Horereye komerisusuparisiro wa Jehova

1. Ovikwaye mbi ku tjatera ohunga nomuano Jehova me ri omurisusuparise?

INDU tji mo ripura ohunga novanane vozohoromende zouye wa kandino, hapo mape ya ove otja owo overisusuparise? Mape ya otja kako. Posi ya, Jehova ngu ri omunamasa ayehe omurisusuparise. (Eps. 113:​5-8) Jehova omurisusuparise mozondjito ze azehe, nu kape notjiṋa tji tji raisa omeritongamisiro mu ye. Morupa ndwi, matu kahungirira komiano vine omiwa Jehova me tu tjinda nu matu kamuna omuano auhe mu u raisa kutja tjiri eye omurisusuparise. Nu wina matu katara komuano Jesus ma horera komerisusuparisiro wa Ihe. Indu tji twa konḓonona oviṋa mbi, mavi tu vatere okutumbuka popezu na Jehova nokurihonga okurira overisusuparise tjimuna ye.

JEHOVA U NONḒERO YOKUPURATENA KWEṰE

2. Epsalme 62:8 ri tu raera tjike ohunga na Jehova? (Wina tara kotjiperendero.)

² Potuingi kai rire oupupu okuhungira ku nomundu omuritongamise. Ovandu overitongamise kave tjindi varwe nawa mena rokutja owo ve muna kutja owo ovasemba pu varwe, ku nao varwe ve riṱizira kokure na wo. Posi ya, Jehova ke ri nao oparukaze. Eye u tjita kutja i rire oupupu kweṱe okukumba ku ye, nu u vanga kutja tu mu raere omauzeu wetu ayehe. (Lesa Epsalme 62:8.) Tjimuna ihe ngu yandja ombango kovanatje ve, tje vanga okutjiwa imbi ovanatje ve mbi mave ripura na mbi mave rikende navyo, Jehova wina u vanga okupuratena kozongumbiro zetu. Eye wa tjita kutja ozongumbiro ozengi nḓo ze tjangwe mOmbeibela. Ihi tji raisa kutja Jehova tjiri u vanga okuzuva ozongumbiro zetu. (Jos. 10:​12-14; 1 Sam. 1:​10-18) Posi ya, mape ya povikando tjiva tu muna kutja katu nokuyenena okukumba ku Jehova mena rozondataiziro ozengi nḓu tu tjita.

3. Omena raye tji matu yenene okukara nongamburiro kutja Jehova u vanga kutja tu kumbe ku ye aruhe?

³ Eṱe matu yenene okutumbuka ku Jehova mongumbiro nandarire kutja matu munu kutja katu ya pwira orusuvero rwe. Omena raye tji matu yenene okutja nao? Momasasanekero womuzandu ngwa pandjarere, Jesus wa sasaneka Jehova ku na ihe worusuvero ngwa ri nomuzandu ngwa tjita ozondataiziro ozengi ngandu tjaa munu kutja ihe ke nokumuyakura rukwao meṱunḓu. Posi ya ihe wa tjita vi indu omuatje we tja kotoka konganda? Jesus wa tja indu ihe tja muna omuatje we okuza kokure, eye wa “utuka, e rimanga mosengo ye ne mu hupite.” (Luk. 15:​17-20) Jehova u ri tjimuna ihe ngo. Indu tje tu zuu amatu kumbu ku ye mena rokutja matu rimunu ondjo mena rondataiziro ndji twa tjita, eye u puratena kweṱe nombango ye aihe. (Omiimbo 3:​19, 20) Eye u nondjenda na eṱe. Nu tjimuna ihe ngwa yenda ama u tuka, eye u tu raera kutja we tu suvera nu u tu huhumiṋa. (Jes. 57:15) Omomuano uṋe Jehova me “utuka kweṱe” ndino? Eye potuingi u ungurisa ovanene vombongo, nouṋepo weṱunḓu retu, nomapanga nge mu suvera okutuhuhumiṋa. (Jak. 5:​14, 15) Jehova u tu pa ombatero ndjo mena rokutja u vanga kutja tu tumbuke popezu na ye.

