Nama Jehovah Amat Penting ba Kitai

1-2. Baka ni kitai nemu nama Jehovah amat penting ba Jesus?

BA Jesus, nama Jehovah nya amat penting. Jesus udah bebendar ngetanka nama Apai iya. Ba artikel ke sebedau tu, kitai udah belajar Jesus sanggup mati kena nunjukka Jehovah nya kudus lalu semua utai ke dikereja Iya betul. (Mrk. 14:36; Heb. 10:​7-9) Lalu pengudah Seribu Taun Jesus Merintah, iya deka mulaika baru semua kuasa ngagai Apai iya laban iya deka Jehovah nerima semua mulia. (1 Kor. 15:​26-28) Nyadi, semua utai ke udah dikereja Jesus ke Jehovah nunjukka iya amat rinduka Jehovah.

² Jesus datai ke dunya dalam nama Apai iya. (Jhn. 5:43; 12:13) Iya udah ngasuh nama Apai iya ditemu bala murid iya. (Jhn. 17:​6, 26) Lebuh iya ngajar orang sereta ngaga kereja ajih, iya enggau terang madahka Jehovah meh ke udah meri iya penemu-dalam enggau kuasa kena ngereja utai nya. (Jhn. 10:25) Lalu, lebuh iya minta Jehovah nyaga bala murid iya, iya minta Jehovah ngereja tu “ketegal nama [Iya].” (Jhn. 17:11) Endang amat, ba Jesus, nama Petara penting agi ari sebarang utai. Nyadi, baka ni sesiku orang ulih ngumbai diri orang Kristian tang enda nemu tauka enda ngena nama Jehovah?

3. Nama deka dikerandauka kitai ba artikel tu?

³ Ketegal kitai orang Kristian ti bendar, kitai neladan Jesus lebuh kitai ngayanka pengerindu sereta basa ke nama Jehovah. (1 Pet. 2:21) Dalam artikel tu, kitai deka berandauka kebuah Jehovah meri nama Iya ngagai sida ke nusui “Berita Manah pasal Perintah Petara” kemayaharitu. (Mat. 24:14) Kitai mega deka berandauka nama kebuah nama Jehovah patut bisi reti ti besai ba tiap iku kitai.

“NEMBIAK KE DIKANGAU NGENA NAMA IYA”

4. (a) Nama dipadah Jesus ngagai bala murid iya sebedau iya pulai ke serega? (b) Nama tanya ke deka dikerandauka kitai?

⁴ Sebedau Jesus pulai ke serega, iya madah ngagai bala murid iya: “Kita deka bulih pengering lebuh kuasa kudus Petara datai ngagai kita, lalu kita deka nyadi saksi aku ba Jerusalem, ba serata Judea enggau Samaria, sereta nyentuk ngagai ujung dunya.” (SKR. 1:8) Nyadi bala murid Jesus deka nusui Berita Manah ngagai serata dunya, ukai semina ba Israel. Nyau kelama, orang ari semua bansa deka bisi peluang nyadi murid Jesus. (Mat. 28:​19, 20) Tang Jesus madah: “Kita deka nyadi saksi aku.” Kati sida ke nyadi murid Jesus semina deka nyadi saksi Jesus? Tauka kati sida patut ngelala Jehovah lalu meri saksi pasal Jehovah mega? Utai ke nyadi ba Surat Kereja Rasul bagi 15 deka nulung kitai nyaut tanya nya.

5. Baka ni bala rasul enggau bala tuai gempuru ba Jerusalem nunjukka semua orang patut nemu nama Jehovah? (Peda mega gambar.)

⁵ Ba 49 M., bala rasul enggau bala tuai gempuru ba Jerusalem baum kena nentuka enti orang bansa bukai patut disunat ngambika ulih nyadi orang Kristian. Ba pengujung randau nya, James, menyadi Jesus madahka tu: “[Peter] udah madahka enggau terang baka ni Petara berengkah beratika orang bansa bukai, ngambika Iya ulih milih orang ari bala sida nyadi nembiak ke dikangau ngena nama Iya.” James benung merujuk ngagai nama sapa? James nandu utai ke dipadah Nabi Amos, ku iya: “Ngambika orang ke agi tinggal ari bala sida ulih bebendar ngiga Jehovah begulai enggau orang ari semua bansa, iya nya orang ke dikangau ngena nama Aku. Nya meh utai ke dipadah Jehovah.” (SKR. 15:​14-18) Bala murid Jesus ti baru tu ukai aja deka belajar pasal Jehovah, tang sida mega deka ‘dikangau ngena nama Iya.’ Reti iya, sida deka ngasuh nama Petara ditemu orang bukai lalu sida deka dikelala sebagai orang ke ngarika nama nya.

