September

Petara udah meri Jesus kuasa kena mutarka semua penanggul mensia. Lebuh Jesus ngaga kereja ajih, iya nunjukka diri ulih mutarka semua penanggul ke enda ulih diputarka kitai. Ambika chunto, Jesus bisi kuasa ngelepaska kitai ari pun penanggul mensia, iya nya dosa sereta semua kesan ari dosa nya, nyengkaum penyakit enggau pemati. (Mat. 9:​1-6; Rom. 5:​12, 18, 19) Kereja ajih ke digaga Jesus nunjukka iya ulih ngeraika “bemacham bansa” penyakit sereta indah ngangkatka orang ke udah mati idup baru. (Mat. 4:23; Jhn. 11:​43, 44) Pia mega, iya bisi kuasa kena neduhka kabut ti besai sereta ngalahka melikat ti jai. (Mrk. 4:​37-39; Luk. 8:2) Kitai tentu berasai lantang laban nemu Jehovah udah meri kuasa ti baka nya ngagai Anak Iya! Kitai ulih andal semaya pasal utai ti manah ke deka dibai Perintah Petara tentu deka dikeamatka. Lebuh Jesus nyadi mensia ba dunya, iya bisi ngaga kereja ajih. Tu ngajar kitai, utai ti deka dikereja iya lebuh nyadi Raja ba Perintah Petara nya tentu deka besai agi. w23.04 3 ¶5-7

Enti raban gempuru nuan besai nyentukka jari nuan suah enda dipeda, nuan engka enggai agi meri komen. Tang anang meh ngetu nguji meri komen. Nuan ulih nyediaka beberapa iti komen ke tiap iti gempuru. Nyadi, enti nuan enda dikangau meri komen ba pun randau nya, nuan agi bisi peluang meri komen seraya randau nya dipejalaika. Lebuh nyediaka diri ke gempuru belajarka majalah Menara Jaga, perundingka baka ni tiap iti genteran nya bekaul enggau tema artikel ti deka dikerandauka. Enti nuan ngereja nya, nuan engka bisi komen ti manah ke ulih diberi sepemanjai randau nya. Nambahka nya, nuan engka ulih nyediaka komen ba genteran ke berandauka ajar Bup Kudus ti tusah agi diterangka. Nama kebuah? Laban engka kurang agi orang deka meri komen ba begian nya. Tang baka ni enti pengudah beberapa iti gempuru, nuan agi nadai peluang meri komen? Nuan ulih madah ngagai menyadi ke ngiring sebedau gempuru berengkah, ni bagi tanya ke deka disaut nuan. w23.04 21-22 ¶9-10

Josep keran deka nitihka iring ari Jehovah, lalu nya ngasuh iya nyadi siku laki ti manah agi. Abis kurang bisi tiga kali iya nerima iring ari Petara bekaul enggau diri sebilik iya. Tiap kali iya nerima iring, iya ngasi enggau jampat, indah lebuh utai nya tusah ba iya. (Mat. 1:20; 2:​13-15, 19-21) Lebuh Josep nitihka iring ari Petara, iya ulih nyaga, nyukung, sereta nyediaka utai ke diguna Maria. Perundingka tu: utai ke digaga Josep tentu ngasuh Maria rindu sereta bebasa agi ngagai iya. Bala laki, nuan ulih neladan Josep lebuh nuan ngiga jaku lalau ari Bup Kudus kena nyaga kita sebilik. Lebuh nuan nitihka jaku lalau tu, taja pan enti jaku lalau nya tusah, nuan ngayanka pengerindu ke bini nuan sereta negapka tikah nuan. Siku menyadi indu ba Vanuatu, ke udah kawin lebih ari 20 taun madahka: “Lebuh laki aku ngiga sereta nitihka iring ari Jehovah, nya ngasuh aku bebasa agi ke iya. Aku berasai likun, lalu aku ulih andalka pemutus ke digaga iya.” w23.05 21 ¶5

Orang Judah ke pulai baru ari Babilon deka nyadi ‘orang ke kudus’ ngagai Petara sida. (U-dat. 7:6) Tang tu ukai reti iya sida enda ibuh ngaga ubah kena ngelantangka ati Jehovah. Mayuh ari orang Judah ada ba Babilon, udah biasa enggau chara orang Babilon berunding sereta standard sida. Betaun-taun pengudah orang Judah ti keterubah pulai ngagai menua Israel, Gabenor Nehemiah tekenyit lebuh nemu bala anak ke ada ba Israel nadai belajarka bansa jaku orang Judah. (U-dat. 6:​6, 7; Neh. 13:​23, 24) Baka ni bala nembiak tu ulih belajar rindu sereta nyembah Jehovah enti sida enda meretika bansa jaku Hebrew? Jaku Hebrew nya jaku utama ke dikena nulis Jaku Petara. (Esr. 10:​3, 44) Nyadi, orang Judah ba dia patut ngaga ubah ti besai, tang ubah tu senang agi digaga ba menua Israel, laban ba endur dia sembah ti tuchi belubah-lubah dipulaika baru.—Neh. 8:​8, 9. w23.05 15 ¶6-7