4. Omena raye tji ya ri oupupu kovandu okuhungira ku na Jesus?

⁴ Jesus aa horere ku Ihe. Jesus omurisusuparise tjimuna Ihe. Indu tja ri kombanda yehi, ovandu aave munu ko oupupu okuya ku ye. Owo kaave tira okumupura omapuriro. (Mar. 4:​10, 11) Indu tje ve pura kutja ve noumune uṋe ohunga notjiṋa, owo aave mu raere oumune wawo nokuhinokuhoreka. (Mat. 16:​13-16) Wina indu tji va tjiti ozondataiziro owo kaave tira kutja Jesus me ve pindikire. Nungwari, owo aave tjiwa kutja Jesus omundu omuwa wotjari nu ngu nomuretima. (Mat. 17:​24-27) Mena rokutja Jesus aa horere ku Ihe momuano mbu ri wo, ovemukongorere aave tjiwa Jehova nawa. (Joh. 14:9) Owo ve rihonga kutja Jehova kamundu otjindandi, kamundu omuritongamise, nu ke ri ṱizire ku ye omuini tjimuna ovanane voruveze ndwo. Posi yokutja eye wa ri omurisusuparise nu ya ri oupupu kovandu okuhungira ku na ye.

5. Omena raye tje ri oupupu ku varwe okuya kweṱe indu tji tu ri overisusuparise?

⁵ Omomuano uṋe mu matu yenene okuhorera ku Jehova? Indu tji twe rihongo okurira overisusuparise, matu tjiti kutja i rire oupupu ku varwe okuhungira ku na eṱe. Indu tji tu he ri overisusuparise, mape ya atu ṱeruru na varwe, atu munu kutja oweṱe ovasemba pu wo nu atu ha yenene okuveisira indu tji ve tu hihamisa. Nu tji twe ritjindi momuano mbwi ovandu kamaave vanga okuya kweṱe. Posi ya indu tji tu ri overisusuparise maku tu vatere okutjita ouwa ku varwe, okukara nomuretima na wo nokuveisira. Ihi ma tji tjiti kutja ovandu ve vange okurira omapanga wetu. (Kol. 3:​12-14) Ovanene vombongo ve sokukondja kutja ovakambure ovakwao mombongo ave ha tira okuyenda ku wo nokuhungira ku na wo. Ku nao, ovanene vombongo mave hepa okukara pu novakambure ovakwao aruhe. Ihi matji hee kutja ovanene vombongo ve sokukara pozombongarero zombongo pendje nokuhita ozombongarero zombongo motungovi tje he ri ohepero. Nu indu tji mave yenene ve kondja okuzuvarisa pu novakambure ovakwao okuza kondjuwo nondjuwo. Imba mbe ri mombongo tji mave kondjo okutjiwa ovanene vombongo nawa, mave kara noupaturuke okuhungira ku na wo oruveze aruhe indu tji mave hepa ombatero.

JEHOVA U RIPURIRA KU VARWE

6-7. Yandja ovihorera mbi mavi raisa kutja Jehova wa ri nonḓero okurundurura ondando ye indu ovakarere ve tji va kumba ku ye.

⁶ Ovandu overitongamise potuingi ve muna kutja mave tjiwa oviṋa avihe nu kave kara nonḓero okurundurura oumune wawo. Posi yokutja Jehova ngu tjiwa oviṋa avihe ke ri nao oparukaze. Mena rokutja omurisusuparise, eye u nonḓero yokupuratena koviṋa varwe mbi mave hungire. Nu nandarire u rundurura ondando ndja tjiti ohunga notjiṋa kaaṋi. Tara kotjihorera tja Mirjam omuṱena wa Moses. Eye na Aron va unaunina Moses, posi yokutja otjiṋa ho tja ri posyo mena rokutja Moses aa kuramene po Jehova. Otjiṋa ho tji raisa kutja Mirjam ka raisire ondengero ku Jehova. Otjiṋa hi tja pindikisa Jehova nu eye wa vera Mirjam nomutjise wongana. Okuzambo Aron we riheka ku Moses okuvatera omuṱena kwawo, nu Moses we riheka ku Jehova okuverukisa Mirjam. Hapo Jehova wa tjita vi? Omundu omuritongamise katja rundurura oumune we, posi ya Jehova wa rundurura oumune we. Mena rokutja Jehova omurisusuparise, eye wa puratena ku Moses na verukisa Mirjam.—Num. 12:​1-15.

