Pengerindu Meransang Nuan Terus Nginjil

1. Nama utai ke dipelajarka kitai ba aum ninting taun 2023?

BA AUM NINTING TAUN 2023,a kitai belajar pasal sekeda penemu ke diaduka baru. Kitai mega nerima berita ti ngagitka ati pasal pengawa nginjil. Ambika chunto, kitai belajar sekeda orang engka bisi peluang sama enggau kitai nyembah Jehovah, indah pengudah Babilon ti Besai dirusakka. Kitai mega bisi ninga siti jaku gerah, iya nya belabuh ari November 2023, semua penginjil enda ibuh ngeriput semua pengawa ke dikereja sida ba pengawa nginjil. Kati ubah nya ngasuh pengawa nginjil kitai kurang penting baka ke selama? Tentu enda!

2. Nama kebuah pengawa nginjil kitai majak penting ninting hari? (Mark 13:10)

² Ninting hari, pengawa nginjil kitai nyadi majak penting. Nama kebuah? Laban awak ke tinggal majak suntuk. Peratika utai ke dipadah Jesus pasal pengawa nginjil ba hari ti penudi. (Bacha Mark 13:10.) Nitihka utai ke dipadah ba bup Matthew, Jesus madahka Berita Manah deka ditusui ba serata dunya sebedau “pengujung” datai. (Mat. 24:14) Leka jaku “pengujung” merujuk ngagai pengujung dunya Sitan ti jai. Jehovah udah netapka “hari enggau jam” alai semua utai tu deka nyadi. (Mat. 24:36; 25:13; SKR. 1:7) Ninting hari, kitai majak semak ngagai maya nya. (Rom. 13:11) Tang sebedau pengujung nya datai, kitai patut terus nginjil.

3. Nama kebuah kitai deka nginjil?

³ Bisi siti tanya ti penting ke patut diperundingka semua kitai. Nama kebuah kitai deka nginjil? Saut iya, ketegal pengerindu. Lebuh kitai nginjil, kitai ngayanka pengerindu kitai ke Berita Manah, ke orang bukai, sereta ke pemadu penting, ke Jehovah enggau nama Iya. Aram kitai berandauka tu siti-siti.

KITAI NGINJIL LABAN KITAI RINDUKA BERITA MANAH

4. Nama reaksi kitai lebuh kitai nerima berita ti manah?

⁴ Perundingka asai ati nuan lebuh nuan nerima berita ti manah. Engka bisi siku ari ruang bilik nuan baru ngadaka anak, tauka nuan nerima tawaran kereja ke amat diguna nuan. Nuan tentu amat gagit ati lalu keran deka madahka berita nya ngagai ruang bilik nuan sereta bala kaban. Baka ni enggau lebuh nuan ninga berita ti pemadu manah, iya nya Berita Manah pasal Perintah Petara?

5. Nama asai ati nuan lebuh nuan terubah kali belajarka pemendar ari Bup Kudus? (Peda mega gambar.)

⁵ Perundingka baru asai ati nuan lebuh nuan terubah iya belajarka pemendar ari Bup Kudus. Nuan belajar, Apai nuan ti ba serega rinduka nuan. Lalu Iya dekaka nuan nyadi sebagi ari ruang bilik Iya. Nuan mega belajar, Iya besemaya deka ngujungka pemedis enggau pemerinsa mensia, lalu ba dunya baru, nuan ulih betemu enggau orang ti dikesayauka nuan ke udah nadai. Nuan mega belajarka mayuh agi pemendar ti bukai. (Mrk. 10:​29, 30; Jhn. 5:​28, 29; Rom. 8:​38, 39; Pem. 21:​3, 4) Semua pemendar nya negu ati nuan. (Luk. 24:32) Nuan rindu enggau utai ke dipelajar nuan, lalu keran deka madahka nya ngagai semua orang!—Banding Jeremiah 20:9.

