjira’ yetu, pu mape hee kutja me tu vatere okuyepa omauzeu omengi, nokukara nehupo rondjoroka. Eṱe tu nondangi tjinene ku Jehova kutja u tu tjiwa nawa, nu we tu suvera tjinene nga tje tu pa omirari auhe wetu mbi ma hepa.—Eps. 32:8.

JEHOVA U TU PA IMBI MBI MATU HEPA

7. Omomiano viṋe tjiva Jehova me tu pa imbi mbi matu hepa? (Ovafilipi 4:19)

⁷ Lesa Ovafilipi 4:19. Jehova u tu hongorera po, nu wina u sera ozongondjero zetu ondaya otja tji matu ungura oukukutu kutja tu mune ovikurya, ozombanda, nopoṋa pu matu kara. (Mat. 6:33; 2 Tes. 3:12) Kanavi okurikenda ohunga noviṋa tjimuna mbyo, posi ya Jehova kavanga kutja tu rikende tjinene. (Mat. 6:25) Omena raye? Omena rokutja Tate wetu kamaa isa ovakarere ve ovaṱakame moruveze rwouzeu. (Mat. 6:8; Hebr. 13:5) Eṱe matu yenene okukara nongamburiro momambo we wokutja me tu pe imbi mbi matu hepa.

8. Ovikwaye Jehova mbya tjitira David?

⁸ Ripura nomuano Jehova ma vatera David. Indu David tjaa ṱara kOmbara Saul, Jehova wa yandja ku David na kovarwe ve vovita oviṋa mbyaave hepa kutja ve hupe. Indu David tjee ripura ohunga nomuano Jehova me mu tjevera oure wozombura nḓo, eye wa tja: “Ami mba ri omutanda, nu nambano mba kurupa, nu nga mba hiya muna omusemba a isiwa i Muhona, norukwato rwe amaru ṱondjara.” (Eps. 37:25) Tjimuna David, ove wina mape ya wa muna omuano Jehova me ku pa imbi mbyo hepa, poo ovakambure ovakweṋu mbyaave hepa moruveze rwouzeu.

9. Omomuano uṋe Jehova ndino me yandja oviṋa ovakarere ve mbi mave hepa indu tji kwa tjitwa omaumba? (Wina tara koviperendero.)

⁹ Jehova wina u yandja oviṋa kovakarere ve mbi mave hepa indu tji kwa tjitwa oumba. Otjotjihorera, indu tji kwa handjauka ondjara moJerusalem meserewondo etenga, Ovakriste okuza kotuveze twarwe va hinda oviṋa ovakambure ovakwao mbyaave hepa. (Oviung. 11:​27-30; Rom. 15:​25, 26) Ovakarere va Mukuru ndino wina ve vatera ovakambure ovakwao mbe ri mouzeu. Indu tji kwa tjitwa oumba, Jehova norusuvero u hinga ovakarere ve okuyandja oviṋa mbi mave hepa tjimuna ovikurya, omeva, ozombanda, nomiti omipange ku imba mbe kara kotuveze ku kwa tjitwa oumba. Orupa rwomatungiro ru ṱuna ozonganda nOmatuwo wOmerikotameneno nga ṱunwa i youmba. Nu ovakarere va Jehova ve hakahana okuhuhumiṋa nokuyandja omayanḓiparisiro okuza mOmbeibela ku imba mba pandjara ozonganda zawo poo ovasuverwa vawo.c

10-11. Mo rihongo ye okuza kotjihorera tja Borys?

¹⁰ Jehova wina u yandja nouharupu ku imba mbe he mu karere. Momuano tjingewo, eṱe tu horera ku Jehova mokupaha omiano okuraisa ouwa ku imba mbe he mu karere. (Gal. 6:10) Indu tji twa tjiti nao, eṱe mape ya atu yenene okuvevatera okurihonga ovingi ohunga na Jehova novakarere ve. Ngatu tare kotjihorera tja Borys, otjiuru tjoskole ngwa tura moUkraine. Nandarire kutja Borys ka umwe wOvahongonone va Jehova, eye aruhe aa tjindi ovanatje mba ri Ovahongonone va Jehova momuano omuwa, nu aa raisa ondengero kongamburiro yawo. Mena rokutja kwa ri novita, eye wa tya okuisa okaresevate ma turire okuyenda koruveze ku kwa ri nondjeverero, nu ovakambure ovakwetu ve mu vatera. Kombunda, Borys wa kakara pOmazemburukiro wOnḓiro ya Jesus. Eye tji me ripura ohunga noviṋa avihe ovakambure ovakwetu mbi ve mu tjitira, Borys wa tja: “Ovahongonone va Jehova ve ndji raisira ouwa nu ve ndji tjinda nawa. Ami tjiri mbi nondangi kOvahongonone va Jehova.”

