AKỤKỤ NKE 8

Jụ Okpukpe Ụgha; Kpee Ezi Okpukpe

1. N’ihe banyere ofufe, olee nhọrọ na-eche ndị mmadụ ihu taa?

JIZỌS sịrị: “Onye na-anọghị n’akụkụ m na-emegide m.” (Matiu 12:30) Ma ànyị anọghị n’akụkụ Jehova, anyị anọrọ n’akụkụ Setan. Ihe ka n’ọnụ ọgụgụ mmadụ na-eche na ha na-ejere Chineke ozi n’ụzọ ọ na-anara, ma Bible na-ekwu na Setan “na-eduhie ụwa dum mmadụ bi.” (Mkpughe 12:9) Ọtụtụ nde mmadụ kwenyere na ha na-efe Chineke ofufe, ma ọ bụ Setan bụ́ Ekwensu ka ha na-ejere ozi n’ezie! Otu nhọrọ na-eche ndị mmadụ ihu taa: Ha aghaghị ijere Jehova, bụ́ “Chineke nke eziokwu” ozi, ma ọ bụ jeere Setan, bụ́ “nna nke ụgha,” ozi.—Abụ Ọma 31:5; Jọn 8:44.

Kewapụ Onwe Gị n’Okpukpe Ụgha

2. Olee otu ụzọ Setan si agbalị igbochi ndị mmadụ ife Jehova ofufe?

² Ikpebi ijere Jehova ozi bụ nhọrọ amamihe dị na ya ime, nhọrọ nke na-eweta nnwapụta Chineke. Ma Setan adịghị enwe obi ụtọ n’ebe onye ọ bụla nke na-ejere Chineke ozi nọ; ọ na-eme ka ihe siere ndị na-eme otú ahụ ike. Otu ụzọ o si eme nke a bụ site n’iweta ịkwa emo ma ọ bụ mmegide site n’aka ndị ọzọ, ọbụna site n’aka ndị enyi na ndị òtù ezinụlọ. Jizọs dọrọ aka ná ntị, sị: “N’ezie, ndị iro mmadụ ga-abụ ndị ezinụlọ nke ya.”—Matiu 10:36.

3. Ọ bụrụ na ezinụlọ ma ọ bụ ndị enyi gị na-emegide ofufe ị na-efe Chineke, gịnị ka ị ga-eme?

³ Ọ bụrụ na nke ahụ emee gị, olee otú ị ga-esi meghachi omume? Ọtụtụ ndị maara na ụzọ ha si efe ofufe ezighị ezi, ma ha na-ala azụ ikewapụ onwe ha na ya. Ha na-eche na ime otú ahụ ga-abụ eguzosighị ike n’ihe nye ndị ezinụlọ ha. Ezi uche ọ̀ dị na nke ahụ? Ọ bụrụ na ị mara na ndị ezinụlọ gị ji ọgwụ ọjọọ na-eme ihe, ị́ gaghị adọ ha aka ná ntị na ọgwụ ọjọọ ahụ ga-emerụ ha ahụ́? Ị gaghị eso ha jiri ọgwụ ọjọọ na-eme ihe, ka ị̀ ga-esonyere ha?

4. Gịnị ka Jọshụa gwara ndị Izrel banyere ofufe n’oge ya?

⁴ Jọshụa gbara ndị Izrel ume ka ha kwụsị ihe omume okpukpe na ọdịnala ndị na-ezighị ezi nke ndị nna nna ha. Ọ sịrị: “Ma ugbu a, na-atụnụ egwu Jehova, na-efekwanụ Ya ofufe n’izu okè na n’eziokwu: wezụgakwanụ chi nile nke nna unu hà fere ofufe n’ofe Osimiri ahụ, na n’Ijipt; ma feenụ Jehova.” (Joshua 24:14) Jọshụa guzosiri ike n’ihe nye Jehova, Jehova gọzikwara ya. Ọ bụrụ na anyị eguzosie ike n’ihe nye Jehova, ọ ga-agọzikwa anyị.—2 Samuel 22:26.

