Alɔ I Yɔ Foofu Alɔ Ŋ

1-2. (a) Ɔdiya nɛ alɔ lɔfu ka ka alɔ i gē yɔ foofu alɔ eko duuma nɛ alɔ yɔ i má unwalu ŋ ma? (b) Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

EKO duuma nɛ alɔ yɔ i má unwalu nōo lɔnɔ nɛhi, ɔtu lɔfu ya alɔ bɛɛka alɔ yɔ foofu alɔ ipu upu nōo tuufi nɛhi nɛ alɔ i jé ɔwɛ ō bɛɛcɛ ŋ ma. Amáŋ, alɔ i gē yɔ foofu alɔ eko duuma nɛ alɔ yɔ i má unwalu ŋ. Ujehofa Adā alɔ nōo yɔ ɔkpanco nōo lɛ ihɔtu a jé lɛyikwu unwalu nɛ alɔ gē má a, ó kē cokonu ō ta alɔ abɔ. O bu ipu ihɔtu, Ujehofa cokonu lɛ alɔ kahinii: “N géē . . . tá uwɔ abɔ̄.”—Ayis. 41:10.

² Ipu ikpɛyi ɛlā nyā, alɔ géē kɛla lɛyikwu ɛgɛ nɛ Ujehofa gē ta alɔ abɔ (1) ŋma lɛ ō ma ɔwɛ fu lɛ alɔ, (2) ŋma lɛ ō ya ɛgbá ku alɔ lɛ alɔ, (3) ŋma lɛ ō je ogbotu lɛ alɔ, mla (4) ŋma lɛ ō je ɔtu ō tu lé lɛ alɔ. Ujehofa cɛ lɛ alɔ jé kpɔcii ka ɛgɛ duuma nɛ unwalu nɛ alɔ yɔ i má ipu oyeeyi a kóō lɛ a, ó gáā mlanyi alɔ gboogboo ŋ. Ó gáā cigbihi kwu alɔ gboogboo ŋ. Ohigbu ɛnyā, alɔ i yɔ foofu alɔ ŋ.

UJEHOFA GĒ MA ƆWƐ FU LƐ ALƆ

3-4. Ɛgɛnyá nɛ Ujehofa gē ma ɔwɛ fu lɛ alɔ a? (Aíjē Kú Ɛ̄gbā 48:14)

³ Jé Aíjē Kú Ɛ̄gbā 48:14. Ujehofa jé ka alɔ i gáā lɔfu bi iyi alɔ jé ɔwɛ gla ŋ, ka alɔ cɛgbá nu o ya ɛɛ kóō ma ɔwɛ fu lɛ alɔ. Ɛgɛnyá nɛ ó gē ma ɔwɛ fu lɛ ācɛ nōo gē gba ɔ ɛ̄gbā kpaakpa icɛ a? Ɔwɛ éyi nɛ ó gē bi le ya ɛnyā a wɛ o bu ipu Ubáyíbu. (Aíjē 119:105) Ujehofa gē bi Ubáyíbu le nwu alɔ ɛgɛ nɛ alɔ lɔfu ya aōmiya olɔhi, mla ō gbla ɔ ya ɔwɛ nɛ alɔ gē ya uce lɛ mla ɔwɛ nɛ alɔ gē gbɛla a. Ɔdaŋ ka alɔ lɛyitaajɛ lɛ aɛlā nɛ ó gē nwu alɔ ŋma ipu Ubáyíbu a, alɔ géē lā oyeeyi nōo lɛ eeye fiyɛ duu babanya mla eyiyoce ō lā oyeeyi opiyoo ɛcɔbu.a Ocabɔ mafu, ó gē nwu alɔ ō je ya ācɛ ɔhá ɛhi mla ō gɔbu yɔ i cɔnu mla uwa ŋ, ō ka ɔkwɛyi ipu ɛjɛɛji ɔdā doodu nɛ alɔ gē ya a, mla ō lɛ ihɔtu olɔfu lɛ ācɛ ɔhá ŋma ipu ɔtu ku alɔ. (Aíjē 37:8; Uhíb. 13:18; 1 Upít. 1:22) Ɔdaŋ ka alɔ mafu ɛdɔ ku auce ō ya nyā, alɔ géē wɛ ɛ́nɛ́ amāŋ adā olɔhi, obiye olɔhi, mla ɔkpa olɔhi.

