Ogos

Peratika dua iti utai ti penting ba Masmur tu: (1) Orang ti badas napi penusah. (2) Jehovah nulung kitai lebuh kitai napi penusah. Baka ni Jehovah nulung kitai? Siti chara Jehovah nulung kitai iya nya, Iya nulung kitai ngembuan runding ti seimbang pasal pengidup ba dunya tu. Amat, Jehovah besemaya kitai deka gaga ati lebuh nyembah Iya. Tang Iya enda gerenti pengidup kitai diatu deka nadai penanggul. (Isa. 66:14) Iya meransang kitai betumpu ba pengidup jemah ila. Maya nya, kitai deka bisi pengidup ti belama iya ke dikedekaka Jehovah ke kitai. (2 Kor. 4:​16-18) Tang ke diatu, Iya nulung kitai terus nyembah Iya ninting hari. (Sab. 3:​22-24) Nama ulih dipelajarka kitai ari bala penyembah Jehovah ti tetap ati ba jeman Bup Kudus, sereta ba jeman kitai? Kitai engka napi penusah ke enda dijangka. Tang lebuh kitai bepanggai ba Jehovah, Iya deka seruran nyaga kitai.—Mas. 55:22. w23.04 14-15 ¶3-4

Kitai ulih belajar ari teladan Josep enggau Maria. Seduai iya sedia deka ngasi piak bekuasa taja pan nya tusah. (Luk. 2: 1-6) Lebuh kandung Maria udah semilan bulan, iya enggau Josep patut ngereja siti utai ti tusah. Maya nya, raja Rome Augustus meri atur ngasuh semua orang ba serata Rome ngerejister nama diri ba nengeri diri empu. Josep enggau Maria patut mupuk ngagai Betlehem. Pejalai nya kira-kira 150 kilometer nengah jalai ti bebukit. Pejalai nya tentu tusah, kelebih agi ke Maria. Seduai iya engka bisi pengirau. Baka ni enti Maria beranak maya dalam pejalai? Kati Maria enggau anak ke dalam kandung nya deka selamat? Seduai iya tentu berasai irau laban anak ke dalam kandung nya Messiah ke dianti sida. Kati nya ulih nyadika alasan ngambika seduai iya enda ibuh ngasika atur ari perintah? Taja pan Josep enggau Maria bisi kebuah irau, seduai iya tetap ngasika atur nya. Jehovah gaga ati laban seduai iya ngasi, lalu Iya nyaga sida. Maria datai enggau selamat ba Betlehem, lalu iya ngadaka siku anak lelaki ti gerai. Iya indah nulung ngamatka jaku benabi dalam Bup Kudus!—Mik. 5:2. w23.10 8 ¶9; 9 ¶11-12

Nama ulih digaga nuan enti nuan berasai kelalu takut deka meri komen? Nuan ulih besedia enggau manah. (J-lam. 21:5) Enti nuan mereti agi utai ke benung dikerandauka, nuan deka senang agi meri komen. Pia mega, sediaka komen ti pandak. (J-lam. 15:23; 17:27) Komen ti pandak ngasuh nuan kurang agi irau. Lalu, lebuh nuan meri komen ti pandak ke ngena leka jaku nuan empu, nuan nunjukka diri udah besedia enggau manah sereta meretika utai ke benung dikerandau. Baka ni enti nuan udah nguji sekeda chara tu, tang agi berasai irau deka meri komen lebih ari sekali tauka dua kali? Pechaya meh Jehovah beterima kasihka usaha nuan ti bebendar ngereja ni ke ulih nuan. (Luk. 21:​1-4) Jehovah enda minta kitai ngereja utai mayuh agi ari ke ulih dikereja kitai. (Plp. 4:5) Tetapka utai ke ulih dikereja nuan. Gaga juluk ati ngambika ulih ngereja nya. Lalu, besampi meh minta Jehovah meri nuan pengelantang ba ati. Terubah iya, juluk ati nya engka meri siti komen ti pandak. w23.04 21 ¶6-8

Rasul Paul mandingka kitai baka soldadu ke mengkang bejaga sereta udah ngerasukka semua kereban perang. Orang ngarapka siku soldadu besedia deka beperang ba sebarang maya lebuh bisi perang. Baka nya mega enggau kitai. Kitai mengkang besedia ke hari Jehovah lebuh kitai ngerasukka terabai dada pengarap enggau pengerindu sereta ngerasukka tupi besi harapan kitai. Terabai dada ngelindung jantung soldadu. Baka nya mega pengarap enggau pengerindu ngelindung ati kitai. Sifat tu deka nulung kitai terus nyembah Petara sereta nitihka Jesus. Pengarap ngasuh kitai yakin Jehovah deka ngupah kitai lebuh kitai ngiga Iya enggau pengabis ati. (Heb. 11:6) Sifat tu deka nulung kitai mengkang tetap ati ngagai Tuai kitai, Jesus, indah enti kitai patut napi penusah. Kitai ulih negapka pengarap kitai ngambika ulih tan napi penusah. Kitai ulih ngereja tu lebuh kitai belajar ari teladan orang kemayaharitu ke mengkang tetap ati taja pan napi perinsa tauka penusah ba ekonomi. Lalu kitai ulih nyeliahka diri ari kelalu rinduka duit sereta reta tengkira enti kitai neladan orang ke idup enggau pengumbas iya ngambika ulih ngenuluka Perintah Petara. w23.06 10 ¶8-9

