Nama Kebuah Nama Jehovah Amat Penting ba Jesus?

1-2. (a) Nama digaga Jesus ba malam sebedau iya dibunuh? (b) Nama deka dikerandauka kitai ba artikel tu?

KENA lemai Hari Empat, 14 Nisan, 33 M., Jesus ngintu pengawa Makai Malam Tuan enggau bala rasul iya ti tetap ati. Iya nemu enda lama da agi, Judas deka nyual iya lalu iya deka diperinsa sereta dibunuh bala munsuh iya. Nyadi, pengudah makai malam nya, Jesus nyebut mayuh utai ti meransang ngagai bala rasul iya. Lalu lebuh sida nyauka mupuk, Jesus pan besampi. Kitai ulih macha pasal sampi ti besai reti tu ba John bagi 17.

² Dalam artikel tu, kitai deka beratika sekeda utai ke ulih dipelajarka kitai ari sampi Jesus. Nama utai ti dikeirauka Jesus sebedau iya mati? Nama utai ti penting ba iya lebuh iya ba dunya? Aram kitai berandauka saut ngagai semua tanya tu.

“AKU UDAH NGASUH NAMA NUAN DITEMU SIDA”

3. Nama utai ke dipadah Jesus pasal nama Jehovah, lalu nama reti utai ku iya? (John 17:​6, 26)

³ Dalam sampi nya, Jesus madah: “Aku udah ngasuh nama Nuan ditemu sida.” Kitai nemu utai tu amat penting ba Jesus laban iya nyebut rambai jaku tu dua kali. (Bacha John 17:​6, 26.) Tang, nama reti utai ku iya? Kati Jesus nerangka nama ke enda ditemu sida? Bala murid Jesus nya orang Judah, nyadi sida udah nemu nama Petara nya Jehovah. Nama nya udah ayan beribu kali ba Bup Kudus Begian Jaku Hebrew. Nyadi, lebuh Jesus nyebut rambai jaku nya, tu ukai reti iya Jesus benung ngajar sida nama Petara nya Jehovah. Tang iya benung ngajar sida sapa Jehovah kebendar iya. Iya nulung bala murid iya ngelala Jehovah enggau manah agi. Ketegal Jesus amat ngelala Jehovah, iya ulih ngajar bala murid iya tuju Jehovah ke dunya sereta ke mensia, utai ke udah enggau utai ke deka dikereja Jehovah, sereta sifat-sifat ke dikembuan Jehovah.

4-5. (a) Baka ni nama sesiku orang ulih nyadi berega agi ba kitai? Beri siti chunto. (b) Baka ni nama Jehovah nyadi berega agi ba bala murid Jesus?

⁴ Perundingka chunto tu: Ba raban gempuru nuan, bisi siku tuai gempuru ke benama David, lalu iya mega siku lutur. Nuan udah betaun-taun ngelala iya. Tang bisi sekali, nuan napi kecemasan lalu patut berubat enggau lengkas. Nuan berubat ba sepital alai David gawa, lalu iya meh lutur ke nyelamatka nyawa nuan. Diatu, nuan majak agi rinduka David. Lalu lebuh nuan ninga nama iya, nuan teingatka utai ti udah dikereja iya kena nyelamatka nuan. Au, David ukai aja siku tuai gempuru ke dikelala nuan, tang mega siku lutur ke udah nyelamatka nyawa nuan.

⁵ Baka nya mega, bala murid Jesus udah nemu nama Jehovah. Tang nama Jehovah nyadi berega agi ba sida laban Jesus nulung sida ngelala Jehovah enggau manah agi. Nama kebuah kitai ulih bejaku munyi nya? Laban Jesus neladan Apai iya ba semua utai ti disebut sereta dikereja iya. Nyadi, lebuh bala murid Jesus ningaka utai ti diajar Jesus sereta meda chara iya ngintu orang bukai, sida ulih ngelala Jehovah enggau manah agi.—Jhn. 14:9; 17:3.

