Neladan Jehovah—Ngayanka Diri Ngembuan Runding ti Masuk Akal

1. Baka ni orang Kristian ulih nyadi baka siti pun kayu? (Peda mega gambar.)

“ANGIN enda ulih matahka pun kayu ke ulih bingkuk nitihka puput angin.” Rambai jaku tu nunjukka pun kayu patut nyadi fleksibel lebuh angin benung bepuput enggau kuat ngambika iya enda patah. Kitai mega patut nyadi fleksibel lebuh situasi ba pengidup kitai nyadi tusah ngambika kitai ulih terus nyembah Jehovah enggau ati ti gaga. Baka ni kitai ulih ngereja nya? Kitai patut ngayanka diri seimbang lebuh situasi ba pengidup kitai berubah sereta lebuh kitai bebasaka runding enggau pemutus orang bukai.

2. Nama sifat ke deka nulung kitai nelebaka diri enggau situasi pengidup kitai ti berubah? Lalu nama deka dikerandauka kitai dalam artikel tu?

² Ketegal kitai nembiak Jehovah, kitai deka ngembuan runding ti masuk akal. Kitai mega deka ngayanka pemaruh ati enggau penyiru. Dalam artikel tu, kitai deka beratika baka ni sifat ke baka tu nulung sekeda orang Kristian mujur lebuh situasi ba pengidup sida berubah. Kitai mega deka meda baka ni sifat tu ulih nulung kitai. Tang terubah iya, aram kitai belajar ari Jehovah enggau Jesus, teladan ti sempurna bekaul enggau ngembuan runding ti masuk akal.

JEHOVAH ENGGAU JESUS NGEMBUAN RUNDING TI MASUK AKAL

3. Baka ni kitai nemu Jehovah ngembuan runding ti masuk akal?

³ Dalam Bup Kudus, Jehovah dikumbai ‘penyaga kitai ke kering,’ tauka baka sigi batu ti tegap ke enda bekinsit. (U-dat. 32:4) Taja pia, Iya mega ngembuan runding ti masuk akal. Seraya situasi ba dunya tu berubah, Jehovah ngayanka Diri fleksibel lalu nentuka semua utai ti udah disemaya Iya deka dikeamatka Iya magang. Jehovah udah nempa mensia neladan gamal Iya. Nyadi Iya mega udah meri kitai penau ngambika ulih nyadi fleksibel lebuh situasi ba pengidup kitai berubah. Iya udah meri kitai prinsip Bup Kudus ke ulih nulung kitai ngaga pemutus ti manah enda ngira nama penanggul ke engka ditapi kitai. Teladan Jehovah Empu enggau prinsip ke udah diberi Iya ngagai kitai nulung kitai nemu, taja pan Iya baka sigi batu ti tegap ke enda bekinsit, tang Jehovah mega ngayanka Diri ngembuan runding ti masuk akal.

4. Beri siti chunto ke nunjukka Jehovah ngembuan runding ti masuk akal. (Adat Lewi 5:7, 11)

⁴ Semua utai ti dikereja Jehovah sempurna sereta masuk akal magang. Iya enda kelalu terit enggau mensia. Ambika chunto, peratika chara Jehovah ngayanka runding ti seimbang ngagai orang Israel. Sekeda orang Israel kaya lalu ke bukai seranta. Tang Jehovah enda minta pemeri ti sama ari semua orang. Kekadang, Iya nejuka tiap iku sida meri pemeri nitihka situasi sida.—Bacha Adat Lewi 5:7, 11.

5. Beri siti chunto ke nunjukka pemaruh ati sereta penyiru Jehovah.

⁵ Pemaruh ati sereta penyiru Jehovah ngasuh Iya ngembuan runding ti seimbang. Ambika chunto, pemaruh ati Jehovah ulih dipeda lebuh Iya deka ngemunaska orang ti jai ba Sodom. Nengah bala melikat Iya, Jehovah ngasuh Lot ngerarika diri ngagai endur ti bebukit. Lot berasai takut deka kin. Nyadi iya minta ngambika sida sebilik ulih dikemendarka ngagai nengeri Soar, siti endur ti mit ke deka dirusakka Jehovah. Jehovah ulih ngasuh Lot ngereja aja utai ti udah diasuh Iya kereja Lot. Taja pia Jehovah ngemendarka Lot ngagai Soar, lalu Iya enda ngerusak nengeri nya. (P-kal. 19:18-22) Beratus taun udah nya, Jehovah ngayanka penyiru ngagai orang Nineweh. Iya nganjung nabi Jonah kena madah ngagai orang ti jai ba Nineweh pasal pengerusak ke deka ninggang sida enggau nengeri sida. Tang lebuh orang Nineweh nesal ati, Jehovah kasihka sida lalu enda ngerusak nengeri nya.—Jon. 3:1, 10; 4:10, 11.

