Nama Ulih Dipelajarka Kitai ari 40 Hari ti Penudi Jesus ba Dunya?

1-2. Nama nyadi lebuh dua iku murid Jesus bejalai ngagai Emaus?

MAYA nya 16 Nisan 33 M. Bala murid Jesus benung tusah ati sereta takut. Dua iku ari murid Jesus ninggalka Jerusalem lalu bejalai ngagai Emaus, siti kampung kira-kira 11 kilometer penyauh ari Jerusalem. Seduai iya balat asa ati laban Jesus, lelaki ke dititih seduai iya, baru udah diukum bunuh. Seduai iya ngarapka Messiah ngereja mayuh utai ti manah ke orang Judah, tang diatu Messiah udah mati. Taja pia, bisi utai ti enda dijangka nyadi.

² Siku lelaki betemu enggau seduai iya ba rantau jalai lalu bejalai enggau seduai iya. Dua iku murid nya madah ngagai lelaki nya pasal utai ke nyadi ngagai Jesus. Udah nya, lelaki nya berengkah berandau enggau seduai iya pasal utai ti deka seruran dikingatka seduai iya. Iya ngena Bup Kudus enggau jaku benabi ke bisi dalam dia kena nerangka kebuah Messiah patut merinsa enggau mati. Pengudah sida datai ba Emaus, nya baru dua iku murid nya sedar, lelaki nya Jesus, ke udah diangkatka Petara idup baru. Gambarka pengaga ati seduai iya lebuh nemu Messiah udah diidupka baru!—Luk. 24:​13-35.

3-4. Nama nyadi ngagai bala murid Jesus, lalu nama deka dipelajarka kitai dalam artikel tu? (Surat Kereja Rasul 1:3)

³ Pengelama 40 hari ti penudi Jesus ba dunya, iya suah mandangka diri ngagai bala murid iya. (Bacha Surat Kereja Rasul 1:3.) Ba timpuh nya, Jesus meransang bala murid iya ke tusah ati sereta takut. Ketegal nya, sida nyadi gaga ati, sereta berani nginjil enggau ngajar pasal Perintah Petara.a

⁴ Kitai deka bulih penguntung lebuh belajarka utai ke digaga Jesus ba timpuh nya. Dalam artikel tu, kitai deka beratika baka ni Jesus ngena 40 hari ti penudi iya ba dunya kena (1) meransang bala murid iya, (2) nulung sida meretika Bup Kudus enggau manah agi, sereta (3) ngelatih sida ngambika sida ulih megai mayuh agi tanggung pengawa. Ba tiap iti situasi tu, kitai deka meda baka ni kitai ulih neladan Jesus.

MERANSANG ORANG BUKAI

5. Nama kebuah bala murid Jesus begunaka peransang?

⁵ Bala murid Jesus begunaka peransang. Nama kebuah? Sekeda ari sida udah ninggalka rumah, diri sebilik, enggau bisnis ngambika ulih nitihka Jesus. (Mat. 19:27) Ke bukai diintu enggau enda manah laban sida nyadi murid Jesus. (Jhn. 9:22) Sida sanggup ngaga semua pengorbanan tu laban sida pechaya, Jesus nya Messiah ti disemaya. (Mat. 16:16) Tang lebuh Jesus dibunuh, sida berasai amat tusah ati enggau asa ati laban sida ngumbai utai ti dikearapka sida enda ulih nyadi.

6. Nama digaga Jesus pengudah iya diangkatka idup baru?

⁶ Jesus faham, bala murid iya berasai tusah ati lebuh iya mati. Lalu iya nemu sida tusah ati ukai ketegal sida kurang pengarap. Nyadi, ba hari ti sama iya diangkatka idup baru, iya berengkah meransang bala murid iya. Ambika chunto, Jesus mandangka diri ngagai Maria Magdalin lebuh Maria nyabak ba kubur iya. (Jhn. 20:​11, 16) Iya mega mandangka diri ngagai dua iku murid, baka ke dipadah ba pun artikel tu. Lalu, iya mega bisi mandangka diri ngagai Rasul Peter. (Luk. 24:34) Nama ulih dipelajarka kitai ari teladan Jesus? Peratika utai ke nyadi lebuh iya mandangka diri ngagai Maria Magdalin.

