Job

38 Jehova wee si n’oké ifufe+ zaa Job, sị:

 2 “Ònye bụ onye a nke na-ekpuchi ihe e zubeworo

Site n’ikwu okwu amamihe na-adịghị na ya?+

 3 Biko, kee ájị̀ n’ume dị ka dimkpa,

Ka m jụọ gị ajụjụ, gị onwe gị azaakwa m.+

 4 Olee ebe ị nọ mgbe m tọrọ ntọala ụwa?+

Gwa m, ma ọ bụrụ na i nwere nghọta.

 5 Ònye kpebiri otú ọ ga-aha, ma ọ bụrụ na ị maara,

Ka ọ̀ bụ onye setịrị eriri e ji atụ̀ ihe n’elu ya?

 6 N’ime gịnị ka e gwunyere ntọala+ ya,

Ka ọ̀ bụ onye tọgbọrọ nkume isi nkuku ya,

 7 Mgbe kpakpando ụtụtụ+ tikọrọ mkpu ọṅụ ọnụ,

Ụmụ Chineke+ niile amalitekwa iti mkpu otuto?

 8 Ọ̀ bụkwa onye ji ibo ụzọ gbochie oké osimiri,+

Bụ́ nke malitere ịsọpụta dị ka à ga-asị na o si n’akpa nwa pụta n’ike;

 9 Mgbe m yiwere ya ígwé ojii dị ka uwe,

Waakwa ya oké ọchịchịrị dị ka ákwà,

10 M wee kpaara ya ókè,

Tinyekwa ihe ntụchi na ibo ụzọ,+

11 M wee sị: ‘Ebe a ka ị ga-erute, ị gaghịkwa agabiga ya;+

Ebe a kwa ka ebili mmiri gị nke dị nganga ga-ejedebe’?+

12 Ọ̀ bụ malite n’ụbọchị gị ka i nyere ụtụtụ iwu?+

Ọ̀ bụ gị mere ka chi ọbụbọ mara ọnọdụ ya,

13 Ka o wee bọọ n’ebe niile ụwa sọtụrụ,

Ka e wee yọgharịa ụwa, ndị ajọ omume ewee si n’ime ya dapụsịa?+

14 Ọ na-agbanwe onwe ya dị ka ụrọ+ nke a kara akara,

Ihe niile adịrịzie ka hà yi ákwà.

15 A na-egbochi ìhè inwuru ndị ajọ omume,+

A na-agbajikwa ogwe aka dị elu.+

16 Ị̀ gatụla n’ebe oké osimiri si asọpụta,

Ka ì jegharịtụla+ chọọ ogbu mmiri?+

17 È kpugheworo gị ọnụ ụzọ ọnwụ,+

Ka ị̀ pụrụ ịhụ ọnụ ụzọ oké ọchịchịrị?+

18 Ì jirila amamihe chebara ebe ndị sara mbara n’ụwa+ echiche?

Gwa m, ma ọ bụrụ na ị maara ihe a niile.

19 Olee ụzọ e si aga n’ebe ìhè bi?+

Oleekwa ebe bụ́ ụlọ ọchịchịrị,

20 Nke na ị ga-akpọrọ ya gaa n’ókè ya,

Nke na ị ga-aghọtakwa okporo ụzọ e si aga n’ụlọ ya?

21 Ị̀ maara ya n’ihi na a mụọla gị mgbe ahụ,+

Nakwa n’ihi na ụbọchị ndụ gị dị ọtụtụ?

22 Ị̀ banyetụla n’ụlọ a kwakọbara snoo,+

Ka ị̀ na-ahụ ọbụna ụlọ a kwakọbara akụ́ mmiri ígwé,+

23 Bụ́ nke m debere maka oge ahụhụ,

Maka ụbọchị ịlụ ọgụ na ibu agha?+

24 Olee ụzọ ìhè si ekesa onwe ya,

Oleekwa ụzọ ifufe ebe ọwụwa anyanwụ+ si ekusasị n’elu ụwa?

25 Ònye waara idei mmiri ụzọ,

Waakwara oké mmiri ozuzo na égbè eluigwe ụzọ,+

26 Ime ka mmiri zoo n’ala mmadụ na-ebighị,+

N’ala ịkpa mmadụ na-ebighị,

27 Iji mee ka afọ ju ebe oké mmiri ozuzo mebisịrị nakwa ebe tọgbọrọ n’efu,

Meekwa ka ahịhịa pulite n’ala?+

28 Mmiri ozuzo ò nwere nna,+

Ka ọ̀ bụ onye mụrụ igirigi?+

29 N’afọ ònye ka mkpụrụ mmiri si apụta,

Ònyekwa na-amụpụta mkpụrụ mmiri+ ígwé?

30 Mmiri na-ezo onwe ya dị ka è ji nkume zochie ya,

Elu ogbu mmiri na-akpụkọtakwa akpụkọta.+

31 Ị̀ pụrụ ikesi ihe kekọtara ìgwè kpakpando Kaịma ike,

Ka ị̀ pụrụ ịtọghe ụdọ kekọtara ìgwè kpakpando Kisịl?+

32 Ị̀ pụrụ ime ka ìgwè kpakpando Mazarọt pụta n’oge ya?

Ị̀ pụrụ iduzi ìgwè kpakpando Ash na ụmụ ya?

33 Ị̀ marawo ụkpụrụ na-achị eluigwe,+

Ka ị̀ pụrụ ime ka ike ya dị irè n’ụwa?

34 Ị̀ pụrụ iji olu dara ụda gwa ígwé ojii okwu,

Ka oké mmiri ozuzo wee zuo gị ahụ́?+

35 Ị̀ pụrụ izipụ àmụ̀mà ka ha gawa

Wee sị gị, ‘Lee anyị!’?

36 Ònye tinyere amamihe+ n’ígwé ojii,

Ka ọ̀ bụ onye mere ka ihe ndị na-eme na mbara igwe nwee nghọta?+

37 Ònye pụrụ iji amamihe ya kwuo ole ígwé ojii dị kpọmkwem,

Ma ọ bụ ite mmiri nke eluigwe—ònye pụrụ ikpu ha ihu,+

38 Mgbe uzuzu na-awụpụ dị ka ihe gbazere agbaze,

Ájá ụrọ ana-anyakọtakwa ọnụ?

39 Ị̀ pụrụ igbutere ọdụm anụ ọ ga-eri,

Ị̀ pụkwara ime ka afọ ju ụmụ ọdụm agụụ ji,+

40 Mgbe ha makpu n’ebe zoro ezo,+

Ma ọ bụ, mgbe ha makpu n’ọgba ha na-eche anụ?

41 Ònye na-akwadebere ugoloọma nri ya+

Mgbe ụmụ ya na-etiku Chineke maka enyemaka,

Mgbe ha na-awagharị n’ihi na ihe ha ga-eri adịghị?