⁷ Eṱe wina tu muna omuano Jehova me ri omurisusuparise indu tji matu ripurire kotjihorera tjombara Hiskija. Jehova wina wa hinda omuprofete Jesaja okukaraera ombara Hiskija kutja ma ṱu. Ombara Hiskija ya rira na i riyarikaṋa ku Jehova kutja me mu verukise. Jehova wa puratena kongumbiro ya Hiskija ne mu raere kutja ma hupu ozombura zarwe 15. (2 Ozomb. 20:​1, 5, 6) Jehova tjiri u notjari novandu nu u nonḓero okupuratena ku wo mena rokutja omurisusuparise.

8. Ovihorera viṋe mbi raisa kutja Jesus u ripurira kovandu? (Markus 3:​1-6)

⁸ Jesus aa horere ku Ihe. Indu tja ri kombanda yehi, Jesus aa tjiti ouwa ku varwe otja tji mape sorwa. Otjotjihorera, Jesus aa verukisa ovandu mEsabata tji tja ri otjiṋa ovanane vozongamburiro tjaave munu kutja katji sokutjitwa. (Lesa Markus 3:​1-6.) Jesus u ripurira kovandu nu u raisa otjari momuano me hongorera po ombongo yOvakriste ndino. Otjotjihorera, indu tjiva mombongo tji va tjiti ouvi ounene, eye u raisa omuretima ku wo nu u ve pa oruveze okuṱuna ozongatukiro zawo.—Omavan. 2:​2-5.

9. Omomuano uṋe mu matu yenene okupuratena nokuripurira ku varwe? (Wina tara koviperendero.)

⁹ Omomuano uṋe mu matu yenene okuhorera ku Jehova? Eṱe twa sokurihongera ku Jehova omuano wokuripura nokupuratena ku varwe. (Jak. 3:17) Otjotjihorera, ovanene mbe horera ku Jehova, kave undjire ko kutja ovanatje vawo ve tjite oviṋa mbi ve hi nokuyenena okutjita. Jakob otjihorera otjiwa tjomundu ngwee ripurire kovanatje ve. (Gen. 33:​12-14) Ovanene overisusuparise nu mbe ripurira kovanatje vawo, ve sokukondja okuhinokusasaneka omuatje umwe ku ingo warwe. Ovanene vombongo wina ve sokuripurira ku varwe. Omuano umwe okukongorera omuhunga mbwa tu wa pewa i yovanene vombongo ovakwao indu tji u hi nokuteya omirari vyOmbeibela. (1 Tim. 3:​2, 3) Nu eṱe atuhe matu yenene okukondja okuzuva nawa oumune wa varwe nandarire indu oumune wetu tji wa panguka. (Rom. 14:1) Ovandu avehe mombongo mave sokukondja kutja, ‘Oupore [poo omuano mu ve ripurira ku varwe] u tjiukwe i ovandu avehe.’—Fil. 4:5 NWT.

JEHOVA U NOMURETIMA

10. Omomiano viṋe Jehova ma raisa omuretima?

¹⁰ Ove mape ya wa rora okumuna kutja ovandu overitongamise kave vanga okuundjisiwa. Owo kave nomuretima. Jehova eye ke ri nao oparukaze, eye u nomuretima okukapita omundu kangamwa auhe. Otjotjihorera, momayuva wa Noa, Jehova wa tja ma undju ozombura 120 ngunda e hi ya yandeka ovarunde. (Gen. 6:3) Ku nao, Noa wa ri noruveze okukurisa ovanatje ve, nu nombatero yeṱunḓu re wa yenena okutunga otjitendeze. Nu kombunda omuengeli wa Jehova wa puratena nomuretima ku Abraham indu tjee mu pura omapuriro ohunga na Sodom na Gomora. Omundu omuritongamise atja tja: ‘Ove ko nousemba okundjipura omapuriro otja ingo.’ Posi ya mena rokutja Jehova u nomuretima omuengeli ngwi wina wa horera ku Jehova indu tja puratena ku Abraham nomuretima.—Gen. 18:​20-33.

