Pechaya meh Jehovah Sayauka Nuan

1. Nama kebuah nuan nyerahka diri ngagai Jehovah? (Peda mega gambar.)

KATI nuan agi ingat lebuh nuan nyerahka diri ngagai Jehovah? Nuan ngaga pemutus nya laban nuan udah ngelala sereta rinduka Iya. Nuan besemaya deka ngenuluka peneka Iya ba pengidup. Nuan mega besemaya deka rinduka Iya enggau pengabis ati, pengidup, runding, enggau pengering nuan. (Mrk. 12:30) Kenyau ari maya nya, pengerindu nuan ke Iya udah majak dalam-sedalam. Nyadi, enti bisi orang nanya nuan: ‘Kati nuan amat rinduka Jehovah?’ Nama saut nuan? Enggau ati ti enda kakang, nuan tentu nyaut: ‘Aku rinduka Jehovah lebih ari semua utai!’

2-3. Jehovah dekaka kitai andalka nama, lalu nama deka dipelajarka kitai dalam artikel tu? (Jeremiah 31:3)

² Tang baka ni enti orang nya nanya: ‘Kati nuan yakin Jehovah rinduka nuan?’ Nuan engka berasai kakang ati, laban nuan ngumbai diri enda layak nerima pengerindu ari Jehovah. Siku menyadi indu ke berasai enda dikesayau lebuh iya agi mit madahka: “Aku rinduka Jehovah enggau pengabis ati aku. Aku amat yakin pasal utai tu. Tang kesuah iya aku berunding, kati Jehovah rinduka aku?” Nyadi, nama utai ke ulih nulung nuan nemu asai ati Jehovah ti bendar pasal nuan?

³ Jehovah deka nuan andal Iya rinduka nuan. (Bacha Jeremiah 31:3 ari nota kaki.)a Kebendar iya, Jehovah ke mai nuan ngagai Iya. Lalu lebuh nuan nyerahka diri ngagai Iya sereta dibaptisa, nuan nerima utai ti amat berega ari Iya, iya nya pengerindu Iya ti setia. Tu reti iya, Jehovah amat rinduka nuan lalu Iya enda sekali-kali deka ninggalka nuan. Ketegal nya, Jehovah ngumbai semua penyembah Iya ti tetap ati sebagai pesaka Iya ti berega. Tu mega nyengkaum nuan. (Mal. 3:17) Jehovah deka nuan ngasaika utai ti sama baka ke diasaika Rasul Paul. Paul amat andal Jehovah rinduka iya nyentukka iya nulis: “Aku amat andal, indah pemati tauka pengidup tauka bala melikat tauka bala perintah tauka utai ke diatu tauka utai ke jemah ila tauka kuasa tauka utai ke ba atas tauka utai ke ba baruh tauka nama-nama utai ke udah ditempa Petara enda ulih nyeraraka kitai ari pengerindu Petara.” (Rom. 8:​38, 39) Nya alai, dalam artikel tu, kitai deka belajar kebuah kitai patut pechaya Jehovah rinduka kitai sereta utai ke ulih nulung kitai ngereja nya.

NAMA KEBUAH NUAN PATUT PECHAYA JEHOVAH RINDUKA NUAN?

4. Baka ni kitai ulih ngelaban Sitan?

⁴ Enti kitai pechaya Jehovah rinduka kitai, kitai ulih ngelaban “panjuk Sitan.” (Eps. 6:11) Sitan dekaka kitai badu agi nyembah Jehovah, lalu iya deka ngena sebarang utai kena nyapai tuju nya. Siti ari panjuk ke dikena iya, iya nya iya ngasuh kitai ngumbai Jehovah enda rinduka kitai. Tang nya bula! Bup Kudus nyemaka Sitan baka siku singa. (1 Pet. 5:​8, 9) Singa rindu nyerang jelu ti lemi sereta nadai ulih ngelaban. Baka nya mega, Sitan suah nyerang kitai lebuh kita berasai lemi, lelak, tauka tusah ati. Kitai engka kala napi utai ti pedis suba, benung napi penanggul diatu, tauka irau pasal jemah ila. (J-lam. 24:10) Nyadi, Sitan ngena peluang nya ngasuh kitai nyadi lemi lalu badu agi nyembah Jehovah. Tang kitai ulih ngelaban Sitan enggau panjuk iya enti kitai enggau naka ulih ngereja utai kena nulung kitai andal agi Jehovah rinduka kitai.—Jas. 4:7.