Sayau amat, enda ngira sekalika kitai bisi pengeran tauka amat bedisiplin, kekadang bisi utai ulih nyadi ke engka ngasuh kitai tusah nyapai juluk ati kitai. Ambika chunto, utai ke enda dijangka engka nyadi, lalu nya ulih ngambi awak sereta perhatian kitai. Ketegal nya, kitai engka bisi mimit aja awak kena ngereja juluk ati kitai. (P-jar. 9:11) Kitai engka napi siti penanggul ke ngasuh kitai berasai asa ati sereta nadai daya. (J-lam. 24:10) Ketegal kitai enda sempurna, kitai engka ngaga penyalah ke ngasuh kitai tusah agi deka nyapai juluk ati nya. (Rom. 7:23) Tauka kitai engka semina berasai lelak. (Mat. 26:43) Nama ulih nulung kitai mutarka situasi ke ngasuh kitai tusah deka nyapai juluk ati kitai? Kingatka meh, enti bisi utai nyadi ke nagang nuan ari nyapai juluk ati nya, tu ukai reti iya nuan patut ngetu nguji nyapai juluk ati nya. Bup Kudus madahka, kitai engka suah napi penanggul tauka penusah. Taja pia, iya mega madah, kitai ulih nguji nyapai juluk ati kitai baru. Amat, lebuh nuan bebendar nguji nyapai juluk ati nuan taja pan tusah, nuan nunjuk ngagai Jehovah nuan deka ngelantangka ati Iya. Jehovah tentu amat gaga ati lebuh Iya meda nuan bebendar nguji deka nyapai juluk ati nuan! w23.05 30 ¶14-15

Nyadi siku pengerintis deka nulung menyadi lelaki ti biak belajar chara bekerejasama enggau mayuh macham orang. Tu mega deka nulung iya nemu chara ngena duit enggau manah. (Plp. 4:​11-13) Siti chara ti manah kena nulung nuan gawa penuh jam ke Jehovah iya nya, nyadi pengerintis sukung. Tu nulung nuan besedia ngambika ulih nyadi pengerintis biasa. Nyadi pengerintis biasa deka muka jalai ngagai pengawa penuh jam ke bukai, baka nyadi pekereja ke nirika bengunan tauka ahli Bethel. Semua menyadi lelaki patut bisi juluk ati nyadi tuai gempuru ngambika ulih gawa ke bala menyadi Kristian. Bup Kudus madahka, bala menyadi lelaki ke bebendar deka nyapai juluk ati tu “inginka pengawa ti manah.” (1 Tim. 3:1) Keterubah, siku menyadi lelaki patut nyadi penulung gempuru dulu. Penulung gempuru nulung bala tuai gempuru ngintu bala menyadi Kristian dalam raban gempuru. Kelimpah ari nya, bala tuai gempuru enggau penulung gempuru enggau baruh ati gawa ke bala menyadi Kristian sereta ransing ba pengawa nginjil. w23.12 28 ¶14-16

Lebuh Josiah beumur 16 taun, iya berengkah ngiga Jehovah. Iya deka belajar pasal Jehovah, lalu ngereja peneka Iya. Taja pia, nya ukai utai ti senang dikereja. Maya nya, mayuh orang nyembah petara pelesu. Ketegal Josiah raja ti biak maya nya, iya begunaka pemerani ngambika ulih ngasuh orang badu ngereja nya. Lalu sebedau Josiah beumur 20 taun, iya berengkah muai semua pengarap ti pelesu ari menua nya. Naka meh pemerani Josiah! (2 Ban. 34:​1, 2) Taja pan nuan agi biak, nuan ulih neladan Josiah. Nuan pan ulih belajar mayuh agi pasal Jehovah enggau sifat-sifat Iya ti ngerinduka ati. Lebuh nuan ngereja nya, nuan tentu diperansang deka nyerahka diri ngagai Iya. Baka ni pemutus tu deka ngubah pengidup nuan? Peratika utai ke dipadah Luke. Iya dibaptisa maya iya beumur 14 taun. Ku iya: “Belabuh ari diatu, aku deka ngenuluka Jehovah ba pengidup aku, lalu aku deka enggau naka ulih ngelantangka ati Iya.” (Mrk. 12:30) Nuan mega deka diberekat enti nuan milih deka nyerahka diri ngagai Jehovah! w23.09 11 ¶12-13