⁴ Ipu Ubáyíbu, Ujehofa da alɔ lɛyikwu aɔ̄kā ku ācɛ nōo lɛ unwalu nɛ ɔtu klla ya uwa bɛɛka alɔ a. (1 Ukɔ́r. 10:13; Ujɛ́m. 5:17) Eko duuma nɛ alɔ jé ɔ̄kā ku oyeeyi ku ācɛ nyā klla bi aɛlā ō nwu a le yuklɔ, alɔ gē lɛ itene ɔwɛ ɛpa. Aflɛyi, alɔ gē wa i jé ka ó wɛ alɔ foofunu gē má unwalu ipu oyeeyi a ŋ. Ācɛ ɔhá má ɛdɔ unwalu ekponu ɔɔma gbɔbu duu ɛ, ó kē le tɔɔtɛ lɛ uwa ō lé ɔtu ku aunwalu néē lɛ a mla otabɔ ku Ujehofa. (1 Upít. 5:9) Ɔmpa, alɔ gē nwu ɛlā nōo lɔfu ta alɔ abɔ ō lé ɔtu ku aunwalu nɛ alɔ gē má a mla ō lɛ abɔ bi eeye ku alɔ.—Uróm 15:4.

5. Anyɛ nɛ Ujehofa gē bi le ma ɔwɛ fu lɛ alɔ a?

⁵ Ujehofa klla gē bi ayinɛ alɔ le má ɔwɛ fu lɛ alɔ.b Ocabɔ mafu, ācɛ o leyi kwu usɛkut gē jila aujɔ má ŋma eko teeko o ya ɛɛ kéē ta alɔ ɔtu kwu ɔtu. Aɛlā ō ka tɛɛcɛ ku uwa gē lɛ ɔfu tu ɔtu okpoce ku alɔ iyē klla gē ta alɔ abɔ ō gɔbu piyatɔha. (Ācot. 15:40–16:5) Anyakwɔcɛ ku ujɔ gē yuklɔ lɔfu lɔfu ō ta eyeeye ku alɔ abɔ o ya ɛɛ ku alɔ yɔ kwu Ujehofa ajaajɛ duu. (1 Upít. 5:​2, 3) Aɛ́nɛ́ mla aadā gē nwu ayipɛ ɔlɛ uwa kéē yihɔtu ku Ujehofa, mla ɛgɛ néē géē ya ōmiya ku ijeeyi mla ō lɛ auce ō ya olɔhi. (Aíit. 22:6) Ayinɛ alɔ nɔnya nōo wɛ Ācɛ O Yɛce Ukraist nōo jikoko ipu ɛlā ku Ɔwɔico gē ta ayinɛ nɔnya nōo wɛ ɛdrɔ a abɔ ŋma lɛ ō lɛ ɛnɛɛnɛ ocabɔ taajɛ lɛ uwa, ō tu uwa aukɔ́ ocɛgbá, mla ō ta uwa ɔtu kwu ɔtu ɔwɛ ogbonɛnɛ.—Utáy. 2:​3-5.

6. Ɔdi nɛ alɔ lɔfu ya o ya ɛɛ ku alɔ lɛ itene ŋma ɔwɛ nɛ Ujehofa gē mafu lɛ alɔ a?

⁶ Ujehofa je ɛjɛɛji aɔdā nɛ alɔ cɛgbá a lɛ alɔ o ya ɛɛ ku alɔ ya ōmiya olɔhi mla o ya ɛɛ ku alɔ lɛ eeye. Ɛgɛnyá nɛ alɔ lɔfu mafu ka ɛjɛɛji aɔdā nɛ ó ya lɛ alɔ ɛ ma jɛ alɔ eyī nɛhi a? Ɔkpá ku Aíita 3:​5, 6 kahinii: “Bī odúúdú ɔtū kú uwɔ lɔtūce Óndú ā. Ā híī gboló ce ɔdā nāa gbɛlá ka anúɔ jé ā ŋ́.” Ɔdaŋ ka alɔ ya lɛ a, ‘ó géē ma ɔwɛ okpaakpa a fu lɛ alɔ.’ Ɔɔma wɛ ka ó géē ta alɔ abɔ ō kwu ŋma aunwalu alɛwa mla ō jɔɔnyɛ oyeeyi nɛ alɔ géē lɛ eeye nɛhi. Ó jɛ alɔ eyī nɛhi ka Ujehofa jé alɔ lɔɔlɔhi klla yihɔtu alɔ nɛɛnɛhi, nōo ya nɛ ó gē tu alɔ ɛnɛɛnɛ ukɔ́ nɛ alɔ cɛgbá eko doodu a!—Aíjē 32:8.

