Semaya Jehovah pasal Paradais Endang Deka Nyadi

1. Nama pesan ke diberi Nabi Isaiah ngagai orang Israel?

NABI Isaiah madahka, Jehovah nya ‘Petara ti tetap ati’ tauka Petara pemendar. Leka jaku “pemendar” mai reti “amin.” (Isa. 65:16) “Amin” mai reti “awakka baka nya,” tauka “tentu.” Dalam Bup Kudus, lebuh leka jaku “amin” dikena bekaul enggau Jehovah tauka Jesus, tu siti gerenti ke nunjukka utai ti dipadah seduai iya endang amat. Nyadi, pesan Isaiah ngagai orang Israel endang terang: Lebuh Jehovah madahka sesiti utai, utai nya seruran deka nyadi. Au, Jehovah seruran ngamatka semaya Iya.

2. Nama kebuah kitai ulih pechayaka semaya Jehovah pasal jemah ila, lalu nama tanya ke deka dikerandauka kitai?

² Kemayaharitu, kati kitai agi ulih pechayaka semaya Jehovah pasal jemah ila? Kira-kira 800 taun pengudah jeman Isaiah, Rasul Paul nerangka kebuah semaya Jehovah seruran ulih dipechaya. Iya madahka: “Petara enda ulih bula.” (Heb. 6:18) Perundingka tu: Siti mata ai ke mansutka ai tawar enda ulih mansutka ai masin mega. Baka nya mega, ketegal Jehovah pun pemendar, Iya enda ulih bula. Nya kebuah kitai ulih pechayaka semua utai ke dipadah Jehovah, nyengkaum semua semaya Iya pasal jemah ila. Dalam artikel tu, kitai deka berandauka tanya tu: Nama semaya Jehovah ke kitai ke jemah ila, lalu nama gerenti ke diberi Jehovah ke ngasuh kitai yakin semaya Iya endang deka nyadi?

NAMA SEMAYA KE UDAH DIGAGA JEHOVAH?

3. (a) Nama semaya ti amat dikerinduka bala nembiak Petara? (Pemandang 21:​3, 4) (b) Nama reaksi sekeda orang lebuh kitai bekunsika semaya tu enggau sida?

³ Kitai deka berandauka siti semaya ti amat dikerinduka bala nembiak Petara ba serata dunya. (Bacha Pemandang 21:​3, 4.) Jehovah besemaya, jemah ila “pemati deka nadai agi. Nadai agi balat tusah ati, nadai agi nyabak, nadai agi pedis.” Mayuh ari kitai bekunsika ayat tu kena ngelantangka ati orang lebuh nginjil. Kitai ngereja nya kena nulung sida nemu baka ni gaya pengidup ba dunya Paradais. Nama reaksi sekeda orang lebuh kitai bekunsika semaya tu enggau sida? Sida engka madah, “Manah semaya nya, tang tusah deka pechaya.”

4. (a) Lebuh Jehovah ngaga semaya pasal Paradais, nama utai ti ditemu Iya? (b) Kelimpah ari ngaga semaya, nama utai bukai ke digaga Jehovah?

⁴ Lebuh Jehovah ngasuh John nuliska semaya pasal Paradais, Iya nemu kitai deka bekunsika harapan tu enggau orang bukai lebuh nginjil pasal Perintah Petara. Jehovah mega nemu, mayuh orang tusah deka pechayaka semaya tu amat deka nyadi. (Isa. 42:9; 60:2; 2 Kor. 4:​3, 4) Nyadi, baka ni kitai ulih nulung orang bukai sereta diri empu yakin semaya ke dipadah ba Pemandang 21:​3, 4 endang deka nyadi? Jehovah ukai semina meri semaya ti manah, tang Iya mega meri kebuah kitai ulih pechayaka semaya nya endang deka nyadi. Nama sekeda kebuah ke diberi Iya?

