Neladan Pengeransing Jesus ke Pengawa Nginjil

1. Nama utai ke ngasuh nembiak Jehovah bebida ari raban ke ngumbai diri Kristian?

SITI utai ti ngasuh bala nembiak Jehovah bebida ari raban ke ngumbai diri Kristian, iya nya pengeransing sida ke pengawa nginjil. (Tit. 2:14) Taja pia, kekadang nuan engka ngasaika diri tusah deka ransing ba pengawa nginjil. Engka nuan setuju enggau utai ke disebut siku tuai gempuru ti bagas. Iya madah: “Kekadang, aku lembau deka nginjil.”

2. Nama kebuah kitai engka tusah deka terus nginjil enggau ransing?

² Kitai engka rindu agi ngereja pengawa bukai ke Jehovah ari ke nginjil. Nama kebuah? Lebuh kitai nulung nirika tauka nyeruri bengunan teokratik, nulung bala menyadi ke ditinggang penusah, tauka meransang sida ba maya bukai, kitai ulih meda asil iya enggau jampat, lalu tu ngasuh kitai gaga ati. Lebuh kitai gawa enggau bala menyadi, kitai ulih gawa begulai enggau manah sereta ulih ngayanka pengerindu ngagai pangan diri. Kitai mega nemu, sida deka menghargai utai ti digaga kitai. Tang kitai engka nginjil ba endur ti sama pengelama betaun-taun, lalu mimit aja orang ke deka ningaka Berita Manah. Ke bukai engka enggai ngintu kitai enggau manah lebuh kitai nginjil. Lalu kitai mega nemu, seraya pengujung dunya tu majak semak, mayuh agi orang deka nyakal pengawa kitai. (Mat. 10:22) Nyadi, nama deka nulung kitai ransing agi ba pengawa nginjil?

3. Nama ulih dipelajarka kitai pasal pengeransing Jesus ari sempama ba Luke 13:​6-9?

³ Teladan Jesus ngajar kitai chara mengkang ransing ba pengawa nginjil. Lebuh Jesus ba dunya, iya seruran ransing ba pengawa nginjil. Kebendar iya, pengeransing Jesus majak nambah lebuh iya mayuh agi nginjil. (Bacha Luke 13:​6-9.) Ba siti sempama, Jesus mandingka pengawa iya baka siku orang ke bekereja ba kebun anggur. Orang nya bebendar gawa nyaga siti pun kayu ara pengelama tiga taun, tang pun nya enda mansutka buah. Baka nya mega, Jesus nginjil pengelama tiga taun ngagai orang Judah, tang mayuh ari sida enggai nyadi murid iya. Taja pia, Jesus enda putus asa nginjil ngagai sida. Jesus baka orang ke bekereja ba kebun anggur nya, ke terus ngarapka pun kayu ara mansutka buah. Jesus bebendar nginjil ngagai orang Judah kena nulung sida nerima Berita Manah.

4. Nama empat iti utai ke deka dipelajarka kitai ari teladan Jesus?

⁴ Dalam artikel tu, kitai deka berandauka chara Jesus ngayanka pengeransing, kelebih agi ba enam bulan ti penudi iya nginjil ba dunya. (Luk. 10:1) Lebuh kitai nitihka utai ke diajar iya sereta ngereja utai ke digaga iya, tu deka nulung kitai mengkang ransing. Kitai deka beratika empat iti utai ke ulih dipelajarka kitai ari Jesus: (1) Iya befokus ba peneka Jehovah, (2) iya beratika jaku benabi Bup Kudus, (3) iya bepanggai ba Jehovah, sereta (4) iya yakin sekeda orang deka mendingka iya.

JESUS BEFOKUS BA PENEKA JEHOVAH

5. Baka ni Jesus nunjukka iya befokus ngereja peneka Petara?

⁵ Jesus enggau ransing nginjil “Berita Manah pasal Perintah Petara” laban iya nemu Jehovah deka iya ngereja pengawa nya. (Luk. 4:43) Ba Jesus, pengawa nginjil nya pengawa ti pemadu penting ba pengidup iya. Indah ba beberapa bulan ti penudi iya nginjil ba dunya, iya bejalai ari “nengeri siti ngagai nengeri siti sereta genturung pendiau ngagai genturung pendiau” kena ngajar orang. (Luk. 13:22) Iya mega ngelatih mayuh agi murid ngambika sida ulih nginjil Berita Manah baka iya.—Luk. 10:1.

