Surat Kereja Rasul

2 Ba hari Pengerami Pentikos,* semua murid Jesus begelumu ba endur ti sama. 2 Lebuh sida benung duduk, enda mukai-mukai sida ninga bunyi ribut ti deras datai ari langit, lalu bunyi nya ulih didinga ba semua endur dalam rumah nya. 3 Pengudah nya, sida meda utai baka api ti mit* ayan lalu inggap ba atas pala tiap iku sida. 4 Sida iya lalu penuh enggau kuasa kudus Petara. Udah nya, sida belabuh bejaku ngena bemacham bansa jaku, nitihka iring kuasa kudus nya.

5 Maya nya, bisi mayuh orang Judah ke alim ba Jerusalem. Sida datai ari tiap iti menua ba serata dunya. 6 Nya alai, lebuh orang mayuh ninga bunyi nya, sida lalu begelumu. Sida iran ati laban ninga bala murid Jesus bejaku dalam bansa jaku sida empu. 7 Orang mayuh balat alit ati lalu madahka: “Peda kita! Semua orang ke bejaku nya orang Galili, enda pia? 8 Nya alai, nama kebuah kitai ninga sida bejaku dalam bansa jaku kitai empu? 9 Kitai tu orang ari Partia, Media, Elam, Mesopotamia, Judea, Kapadosia, Pontus, Asia,* 10 Prigia, Pampilia, Ejip, enggau sekeda endur ba Libia ke semak Sairin. Bisi mega temuai ari Rome, orang Judah, orang ke megai pengarap Judah, 11 orang Krit enggau orang Arab. Tang kitai ninga sida bejaku dalam bansa jaku kitai pasal utai ti ngalitka ati ke digaga Petara.” 12 Semua sida iran ati lalu nanya pangan diri: “Nama utai ke benung nyadi tu?” 13 Tang bisi mega orang ngeleseka sida lalu madahka: “Sida tu udah mabuk.”

14 Tang Peter bediri enggau 11 iku da rasul ke bukai, lalu belabuh bejaku enggau nyawa ti inggar: “Orang Judea enggau semua orang ke diau ba Jerusalem, dinga kita jaku aku enggau manah ngambika kita nemu. 15 Kebendar iya, sida tu enda mabuk baka ke disangka kita, laban diatu baru pukul semilan pagi.* 16 Tang utai ke nyadi tu ngamatka utai ke udah disebut Nabi Joel: 17 ‘Ku Petara madahka, “Ba hari ti penudi, Aku deka nuangka sebagi ari kuasa kudus Aku ngagai semua macham orang. Anak lelaki enggau anak indu kita deka benabi. Lalu ba bala kita, sida ke biak deka bulih genera, lalu sida ke tuai deka bulih mimpi. 18 Maya nya, Aku mega deka nuangka sebagi ari kuasa kudus Aku ngagai ulun Aku ke lelaki enggau ke indu, lalu sida deka benabi. 19 Aku deka mandangka kereja ajih ba langit sereta tanda ba dunya: Darah, api, enggau asap ti tebal. 20 Sebedau hari Jehovah ti besai sereta bemulia nya datai, mata panas deka nyadi petang lalu bulan deka nyadi mirah baka darah. 21 Tang semua orang ke ngangauka nama Jehovah deka diselamatka.”’

22 “Dinga kita orang Israel: Jesus, orang Nasaret nya, dikirumka Petara. Kita empu nemu pasal kereja ajih, tanda, enggau pengawa ke ngalitka ati ke digaga Petara nengah iya ba bala kita. 23 Kita udah nyerahka iya ngagai orang ke bedosa ngambika iya dipantang ba tiang lalu dibunuh. Sebedau nya, Petara endang udah nemu Jesus deka ditangkap, lalu Petara nentuka pekara nya deka nyadi. 24 Tang Petara ngidupka iya lalu ngelepaska iya ari digenggam pemati,* laban iya tentu enda ulih mengkang ditanchang pemati. 25 Ku David bejaku pasal iya: ‘Aku seruran meda Jehovah ba mua aku. Iya bisi ba sepiak kanan aku, ngambika aku enda sekali-kali irau.* 26 Ketegal nya, ati aku lantang lalu dilah aku balat gaga. Kelimpah ari nya, aku deka andalka Petara ba pengidup aku, 27 laban Nuan enda ninggalka aku ba Kubur,* tauka nejuka tubuh ulun Nuan ke taluk nyadi reput.* 28 Nuan udah nunjukka aku jalai pengidup. Nuan deka ngasuh aku penuh enggau pengaga ati ba mua Nuan.’

