Satu Peter
5 Aku ke mega tuai gempuru, ke kala meda pemerinsa Kristus sereta ke nerima mulia ti deka dipandangka, minta* kita bala tuai gempuru ngambika ngereja tu: 2 Baka siku pengibun bedus, ibun meh raban bedus Petara ke patut dijaga kita. Kita ke ngemataka raban bedus nya,* kereja meh tanggung pengawa kita ari ati ba mua Petara, ukai ketegal dipejal. Kereja meh nya enggau ransing, ukai ketegal deka ngulihka penguntung enggau chara ti enda lurus. 3 Nyadi meh teladan ke raban bedus, lalu anang bekuasa atas sida ke diempu Petara. 4 Lebuh ketuai pengibun bedus dipandangka, kita deka nerima makota ti bemulia ke enda nemu jai.
5 Pia mega enggau kita, bala lelaki ke biak, nunduk meh ngagai bala lelaki ke tuai agi.* Semua kita patut baruh ati lebuh begulai enggau pangan diri laban Petara enda lantang ati ngagai orang ke sumbung, tang Iya nunjukka pemanah ati ti besai ngagai orang ke baruh ati.
6 Nya alai, ayanka meh diri baruh ati ba baruh jari Petara ti bekuasa, ngambika Iya ulih ngeninggika kita ba maya ti ditetapka. 7 Buai semua pengirau kita ngagai Petara laban Iya ibuhka kita. 8 Jaga meh runding kita, lalu anang enda bejaga! Munsuh kita, Sitan,* benung segau-segau baka singa ke negung, ti deka ngiga mansa ke diempa iya. 9 Tang kita patut ngelaban iya ngena pengarap ti tegap, laban kita nemu semua bala menyadi kita ba serata dunya benung napi pemerinsa ti sama. 10 Tang pengudah kita merinsa enda lama, Petara ke penuh enggau pemanah ati ti besai sereta ke ngangauka kita ngambika beserakup enggau Kristus lalu nerima mulia ti meruan belama iya, deka nembuka latih kita. Iya meh ke deka ngasuh kita tegap. Iya meh ke deka ngasuh kita kering, lalu Iya meh ke deka ngasuh kita entap. 11 Ngarapka Iya bekuasa belama iya. Amin.
12 Nengah Silvanus,* ke ba aku baka menyadi ke setia, aku nulis surat tu ngagai kita ngena beberapa leka jaku kena meransang kita sereta kena ngasuh kita amat-amat pechaya, tu meh pemanah ati Petara ti besai sereta ti bendar. Bepegai tegut meh ngagai pemanah ati nya. 13 Menyadi indu* ke ba Babilon, ke mega dipilih baka kita, ngirumka salam ngagai kita, lalu pia mega enggau anak aku, Mark. 14 Lebuh nyambut pangan diri, sium meh pangan diri kena ngayanka pengerindu.
Ngarapka semua kita ke beserakup enggau Kristus bulih pengelantang.