6. Nama kaul entara pengawa nginjil enggau pengawa bukai ke engka dikembuan kitai? (Peda mega gambar.)

⁶ Kemayaharitu, Jehovah enggau Jesus mega deka kitai ngenuluka pengawa nginjil. (Mat. 24:14; 28:​19, 20) Sebarang pengawa ke dikereja kitai ke Jehovah bisi kaul ti rapat enggau pengawa nginjil. Ambika chunto, kitai nirika bengunan teokratik tauka gawa ba Bethel kena nyukung pengawa nginjil. Lebuh bala menyadi kitai ditinggang penusah, kitai deka nulung sida ngambika sida ulih begempuru sereta nginjil baru. Enti kitai seruran ingat, Jehovah deka kitai ngenuluka pengawa nginjil, kitai deka keran agi nginjil. János, siku tuai gempuru ba Hungary, madahka: “Aku ngingatka diri empu, nadai pengawa bukai ke digaga kitai ke Jehovah ulih nganti pengawa nginjil. Nya meh pengawa utama kitai.”

7. Nama kebuah Jehovah deka kitai terus nginjil? (1 Timoti 2:​3, 4)

⁷ Kitai ulih negapka agi pengeransing kitai ke pengawa nginjil lebuh kitai neladan runding Jehovah pasal orang bukai. Jehovah deka semua macham orang ninga pasal Berita Manah sereta belajar pemendar pasal Iya. (Bacha 1 Timoti 2:​3, 4.) Ketegal nya, Iya ngelatih kitai ngambika landik agi bekunsika Berita Manah. Ambika chunto, brosur Pengerindu Deka Meransang Nuan—Ngaga Orang Nyadi Murid ngajar kitai chara ngepunka randau enggau orang, ngambika ila sida engka deka belajarka Bup Kudus lalu nyadi murid Jesus. Indah enti sida enda berengkah nyembah Jehovah diatu, sida engka bisi peluang ngereja nya sebedau pengujung Penusah ti Besai. Utai ti dipadah kitai ngagai sida diatu engka deka meransang sida nyembah Jehovah ila. Tang tu semina ulih nyadi enti kitai enda ngetu nginjil.

JESUS BERATIKA JAKU BENABI BUP KUDUS

8. Nama jaku benabi Bup Kudus ke nulung Jesus ngena awak ke dikembuan iya enggau manah?

⁸ Jesus nemu baka ni jaku benabi Bup Kudus deka dikeamatka. Iya nemu pengawa nginjil iya ba dunya semina pengelama tiga taun setengah aja. (Dan. 9:​26, 27) Iya mega nemu ni maya sereta baka ni iya deka mati. (Luk. 18:​31-34) Ketegal iya nemu jaku benabi Bup Kudus, tu nulung iya ngena awak iya enggau chara ti pemadu manah. Asil iya, iya nginjil enggau ransing ngambika ulih nembuka pengawa ke udah diberi ngagai iya.

9. Baka ni jaku benabi Bup Kudus nulung kitai nginjil enggau ransing?

⁹ Lebuh kitai belematika jaku benabi Bup Kudus ke benung dikeamatka diatu sereta deka dikeamatka enda lama da agi, kitai nemu pengujung dunya ti jai tu majak semak. Bup Kudus udah madah pasal ulah orang sereta utai ke deka nyadi ba hari ti penudi, lalu kitai benung meda jaku benabi nya dikeamatka. Jaku benabi Bup Kudus mega madahka, raja selatan enggau raja utara deka belaban enggau pangan diri ‘lebuh timpuh nyau deka abis.’ (Dan. 11:40) Kitai nemu tu merujuk ngagai perintah Britain enggau perintah Amerika Serikat ke bisi konflik enggau perintah Rusia sereta perintah ke nyukung iya. Kitai mega nemu kaki patung ba jaku benabi Daniel 2:​43-45 ngambarka kuasa dunya Anglo-Amerika, iya nya perintah Britain enggau Amerika Serikat. Ari utai ke dipelajarka kitai pasal jaku benabi Bup Kudus, kitai yakin enda lama da agi Perintah Petara deka ngemunaska perintah mensia. Semua jaku benabi tu nunjukka kitai amat semak enggau pengujung dunya tu, lalu tu nulung kitai nginjil enggau ransing agi.