5. Nama kebuah kitai bisi pengingin deka ngasaika pengerindu ari Jehovah?

⁵ Enti kitai pechaya Jehovah rinduka kitai, kaul kitai enggau Iya deka majak rapat. Nama kebuah kitai nyebut munyi nya? Jehovah ngaga kitai enggau pengingin deka rinduka orang bukai sereta berasai dikesayau. Lebuh orang ngayanka pengerindu ngagai kitai, tu meransang kitai rinduka sida mega. Nyadi, lebuh kitai majak ngasaika pengerindu ari Jehovah, kitai mega deka majak agi rinduka Iya. (1 Jhn. 4:19) Majak dalam agi pengerindu kitai ke Iya, majak agi Iya deka rinduka kitai. Bup Kudus enggau terang madahka: “Semak meh ngagai Petara, lalu Iya pan deka semak ngagai kita.” (Jas. 4:8) Nyadi, nama ulih digaga kitai ngambika andal enggau pengabis ati Jehovah rinduka kitai?

NAMA ULIH NULUNG NUAN PECHAYA JEHOVAH RINDUKA NUAN?

6. Nama ulih disampika kitai ngambika ulih pechaya Jehovah rinduka kitai?

⁶ Seruran besampi enggau nyemetak. (Luk. 18:1; Rom. 12:12) Nuan engka patut besampi ngagai Jehovah mayuh kali ninting hari, lalu minta Iya nulung nuan nemu asai ati Iya pasal nuan. Kekadang, nuan engka kelalu nyalahka diri nyentukka nuan ngumbai Jehovah enda rinduka nuan. Tang kingatka meh, Jehovah besai agi ari ati nuan. (1 Jhn. 3:​19, 20) Iya meda sifat-sifat nuan ti manah taja pan nuan engka enda sedar nuan bisi sifat nya. (1 Sam. 16:7; 2 Ban. 6:30) Nyadi, anang meh kakang ati madahka asai ati nuan ngagai Iya, lalu minta Iya nulung nuan pechaya Iya rinduka nuan. (Mas. 62:8) Pengudah nuan besampi, gaga meh sekeda utai tu.

7-8. Baka ni bup Masmur ngasuh kitai andal agi Jehovah rinduka kitai?

⁷ Andal meh enggau utai ke dipadah Jehovah. Jehovah meri kuasa kudus ngagai bala lelaki ke nulis Bup Kudus. Nyadi, kitai ulih andal utai ke ditulis sida pasal Jehovah endang amat. Peratika chara David ngambarka pengibuh Jehovah ke kitai. Iya nulis: ‘Jehovah diau semak orang ke tusah ati lalu ngidupka sida ke nadai agi pengadang.’ (Mas. 34:18) Lebuh nuan amat tusah ati, nuan engka ngumbai nadai orang ulih faham asai ati nuan lalu nadai orang ulih nulung nuan. Tang Jehovah besemaya, ba maya ke baka nya, Iya semak enggau nuan laban Iya ulih meda nuan amat begunaka Iya. Ba siti agi masmur, David nulis: “Nuan nemu pemayuh ai mata aku labuh. Ukai enda semua ai mata aku nya udah dituliska Nuan magang dalam bup Nuan?” (Mas. 56:8) Jehovah meda lebuh nuan tusah ati sereta pedis. Iya amat ibuhka nuan lalu tusah ati lebuh meda nuan merinsa. Tiap leka ai mata kitai amat berega ba Jehovah. Iya baka ke nulis pasal semua ai mata nya dalam bup Iya. Iya ingat tiap kali nuan berasai pedis sereta nyabak. Ba Masmur 139:​3, kitai macha: “Nuan [Jehovah] nemu semua utai ti dikereja aku.” Jehovah meda semua utai ke dikereja nuan. Tang Iya befokus ba utai ti manah ke digaga nuan. (Heb. 6:10) Nama kebuah? Laban Iya ngumbai semua utai ke udah digaga nuan kena ngelantangka ati Iya amat berega.b

⁸ Nengah semua ayat Bup Kudus ti ngelantangka ati nya, Jehovah baka ke madah: ‘Aku ka nuan nemu, Aku amat sayauka nuan sereta ibuhka nuan.’ Tang baka ke udah dipelajarka kitai, Sitan ngerembaika pemula ke madah Jehovah enda rinduka nuan. Nyadi, enti nuan kakang ati sekalika Jehovah rinduka nuan tauka enda, tanya diri empu: ‘Kati aku deka pechayaka Sitan, “apai semua pemula” tauka Jehovah, “Petara ke enda ulih bula”?’—Jhn. 8:44; Heb 6:18.