29 “Bala menyadi, awakka aku bejaku enggau terus terang* pasal David, aki kitai. Iya udah nadai lalu dikuburka. Kubur iya agi bisi ba ditu nyentuk ke seharitu. 30 Laban David siku nabi lalu iya nemu Petara udah besemaya ngena sumpah ngagai iya, siku ari peturun iya deka duduk ba kerusi diraja iya. 31 David endang udah nemu sereta bejaku pasal pengangkat Kristus ari mati. Iya madahka Petara enda ninggalka Kristus ba Kubur* lalu tubuh iya enda nyadi reput. 32 Jesus meh ke udah diidupka Petara ari mati, lalu kami semua nyadi saksi ba pekara tu. 33 Ketegal iya udah ditinggika ngagai sepiak kanan Petara lalu nerima kuasa kudus ke udah disemayaka Petara, iya nuangka kuasa kudus nya ngagai kami baka ke dipeda sereta didinga kita. 34 David enda niki ke serega, tang iya empu madahka: ‘Ku Jehovah bejaku enggau Tuan aku: “Duduk ba sepiak kanan Aku, 35 datai ke Aku udah ngaga munsuh nuan nyadika pelasar kaki nuan.”’ 36 Nya alai, awakka semua orang Israel nemu sereta andal, Jesus ke udah diukum bunuh kita ba tiang udah dipilih Petara nyadi Tuan enggau Kristus.”

37 Pengudah ninga utai nya, ati orang mayuh asaika diachuk. Sida lalu nanya Peter enggau bala rasul ke bukai: “Bala menyadi, nama utai ke patut digaga kami?” 38 Peter madah ngagai sida: “Nesal ati meh kita, lalu tiap iku kita patut dibaptisa dalam nama Jesus Kristus ngambika dosa kita diampun. Udah nya, kita deka nerima pemeri Petara ti pechuma, iya nya kuasa kudus Iya. 39 Semaya tu ukai semina diberi ngagai kita enggau anak kita, tang mega ngagai semua orang ke ba endur ti jauh, iya nya semua sida ke dikangau Jehovah, Petara kitai.” 40 Peter nyebut mayuh agi utai kena meri saksi enggau silik agi. Iya mega majak meransang sida. Ku iya: “Selamatka diri ari rebak ke jai tu.” 41 Nya alai, sida ke nerima jaku iya enggau gaga ati, dibaptisa. Sehari nya, penyampau murid Jesus nambah kira-kira 3,000 iku orang. 42 Sida majak beratika utai ke diajar bala rasul, begulai enggau pangan diri,* beserumpu makai, enggau besampi.

43 Bala rasul belabuh ngaga mayuh kereja ajih enggau tanda. Semua orang ke meda utai tu lalu nangika Petara. 44 Semua murid ke baru begelumu sereta bekunsika semua utai ke dikemisi sida. 45 Sida nyual tanah enggau semua utai ke dikemisi sida, lalu duit nya dibagi sida ngagai semua orang, nitihka utai ke diguna siku-siku. 46 Ninting hari, sida begulai begempuru ba Rumah Sembiang enggau siti tuju. Sida enggau gaga ati makai ba rumah pangan diri sereta bekunsika pemakai. Sida ngereja semua utai ari ati. 47 Sida muji Petara lalu sida dikerinduka semua orang. Pia mega, ninting hari, Jehovah majak mai mayuh orang ke diselamatka Iya ngambika begulai enggau sida. Lalu penyampau sida majak nambah.