6. Beri sekeda chunto ke nunjukka chara Jesus neladan Jehovah ke ngembuan runding ti masuk akal.

⁶ Jesus neladan Jehovah ke ngembuan runding ti masuk akal. Iya dianjung ke dunya ngambika ulih nginjil ngagai “orang Israel, ke baka bedus ti tesat.” Tang iya ngayanka runding ti masuk akal tauka seimbang lebuh iya nginjil ngagai orang bukai. Bisi sekali, siku indu ke ukai bansa Israel minta Jesus ngeraika anak indu iya ti balat merinsa ketegal “dirasuk melikat ti jai.” Jesus enggau siru ngereja utai ti dipinta indu nya lalu ngeraika anak indu iya. (Mat. 15:21-28) Peratika siti agi chunto. Maya Jesus berengkah ngereja pengawa nginjil, iya kala madah: “Enti orang enggai ngaku diri murid aku . . . , aku pan enggai ngaku iya murid aku.” (Mat. 10:33) Tang Jesus terus ngaku Peter nyadi murid iya taja pan Peter tiga kali madahka diri enda ngelala Jesus. Nama kebuah? Jesus nemu Peter amat nesalka utai ti udah digaga iya lalu iya mega siku lelaki ti tetap ati. Pengudah Jesus diangkatka idup baru, iya ngayanka diri ngagai Peter. Maya nya, Jesus tentu bisi ngasuh Peter yakin iya udah ngampunka Peter lalu iya mega agi rinduka Peter.—Luk. 24:33, 34.

7. Sejalai enggau James 3:17, nama reputasi ti dikedekaka kitai?

⁷ Kitai udah belajar Petara Jehovah enggau Jesus Kristus ngembuan runding ti masuk akal. Baka ni enggau kitai? Jehovah mega ngarapka kitai ngembuan runding ti masuk akal. (Bacha James 3:17.) Siti salin Bup Kudus madahka: “Ari ulah nuan, ayanka diri ngembuan runding ti masuk akal.” Kitai ulih nanya diri empu: ‘Kati orang bukai ngumbai aku ngembuan runding ti masuk akal? Tauka kati sida ngumbai aku kelalu terit? Kati aku minta orang ngereja utai semina nitihka chara aku aja? Tauka kati aku ningaka runding orang bukai lalu nitihka chara sida enti ulih?’ Enti kitai majak ngayanka runding ti masuk akal, kitai deka majak agi neladan Jehovah enggau Jesus. Aram kitai beratika dua iti situasi alai kitai patut ngayanka runding ti masuk akal: (1) lebuh situasi kitai empu berubah, lalu (2) lebuh runding sereta pemutus orang bukai bebida enggau kitai.

AYANKA DIRI NGEMBUAN RUNDING TI MASUK AKAL LEBUH SITUASI KITAI BERUBAH

8. Nama ulih nulung kitai ngayanka runding ti masuk akal lebuh situasi kitai berubah? (Peda mega nota kaki.)

⁸ Kitai patut ngayanka runding ti masuk akal lebuh situasi kitai berubah. Ubah ke baka tu engka ngasuh kitai napi penanggul ke enda dijangka kitai. Ambika chunto, kitai engka napi penanggul ti balat ba pengerai. Situasi ekonomi enggau situasi ba perintah alai kitai diau engka berubah. Semua tu ulih nyadi enggau ngenyit, lalu tu ulih ngasuh pengidup kitai engka nyadi tusah agi. (P-jar. 9:11; 1 Kor. 7:31) Indah ubah ba pengawa teokratik kitai ulih nyadi siti penguji. Enda ngira nama cabaran ke ditapi kitai, kitai ulih mujur nelebaka diri enggau situasi ti baru enti kitai ngereja empat iti utai tu: (1) terima meh situasi nuan ti udah berubah diatu, (2) perundingka utai ti deka dikereja nuan diatu, ukai utai ti kala dikereja nuan, (3) betumpu ba utai ti positif, lalu (4) kereja utai ke orang bukai.b Aram kitai meda chara sekeda bala menyadi Kristian kitai udah bulih penguntung lebuh sida ngereja utai tu.