UJEHOFA GĒ YA ƐGBÁ KU ALƆ LƐ ALƆ

7. Ɛgɛnyá nɛ Ujehofa gē bi le ya ɛgbá ku alɔ lɛ alɔ a? (Ācɛ Ufílipāyi 4:19)

⁷ Jé Ācɛ Ufílipāyi 4:19. Ba tu ō bi alɔ jé ɔwɛ ō lɛ ɔdole ku Ɛlā ku Ɔwɔico, Ujehofa klla gē je otabɔ lɛ alɔ abɔ alɔ gē yuklɔ lɔfu lɔfu ō lɛ ɔdole mla ili nɛ alɔ cɛgbá, mla ɛga nɛ alɔ géē lā a. (Umát. 6:33; 2 Utes. 3:12) Ó wɛ ɔdā ɔlamu ku alɔ lɛ ɔtooplico lɛyikwu ɛgɛ nɛ alɔ géē lɛ aɔdā nōo ba nyā. Amáŋ Ujehofa i dɔka ku alɔ lɛ ɔtooplico fiyɛ ɔfu lɛyikwu aɔdā nōo ba nyā ŋ. (Umát. 6:25) Ɔdiya a? Ohigbu ka Adā alɔ i gáā cigbihi kwu ācɛ nōo gē gba ɔ ɛ̄gbā kpaakpa a eko nɛ ɛgbá ce uwa ŋ. (Umát. 6:8; Uhíb. 13:5) Alɔ lɔfu lɛ ɔtu ce ɔ duudu abɔ ó ka ka ó géē ya aɔdā nōo wɛ ɛgbá ku alɔ lɛ alɔ a.

8. Ɔdi nɛ Ujehofa ya lɛ Udefidi a?

⁸ Gbɛla lɛyikwu ɛgɛ nɛ Ujehofa je otabɔ lɛ Udefidi a. Ɛpleeko olɔnɔ nɛhi ipu oyeeyi ku nu nɛ Udefidi yɔ i kwu ŋma ɛgiyi Usɔlu nōo wɛ Ɔcɛ́ a, Ujehofa je ɔdā nɛ Udefidi mla acocɛhɔ ku nu cɛgbá o ya ɛɛ kéē yeeyi a lɛ uwa. Eko nɛ Udefidi gbɛla lɛyikwu ɛgɛ nɛ Ujehofa teyi kwu ɔ ɛpleeko ɔɔma a, ó kahinii: “N le gbo ɔnyākwɔ́cɛ klla kwú hīla ɛɛ́, amáŋ ń má ɔ̄cɛ okpaakpa dúúmā nɛ̄ Óndú ā kwú ɛlá nū ú gwū jéjée ɛ́ɛ́ ŋ́.” (Aíjē 37:25) Bɛɛka Udefidi a, á jé ŋ, awɔ abɔyi uwɔ lɔfu má ɛgɛ nɛ Ujehofa o bu ɔwɛ ku ihɔtu teyi kwu uwɔ mla ayinɛ uwɔ ɛpleeko ku unwalu a ɛ.

9. Ɛgɛnyá nɛ Ujehofa gē ya ɛgbá ku ācɛ ɔlɛ nu icɛ eko nɛ ɔdā amiya le ya a? (Má ifoto a.)