JEHOVAH GERENTI SEMAYA IYA DEKA DIKEAMATKA

5. Nama ayat Bup Kudus ke ulih ngasuh kitai pechayaka semaya ari Petara? Nama dipadah ayat nya?

⁵ Ba ayat ke nangkanka nya, kitai tetemuka kebuah kitai ulih pechayaka semaya Jehovah pasal Paradais. Ayat nya madah: “Iya ke duduk ba kerusi diraja madahka: ‘Peda! Diatu Aku benung ngaga semua utai nyadi baru.’ Iya mega madahka: ‘Tuliska utai tu, laban jaku tu amat sereta tau dikearapka.’ Udah nya, Iya bejaku ngagai aku: ‘Semua utai nya udah nyadi. Aku meh Alfa enggau Omega. Aku meh pun enggau pengujung.’”—Pem. 21:​5, 6a.

6. Nama kebuah utai ti ditulis ba Pemandang 21:​5, 6 negapka pengarap kitai ngagai semaya Petara?

⁶ Nama kebuah ayat Bup Kudus tu negapka pengarap kitai ngagai semaya Petara? Dalam ayat tu, utai ti dikereja Jehovah ulih dibandingka enggau pengawa nyain siti dokumen. Lebuh Jehovah nyain dokumen nya, tu gerenti Iya deka ngamatka semaya nya.b Nyadi, semaya Petara bisi ditulis ba Pemandang 21:​3, 4. Lalu, ba ayat 5 enggau 6, kitai ulih tetemuka sain Jehovah. Ayat nya ngasuh kitai yakin Jehovah deka ngamatka semaya nya. Aram kitai beratika leka jaku ke dikena dalam ayat nya ke ngasuh kitai yakin kitai ulih arapka Iya.

7. Sapa berengkah bejaku ba ayat 5, lalu nama kebuah tu spesial?

⁷ Ayat 5 berengkah baka tu: “Iya ke duduk ba kerusi diraja madahka.” (Pem. 21:5a) Rambai jaku tu amat spesial, laban dalam bup Pemandang semina tiga kali aja Jehovah Empu bejaku, lalu tu siti ari iya. Gerenti tu ukai diberi siku melikat, indah ukai Jesus, tang Jehovah Empu ke meri gerenti tu! Tu nunjukka kitai ulih pechayaka utai ti deka dipadah Iya pengudah nya. Nama kebuah kitai ulih bejaku munyi nya? Laban Jehovah “endang enda nemu bula.” (Tit. 1:2) Nyadi, utai ke dibacha kitai ba Pemandang 21:​5, 6 endang ulih dikearapka.

“PEDA! DIATU AKU BENUNG NGAGA SEMUA UTAI NYADI BARU”

8. Nama utai ti dipadah Jehovah ke ngasuh kitai pechaya agi semaya Iya deka dikeamatka? (Isaiah 46:10)

⁸ Udah nya, Jehovah madahka “Peda!” (Pem. 21:5) Leka jaku Gerika ke mai reti “peda!” suah dikena dalam bup Pemandang. Siti rujukan madahka leka jaku tu dikena “ngambika pemacha beratika utai ti deka dipadah pengudah nya.” Nyadi, nama dipadah Petara pengudah nya? Iya madahka: “Diatu Aku benung ngaga semua utai nyadi baru.” Amat, Jehovah deka ngaga ubah tu jemah ila, tang Iya amat yakin Iya deka ngamatka semaya nya. Nya kebuah Iya nyebut utai nya baka ke Iya benung ngereja nya diatu.—Bacha Isaiah 46:10.

9. (a) Nama reti rambai jaku “ngaga semua utai nyadi baru”? (b) Nama deka nyadi ngagai “langit” enggau “dunya” ke bisi diatu?