Nemu nagang diri nya reti iya kitai ulih ngawal asai ati sereta ulah kitai. Kitai mega begunaka sifat nemu nagang diri ngambika ulih nyapai juluk ati, kelebih agi enti juluk ati kitai nya tusah tauka tusah dijapai enti kitai nadai pengeran deka ngereja sesiti utai. Anang enda ingat, sifat nemu nagang diri nya sebagi ari buah kuasa kudus Petara. Nya alai, pinta meh ari Jehovah kuasa kudus kena nulung nuan ngemansangka sifat ti penting nya. (Luk. 11:13; Gal. 5:​22, 23) Anang nganti situasi ti sempurna. Ba dunya tu, kitai engka nadai kala deka tetemuka situasi ti sempurna. Enti kitai nganti situasi ke baka nya, kitai engka enda kala deka nyapai juluk ati kitai. Kitai engka kurang pengeran deka nyapai juluk ati nya laban juluk ati kitai engka kelalu tusah deka dijapai. Enti tu situasi nuan, kati nuan ulih magi juluk ati nya ngagai juluk ati ti mit agi? Enti juluk ati nuan nya ngemansangka sesiti sifat, kati ulih nuan nguji ngayanka sifat tu nengah chara ti mit dulu? Enti juluk ati nuan nya deka macha semua ayat Bup Kudus, kati ulih nuan berengkah enggau ngaga jadual macha ti pandak agi? w23.05 29 ¶11-13

Sepemanjai Hari ti Penudi tu, Jehovah udah ngena gerempung Iya ngambika nyediaka iring ari Jaku Petara. Tu nulung semua kitai ngambika terus bejalai ba “Jalai Raya Ngagai Pengudus.” (Isa. 35:8; 48:17; 60:17) Kitai engka ulih madah, lebuh sesiku orang setuju deka belajarka Bup Kudus, iya bisi peluang bejalai ba “Jalai Raya Ngagai Pengudus.” Sekeda orang semina ngaga pejalai ti pandak aja, lalu udah nya ninggalka jalai raya nya. Ke bukai keran deka neruska pejalai nya nyentukka sida datai ngagai destinasi sida. Nama destinasi nya? Ba sida ke bisi harapan ngagai serega, “Jalai Raya Ngagai Pengudus” mai sida ngagai “paradais Petara” ba serega. (Pem. 2:7) Ba sida ke bisi harapan idup ba dunya, jalai raya nya deka mai sida ngagai pengujung 1,000 taun Kristus merintah. Maya nya, semua orang deka nyadi sempurna. Enti nuan benung bejalai ba jalai raya nya diatu, anang berundingka utai ti udah dilengkaka nuan. Lalu anang ninggalka jalai raya nya nyentukka nuan udah nembuka pejalai nuan ti nuju ngagai dunya ti baru. w23.05 17 ¶15; 19 ¶16-18

Lebuh nuan berundingka semua utai ke udah digaga Jehovah ke nuan, nuan deka berasai beterima kasih ngagai Iya sereta diperansang deka nyerahka pengidup nuan ngagai Iya. (Mas. 116:​12-14) Bup Kudus madahka, Jehovah meri “tiap iti pemeri ti manah sereta sempurna.” (Jas. 1:17) Pemeri ti pemadu besai nya, genselan tebus Anak Iya, Jesus. Gambarka pemesai reti pemeri nya! Ketegal genselan tebus nya, nuan ulih ngembuan kaul ti rapat enggau Jehovah. Lalu, Jehovah mega udah meri nuan peluang idup belama iya. (1 Jhn. 4:​9, 10) Lebuh nuan nyerahka diri ngagai Jehovah, nya siti chara ti pemadu manah ngayanka asai ati ti beterima kasih ketegal pemeri ti pemadu besai ke udah diterima nuan ari Iya. Pia mega enggau berekat ke bukai ke udah diberi Jehovah ngagai nuan.—U-dat. 16:17; 2 Kor. 5:15. w24.03 5 ¶8

Lebuh kitai meda standard moral ti enda manah ke dikembuan orang kemayaharitu, kitai ngasaika utai ti sama baka ke diasaika Lot. Iya “balat tusah ati ketegal orang ke ngelanggar adat enda malu ngereja utai ti jai,” laban iya nemu Apai kitai ti di serega begedika ulah ti jai. (2 Pet. 2:​7, 8) Ketegal Lot amat bebasa sereta rinduka Petara, iya begedika ulah ti enda bemoral ke dikembuan orang ke ngelingi iya. Kitai mega dikelingi orang ke kurang basa tauka nadai basa ke standard moral Jehovah. Taja pia, kitai ulih mengkang beresi ari segi moral enti kitai terus rinduka Petara sereta ngemansangka asai ati ti nangika Iya. Nya kebuah Jehovah nyediaka jaku peransang ti bepengerindu nengah bup Jaku Dalam. Semua orang Kristian, lelaki tauka indu, tuai tauka biak, tau bulih penguntung ari beratika jaku lalau ti bepenemu-dalam ke bisi dia. Lebuh kitai nangika Jehovah, kitai bejimat enggaika bekaban enggau orang ke ngereja utai ti jai. w23.06 20 ¶1-2; 21 ¶5