⁹ Ujehofa klla gē ya ɛgbá ku ācɛ ɔlɛ nu eko nɛ ɔdā amiya le ya. Ocabɔ mafu, eko nɛ ɔkpɛta yɔ i ŋmo nɛɛnɛhi ipu Ujerusalɛm eko ku Ācɛ O Yɛce Ukraist ku eko aflɛyi a, ayinɛ uwa nōo yɔ ɛga ɔhá a tu aɔdā néē cɛgbá a ɛhɔ gē lɛ uwa. (Ācot. 11:​27-30; Uróm 15:​25, 26) Ācɛ ɔlɛ Ɔwɔico icɛ gē je otabɔ lɛ ayinɛ uwa eko nɛ ɛgbá ce uwa a duu. Eko duuma nɛ amiya nōo gē ya abɔyi uwa a le ya, Ujehofa o bu ipu ihɔtu gē lɛ abɔ kwu ācɛ ɔlɛ nu ɔtu ō je aɔdā ocɛgbá bɛɛka ɔdole, eŋkpɔ, ili, mla ɛcí gē lɛ ayinɛ alɔ nōo lā ɛga nɛ ɔdā amiya nyā ya a. Ígwu ku ayinɛ alɔ nōo gē yuklɔ ku ɔlɛ ō gwo a gē tabɔ ō gla aɔlɛ mla Aagbla Ku Ajɔɔcɛ nōo le biya a ya. Ācɛ ɔlɛ Ujehofa i kē i kpo eko bonu ō je ɔtu ō tu lé mla ɔtu ō tu kwu ɔtu ŋma ipu Ubáyíbu lɛ ācɛ nɛ ɔlɛ uwa mla ācɛ néē yihɔtu ku uwa a hɛ uwa abɔ a ŋ.c

10-11. Ɛlā nyá nɛ a nwu ŋma ɔ̄kā ku Borys a?

¹⁰ Ujehofa klla gē nwula abɔ ō ya ɛgbá ku ācɛ nōó gē gba ɔ ɛ̄gbā babanya ɛ ŋ ma. Ɔwɛ ekponu ɔɔma, alɔ gē gbla Ujehofa ya ŋma lɛ ō dɔka ɔwɛ ɛyɛɛyɛyi nɛ alɔ lɔfu mafu uce ogbonɛnɛ lɛ ācɛ nōó gē gba ɔ ɛ̄gbā ŋ ma. (Ugal. 6:10) Eko duuma nɛ alɔ ya lɛ a, ó lɔfu tɔɔtɛ lɛ alɔ ō ta uwa abɔ kéē nwu ɛlā fiyɛ lɛyikwu alɔ mla Ujehofa. Leyi yɛ ɔ̄kā ku Borys, otrɛyi ku inɔkpa éyi nōo lā ipu Ukraine a. Naana nɛ u Borys i wɛ éyi ku Ācɛ Ocijali Ku Ujehofa ŋ ma, ó gē ya ɛlā ɔwɛ ogbonɛnɛ mla ayipɛ inɔkpa ku nu nōo wɛ Ācɛ Ocijali Ku Ujehofa a eko doodu klla gē mafu ojilima lɛ ɔdā néē kpɔtuce a. Ohigbu ɛfú néē yɔ i kpo a, ó le miya ō le kwu ŋma ipɔlɛ nɛ ó lā a gā ɛga nōo lɛ ogbotu fiyɛ ipu éwo ɔɔma, ayinɛ alɔ kē ta ɔ abɔ nɛhi. Igbihaajɛ, Borys gā Oblatu Ku Ikwū Ku Ujisɔsi Ukraist. Eko nɛ ó yɔ i gbɛla lɛyikwu ɛjɛɛji ɔdā nɛ ayinɛ a ya lɛ ɔ a, Borys kahinii: “Ācɛ Ocijali Ku Ujehofa a gbonɛnɛ gā um nɛɛnɛhi klla teyi kwu um lɔɔlɔhi. N ta Ācɛ Ocijali Ku Ujehofa a ahinya nɛɛnɛhi.”

