Isi 17

Izi Nikọdimọs Ihe

MGBE ọ na-ekere òkè n’Ememe Ngabiga nke afọ 30 O.A., Jisọs mere ihe ịrịba ama ma ọ bụ ọrụ ebube ndị kwesịrị ịrịba ama. N’ihi nke a, ọtụtụ ndị kwere na ya. Nikọdimọs, onye òtù Sanhedrin, bụ́ ụlọ ikpe ukwu nke ndị Juu, nwere mmasị, chọọkwa ka e zikwuo ya ihe. Ya mere, ọ bịakwutere Jisọs n’ọchịchịrị nke abalị, eleghị anya na-atụ egwu na ùgwù ya nwere n’ebe ndị ọzọ bụkwa ndị ndú ndị Juu nọ ga-akpụ n’ala ma ọ bụrụ na a hụ ya.

Ọ sịrị, “Rabaị, anyị matara na ị bụ onye ozizi nke siworo n’ebe Chineke nọ bịa: n’ihi na ọ dịghị onye ọ bụla pụrụ ime ihe ịrịba ama ndị a nke gị onwe gị na-eme, ma ọ bụrụ na Chineke anọnyereghị ya.” Ná nzaghachi, Jisọs gwara Nikọdimọs na ka mmadụ wee baa n’Alaeze Chineke, ọ ghaghị ịbụ onye ‘a mụrụ ọzọ.’

Ma olee otú a pụrụ isi mụọ mmadụ ọzọ? Nikọdimọs jụrụ sị, “Ọ̀ pụrụ ịba n’afọ nne ya nke ugbo abụọ, e wee mụọ ya?”

Ee e, nke ahụ abụghị ihe ịmụ mmadụ ọzọ pụtara. Jisọs kọwara na “ọ bụrụ na a mụghị mmadụ site ná mmiri na mmụọ nsọ, ọ pụghị ịhụ alaeze Chineke anya.” Mgbe e mere Jisọs baptism, mmụọ nsọ wee dakwasị ya n’isi, e si otú a mụọ ya “site ná mmiri na mmụọ nsọ.” Site n’okwu sochiri ya nke sitere n’eluigwe, bụ́, ‘Nke a bụ Ọkpara m onye ihe ya dị m ezi mma,’ Chineke kpọsara na ya ewepụtawo nwa ime mmụọ nke nwere olileanya ịbanye n’Alaeze eluigwe. Mgbe nke ahụ gasịrị, na Pentikọst nke afọ 33 O.A., ndị ọzọ e mere baptism ga-anata mmụọ nsọ, wee sikwa otú a bụrụ ndị a mụrụ ọzọ dị ka ụmụ ime mmụọ nke Chineke.

Ma ọrụ nke Ọkpara ­Chineke, onye bụ mmadụ pụrụ iche, dị oké mkpa. Jisọs gwara Nikọdimọs sị, “Dị ka Mosis weliri agwọ n’ọhịa, ọbụna otú a a ghaghị iweli Nwa nke mmadụ elu: ka onye ọ bụla nke kwere wee nwee ndụ ebighị ebi na ya.” Ee, dị ka ndị Israel ahụ agwọ ọjọọ tara na-aghaghị ilekwasị anya n’agwọ ọla ahụ iji bụrụ ndị a zọpụtara, otú ahụ ka ihe nile a kpọrọ mmadụ na-aghaghị inwe okwukwe n’ebe Ọkpara Chineke nọ iji bụrụ ndị a zọpụtara n’ọnọdụ ọnwụ ha.

N’imesi ịhụnanya Jehova ike na nke a, Jisọs gwakwara Nikọdimọs, sị: “Chineke hụrụ ụwa n’anya otú a, na o nyere ọbụna Ọkpara ọ mụrụ nanị ya, ka onye ọ bụla nke kwere na ya wee ghara ịla n’iyi, kama ka o nwee ndụ ebighị ebi.” Otú a, na Jerusalem ebe a, nanị ọnwa isii mgbe ọ malitesịrị ije ozi ya, Jisọs mere ka o doo anya na site n’aka ya ka Jehova Chineke ga-esi azọpụta agbụrụ mmadụ.

Jisọs gara n’ihu ịkọwara Nikọdimọs, sị: “N’ihi na Chineke eziteghị Ọkpara ya n’ụwa ka o kpee ụwa ikpe,” ya bụ, ọ bụghị ịma ya ikpe, ma ọ bụ ịkatọ ya, na-ama agbụrụ mmadụ ikpe mbibi. Kama nke ahụ, dị ka Jisọs na-ekwu, e zitere ya “ka e wee site n’aka ya zọpụta ụwa.”

Nikọdimọs ejiwo egwu bịakwute Jisọs n’ọchịchịrị nke abalị. Ya mere ọ bụ ihe na-akpali mmasị na Jisọs mechiri mkparịta ụka ha site n’ikwu, sị: “Ma nke a bụ ikpe ahụ, na ìhè ahụ [nke Jisọs mere ihe atụ ya ná ndụ na ozizi ya nile] abịawo n’ụwa, ma mmadụ hụrụ ọchịchịrị n’anya kama ìhè ahụ; n’ihi na ọrụ ha jọrọ njọ. N’ihi na onye ọ bụla nke na-eme ihe na-adịghị mma na-akpọ ìhè ahụ asị, ọ dịghị abịakwutekwa ìhè ahụ, ka a ghara ịtụ ya ọrụ ya nile n’anya. Ma onye na-eme ihe bụ eziokwu na-abịakwute ìhè ahụ, ka e wee mee ka ọrụ ya pụta ìhè, na a rụworo ha na Chineke.” Jọn 2:⁠23–3:⁠21; Matiu 3:​16, 17; Ọrụ 2:​1-⁠4; Ọnụ Ọgụgụ 21:⁠9.

▪ Gịnị kpaliri Nikọdimọs ime nleta ahụ o mere, n’ihi gịnịkwa ka o ji bịa n’abalị?

▪ Gịnị ka ọ pụtara bụ́ ‘ịmụ mmadụ ọzọ’?

▪ Olee otú Jisọs si kọwaa òkè ọ na-ekere ná nzọpụta anyị?

▪ Gịnị ka ọ pụtara bụ́ ịsị na Jisọs abịaghị ikpe ụwa ikpe?