Nuan engka bisi napi sakal ari diri sebilik. Tauka, nuan engka ngelengkaka sekeda utai ngambika ulih ngenuluka Perintah Petara. (Mat. 6:33) Enti pia, andal meh, Jehovah beratika semua pengorbanan nuan. (Heb. 6:10) Nuan engka udah ngasaika pengamat jaku Jesus: “Barang sapa ke udah ninggalka rumah, tauka menyadi lelaki, tauka menyadi indu, tauka indai, tauka apai, tauka anak, tauka tanah, ketegal nama aku enggau ketegal Berita Manah, deka nerima 100 kali lipat mayuh agi ba jeman tu, iya nya mayuh agi rumah, menyadi lelaki, menyadi indu, indai, anak, enggau tanah, taja pan kena perinsa. Lalu jemah ila, iya deka bulih pengidup ti meruan belama iya.” (Mrk. 10:​29, 30) Berekat ke diterima nuan deka jauh besai agi ari sebarang pengorbanan ke udah digaga nuan.—Mas. 37:4. w24.03 9 ¶5

Lebuh orang Kristian ba Judea napi lapar pungkang ti balat, bala menyadi lelaki ba raban gempuru ba Antiok “meri tulung nitihka utai ti ulih diberi sida siku-siku.” (SKR. 11:​27-30) Taja pan bala menyadi ke ditinggang lapar pungkang nya diau ba endur ti jauh, orang Kristian ba Antiok keran deka nulung sida. (1 Jhn. 3:​17, 18) Kitai mega ulih ngayanka penyiru kemayaharitu lebuh kitai ninga pasal bala menyadi kitai ke udah ditinggang penusah baka bencana alam. Kitai deka nulung enggau jampat. Kitai engka ulih nanya ngagai bala tuai gempuru enti kitai ulih nulung ba sesiti projek, meri duit pemeri ngagai pengawa sedunya, tauka besampika sida ti ditinggang penusah. Bala menyadi kitai engka begunaka tulung ngulihka utai ti digunaka sida beridup. Lebuh Raja kitai, Jesus Kristus, datai ngakim orang, kitai deka iya meda kitai bisi ngayanka penyiru lalu mai kitai “bempu Perintah” Petara.—Mat. 25:​34-40. w23.07 4 ¶9-10; 6 ¶12

Jesus neladan Jehovah ke ngembuan runding ti masuk akal. Iya dianjung ke dunya ngambika ulih nginjil ngagai “orang Israel, ke baka bedus ti tesat.” Tang iya ngayanka runding ti masuk akal tauka seimbang lebuh iya nginjil ngagai orang bukai. Bisi sekali, siku indu ke ukai bansa Israel minta Jesus ngeraika anak indu iya ti balat merinsa ketegal “dirasuk melikat ti jai.” Jesus enggau siru ngereja utai ti dipinta indu nya lalu ngeraika anak indu iya. (Mat. 15:​21-28) Peratika siti agi chunto. Maya Jesus berengkah ngereja pengawa nginjil, iya kala madah: “Enti orang enggai ngaku diri murid aku . . . , aku pan enggai ngaku iya murid aku.” (Mat. 10:33) Tang Jesus terus ngaku Peter nyadi murid iya taja pan Peter tiga kali madahka diri enda ngelala Jesus. Nama kebuah? Jesus nemu Peter amat nesalka utai ti udah digaga iya lalu iya mega siku lelaki ti tetap ati. Pengudah Jesus diangkatka idup baru, iya ngayanka diri ngagai Peter. Maya nya, Jesus tentu bisi ngasuh Peter yakin iya udah ngampunka Peter lalu iya mega agi rinduka Peter. (Luk. 24:​33, 34) Petara Jehovah enggau Jesus Kristus ngembuan runding ti masuk akal. Baka ni enggau kitai? Jehovah mega ngarapka kitai ngembuan runding ti masuk akal. w23.07 21-22 ¶6-7

Baka ni kitai deka nulung orang bukai yakin utai tu amat deka nyadi? Kesatu, Jehovah Empu ke ngaga semaya nya. Bup Pemandang madahka: “Iya ke duduk ba kerusi diraja madahka: ‘Peda! Diatu Aku benung ngaga semua utai nyadi baru.’” Jehovah bisi penemu-dalam, kuasa, enggau pengingin deka ngamatka semaya nya. Kedua, Jehovah nemu utai ti dipadah Iya tentu deka nyadi. Nya kebuah Iya madah: “Jaku tu amat sereta tau dikearapka. . . . Semua utai nya udah nyadi.” Ketiga, lebuh Jehovah ngepunka sesiti utai, Iya tentu deka nembuka pengawa nya. Nya kebuah Iya madah: “Aku meh Alfa enggau Omega.” (Pem. 21:6) Jehovah deka nunjukka Sitan nya pemula lalu enda ulih nagang Iya ari ngamatka semaya Iya. Enti orang madah, “Manah semaya nya, tang tusah deka pechaya,” Nuan ulih macha sereta nerangka Pemandang 21:​5, 6 ngagai sida. Tunjukka chara Jehovah udah meri gerenti Iya deka ngamatka semaya nya, baka ke Iya udah nyain siti dokumen.—Isa. 65:16. w23.11 7 ¶18-19

