Anyị Aghaghị Ịga Ugboro Ugboro
1 Ị̀ ṅara ntị mgbe mbụ mmadụ gwara gị okwu banyere ozi ọma ahụ? Ọ bụrụ na ị ṅaghị ntị, ị ghaghị inwe ekele na Ndịàmà Jehova bịara ugboro ugboro ruo mgbe i mesịrị kwere ka e duziere gị ọmụmụ Bible. Ọ dị mma ịdị na-eche banyere nke ahụ mgbe ị na-arụ ókèala e kenyere gị ugboro ugboro.
2 Ndụ ndị mmadụ na-agbanwe agbanwe mgbe nile. Ha na-eche nsogbu ma ọ bụ ọnọdụ ndị ọhụrụ ihu, na-anụ banyere ihe omume ndị na-akpata nchegbu na-eme n’ógbè ma ọ bụ n’ụwa, na-enwe ndọghachi azụ n’ụzọ akụ̀ na ụba, ma ọ bụ na-enwe ọrịa ma ọ bụ ọnwụ mmadụ n’ezinụlọ ha. Ihe ndị dị otú ahụ pụrụ ime ka ha chọọ ịmata ihe kpatara nsogbu ndị a. Anyị aghaghị ịghọta ihe ndị na-akpatara ndị mmadụ obi erughị ala ma jiri ozi na-enye nkasị obi jekwuru ha.
3 Ihe A Bụ Ọrụ Nnapụta: Chee echiche banyere ndị ọrụ nnapụta n’ebe e nwere ọdachi. Ọ bụ ezie na ụfọdụ pụrụ ịdị na-achọgharị ndị mmadụ n’ebe a na-achọta mmadụ ole na ole dị ndụ, ha adịghị adala azụ wee kwụsị n’ihi na ndị ọrụ ibe ha nọ n’ebe ọzọ na-achọta ndị dị ndụ karị. Ọrụ nnapụta anyị na-arụ akwụsịbeghị. Kwa afọ, a na-achọta ọtụtụ narị puku mmadụ ndị chọrọ ịlanarị ‘oké mkpagbu ahụ.’—Mkpu. 7:9, 14.
4 “Onye ọ bụla nke ga-akpọku aha Onyenwe anyị, a ga-azọpụta ya.” (Rom 10:13-15) Okwu ndị a kwesịrị ime ka onye ọ bụla n’ime anyị mata mkpa ọ dị ịnọgide na-eme nkwusa. Eri oge mbụ a malitere ịrụzu ókèala anyị, ụmụaka etowo ma ruo ogo ichere onwe ha echiche ugbu a banyere ọdịnihu ha na nzube nke ndụ. Ọ dịghị ụzọ anyị pụrụ isi mara onye ga-emesịa gee ntị. (Ekli. 11:6) Ọtụtụ ndị bụbu ndị mmegide anatawo eziokwu ahụ. Ọrụ anyị abụghị ikpe ndị mmadụ ikpe, kama ịnọgide na-enye ha ohere ịnụrụ na ịbụ ndị e si n’ụwa ochie a napụta. Dị ka ndị na-eso ụzọ Jisọs nke oge mbụ mere, anyị aghaghị ‘ịnọgide na-ejekwuru’ ndị mmadụ ma gbalịa ịkpali mmasị ha n’ozi Alaeze ahụ.—Mat. 10:6, 7.
5 Eziokwu ahụ bụ́ na ohere ka dịịrị anyị ime nkwusa bụ ngosipụta nke ebere Jehova. (2 Pita 3:9) Ka anyị na-enye ndị ọzọ ohere ịnụ ozi ahụ ugboro ugboro, anyị na-eme ka ịhụnanya Chineke pụta ìhè, n’ụzọ dịkwa otú a anyị na-enye ya otuto.