¹¹ Eṱe wina matu yenene okuhorera ku Tate wetu wotjari, mokuraisa orusuvero ku imba mbe nouhepe, nandarire kutja Ovahongonone va Jehova poo indee. (Luk. 6:​31, 36) Eṱe matu zeri kutja orusuvero ndu matu ve raisire maru ve hingi okuvanga okurihonga ovingi ohunga na Jehova nokuuta okumukarera. (1 Petr. 2:12) Posi ya nandarire kutja va toorora okukarera Jehova poo indee, eṱe matu kara nondjoroka mena rokutja “mokuyandja mu nenyando tjinene.”—Oviung. 20:35.

JEHOVA U TU TJEVERA

12. Ondjeverero iṋe Jehova ndja kwizika okuyandja kovakarere ve otjotjimbumba? (Epsalme 91:​1, 2, 14)

¹² Lesa Epsalme 91:​1, 2, 14. Jehova wa kwizika okutjevera ovakarere ve ndino okuza koviṋa mbi mape ya avi teya oupanga wawo ku na ye. Eye kamaa yandjere Satan okutjaera ovakarere ve okurikotamena ku ye momuano mbwe vanga. (Joh. 17:15) Moruveze ‘rwondatumisire ondirise,’ eṱe matu yenene okukara nongamburiro okuura mu Jehova, kutja ma yenenisa omakwizikiro we wokutuvatera okukayenda komurungu okukara nongamburiro yomasa nokutuyama.—Omavan. 7:​9, 14.

13. Omomiano viṋe Jehova me tu tjevera kourike wetu?

¹³ Jehova u tu tjevera vi kourike wetu? Jehova we tu pa Ombeibela kutja tu tjiwe pokati kouwa nouvi. (Hebr. 5:14) Indu tji matu ṱakamisa imbi mbi matu rihongo okuza mOmbeibela, eṱe tu tjevera oupanga wetu ku na ye, nu wina tu toora omikambo mbi mavi tu vatere okukara nondjoroka nokurira ovaveruke mehupo retu. (Eps. 91:4) Nu wina Jehova we tu pa ovakambure ovakwetu mbe tu vatera okurira ovaṱakame ku ye. (Jes. 32:​1, 2) Ovakambure ovakwetu mombongo va suvera Jehova, nu ve nonḓuviro ku ye. Okukara pu na wo pozombongarero zombongo, motjiungura tjokuzuvarisa, na potuveze twokurikuturisa ouruvi ku tu tunduuza nokutuvatera okuyepa imbi mbi ri ovivi.—Omiano 13:20.

14. (a) Ongwaye Jehova tje he tu tjevere komauzeu ayehe? (b) Epsalme 9:10 ri tu pa ongamburiro yaye? (Wina tara komambo wokehi.)

¹⁴ Morukapitaveze, Jehova povikando tjiva aa tjevere ovakarere ve kutja ave ha hihamisiwa poo ave ha zepewa. Posi ya kaaruhe tjaa tjiti nao. Ombeibela i honga kutja atuhe tu yenena okumuna omauzeu ngu tu hi nokuundjira ko. (Omuzuv. 9:11) Jehova wina wa yandjera ovakarere ve tjiva vorukapitaveze okumuna ondatumisire nu nandarire onḓiro, okuraisa kutja Satan omunavizeze. (Job 2:​4-6; Mat. 24:9) Oviṋa mbyo wina vi tjitwa kovakarere va Jehova ndino. Nandarire kutja Jehova mape ya a ha isa po omauzeu wetu, eṱe matu yenene okukara nongamburiro kutja eye kamaa isa imba mbe mu suvera.d—Eps. 9:10.

JEHOVA U TU HUHUMIṊA

15. Omomuano uṋe mu tu huhumiṋwa i yongumbiro, Embo ra Mukuru, novakambure ovakwetu? (2 Ovakorinte 1:​3, 4)

¹⁵ Lesa 2 Ovakorinte 1:​3, 4. Povikando tjiva tu kara noruhoze, ozongendo, nombameno. Ngahino nai, u ri mongaro onḓeu ndji mai tjiti kutja u rimune ourike. Hapo pe nomundu ngu ma tjiwa ongaro mu u ri? Jehova ma tjiwa ongaro mu u ri. Eye u tjiwa omauzeu mu tu ri, nu wina “u tu vatera momauzeu wetu aehe.” Omomuano uṋe? Indu tji matu kumbu ku Jehova okuza komutima, eye u tu pa ‘ohange yaNdjambi ndja kapita ozondunge azehe zovandu.’ (Fil. 4:​6, 7) Eṱe wina tu muna omahuhumiṋino indu tji matu lese Ombeibela. MOmbeibela, Jehova u tu raera omuano me tu suvera, u tu honga okukara nozondunge, nu wina u tu pa omaundjiro. Eṱe wina tu muna omahuhumiṋino pozombongarero zombongo pu tu rihonga oviṋa oviyanḓiparise okuza mOmbeibela, nu pu tu kara pu novakambure ovakwetu mbe tu suvera.