Jehovah ngaga semaya nya ngagai Abraham lebuh Iya beumur 75 taun, maya nya iya agi bedau bisi anak. Kati Abraham bisi meda semaya nya dikeamatka? Bisi, tang ukai semua semaya nya. Pengudah meraka Sungai Eupratis, enggau pengudah nganti 25 taun, Abraham meda anak iya Isak ada, lalu iya patut nganti 60 taun da agi sebedau uchu iya Esau enggau Jakop ada. (Heb. 6:15) Tang Abraham enda sempat meda peturun iya nyadi bansa ti besai lalu bempu Menua ti Udah Disemaya. Taja pia, iya bisi kaul ti rapat enggau Jehovah. (Jas. 2:23) Lalu lebuh Abraham diangkatka idup baru ila, iya tentu gaga ati lebuh nemu pengarap enggau penyabar iya udah mai berekat ngagai semua bansa ba dunya! (P-kal. 22:18) Nama ulih dipelajarka kitai? Kitai empu engka enda meda semua semaya Jehovah dikeamatka diatu. Tang, enti kitai sabar baka Abraham, kitai ulih yakin Jehovah deka ngupah kitai diatu lalu deka meri upah ti besai agi ba dunya baru ke disemayaka Iya.—Mrk. 10:​29, 30. w23.08 24 ¶14

Lebuh Raja Usiah agi biak, iya siku raja ti baruh ati. Bup Kudus madahka, iya belajar betuaika tauka nangika Jehovah enggau ati ti tetap. Iya idup nyentukka iya beumur 68 taun, lalu Jehovah merekat iya nyauka sepemanjai pengidup iya. (2 Ban. 26:1-4) Usiah ngalahka mayuh munsuh, lalu negapka kuta nengeri Jerusalem. (2 Ban. 26:​6-15) Usiah tentu gaga ati enggau semua tulung ke udah diberi Jehovah. (P-jar. 3:​12, 13) Raja Usiah suah meri arahan ngagai orang bukai. Engka tu ngasuh iya ngumbai diri ulih ngereja sebarang utai ti dikedekaka iya. Bisi sekali, Usiah tama ngagai Rumah Sembiang Jehovah, lalu nguji deka nunu menyan. Tang, bala raja enda dikemendarka ngereja pengawa tu. (2 Ban. 26:​16-18) Imam Besai Asariah bisi nguji deka nagang iya ari ngereja nya, tang Usiah nyadi ringat. Sayau amat, Usiah enda mengkang tetap ati. Ketegal nya, Jehovah ngukum iya ngena penyakit lan. (2 Ban. 26:​19-21) Pengidup iya tentu manah agi enti sema iya mengkang baruh ati! w23.09 10 ¶9-10

Taja pan rasul Peter siku ari orang Kristian ke dipilih ke serega, tang iya agi patut belaban enggau pengelemi iya. Ba taun 36 M., Petara nganjung Peter betemu enggau Kornelius. Kornelius ukai orang bansa Judah. Ba maya nya mega, Petara milih Kornelius ngena kuasa kudus. Tu enggau terang nunjukka “Petara enda bepilih mata,” lalu Iya nerima orang ke ukai bansa Judah nyadi orang Kristian maya nya. (SKR. 10:​34, 44, 45) Pengudah nya, Peter belabuh makai enggau orang bansa bukai. Tu ukai utai ti biasa dikereja iya. Taja pia, bisi sekeda orang Kristian ke bansa Judah ngasaika orang Judah enda patut makai enggau orang bansa bukai. Lebuh orang ke bisi runding ti baka nya datai ngagai Antiok, Peter badu agi makai begulai enggau bala menyadi Kristian iya ke ari bansa bukai. Iya engka takut deka ngemediska ati bala menyadi Kristian ari bansa Judah. Rasul Paul meda ulah Peter ti pepura, lalu ngerara iya ba mua orang mayuh. (Gal. 2:​13, 14) Taja pan Peter udah ngereja penyalah, tang iya enda putus asa. w23.09 22 ¶8