Nkụzi Okpukpe—Ndị Bụ́ Eziokwu na Ndị Na-abụghị Eziokwu

Atọ n’Ime Otu: Ọtụtụ okpukpe na-akụzi na Chineke bụ Atọ n’Ime Otu. Ha na-ekwu na “Nna ahụ bụ Chineke, Ọkpara ahụ [Jizọs] bụ Chineke, Mmụọ Nsọ bụkwa Chineke, ma ha abụghịkwa Chineke atọ kama otu Chineke.”

Bible akpọtụdịghị okwu ahụ bụ́ “Atọ n’Ime Otu” aha, ọ dịghịkwa akụzi na Jehova dị atọ ma bụrụ otu onye. Nanị Jehova bụ Chineke. Ndị Kọrint nke Mbụ 8:6 na-asị: “Nye anyị e nwere n’ezie otu Chineke bụ́ Nna.” Jehova bụ Onye Kasị Elu. Jizọs abụghị Chineke kama ọ bụ “Ọkpara Chineke.” (1 Jọn 4:15) N’otu aka ahụ, mmụọ nsọ abụghị Chineke. Mmụọ nsọ abụdịghị onye. Ọ bụ ike Chineke nke nọ n’ọrụ.—Ọrụ 1:8; Ndị Efesọs 5:18.
Mkpụrụ Obi: Ọtụtụ okpukpe na-akụzi na mkpụrụ obi bụ ihe dị n’ime mmadụ nke na-apụghị ịnwụ anwụ. Bible na-akụzi na mkpụrụ obi bụ onye ahụ, anyị makwa na mmadụ pụrụ ịnwụ anwụ.—Jenesis 2:7; Ezikiel 18:4.
Ọkụ Ala Mmụọ: Okpukpe ụgha dị iche iche na-akụzi na a na-emekpa mkpụrụ obi nke ndị ajọ omume ahụ́ ruo mgbe ebighị ebi na hel. Bible na-ekwu na ndị nwụrụ anwụ “adịghị ama ihe ọ bụla.” (Eklisiastis 9:5) Bible na-akụzikwa na “Chineke bụ ịhụnanya.” (1 Jọn 4:8) Jehova, bụ́ Chineke nke na-ahụ n’anya, enweghị mgbe ọ ga-eji ọkụ mekpaa ndị ọzọ ahụ́.

Igbe: Gịnị ka Bible na-akụzi banyere Atọ n’Ime Otu, mkpụrụ obi, na ọkụ ala mmụọ?

Bibisie Ihe Ndị E Ji Eme Ihe n’Ofufe Ụgha

Ebe otu nwaanyị na-akpọ ihe ndị o ji eme anwansi ọkụ

5. Gịnị mere anyị kwesịrị iji bibie ihe nile metụtara ime anwansi?

⁵ Ikewapụ onwe anyị n’okpukpe ụgha pụtakwara na anyị kwesịrị ibibi ihe ọ bụla metụtara anwansi ndị anyị pụrụ inwe, dị ka ọgwụ nchebe, mgbaaka na ọla aka ndị nwere ike mgbaasị, na ihe ndị yiri ha. Nke a dị mkpa n’ihi na ọ na-egosi na ọ bụ Jehova ka anyị tụkwasịrị obi anyị nile.

6. Olee ihe Ndị Kraịst oge mbụ mere akwụkwọ ha ndị na-ekwu banyere ime anwansi?

⁶ Tụlee ihe ụfọdụ Ndị Kraịst oge mbụ mere mgbe ha kpebiri ikpe ezi okpukpe. Bible na-asị: “Ọnụ ọgụgụ dịtụ ukwuu nke ndị na-eme [anwansi] chịkọtara akwụkwọ ha ma kpọọ ha ọkụ n’ihu mmadụ nile.”—Ọrụ 19:19.

7. Gịnị ka anyị pụrụ ime ma ọ bụrụ na ndị mmụọ ọjọọ na-enyegharị anyị nsogbu?

⁷ Ndị mmụọ ọjọọ nwere ike ịdị na-enyegharị ụfọdụ ndị malitere ijere Jehova ozi nsogbu, bụ́ ndị tinyeburu aka kpọmkwem n’ịta amoosu, ime mgbaasị, ma ọ bụ n’ime anwansi. Ọ bụrụ na nke ahụ emee gị, kpọkuo Jehova n’olu dara ụda n’ekpere, kpọọ aha ya. Ọ ga-enyere gị aka.—Ilu 18:10; Jems 4:7.

