“Rimaneye ndinondi kutja mamu vanga okukarera uṋe”

1. Ovikwaye mbi matu sokutjita kutja tu kare nondjoroka yatjiri, nu omena raye? (Jesaja 48:​17, 18)

TATE wetu womeyuru we tu suvera tjinene, nu u vanga kutja tu yorokere ehupo nai na moruyaveze. (Omuzuv. 3:​12, 13) Eye we tu uta kutja tu yenene okuungura oviṋa tjiva momuano wapeke, posi yokutja eye ke tu memene kutja tu yenene okurinana oveni, poo okurityera kutja ovikwaye mbi ri ovisemba na mbi he ri ovisemba. (Omuzuv. 8:9; Jer. 10:23) Eye u tjiwa kutja matu sokumukarera nokukara nonḓuviro ku ye kutja tu kare nondjoroka yatjiri.—Lesa Jesaja 48:​17, 18.

2. Ovikwaye Satan mbye vanga kutja tu kambure mo, nu Jehova wa tjita tjike?

² Satan u vanga kutja tu kambure kutja matu yenene okukara nondjoroka nokuhina Jehova, nokutja ovandu mave yenene okurinana oveni nondoṋeno. (Gen. 3:​4, 5) Jehova wa yandjera ovandu okurinana oveni oure woruveze kaaṋi okuraisa kutja Satan omunavizeze. Oupupu okumuna kutja omananeno wovandu kaye nondoṋeno. Posi yokutja, Ombeibela i hungira ohunga novarumendu novakazendu ovengi mba ri nondjoroka mena rokutja aave rikotamene ku Jehova. Umwe wawo ngwa ri nondjoroka tjinene wa ri Jesus Kristus. Morupa ndwi, matu katara kutja omena raye Jesus tja toorora okurikotamena ku Jehova. Okuzambo, matu katara kutja omena raye tji twa sokurikotamena ku Tate wetu womeyuru Jehova. Korusenina, matu katara komapu tjiva kutja omena raye tji tu toorora okurikotamena ku Jehova.

OMENA RAYE JESUS TJA TOORORA OKURIKOTAMENA KU JEHOVA?

3. Ovikwaye Satan mbya tja ma yandja ku Jesus, nu Jesus wa toorora okutjita tjike?

³ Indu tja ri kombanda yehi, Jesus aa sokutoorora kutja ma karere uṋe. Katjisupi kombunda yombapitisimo ye, Satan wa raera Jesus kutja me mu pe omauhona ayehe wouye indu tja woro ozongoro ne rikotamene ku ye, nandarire otjikando tjimwe uriri. Jesus wa zira kutja: “Za po, Satan! Omatjangwa maye tja: ‘Rikotamena ku Muhona Ndjambi woye, nu u karere Ye erike!’” (Mat. 4:​8-10) Omena raye Jesus tja toorora okutjita nao? Ngatu tare komapu tjiva.

4-5. Omena raye Jesus tja toorora okukarera Jehova?

⁴ Epu enanḓengu Jesus nda toororera okukarera Jehova ya ri mena rokutja we mu suvera tjinene. (Joh. 14:31) Kombanda yanao, Jesus u rikotamena ku Jehova mena rokutja ootjiṋa otjisemba okutjita. (Joh. 8:​28, 29; Omavan. 4:11) Jesus u tjiwa kutja Jehova ongwe tu uta, eṱe matu yenene okukambura mu ye, nu u tu pa oviṋa ovingi oviwa. (Eps. 33:4; 36:9; Jak. 1:17) Jehova aruhe aa hungire ouatjiri ku Jesus, nu we mu pa avihe mbye na vyo. (Joh. 1:14) Posi ya, Satan wa panguka tjinene ku Jehova. Satan wa eta ouvi nonḓiro kovandu. Eye omunavizeze, ngu ripurira ku ye omuini, nu ngu nomunenetima. (Joh. 8:44) Mena rokutja Jesus aa tjiwa omapu ngo, eye kaa vanga okuhorera ku Satan nokupirukira Jehova.—Fil. 2:​5-8.

⁵ Epu rarwe Jesus nda toororera okukarera Jehova ya ri mena roviṋa oviwa mbyaavi sokuyenenisiwa mena rouṱakame we. (Hebr. 12:2) Eye aa tjiwa kutja indu tja kayenda komurungu okurira omuṱakame ma yapura ena ra Ihe, nu ma tjiti kutja ouvi nonḓiro avi ha kara ko rukwao.

OMENA RAYE TJI TWA SOKURIKOTAMENA KU JEHOVA ERIKE?

6-7. Omena raye ovandu ovengi ndino tji ve ha karere Jehova, nu ongwaye tji twa sokurikotamena ku ye erike?