Lebuh kitai meresa diri empu enggau jujur, kitai engka tetemuka sekeda pengelemi. Taja pia, anang meh asa ati. Ketegal “pemanah ati Tuan,” iya tentu deka nulung nuan ngaga pemansang. (1 Pet. 2:3) Rasul Peter nulung kitai yakin pasal utai nya: “Petara . . . deka nembuka latih kita. Iya meh ke deka ngasuh kita tegap.” Peter kala ngasaika diri enda chukup manah begulai enggau Anak Petara. (Luk. 5:8) Tang, enggau sukung ari Jehovah sereta Jesus, Peter ulih nitihka Jesus enggau tetap ati. Asil iya, Jehovah ngemendarka Peter tama nengah “jalai penama ti bemulia ke nuju ngagai Perintah ti meruan belama iya, ke diempu Tuan enggau Penyelamat kitai, Jesus Kristus.” (2 Pet. 1:11) Tu siti berekat ti chukup manah! Enti nuan enda putus asa baka Peter, lalu ngelakka Jehovah ngelatih nuan, nuan pan tau bulih pengidup ti meruan belama iya. Bup Kudus madahka: “Kita deka bulih pengelepas laban kita arap.”—1 Pet. 1:9. w23.09 31 ¶16-17

Langkau Sembiang suba bisi siti laman. Laman nya luas sereta dikelingi pagar. Ba dia, bala imam ngereja pengawa sida. Ba laman nya, bisi siti alta temaga ti besai, alai pemeri tunu diserahka. Pia mega, bisi bisin temaga ke diisi enggau ai ngambika bala imam ulih masu diri sebedau sida ngereja pengawa imam sida. (P-sut. 30:​17-20; 40:​6-8) Kemayaharitu, orang ke dipilih ngagai serega gawa enggau tetap ati ba laman dalam rumah sembiang rohani ke ba dunya. Bisin ai ti besai ngingatka sida sereta semua kitai, ngambika mengkang tuchi ba moral enggau ba pengarap. Ba dini alai “seraban orang ti mayuh,” nyembah Jehovah? Rasul John meda sida “bediri ba mua kerusi diraja.” Endur nya ba laman luar, iya nya ba dunya. “Ba Rumah Sembiang [Petara], siang malam sida bejalaika pengawa ti tuchi ke Iya.” (Pem. 7:​9, 13-15) Kitai berasai amat besyukur laban Jehovah udah meri kitai peluang ulih nyembah Iya ba rumah sembiang rohani Iya. w23.10 28 ¶15-16

Siti chara Jehovah ngeringka kitai, iya nya nengah bala tuai gempuru. (Isa. 32:​1, 2) Nyadi, lebuh nuan berasai irau, kunsika meh pengirau nuan enggau bala tuai gempuru. Anang kakang ati nerima tulung ari bala tuai gempuru. Nengah sida, Jehovah ulih ngasuh nuan nyadi kering. Semaya dalam Bup Kudus ulih meri kitai harapan. Sekeda ari kitai bisi harapan idup belama iya ba serega, lalu ke bukai bisi harapan idup belama iya ba dunya Paradais.(Rom. 4:​3, 18, 19) Harapan tu meri kitai pengering ngambika tan napi penguji, terus nginjil pasal Berita Manah, sereta ngereja utai ke bala menyadi Kristian kitai. (1 Tes. 1:3) Harapan ti sama nya meh ke ngeringka Rasul Paul. Paul madah iya “diansak,” “charut runding,” “diperinsa,” lalu ‘dipalu ngambika rebah.’ Indah, iya napi utai ke tau nabanka nyawa. (2 Kor. 4:​8-10) Paul bulih pengering ngambika tan napi penguji lebuh iya fokus ba harapan iya. (2 Kor. 4:​16-18) Paul fokus ngagai harapan iya ke jemah ila. Harapan iya idup belama ba serega nya “mulia ti amat besai.” Paul belematika harapan nya. Asil iya, “ninting hari . . .[iya] dikeringka baru.” w23.10 15-16 ¶14-17.

Lebuh besampi, berunding pasal kati nya maya iya Jehovah patut nyaut sampi nuan. Kitai engka ngumbai sampi kitai patut disaut tekala nya. Tang kebendar iya, Jehovah nemu ni maya ti pemadu sesuai kena nulung kitai. (Heb. 4:16) Lebuh kitai enda nerima utai ke disampika kitai tekala nya, kitai engka ngumbai saut ari Jehovah nya ‘Enda ulih.’ Tang saut ari Jehovah engka ‘Bedau agi.’ Ambika chunto, siku menyadi lelaki ti biak besampi ngambika Jehovah ngeraika penyakit iya. Tang iya enda nyadi gerai agi. Enti Jehovah ngaga kereja ajih lalu ngeraika iya, Sitan engka madah menyadi nya semina nyembah Jehovah laban Jehovah ngeraika iya. (Jop 1:​9-11; 2:4) Kelimpah ari nya, Jehovah udah netapka jam alai Iya deka ngeraika semua penyakit. (Isa. 33:24; Pem. 21:​3, 4) Nyadi, nyentuk ngagai maya nya, kitai enda ulih ngarapka Jehovah ngaga kereja ajih kena ngeraika kitai. Nya alai, nama utai ke ulih dipinta menyadi lelaki nya? Iya ulih minta Jehovah meri iya pengering enggau pengelantang ba runding ngambika ulih tan napi penyakit nya, lalu terus nyembah Jehovah enggau tetap ati. w23.11 24 ¶13