16. Ove mo rihongere ko tjike kotjihorera tja Nathan na Priscilla?

¹⁶ Eṱe matu yenene okumuna omuano Jehova me yandja omahuhumiṋino nomayanḓiparisiro okupitira mOmbeibela, okuza kotjihorera tja Nathan na Priscilla, mba tura moUnited States. Ozombura tjiva nḓa kapita, owo va tya okutjindira koṋa ku ku nouhepe wovazuvarise. Nathan wa tja: “Eṱe twa ri nongamburiro kutja Jehova ma sere ozongondjero zetu ondaya.” Posi yokutja, owo tji va vaza motjiungura tjawo otjipe, va uta okuvera nu va ri nouzeu wotjimariva. Korusenina, ovakupasane va yaruka kehi rawo nu owo va kayenda komurungu okukara nouzeu wotjimariva. Nathan wa tja: “Ami mba kuminwe kutja omena raye Mukuru tje hi na we tu vatera, tjimuna tjaatu undjire ko. Ami mba uta okumuna kutja mutu mba tjita otjiṋa otjivi.” Posi ya, otja oruveze tjaaru kayenda, Nathan na Priscilla va uta okumuna kutja Mukuru keeve nakaura. Nathan wina wa tja: “Moruveze rwouzeu ndwo, Ombeibela ya ri tjimuna epanga rounongo nda ri tu pe omahuhumiṋino nokutuhongorera po. Okuripurira komuano Jehova mee tu vatera okutuurunga, pendje nokuyandja ombango komauzeu wetu, kwe tu vatera okukara nongamburiro kutja Jehova ma kayenda komurungu okutuvatera moruyaveze.”

17. Omukazendu omukambure wena Helga wa muna vi omahuhumiṋino? (Wina tara kotjiperendero.)

¹⁷ Ovakambure ovakwetu mave yenene okutupa omahuhumiṋino. Omomuano uṋe? Ngatu tare kotjihorera tjomukazendu omukambure Helga, ngwa tura moHungary. Oure wozombura ozengi, eye wa ri nomauzeu ngaaye tjiti kutja ma kare nombameno. Posi ya indu tji me ripurire koviṋa mbya tjitwa ku ye, eye wa muna kutja Jehova aa ungurisa ovakambure ovakwao mombongo okumuhuhumiṋa. Eye wa tja: “Jehova aruhe ee ndji vatere indu tji mba ngundipara mena roviungura, tjee tjevere omuatje wandje ngwa verere, na indu tjee munu omauzeu warwe. Eyuva arihe, oure wozombura 30, kape neyuva Mukuru nde hi na wa yenenisa omakwizikiro we wokundjihuhumiṋa. Eye aruhe u ndji huhumiṋa okupitira momambo omawa nomayanḓiparise okuza ku varwe. Ami potuingi ee hindirwa ombuze, nokutjangerwa okakarata, poo okutangwa moruveze ndu ri rwo.”

18. Omomuano uṋe mu matu yenene okuhuhumiṋa varwe?

¹⁸ Eṱe tu nondjingonekero okuhorera Mukuru wetu mokuhuhumiṋa varwe. Omomuano uṋe mu matu yenene okutjita nao? Eṱe matu yenene okupuratena ku wo nomuretima, okuhungira ku na wo momuano omuwa nokuvevatera momiano pekepeke. (Omiano 3:27) Eṱe tu kondja okuhuhumiṋa avehe mbe ri mouzeu, nandarire imba mbe ha karere Mukuru. Indu ovararanganda vetu tji ve ri moruhoze, tji va vere, poo tji ve nozongendo, eṱe tu keveryangera, tu puratena ku wo, nu tu ve raisira omatjangwa omayanḓiparise okuza mOmbeibela. Indu tji matu horere ku Jehova ngu ri ‘Ndjambi womayaruriro pehi aehe womutima,’ eṱe tu vatera ovakambure ovakwetu okutuurunga omauzeu. Nu wina mape ya atu vatere imba mbe he rikotamene ku Mukuru kutja ve vanga okurihonga ohunga na ye.—Mat. 5:16.

JEHOVA ARUHE ME TU VATERE

19. Ovikwaye Jehova mbye tu tjitira, nu omomuano uṋe mu matu yenene okuhorera ku ye?

¹⁹ Jehova u rikendera tjinene ku imba avehe mbe mu suvera. Eye ke twesa indu tji tu nomauzeu. Jehova u rikendera kovakarere ve ovaṱakame, tjimuna omunene tje rikendera komuatje we. Eye u tu hongorera po, u tu pa imbi mbi matu hepa, u tu tjevera, nu u tu huhumiṋa. Eṱe tu horera ku Tate wetu worusuvero indu tji matu vatere nokutunduuza varwe tji ve ri momauzeu. Mouye mbwi, mape ya atu munu omauzeu ngu maye tu hihamisa, posi ya tu nongamburiro kutja Jehova u ri pu na eṱe. Kombanda yaavihe, eye wa kwizika kutja: “O tira, Ami mbi ri puna ove!” (Jes. 41:10) Omakwizikiro nga ye tu pongamburiro yokutja tjiri kaweṱe atuyerike.