6-7. (a) Nama tuju Jesus datai ke dunya? (b) Nama kebuah ti penting agi ke ngasuh Jesus datai ke dunya?

⁶ Reti nama Jesus nya, “Jehovah Nya Penyelamat.” Jehovah ngena Jesus nyelamatka semua orang ke arapka Iya enggau Anak Iya. Jesus datai ke dunya kena nyerahka nyawa diri ke mensia. (Mat. 20:28) Enggau chara tu, iya muka jalai ngambika dosa orang ulih diampun, lalu bulih pengidup ti meruan belama iya.—Jhn. 3:16.

⁷ Tang nama kebuah mensia patut diselamatka? Tu ketegal utai ke nyadi ba taman Eden. Baka ke dikerandauka ba artikel sebedau tu, Adam enggau Awa angkat ngelaban Jehovah, lalu lenyau peluang idup belama iya. (P-kal. 3:​6, 24) Tang Jesus datai ke dunya kena ngereja utai ti penting agi ari nyelamatka bala peturun Adam enggau Awa. Nama Jehovah udah dipetenah. (P-kal. 3:​4, 5) Nyadi, mensia patut nemu Jehovah nadai ngereja nama-nama penyalah, lalu nama Iya endang kudus. Jesus meh orang ti pemadu sesuai kena ngereja tu laban iya ngarika Jehovah lalu enggau sempurna ngereja semua utai ke diasuh Jehovah.

8. Nama utai ke patut diterima semua orang ke nitihka Jesus?

⁸ Semua orang Kristian patut sedar, Pun penyelamat sida nya, Apai Jesus, Petara Jehovah. (Jhn. 17:3) Nambahka nya, baka Jesus, sida deka dikelala ngena nama Jehovah. Sida mega patut nemu pemesai reti nguduska nama Jehovah. Sida patut ngereja tu ngambika ulih diselamat lalu bulih pengidup ti meruan belama iya. (SKR. 2:​21, 22) Nyadi, semua orang ke nitihka Jesus patut belajar pasal Jehovah enggau Jesus. Nya kebuah Jesus ngujungka sampi iya ke ditulis ba John 17 ngena rambai jaku tu: “Aku udah ngasuh nama Nuan ditemu sida, lalu aku deka terus ngereja nya, ngambika sida rinduka orang bukai baka Nuan ke rinduka aku, lalu ngambika aku beserakup enggau sida.”—Jhn. 17:26.

“KITA TU MEH SAKSI AKU”

9. Enti kitai deka nitihka Jesus, nama utai ke patut nyadi pemadu penting ba kitai?

⁹ Ari utai ke udah dikerandauka kitai, semua orang ke nitihka Jesus patut nguduska nama Jehovah. (Mat. 6:​9, 10) Nama Jehovah patut nyadi nama ti pemadu penting ba kitai, lalu kitai patut nunjukka nya ari ulah kitai. Nyadi, nama ulih digaga kitai kena nguduska nama Jehovah sereta nunjukka utai ke dipadah Sitan pasal Jehovah nya bula?

10. Nama utai ke dipadah ba Isaiah bagi 42 ngagai 44? (Isaiah 43:9; 44:​7-9) (Peda mega gambar.)

¹⁰ Ba Isaiah bagi 42 ngagai 44, kitai belajar pasal utai ke ulih digaga kitai kena nguduska nama Jehovah. Ba tiga iti bagi nya, Jehovah minta orang ke enda nyembah Iya nunjukka sekalika petara ke disembah sida nya amat tauka enda. Lalu baka kes ba mahkamah, Jehovah minta enti bisi saksi ke ulih nunjukka utai tu. Tang nadai siku pan ulih ngereja nya!—Bacha Isaiah 43:9; 44:​7-9.