Lebuh rasul Paul nulis surat tu, raban gempuru Tesalonika baru aja ditumbuhka kurang ari setaun. Bala menyadi lelaki ke dipilih engka kurang bepengalaman lalu engka bisi ngereja penyalah. Taja pia, sida endang patut dipebasa. Seraya Penusah ti Besai majak semak, kitai patut lebih agi bepanggai ngagai bala tuai gempuru ba endur kitai ngambika ulih nerima iring. Kitai engka enda ulih nerima iring ari bala menyadi ba indu opis tauka ba pampang opis. Nyadi, amat penting kitai belajar rindu sereta bebasaka bala tuai gempuru kitai diatu. Enda ngira nama utai ke nyadi, aram meh kitai mengkang bejaga. Anang betumpu ba pengelemi sida, tang kingatka meh nengah Jesus, Jehovah benung ngiring bala menyadi lelaki ti tetap ati tu. Baka tupi besi ke ngelindung pala soldadu, harapan kitai ke nganti deka diselamatka deka nyaga runding kitai sereta nulung kitai berunding enggau betul. Kitai nemu utai ke ulih diberi dunya tu nadai reti magang. (Plp. 3:8) Harapan kitai nulung kitai mengkang tenang sereta enda panik. w23.06 11-12 ¶11-12

Sida ke ninga kangau indu ti beli patut ngaga pemutus sekalika sida deka nerima tauka nulak kangau iya. Kitai mega engka patut ngaga pemutus ke baka nya. Bisi kebuah ti amat manah kitai patut nyeliahka diri ari ngereja ulah seks ti kamah. Indu ti beli nya nyebut: “Ai ti dichuri berasai manis agi.” (J-lam. 9:17) Nama reti “ai ti dichuri”? Bup Kudus mandingka seks entara laki enggau bini baka ai ti ngasuh berasai nyamai. (J-lam. 5:​15-18) Siku lelaki enggau indu ke udah kawin enggau sah dikemendarka bisi hubungan seks enggau pangan diri. Tang, utai nya amat bebida enggau “ai ti dichuri,” ke engka dituju ngagai ulah seks ti kamah, ti ditagang. Orang ke ngereja ulah seks ti kamah kesuah iya nguji ngelalaika nya ari orang bukai, baka siku penchuri ke belalai ngenchuri utai. “Ai ti dichuri” engka berasai manis enti sida ngumbai nadai orang deka nemu utai ke udah dikereja sida. Sida nipu diri empu! Laban Jehovah meda semua utai. Enti Jehovah enda nerima kitai, nya utai ti pemadu pait ke diasaika kitai, lalu tu tentu ukai utai ti “manis.”—1 Kor. 6:​9, 10. w23.06 22 ¶7-9

Nama patut digaga nuan enti nuan ngasaika sampi nuan enda agi datai ari ati? Tauka, nuan enda agi rinduka pengawa nginjil baka suba? Enti nuan berasai baka tu pengudah dibaptisa, anang meh ngumbai diri udah lenyau kuasa kudus Jehovah. Ketegal kitai enda sempurna, asai ati kitai ulih berubah. Enti pengeransing nuan majak kurang, belematika meh teladan Rasul Paul. Iya bebendar deka neladan Jesus. Taja pia, Paul mega nemu, kekadang iya kurang pengeransing deka ngereja utai ti patut dikereja iya. Paul keran deka ngereja tanggung pengawa iya enda ngira asai ati ke dikembuan iya maya nya. Baka nya mega, anang semina ngaga pemutus bepanggai ba asai ati nuan aja. Terus meh ngereja utai ti betul, enda ngira asai ati ke dikembuan nuan maya nya. Enti nuan terus ngereja utai ti betul, nyau kelama asai ati nuan deka berubah.—1 Kor. 9:16. w24.03 11-12 ¶12-13

Kitai ulih ngayanka pengerindu ngagai bala menyadi Kristian kitai lebuh kitai nyadi kaban sida sereta begulai enggau sida. (2 Kor. 6:​11-13) Mayuh ari raban gempuru kitai ngembuan bala menyadi Kristian ke datai ari latar belakang ti amat bebida, lalu sida mega ngembuan personaliti ti amat bebida enggau kitai. Kitai ulih ngenalamka pengerindu kitai ke semua sida lebuh kitai betumpu ba sifat manah ti dikembuan sida. Lebuh kitai belajar beratika orang sama baka chara Jehovah beratika sida, kitai nunjukka diri rinduka sida. Pengerindu amat penting maya Penusah ti Besai. Lebuh penusah nya berengkah, baka ni Jehovah deka nyaga kitai? Peratika utai ti diasuh Jehovah kereja bala nembiak Iya lebuh menua Babilon kelia diserang: ‘Pulai ngagai rumah kita empu, kita ke nembiak aku, lalu tutup pintu kita. Belalai enda lama, nganti pengeringat Petara badu.’ (Isa. 26:20) Kitai mega engka patut nitihka iring ti sama maya Penusah ti Besai. w23.07 6-7 ¶14-16