9. Baka ni sepasang laki bini ke nyadi pengerintis seberai tasik napi penguji ke enda dijangka?

⁹ Terima meh situasi nuan ti udah berubah diatu. Emanuele enggau Francesca dianjung nyadi pengerintis seberai tasik ba menua bukai. Seduai iya baru aja berengkah belajarka bansa jaku ti baru, lalu bekelala enggau bala menyadi Kristian dalam raban gempuru ti baru nya. Tang pandemik COVID-19 pan berengkah lalu seduai iya patut nyeraraka diri ari orang bukai. Udah nya, indai Francesca nadai enggau ngenyit. Francesca amat keran deka pulai lalu begulai enggau sida sebilik, tang iya enda ulih kin ketegal pandemik. Nama utai ti nulung iya tan napi semua penanggul tu? Keterubah, Emanuele enggau Francesca begulai besampi minta penemu-dalam ngambika ulih neruska pengidup ninting hari sereta enda kelalu irau. Jehovah nyaut sampi seduai iya ba maya ti sesuai nengah gerempung Iya. Ambika chunto, seduai iya diperansang enggau utai ti dipadah siku menyadi lelaki dalam siti video: “Jampat agi kitai nerima utai ti nyadi, jampat agi kitai deka gaga ati baru. Udah nya, kitai ulih bebendar ngena situasi kitai ti baru nya kena nyembah Jehovah sereta nulung orang bukai ke napi penusah.”c Kedua, seduai iya ngaga pemutus deka ngemansangka agi pengelandik nginjil ngena talipun, lalu seduai iya indah ulih tetemuka siku pemelajar Bup Kudus ti baru. Ketiga, seduai iya nerima sukung ke diberi bala menyadi Kristian, lalu seduai iya mega beterima kasihka pengerindu ti diayanka ngagai seduai iya. Siku menyadi indu ti manah nganjung ngagai seduai iya siti mesej ti pandak ke ngundan ayat Bup Kudus ninting hari pengelama setaun. Enti kitai mega nerima situasi kitai ti baru, kitai deka gaga ati enggau utai ti ulih dikereja kitai.

10. Baka ni siku menyadi indu nelebaka diri enggau siti ubah ti besai dalam pengidup iya?

¹⁰ Perundingka utai ti deka dikereja nuan diatu, ukai utai ti kala dikereja nuan, sereta betumpu ba utai ti positif. Christina, siku menyadi indu bansa Romania, diau ba menua Jepun. Iya berasai asa ati lebuh raban gempuru English alai iya begempuru udah ditutup. Taja pia, iya enda terus berundingka utai ti udah nyadi. Tang, iya enggau raban gempuru jaku Jepun lalu bebendar nginjil ngena jaku nya. Iya minta siku indu ke kala gawa enggau iya ngajar iya bejaku ngena jaku Jepun enggau manah agi. Indu nya besetuju deka ngena Bup Kudus sereta brosur Idup enggau Lantang Belama Iya! ngajar Christina jaku Jepun. Nyadi, Christina belajar bejaku ngena jaku Jepun enggau manah agi, tang keberat agi indu nya deka belajar mayuh agi pasal Bup Kudus. Lebuh kitai enda betumpu ba utai ti kala nyadi suba lalu ngembuan runding ti positif, ubah ti ngenyit ulih mai berekat ti enda dijangka kitai.

11. Nama udah nulung sepasang laki bini ke napi penanggul ba ekonomi?

¹¹ Kereja utai ke orang bukai. Sepasang laki bini ke diau ba menua alai pengawa kitai ditagang, berengkah ngembuan penanggul ba ekonomi lebuh menua nya bankrap. Baka ni seduai iya mutarka situasi nya? Keterubah, seduai iya nguji ngurangka belanja. Udah nya, seduai iya enda betumpu ba penanggul diri empu, tang seduai iya bebendar deka nulung orang bukai nengah pengawa nginjil. (SKR. 20:35) Laki nya madahka, “Ketegal kami ngena mayuh agi awak ba pengawa nginjil, kami kurang agi awak berunding pasal penanggul kami lalu bisi mayuh agi awak ngereja peneka Petara.” Lebuh situasi kitai berubah, kitai mesti ingat ngambika terus nulung orang bukai kelebih agi nengah pengawa nginjil. Tu amat penting.