¹¹ Alɔ abɔyi alɔ lɔfu ya ɛgbla ku Adā alɔ nōo yɔ ɔkpanco nōo gē menyinyi nɛhi a, ŋma lɛ ō mafu ihɔtu lɛ ācɛ nɛ ɛgbá ce uwa a ɔdaŋ néē gē gba Ujehofa ɛ̄gbā amāŋ néē kóō gē gba ɔ ɛ̄gbā ŋ. (Ulúk. 6:​31, 36) Alɔ leyice ka ihɔtu nɛ alɔ gē mafu lɛ uwa a géē lɛ abɔ kwu uwa ɔtu kéē dɔka ō nwu ɛlā fiyɛ lɛyikwu Ujehofa mla ō gbɔɔ ō gba ɔ ɛ̄gbā tɔha mla alɔ. (1 Upít. 2:12) Amáŋ ɔdaŋ néē miya ō gba Ujehofa ɛ̄gbā amāŋ ka é ta ō gba ɔ ɛ̄gbā, alɔ géē lɛ eeye ohigbu ka “aɔ́dā olɔhi [amāŋ eeye gē] yɔ̄ lɛ ɔ̄cɛ nōo gē je ā.”—Ācot. 20:35.

UJEHOFA GĒ JE OGBOTU LƐ ALƆ

12. Ogbotu nyá nɛ Ujehofa cokonu ō je lɛ ɛjɛɛji ācɛ ɔlɛ nu a? (Aíjē Kú Ɛ̄gbā 91:​1, 2, 14)

¹² Jé Aíjē Kú Ɛ̄gbā 91:​1, 2, 14. Icɛ, Ujehofa cokonu ō je ogbotu lɛ ācɛ ɔlɛ nu ŋma ɛgiyi ɔdā duuma nōo lɔfu biya ɛma néē lɛ mɛmla ɔ a. Ó gáā jɛga lɛ Usetan kóō ci ācɛ ɔlɛ nu ŋma ō gba ɔ ɛ̄gbā ɔwɛ nɛ ó dɔka a gboogboo ŋ. (Ujɔ́n. 17:15) Ɛpleeko ku “ákanya nɛ̄hi ā,” alɔ lɔfu lɛ ɔtu ce lɔfu lɔfu ka Ujehofa géē ya okonu nɛ ó ce a jila, ō ta alɔ abɔ ō ya ku ɔtu okpoce ku alɔ kóō yɔ lɛ ɔfu mla ō nya alɔ ta.—Mafú 7:​9, 14.

13. Ɛgɛnyá nɛ Ujehofa gē je ogbotu lɛ eyeeye ku alɔ a?

¹³ Ɛgɛnyá nɛ Ujehofa gē je ogbotu lɛ eyeeye ku alɔ a? Ujehofa je Ubáyíbu lɛ alɔ o ya ɛɛ ku alɔ lɔfu jé ɔdā olɔhi mla ɔdobɔbi. (Uhíb. 5:14) Eko duuma nɛ alɔ bi ɛlā nɛ alɔ nwu ŋma ipu Ubáyíbu a le yuklɔ, alɔ gē gbo ɛma nɛ alɔ lɛ mɛmla ɔ a klla gē ya ōmiya nōo gē ta alɔ abɔ ō lɛ eeye fiyɛ ipu oyeeyi, mla ō lā oyeeyi nɛ alɔ géē lɛ ɔbɔla ku ɔkpiye lɔɔlɔhi. (Aíjē 91:4) O ka tu ɔ, Ujehofa klla je aujɔ ɛyɛɛyɛyi lɛ alɔ nōo gē je otabɔ nɛ alɔ cɛgbá a lɛ alɔ o ya ɛɛ ku alɔ gɔbu hayi kpaakpa lɛ ɔ a. (Ayis. 32:​1, 2) Ayinɛ alɔ nōo yɔ ipu ujɔ a yihɔtu ku Ujehofa nɛɛnɛhi klla gē lɛyitaajɛ lɛ ɔ. Ō yɔ tɔha mla uwa ipu ōjila ku ujɔ, ipu uklɔ ku ɔna ō ta, mla eko nɛ alɔ piyatɔha o ya ɛɛ ku alɔ jɔɔnyɛ iyi alɔ, gē je ɔtu ō tu kwu ɔtu lɛ alɔ klla gē ta alɔ abɔ o ya ɛɛ ku alɔ kwu ŋma ō ya ɔdobɔbi.—Aíit. 13:20.

14. (a) Ɔdiya nɛ Ɔwɔico i gē gbo alɔ ŋma ɛjɛɛji unwalu nɛ alɔ gē má a ŋ ma? (b) Ɔtu ō tu kwu ɔtu nyá nɛ ɔkpá ku Aíjē Kú Ɛ̄gbā 9:10 je lɛ alɔ a? (Má ɛlā néē ta ɛhaajɛ ku upeji a.)