7. Jesus meda Maria benung ngereja nama, lalu nama digaga iya ke Maria? (John 20:​11-16) (Peda mega gambar.)

⁷ Bacha John 20:​11-16. Ba tumu pagi kena 16 Nisan, sekeda orang indu ngagai kubur alai bangkai Jesus diengkah. (Luk. 24:​1, 10) Siku ari bala indu nya Maria Magdalin. Lebuh Maria datai ba kubur nya, iya meda bangkai Jesus nadai ba dia. Nyadi, iya mansang madahka utai tu ngagai Peter enggau John. Dua iku lelaki tu belanda ngagai kubur nya lalu Maria nitihka seduai iya. Dua iku lelaki nya meda bangkai Jesus nadai ba dia, lalu seduai iya pan pulai ke rumah, tang Maria mengkang ba dia lalu nyabak. Iya enda nemu, Jesus bisi ba dia beratika iya. Jesus meda Maria nyabakka iya, lalu Jesus deka ngelantangka ati iya. Nyadi, Jesus mandangka diri ngagai Maria lalu ngereja siti utai ti amat meransang iya. Jesus ngasuh Maria mupuk mai siti pesan ti penting ngagai bala murid iya. Maria patut madah ngagai sida, Jesus udah diangkatka idup baru.—Jhn. 20:​17, 18.

8. Baka ni kitai ulih neladan Jesus?

⁸ Baka ni kitai ulih neladan Jesus? Kitai neladan Jesus lebuh kitai meransang bala menyadi kitai terus nyembah Jehovah. Baka Jesus, kitai deka nemu penusah ke ditapi bala menyadi, nguji meretika asai ati sida, sereta ngelantangka ati sida. Peratika pengalaman siku menyadi indu ke benama Jocelyn. Menyadi indu iya ke biak mati enggau ngenyit. Ku Jocelyn madahka: “Bebulan-bulan aku berasai amat tusah ati.” Taja pia, sepasang laki bini nemu utai ti ditapi Jocelyn. Seduai iya mai Jocelyn ngagai rumah seduai iya lalu mendingka iya enggau manah. Seduai iya ngintu Jocelyn enggau manah lalu madahka, iya amat berega ba Jehovah. Jocelyn madahka: “Aku ngasaika diri baka benung lemas ba tasik ti petang, ke benung dipangka kabut ti besai. Tang Jehovah ngena seduai iya nyelamatka aku. Seduai iya nulung aku ngembuan pengingin deka terus nyembah Jehovah.” Kitai mega ulih meransang orang bukai lebuh kitai ninga enggau manah maya sida mantaika asai ati sida. Enti kitai ngereja nya, kitai ulih ngelantangka ati sida lalu nulung sida terus nyembah Jehovah.—Rom. 12:15.

NULUNG ORANG BUKAI MERETIKA JAKU PETARA

9. Nama cabaran ke ditapi bala murid Jesus, lalu baka ni Jesus nulung sida?

⁹ Bala murid Jesus pechayaka Jaku Petara lalu enggau bebendar ngasika Jehovah. (Jhn. 17:6) Tang, sida enda ulih faham nama kebuah Jesus dibunuh sebagai penjenayah. Jesus nemu, bala murid iya bisi pengarap enggau pengerindu ngagai Jehovah. Tang iya sedar, sida patut meretika agi Jaku Petara enggau manah. (Luk. 9:​44, 45; Jhn. 20:9) Nyadi, iya nulung sida faham reti utai ke dibacha sida dalam Bup Kudus. Peratika baka ni iya ngereja nya lebuh iya mandangka diri ngagai dua iku murid ba pejalai ngagai Emaus.

10. Baka ni Jesus nulung bala murid iya sedar, iya endang Messiah? (Luke 24:​18-27)

¹⁰ Bacha Luke 24:​18-27. Peratika, Jesus enda tekala nya madahka sapa iya kebendar iya. Tang iya ngena tanya. Nama kebuah? Engka iya deka seduai iya madahka asai ati sereta utai ke bisi dalam runding sida. Lalu nya meh ke digaga seduai iya. Seduai iya madah ngagai iya, sida ngumbai Jesus deka ngelepaska orang Israel ari perintah Rome. Pengudah seduai iya mantaika asai ati, Jesus ngena ayat Bup Kudus nulung seduai iya faham, mayuh jaku benabi udah dikeamatka.b Lemai nya, iya betemu enggau bala murid ke bukai lalu nerangka reti jaku benabi nya ngagai sida. (Luk. 24:​33-48) Nama ulih dipelajarka kitai ari cherita tu?