“NAMA NUAN, KE UDAH DIBERI NUAN NGAGAI AKU”

6. Nama reti ku Jesus lebuh iya madah Jehovah udah meri nama Iya ngagai Jesus? (John 17:​11, 12)

⁶ Dalam sampi Jesus ke bala murid iya, iya madah: “Jaga meh sida ketegal nama Nuan ke udah diberi Nuan ngagai aku.” (Bacha John 17:​11, 12.) Kati tu mai reti diatu Jesus deka dikumbai Jehovah? Enda. Lebuh Jesus nyebut nama Jehovah, iya madah “nama Nuan.” Jesus enda dikumbai Jehovah. Nyadi, nama reti utai ku Jesus lebuh iya madah nama Petara udah diberi ngagai iya? Kesatu, Jehovah nganjung Jesus bejaku ngarika Iya. Jesus datai dalam nama Apai iya lalu ngereja mayuh utai ti ngalitka ati dalam nama Apai iya. (Jhn. 5:43; 10:25) Kedua, reti nama Jesus nya “Jehovah nya Penyelamat.” Nyadi, reti nama Jesus bisi nyengkaum nama Jehovah.

7. Nama kebuah Jesus ulih bejaku ngarika Jehovah? Beri siti chunto.

⁷ Ambika chunto, siku raja ulih nganjung sesiku orang bejaku ngarika iya. Nyadi lebuh orang nya bejaku, iya bisi kuasa ti sama baka raja nya. Baka nya mega, Jesus bisi kuasa bejaku ngarika Jehovah laban iya dianjung Jehovah.—Mat. 21:9; Luk. 13:35.

8. Nama kebuah Jehovah madahka: “[Jesus] datai dalam nama Aku,” indah sebedau Jesus datai ke dunya? (Pemansut 23:​20, 21)

⁸ Bup Kudus ngangauka Jesus nya Jaku, laban Jehovah ngena iya meri penerang sereta iring ngagai bala melikat sereta mensia. (Jhn. 1:​1-3) Ambika chunto, Jesus nya engka melikat ke dikena Jehovah nyaga orang Israel lebuh sida ba menua puang. Lebuh Jehovah ngasuh orang Israel ngasika melikat nya, Jehovah madahka kebuah sida patut ngereja nya: “Iya datai dalam nama Aku.”a (Bacha Pemansut 23:​20, 21.) Jehovah bejaku munyi nya laban Jesus bejaku ngarika Iya lalu Jesus meh ke dipilih kena nunjukka Jehovah nya kudus lalu semua utai ti dikereja Jehovah nya betul.

“APAI, MULIAKA NAMA NUAN”

9. Kati nama Jehovah penting ba Jesus? Terangka.

⁹ Baka ke udah dikerandauka kitai, nama Jehovah amat penting ba Jesus, indah sebedau Jesus datai ke dunya. Nya kebuah, nama Jehovah bisi kaul ti rapat enggau semua utai ti dikereja Jesus ba dunya. Ba pengujung pengawa nginjil iya, Jesus madah ngagai Jehovah: “Apai, muliaka nama Nuan.” Tekala nya, Jehovah nyaut ari serega ngena nyawa ti inggar: “Aku udah ngemuliaka nama Aku, lalu deka ngemuliaka iya baru.”—Jhn. 12:28.

10-11. (a) Baka ni Jesus ngemuliaka nama Jehovah? (Peda mega gambar.) (b) Nama kebuah Jesus patut nguduska nama Jehovah sereta nunjukka semua utai ti dikereja Jehovah nya betul?

¹⁰ Jesus mega ngemuliaka nama Apai iya. Baka ni? Iya madah ngagai orang bukai pasal sifat sereta pengawa Apai iya ti ngalitka ati. Tang iya mega ngereja utai bukai. Jesus patut nunjukka semua utai ke dikereja Jehovah nya betul, lalu nama Jehovah nya kudus. Jesus nunjukka pemesai reti utai tu lebuh iya ngajar bala murid iya pasal chunto sampi. Iya madahka: “Apai kami ti ba serega, kudus meh nama Nuan.”—Mat. 6:9.