¹⁴ Eko ikee, ekoohi Ujehofa gē je ogbotu lɛ ācɛ ɔlɛ nu ka é hii ya uwa agbe amāŋ ō ŋmo uwa ŋ. Amáŋ, ó gē ya ɛnyā eko doodu ŋ. Ubáyíbu nwu alɔ ka ɔcɛ duuma lɔfu má iyi nu ipu āhɔ̄ olɔnɔ gla. (Ɔ̄cok. 9:11) O ka tu ɔ, Ujehofa jɛga lɛ ōhī ku ācɛ nōo gē gba ɔ ɛ̄gbā a kéē má o ya ŋmo ka é klla ŋmo ōhī ku uwa, o ya ɛɛ kóō mafu ka Usetan wɛ ɔcɛ o kɛmgbɛ. (Ujób. 2:​4-6; Umát. 23:34) Ɔdā ekponu ɔɔma gē ya da alɔ icɛ duu. Naana nɛ Ujehofa i gáā lɔfu fu unwalu nɛ alɔ gē má a ŋ ma, alɔ lɔfu lɛ ɔtu ce lɔfu lɔfu ka ó gáā cigbihi kwu ācɛ nōo yihɔtu ku nu a gboogboo ŋ.d—Aíjē 9:10.

UJEHOFA GĒ TU ALƆ ƆTU LÉ

15. Ɛgɛnyá nɛ alɔ gē lɛ ɔtu ō tu lé o bu ipu ɔkɔ ō gba, Ɛlā ku Ɔwɔico, mla o bu ipu ayinɛ alɔ nōo yɔ ipu ujɔ a? (2 Ācɛ Ukɔ́rīnti 1:​3, 4)

¹⁵ Jé 2 Ācɛ Ukɔ́rīnti 1:​3, 4. Ekoohi alɔ gē má ɔtu nobi, gē lɛ ɔtooplico, amāŋ gē jé ɔnɔ. Á jé ŋ, a lɔfu yɔ i má āhɔ̄ olɔnɔ nɛhi éyi babanya nōo gē ya ku ɔtu kóō ya uwɔ bɛɛka a yɔ foofu uwɔ a. Ó lɛ ɔcɛ duuma nōo jɛyi ku ɛgɛ nɛ ɔtu yɔ i ya uwɔ lɛ a? Ii, Ujehofa jé. Ɔnɔ nɛ alɔ gē jé a i gē kwu ɔ iyē tu ɔ lɛ alɔ foofunu ŋ, amáŋ ó klla “gē tú alɔ ɔtūlé ipú odúúdú unwalu kú alɔ” a. Ɛgɛnyá a? Eko duuma nɛ alɔ ka ɔtu ku alɔ ipu ɔkɔ ō gba lɛ Ujehofa, ó gē je “ɛbɔ́ kú nū nōó tōō jɛ́ɛyí nū ŋ́ mā” lɛ alɔ. (Ufíl. 4:​6, 7) Alɔ klla gē lɛ ɔtu ō tu lé eko duuma nɛ alɔ yɔ i jé aɛlā nɛ Ujehofa gē ka lɛ alɔ ipu Ubáyíbu a. Ipu Ubáyíbu, Ujehofa da alɔ lɛyikwu ɛgɛ nɛ ó yihɔtu alɔ nɛɛnɛhi lɛ a, ó gē nwu alɔ ɛgɛ nɛ alɔ lɔfu jeeyi, ó klla je eyiyoce lɛ alɔ. Alɔ klla gē miyɛ ɔtu ō tu lé ipu ōjila ku ujɔ ku alɔ ɛga nɛ alɔ gē nwu aɛlā ō ta ɔtu kwu ɔtu alɛwa ŋma ipu Ubáyíbu, mla ɛga nɛ alɔ klla gē yɔ mla ayinɛ alɔ nōo yihɔtu alɔ nɛhi a.

16. Ɛlā nyá nɛ a nwu ŋma ɔ̄kā ku Nathan mla u Priscilla a?