Ari ulah nuan, ayanka diri ngembuan runding ti masuk akal. Tanya diri empu: ‘Kati orang bukai ngumbai aku ngembuan runding ti masuk akal? Tauka kati sida ngumbai aku kelalu terit? Kati aku ningaka runding orang bukai lalu nitihka chara sida enti ulih?’ Enti kitai majak ngayanka runding ti masuk akal, kitai deka majak agi neladan Jehovah enggau Jesus. Kitai patut ngayanka runding ti masuk akal lebuh situasi kitai berubah. Ubah ke baka tu engka ngasuh kitai napi penanggul ke enda dijangka kitai. Ambika chunto, kitai engka napi penanggul ti balat ba pengerai. Situasi ekonomi enggau situasi ba perintah alai kitai diau engka berubah. Semua tu ulih nyadi enggau ngenyit, lalu tu ulih ngasuh pengidup kitai engka nyadi tusah agi. (P-jar. 9:11) Indah ubah ba pengawa teokratik kitai ulih nyadi siti penguji. Kitai ulih mujur nelebaka diri enggau situasi ti baru enti kitai ngereja empat iti utai tu: (1) terima meh situasi nuan ti udah berubah diatu, (2) perundingka utai ti deka dikereja nuan diatu, ukai utai ti kala dikereja nuan, (3) betumpu ba utai ti positif, lalu (4) kereja utai ke orang bukai. w23.07 22 ¶7-8

Orang Babilon naban nabi Daniel nyadi orang tangkap ba menua Babilon, endur ti jauh ari Jerusalem. Maya nya iya agi nembiak. Taja pan iya agi biak, tang bala pegawai orang Babilon kagum enggau iya. Sida “meda gamal” Daniel ‘nadai penimpang sereta sigat,’ lalu iya datai ari ruang bilik ti penting. (1 Sam. 16:7) Ketegal nya, orang Babilon ngelatih iya ngambika iya ulih gawa ba istana. (Dan. 1:​3, 4, 6) Jehovah rinduka Daniel ketegal pemutus ti manah ke digaga iya ba pengidup. Kebendar iya, lebuh Jehovah madah Daniel nya baka Noah enggau Jop, Daniel engka beumur kira-kira 20 taun aja. Taja pan Daniel agi biak, tang Jehovah ngumbai Daniel lurus baka Noah enggau Jop, ke udah nyembah Iya enggau tetap ati pengelama betaun-taun. (P-kal. 5:32; 6:​9, 10; Jop 42:​16, 17; Esk. 14:14) Lalu Jehovah terus rinduka Daniel sepemanjai pengidup iya.—Dan. 10:​11, 19. w23.08 2 ¶1-2

Lebuh nuan deka meli sebuah rumah. nuan tentu deka meresa rumah nya enggau silik sebedau meli iya. Kitai ulih ngereja utai ti sama lebuh macha sereta belajarka Bup Kudus. Enti nuan macha enggau jampat, nuan engka semina belajarka “pekara asas ti bekaul enggau pesan ti kudus ari Petara.” (Heb. 5:12) Baka rumah ke dipadah tadi, kitai mesti tama ngambika ulih nemu mayuh agi pasal rumah nya. Uji beratika baka ni utai ke ditulis dalam siti bup mit bisi kaul enggau bup mit ke bukai dalam Bup Kudus. Bebendar nguji faham nama pemendar ke dipechayaka nuan, sereta kebuah nuan pechayaka iya. Ngambika ulih meretika semua begian dalam Bup Kudus, bisi sekeda utai ke patut dipelajarka kitai enggau dalam agi. Rasul Paul meransang bala menyadi Kristian ngambika bagas agi belajarka Bup Kudus. Enggau nya, sida ulih “amat-amat nemu pemesai buka, pemanjai, peninggi, enggau penalam” pemendar. Tu deka nulung sida “beurat sereta tegap” ba pengarap. (Eps. 3:​14-19) Kitai mega patut ngereja utai ti sama. w23.10 18 ¶1-3

Bup Kudus ngundan mayuh teladan pasal orang ke sabar. Endang manah enti nuan ulih mansik pasal sida. Ambika chunto, David agi biak lebuh iya dipilih nyadi raja orang Israel. Tang iya patut nganti betaun-taun sebedau iya ulih nyadi raja. Simion enggau Ana nyembah Jehovah enggau tetap ati seraya seduai iya nganti penatai Messiah ti Disemaya. (Luk. 2:​25, 36-38) Lebuh nuan belajarka teladan sida, giga meh saut ngagai sekeda ari tanya tu: Nama udah nulung iya ngayanka penyabar? Nama penguntung ke udah diulih iya ketegal iya sabar? Baka ni aku ulih neladan iya? Nuan mega tau bulih penguntung lebuh belajar pasal chunto sida ke enda sabar. (1 Sam. 13:​8-14) Nuan ulih nanya: ‘Nama kebuah sida enda sabar? Nama penyadi iya lebuh sida enda sabar?’ w23.08 25 ¶15

