Na-agha Mkpụrụ n’Ụba Kama Jiri Nghọta

¹ Onye ọrụ ugbo ọ bụla maara na ọ bụrụ na ya aghaa mkpụrụ ya n’ụba, na ya ga-eweta ihe ubi bara ụba ma eleghị anya, ma ọ bụrụ na o were aka ntagide ghaa mkpụrụ, n’ezie, ọ ga-eweta ihe dị nta n’ubi. (2 Kọr. 9:6) Ndị ọrụ ugbo na-elezi anya ka ha ghara imefusị mkpụrụ ha site n’ịgha ya n’ebe ọ na-apụghị ito. Nghọta dị otú ahụ dị mkpa mgbe anyị na-enyefe akwụkwọ anyị n’ubi. Ọchịchọ anyị bụ inyefe akwụkwọ anyị n’aka ndị nwere mmasị ịgụ ya. Anyị chọrọ inye ndị kwesịrị ekwesị ohere ịmụta banyere obiọma na-erughịrị mmadụ nke Jehova na olileanya Alaeze ahụ.

² Ị̀ na-achọpụta na magazin, broshuọ, na akwụkwọ ndị ọzọ na-atụkọba n’elu shelf dị n’ụlọ gị, ebe a pụrụ iji ha mee ka ndị kwesịrị ekwesị nọ n’ókèala unu nweta ihe ọmụma nke eziokwu? (Tụlee Matiu 25:25.) Ị̀ na-ala azụ mgbe ụfọdụ inyefe magazin ma ọ bụ akwụkwọ ọzọ na mgbe mbụ ị gara nanị n’ihi na o siiri gị ike ikwu otú e si akwado ọrụ nkwusa Alaeze ahụ? Ndị nkwusa nwere ahụmahụ achọpụtawo na ndị nwe ụlọ, bụ́ ndị nwere ekele, na-eme ihe mgbe e kwuru okwu dị mfe, nke doro anya mgbe a gwara ha otú e si eji onyinye a na-enye maka ọrụ Alaeze ahụ eme ihe.

³ Ị pụrụ ikwu, sị:

◼ “Ị pụrụ ịnọ na-eche otú anyị pụrụ isi na-enyefe akwụkwọ n’ekwughị ego ole a ga-akwụ. Ọ bụ otu akụkụ nke ọrụ izi ihe zuru ụwa ọnụ nke e ji onyinye afọ ofufo na-akwado. Ọ bụrụ na ọ ga-amasị gị inye ntakịrị onyinye maka ọrụ ahụ, obi ga-adị m nnọọ ụtọ ịnata ya.”

⁴ Ọtụtụ ndị nwe ụlọ ga-ajụ ego ole akwụkwọ ahụ bụ.

Ị pụrụ ịza sị:

◼ “A dịghị akwụ ụgwọ akwụkwọ a n’ihi na e ji onyinye afọ ofufo na-akwado ọrụ anyị. Ọ bụrụ na ọ ga-amasị gị inye ntakịrị onyinye taa, obi ga-adị anyị ụtọ ịhụ na e ji ya mee ihe n’ọrụ nkwusa ahụ zuru ụwa ọnụ.”

Ma ọ bụ ị pụrụ ikwu, sị:

◼ “Anyị na-enye ndị nile nwere mmasị ịmụtakwu banyere Bible, akwụkwọ anyị. Ọ bụrụ na ọ ga-amasị gị inye ntakịrị onyinye maka ọrụ a zuru ụwa ọnụ, ọ ga-amasị m iziga ya n’aha gị.”

⁵ N’ọrụ magazin, ndị nkwusa ụfọdụ na-egosi ime peeji nke otu magazin ma kwuo, sị:

◼ “Dị ka ị na-ahụ n’ebe a, e ji onyinye afọ ofufo na-akwado ọrụ anyị. Ọ bụrụ na ọ ga-amasị gị inye ntakịrị onyinye iji nye aka n’ọrụ a, aga m ahụ maka ya.”

Leekwa okwu ọzọ dị mfe:

◼ “Ọ bụ ezie na a na-enye akwụkwọ anyị n’ekwughị ego ole a ga-akwụ, anyị na-anabata ntakịrị onyinye maka ọrụ anyị zuru ụwa ọnụ.”

⁶ Anyị ekwesịghị ịla azụ mgbe ọ bụla n’ịgha mkpụrụ Alaeze ahụ n’ihi na ọ na-esiri anyị ike ikwu otú e si enweta ego maka ọrụ ahụ. N’otu oge ahụ, nghọta dị mkpa ka e wee ghara imefusị akwụkwọ anyị “n’ala nkume.” (Mak 4:5, 6, 16, 17) Ndị nwere ekele maka ozi ọma ahụ anyị na-ezi na-enwe obi ụtọ inwe ohere inye onyinye maka ịkwado ya n’ụzọ ihe onwunwe.—Tụlee Matiu 10:42.