¹⁶ Alɔ lɔfu má ɛgɛ nɛ Ujehofa gē je ɔtu ō tu lé mla ɔtu ō tu kwu ɔtu lɛ alɔ ŋma ipu Ubáyíbu a, ŋma ipu ɔ̄kā ku Nathan mla u Priscilla néē lā ipu United States a. Ihayi ōhī nōo gáā yɛ a, é le miya ō gā ɛga nɛ ɛgbá ku ācɛ o tɔɔna Ɛlā Ɔwɔico yɔ fiyɛ a. Nathan kahinii: “Alɔ kpɔtuce lɔfu lɔfu ka Ujehofa géē ya ku odee kóō nyɔ lɔɔlɔhi lɛ alɔ.” Amáŋ igbihi néē faajɛ ɛga ɛpɛpɛ néē gáā yuklɔ a, é gbɔɔ ō má unwalu ku ōcē néē leyice ŋ klla gbɔɔ ō lɛ unwalu ku ije duu. Igbihaajɛ, ɔba mla ɔnyā nyā le cigbihi gā ɔlɛ ɛga néē klla yɔ i lɛ unwalu ku ije kpɔ a. Nathan kahinii: “N gbɔɔ ō gbɛla ka ɔdiya ɛɛ nɛ Ujehofa i ta alɔ abɔ ɛgɛ nɛ alɔ gbɛla ka ó géē ta alɔ abɔ a ŋ ma. N kóō gbɛla duu ɔdaŋ ka um lɛ ɔdobɔbi éyi ya ɛ.” Amáŋ abɔ eko yɔ i nyɔ a, Nathan mla u Priscilla gáā le má ka Ɔwɔico i cigbihi kwu uwa eko nɛ ɛgbá ce uwa a ŋ. Nathan kahinii: “Ɛpleeko nɛ alɔ yɔ ipu āhɔ̄ olɔnɔ nɛhi ɔɔma a, Ubáyíbu gáā lɛbɛɛka ɔkpa ku alɔ nōo jijeeyi nōo gē je ɔtu ō tu kwu ɔtu lɛ alɔ nōo klla gē ma ɔwɛ fu lɛ alɔ a. Ō lɛ ɔtu ku alɔ kwu ɛgɛ nɛ Ujehofa je otabɔ lɛ alɔ ō lé ɔtu aunwalu nɛ alɔ lɛ ikɔkɔ ō lɛ ɔtu ku alɔ kwu aunwalu ɔɔma a, ta alɔ abɔ ō jé kpɔcii ka Ujehofa géē gɔbu yɔ i ta alɔ abɔ ɛcɔbu.”

17. Ɛgɛnyá nɛ ɔyinɛ alɔ nɔnya éyi nōo lé ka u Helga a miyɛ ɔtu ō tu lé a? (Má ifoto a.)

¹⁷ Ó lɛ ɔwɛ ɔhá kpɔ nɛ ayinɛ alɔ lɔfu je ɔtu ō tu lé lɛ alɔ. Ɛgɛnyá a? Leyi yɛ ocabɔ ku Helga, nōo lā ipu Hungary a. Ihayi alɛwa, ó má āhɔ̄ olɔnɔ ōhī nōo ya kóō lɛ ɔtooplico nɛɛnɛhi nɛ ɔtu klla ya ɔ bɛɛka ó tiile ŋ ma. Amáŋ abɔ ó gbɛla gā igbihi a, ó má ɛgɛ nɛ Ujehofa je ɔtu ō tu lé lɛ ɔ o bu ipu ayinɛ nōo yɔ ipu ujɔ a. Ó ta ɔkpá kahinii: “Ujehofa gē je otabɔ gā um eko doodu eko duuma nɛ ó má ka ń lɛ ɔfu lɛ a gɛ ŋ ohigbu uklɔ nɛ um gē ya néē gē gba ije gā um, ohigbu eko nɛ um gē bi le teyi kwu ɔyi um nōo yɔ i doōcē eko ɔɔma, mla aunwalu ɔhá nɛ um gē má a. Ɛ̄cī doodu ipu ihayi ofu ce igwo nōo gáā yɛ a, ó lɛ okonu nɛ ó ce a tu ō yɔ i tu um ɔtule. Ó gē lɛ ɔfu ta um iyē igbalɛwa o bu ipu aɛlā ō ta ɔtu kwu ɔtu ŋma ɛgiyi ācɛ ɔhá. Igbalɛwa n gē miyɛ umɛseji mla aɛlā ku ahinya ō ta eko nɛ um cɛgbá nu fiyɛ duu a.”