9. Nama semaya ke digaga Jehovah ngagai sida ke rinduka Iya? (Pemansut 20:​5, 6)

⁹ Belematika asai ati Jehovah ngagai sida ke rinduka Iya. Peratika utai ke dipadah Jehovah ngagai Moses enggau orang Israel. (Bacha Pemansut 20:​5, 6.) Jehovah besemaya deka ngayanka pengerindu ti setia ngagai sida ke rinduka Iya. Ketegal Jehovah nya setia, kitai ulih yakin Iya seruran rinduka orang ke rinduka Iya. (Neh. 1:5) Nyadi, lebuh nuan belabuh ngumbai Jehovah enda rinduka nuan, tanya diri empu: ‘Kati aku rinduka Jehovah?’ Enti nuan rinduka Iya sereta enggau bebendar deka ngelantangka ati Iya, nuan ulih yakin, Iya mega amat rinduka nuan. (Dan. 9:4; 1 Kor. 8:3) Reti iya, enti nuan yakin nuan rinduka Jehovah, nuan mega ulih yakin Iya rinduka nuan. Nuan ulih andal enggau pengabis iya, Jehovah amat rinduka nuan sereta enda sekali-kali deka ninggalka nuan.

10-11. Jehovah deka nuan ngembuan runding ti baka ni pasal tebus? (Galatia 2:20)

¹⁰ Belematika genselan tebus Jesus. Genselan tebus Jesus nya pemeri Jehovah ti pemadu berega ke mensia. (Jhn. 3:16) Kati pemeri tu mega ke nuan? Au! Peratika pengalaman Rasul Paul. Iya ngereja sekeda utai ti amat jai sebedau iya nyadi orang Kristian. Lalu pengudah iya nyadi orang Kristian, iya agi patut belaban enggau pengelemi diri. (Rom. 7:​24, 25; 1 Tim. 1:​12-14) Taja pia, iya belubah-lubah yakin agi genselan tebus nya pemeri ari Jehovah ke iya. (Bacha Galatia 2:20.) Kingatka, Jehovah ke ngasuh Paul nulis ayat nya dalam Bup Kudus. Lalu semua ayat dalam Bup Kudus nya kena ngajar kitai. (Rom. 15:4) Jaku Paul nunjukka Jehovah deka nuan pechaya, genselan tebus Jesus nya mega pemeri ke nuan. Lebuh nuan berundingka pemanah pemeri nya, tu deka nulung nuan andal agi, Jehovah rinduka nuan.

¹¹ Kitai amat beterima kasihka Jehovah laban udah nganjung Jesus ke dunya mati ke kitai. Tang siti agi kebuah Jesus datai ke dunya, iya nya madahka pemendar pasal Petara ngagai orang bukai. (Jhn. 18:37) Pemendar nya nyengkaum asai ati Jehovah pasal kitai.

JESUS NULUNG NUAN ANDAL JEHOVAH AMAT RINDUKA NUAN

12. Nama kebuah kitai ulih pechayaka utai ke dipadah Jesus pasal Jehovah?

¹² Lebuh Jesus ba dunya, iya rindu ngajar orang pasal Jehovah. (Luk. 10:22) Nama kebuah kitai ulih pechayaka utai ke dipadah Jesus pasal Jehovah? Laban Jesus udah diau begulai enggau Apai iya ba serega jauh lama agi ari orang bukai. (Kol. 1:15) Iya empu udah ngasaika pengerindu ari Jehovah. Lalu iya udah meda Apai iya ngayanka pengerindu ngagai bala melikat ti tetap ati sereta ngagai bala mensia ti tetap ati ba dunya. Nyadi, baka ni Jesus nulung kitai andal Jehovah amat rinduka kitai?

13. Jesus deka kitai ngembuan runding ti baka ni pasal Jehovah?

¹³ Jesus deka kitai ngembuan runding ti sama enggau iya pasal Jehovah. Dalam Bup Injil, Jesus ngangauka Jehovah, “Apai,” lebih ari 160 kali. Lalu lebuh bejaku enggau bala murid iya, Jesus ngena rambai jaku baka “Apai kita ti ba serega” tauka “Apai kita.” (Mat. 5:16; 6:26; Jhn. 20:17) Sebedau Jesus datai ke dunya, bala nembiak Jehovah ngangauka Jehovah ngena mayuh macham gelar baka “Petara ti Pemadu Bekuasa,” “Petara ti Pemadu Tinggi,” “Ketuai Soldadu Serega,” sereta gelar ke bukai. Tang Jesus suah ngangauka Jehovah, “Apai.” Gelar nya nunjukka kaul ti rapat ke dikembuan Jehovah enggau bala penyembah Iya. Nyadi, Jesus benung ngajar kitai, Jehovah rinduka kitai baka siku apai ke sayauka bala anak iya. Aram kitai beratika dua iti chunto alai Jesus ngangauka Jehovah, “Apai.”