12. Baka ni teladan Paul nulung kitai fleksibel ba pengawa nginjil?

¹² Lebuh ngereja pengawa nginjil, kitai patut fleksibel. Orang ba alai kitai nginjil bisi runding ti bebida pasal Petara sereta bisi latar belakang ti enda sama. Rasul Paul senang nelebaka diri, lalu kitai ulih belajar ari teladan iya. Jesus milih Paul nyadi “rasul ke dianjung ngagai bansa bukai.” (Rom. 11:13) Nya alai, Paul nginjil ngagai orang Judah, orang Gerika, orang ti bepelajar, orang ke diau ba kampung, pegawai perintah, sereta raja. Paul “udah ngereja semua utai ke ulih [iya] kena nulung semua macham orang,” ngambika ulih nyapai ati sida. (1 Kor. 9:19-23) Iya beratika latar belakang sereta utai ti dipechaya orang ke ditemu iya maya nginjil, lalu tu nulung iya ngaga ubah ba chara iya nginjil ngagai sida. Kitai mega ulih ngemansangka chara kitai nginjil, enti kitai fleksibel sereta berundingka chara ti pemadu manah kena nulung tiap iku orang.

BEBASAKA RUNDING ORANG BUKAI

13. Nitihka 1 Korint 8:9, nama utai ti bahaya ke ulih diseliahka kitai enti kitai bebasaka runding orang bukai?

¹³ Runding ti seimbang mega ulih nulung kitai bebasaka runding orang bukai. Ambika chunto, sekeda bala menyadi indu rindu nganta, tang ke bukai enda. Sekeda menyadi Kristian rindu ngirup ai bisa enggau pengumbas iya, tang sekeda ke bukai enggai ngirup. Semua orang Kristian deka bisi pengerai ti manah, tang chara tiap iku orang nyaga pengerai diri bebida. Enti kitai ngumbai diri seruran betul lalu nguji mejal bala menyadi Kristian ngereja utai ti dikereja kitai empu, kitai ulih ngasuh orang bukai labuh ba pengarap sereta ngasuh raban gempuru enda beserakup. Kitai tentu enggai ngereja nya! (Bacha 1 Korint 8:9; 10:23, 24) Aram kitai beratika dua iti chunto ke nunjukka chara kitai ulih nitihka prinsip Bup Kudus ti ulih nulung kitai seimbang, sereta ngetanka penyerakup ba raban gempuru.

14. Nama prinsip Bup Kudus ke patut dikingatka kitai lebuh milih chara begari sereta ngias diri?

¹⁴ Chara begari sereta ngias diri. Jehovah nadai netapka chara kitai patut begari, tang Iya meri kitai prinsip Bup Kudus ke patut dititih. Chara orang Kristian begari patut mai basa ngagai Jehovah, ngayanka runding ti seimbang, sereta enggau pengumbas iya. Sida mega “patut berunding enggau manah” pasal chara begari. (1 Tim. 2:9, 10; 1 Pet. 3:3) Nya alai, kitai enggai ngasuh orang kelalu beratika chara kitai begari. Prinsip Bup Kudus mega deka nulung bala tuai gempuru nyeliah ari ngaga atur kediri empu pasal chara begari sereta ngias diri. Ambika chunto, ba siti raban gempuru, bala tuai gempuru deka nulung sekeda bala menyadi lelaki ti biak. Nama kebuah? Laban sida rindu nunda stail buk ti tebilang, ke pandak tang enda kemas. Baka ni bala tuai gempuru ulih nulung sida, tang ba maya ti sama enda netapka atur ke sida? Siku tuai ti ngabas madah ngagai bala tuai gempuru utai ti ulih dipadah ngagai bala menyadi lelaki ti biak nya: “Enti nuan ba pentas, lalu bala menyadi lebih agi betumpu ba chara nuan begari ari ke utai ti dipadah nuan, reti iya gari sereta chara nuan ngias diri bisi penanggul.” Penerang ti senang dimeretika tu nulung bala menyadi lelaki ti biak nya nemu nama utai ke patut dikereja sida, lalu bala tuai gempuru enda ibuh netapka atur ke sida.d