6. Nama dipelajarka nuan ari pengalaman Ernest enggau Rose?

⁶ Peratika pengalaman tu: Siku menyadi lelaki ke benama Ernestb beumur sepuluh taun lebuh apai iya nadai. Ku Ernest ngenang baru: “Maya nya aku berunding: ‘Kati iya udah ke serega? Tauka iya amat udah nadai?’ Aku chemburu ngagai anak mit ke bukai laban sida bisi apai.” Ernest suah ngagai kubur apai iya, besugang lalu besampi: “Petara, padah meh ngagai aku dini apai aku.” Kira-kira 17 taun pengudah apai iya nadai, bisi orang mai Ernest belajarka Bup Kudus, lalu iya setuju. Iya amat gaga ati lebuh iya belajar, orang ke mati enda nemu utai, lalu sida baka ke tinduk jenak. Iya mega gaga ati lebuh belajar pasal semaya Bup Kudus bekaul enggau pengangkat ari mati jemah ila. (P-jar. 9:​5, 10; SKR. 24:15) Ernest udah tetemuka saut ngagai tanya ke deka ditemu iya betaun-taun! Iya amat gagit ati pasal pemendar Bup Kudus ke dipelajar iya. Maya nya, bini iya Rose mega sama belajarka Bup Kudus. Rose mega rindu utai ke dipelajar iya. Ba taun 1978, seduai iya dibaptisa. Seduai iya enggau ransing bekunsika pemendar Bup Kudus ngagai diri sebilik, bala kaban, enggau orang bukai. Asil iya, seduai iya udah nulung lebih ari 70 iku orang ngelala Jehovah sereta dibaptisa.

7. Nama nyadi lebuh pengerindu kitai ke pemendar Bup Kudus majak nambah? (Luke 6:45)

⁷ Lebuh pengerindu kitai ke pemendar Bup Kudus majak nambah, kitai keran deka bekunsika nya ngagai orang bukai. (Bacha Luke 6:45.) Kitai ngasaika utai ti sama enggau bala murid Jesus ba abad keterubah, ke madah: “Kami enda ulih ngetu bejaku pasal utai ke udah dipeda sereta didinga kami.” (SKR. 4:20) Amat, kitai rinduka pemendar nyentukka kitai deka bekunsika nya ngagai semua orang!

KITAI NGINJIL LABAN KITAI RINDUKA ORANG

8. Nama kebuah kitai deka bekunsika Berita Manah ngagai orang bukai? (Peda kutak “Pengerindu Deka Meransang Nuan—Ngaga Orang Nyadi Murid.”) (Peda mega gambar.)

⁸ Sama baka Jehovah enggau Anak Iya, Jesus, kitai mega rinduka orang. (J-lam. 8:31; Jhn. 3:16) Kitai berasai siru ngagai sida ke “enda ngelala Petara” enggau sida ke nadai harapan. (Eps. 2:12) Ketegal penanggul ke ditapi sida, sida engka ngasaika diri baka ba dalam lubang ti dalam. Tang, kitai bisi tali ke ulih narit sida pansut ari lubang nya, iya nya Berita Manah pasal Perintah Petara. Ketegal kitai rindu sereta siruka sida, kitai enggau naka ulih bekunsika Berita Manah ngagai sida. Lebuh sida belajar pasal Berita Manah, nya deka meri sida harapan, nulung sida gaga ati diatu, sereta meri sida peluang ngasaika “pengidup ti bendar,” iya nya pengidup ti meruan belama iya ba dunya baru.—1 Tim. 6:19.