10. Nama agi chara bukai jaku benabi Bup Kudus ulih meransang kitai terus nginjil?

¹⁰ Jaku benabi Bup Kudus mega meri kitai pesan ke keran dikunsi kitai. Carrie, siku menyadi indu ba Republik Dominikan, madahka: “Lebuh aku berundingka utai ti manah ke deka digaga Jehovah jemah ila, aku ngasaika diri patut madahka tu ngagai orang bukai. Lebuh aku meda penanggul ke ditapi orang bukai, aku sedar sida mega patut nemu pasal semaya Jehovah.” Kelimpah ari nya, jaku benabi Bup Kudus mega nunjukka Jehovah benung nulung kitai ba pengawa nginjil, lalu tu meransang kitai terus nginjil. Leila, siku menyadi indu ke diau ba Hungary, madahka: “Isaiah 11:​6-9 nunjukka Jehovah ulih nulung sapa-sapa aja ngaga ubah. Tu nulung aku nusui Berita Manah ngagai orang, indah ngagai sida ke dikumbai aku enggai ninga.” Lalu Christopher, siku menyadi lelaki ari Zambia, madahka: “Baka ke dipadah Mark 13:​10, Berita Manah benung dikerembaika ba serata dunya. Lalu aku gaga ati laban ulih nulung ngamatka jaku benabi tu.” Nyadi, nama jaku benabi Bup Kudus ke meransang nuan terus nginjil?

JESUS BEPANGGAI BA JEHOVAH

11. Nama kebuah Jesus patut bepanggai ba Jehovah ngambika ulih terus nginjil enggau ransing? (Luke 12:​49, 53)

¹¹ Jesus yakin Jehovah deka nulung iya terus nginjil enggau ransing. Taja pan Jesus bejaku enggau basa lebuh iya nginjil, tang iya nemu pesan pasal Perintah Petara deka ngasuh sekeda orang ringat, lalu mayuh agi deka nyakal pesan nya. (Bacha Luke 12:​49, 53.) Bala tuai pengarap enda rindu enggau utai ke diajar Jesus, nyadi sida bekali-kali nguji deka munuh iya. (Jhn. 8:59; 10:​31, 39) Tang Jesus enda ngetu nginjil laban iya nemu Jehovah bisi enggau iya. Ku iya madah: “Aku enda kediri, tang Apai ke ngirumka aku bisi enggau aku. . . . Iya enda ninggalka aku kediri, laban aku seruran ngereja utai ke ngelantangka ati Iya.”—Jhn. 8:​16, 29.

12. Baka ni Jesus nyediaka bala murid iya ngambika terus nginjil taja pan sida deka napi sakal?

¹² Jesus suah ngingatka bala murid iya ngambika bepanggai ba Jehovah, ke deka nulung sida lebuh sida napi sakal. (Mat. 10:​18-20; Luk. 12:​11, 12) Ketegal Jesus nemu mayuh orang deka nyakal Berita Manah, iya ngasuh bala murid iya bejaga. (Mat. 10:16; Luk. 10:3) Iya mega madah ngagai sida, enti orang enggai mendingka sida, sida enda patut mejal orang nya nerima pesan ke dibai sida. (Luk. 10:​10, 11) Lalu iya ngasuh sida rari enti sida diperinsa. (Mat. 10:23) Taja pan Jesus ransing sereta bepanggai ba Jehovah, tang iya nguji nyeliah ari situasi ti bahaya.—Jhn. 11:​53, 54.

13. Nama kebuah nuan ulih yakin Jehovah deka nulung nuan?

¹³ Ketegal mayuh orang nyakal pengawa kitai kemayaharitu, kitai begunaka tulung ari Jehovah ngambika ulih terus nginjil enggau ransing. (Pem. 12:17) Nama kebuah nuan ulih yakin Jehovah deka nulung nuan? Peratika sampi Jesus ba John bagi 17. Jesus minta Jehovah nyaga bala rasul iya, lalu Jehovah nyaut sampi Jesus. Bup Surat Kereja Rasul madahka baka ni Jehovah nulung bala rasul nginjil enggau ransing taja pan diperinsa. Dalam sampi Jesus, iya mega minta Jehovah nyaga sida ke deka arapka iya pengudah ninga utai ke diajar bala rasul, lalu nyadi bala murid iya jemah ila. Tu mega nyengkaum nuan. Jehovah agi nyaut sampi Jesus kemayaharitu. Iya deka nulung nuan sama baka chara Iya nulung bala rasul.—Jhn. 17:​11, 15, 20.

