Kụziere Ụmụ Gị Ihe
Ndị Enyi Ya na Chineke Hụrụ Ya n’Anya
O NWEGHỊ onye maara aha ya taa. Naanị ihe e ji mara ya ugbu a bụ aha nna ya, bụ́ Jefta. Ka anyị leba anya na Baịbụl ma mata banyere ha abụọ. Anyị ga-achọpụta na ma ndị enyi ada Jefta ma Chineke hụrụ ya n’anya.
Anyị nwere ike ịgụ banyere Jefta na nwa ya nwaanyị na Baịbụl ná Ndị Ikpe isi 11. Ebe ọ bụ na Jefta bụ ohu Chineke kwesịrị ntụkwasị obi, o doro anya na ọ na-akọrọ nwa ya nwaanyị ihe ndị dị n’Akwụkwọ Nsọ mgbe niile.
Jefta dịrị ndụ tupu ndị Chineke, bụ́ ndị Izrel, ekwuo ka e nye ha eze bụ́ mmadụ ga na-achị ha. Jefta bụ nwoke siri ike nke maara otú e si alụ ọgụ. N’ihi ya, ndị Izrel gwara ya ka o duru ha gaa ịlụso ndị Amọn agha, bụ́ mba ha na Izrel gbara, bụ́kwa ndị na-alụso ha ọgụ.
Jefta chọrọ ka Chineke nyere ya aka imeri ndị Amọn, n’ihi ya, o kwere Chineke nkwa. Jefta kwuru na ọ bụrụ na Jehova emee ka ya merie n’agha ahụ, ya ga-enye Jehova onye mbụ si n’ụlọ ya pụta izute ya mgbe ọ lọtara. Onye ahụ ga-eji ndụ ya niile jee ozi n’ụlọikwuu Chineke, bụ́ ebe ndị Chineke na-efe ofufe n’oge ahụ. Ị̀ maara onye mbụ pụtara izute ya?—a
Ee, ọ bụ ada Jefta! O wutere nnọọ Jefta. O nwere naanị otu nwa. Ma, o kwela Jehova nkwa, ọ ga-emezurịrị ya. Ozugbo ahụ, nwa ya nwaanyị kwuru, sị: “Nna m, ọ bụrụ na i megheworo Jehova ọnụ gị, mee m ihe si n’ọnụ gị pụta.” O kwuziri ka e nye ya ọnwa abụọ ka ya gaa bee ákwá n’ugwu. Olee ihe mere ihe ahụ ji na-ewute ya? Ọ bụ n’ihi na ọ bụrụ na o mezuo nkwa ahụ nna ya kwere, ọ gaghị alụ di ma ọ bụ mụọ nwa. N’agbanyeghị nke ahụ, o cheghị na ọ bụ ọchịchọ nke ya ka mkpa. Ọ chọrọ irubere nna ya isi ma kwesị ntụkwasị obi n’ebe Jehova nọ. Ì chere na o mere Jehova na nna ya obi ụtọ?—
Ya mere, Jefta hapụrụ nwa ya nwaanyị na ndị enyi ya nwaanyị ka ha jiri ọnwa abụọ nọọ n’ugwu. Mgbe ọ lọtara, nna ya mezuru nkwa ya site n’iziga ya n’ụlọikwuu Chineke dị na Shaịlo ka ọ nọrọ ebe ahụ ná ndụ ya niile. Kwa afọ, ụmụ agbọghọ Izrel na-aga Shaịlo ịgba ada Jefta ume.
Ọ̀ dị ndị na-eto eto ị maara na-erubere ndị mụrụ ha isi ma hụ Jehova n’anya?— Ọ dị mma ka ị matakwuo ụmụaka ndị ahụ ma mere ha enyi. Ọ bụrụ na i ṅomie ada Jefta ma na-erube isi, kwesịkwa ntụkwasị obi, ị ga-enwe ezi ndị enyi. Ị ga-eme ndị mụrụ gị obi ụtọ, Jehova ga-ahụkwa gị n’anya.
Gụọ ebe ndị a na Baịbụl gị
[Ihe e dere n’ala ala peeji]
a Ọ bụrụ nwatakịrị ka ị na-agụrụ akụkọ a, akara ùhiè ndị dị n’isiokwu a na-echetara gị ka ị kwụsịtụ gbaa ya ume ka ọ zaa ajụjụ ndị ahụ.