15. Nama adat enggau prinsip Bup Kudus ke ulih nulung kitai lebuh kitai patut ngaga pemutus ke bekaul enggau pengerai kitai? (Rome 14:5)

¹⁵ Pengerai kitai. Tiap iku orang Kristian patut ngaga pemutus pasal chara ngintu pengerai diri empu. (Gal. 6:5) Lebuh orang Kristian milih chara berubat, sida patut ngasika adat Bup Kudus ke ngasuh sida nyeliah ari darah sereta pengawa ti bekaul enggau bala melikat ti jai. (SKR. 15:20; Gal. 5:19, 20) Kelimpah ari utai ti dipadah dalam Bup Kudus, sida ulih milih kediri empu ni bagi chara berubat ke deka diterima sida. Sekeda bala menyadi semina nerima rawatan ari bala lutur sereta ba sepital aja. Tang bisi mega bala menyadi ti deka nerima chara berubat ke bukai. Kitai empu engka amat yakin pasal sesiti chara berubat ke engka ulih nulung tauka ngemediska pengerai kitai. Taja pia, bala menyadi Kristian kitai bisi hak ngaga pemutus kediri empu pasal chara berubat ti deka diterima sida. Kitai patut bebasaka hak sida. Nya alai, kitai patut ingatka empat iti pekara tu: (1) Semina Perintah Petara aja ke ulih nyumanka semua bansa penyakit sereta meri kitai pengerai ti sempurna. (Isa. 33:24) (2) Lebuh ngaga pemutus bekaul enggau pengerai diri empu, tiap iku orang Kristian “patut amat andalka” utai ti pemadu manah ke pengerai iya empu. (Bacha Rome 14:5.) (3) Kitai enda ngakim pemutus ke digaga orang bukai sereta kitai enggai ngereja sebarang utai ke ngasuh sida labuh ba pengarap. (Rom. 14:13) (4) Orang Kristian ngayanka pengerindu lalu sida faham penyerakup ba raban gempuru penting agi ari runding diri empu. (Rom. 14:15, 19, 20) Enti kitai mengkang ingatka empat iti pekara tu, kitai deka ngembuan kaul ti rapat enggau bala menyadi Kristian kitai, lalu ngetanka penyerakup ba raban gempuru.

16. Baka ni siku tuai gempuru ulih ngayanka diri ngembuan runding ti masuk akal lebuh begulai enggau bala tuai gempuru ke bukai? (Peda mega gambar.)

¹⁶ Bala tuai gempuru patut netapka teladan ti manah bekaul enggau ngayanka runding ti masuk akal. (1 Tim. 3:2, 3) Ambika chunto, siku tuai gempuru enda patut ngarapka runding iya seruran diterima semina ketegal iya tuai agi ari bala tuai gempuru ke bukai. Iya sedar kuasa kudus Jehovah ulih ngasuh sapa-sapa aja ke bisi dalam raban tuai gempuru nyebut utai ti deka nulung sida ngaga pemutus ti manah. Lalu enti mayuh ari bala tuai gempuru nya setuju enggau sesiti pemutus ti enda ngelanggar prinsip Bup Kudus, siku tuai gempuru ti ngembuan runding ti masuk akal deka nyukung pemutus nya taja pan iya ngembuan runding ti bebida.

PENGUNTUNG ENTI NGEMBUAN RUNDING TI MASUK AKAL

17. Nama penguntung ke deka diulih enti kitai bisi runding ti masuk akal?

¹⁷ Orang Kristian deka bulih mayuh penguntung enti sida ngembuan runding ti masuk akal. Kitai deka ngembuan kaul ti manah agi enggau bala menyadi Kristian kitai, lalu raban gempuru deka bisi pengelantang. Kitai rinduka personaliti enggau adat ti bebida ke bisi ba nembiak Jehovah. Lalu kitai mega gaga ati laban kitai nemu, taja pan semua kitai bebida tang kitai ulih beserakup nyembah Jehovah. Lalu ke pemadu penting, kitai gaga ati laban nemu, kitai benung neladan Petara kitai Jehovah ke mega ngembuan runding ti masuk akal.