Isaiah
65 “Aku nejuka Diri ditemu sida ke enda nanya pasal Aku;
Aku nejuka Diri ditemu sida ke enda ngiga Aku.
Ku Aku madah ngagai bansa ke enda ngangauka nama Aku: ‘Tu Aku! Tu Aku!’
2 Sepemanjai hari, Aku ngunjurka jari Aku ngagai orang ke degil,
Ngagai sida ke nengah jalai ti jai,
Ke nitihka runding sida empu,
3 Ke seruran ngemediska ati Aku ba depan-depan Aku,
Ke nyerahka pemeri ba taman sereta ke nunu korban ba atas batu-bata nyentukka asap niki ke atas.
4 Sida duduk ba pendam,
Lalu bemalam ba endur ke enda ditemu orang.*
Sida makai dagin babi,
Lalu periuk sida penuh laban sup utai ke udah but.
5 Ku sida madah: ‘Dia aja kita. Anang semak kami,
Laban kami tu kudus agi ari kita!’*
Sida majak ngasuh Aku ringat baka api ti mau sepemanjai hari.
6 Peda! Semua nya udah ditulis ba depan Aku;
Aku sigi enda diau diri,
Tang Aku deka malas sida.
Aku deka ngukum sida enggau pengabis iya,
7 Ketegal penyalah sida enggau penyalah aki ini sida,” ku Jehovah.
“Sida udah nyerahka pemeri tunu ba gunung nyentukka asap niki ke atas.
Sida mega ngeleseka Aku ba bukit.
Nya alai, Aku deka ngukum sida enggau pengabis iya.”
8 Tu meh utai ke dipadahka Jehovah:
“Baka maya setangkai buah anggur ditemu, ke ulih dikena ngaga wain ti baru,
Lalu bisi orang madah: ‘Anang ngemunaska nya, laban agi bisi buah ke manah,’
Baka nya meh utai ke deka digaga Aku ngagai bala nembiak Aku;
Aku enda ngemunaska semua sida.
9 Ari Jakop, Aku deka mansutka siku peturun.
Ari Judah, siku orang deka ngempu gunung-gunung Aku;
Orang ke dipilih Aku deka ngempu nya,
Lalu bala nembiak Aku deka diau dia.
10 Ke bala nembiak Aku ke ngiga Aku,
Saron deka nyadi padang rumput ke jelu bedus,
Lalu Lebak Akor deka nyadi endur alai jelu tupi berehat.
11 Tang kita ninggalka Aku, Jehovah,
Lalu kita enda ingatka gunung Aku ti kudus.
Kita nyediaka mija ke petara Tuah,
Lalu ngisi wain ba cawan ke petara Takdir.
12 Nya alai, Aku deka nyerahka kita ngagai pedang,
Lalu semua kita deka besugang ngambika dibunuh,
Laban lebuh Aku ngangau, kita enda nyaut,
Lebuh Aku bejaku, kita enda mending.
Kita majak ngereja utai ti jai ba mata Aku,
Lalu kita milih utai ti enda ngelantangka ati Aku.”
13 Nya alai, Jehovah, Tuan ti Pemadu Tinggi, bejaku munyi tu:
“Peda! Bala nembiak Aku deka makai, tang kita deka lapar.
Bala nembiak Aku deka ngirup, tang kita deka aus.
Bala nembiak Aku deka gaga ati, tang kita deka merinsa ketegal malu.
14 Peda! Bala nembiak Aku deka manjung gaga ati ketegal ati ti lantang.
Tang kita deka besebana ketegal ati ti pedis,
Lalu kita deka rauh-rauh nyabak ketegal ati ti anchur.
15 Nama ke ditinggalka kita deka dikena orang ke dipilih Aku nyadika leka jaku sumpah.
Aku, Jehovah, Tuan ti Pemadu Tinggi, deka munuh tiap iku kita,
Tang Aku deka ngangauka bala nembiak Aku ngena nama bukai;
16 Barang sapa ke ba dunya ke ngiga berekat
Deka diberekat Petara ti setia.*
Barang sapa ke besumpah ba dunya
Deka besumpah dalam nama Petara ti setia.*
Pemerinsa* ke nyadi suba enda agi dikingatka;
Semua nya nadai dipeda Aku agi.
17 Peda! Aku ngaga langit baru enggau dunya baru.
Semua utai ti lama enda agi diperundingka;*
Semua utai nya nadai agi dikenang.
18 Nya alai, lantang ati meh enggau gaga ati meh belama iya ke utai ke digaga Aku.
Peda! Jerusalem ke digaga Aku deka mai pengaga ati,
Lalu orang ke diau ba dia deka mai pengelantang ati.
19 Aku deka gaga ati ketegal Jerusalem enggau bala nembiak Aku;
Ba dia, bunyi orang nyabak enggau bunyi orang merinsa nadai agi didinga.”
20 “Ba dia, nadai agi anak mit ke idup beberapa hari aja;
Nadai agi orang tuai ke enda gayu,
Laban sapa-sapa ke mati maya umur 100 taun deka dikumbai agi mit,
Lalu orang ke bedosa deka mati ketegal ditinggang sumpah, taja pan iya beumur 100 taun.*
21 Orang deka ngaga rumah lalu diau ba dia.
Sida deka ngintu kebun anggur lalu makai asil ari kebun nya.
22 Rumah ke digaga sida enda diuan orang bukai,
Lalu utai ke ditanam sida enda diempa orang bukai.
Bala nembiak Aku deka panjai umur baka pun kayu.
Orang ke dipilih Aku deka balat puas ati ketegal pengawa ke dikereja sida.
23 Sida enda lebu ngapa bebendar gawa,
Lalu anak ke diadaka sida enda ditinggang pemerinsa,
Laban sida orang* ke diberekat Jehovah,
Pia mega enggau bala peturun sida.
24 Sebedau sida ngangau, Aku deka nyaut;
Maya sida bejaku, Aku deka mending.
25 Serigala enggau anak bedus deka makai begulai.
Singa deka makai rumput baka sapi,
Lalu ular deka makai debu.
Jelu nya enda ngemedis tauka nganchurka utai ba serata gunung Aku ti kudus,” ku Jehovah.