⁹ Aram kitai beratika siti agi utai ke dipadah ba Pemandang 21:5. Dalam ayat nya, Jehovah mega madahka: “Diatu Aku benung ngaga semua utai nyadi baru.” Nama reti tu? Ba bagi tu, utai tu ditujuka ngagai dua iti utai ti deka dikereja Jehovah, iya nya nganti sereta ngaduka baru. Keterubah, nama deka diganti Jehovah? Ba Pemandang 21:​1, kitai macha: “Langit ti lama enggau dunya ti lama udah lenyau.” “Langit ti lama” merujuk ngagai perintah ba dunya ke di baruh kuasa Sitan enggau bala melikat iya ti jai. (Mat. 4:​8, 9; 1 Jhn. 5:19) Baka ke dikena dalam Bup Kudus, leka jaku “dunya” ulih merujuk ngagai orang ba dunya. (Mas. 96:1) Nyadi, “dunya ti lama” merujuk ngagai orang ti jai kemayaharitu. Jehovah enda ngemanahka agi “langit” enggau “dunya” ke bisi diatu, tang Iya deka ngerusak sida. Udah nya, Iya deka nganti sida enggau “langit ti baru enggau dunya ti baru.” Reti iya, bisi siti perintah ti baru ke deka merintah atas orang ti lurus.

10. Nama utai ti deka digaga Jehovah nyadi baru?

¹⁰ Udah nya, ba Pemandang 21:​5, kitai macha pasal utai ti dipadah Jehovah bekaul enggau utai ti deka digaga Iya nyadi baru. Peratika dalam ayat nya, Jehovah enda madah, “Diatu aku benung ngaga semua utai ti baru.” Tang, Iya madahka: “Diatu Aku benung ngaga semua utai nyadi baru.” Jehovah deka ngaduka baru bumi tu sereta ngeraika mensia ngambika semua sida nyadi sempurna. Baka ke dipadah Isaiah, Jehovah deka ngaduka baru bumi tu ngambika nyadi endur ti manah sama baka taman Eden. Lalu Jehovah deka ngasuh tiap iku kitai nyadi sempurna. Orang ke tachat, buta, enggau bengal deka digeraika, indah orang ke udah mati deka diangkatka idup baru.—Isa. 25:8; 35:​1-7.

“JAKU TU AMAT SERETA TAU DIKEARAPKA. . . . SEMUA UTAI NYA UDAH NYADI.”

11. Nama utai ke diasuh Jehovah kereja John, lalu nama kebuah?

¹¹ Nama utai bukai ke dipadah Petara ke ngasuh kitai ulih pechayaka Iya? Jehovah madah ngagai John: “Tuliska utai tu, laban jaku tu amat sereta tau dikearapka.” (Pem. 21:5) Jehovah ukai semina ngasuh John ‘nulis,’ tang Iya mega meri kebuah nya. Iya madah: “Laban jaku tu amat sereta tau dikearapka.” Reti nya, jaku Petara endang ulih dipechaya. Kitai amat beterima kasih laban John ngasika pesan Jehovah ke ngasuh iya ‘nulis.’ Asil iya, kitai ulih macha pasal semaya dunya Paradais ke diberi Petara, lalu belematika berekat ti manah ke deka diulih kitai.

12. Nama kebuah Jehovah ulih madah: “Semua utai nya udah nyadi”?

¹² Nama utai ke dipadah Petara pengudah nya? “Semua utai nya udah nyadi.” (Pem. 21:6) Nama kebuah Jehovah nyebut semaya nya baka ke semaya nya udah dikeamatka? Laban nadai utai ulih nagang Iya ari ngamatka tuju Iya. Udah nya, Jehovah nyebut siti agi utai ke ngasuh kitai yakin semaya Iya endang deka nyadi. Nama utai nya?