Taja pan Samson bisi ngaga penyalah ti besai, tang iya nadai putus asa. Iya ngiga peluang ngambika ulih ngalahka orang Pilistin laban nya pengawa ke udah diberi Jehovah ngagai iya. (P-ulu. 16:​28-30) Ku Samson madah ngagai Jehovah: “Aku besampi minta Nuan meri aku pengering sekali tu agi, ngambika aku ulih malas orang Pilistin.” Jehovah nyaut sampi Samson, lalu sekali agi meri iya pengering ti luar biasa. Asil iya, Samson ulih munuh mayuh agi orang Pilistin ari ke udah dikereja iya ngelama tu. Taja pan Samson napi mayuh penusah ketegal penyalah ke dikereja iya, tang iya enda ngetu ngereja peneka Jehovah. Lebuh kitai ngaga penyalah, lalu nerima disiplin tauka lenyau tanggung pengawa ba gerempung Jehovah, kitai enggai ngetu nyembah Jehovah. Kingatka, Jehovah sedia deka ngampun kitai. (Mas. 103:​8, 9) Taja pan kitai bisi ngereja penyalah, kitai agi ulih dikena Jehovah. Baka Jehovah ke udah ngeringka Samson, Iya mega deka ngeringka kitai kena ngereja peneka Iya. w23.09 6 ¶15-16

Lebuh kitai ngayanka pengeliat ati, Jehovah deka nerima kitai. Kati tu reti iya Jehovah gaga ati lebuh nuan napi pemerinsa? Enda, ukai baka nya. Tang Jehovah gaga ati laban nuan liat ati ngenatka pemerinsa sereta tetap ati ngagai Iya. Kitai berasai amat diperansang laban nemu, lebuh kitai ngayanka pengeliat ati, kitai deka ngagaka ati Jehovah. (Mas. 5:12) Peratika teladan Abraham. Iya mega napi pemerinsa. Tang lebuh iya ngayanka pengeliat ati sereta tetap ati, Jehovah gaga ati enggau iya. Jehovah ngangauka Abraham pangan Iya, lalu ngumbai iya lurus. (P-kal. 15:6; Rom. 4:​13, 22) Nya mega ulih nyadi ba kitai. Petara gaga ati enggau kitai ukai ketegal pemayuh utai ti dikereja kitai ke Iya tauka nama tanggung pengawa ke dikembuan kitai ba gerempung Iya. Tang, Jehovah gaga ati enggau kitai lebuh kitai tetap ati ngenatka pemerinsa. Lalu enda ngira sekalika kitai tuai tauka biak, nama situasi ke ditapi kitai, tauka nama pengelandik ti dikembuan kitai, semua kitai ulih ngayanka pengeliat ati. Kati nuan benung tan ngenatka pemerinsa diatu sereta mengkang tetap ati ngagai Jehovah? Enti pia, kingatka meh, nuan benung ngagaka ati Jehovah. Lebuh kitai nemu Petara gaga ati enggau kitai, kitai deka andal agi ke harapan ti udah disemayaka Iya. w23.12 11 ¶13-14

Bala menyadi Kristian ti lelaki patut belajar chara ninga enggau manah ngambika ulih meretika runding sereta asai ati orang bukai. (J-lam. 20:5) Iya mega ulih nemu runding sereta asai ati orang bukai ari chara sida bejaku, reaksi sida, sereta gaya tubuh sida. Nuan enda ulih belajarka tu enti nuan enda begulai enggau orang bukai. Enti nuan seruran ngena perengka elektronik, baka email enggau mesej, tu deka ngasuh nuan tusah agi bekomunikasi enggau orang betunga mua. Nya alai, giga meh peluang ngambika ulih begulai enggau orang betunga mua. (2 Jhn. 12) Menyadi lelaki ti matang mega patut nemu ngintu diri empu sereta ruang bilik iya. (1 Tim. 5:8) Amat, belajarka sesiti pengelandik nya penting ngambika nuan ulih tetemuka kereja. (SKR. 18:​2, 3; 20:34; Eps. 4:28) Bebendar gawa lalu tembuka pengawa ti udah diberi ngagai nuan. Orang bukai deka beratika tu lalu nuan deka bisi reputasi ti manah. Enti nuan ngereja tu, nuan deka senang agi bulih kereja ti tetap. w23.12 27 ¶12-13

Lebuh Bup Kudus nyebut pasal ‘hari Jehovah,’ nya dituju ngagai maya lebuh Jehovah ngemunaska bala munsuh Iya, sereta mai pengelepas ngagai bala nembiak Iya. Suba, Jehovah bisi ngukum sekeda bansa. (Isa. 13:​1, 6; Esk. 13:5; Sep. 1:8) Ba jeman kitai, ‘hari Jehovah’ deka berengkah lebuh bala tuai politik ngerusak Babilon ti Besai. Tu deka ngepunka perang Armagedon. Ngambika ulih selamat maya “hari” nya datai, kitai patut besedia diatu. Jesus ngajar kitai “patut sedia” ke “Penusah ti Besai,” reti iya pengawa tu enda nemu ngetu. (Mat. 24:21; Luk. 12:40) Ba surat rasul Paul ti keterubah ke ditulis ngagai orang ba Tesalonika, iya ngena beberapa iti sempama kena nulung orang Kristian mengkang besedia ke hari lebuh Jehovah deka ngakim. Paul nemu hari Jehovah enda datai ba maya nya. (2 Tes. 2:​1-3) Taja pia, iya meransang bala menyadi ba dia ngambika besedia ke hari nya, baka ke hari nya deka datai pagila. Kitai mega ulih nitihka jaku lalau iya. w23.06 8 ¶1-2