8. Olee otú Ndị Kraịst si ele arụsị, ihe oyiyi, na foto ndị e ji eme ihe n’ofufe ụgha anya?

⁸ Ndị chọrọ ijere Jehova ozi agaghị enwe arụsị, ihe oyiyi, ma ọ bụ ihe oyiyi okpukpe ọ bụla nke e ji efe ofufe ụgha, ma ọ bụ jiri ha na-eme ihe. Ezi Ndị Kraịst “na-eje ije n’okwukwe, ọ bụghị n’ihe anya na-ahụ.” (2 Ndị Kọrint 5:7) Ha na-asọpụrụ iwu Chineke nke na-amachibido iji ihe oyiyi ọ bụla na-efe ofufe iwu.—Ọpụpụ 20:4, 5.

Soro Ndị Jehova Na-akpakọrịta

Ebe otu nwaanyị na nwa ya nwaanyị na-esi nri

9. Ndụmọdụ dị aṅaa ka Bible na-enye banyere ịbụ onye maara ihe?

⁹ Bible na-asị: “Na-ejeso ndị maara ihe, ị ga-amakwa ihe.” (Ilu 13:20) Ọ bụrụ na anyị chọrọ ịbụ ndị maara ihe, ọ dị anyị mkpa iso Ndịàmà Jehova na-eje ije ma ọ bụ na-akpakọrịta. Ọ bụ ha bụ ndị na-eje ije n’okporo ụzọ nke na-eduba ná ndụ.—Matiu 7:14.

10. Olee otú Ndịàmà Jehova pụrụ isi nyere gị aka ijere Chineke ozi?

¹⁰ Ndịàmà nwere ezi mmasị n’ebe ndị mmadụ nọ. Ọrụ ha bụ inyere ndị nwere obi eziokwu aka ịghọta eziokwu Bible ndị na-eduba ná ndụ ebighị ebi. Ha pụrụ inyere gị aka site n’iduziri gị ọmụmụ Bible n’efu. Ha ga-aza ajụjụ gị ma gosi gị ụzọ isi tinye ihe ọmụma Bible n’ọrụ ná ndụ gị.—Jọn 17:3.

11. Olee otú nzukọ Ndị Kraịst ga-esi nyere gị aka?

¹¹ Ná nzukọ ha dị iche iche, bụ́ ndị a na-enwekarị n’Ụlọ Nzukọ Alaeze, ị ga-amụtakwu banyere ụzọ Jehova. A ga-ewusikwu ọchịchọ i nwere ikpe ezi okpukpe ike. Ị ga-enwetakwa ọzụzụ n’ụzọ isi nyere ndị ọzọ aka ịmụta eziokwu Bible.—Ndị Hibru 10:24, 25.

Ebe otu ọgbakọ na-amụ ihe n’Ụlọ Nzukọ Alaeze

12. Olee otú ekpere pụrụ isi nyere gị aka ijere Chineke ozi?

¹² Ka ị na-amụtakwu ihe banyere uche Jehova na nzube ya, o yikarịrị ka ị ga-eji ụzọ ịhụnanya ya kpọrọ ihe karị. I kwesịkwara ito eto n’ọchịchọ i nwere ime ihe na-atọ ya ụtọ na izere ihe ndị na-adịghị amasị ya. Cheta na ị pụrụ ịgakwuru Jehova n’ekpere iji rịọ ya ka o nyere gị aka ime ihe ziri ezi ma na-ezere ihe ọjọọ.—1 Ndị Kọrint 6:9, 10; Ndị Filipaị 4:6.

Ebe otu ezinụlọ na-amụkọ Baịbụl ọnụ — Olee otú ị pụrụ isi na-efe ezi ofufe?

13. Olee otú ị pụrụ isi mee ka obi Jehova ṅụrịa?

¹³ Ka oge na-aga, ka ị na-eto eto n’ụzọ ime mmụọ, obi abụọ adịghị ya na ị ga-ahụ mkpa ọ dị ịghọ Onyeàmà Jehova raara onwe ya nye, nke e mere baptizim. Site n’ịghọ otu n’ime ndị Jehova, ị ga-eme ka obi Jehova ṅụrịa. (Ilu 27:11) Ị ga-eso ná ndị obi ụtọ bụ́ ndị Chineke na-ekwu banyere ha, sị: “M ga-ebi n’etiti ha, jegharịakwa n’etiti ha, m ga-abụkwa Chineke ha, ha ga-abụkwa ndị m.”—2 Ndị Kọrint 6:16.