“AKU MEH ALFA ENGGAU OMEGA”

13. Nama kebuah Jehovah madahka: “Aku meh Alfa enggau Omega”?

¹³ Baka ke dipadah tadi, Jehovah Empu bejaku tiga kali ba utai ti dipandangka Iya dalam runding John. (Pem. 1:8; 21:​5, 6; 22:13) Tiap kali, Jehovah madahka utai ti sama: “Aku meh Alfa enggau Omega.” Alfa nya urup keterubah ba jaku Gerika lalu Omega nya urup ke penudi. Lebuh Jehovah madah “Aku meh Alfa enggau Omega,” Jehovah nulung kitai faham, enti Iya ngepunka sesiti utai, Iya tentu deka nembuka utai nya.

14. (a) Beri chunto ke nunjukka kemaya Jehovah baka ke nyebut “Alfa” enggau “Omega.” (b) Nama gerenti ke ditemu kitai ba Pemungkal 2:​1-3?

¹⁴ Lebuh Jehovah ngaga Adam enggau Awa, Iya madah ngagai seduai iya tuju Iya ke mensia enggau ke bumi. Bup Kudus madahka: “Petara lalu merekatka seduai iya. Ku Iya bejaku ngagai seduai iya: ‘Beranak betelesak, lalu ngemenuhka dunya. Bekuasa meh ba serata dunya.’” (P-kal. 1:28) Ba maya nya, Jehovah madahka tuju Iya ke bumi enggau ke mensia. Nya meh maya Jehovah baka ke nyebut “Alfa.” Tuju Jehovah deka dikeamatka lebuh peturun Adam seduai Awa ti lurus ngemenuhka bumi tu lalu bumi tu nyadi Paradais. Nya meh maya Jehovah baka ke nyebut “Omega.” Pengudah tembu “ngaga langit enggau dunya sereta semua utai ke ba dia,” Jehovah meri siti gerenti. Tu bisi ditulis ba Pemungkal 2:​1-3. (Bacha.) Jehovah madahka, hari ketujuh nya kudus. Nama reti tu? Tu nunjukka tuju Jehovah ke mensia enggau ke bumi deka dikeamatka magang ba ujung hari ketujuh.

15. Nama kebuah Sitan engka ngumbai diri udah mujur nagang Jehovah ari ngamatka tuju Iya?

¹⁵ Pengudah Adam seduai Awa angkat ngelaban Jehovah, seduai iya nyadi orang ti bedosa. Asil iya, dosa enggau pemati ngelekai ngagai semua peturun seduai iya. (Rom. 5:12) Ketegal nya, Sitan engka ngumbai diri udah mujur nagang Petara ari ngamatka tuju Iya ti deka ngemenuhka dunya tu enggau orang ti sempurna sereta ngasi. Kati diatu Sitan udah mujur nagang Jehovah ari nyebut “Omega”? Sitan engka berunding, Jehovah enda ulih ngamatka semaya Iya laban Jehovah nadai mayuh pilihan. Sitan engka ngumbai Jehovah deka munuh Adam seduai Awa lalu ngaga sepasang agi laki bini ti sempurna ke deka ngamatka tuju Iya ke mensia. Tang enti Petara ngereja nya, Sitan tentu nuduh Petara nya pemula. Nama kebuah? Laban baka ke ditulis ba Pemungkal 1:​28, Jehovah udah madah ngagai Adam seduai Awa, peturun seduai iya nya meh ti deka ngemenuhka dunya.

16. Nama kebuah Sitan engka ngumbai diri ulih nuduh Jehovah enda ulih ngamatka semaya Iya?

¹⁶ Sitan engka ngumbai Petara bisi siti agi pilihan. Sitan engka ngumbai Jehovah deka nejuka Adam seduai Awa bisi peturun tang peturun seduai iya enda ulih nyadi sempurna. (P-jar. 7:20; Rom. 3:23) Lalu enti peturun Adam seduai Awa enda ulih nyadi sempurna, Sitan tentu ngumbai Jehovah enda ulih ngamatka tuju Iya. Tuju Jehovah ti deka ngemenuhka dunya tu enggau mensia ti sempurna udah puntan.