Peter orang ti setia. Iya enda ngelakka nama-nama utai ngasuh iya badu ari nitihka Jesus. Bisi sekali, Jesus nyebut utai ke tusah deka difaham bala murid iya. (Jhn. 6:68) Mayuh ari murid Jesus badu agi nitihka iya. Sida enda nganti Jesus nerangka utai ti disebut iya. Tang Peter ngayanka diri setia ngagai Jesus. Ku iya madah ngagai Jesus: “Jaku nuan meri pengidup ti meruan belama iya.” Jesus nemu Peter enggau bala rasul ke bukai deka ninggalka iya. Taja pia, Jesus madah ngagai Peter, iya andal Peter deka pulai baru lalu terus tetap ati. (Luk. 22:​31, 32) Jesus nemu “ati amat ransing, tang tubuh lemi.” (Mrk. 14:38) Nya alai, taja pan Peter madahka diri enda ngelala Jesus, tang Jesus enda putus asa ngagai Peter. Pengudah Jesus diangkatka idup baru, iya ngayanka diri ngagai Peter. Maya nya, Peter kediri aja. (Mrk. 16:7; Luk. 24:34; 1 Kor. 15:5) Maya nya, Peter amat tusah ati ketegal utai ti udah dikereja iya. Iya tentu berasai amat diperansang pengudah Jesus datai betemu enggau iya. w23.09 22 ¶9-10

Petara ngampunka dosa orang ke arapka Iya. Reti iya, Jehovah enda agi beratika dosa sida. (Mas. 32:​1, 2) Ba Jehovah, sida ulih dikumbai enda bepenyalah tauka lurus ketegal pengarap sida. Taja pan Abraham, David, enggau nembiak Petara ke bukai dikumbai lurus, tang sida agi enda sempurna sereta bedosa. Taja pia, ketegal pengarap sida, Petara ngumbai sida enda bepenyalah, kelebih agi enti dibandingka enggau orang ke enda arapka Iya. (Eps. 2:12) Baka ke ditulis dalam surat iya, Rasul Paul madahka kitai patut ngembuan pengarap ngambika ulih nyadi pangan Petara. Abraham seduai David dikumbai pangan Petara laban seduai iya arapka Iya. Kitai mega ulih nyadi pangan Petara ketegal pengarap kitai. w23.12 3 ¶6-7

Kemayaharitu, orang Kristian bisi basa ti besai laban ulih nyembah Jehovah. Sida meri awak, pengering, enggau utai ke dikemisi sida ngambika ulih ngenuluka Perintah Petara. Nyadi, lebuh kitai enggau naka ulih gawa ke Jehovah, kitai nunjukka diri beterima kasihka basa ke dikembuan kitai laban ulih nyembah Jehovah. Rasul Paul nulis pasal utai ke patut seruran digaga kitai lebuh kitai nyembah Jehovah. (Heb. 10:​22-25) Nya nyengkaum besampi ngagai Jehovah, nginjil ngagai orang bukai, begempuru, sereta meransang pangan diri, “kelebih agi lebuh [kitai] meda hari [Jehovah] nya nyau semak.” Nyauka ba pengujung bup Pemandang, siku melikat Jehovah madah: “Sembah meh Petara!” (Pem. 19:10; 22:9) Iya nyebut utai tu dua kali, kena nunjukka pengawa tu amat penting. Arapka semua kitai seruran ingatka semua utai ke udah dipelajarka kitai pasal rumah sembiang rohani Jehovah sereta nyaga peluang kitai ke ulih nyembah Petara kitai, Jehovah! w23.10 29 ¶17-18

Semua kitai deka “terus rinduka pangan diri.” Taja pia, kitai patut ingat Jesus kala madah “pengerindu orang ke pangan diri deka majak kurang.” (Mat. 24:12) Kati tu reti iya mayuh ari bala murid Jesus deka ngetu rinduka pangan diri? Enda. Tang kitai patut bejimat ngambika enda nitihka chara orang ba dunya, ke enda ngayanka pengerindu. Nya alai, kitai deka berandauka siti tanya ti penting: Nama ulih nulung kitai nemu sekalika kitai agi rinduka bala menyadi Kristian tauka enda? Siti chara kitai ulih nemu sekalika kitai agi rinduka bala menyadi, iya nya ari reaksi kitai lebuh sekeda situasi nyadi ba pengidup kitai. (2 Kor. 8:8) Rasul Peter bisi nyebut siti ari situasi nya. Ku iya: “Tang ke pemadu penting nya, rindu meh ke pangan diri enggau pengabis ati laban pengerindu ulih nutup mayuh dosa.” (1 Pet. 4:8) Bala menyadi Kristian engka ngaga penyalah tauka ngereja utai ke ngemediska ati kitai. Lebuh utai nya nyadi, reaksi kitai deka nulung kitai nemu sekalika kitai rinduka sida tauka enda. w23.11 10-11 ¶12-13