Enweere M Onwe M Pụọ n’Aka Ndị Mmụọ Ọjọọ

N’otu abalị ka mụ na di m dina n’àkwà na-ehi ụra, anụrụ m ka otu olu kpọrọ aha m ugboro atọ. Ahụziri m ka uko ụlọ kewara abụọ, ihe yiri bọl nke na-acha ka ọkụ wee dakwasị m n’afọ. Ma di m ahụghị nke ọ bụla n’ime ihe ndị a. Ka o sina dị, enwere m oké ahụ́ ikpo ọkụ nke dịruru ọtụtụ ọnwa.

Ọnwa isii ka e mesịrị, olu ahụ kpọrọ m ọzọ. Ozugbo ahụ, o yiri ka ụlọ anyị dum ọ̀ dị n’ime mmiri dị ogbu. Otu nnukwu eke si n’ime mmiri ahụ pụta ma gbakụọ m n’aka. Agbalịrị m ifechapụ ya ma efechapụlighị m ya. Egwu jidere m. Mgbe ahụ ahụkwaghị m mmiri ahụ na agwọ ahụ, e wee tụọ m n’ala n’ụzọ siri ike. Amaghị m onwe m ruo ọtụtụ awa. Olu ahụ wee gwa m ka m laghachi n’ụlọ mgbaasị dị n’ime obodo bụ́ ebe a na-agwọ ọrịa. Mgbe m jụrụ mmụọ ahụ aha ya, ọ gwara m aha nke pụtara “onye nwere akụ̀ na ụba ma o nweghị nwa.” O kwere m nkwa na ya ga-eme ka m baa ọgaranya site n’ikike ịgwọ ọrịa.

Ndị ọrịa si n’ebe nile na-abịakwute m. Tupu ha abịarute n’ụlọ m, m ga-ahụ ha n’enyo pụrụ iche m nwere. Mgbe ahụ, mgbe mmadụ bịara, m ga-akụ ọbụ aka m na nke ya, a ga-ekpughekwara m ozugbo ahụ ụdị ihe na-arịa ya ma ọ bụ nsogbu ya na ihe ga-agwọ ya. Mmụọ ahụ na-agwakwa m ego ole ndị mmadụ ga-akwụ.

Ego na onyinye na-ezo ka mmiri n’ihi ịdị irè nke ọgwụgwọ ahụ. M wee ghọọ “onye nwere akụ̀ na ụba,” ma amatakwara m ihe ọ pụtara bụ́ na “o nweghị nwa.” Oge ọ bụla m mụrụ nwa, nke tọrọ nke ahụ ga-anwụ. Nke a wetaara m obi ilu dị ukwuu. N’ime afọ 12 m jeere mmụọ a ozi, ụmụ m isii nwụrụ.

Amalitere m ikpegara Chineke ekpere maka enyemaka. Ekpesiri m ekpere ike. Otu ụbọchị, Ndịàmà Jehova kụrụ aka n’ọnụ ụzọ m. Ọ bụ ezie na m na-adị achụpụ ha, ekpebiri m ige ntị n’ụbọchị ahụ. Ná mkparịta ụka ndị sochirinụ, m mụtara na ọ bụ mmụọ ọjọọ ka m na-ejere ozi! Ekpebiri m isepụ aka ná mgbaasị.

Mgbe m gwara ya mmụọ ahụ, ọ dọrọ m aka ná ntị banyere mkpebi m. Otú ọ dị, asịrị m: “Nke mụ na gị ebiela.”

Akpọrọ m ihe nile m ji na-agba afa ọkụ. Mụ na Ndịàmà mụrụ Bible, m wee ghọọ ohu Jehova, e meekwa m baptizim na 1973. Ugbu a, enwere m ụmụ ise ahụ́ dị mma. Di m ghọkwara Onyeàmà e mere baptizim.—Dị ka Josephine Ikezu si kọọ.

Igbe: Olee otú otu nwanyị si nwere onwe ya pụọ n’aka ndị mmụọ ọjọọ?