11. Nama utai ke dipadah Jehovah ngagai bala nembiak Iya ba Isaiah 43:​10-13?

¹¹ Bacha Isaiah 43:​10-13. Ku Jehovah madah ngagai bala nembiak Iya: ‘Kita tu meh saksi Aku. Aku endang Petara.’ Jehovah ngasuh sida nyaut tanya tu: “Kati kita bisi petara bukai?” (Isa. 44:8) Kitai bisi basa ti besai nyaut tanya nya. Nengah jaku sereta ulah kitai, kitai nunjukka semina Jehovah aja Petara ti bendar. Nama Iya meh ti pemadu tinggi. Lalu ari chara pengidup kitai, kitai nunjukka kitai amat rinduka Jehovah sereta setia ngagai Iya, taja pan Sitan ngasuh kitai tusah deka ngereja nya. Enggau chara tu, kitai bisi peluang nulung nguduska nama Jehovah.

12. Baka ni jaku benabi ba Isaiah 40:​3, 5 dikeamatka?

¹² Lebuh kitai nyukung nama tauka ngetanka reputasi Jehovah, kitai benung neladan Jesus Kristus. Isaiah madahka siti jaku benabi pasal siku orang ke deka ‘nyediaka jalai ke Jehovah.’ (Isa. 40:3) Baka ni jaku benabi nya dikeamatka? John Pemaptisa nyediaka jalai ke Jesus, tang kebendar iya, nya “jalai ke Jehovah” laban Jesus datai sereta bejaku dalam nama Jehovah. (Mat. 3:3; Mrk. 1:​2-4; Luk. 3:​3-6) Jaku benabi nya mega madahka: ‘Mulia Jehovah deka dipandangka.’ (Isa. 40:5) Baka ni tu ulih nyadi? Lebuh Jesus datai ke dunya, iya ngarika Jehovah enggau sempurna baka ke Jehovah Empu ke udah datai ke dunya.—Jhn. 12:45.

13. Baka ni kitai ulih neladan Jesus?

¹³ Baka Jesus, kitai mega bala saksi Jehovah. Kitai ngasuh orang nemu nama Jehovah sereta madah ngagai sida pasal pengawa Iya ti ngalitka ati. Tang ngambika ulih nyadi saksi ti manah ke Jehovah, kitai mega patut madah ngagai orang pasal semua utai ke udah dikereja Jesus kena nguduska nama Jehovah. (SKR. 1:8) Nadai orang ke meri saksi pasal Jehovah manah agi ari Jesus, lalu kitai nitihka teladan iya. (Pem. 1:5) Nama agi chara bukai kitai nunjukka nama Jehovah penting ba kitai?

CHARA BUKAI KITAI NUNJUKKA NAMA JEHOVAH PENTING BA KITAI

14. Nitihka 1 Korint 1:​31, nama asai ati kitai pasal nama Jehovah?

¹⁴ Kitai temegah ati ke nama Jehovah. (Bacha 1 Korint 1:31.) Jehovah amat gaga ati lebuh kitai temegah ati ke nama Iya. (Jer. 9:​23, 24; 2 Kor. 10:17) Kitai ngumbai nya basa ti besai madah ngagai orang, Jehovah nya kudus, sereta semua utai ke digaga Iya betul magang. Kitai enda tau berasai malu madahka diri Saksi-Saksi Jehovah ngagai orang ke sama gawa, kaban ke sama kelas, jiran, tauka orang bukai. Sitan dekaka kitai badu bejaku pasal nama Jehovah ngagai orang bukai. (Jer. 11:21; Pem. 12:17) Sitan enggau sida ke ngerembaika pemula iya, deka ngasuh orang enda ingatka nama Jehovah. (Jer. 23:​26, 27) Tang ketegal kitai rinduka nama Jehovah, kitai deka muji Iya “sepemanjai hari.”—Mas. 5:11; 89:16.