17. Nama digaga Jehovah kena ngamatka semaya Iya taja pan Sitan enggau Adam seduai Awa angkat ngelaban Iya? Nama asil iya? (Peda mega gambar.)

¹⁷ Sitan tentu enda nyangka utai ti deka dikereja Jehovah. Jehovah bisi chara ti pemadu manah kena ngamatka semaya Iya taja pan Sitan enggau Adam seduai Awa angkat ngelaban Iya. (Mas. 92:5) Jehovah nejuka Adam seduai Awa bisi anak. Enggau nya, utai ke dipadah Jehovah dikeamatka. Iya ukai pemula. Jehovah mega nentuka tuju Iya ulih dikeamatka lebuh Iya nyediaka siku “peturun” ti deka nyelamatka peturun Adam seduai Awa ti ngasi. (P-kal. 3:15; 22:18) Chara tu nunjukka, enti Jehovah udah madahka Diri deka ngereja sesiti utai, nadai utai ulih nagang Iya. Sitan tentu tekenyit enggau atur tebus ke digaga Jehovah. Nama kebuah? Laban atur tu bepelasarka pengerindu ti enda berundingka diri empu. (Mat. 20:28; Jhn. 3:16) Sitan nadai sifat tu laban iya seruran berundingka diri empu aja. Nyadi, nama deka nyadi ketegal bisi atur tebus? Ba pengujung Seribu Taun Kristus Merintah, peturun Adam seduai Awa ti sempurna sereta ngasi deka diau ba dunya Paradais. Nya meh tuju asal Jehovah. Maya nya, kitai baka ke ninga Jehovah nyebut “Omega.”

CHARA NEGAPKA PENGARAP KITAI NGAGAI SEMAYA JEHOVAH PASAL PARADAIS

18. Nama tiga iti utai ke ngasuh kitai pechaya semaya Petara deka nyadi? (Peda mega kutak “Tiga Iti Kebuah Kitai Ulih Arapka Semaya Jehovah.”)

¹⁸ Dalam artikel tu, kitai udah berandauka kebuah kitai ulih yakin dunya tu deka nyadi Paradais. Baka ni kitai deka nulung orang bukai yakin utai tu amat deka nyadi? Kesatu, Jehovah Empu ke ngaga semaya nya. Bup Pemandang madahka: “Iya ke duduk ba kerusi diraja madahka: ‘Peda! Diatu Aku benung ngaga semua utai nyadi baru.’” Jehovah bisi penemu-dalam, kuasa, enggau pengingin deka ngamatka semaya nya. Kedua, Jehovah nemu utai ti dipadah Iya tentu deka nyadi. Nya kebuah Iya madah: “Jaku tu amat sereta tau dikearapka. . . . Semua utai nya udah nyadi.” Ketiga, lebuh Jehovah ngepunka sesiti utai, Iya tentu deka nembuka pengawa nya. Nya kebuah Iya madah: “Aku meh Alfa enggau Omega.” Jehovah deka nunjukka Sitan nya pemula lalu enda ulih nagang Iya ari ngamatka semaya Iya.

19. Lebuh orang kakang ati enggau semaya Petara pasal Paradais, nama ulih dikereja nuan?

¹⁹ Kitai engka bekunsika semaya ti ngelantangka ati pasal dunya Paradais ba Pemandang 21:4. Tang enti orang madah, “Manah semaya nya, tang tusah deka pechaya,” nama ulih dikereja nuan? Nuan ulih macha sereta nerangka ayat 5 enggau 6 ngagai sida. Tunjukka chara Jehovah udah meri gerenti Iya deka ngamatka semaya nya, baka ke Iya udah nyain siti dokumen. (Isa. 65:16) Kingatka meh, tiap kali nuan bekunsika gerenti ke diberi Petara ngagai orang ke ditemu nuan ba pengawa nginjil, nuan negapka agi pengarap nuan empu ngagai semaya Jehovah.