Kitai enda ulih ngumbai diri ngasika pesan Jesus pasal pengerindu enti kitai semina rinduka sekeda aja menyadi ba raban gempuru. Endang amat, baka Jesus, kitai engka berasai semak agi enggau sekeda bala menyadi. (Jhn. 13:23; 20:2) Tang rasul Peter madahka, kitai patut bebendar agi “rinduka pangan diri baka diri menyadi.” Pengerindu ke baka tu patut diayanka ngagai semua bala menyadi Kristian kitai laban sida sebagi ari diri sebilik kitai. (1 Pet. 2:17) Peter meransang kitai: “Bebendar meh rinduka pangan diri ari ati.” (1 Pet. 1:22) Dalam konteks tu, ‘bebendar rinduka pangan diri ari ati’ mai reti, terus ngayanka pengerindu taja pan tusah deka rinduka orang nya. Ambika chunto, engka bisi siku menyadi ngemediska ati kitai. Keterubah iya, kitai engka tusah deka ngayanka pengerindu laban kitai deka malas dendam. Tang Peter belajar ari Jesus, Petara enda rinduka ulah ke baka nya. (Jhn. 18:​10, 11) Peter nulis: “Anang malas penyai ngena penyai, tauka jaku kelese ngena jaku kelese. Tang, balas meh ngena jaku ti manah.” (1 Pet. 3:9) Enti nuan bebendar rinduka pangan diri ari ati, nuan deka diperansang ngayanka pemanah ati enggau pengibuh. w23.09 28-29 ¶9-11

Kitai alit ati lebuh meda siku anak mit mansang besai enggau jampat. Pengawa tu baka ke nyadi enggau automatik. Taja pia, enti kitai deka nyadi orang Kristian ti matang, tu ukai pengawa ti automatik. (1 Kor. 13:11; Heb. 6:1) Ngambika ulih nyapai tuju nya, tiap iku kitai patut ngembuan kaul ti rapat enggau Jehovah. Kitai mega begunaka kuasa kudus Iya kena nulung kitai ngemansangka sifat ti ngelantangka ati Iya, belajarka pengelandik ti deka nulung kitai ba pengidup besehari-sehari, sereta besedia ke tanggungjawap ti engka dikembuan kitai jemah ila. (J-lam. 1:5) Bup Kudus madahka, Jehovah ngaga lelaki enggau indu. (P-kal. 1:27) Endang amat, tubuh lelaki enggau tubuh indu bebida, tang bisi utai bukai mega ke ngasuh sida bebida. Ambika chunto, Jehovah ngaga lelaki enggau indu ngambika ngereja sesiti tanggung pengawa. Nyadi, sida begunaka sifat enggau pengelandik ke deka nulung sida ngereja tanggung pengawa diri empu.—P-kal. 2:18. w23.12 18 ¶1-2

Kati Jesus dekaka orang bukai ngena nama Apai iya? Au. Sekeda tuai pengarap engka pechaya nama Petara kelalu kudus lalu enda tau disebut. Ku sida, enti kitai nyebut nama Petara, kitai enda bebasaka Iya. Tang Jesus enda nejuka adat ti enda bepelasarka Bup Kudus tu nagang iya ari ngemuliaka nama Apai iya. Peratika utai ti nyadi lebuh Jesus ngeraika siku lelaki ke dirasuk melikat ti jai ba Gerasa. Orang ba dia nyadi takut lalu ngasuh Jesus mupuk ari endur nya. Jesus pan ninggalka endur nya. (Mrk. 5:​16, 17) Taja pia, Jesus agi dekaka nama Jehovah ditemu orang ba dia. Nyadi, iya ngasuh lelaki ke udah digeraika nya madah ngagai orang ba dia pasal utai ke udah dikereja Jehovah, ukai pasal utai ke udah dikereja Jesus. (Mrk. 5:19) Kemayaharitu, Jesus mega dekaka kitai madahka pasal nama Apai iya ba serata dunya. (Mat. 24:14; 28: 20) Lebuh kitai ngereja nya, kitai ngagaka ati Jesus, Raja kitai. w24.02 10 ¶10