18. Ɛgɛnyá nɛ alɔ lɔfu je ɔtu ō tu lé lɛ ācɛ ɔhá a?

¹⁸ Alɔ lɛ ɛnɛɛnɛ ɛga ō ya ɛgbla ku Ɔwɔico ku alɔ ŋma lɛ ō ta ācɛ ɔhá ɔtu lé. Ɛgɛnyá nɛ alɔ lɔfu ya ɔɔma a? Alɔ lɔfu lɛ ɔtu lé ō jahɔ tu uwa, ō kɛla mla uwa ɔwɛ ogbonɛnɛ, mla ō je otabɔ lɛ uwa aɔwɛ ocɛgbá. (Aíit. 3:27) Alɔ gē ceyitikwu lɔfu lɔfu ō je ɔtu ō tu lé lɛ ɛjɛɛji ācɛ nōo yɔ i má owe a, kwu ācɛ nōó kóō yɔ i gba Ɔwɔico ɛ̄gbā babanya ɛ ŋ ma. Eko duuma nɛ aoladogbe ku alɔ yɔ i má ɔtu nobi, unwalu ku ōcē, amāŋ ɔtooplico, alɔ gē nyɔ gáā má uwa, gē jahɔ tu uwa, klla gē kɔ aɛga ku Ubáyíbu ō ta ɔtu kwu ɔtu mla uwa. Ɔdaŋ ka alɔ ya ɛgbla ku Ujehofa nōo wɛ “Ɔwɔicō . . . nōo ī tú ɔ̄cɛ ɔtūlé ojigógó” a, á jé ŋ, ó wɛ ayinɛ alɔ foofunu nɛ alɔ lɔfu je otabɔ lɛ uwa ō lé ɔtu aunwalu néē yɔ i má a ŋ. Amáŋ alɔ klla lɔfu je otabɔ lɛ ācɛ nōó kóō yɔ i gba Ɔwɔico ɛ̄gbā babanya ɛ ŋ ma kéē dɔka ō gáā nwu ɛlā lɛyikwu ɔ.—Umát. 5:16.

UJEHOFA GÉĒ JE OTABƆ LƐ ALƆ EKO DOODU

19. Ɔdi nɛ Ujehofa gē ya lɛ alɔ a, ɛgɛnyá nɛ alɔ kē lɔfu ya ɛgbla ku nu a?

¹⁹ Ujehofa lɛ ɛlá wu ɛjɛɛji ācɛ nōo yihɔtu ku nu a nɛɛnɛhi. Ó gē cigbihi kwu alɔ eko nɛ alɔ yɔ ipu unwalu ŋ. Ɛgɛ nɛ ɛ́nɛ́ amāŋ adā gē teyi kwu ɔyi uwa ɔwɛ ku ihɔtu a, ɛgɔɔma nɛ Ujehofa gē teyi kwu ācɛ nōo gē gba ɔ ɛ̄gbā kpaakpa a. Ó gē ma ɔwɛ fu lɛ alɔ, gē ya ɛgbá ku alɔ lɛ alɔ, gē je ogbotu lɛ alɔ, klla gē tu alɔ ɔtule. Alɔ gē ya ɛgbla ku Adā alɔ nōo yɔ ɔkpanco nōo lɛ ihɔtu a eko duuma nɛ alɔ je otabɔ mla ɔtu ō tu kwu ɔtu lɛ ācɛ ɔhá eko duuma néē yɔ i má unwalu. Ipu ɛcɛ nyā, alɔ lɔfu má āhɔ̄ olɔnɔ klla lɛ ɔtu nobi, amáŋ alɔ lɔfu lɛ ɔtu ce lɔfu lɔfu ka Ujehofa yɔ mla alɔ. Daama, ó cokonu lɛ alɔ kahinii: “A yúúfi ŋ́, n yɔ̄ pi uwɔ.” (Ayis. 41:10) Okonu ō ce nyā je ɔtu ō ce lɛ alɔ ka u mla otabɔ ku Ujehofa, alɔ i yɔ foofu alɔ ŋ.