Ba taun 1978, siti bengunan ti amat tinggi udah didirika ba Tokyo, Jepun. Mayuh orang berunding, nama kebuah bengunan nya enda tumbang taja pan bisi mayuh gempa bumi nyadi ba nengeri nya. Nama resia iya? Bala injinir ngaga pelan bengunan nya ngambika ulih nyadi chukup tegap. Tang ba maya ti sama, bengunan nya ulih fleksibel ngambika enda tumbang maya gempa bumi nyadi. Orang Kristian ulih disemaka baka bengunan ti amat tinggi nya. Baka ni? Orang Kristian mesti seimbang bekaul enggau nyadi tegap sereta nyadi fleksibel. Iya patut mengkang tegap sereta seruran keran deka ngasika adat Jehovah enggau standard Iya. Iya “sedia deka ngasi” lalu enda alah laban penguji. Tang ba maya ti sama, iya patut “bisi runding ti masuk akal,” tauka fleksibel, lebuh iya ulih tauka patut ngereja nya. (Jas. 3:17) Orang Kristian ke bisi runding ti seimbang enda kelalu terit tauka kelalu fleksibel nyentukka iya ngereja sebarang utai enggau sepeneka ati. w23.07 14 ¶1-2

Jesus patut belaban enggau penguji ari Sitan, indah penguji ari Sitan ke deka iya badu agi setia ngagai Petara. (Mat. 4:​1-11) Sitan keran deka ngasuh Jesus bedosa ngambika Jesus enda ulih mayar tebus nya. Sepemanjai pengawa nginjil iya ba dunya, Jesus napi mayuh penusah ke bukai. Bala munsuh iya merinsaka iya sereta nguji deka munuh iya. (Luk. 4:​28, 29; 13:31) Iya patut sabar enggau pengelemi bala murid iya. (Mrk. 9:​33, 34) Lebuh iya dipechara, iya diperinsa sereta dipechat. Udah nya, iya diukum bunuh baka siku penjenayah, lalu mati enggau chara ti amat pedis. (Heb. 12:​1-3) Lalu ba begian ujung penguji nya, iya patut tan kediri empu. Maya nya, Jehovah enda ngelindung iya. (Mat. 27:46) Endang amat, Jesus balat merinsa ketegal deka nyediaka tebus ke kitai. Lebuh kitai berundingka semua pengorbanan ke sanggup digaga Jesus ke kitai, tu ngasuh kitai majak agi rinduka iya. w24.01 10-11 ¶7-9

Baka ni penyabar nulung kitai ngembuan kaul ti manah enggau orang bukai? Enti kitai bisi sifat sabar, nya nulung kitai ninga enggau manah lebuh orang bukai bejaku. (Jas. 1:19) Sifat tu mega nulung kitai bebaik enggau orang bukai. Enti kitai sabar, kitai enda jampat pedis ati lalu enda nyebut utai ke ulih ngemediska ati orang bukai, taja pan enti kitai benung stres. Pia mega, enti kitai sabar, kitai lubah ringat lebuh orang ngemediska ati kitai. Ari ke malas utai ke digaga sida, kitai “terus liat ati enggau pangan diri sereta ngampunka pangan diri ari ati.” (Kol. 3:​12, 13) Sifat sabar nulung kitai ngaga pemutus ti manah agi. Kitai enda berumban lebuh ngaga pemutus, tauka nitihka asai ati aja. Tang kitai ulih ngena awak mansik pilihan ke bisi, lalu udah nya milih ni bagi ke pemadu manah. Ambika chunto, enti kitai benung ngiga kereja, kitai engka deka nerima tawaran kereja ti keterubah ke diterima kitai. Taja pia, enti kitai sabar, kitai deka ngena awak berundingka: Enti aku nerima kereja tu, nama kesan iya ba ruang bilik aku sereta ba kaul kami sebilik enggau Jehovah? Amat, enti kitai sabar, kitai ulih nyeliah ari ngaga pemutus ti salah. w23.08 22 ¶8-9

Enti nuan berasai tusah ati laban patut belaban enggau pengingin ti salah, perundingka baru semaya ke udah digaga nuan lebuh nuan nyerahka diri ngagai Jehovah deka nulung nuan keran agi ngelaban pengingin ti salah nya. Baka ni? Lebuh nuan nyerahka diri ngagai Jehovah, nya nunjukka nuan nulak pengingin diri empu sereta juluk ati ke enda dikerinduka Jehovah. (Mat. 16:24) Nyadi, lebuh nuan napi penguji tauka situasi ti tusah, nuan enda ibuh agi berunding pasal utai ke deka dikereja nuan. Nuan udah nemu utai ke deka dikereja nuan, iya nya mengkang tetap ati ngagai Jehovah. Nuan keran deka ngagaka ati Jehovah. Nuan deka nyadi baka Jop. Taja pan iya napi penanggul ti balat tusah, tang iya madahka: “Aku deka mengkang tetap ati ngagai Petara!”—Jop 27:​5, NWT. w24.03 9 ¶6-7