15. Nama reti ngangauka nama Jehovah?

¹⁵ Kitai terus ngangauka nama Jehovah. (Jol. 2:32; Rom. 10:​13, 14) Ngangauka nama Jehovah ukai semina mai reti nemu sereta ngena nama Petara. Tang, kitai sedar Jehovah nya Petara ke bisi asai ati sereta sifat-sifat ti manah, lalu kitai ulih ngembuan kaul ti rapat enggau Iya. Kitai belajar arapka Iya sereta ngiga Iya lebuh kitai begunaka tulung enggau iring. (Mas. 20:7; 99:6; 116:4; 145:18) Pia mega, kitai nusui pasal nama Iya sereta sifat Iya ngagai orang bukai. Lalu, kitai nulung sida ngaga ubah dalam pengidup ngambika sida ulih ngelantangka ati Jehovah sereta diselamatka.—Isa. 12:4; SKR. 2:​21, 38.

16. Baka ni kitai ulih nunjukka Sitan nya pemula?

¹⁶ Kitai sanggup merinsa ketegal nama Jehovah. (Jas. 5:​10, 11) Lebuh kitai mengkang setia ngagai Jehovah taja pan napi pemerinsa, kitai nunjukka Sitan nya pemula. Maya jeman Jop, ku Sitan nuduh orang ke nyembah Jehovah: “Mensia deka ngelengkaka semua utai, asal nyawa iya idup.” (Jop 2:4) Sitan madahka, mensia semina deka nyembah Jehovah ba maya ti senang, lalu deka ninggalka Jehovah lebuh napi penusah. Jop ti tetap ati nunjukka jaku tuduh nya enda betul. Kemayaharitu, kitai mega ulih nunjukka kitai enggai sesekali ngetu nyembah Jehovah taja pan pengidup kitai nyadi amat tusah tauka lebuh Sitan nguji deka ngasuh kitai asa ati. Kitai ulih yakin enggau pengabis ati Jehovah deka nyaga kitai ketegal nama Iya.—Jhn. 17:11.

17. Baka ke dipadah ba 1 Peter 2:​12, nama agi chara bukai kitai ulih ngemuliaka nama Jehovah?

¹⁷ Kitai enggau naka ulih ngemuliaka nama Jehovah. (J-lam. 30:9; Jer. 7:​8-11) Ketegal kitai dikumbai Saksi-Saksi Jehovah, utai ke digaga kitai ulih ngemuliaka tauka ngenyaika nama Iya. (Bacha 1 Peter 2:12.) Nya alai, kitai deka enggau naka ulih ngemuliaka Jehovah nengah jaku enggau ulah kitai. Lebuh kitai ngereja nya, kitai agi ulih ngemuliaka nama Jehovah taja pan kitai enda sempurna.

18. Nama agi chara kitai ulih nunjukka nama Jehovah nya penting ba kitai? (Peda mega nota kaki.)

¹⁸ Ba kitai, nama Jehovah penting agi ari runding orang pasal kitai. (Mas. 138:2) Nama kebuah? Laban lebuh kitai ngereja utai ti ngagaka ati Jehovah, kesuah iya orang engka enda rindu meda nya lalu nyebut utai ti enda manah pasal kitai.a Lebuh Jesus mati, orang ngumbai iya siku penjenayah lalu begedika iya. Tang Jesus sanggup mati enggau chara tu ngambika nama Jehovah ulih dimuliaka. Iya enda maluka nya tauka kelalu irauka utai ke diperundingka orang bukai pasal iya. (Heb. 12:​2-4) Jesus befokus ba ngereja peneka Petara.—Mat. 26:39.

19. Nama asai ati nuan pasal nama Jehovah, lalu nama kebuah?

¹⁹ Kitai temegah ati enggau nama Jehovah lalu ngasaika nya siti basa ti besai dikumbai Saksi-Saksi Jehovah. Ketegal nama Jehovah amat penting ba kitai, kitai deka terus muji Iya taja pan orang ngemaruhka kitai. Ba kitai, nama Jehovah penting agi ari runding orang bukai pasal kitai. Nyadi, aram meh kitai enggau naka ulih muji nama Jehovah enda ngira nama utai ke dikereja Sitan ngagai kitai. Lebuh kitai ngereja nya, kitai nunjukka nama Jehovah utai ti pemadu penting ba kitai, sama baka ba Jesus.