Isaiah
48 Dingaka tu, O peturun Jakop,
Kita ke ngangau diri ngena nama Israel
Sereta ke datai ari peturun Judah,
Kita ke besumpah atas nama Jehovah
Sereta ke ngangauka Petara orang Israel,
Taja pan kita enda ikhlas sereta enda ngereja utai ti betul.*
2 Kita ngaku diri orang ari kuta ti kudus,
Lalu bepanggai ba Petara orang Israel
Ke benama Jehovah, ketuai soldadu serega.
3 “Kenyau ari kelia menya, Aku udah madahka pasal utai ke nyadi suba.
Jaku nya pansut ari mulut Aku Empu
Lalu Aku udah nusui iya.
Aku ngereja nya enggau ngenyit, lalu semua nya pan nyadi.
4 Laban Aku nemu nuan amat degil;
Urat rekung nuan baka besi lalu kening nuan baka temaga.
5 Ari suba Aku udah madah ngagai nuan.
Sebedau utai nya nyadi, Aku udah ngasuh nuan ninga nya,
Ngambika nuan enda madah: ‘Patung ke disembah aku ke ngereja tu;
Patung ke diukir enggau patung besi aku ke meri pesan tu.’
6 Kita udah ninga sereta meda semua utai tu.
Enda patut kita enggai nusui pasal nya?
Berengkah ari diatu, Aku deka madahka kita utai ti baru;
Resia ke dilalaika, ke bedau ditemu kita.
7 Baru diatu Aku ngasuh semua utai nya nyadi, ukai suba.
Sebedau tu, nuan enda kala ninga pasal nya
Ngambika nuan enda nyebut munyi tu: ‘Aku udah nemu pasal nya.’
8 Nadai nuan kala ninga, nadai nuan nemu.
Suba, pending nuan ditutup
Laban Aku nemu nuan orang ke amat licik,
Lalu nuan dikumbai orang ke bedosa kenyau ari ada.
9 Ketegal nama Aku, Aku deka nagang pengeringat Aku;
Ketegal mulia Aku, Aku deka sabar ngagai kita,
Lalu Aku enda ngemunaska kita.
10 Peda! Aku udah ngaga nuan nyadi tulin, tang ukai baka pirak ke digaga nyadi tulin.
Aku nejuka nuan merinsa* ngambika nuan nyadi tulin, baka besi ke diluluhka dalam serumbung api.
11 Ketegal nama Aku, au ketegal nama Aku, Aku deka ngereja tu.
Patut Aku nejuka nama Aku enda dibasa?
Aku enda meri mulia Aku ngagai sapa-sapa.*
12 O Jakop, dingaka meh Aku; O Israel, ke udah dikangau Aku,
Aku agi tetap sama. Aku meh ti keterubah; Aku mega ti kepenudi.
13 Ngena jari Aku Empu, Aku ngaga asas dunya.
Ngena jari kanan Aku, Aku ngerembaika langit.
Lebuh Aku ngangau, seduai iya* bediri.
14 Begempuru meh semua kita lalu dinga meh.
Ni bagi petara pelesu* ke nusui pasal utai tu?
Orang ke dikerinduka Aku, Jehovah,
Deka ngereja peneka Aku ngelaban Babilon,
Lalu jari iya deka nyerang orang Kaldea.
15 Aku udah bejaku, lalu Aku udah ngangauka iya.
Aku udah mai iya, lalu pengawa iya deka mujur.
16 Datai semak ngagai Aku, lalu dingaka tu.
Kenyau ari pun, Aku enda belalai bejaku.
Kenyau ari maya utai nya nyadi, Aku bisi ba dia.”
Diatu, Jehovah, Tuan ti Pemadu Tinggi, udah nganjung aku, lalu meri aku kuasa kudus Iya.
17 Tu meh utai ke dipadahka Jehovah, Penebus nuan, Petara Israel ti Kudus:
“Aku tu Jehovah, Petara nuan,
Ke ngajar nuan ke penguntung nuan empu,
Ke ngiring nuan bejalai ba jalai ke patut ditengah nuan.
18 Enti sema nuan beratika enggau manah pesan Aku,
Pengelantang nuan tentu deka nyadi baka sungai,
Lalu pengelurus nuan deka nyadi baka umbak ba tasik.
19 Peturun nuan deka mayuh baka pasir,
Lalu bala uchu ichit nuan deka mayuh baka igi pasir.
Nama sida enda sekali-kali deka dibuai tauka dipunaska.”
20 Pansut ari Babilon!
Rari ari orang Kaldea!
Padahka lalu tusui tu enggau ati ti balat gaga!
Tusuika tu ngagai ujung dunya.
Padahka: “Jehovah udah nebus Jakop, penyembah Iya.
21 Sida enda aus lebuh Iya nguluka sida nengah padang pasir.
Iya ngasuh ai pansut ari batu ke sida;
Iya melah batu lalu ai pansut.”
22 Ku Jehovah: “Orang ke jai nadai pengelantang.”