11-12. (a) Nama ulih dipelajarka kitai ari chara Jesus ngajar pemendar Bup Kudus? (Peda mega gambar.) (b) Baka ni siku menyadi lelaki nulung pemelajar Bup Kudus iya?

¹¹ Baka ni kitai ulih neladan Jesus? Keterubah, lebuh kitai ngajar pemelajar Bup Kudus, uji ngena tanya ke ulih nulung sida mansutka asai ati sida. (J-lam. 20:5) Pengudah nuan nemu asai ati sida, tunjukka sida chara ngiga ayat Bup Kudus ke ngena ba situasi sida. Seliah ari madahka utai ke patut digaga sida, tang tanya sida pasal ayat Bup Kudus nya. Peransang sida berundingka ayat ke dibacha sida sereta baka ni sida ulih ngena utai nya ba pengidup sida. Peratika pengalaman siku menyadi lelaki ba Ghana ke benama Nortey.

¹² Nortey berengkah belajarka Bup Kudus lebuh iya beumur 16 taun. Enda lama udah nya, diri sebilik iya nyakal iya. Nama nulung iya terus belajarka Bup Kudus? Sebedau nya, pengajar Bup Kudus iya udah berandauka Matthew bagi 10 enggau iya, lalu nerangka orang Kristian ti bendar deka diperinsa. Nortey madahka: “Lebuh diri sebilik aku berengkah nyakal, aku andal aku udah tetemuka pemendar.” Pengajar Bup Kudus iya mega nunjukka iya Matthew 10:16 ke madahka, kitai patut bejaga. Pengudah nya, seduai iya berandauka ayat tu ngambika Nortey ulih nerangka pengarap iya enggau basa ngagai diri sebilik iya. Pengudah iya dibaptisa, Nortey bisi pengingin deka nyadi pengerintis, tang apai iya dekaka iya ngagai universiti. Pengajar iya enda madahka utai ke patut digaga Nortey, tang iya ngena tanya nulung Nortey berundingka ayat Bup Kudus ke ulih nulung iya ngaga pemutus ti betul. Nama asil iya? Nortey ngaga pemutus nyadi pengerintis. Ketegal pemutus nya, apai iya muru iya ari rumah. Nama asai ati Nortey pasal utai ke nyadi nya? Ku iya madah: “Aku andal, aku udah ngaga pemutus ti betul.” Amat, lebuh kitai nulung orang belematika ayat Bup Kudus, kitai nulung sida negapka pengarap sida sereta terus nyembah Jehovah.—Eps. 3:​16-19.

NGELATIH MENYADI LELAKI MEGAI MAYUH AGI TANGGUNG PENGAWA

13. Nama digaga Jesus kena nentuka pengawa nginjil terus dipejalaika, indah pengudah iya pulai ke serega? (Epesus 4:8)

¹³ Lebuh Jesus ba dunya, iya ngereja semua utai ke diasuh Apai iya. (Jhn. 17:4) Tang Jesus enda ngumbai semina iya siku aja ke layak ngereja utai ke diasuh Apai iya. Ba timpuh tiga taun setengah iya nginjil ba dunya, iya mega ngelatih orang bukai ngereja pengawa nya. Jesus arapka bala murid iya. Iya ngasuh sida nginjil enggau ngajar pasal Berita Manah. Iya mega meri sida tanggung pengawa nyaga bala nembiak Jehovah. Sekeda ari bala murid ke diberi tanggung pengawa tu engka beumur kurang ari 30 taun. (Bacha Epesus 4:8.) Bala lelaki tu udah bebendar gawa enggau Jesus sereta setia enggau iya. Tang baka ni Jesus ngena 40 hari ti penudi iya ngelatih sida ngambika sida ulih megai mayuh agi tanggung pengawa?

14. Nama utai ke diajar Jesus ngagai bala murid iya sebedau iya pulai ke serega? (Peda mega gambar.)

¹⁴ Jesus meri bala murid iya jaku lalau ke diguna sida enggau terus terang, tang iya ngereja nya enggau chara ti nelap. Ambika chunto, iya bisi beratika sekeda ari bala murid iya enda entu pechaya iya udah mati lalu diangkatka idup baru. Nyadi, iya meri sida jaku lalau. (Luk. 24:​25-27; Jhn. 20:27) Iya mega ngasuh sida ngemeratka agi pengawa nyaga bala nembiak Jehovah ari ke ngemeratka kereja sekular. (Jhn. 21:15) Lalu iya mega ngingatka sida ngambika enda mandingka tanggung pengawa ke diterima sida enggau tanggung pengawa ke diterima orang bukai. (Jhn. 21:​20-22) Iya mega ngemetulka sekeda runding ti salah ke dikembuan sida pasal Perintah Petara sereta nulung sida betumpu ba pengawa nginjil pasal Berita Manah. (SKR. 1:​6-8) Nama ulih dipelajarka bala tuai gempuru ari Jesus?