⁶ Ovandu ovengi ndino kave karere Jehova mena rokutja kave tjiwa ovikaṋena vye oviwa noviṋa oviwa mbye ve tjitira. Owo ve ri tjimuna ovandu omuapostele Paulus kaa zuvarisa ko moAtene. Owo wina kaave tjiwa Mukuru.—Oviung. 17:​19, 20, 30, 34.

⁷ Paulus wa kahurura kovandu moAtene kutja Mukuru watjiri u “yandja omuinyo nosuvaneno noviṋa avihe ku ngamwa auhe.” Eye wa weza kutja: “Mu Ye omu tu nomuinyo nomu tu nyinganyinga nomu tu ri.” Mukuru ongu ri Omuute nu “pomundu umwe Eye wa utire po omihoko avihe vyovandu,” ku nao eṱe matu sokurikotamena ku ye erike.—Oviung. 17:​25, 26, 28.

8. Ovikwaye Jehova mbye hi na maa roro okutjita, nu omomuano uṋe me tu raisira kutja we tu suvera tjinene?

⁸ Otjomuute nOmuhonapare weyuru nehi, Jehova atja ṋiṋikiza ovandu okurikotamena ku ye. Posi ya, eye kamaa roro okutjita nao. Eye we tu pa oviraisiro ovingi okuturaisira kutja okeri, nu wa suvera auhe wetu nomasa. Eye u vanga kutja ovandu ovengi ve rire omapanga we nga aruhe. (1 Tim. 2:​3, 4) Ku nao, Jehova we tu rongerisa okuhonga varwe ohunga nondando ye noviṋa oviwa mbi ma katjitira ovandu. (Mat. 10:​11-13; 28:​19, 20) Nu we tu pa ozombongo mu tu yenena okurikotamena ku ye nokumuna ombatero okuza kovanene vombongo vorusuvero.—Oviung. 20:28.

9. Omomiano viṋe Jehova me raisa kutja wa suvera ovandu avehe?

⁹ Jehova u raisa orusuvero rwe mokuyandja oviṋa oviwa nandarire ku imba mbe ha vanga okukambura mu ye. Ripura ohunga notjiṋa hi: Oure wozombura ozengi, ovandu ovengi va toorora okutjita ombango yawo oveni moruveze rwokukara nonḓuviro ku Jehova. Nandarire nao, Jehova norusuvero u ve pa oviṋa mbi mave hepa kutja ve hupe nokukara nondjoroka mehupo rawo. (Mat. 5:​44, 45; Oviung. 14:​16, 17) Eye u ve yandjera kutja ve yenene okukara nomapanga nomaṱunḓu nge ve suvera. Owo wina ve yenena okukara novanatje, oviungura, nokukara nondjoroka mehupo. (Eps. 127:3; Omuzuv. 2:24) Oviṋa avihe mbyo vi raisa oukahu kutja Tate wetu womeyuru wa suvera ovandu avehe. (Eks. 34:6) Nambano matu kerizemburukisa omapu tjiva wokutja omena raye tji twa toorora okukarera Jehova nokutja omomuano uṋe me tu sera ondaya.

OMENA RAYE TJI TU TOORORA OKUKARERA JEHOVA?

10. (a) Epu riṋe enanḓengu ndi tu hinga okukarera Jehova? (Mateus 22:37) (b) Ouwa waye mbu wa muna okuza komuretima wa Jehova? (Epsalme 103:​13, 14)

¹⁰ Tjimuna Jesus, epu enanḓengu ndi tu hinga okukarera Jehova omena rokutja twe mu suvera tjinene. (Lesa Mateus 22:37.) Indu tji twe rihongo ohunga novikaṋena vya Jehova, eṱe tu vanga okutumbuka popezu na ye. Otjotjihorera, Jehova u nomuretima na eṱe. Indu Ovaisrael tji ve ha ri nonḓuviro ku ye, eye we ve ningira kutja “ve ise okutjita ouvi.” (Jer. 18:11) Jehova u tjiwa kutja twa ungurwa poruuma. (Lesa Epsalme 103:​13, 14.) Indu tji mo ripura ohunga nomuretima wa Jehova novikaṋena vye vyarwe oviwa, hapo iho katji ku hingi okumukarera nga aruhe?

11. Omapu yeṋe yarwe nge tu hinga okukarera Tate wetu womeyuru?

¹¹ Eṱe wina tu karera Jehova mena rokutja ootjiṋa otjisemba okutjita. (Mat. 4:10) Nu tu tjiwa kutja indu tji tu ri ovaṱakame ku Jehova maku vatere okuyapura ena ra Jehova, okuraisa kutja Satan omunavizeze, nokuyorokisa omutima wa Tate wetu. Nu tji twa toorora okukarera Jehova nai, eṱe matu kara nomaundjiro wokumukarera nga aruhe.—Joh. 17:3.