14. Nama kebuah kitai yakin kitai ulih nginjil enggau ransing taja pan ba maya ti tusah? (Peda mega gambar.)

¹⁴ Seraya pengujung majak semak, kitai engka tusah agi deka nginjil enggau ransing. Tang Jesus ngasuh kitai yakin, kitai deka nerima tulung ngambika kitai ulih terus ransing ba pengawa tu. (Luk. 21:​12-15) Baka Jesus enggau bala murid iya, kitai nejuka orang milih sekalika sida deka ninga tauka enda, lalu kitai enda bekelikuh enggau sida. Indah ba menua alai pengawa kitai disekat, bala menyadi kitai agi ulih terus nginjil laban sida bepanggai ba Jehovah, ukai ba pengering diri empu. Baka Jehovah ke udah meri kuasa kudus ngagai bala nembiak Iya ba abad keterubah, Iya mega meri kitai kuasa kudus ngambika “pengawa nginjil ulih dipejalaika enggau silik” nyentukka Iya madah pengawa nya udah tembu. (2 Tim. 4:17) Nuan ulih yakin, enti nuan bepanggai ba Jehovah, nuan ulih terus nginjil enggau ransing.

JESUS YAKIN SEKEDA ORANG DEKA MENDING

15. Nama utai ke nunjukka Jesus yakin pengawa nginjil iya deka bisi asil ti manah?

¹⁵ Jesus yakin tentu bisi orang ke deka ningaka Berita Manah. Tu nulung iya mengkang gaga ati sereta bebendar nginjil. Ambika chunto, kira-kira setaun pengudah Jesus berengkah nginjil, iya meda mayuh orang deka ningaka Berita Manah. Lalu iya nyemaka sida baka ladang ti udah mansau, lalu sedia deka diketau. (Jhn. 4:35) Kira-kira setaun pengudah nya, iya madah ngagai bala murid iya: “Utai ti diketau endang mayuh.” (Mat. 9:37, 38) Udah nya, Jesus sekali agi madah: “Utai ti diketau endang mayuh, . . . Nya alai, minta ngagai Orang ke bempu ladang ngambika ngirum mayuh agi orang ngetau.” (Luk. 10:2) Au, lebuh orang mendingka Berita Manah, Jesus balat gaga ati.—Luk. 10:21.

16. Baka ni sempama Jesus nulung kitai yakin pengawa nginjil kitai deka bisi asil ti manah? (Luke 13:​18-21) (Peda mega gambar.)

¹⁶ Peratika dua iti sempama ke dipadah Jesus. (Bacha Luke 13:​18-21.) Ba siti sempama nya, Jesus nyemaka pesan pasal Perintah Petara baka siti igi mustard ti mit ke deka tumbuh nyadi baka pun kayu ti besai. Reti iya, mayuh orang deka nerima Berita Manah lalu nadai utai ulih nagang tu ari nyadi. Ba siti agi sempama, Jesus nyemaka pesan Perintah Petara baka ragi. Tu ketegal, pesan pasal Perintah Petara deka dikerembaika ngagai serata dunya, lalu deka meransang orang ngaga ubah, taja pan ubah nya enda dipeda tekala nya. Nengah dua iti sempama tu, Jesus nulung bala murid iya yakin pengawa nginjil sida deka bisi asil ti manah laban sida deka nulung mayuh orang. Tu deka nulung sida mengkang ransing.

17. Nama kebuah kitai mengkang yakin pengawa nginjil kitai deka bisi asil ti manah?

¹⁷ Lebuh kitai beratika baka ni pengawa nginjil kitai udah nulung orang ba serata dunya, kitai diperansang deka terus nginjil. Ninting taun, bejuta iku orang ke bisi minat datai ngagai pengawa Ngingatka Pemati Jesus sereta belajarka Bup Kudus enggau kitai. Pia mega, beratus ribu iku orang dibaptisa lalu enggau kitai ba pengawa nginjil. Kitai enda nemu berapa mayuh agi orang ke deka nerima Berita Manah. Tang kitai nemu, Jehovah benung ngelumuka seraban orang ti mayuh ke deka selamat maya Penusah ti Besai. (Pem. 7:​9, 14) Jehovah, Orang ke bempu ladang, yakin agi bisi mayuh orang ke deka nerima Berita Manah. Nyadi, kitai deka terus nginjil.

18. Lebuh orang meda kitai, kitai deka sida beratika nama?

¹⁸ Bala murid Jesus senang dikelala ketegal sida ransing nginjil. Ambika chunto, lebuh orang beratika pemerani sereta pengeransing bala rasul, sida nyau sedar bala rasul nya “kala begulai enggau Jesus.” (SKR. 4:13) Nyadi, lebuh kitai nginjil enggau berani sereta ransing, orang deka nemu kitai benung neladan Jesus.