¹¹ Nama kebuah Jesus patut nguduska nama Jehovah sereta nunjukka semua utai ti dikereja Jehovah nya betul? Laban ba taman Eden, Sitan madahka utai ti bula pasal Petara Jehovah. Sitan madahka, Jehovah nya pemula lalu Iya benung ngetanka utai ti manah ari Adam enggau Awa. (P-kal. 3:​1-5) Enggau nya, Sitan madahka chara Jehovah merintah enda betul. Jaku bula Sitan ngenyaika reputasi tauka nama Jehovah. Udah nya, maya jeman Jop, Sitan madahka orang semina nyembah Jehovah laban sida deka bulih utai ari Jehovah. Sitan mega madahka, orang deka ngetu nyembah Jehovah lebuh sida napi penanggul laban sida enda entu rinduka Jehovah. (Jop 1:​9-11; 2:4) Nyadi, kena nunjukka sekalika Jehovah tauka Sitan nya pemula, tu begunaka awak.

“AKU NYERAHKA NYAWA DIRI”

12. Ketegal Jesus amat rinduka nama Jehovah, nama utai ke sanggup digaga iya?

¹² Ketegal Jesus amat rinduka Jehovah, iya sanggup ngereja sebarang utai kena nunjukka Jehovah nya kudus lalu semua utai ke dikereja Jehovah nya betul. Ku Jesus madahka: “Aku nyerahka nyawa diri.” (Jhn. 10:​17, 18) Au, iya indah sanggup mati ke nama Jehovah.b Taja pan Adam seduai Awa sempurna, tang seduai iya enda ngasika Jehovah lalu nitihka Sitan. Taja pia, Jesus sanggup datai ke dunya kena nunjukka pengerindu iya ke Jehovah. Jesus ngereja tu lebuh iya ngasika Jehovah ba semua utai ke digaga sereta disebut iya. (Heb. 4:15; 5:​7-10) Iya mengkang tetap ati ngagai Jehovah nyentukka iya mati ba tiang perinsa. (Heb. 12:2) Nengah chara tu, Jesus nunjukka pengerindu ke Jehovah enggau ke nama Iya.

13. Nama kebuah Jesus nya orang ti pemadu sesuai kena nunjukka Sitan nya pemula? (Peda mega gambar.)

¹³ Semua utai ke digaga Jesus ba pengidup iya nunjukka Sitan nya meh ke pemula, ukai Jehovah! (Jhn. 8:44) Jesus ngelala Jehovah jauh manah agi ari orang bukai. Enti bisi utai ke dipadah Sitan pasal Jehovah nya amat, Jesus tentu nemu pasal nya. Tang Jesus keran deka ngetanka reputasi, tauka nama Jehovah. Indah lebuh Jehovah baka ke udah ninggalka Jesus, Jesus sanggup mati sereta mengkang tetap ati, ari ke enda ngasika Apai iya.—Mat. 27:46.c

“AKU NEMBUKA PENGAWA KE DIBERI NUAN NGAGAI AKU”

14. Baka ni Jehovah ngupah penetap ati Jesus?

¹⁴ Ba malam sebedau Jesus mati, iya besampi: “Aku nembuka pengawa ke diberi Nuan ngagai aku.” Iya andal Jehovah deka ngupah penetap ati iya. (Jhn. 17:​4, 5) Pengandal Jesus ngagai Apai iya enda lebu ngapa, laban Jehovah enda nejuka Jesus mengkang dalam kubur. (SKR. 2:​23, 24) Jehovah ngangkatka Jesus idup baru lalu meri iya penuduk ti jauh tinggi agi ba serega. (Plp. 2:​8, 9) Nyau kelama, Jesus nyadi raja ba Perintah Petara. Nama deka digaga Perintah nya? Begian kedua ari chunto sampi Jesus madahka saut iya: “Datai meh Perintah Nuan. Nyadi meh peneka Nuan [Jehovah] ba dunya baka ba serega.”—Mat. 6:10.

