“Ezigbo Onye Nlekọta na Ezigbo Enyi”

JOHN (JACK) BARR, bụ́ onye so n’Òtù Na-achị Isi nke Ndịàmà Jehova, jechara ozi ya n’ụwa n’ụtụtụ Satọdee Disemba 4, 2010. Ọ dị iri afọ itoolu na asaa tupu ya anwụọ. E nweela onye kpọrọ ya “ezigbo onye nlekọta na ezigbo enyi.”

A mụrụ Nwanna Jack Barr n’Abadin, nke dị na Skọtland. Ọ bụ ọdụdụ nwa n’ime ụmụ atọ nne ya na nna ya mụrụ. Nne ya na nna ya bụ Ndị Kraịst e tere mmanụ. Nwanna Barr na-ejikarị obi ụtọ ekwu banyere otú nne ya na nna ya si zụlite ya; obi dị ya ụtọ na ezigbo nne ya na nna ya setịpụụrụ ya ihe nlereanya magburu onwe ya.

Mgbe Jack gafere afọ iri, ịgwa ndị ọ na-amabughị okwu malitere isiri ya nnọọ ike. Ma, ọ gbasiri mbọ ike ka ọ kwụsị ime nke a. Otu ehihie Sọnde n’afọ 1927, mgbe ọ dị afọ iri na anọ, ọ gwara papa ya na ya chọrọ isoro ya gaa ozi ọma site n’ụlọ ruo n’ụlọ. Otú a ka o si malite. Malite ụbọchị ahụ ruo ụbọchị ọ nwụrụ, ọ nọgidere na-eji ịnụ ọkụ n’obi na-ezi ozi ọma.

Mgbe Jack dị obere, otu ihe mberede nke fọrọ obere ka ọ taa isi mama ya mere ka Jack chebara ndụ echiche. Nke a mere ka ọ rara ndụ ya nye Jehova n’afọ 1929, e meekwa ya baptizim mgbe ohere ya dapụtara n’afọ 1934. Ọ malitere ije ozi na Betel dị na Lọndọn, Ingland n’afọ 1939. Otú a ka o siri bido ozi oge niile nke o jere iri afọ asaa na otu.

N’Ọktoba 29, n’afọ 1960, Nwanna Barr banyere n’ihe ọ kpọrọ “mmekọrịta dị oké ọnụ ahịa” mgbe ọ lụrụ Mildred Willett, bụ́ onye ozi ala ọzọ ji ịnụ ọkụ n’obi jee ozi ọtụtụ afọ. Nwanna Barr na nwunye ya bụ ezi ihe nlereanya, ha nọgidekwara na-ejekọ ozi ọnụ ruo mgbe Mildred jechara ozi ya n’ụwa n’Ọktoba afọ 2004. Mgbe Nwanna Barr na nwunye ya nọ ndụ, ha na-agụkọ Baịbụl ọnụ kwa ụbọchị.

Ndị ma Jack Barr ga na-echeta ezigbo ndụmọdụ ndị sitere n’Akwụkwọ Nsọ o ji obiọma enye. Ọ na-arụsi ọrụ ike mgbe ọ nọ ndụ, ọ bụ onye nlekọta hụrụ ndị ọ na-elekọta n’anya, bụrụkwa ezigbo enyi ndị mmadụ. Otú o si aza ajụjụ n’ọmụmụ ihe, otú o si ezi ihe n’ọmụmụ ihe, nakwa otú o si ekpe ekpere gosiri na o ji eziokwu kpọrọ ihe nakwa na ya na Jehova dị n’ezigbo mma.

Ọ bụ eziokwu na anyị agaghịzi ahụ Nwanna Barr, obi dị anyị ụtọ na ọ gaala ebe ọ na-agaghị anwụ anwụ, bụ́ ihe ùgwù ọ tụsiri anya ya ike ma na-ekwukarị okwu ya. O jighị ya gwuo egwu.—1 Kọr. 15:53, 54.a

[Ihe e dere n’ala ala peeji]