12-13. Matu rihongo tjike okuza kotjihorera Jane na Pam?

¹² Eṱe matu yenene okusuvera Jehova nomasa nandarire kutja oweṱe ovaṱiṱi, nu orusuvero rwetu ndwo maru yenene okukurira ko otja tji matu kuru. Tara kotjihorera tja Jane na Pam,a ovakazona vevari omuangu nerumbi. Jane wa ri nozombura 11 nu Pam wa ri nozombura 10, indu tji va uta okurihonga Ombeibela. Nandarire kutja ovanene vawo kava ri nonḓero okurihonga Ombeibela, owo va yandjera Jane na Pam okurihonga ku nOvahongonone va Jehova. Posi ya, owo aave yenene okutjita nao indu tji va kayenda komurungu okuyenda kokereka pu neṱunḓu rawo onavyeka. Jane wa tja: “Oviṋa Ovahongonone va Jehova mbi ve ndji honga okuza mOmbeibela vye ndji vatera okuhinokuungurisa ovipurukise nokukara kokure nomahakaeneno womonyama, tjimuna ovanatje ovengi poskole tjaave tjiti.”

¹³ Kombunda yozombura ozonḓiṱi, Jane na Pam va rira ovazuvarise. Kombunda, owo va rira ovakandjira nandarire kutja aave tjevere ovanene vawo mba kurupire. Jane wa kahurura omuano mbwaa fula ohunga noviṋa avihe Jehova mbye ve tjitira. Eye wa tja: “Ami mbe rimunina omuini kutja Jehova u ṱakamisa omapanga we, nu ‘u tjiwa imba ove’ otja ku 2 Timoteus 2:19.” Tjiri, Jehova aruhe u rikendera imba mbe toorora okumusuvera nokumukarera.

14. Hapo omambo wetu nomuano mbu tu ritjinda vi raisa vi kutja tu yandja oruvara kena ra Jehova? (Wina tara koviperendero.)

¹⁴ Eṱe tu vanga okukohorora ena ra Jehova kovizeze avihe. Tara kotjihorera hi: Ngatu tje u nepanga ropopezu ngu tjita ouwa, ngu ri ondjandje nu ngu isira. Eyuva rimwe, o zuu omundu ngu ma tja epanga roye omundu omuvi nu ke nouatjiri. Hapo ove mo tjiti vi? Ove mo karere ku ye. Momuano tjingewo, indu tji matu zuu ovizeze ohunga na Jehova, eṱe tu mu karera mokuhungira ouatjiri ohunga na ye. (Eps. 34:1; Jes. 43:10) Eṱe tu raisa kutja tu vanga okukarera Jehova nomutima wetu auhe momambo na movitjitwa vyetu.

15. Omuapostele Paulus wa muna ouwa waye mokurundurura ozondando ze? (Ovafilipi 3:​7, 8)

¹⁵ Eṱe tu kara nonḓero okutjita omarundurukiro mehupo retu kutja tu yorokise Jehova, poo okuungura ovingi motjiungura tje. Otjotjihorera, omuapostele Paulus wa ri notjihako tjokombanda mongamburiro yOvajuda, posi ya eye wa isa ongamburiro ndjo kokutja ma yenene okurira omukongorere wa Kristus nokukarera Jehova. (Gal. 1:14) Ku nao, eye wa ri nehupo ewa motjiungura tja Jehova nu wa muna ondjambi yokukahonapara pu na Kristus meyuru. Eye kaari nomuhihamwatima mena romukambo mbwa toora okukarera Jehova. Eṱe wina kamaatu kara nomuhihamwatima.—Lesa Ovafilipi 3:​7, 8.