11. Otja ku 2 Petrus 3:​9, ongwaye Jehova tje raisa omuretima moruveze rwetu?

¹¹ Jehova ndino wina u kayenda komurungu okuraisa omuretima. Eye u undja oruveze ndwa twa po okueta omaandero. Omena raye tje nomuretima? Mena rokutja eye ka “vanga kutja omundu nangarire umwe a yandekwe, nungwari tjinga e vanga kutja avehe ve ritanaure komauvi wawo.” (Lesa 2 Petrus 3:9.) Hapo omuretima Jehova mbwe raisa nai omungandjo? Kako. Omangete wovandu vomitima omiwa va tumbuka popezu na ye. Nu eṱe wina tu nonḓero yokutja ovengi mave tjiti nao. Posi ya omuretima wa Jehova ka u nokukarerera. Jehova wa suvera ovandu, posi ya ke nokuyandjera kutja aruhe ve kayende komurungu okutjita avihe mbi mave vanga. Eye ke nokuyandjera kutja ourunde u kare ko nga aruhe.—Hab. 2:3.

12. Omomuano uṋe Jesus me horera komuretima wa Jehova?

¹² Jesus aa horere ku Ihe. Oure wozombura ozengi Jesus aa horere komuretima wa Ihe. Jesus wa muna omuano Satan ma kora ovizeze ohunga na Jehova novakarere ve ovaṱakame. (Gen. 3:​4, 5; Job 1:11; Omavan. 12:10) Jesus wina wa muna omuano ovandu ovengi mu ve muna omauzeu. Jesus tjiri u nonḓero “okuyekuyandeka imbi oviungura vya Satan.” (1 Joh. 3:8) Hapo ovikwaye mbi vatera Jesus okuundja nomuretima ku Jehova okumupa ouyara okuyandeka oviungura vyOmudiaboli oparukaze? Omena rokutja Jesus omurisusuparise nu ma tjiwa kutja Jehova ongu tjiwa kutja omaandero maye ya ruṋe.—Oviung. 1:7.

13. Omena raye nu omomuano uṋe Jesus ma raisa omuretima kovaapostele ve?

¹³ Indu Jesus tja ri kombanda yehi, eye wina wa raisa omuretima kovaapostele ve. Otjotjihorera, indu ovaapostele aruhe tjaave pose ohunga nokutja ouṋe ngu ri omunene mokati kawo, Jesus ke na pa yumba ohama. Nungwari eye wa kara nomuretima na wo. (Luk. 9:46; 22:​24-27) Eye wa ri nongamburiro yokutja owo mave rihongo okurira overisusuparise tjimuna ye. Hapo ove wa rora okutjita ondataiziro imwe povikando ovingi? Indu tji pe ri nao, ove u nondangi kutja u nOmbara ndji ku honaparera po, nu ngu ri omurisusuparise nu ngu nomuretima.

14. Omomuano uṋe mu matu yenene okukara nomuretima?

¹⁴ Omomuano uṋe mu matu yenene okuhorera ku Jehova? Indu tji twa kara “nomeripura wa Kristus,” eṱe matu ripura nokuritjinda tjimuna Jehova. (1 Kor. 2:16) Ovikwaye mbi mavi tu vatere okuripura tjimuna Jesus? Omuano umwe omunanḓengu mu matu yenene okutjita nao omokulesa ohunga nehupo ra Jesus mOmbeibela. Ku nao, matu sokutwa po oruveze okuripurira ko oukoto koviṋa Jesus mbya tjita nokutja omena raye tjee vi tjiti. Nu eṱe wina matu hepa okukumba ku Jehova kutja me tu vatere okurira overisusuparise nu tu kare nomuretima tjimuna Jesus. Indu tji matu rihongo okuripura tjimuna Jesus, ma rire oupupu kweṱe okuhorera ku Jehova mokukara nomuretima na eṱe oveni na wina kovakwetu.—Mat. 18:​26-30, 35.

