Okwukwe Ya Na-agba Ndị Ọzọ Ume
MGBE a mụrụ Silvia na December 1992, o yiri obere nwatakịrị nwanyị ji nnọọ ahụ́. Ma mgbe ọ dị afọ abụọ, a chọpụtara na Silvia na-arịa ọrịa cystic fibrosis, bụ́ ọrịa a na-adịghị agwọ agwọ nke na-eme ka o siere mmadụ ike iku ume ma na-eme ka o sie ike nri ịgbari n’ahụ́. Iji nagide ọrịa ya, Silvia na-aṅụ mkpụrụ ọgwụ iri atọ na isii kwa ụbọchị, jiri imi na-ekuru ọgwụ ndị a na-ekuru ekuru, ma na-emega nnọọ ahụ́ nke ọma. Ebe ọ bụ na akpa ume ya adịghị arụcha ọrụ nke ọma, a na-akwụnyere ya akpa ikuku oxygen mgbe nile, ọbụna ma ọ na-apụ apụ.
Mama ya bụ́ Teresa kwuru, sị: “Otú Silvia si na-anagide ọrịa a na-atụ nnọọ n’anya. Ihe ndị ọ mụtara n’Akwụkwọ Nsọ mere nnọọ ka okwukwe ya sie ike. Okwukwe a o nwere na-enyere ya aka idi mwute na ahụ́ erughị ala ọ na-enwe. Ọ na-echetakarị ụwa ọhụrụ Jehova kwere ná nkwa, bụ́ ebe a ga-agwọ ndị ọrịa nile.” (Mkpughe 21:4) Mgbe ụfọdụ, ọ bụrụ na ndị ezinụlọ ya e nwee nkụda mmụọ, ihu ọchị Silvia na-enwe bụ́ nke na-egosi na ụjọ ejighị ya, na-agba ha ume. Ọ na-agwa ndị mụrụ ya na nwanne ya nwoke, sị: “Ndụ n’ime ụwa ọhụrụ ahụ ga-anọchi anya ahụhụ nile anyị na-ata ugbu a.”
Silvia na-agachi ozi ọma anya, ndị ọ na-ekwusara ozi ọma nke sitere n’Okwu Chineke na-achọpụtakwa na ọ na-enwe nnọọ ihu ọchị bụ́ nke na-egosi na o nwere obi ụtọ na ọṅụ. Ụmụnna ndị ha na ya nọ n’otu ọgbakọ na Canary Islands na-ejikwa nnọọ mmasị na-ege ntị mgbe ọ na-aza ajụjụ na mgbe ọ na-eme ihe omume. Mgbe ọ bụla e mechikwara ọmụmụ ihe, Silvia na-enwe mmasị ichere n’Ụlọ Nzukọ Alaeze iji soro ụmụnna ya ndị nwoke na ndị nwanyị kọrịa. Omume enyi ya na mgbasapụ ihu ya akpaliwo onye ọ bụla nọ n’ọgbakọ ahụ ịhụ ya n’anya.
Papa ya bụ́ Antonio kwuru, sị: “Silvia na-akụziri anyị ihe dị nnọọ mkpa. N’agbanyeghị nsogbu a na-enwe, ndụ bụ onyinye si n’aka Chineke, anyị kwesịkwara igosi na anyị nwere ekele maka ya.” Dị ka Silvia, ndị ohu Chineke nile—ma nwata ma okenye—na-echeresi nnọọ ike mgbe ‘onye obibi ya na-agaghị asị, Ana m arịa ọrịa.’—Aịsaịa 33:24.
[Foto dị na peeji nke 31]
Ebe Silvia nọ na-agụ Bible, mama ya ejidere ya akpa ikuku “oxygen” ya