16. Matu rihongo tjike okuza kotjihorera tja Julia? (Wina tara koviperendero.)

¹⁶ Indu tji twa tjiti kutja omerikotameneno wetu ku Jehova ye rire omananḓengu mehupo retu, eye me tu sere ondaya nai na moruyaveze. Tara kotjihorera tjomukazendu omukambure wena Julia. Ngunda e hi ye rihonga ouatjiri, Julia aa imbura mokereka yawo okuza kouṱiṱi. Eye aa imbura nawa, ku nao wa muna omahongero kutja ma yenene okurira omuimbure wakatjoruhonga. Ousupi kombunda yanao, Julia wa rira omutjiukwandu, nu eye wa uta okuimbura potuveze otutjiukwa. Ngunda e ri poskole ndjaai tjiukirwa kokuimbura, omuatje omuzandu moklasa wa uta okuhungira kuna ye ohunga na Mukuru nu we mu kahururira kutja Mukuru u nena, nu ena re oJehova. Kombunda yanao, Julia wa uta okurihonga Ombeibela tuvari motjivike. Korusenina, eye wa tya okuungurisa oruveze nomasa we okukarera Jehova moruveze rwokurira omuimbure wakatjoruhonga. Ondando ndjo ya ri onḓeu. Eye wa tja: “Ovandu ovengi ve ndji raera kutja me morosa otjiyandjewa tjandje, indu tji mba isa okuimbura kutja mbi karere Jehova. Posi ya, ami ee vanga okuungurisa oruveze rwandje okukarera Jehova.” Hapo eye u noumune uṋe ohunga nondando ndja toora oure wozombura zokombanda 30 nḓa kapita? Eye wa tja: “Ami mbi nondjoroka kutja mba toorora okukarera Jehova, nu me tjiwa kutja eye ma kayenenisa ozonḓero zomutima wandje azehe moruyaveze.”—Eps. 145:16.

KAYENDE KOMURUNGU OKUKARERA JEHOVA

17. Hapo okutjiwa kutja tu hupa momayuva omasenina maku ṱunu vi ku imba mba toorora okukarera Jehova na imba mbe hi ya tjita nao ngunda?

¹⁷ Eṱe tu hupa momayuva omasenina womayandero wouye. Omuapostele Paulus wa tjanga kutja: “Pa sewa okaruveze okasupi uriri, nu ingwi ngu kwa za me ya otji me ya, nu ke nokuwomba.” (Hebr. 10:37) Otjiṋa hi matji tu ṱunu vi? Oruveze ndwa sewa po kovandu okutoorora okukarera Jehova orusupi. (1 Kor. 7:29) Nu indu tji twa toora omukambo wokukarera Mukuru, matu tjiwa kutja nandarire kutja matu hepa okutuurunga omauzeu, oyo ‘oyokaruveze okasupi uriri.’

18. Jehova na Jesus ve vanga kutja tu tjite vi?

¹⁸ Jesus wa tunduuza ovandu okurira ovahongewa ve nokukayenda komurungu okumukongorera. (Mat. 16:24) Indu tji twa karera Jehova oure wozombura ozengi, eṱe matu sokurimanena okukayenda komurungu okumukarera. Eṱe matu sokuungura oukukutu kutja tu kayende komurungu okukarera Jehova. Mape ya kamaa rire oupupu, posi ya eṱe matu yenene okukara nondjoroka nu matu munu ozondaya ozengi, nandarire nai.—Eps. 35:27.

19. Matu rihongo ye okuza kotjihorera tja Gene?

¹⁹ Ovandu tjiva ve muna kutja kamaave yorokere ehupo rawo indu tji mave karere Jehova. Indu tji u ri omutanda, hapo u muna kutja ouzeu tjinene kove okukarera Jehova? Omurumendu omukambure omutanda wena Gene wa tja: “Ami ee munu kutja himee yenene okuungura oviṋa ovingi mbye vanga okuungura mena rokutja owami umwe wOvahongonone va Jehova. Aape munika tjimuna ovanatje ovengi mbu twe kurira pamwe aave yorokere oviṋa tjimuna okuyenda kozopati, okukara nomapanga womorusuvero, nokunyanda ozovidio game zoutwe, ngunda ami ee sokuungurisa oruveze rwandje okuyenda kozombongarero zombongo nokukara motjiungura tjokuzuvarisa.” Hapo ouripura mbwo wa tuṋa vi ku Gene? Eye wa tja: “Ami mba uta okutjita oviṋa tjiva ovivi mbyaavi tjitwa i yomitanda vyarwe, nu mba ri nondjoroka oure woruveze orusupi. Posi ya ondjoroka ndjo kaya ri ondjoroka yatjiri. Ami mba uta okuripura ohunga nouwa mbu za mokukongorera imbi Ombeibela mbi i honga, nu mba tya okukarera Jehova nomutima wandje auhe. Okuza koruveze ndwo, pe munika tjimuna Jehova wa zira ozongumbiro zandje azehe.”

20. Matu sokurimanena okutjita ye?

²⁰ Omutjange wEpsalme wa imbura ku Jehova kutja: “Ovaṋingandu imba mbu mo toorora okutumbuza kOve, kutja ve ture motjouyapuke tjoye.” (Eps. 65:4) Ngatu rimanene okukayenda komurungu okukarera Jehova, tjimuna Josua tja tja: “Ami nonganda yandje matu karere Muhona.”—Jos. 24:15.