9. Nama jaku tangkan ke diberi kitai pasal jemah ila, lalu nama kebuah? (Esekiel 33:​7, 8)

⁹ Pengerindu kitai ke orang mega meransang kitai nangkan sida pasal pengujung dunya ti jai tu ke majak semak. (Bacha Esekiel 33:​7, 8.) Kitai siruka semua orang, nyengkaum diri sebilik kitai ke enda nyembah Jehovah. Mayuh orang ngereja pengawa besehari-sehari lalu enda nemu utai ke deka nyadi dudi hari. Sida enda nemu “Penusah ti Besai deka nyadi. Penusah nya nadai kala nyadi kenyau ari penumbuh dunya nyentuk ngagai seharitu, lalu iya enda agi nyadi pengudah nya.” (Mat. 24:21) Kitai deka sida nemu utai ke deka nyadi maya nya. Terubah iya, semua pengarap pelesu deka dirusak. Pengudah nya, semua sistem dunya ti jai tu deka dirusak maya Armagedon. (Pem. 16:​14, 16; 17:​16, 17; 19:​11, 19, 20) Kitai besampi ngambika mayuh agi orang deka ningaka jaku tangkan tu, lalu sama enggau kitai nyembah Jehovah. Tang, baka ni enggau sida ke enda ningaka jaku tangkan nya diatu, nyengkaum diri sebilik kitai?

10. Nama kebuah penting kitai terus madahka jaku tangkan nya?

¹⁰ Baka ke udah diterangka ba artikel sebedau tu, engka Jehovah deka nyelamatka sida ke berengkah arapka Iya lebuh sida meda pengerusak Babilon ti Besai. Enti pia, nya meh kebuah kitai patut terus madahka sida jaku tangkan nya. Perundingka tu: Utai ke dipadah kitai ngagai sida diatu engka dikenang sida baru lebuh utai nya nyadi. (Banding Esekiel 33:33.) Engka sida deka ingat baru jaku tangkan ke diberi kitai, lalu diperansang nyembah Jehovah sebedau terlambat. Baka jejaga ba Pilipi ke berengkah nyembah Jehovah pengudah “tanah berenyang ti balat nyadi,” sekeda orang mega engka deka berengkah nyembah Jehovah pengudah sida meda pengerusak Babilon ti Besai nyadi.—SKR. 16:​25-34.

KITAI NGINJIL LABAN KITAI RINDUKA JEHOVAH ENGGAU NAMA IYA

11. Baka ni kitai meri Jehovah mulia, basa, enggau kuasa? (Pemandang 4:11) (Peda mega gambar.)

¹¹ Kebuah ti pemadu penting kitai nginjil pasal Berita Manah, iya nya kitai rinduka Petara Jehovah enggau nama Iya ti kudus. Pengawa nginjil nya siti chara kitai muji Petara ti dikerinduka kitai. (Bacha Pemandang 4:11.) Kitai enggau pengabis ati setuju, Petara Jehovah endang layak nerima mulia, basa, enggau kuasa. Kitai meri Jehovah mulia enggau basa lebuh kitai bekunsi enggau orang bukai bukti ke nunjukka Iya “udah ngaga semua utai.” Lalu kitai ulih idup laban Iya udah meri kitai nyawa. Kitai meri Jehovah kuasa kitai lebuh kitai ngena awak, pengering, sereta utai ti dikemisi kitai ngereja pengawa nginjil enggau naka ulih. (Mat. 6:33; Luk. 13:24; Kol. 3:23) Pandakka jaku, kitai rindu bejaku pasal Petara ti dikerinduka kitai! Kitai mega diperansang madahka ngagai orang bukai pasal nama Iya sereta Iya Petara ke baka ni. Nama kebuah?

12. Baka ni kitai nguduska nama Jehovah ba pengawa nginjil kitai?

¹² Pengerindu kitai ke Jehovah meransang kitai nguduska nama Iya. (Mat. 6:9) Reti nya, kitai deka madah ngagai orang bukai, semua utai ke dipadah Sitan pasal Jehovah nya bula magang. (P-kal. 3:​1-5; Jop 2:4; Jhn. 8:44) Lebuh kitai nginjil, kitai keran deka madah ngagai sapa-sapa ke deka ninga, sapa Jehovah kebendar iya. Kitai deka semua orang nemu sifat Iya ti pemadu besai nya pengerindu, lalu chara Iya merintah seruran lurus sereta adil. Kitai mega deka sida nemu, enda lama da agi, Perintah Iya deka ngujungka semua pemerinsa, lalu mai pemaik enggau pengelantang ngagai semua mensia. (Mas. 37:​10, 11, 29; 1 Jhn. 4:8) Lebuh kitai madahka semua utai tu pasal Jehovah, kitai nguduska nama Iya. Kitai mega gaga ati laban kitai ngereja utai ke patut digaga kitai ke nyadi Saksi Iya. Nama kebuah kitai ulih bejaku munyi nya?