15. Nama agi ke deka digaga Jesus?

¹⁵ Enda lama da agi, Jesus deka beperang ngelaban bala munsuh Petara, lalu ngemunaska orang ti jai ba Armagedon. (Pem. 16:​14, 16; 19:​11-16) Pengudah nya, Jesus deka muai Sitan ba “lubang ti amat dalam,” alai Sitan deka dikurung lalu enda ulih ngereja nama-nama utai. (Pem. 20:​1-3) Lalu, Jesus deka merintah pengelama seribu taun. Maya nya, iya deka mulaika baru pengelantang ba dunya sereta nulung mensia nyadi sempurna. Iya deka ngangkatka orang idup baru lalu ngaga serata dunya nyadi Paradais. Lalu tuju Jehovah deka dikeamatka!—Pem. 21:​1-4.

16. Baka ni gaya pengidup pengudah Seribu Taun Kristus Merintah?

¹⁶ Baka ni gaya pengidup pengudah Seribu Taun Kristus Merintah? Dosa deka nadai agi. Mensia enda agi begunaka tebus kena minta ampun ke dosa sida. Kitai mega enda agi begunaka orang tengah tauka bala imam ngambika tau bulih kaul ti rapat enggau Jehovah. Lalu ‘munsuh ke penudi, iya nya pemati’ deka dipunaska. Orang ke mati deka diangkatka idup baru. Semua orang ba dunya deka nyadi sempurna.—1 Kor. 15:​25, 26.

17-18. (a) Nama nyadi ba pengujung Seribu Taun Kristus Merintah? (b) Nama deka digaga Jesus lebuh timpuh iya merintah abis? (1 Korint 15:​24, 28) (Peda mega gambar.)

¹⁷ Nama agi deka nyadi ba pengujung Seribu Taun Kristus Merintah? Maya nya bisi utai ti amat spesial ke deka nyadi. Nadai agi sapa-sapa ke deka kakang ati sekalika Jehovah nya Petara ti lurus sereta kudus tauka enda. Nama kebuah? Maya ba taman Eden, Sitan madahka Jehovah nya pemula sereta enda merintah mensia enggau bepengerindu. Kenyau ari maya nya, sida ke nyembah Jehovah udah bekali-kali nguduska nama Iya. Nyadi, ba pengujung Seribu Taun Kristus Merintah, semua orang ulih meda chara Jehovah nya chara ti pemadu manah. Au, nadai orang deka kakang ati Jehovah nya endang Apai ti bepengerindu.

¹⁸ Maya nya mega, orang deka nemu utai ti dipadah Sitan pasal Jehovah nya bula magang. Nama deka digaga Jesus lebuh timpuh iya merintah abis? Kati iya deka nyadi baka Sitan, lalu angkat ngelaban Jehovah? Tentu enda! (Bacha 1 Korint 15:​24, 28.) Jesus deka mulaika baru Perintah nya ngagai Apai iya, lalu nunduk ngagai Jehovah. Au, enda baka Sitan, Jesus sanggup nyerahka semua kuasa iya ngagai Jehovah laban iya rinduka Jehovah.

19. Nama reti nama Jehovah ba Jesus?

¹⁹ Ari utai ke dikerandauka kitai dalam artikel tu, kitai ulih meda kebuah Jehovah sanggup meri nama Iya ngagai Jesus. Jesus udah enggau sempurna ngarika Apai iya. Nyadi, nama reti nama Jehovah ba Jesus? Nama Jehovah nya utai ti pemadu penting ba Jesus. Iya sanggup mati ke nama nya, lalu iya mega sanggup mulaika baru semua utai ngagai Jehovah ba pengujung seribu taun iya merintah. Baka ni kitai ulih neladan Jesus? Kitai deka berandauka saut ngagai tanya tu ba artikel ke nangkanka tu.