Kitai bulih mayuh berekat laban nyadi sebagi ari gerempung Jehovah ba hari ti penudi tu. Pengidup ba dunya tu majak tusah, tang Jehovah udah meri kitai bala menyadi Kristian kena nulung kitai. (Mas. 133:1) Iya nulung kitai ngembuan ruang bilik ti lantang. (Eps. 5:33–6:1) Lalu, Iya meri kitai penemu-dalam ngambika kitai bulih pengelantang ti bendar ba ati. Tang kitai patut berusaha ngambika ulih terus nyembah Jehovah enggau tetap ati. Nama kebuah? Laban kekadang utai ke dipadah tauka dikereja orang bukai ulih ngemediska ati kitai. Kitai mega engka asa ati lebuh kitai ngaga penyalah, kelebih agi enti kitai bekali-kali ngereja penyalah ti sama. Taja pia, kitai patut terus nyembah Jehovah taja pan napi situasi tu: (1) Lebuh bala menyadi Kristian ngemediska ati kitai, (2) lebuh kaling pengidup ngasaka ati kitai, sereta (3) lebuh kitai asa ati enggau diri empu. w24.03 14 ¶1-2

Kekadang, nuan engka ninga pengalaman ari bala menyadi ke udah ngereja mayuh agi ke Jehovah. Engka sida udah enggau Sekula Penginjil Perintah Petara, tauka pindah ngagai endur ke begunaka mayuh agi penginjil. Enti situasi nuan ngemendarka nuan ngereja nya, tu mega ulih nyadi siti juluk ati ti manah ke nuan. Nembiak Jehovah seruran ngiga chara deka ngereja mayuh agi ke Iya. (SKR. 16:9) Tang baka ni enti nuan enda ulih ngereja nya diatu? Anang sekali-kali ngumbai diri kurang agi berega ari sida ke ulih ngereja nya. Utai ti pemadu penting nya, nuan terus tan datai ke ujung. (Mat. 10:22) Kingatka meh, lebuh nuan ngereja ni ke ulih nuan, nuan udah ngagaka ati Jehovah. Nya siti chara ti manah nuan ulih terus nitihka Jesus pengudah dibaptisa.—Mas. 26:1. w24.03 10 ¶11

Apai kitai ti ba serega besemaya deka ngampunka kitai enti kitai nesal ati. (Mas. 86:5) Nyadi, enti kitai amat nesalka penyalah ke udah digaga, kitai ulih pechaya utai ku Jehovah nya endang amat, iya nya Iya udah ngampunka kitai. Kingatka meh, Jehovah enda kala minta utai lebih ari ke ulih dikereja kitai. Iya beterima kasih enggau pengawa kitai, seagi-agi kitai ngereja nya enggau bebendar. Kelimpah ari nya, kitai mega ulih belematika teladan sida ke dalam Bup Kudus ti gawa ke Jehovah enggau pengabis ati. Ambika chunto, peratika teladan rasul Paul. Betaun-taun, iya bebendar gawa ke Jehovah. Iya bejalai jauh sereta numbuhka mayuh raban gempuru. Tang lebuh situasi ba pengidup iya berubah, lalu iya enda ulih agi nginjil mayuh baka suba, kati tu reti iya Jehovah enda agi gaga ati enggau iya? Enda. Iya terus ngereja utai ke ulih iya, lalu Jehovah merekatka iya. (SKR. 28:​30, 31) Baka nya mega, utai ke ulih digaga kitai ke Jehovah ulih berubah. Tang utai ti penting ba Jehovah nya, tuju ati kitai gawa ke Iya. w24.03 27 ¶7, 9

Nengah sampi iya ngagai Jehovah, Jesus netapka teladan ke ulih dititihka bala murid iya. Sepemanjai pengawa nginjil iya, Jesus suah besampi. Iya patut netapka awak kena besampi laban iya suah kisuk sereta dikelingi mayuh orang. (Mrk. 6:​31, 45, 46) Iya dani tumu pagi ngambika iya bisi awak kediri kena besampi. Jesus besampi semalam-malam sebedau ngaga sesiti pemutus ti penting. Ba maya ke bukai mega Jesus ngereja tu. (Luk. 6:​12, 13) Lalu Jesus mega mayuh kali besampi ba malam sebedau iya mati, enda lama sebedau iya nembuka begian ti pemadu penting ari pengawa iya ba dunya. (Mat. 26:​39, 42, 44) Ari teladan Jesus kitai belajar, enda ngira sekalika kitai amat kisuk pan, kitai patut netapka awak kena besampi. Baka Jesus, kitai engka patut ngiga awak kena besampi. Kitai engka patut dani tumu agi ngambika ulih besampi tauka kitai engka ulih besampi maya laun malam. Lebuh kitai ngereja nya, kitai nunjukka diri beterima kasih ngagai Jehovah laban udah meri kitai pemeri ti spesial tu. w23.05 3 ¶4-5

