N’ihi Gịnị Ka Ha Ji Na-eme Ya?

¹ E buru n’amụma banyere Kraịst na ‘ekworo nke ụlọ Chineke ga-eripịa ya.’ (Abụ Ọma 69:9) Ekworo Jisọs maka ezi ofufe nke Jehova kwaliri ya ibute ozi ahụ ụzọ. (Luk 4:43; Jọn 18:37) A na-egosipụta otu ekworo a nke ịgbara eziokwu àmà taa n’ozi nke Ndịàmà Jehova. N’afọ ije ozi gara aga, nkezi nke 645,509 n’ụwa nile keere òkè kwa ọnwa n’ụdị ụfọdụ nke ozi ọsụ ụzọ. N’ihi nraranye anyị nye Chineke, onye ọ bụla n’ime anyị kwesịrị iji ekpere tụlee ma anyị pụrụ idozi ọnọdụ anyị iji jee ozi dị ka onye ọsụ ụzọ inyeaka ma ọ bụ nke oge nile.—Abụ Ọma 110:3; Ekli. 12:1; Rom 12:1.

² N’ibi n’ime usoro ihe a nke na-achọ ihe onwunwe n’ụzọ ọdịmma onwe onye nanị, ọ na-esiri ọtụtụ ndị nọ n’ụwa ike ịghọta ihe mere mmadụ ọ bụla ga-eji chọọ ịrụsi ọrụ ike otú a n’ozi ahụ maka ihe na-enweghị uru ego ma ọ bụ otuto ọ na-enye. N’ihi gịnị ka ndị ọsụ ụzọ ji na-eme ya? Ha maara na ha na-etinye aka n’ọrụ na-azọpụta ndụ. N’ịbụ ndị ịhụnanya miri emi maka Jehova na maka mmadụ ibe ha kpaliri, ha na-enwe echiche ibu ọrụ siri ike, nke onwe onye inye aka iji zọpụta ndụ. (Rom 1:14-16; 1 Tim. 2:4; 4:16) Otu di na nwunye bụ́ ndị ọsụ ụzọ chịkọtara ya n’ụzọ dị mma site n’ikwu, sị: “N’ihi gịnị ka anyị ji na-asụ ụzọ? Ọ̀ dị otú anyị pụrụ isi gosi na ụta adịghịrị anyị n’ihu Jehova ma ọ bụrụ na anyị asụghị ụzọ?”

³ Nwanna nwanyị ọzọ dere nke a banyere mkpebi ya ịmalite ịsụ ụzọ: “Mụ na di m mere atụmatụ iji ihe otu onye na-akpata na-ebi ndụ, nke pụtara ịhapụ ihe nile na-adịghị mkpa. Ma, Jehova gọziri anyị nke ukwuu, ọ dịghị mgbe ọ hapụrụ anyị n’ogbenye ma ọ bụ ná mkpa. . . . Achọtawo m ezi ihe mere m ga-eji adị ndụ—nke bụ inyere ndị nọ ná mkpa aka ịmara na Jehova, bụ́ ezi Chineke ahụ, anọghị n’ebe dị anya nye ndị na-achọ ya.” N’ịhụ ịdị ngwa nke oge a, ndị ọsụ ụzọ na-enwe afọ ojuju n’ihe ndị dị mkpa ná ndụ ka ha na-achọsi ike inweta akụ̀ ime mmụọ ndị ga-adịru ebighị ebi.—1 Tim. 6:8, 18, 19.

⁴ Ọ bụrụ na ọnọdụ gị kwe, gịnị ma i sonyere ọtụtụ narị puku ụmụnna gị ndị nwoke na ndị nwanyị n’ụwa nile bụ́ ndị na-asụ ụzọ? N’ụzọ ahụ ị pụrụ inweta otu ọṅụ ahụ ha na-enweta.