14. Baka ni Jesus nunjukka tiap iku kitai amat berega ba Apai kitai Jehovah? (Matthew 10:​29-31) (Peda mega gambar.)

¹⁴ Keterubah, peratika jaku Jesus ba Matthew 10:​29-31. (Bacha.) Jesus madah, Jehovah nemu dini alai tiap iku burung pipit. Tang burung enda nyembah Jehovah tauka rinduka Iya. Enti Jehovah ngumbai burung ti mit nya amat berega, kitai ulih andal Iya ibuh agi ke tiap iku kitai laban kitai rinduka Iya sereta nyembah Iya. Jesus mega madahka: “Indah semua lambar buk ba pala kita udah diitung Iya magang.” Enti Jehovah nemu indah utai ti mit pasal kitai, tu ngasuh kitai andal agi Iya amat ibuhka kitai. Endang amat, Jesus deka kitai andal, tiap iku kitai amat berega ba Apai kitai, Jehovah.

15. Nama ulih dipelajarka nuan ari jaku Jesus ba John 6: 44 pasal Apai nuan ti ba serega?

¹⁵ Peratika siti agi chunto lebuh Jesus ngangauka Jehovah, “Apai.” (Bacha John 6:44 enggau nota kaki.) Apai nuan ti ba serega ke mai, tauka narit ati nuan ngagai pemendar. Nama kebuah Iya ngereja nya? Laban Iya ulih meda nuan bisi ati ti manah. (SKR. 13:48) Lebuh Jesus nyebut jaku ba John 6:​44, iya engka benung merujuk ngagai jaku Jehovah ba Jeremiah 31:​3, iya nya ayat tema artikel tu. Dalam ayat nya Jehovah madah: “Ketegal pengerindu ti setia, Aku udah mai nuan ngagai Aku.” (Jer. 31:​3, NWT; banding Hosea 11:4.) Perundingka nama reti jaku nya: Apai kitai ti ba serega, ke amat bepengerindu, seruran meda utai ti manah ba nuan taja pan nuan engka enda meda pemanah nuan.

16. (a) Nama utai ke udah diajar Jesus, lalu nama kebuah kitai patut pechayaka iya? (b) Nama ulih nulung nuan andal, Jehovah nya Apai ti pemadu manah ke nuan? (Peda kutak “Apai Kitai ti Pemadu Manah.”)

¹⁶ Jesus udah ngajar nuan, Jehovah ukai aja Apai iya, tang mega Apai nuan. Jesus deka nuan pechaya, Jehovah amat sayauka nuan sereta ibuhka nuan. Nyadi, lebuh nuan belabuh kakang ati sekalika Jehovah rinduka nuan tauka enda, kingatka meh utai ke dipadah Jesus sereta arapka iya laban iya nemu Apai kitai enggau pemadu manah sereta enda kala nyebut utai ti bula.—1 Pet. 2:22.

KEREJA UTAI KE NULUNG NUAN PECHAYA JEHOVAH RINDUKA NUAN

17. Nama kebuah kitai mesti mengkang pechaya Jehovah rinduka kitai?

¹⁷ Kitai patut ngereja sebarang utai ke ulih nulung kitai pechaya Jehovah rinduka kitai. Baka ke udah dipelajarka kitai, Sitan enggau naka ulih manjuk kitai ngambika kitai badu nyembah Jehovah. Ketegal iya deka kitai lemi, iya enda putus asa ngasuh kitai pechaya Jehovah enda sayauka kitai. Tang kitai enda patut pechayaka pemula Sitan!—Jop 27:5.

18. Nama ulih digaga nuan ngambika nuan ulih andal agi Jehovah rinduka nuan?

¹⁸ Dalam artikel tu, nuan udah belajar utai ke ulih digaga nuan ngambika andal agi Jehovah rinduka nuan. Nuan ulih besampi lalu minta Iya nulung nuan meda sifat ke dipeda Iya ba nuan. Berunding enggau dalam ayat Bup Kudus ke nunjukka chara Jehovah ibuhka sida ke rinduka Iya. Kingatka, Jehovah seruran rinduka orang ke rinduka Iya. Belematika kebuah nuan ulih ngumbai genselan tebus Jesus nya pemeri Jehovah ke nuan. Lalu pechaya meh, Jehovah nya Apai nuan baka ke dipadah Jesus. Udah nya, enti orang nanya: ‘Kati nuan yakin Jehovah rinduka nuan?’ Nuan ulih nyaut enggau yakin: ‘Au, Iya sayauka aku! Lalu ninting hari aku deka bebendar ngayanka pengerindu aku ke Iya!’