15-16. (a) Baka ni bala tuai gempuru ulih neladan Jesus? (b) Baka ni jaku lalau ke diterima Patrick udah nulung iya?

¹⁵ Baka ni bala tuai gempuru ulih neladan Jesus? Sida mesti ngelatih bala menyadi lelaki, indah sida ke agi biak, ngambika ngereja mayuh agi tanggung pengawa ba raban gempuru.c Bala tuai gempuru sedar, sida ke dilatih patut belajarka mayuh utai. Sida patut meri bala menyadi ke dilatih nya jaku lalau ti bepengerindu ngambika bala menyadi nya ulih belajar nyadi baruh ati, tau dikearapka, sereta sedia nulung orang bukai.—1 Tim. 3:1; 2 Tim. 2:2; 1 Pet. 5:5.

¹⁶ Peratika baka ni jaku lalau udah nulung siku menyadi lelaki ke benama Patrick. Lebuh iya agi biak, iya suah bejaku kasar, lalu ngelayan orang bukai enggau enda manah, indah ngagai bala menyadi indu. Siku tuai gempuru beratika pengelemi Patrick lalu meri iya jaku lalau enggau terus terang, tang enggau chara ti nelap. Ku Patrick madahka: “Aku gaga ati laban tuai gempuru nya nunjukka aku utai ke patut diubah aku. Aku suah berasai asa ati lebuh aku meda bala menyadi lelaki ke bukai nerima tanggung pengawa ke dikinginka aku. Tang jaku lalau nya nulung aku sedar, aku patut baruh ati agi sereta ngayanka pengerindu ngagai bala menyadi, lalu enda kelalu berunding pasal nerima tanggung pengawa ba raban gempuru.” Asil iya, Patrick dipilih nyadi tuai gempuru lebuh iya beumur 23 taun.—J-lam. 27:9.

17. Baka ni Jesus nunjukka iya yakin enggau bala murid iya?

¹⁷ Jesus ukai aja meri bala murid iya tanggung pengawa nginjil, tang mega ngajar. Bala murid iya engka ngasaika diri enda layak ngereja pengawa nya. Tang Jesus amat yakin sida ulih ngereja tanggung pengawa tu. Nya kebuah iya madah ngagai sida: “Baka Apai ke udah ngirumka aku, aku mega deka ngirumka kita.”—Jhn. 20:21.

18. Baka ni bala tuai gempuru ulih neladan Jesus?

¹⁸ Baka ni bala tuai gempuru ulih neladan Jesus? Bala tuai gempuru ti bepenemu-dalam ngelatih bala menyadi lelaki lebuh sida meri sekeda tanggung pengawa ngagai bala menyadi nya. (Plp. 2:​19-22) Ambika chunto, bala tuai gempuru ulih minta bala menyadi ke biak nulung meresi sereta nyeruri Palan Gempuru. Bala tuai gempuru ulih meri menyadi nya siti tanggung pengawa, ngajar iya chara ngereja nya, lalu andal iya ulih nembuka pengawa nya. Matthew, siku tuai gempuru ke baru dipilih, amat beterima kasih laban bala tuai gempuru ti bepeneleba ngelatih iya ngereja mayuh pengawa ba raban gempuru. Sida mega andal, iya ulih ngereja pengawa nya enggau manah. Ku Matthew madahka: “Lebuh aku ngaga penyalah, sida nulung aku sedar, aku ulih belajar ari penyalah nya, lalu ngereja utai enggau manah agi ila.”d

19. Nama utai ti keran deka digaga kitai?

¹⁹ Jesus ngena 40 hari ti penudi iya ba dunya meransang, ngajar, sereta ngelatih orang bukai. Kitai tentu keran deka nitihka teladan iya. (1 Pet. 2:21) Kitai nemu, Jesus deka nulung kitai ngereja nya laban iya udah besemaya: “Aku deka seruran enggau kita nyentuk ngagai pengujung dunya.”—Mat. 28:20.