JEHOVA U NA KONATJA NOVERISUSUPARISE

15. Yandja ovihorera mbi mavi raisa kutja Jehova wa suvera ovandu overisusuparise. (Epsalme 138:6)

¹⁵ Lesa Epsalme 138:6. Tjiri ondjingonekero onene okutjiwa kutja Jehova ngu ri wOkombandambanda mouye auhe u yandja ombango yapeke kovandu overisusuparise. Pa ri ovandu ovengi oure wozombura mbaave varwa otja ovandu mbe hi nonḓengu, posi ya Jehova wa yandja ombango ku wo. Tjiva vawo mape ya katu ve tjiwa nawa, posi ya Jehova wa tjita kutja ve tjangwe mOmbeibela. Otjotjihorera, Jehova wa hinga Moses okutjanga ena romukazendu omuṱakame Debora ngwa ri omukarere meṱunḓu ra Isak na Jakob oure wozombura 125. Nandarire kutja kape novingi mbi mavi tjiukwa ohunga nomukazendu omuṱakame ngwi, Jehova wa tjita kutja Moses ma tjange ehungi ndi mari raisa kutja eye wa ri omusuverwa ku wo. (Gen. 24:59; 35:8) Ozombura ozengi kombunda yanao, Jehova wa toorora omuzandona ngwaa risa ozonḓu, wena David okurira ombara ya Israel. (2 Sam. 22:​1, 36) Katjisupi kombunda ya indu Jesus tja za nokukwatwa, Mukuru wa hinda ovaengeli kotjimbumba tjovarise nu e ve pe ondjingonekero okurira ovandu ovatenga okutjiwa kutja Messias wa kwatwa muBetlehem. (Luk. 2:​8-11) Nu indu Josef na Maria tji va twara Jesus kondjuwo ondjapuke ya Muhona, Jehova wa yandja ondjingonekero ku Simeon na Ana mba ri ovanene motjiwondo okumuna Omuna we. (Luk. 2:​25-30, 36-38) Otjingaperi kutja “nandarire kutja Muhona wa tongama kombanda, Eye u na konatja noverisusuparise.”

16. Jesus wa horera vi ku Ihe momuano maa tjindi varwe?

¹⁶ Jesus aa horere ku Ihe. Tjimuna Ihe, Jesus wa suverere ovandu mbaave varwa i varwe otjovandu ovehinonḓengu. Eye aa hongo ouatjiri ohunga nOuhona wa Mukuru ‘kovandu vakauriri mbe hi na indu va hongerwe.’ (Oviung. 4:13; Mat. 11:25) Jesus wina wa verukisa ovavere nu e ve tjindi momuano worusuvero nondengero. (Luk. 5:13) Ongurova osenina komurungu wonḓiro ye, Jesus wa koha ozombaze zovaapostele ve, tji tjiri otjiṋa tji tji ungurwa i yovakarere. (Joh. 13:5) Nu ngunda e hi ya ronda keyuru, eye wa yandja otjiungura otjinanḓengu kovakarere ve avehe tjokuvatera varwe okukamuna omuinyo waaruhe, mu mamu kamburire mo eṱe ndino.—Mat. 28:​19, 20.

17. Omomuano uṋe mu matu yenene okuraisa orusuvero nondengero ku varwe? (Wina tara kotjiperendero.)

¹⁷ Omomuano uṋe mu matu yenene okuhorera ku Jehova? Eṱe tu raisa orusuvero nondengero kovandu, indu tji matu zuvarisa ombuze ombwa kovandu avehe kainatja kutja vaza pi, owomuhoko uṋe poo va hongwa pu pe ṱa pi. Nu tu yandja ondjingonekero kovakambure ovakwetu indu tji matu ve vara kutja ovanene pu eṱe, kainatja kutja otjiungura poo omerizirira yeṋe ngu mape ya atu kara na wo. (Fil. 2:3) Jehova u nondjoroka indu tji tu ri overisusuparise na indu tji matu tjindasana norusuvero nondengero.—Rom. 12:10; Sef. 3:12.

18. Omena raye tji mo vanga okuhorera komerisusuparisiro wa Jehova?

¹⁸ Indu tji matu kondjo oukukutu okuhorera komerisusuparisiro wa Tate wetu womeyuru worusuvero, ma rire oupupu ku varwe okuya kweṱe, nokuhungira ku na eṱe, nu matu kara nomuretima. Nu matu yozike varwe tjimuna Jehova tje tjita. Zemburuka kutja indu auhe wetu tji ma kondjo okukara tjimuna Mukuru wetu omurisusuparise, ihi matji tjiti kutja auhe wetu ma rire otjihuze ku ye.—Jes. 43:4.