Abụ Ọma

Abụ.

98 Bụkuonụ Jehova abụ ọhụrụ,+

N’ihi na o meela ihe ndị dị ebube.+

O jirila aka ya siri ike,* ya bụ, ogwe aka ya dị nsọ, zọpụta ndị ya.*+

2 Jehova emeela ka a mara na ọ bụ onye nzọpụta.+

O meela ka mba dị iche iche mara na ọ bụ onye ezi omume.+

3 O chetala nkwa o kwere na ọ ga-egosi na ọ hụrụ ụlọ Izrel n’anya, gosikwa ha na ọ bụ onye e kwesịrị ịtụkwasị obi.+

Ndị niile bi n’ụwa ahụla otú Chineke anyị si zọpụta ndị ya.*+

4 Ndị niile bi n’ụwa, tienụ mkpu ọṅụ, tookwanụ Jehova.

Nweenụ obi ụtọ, tienụ mkpu ọṅụ, bụọkwanụ abụ otuto.+

5 Jirinụ ụbọ akwara bụkuo Jehova abụ otuto.

Kpọọrọnụ ya ụbọ akwara, bụọkwaranụ ya abụ na-atọ ụtọ.

6 Fụọnụ opi dị iche iche,+

Tiekwanụ mkpu ọṅụ n’ihu Eze, bụ́ Jehova.

7 Ka oké osimiri na ihe niile dị n’ime ya mee mkpọtụ,

Ma ụwa* ma ndị bi na ya.

8 Ka osimiri kụọ aka.

Ka ugwu niile tie mkpu ọṅụ+

9 N’ihi Jehova, n’ihi na ọ na-abịa* ikpe ụwa ikpe.

Ọ ga-ekpe ụwa* ikpe ziri ezi,+

Kpeekwa ndị dị iche iche ikpe ziri ezi.+