Jehovah, “Petara ti penuh enggau pengerindu,” bisi enggau kitai! (2 Kor. 13:11) Iya ibuhka kitai siku-siku. Kitai andal kitai benung “dijaga ulih pengerindu Iya ti meruan belama iya.” (Mas. 32:10) Lebuh kitai suah berundingka chara Iya ngayanka pengerindu ngagai kitai, kitai deka majak agi ngasaika pengibuh Iya. Lalu tu deka meransang kitai majak semak enggau Iya. Kitai ulih besampi ngagai Iya ba sebarang maya, lalu madahka kitai amat begunaka pengerindu Iya. Kitai ulih mantaika semua pengirau kitai ngagai Iya laban kitai yakin Iya meretika kitai sereta keran deka nulung kitai. (Mas. 145:19) Baka api ke ulih ngangatka tubuh kitai maya hari chelap, pengerindu Jehovah ulih ngelantangka ati kitai lebuh kitai bisi mayuh penanggul. Nyadi, terima meh pengerindu Jehovah ti deka ngelantangka ati nuan sereta ngasuh nuan berasai nyamai. Udah nya, balas meh pengerindu Iya lalu nyebut: ‘Aku rinduka Jehovah’!—Mas. 116:1. w24.01 31 ¶19-20

Jesus ukai semina madah ngagai orang, nama Petara nya Jehovah. Orang Judah ke diajar Jesus endang udah nemu nama Petara. Tang Jesus netapka teladan ti manah lebuh iya “nerangka pasal Petara.” (Jhn. 1:​17, 18) Ambika chunto, Bup Kudus Begian Jaku Hebrew madahka, Jehovah nya pengasih sereta siru. (P-sut. 34:​5-7) Lalu Jesus nerangka tu enggau terang agi lebuh iya madahka cherita pasal anak ti tesat enggau apai iya. Cherita nya madah pasal siku apai ke meda anak iya ke udah nesal ati “ari jauh.” Apai nya lalu belanda ngagai anak iya, merap, lalu nyium iya, sereta ngampunka anak iya enggau pengabis ati. Tu nulung kitai faham pemesai pengasih sereta penyiru Jehovah. (Luk. 15:​11-32) Au, Jesus nulung orang bukai ngelala Apai iya enggau manah agi. w24.02 10 ¶8-9

Jehovah ulih mai pengelantang ngagai orang ke tusah ati sereta ngasuh sida berasai nyamai. Baka ni kitai ulih neladan penyiru Jehovah sereta ngelantangka ati orang bukai? Siti chara nya, kitai ulih ngemansangka sifat ke deka nulung kitai siruka orang bukai sereta ngelantangka ati sida. Nama sekeda sifat nya? Nama deka nulung kitai ngetanka pengerindu ke nulung kitai ‘terus ngelantangka ati pangan diri’ ninting hari? (1 Tes. 4:18) Kitai patut ngemansangka sifat baka simpati, rinduka pangan diri baka diri menyadi, sereta manah ati. (Kol. 3:12; 1 Pet. 3:8) Baka ni sifat-sifat tu deka nulung kitai? Lebuh kitai siruka bala menyadi Kristian kitai lalu amat ibuhka sida, kitai deka keran agi ngelantangka ati sida lebuh sida tusah ati. Baka ke dipadah Jesus, “utai ti disebut orang datai ari ati. Orang ke manah mansutka utai ti manah ari ati iya ti manah.” (Mat. 12:​34, 35) Ngelantangka ati bala menyadi Kristian kitai nya siti chara ti penting kitai ngayanka pengerindu ngagai sida. w23.11 10 ¶10-11

Kitai patut minta tulung enti kitai deka meretika jaku benabi dalam Bup Kudus. Peratika chunto tu. Gambarka nuan benung ngelawa siti endur ke enda biasa ba nuan. Tang kaban ke enggau nuan kin, nemu endur nya enggau manah. Iya nemu dini alai nuan sereta penunga tiap iti jalai ba endur nya. Nuan tentu gaga ati laban kaban nuan deka enggau nuan kin! Baka nya mega, Jehovah baka kaban nya tadi, ti ulih nulung kitai. Iya amat nemu utai ti deka nyadi jemah ila. Nyadi, kena meretika jaku benabi dalam Bup Kudus, kitai mesti enggau baruh ati minta tulung ari Jehovah. (Dan. 2:28; 2 Pet. 1:​19, 20) Baka apai indai ti dekaka bala anak sida bisi pengidup ti manah, Jehovah mega deka bala anak Iya ngembuan pengidup ti manah jemah ila. (Jer. 29:11) Tang enda baka bala apai indai ba dunya tu, Jehovah ulih madahka kitai utai ti deka nyadi jemah ila, lalu Iya seruran betul. Jehovah nentuka jaku benabi ditulis dalam Bup Kudus ngambika kitai ulih nemu pekara ti penting sebedau utai nya nyadi.—Isa. 46:10. w23.08 8 ¶3-4