Peratika rambai jaku “udah dituangka” ba ayat seharitu. Dalam jaku asal, ayat tu mai reti, pengerindu Jehovah ke sida ti dipilih ke serega amat kuat nyentukka iya ulih disemaka baka sungai ti benung mengalir. Sida ti dipilih ke serega nemu sida “dikerinduka Petara.” (Jud. 1) Rasul John madahka asai ati sida lebuh iya nulis: “Peda pemesai pengerindu Apai ngagai kitai nyentukka kitai patut dikumbai bala anak Petara!” (1 Jhn. 3:1) Kati Jehovah semina rinduka sida ti dipilih ke serega? Enda, Jehovah rinduka semua kitai. Nama bukti ti pemadu besai ke nunjukka Jehovah rinduka nuan? Bukti iya nya, genselan tebus Jesus. Semina Jehovah aja ke udah ngayanka pengerindu ti pemadu besai nengah genselan tebus tu.—Jhn. 3:16; Rom. 5:8. w24.01 28 ¶9-10

Ayat tu madahka siti agi utai ke nulung David lebuh iya berasai takut. Taja pan nyawa iya dalam bahaya, tang iya belematika utai ke deka dikereja Jehovah ke iya jemah ila. David nemu Jehovah deka nyelamatka iya ba maya ti ngena, laban Jehovah madah David deka nyadi raja orang Israel. (1 Sam. 16:​1, 13) Ba David, semua utai ti disemayaka Jehovah tentu deka nyadi. Nama utai ke udah disemayaka Jehovah ke nuan? Endang amat, kitai enda ngarapka Jehovah ngelindung kitai ari semua penusah. Tang kingatka meh, sebarang penguji ke ditapi nuan ba dunya tu deka nadai agi ba dunya baru. Jehovah deka muai iya. (Isa. 25:​7-9) Petara ke ngaga kitai tentu ulih ngidupka baru orang ke udah mati, ngeraika kitai ari semua macham penyakit, muai semua utai ke ngasuh kitai tusah ati, sereta ngemunaska semua orang ke nyakal Iya.—1 Jhn. 4:4. w24.01 6 ¶12-13

Perundingka kebuah nuan nyerahka diri ngagai Jehovah sereta dibaptisa. Nuan ngereja tu laban nuan deka bepiak ba Jehovah. Kingatka baru utai ke udah nulung nuan yakin nuan udah tetemuka pemendar. Nuan udah ngelala Jehovah lalu nuan berengkah bebasa sereta rinduka Iya ti nyadi Apai nuan ti di serega. Pengarap nuan majak mansang lalu tu meransang nuan ngaga ubah ba pengidup. Nuan badu agi ngereja utai ti dipegedika Jehovah lalu berengkah ngereja utai ti ngerinduka ati Iya. Nuan berasai lantang lebuh nuan nemu Petara udah ngampunka nuan. (Mas. 32:2) Nuan datai begempuru lalu berengkah bekunsika utai ti manah ke dipelajarka nuan enggau orang bukai. Lalu ketegal nuan udah nyerahka diri ngagai Jehovah lalu dibaptisa, nuan diatu benung bejalai ba jalai ti nuju ngagai pengidup, lalu nuan deka enggau naka ulih nentuka diri terus bejalai ba jalai nya. (Mat. 7:​13, 14) Tang aram meh kitai mengkang bediri tegap, enda bekinsit, lalu seruran rinduka Jehovah sereta ngasika pesan Iya. w23.07 17 ¶14; 19 ¶19

Lebuh nuan belematika semaya ke udah digaga nuan ngagai Jehovah, nuan deka bulih pengering kena ngelaban sebarang penguji. Ambika chunto, kati nuan deka ngayanka asai ati ti romantik ngagai kaling pengidup orang bukai? Tentu enda. Nuan udah besemaya ngagai Jehovah, nuan enggai ngereja utai ke baka nya. Enti nuan enda ngelakka asai ati ti salah tumbuh dalam ati nuan, nuan enda ibuh belaban kena muai asai ati nya dudi hari. Enggau nya, nuan ulih nyeliahka ari nitihka jalai “orang ke jai.” (J-lam. 4:​14, 15) Belematika teladan Jesus ulih nulung kitai. Iya keran deka ngagaka ati Apai iya. Baka Jesus, kitai mega keran deka nulak sebarang utai ke enda dikerinduka Petara laban kitai udah nyerahka diri ngagai Jehovah. (Mat. 4:10; Jhn. 8:29) Lebuh nuan napi penanggul tauka penguji, nya siti peluang kena nunjukka diri keran deka nitihka Jesus. Lalu nuan ulih andal, Jehovah deka nulung nuan ngereja nya. w24.03 9-10 ¶8-10