13. Nama kebuah kitai ngumbai nya siti basa ulih dikumbai Saksi-Saksi Jehovah? (Isaiah 43:​10-12)

¹³ Jehovah udah milih kitai nyadi “Saksi” Iya. (Bacha Isaiah 43:​10-12.) Beberapa taun suba, siti surat ari Raban ti Ngiring madahka: “Basa ti pemadu besai ke dikembuan kitai iya nya dikumbai siku ari Saksi-Saksi Jehovah.” Nama kebuah kitai ngumbai nya siti basa? Gambarka nuan dituduh ngereja utai ti salah. Nuan tentu begunaka siku orang ke ulih madah jaku tuduh nya bula, lalu madahka kebendar iya nuan orang ti manah, ke enda sekali-kali ngereja utai ke baka nya. Sapa ke deka dipilih nuan ngereja nya? Nuan tentu milih orang ke dikelala sereta dikearapka nuan, ke bisi reputasi ti manah ngambika orang bukai ulih pechayaka iya. Baka nya mega, lebuh Jehovah milih kitai nyadi Saksi Iya, Jehovah nunjukka Iya ngelala kitai enggau manah, lalu Iya pechaya kitai ulih madah ngagai orang bukai semina Iya aja Petara ti bendar. Nya alai, kitai ngasaika nya siti basa ulih nyadi Saksi Iya. Ketegal nya, kitai ngena semua peluang kena ngasuh nama Iya ditemu orang sereta nunjukka semua utai ti jai ke dipadah pasal Iya bula magang. Enggau nya, kitai endang ngereja utai ti patut, iya nya nyadi Saksi-Saksi Jehovah!—Mas. 83:18; Rom. 10:​13-15.

KITAI DEKA TERUS NGINJIL NYENTUKKA UJUNG

14. Nama utai ti ngagitka ati ke deka nyadi enda lama da agi?

¹⁴ Kitai gagit ati deka meda utai ke deka nyadi enda lama da agi! Enggau berekat ari Jehovah, kitai ngarapka mayuh agi orang deka nerima pemendar sebedau Penusah ti Besai berengkah. Kitai mega gagit ati, laban indah ba maya ti pemadu tusah, iya nya maya Penusah ti Besai, engka mayuh agi orang deka pansut ari dunya Sitan lalu sama enggau kitai muji Jehovah!—SKR. 13:48.

15-16. Nama utai ke deka terus dikereja kitai, lalu nyentukka kemaya kitai deka ngereja nya?

¹⁵ Ke diatu, kitai agi bisi pengawa ke patut dikereja. Kitai bisi basa ngerembaika Berita Manah pasal Perintah Petara ngagai serata dunya. Pengawa tu amat penting, lalu enda agi dikereja ila. Ba maya ti sama, kitai patut terus nangkan orang pasal utai ke deka nyadi enda lama da agi. Sida patut nemu, pengujung dunya ti jai tu majak semak. Udah nya, lebuh hari nya datai, sida deka nemu pesan ke ditusui kitai nya datai ari Petara Jehovah.—Esk. 38:23.

¹⁶ Nama utai ti keran digaga kitai? Ketegal kitai rinduka Berita Manah, rinduka orang, sereta ke pemadu penting, kitai rinduka Petara Jehovah enggau nama Iya, kitai deka terus nginjil enggau ransing nyentukka Jehovah madah: “Udah tembu!”